Read Southern Kisi Chɛ̄lūīma̍yā 46 Bible Online

Chɛ̄lūīma̍yā 46 - Southern Kisi bible

Chɛ̄lūīma̍yā 46

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍ yōōŋgūla̍ŋ le̍ lɛ̄ŋnde̍ o̍ chi̍e̍ēŋndo̍ ni᷄ŋ.

²Yōōŋgū o̍ ke̍ ya̍ a̍ a̍ I̍chi̍pī o̍kɔ̄ɔ̄ wo̍ ndu̍ cho̍ ho̍ō ni̍. Mi̍ Mɛ̄lɛ̄ka̍ Ya̍a̍wɛ̄ɛ̄, o̍ ke᷅ ya̍ yōōŋgōo̍ le̍ pūa̍a̍ chɔ̄ūwa̍ I̍chi̍pī, Māsāa̍ Ni̍kō, o̍ wa̍ I̍chi̍pī wo̍ pūa̍a̍ ndūa̍a̍ chɔ̄ūwa̍. Kāāchɛ̄mi̍sī chi̍e̍e̍ o̍ Pēē Bɛ̍ndōo̍ Yūfi̍lu̍a̍tīī hōlnɔ᷄ŋndo̍ pūa̍a̍ chɔ̄ūwa̍ ha̍ā ā wa̍ īchāli̍ ni̍. Kɛ̍ mi̍ Nābi̍u̍kānɛ̍ɛ̍sā, māsāa̍ le̍ Ba̍bi̍lɔ̄ŋ o̍ sɔ̍ŋgā a̍ pūa̍a̍ chɔ̄ūwa̍ ha̍ā mbo̍ yām nda̍. Wɔ̄sī Chɛ̄hōwa̍kīm, po̍ Chōōsa̍yā wo̍ ō chīŋā wɔ̄sīla̍ŋ lā hīɔ̍ɔ̍lu̍ o̍ lēmāsā Chu̍dā wo̍, wɔ̄sī kōŋ sūɛ̍i̍ he̍ī ī yɔ̄nu̍ŋ ni̍. Yōōŋgu̍ Mɛ̄lɛ̄ka̍ ke̍ ya̍ a̍ pūa̍a̍ chɔ̄ūwa̍ ha̍ā o̍kɔ̄ɔ̄ māā ya̍ I̍ di̍mi̍ wo̍ cho̍ ho̍ō ni̍, āā,

³“Lā bɛ̄ɛ̄ndi̍a̍a̍ nyɛ̍lā nyāla̍ ka̍lā ka̍lāla̍ cho̍ māā bōo̍la̍ bɛ̍ndu̍ le̍ nya̍ māndāa̍ o̍ chɔ̄ūwo̍ ni᷄ŋ, lā bɛ̄ndū ni̍, lā pɔ̄mbɔ̄ ni̍, mī lā fūla̍ le̍ sɔ̍ŋgɔ̄ɔ̍.

⁴Nya̍ pūa̍a̍ sɔ̍ŋgā o̍ su̍a̍a̍ chōo̍ wa̍, lā bɛ̄ɛ̄ndi̍a̍a̍ su̍a̍ā nyāa̍ chɔ̄ūwa̍, mī lā he᷄l lēchōo̍. Lā wōūnu̍ŋ mɔ̍si̍lta̍ nyāla̍ chɔ̄ūla̍ŋ mī wānā o̍ wānā si̍m o̍ fo̍ndā o̍ nɔ̍ le̍ si᷄mnda̍ŋndo̍ le̍ sɔ̍ŋgɔ̄ɔ̍. Lā yīkpa̍ ba̍lta̍ nyāla̍ŋ mī lā lūɛ̄ī ŋɛ̍lɛ̍ ŋɛ̍lɛ̍. Lā wōūnu̍ŋ wo̍lɔ̄ɔ̄lā nyāla̍ chɔ̄ūla̍ŋ kpo̍u̍.”

⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Kɛ̍ ndu̍yɛ̍ nyɛ̄ ya̍ I̍ cho̍ chɔ̄ɔ̍ mbo̍ wā yɔ̄nɔ᷄ŋndo̍ wo̍ ndu̍ cho̍ ho̍ō ni̍. Sīōōŋīī bɛ̄ndūe̍i̍ ī bīī pūa̍a̍ I̍chi̍pī ma̍ wā mīīŋgōo̍ a̍ kīlta̍ŋ. Ya̍a̍mɔ̍ɔ̍wa̍ yēm ku̍u̍ba̍a̍ ndāa̍. Ā chō kīlta̍ŋ kpe̍e̍kpe̍i̍ tōfa᷄ŋ bɛ̍ɛ̍ ā cho̍ a̍ mākɔ̄ɔ̄ le̍. Sīōōŋīī bɛ̄ndūe̍i̍ chō nda̍ ī bīyāā.

⁶Pūa̍a̍ nyāānūŋ nya̍a̍nɔ᷄ŋ bɛ̍ndōo̍ nda̍ tɛ̄ɛ̄ŋ nda̍ bɛ̍ɛ̍, ā nɔ̍lā mā hɛ̄lu̍ŋ te̍. Ku̍u̍ba̍a̍ ndāa̍ bɛ̍ɛ̄ ā he̍lūŋ te̍. Ā chō bā lūāŋndo̍ o̍ Pēē Bɛ̍ndōo̍ Yūfi̍lu̍a̍tīī hōlnɔ᷄ŋndo̍, ā chō kīlta̍ŋ a̍ bōŋī bōŋīo̍o̍ mā dēlī.

⁷Lɛ̄ŋnde̍ kūɛ̍ɛ̍nɛ̍ le̍ cho̍ yɛ̄ chōo̍ ho̍ō, le̍ he̍l le᷅ŋ mɛ̄ɛ̍ mɛ̄ŋnda̍ŋ o̍ Pīo̍o̍ Na̍īl ma̍ nɔ̍ hūnɔ̄ɔ̍ nu̍a̍ā mī mā tīu̍ bā o̍ bā fe̍e̍ yɛ̍ le̍ŋ. Lɛ̄ŋndē I̍chi̍pīle̍ŋ le̍ŋ le̍ cho̍ chō kōŋ ni̍. Le̍ŋ le̍ ke̍lū yōŋgāa̍ ni̍ māā lē nɔ̄lā mī lē kūmbū lɛ̄ŋnde̍ ī pīlɛ̍i̍ kpo̍u̍, ī tɛ̄ɛ̄mbu̍u̍ chi̍o̍o̍ŋ o̍ lɛ̄ŋnde̍ ni᷄ŋ a̍ wānā o̍ wāna̍ cho̍ lēni᷄ŋ.

⁸Lɛ̄ŋndē I̍chi̍pīle̍ŋ le̍ŋ le̍ he̍e̍lu̍ŋ he̍e̍lɔ᷄ŋ bɛ̍ndū kōŋ ni̍, mɛ̄ɛ̍ mɛ̄ŋnda̍ŋ o̍ Pīo̍o̍ Na̍īl ma̍ nɔ̍ nu̍a̍ā hūnɔ̄ɔ̍ bɛ̄ndōo̍ mī mā tīu̍ bā o̍ bā fe̍e̍ yɛ̍. Le̍ŋ le̍ ke̍lū yōŋgāa̍ ni̍ mi̍ lē dīmī māā, i̍ nɔ̍lā mī kūūmbu̍ŋ lɛ᷅ŋnde̍ ī pīlɛ̍i̍ chōo̍ ndu̍yɛ̍ mī I̍ tɛ̍ɛ̍mbu̍u̍ chi̍o̍o̍ŋ o̍ lɛ̄ŋnde̍ ni᷄ŋ a̍ wānā o̍ wāna̍ cho̍ lēni᷄ŋ.

⁹Pūa̍a̍ I̍chi̍pī, nya̍ sɔ̍ŋgā o̍ sūa̍a̍ chōo̍ wa̍, lā kɔ̍ le̍ lɛ̄ŋnde̍ nde᷅ŋ chīŋa̍la᷅ŋndo̍. Nya̍ sɔ̍ŋgā o̍ nyɛ̄lā nyāāna᷄ŋnda̍ su̍a̍a̍ ā nāŋ nda̍ŋ ni᷄ŋ nda̍, lā nyāānu̍ŋ a̍ la̍ŋ kpe̍e̍kpe̍i̍ mī lā kɔ̍ de᷅l lɛ̄ŋnde̍ chōo̍. Lā kɔ̍ la̍tu̍lu̍ a̍ chāāŋāā nyāā ku̍u̍ba̍a̍ Īto̍o̍pīāā, a̍ ha̍ā Li̍bīāā, a̍ sɔ̍ŋgā a̍ nyɛ̄la̍ cho̍ māā bōo̍la̍ bɛ̍ndū wa̍, Lā kɔ̍ la̍tu̍lu̍ a̍ pūa̍a̍ Li̍dīāā, a̍ cha̍ā sɔ̍ŋgɔ̄ɔ̍ chāā bɛ̄ndōo̍ a̍ chīɔ̄ūla̍ŋ nda̍.”

¹⁰Kɛ̍ ndu̍yɛ̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ nɔ̍ kpāāyāa̍ kpo̍u̍ wo̍, pāa̍le̍ ndɔ̄le̍ŋ lē chō o̍ nɛ̄ī, pāa̍le̍ o̍ mi̍ŋgī ni̍ŋ ma̍a̍ le̍ŋ, pāa̍le̍ o̍ tu̍sī ni̍ŋ ya̍a̍mɔ̍ɔ̍wa̍a̍ ndūa̍a̍ nyɛ̄ pālāa̍ chōo̍ mbō mīŋgu̍l nda̍ māa̍ le̍ŋ. Pa̍a̍le̍ le̍ŋ, mūɛ̄ī ndūɛ̍i̍ fāŋnde̍ ī dīū ni̍ŋ wa᷅ŋndā chi̍e̍e̍ te̍i̍ mī ī sāŋga̍ a̍ dīyɔ̄ɔ̍. Ī sōlī ni̍ŋ ko̍o̍ma̍ wāŋndā chīe̍e̍ya̍ te̍i̍ mī ī dīū wa᷅ŋ a̍ kōo̍wa̍ŋ. Kāni̍ fo̍ndōle̍, pa̍a̍le̍ le̍ŋ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, Mɛ̄lɛ̄ka̍ Kpu̍lu̍ŋgūma̍ bɛ̄ndōo̍ ō sōlī ni̍ŋ ya̍a̍mɔ̍ɔ̍wa̍a̍ ndūa̍a̍ sa̍lāa̍ o̍ lɛ̄ŋnde̍ŋ bā lūāŋndo̍, o̍ Pīo̍o̍ Yūfi̍lu̍a̍tīī hōlnɔ᷄ŋndo̍ ni̍.

¹¹Wāŋnda̍ I̍chi̍pī, lā he᷄l Ki̍li̍a̍a̍dī chi̍e̍e̍ mī lā kɔ̍ nu̍u̍wā kōo̍wa̍ŋ mī lā chīɔ̄ūnu̍ŋ. Kɛ̍ ndu̍yɛ̍ mɛ̄ɛ̍ mɛ̄ɛ̍ nya̍ dīŋa̍ŋ ko̍o̍wa̍ŋ ni᷄ŋ, fo̍ndō fu̍u̍ ko̍ni̍, mākōŋgo̍ o̍ mākōŋgo̍ ma̍ cho̍ mī mā sīŋgi̍ nya̍ le̍.

¹²Lɛ̄ŋnde̍ kpo̍u̍ I̍ chō hūnɔ̄ɔ̄ tūēīyɔ̄ɔ̄ a̍ si̍ɔ̍mbu̍la̍ bɛ᷅ŋnda̍ bi̍ī nya̍ ni̍ŋ nda̍ŋ o̍kɔ̄ɔ̄. Cha᷄ŋnda̍ nya̍ wā ni̍ŋ nda̍ŋ lā chō hūnɔ̄ɔ̄ tīū o̍ chi̍e̍ēŋndo̍ ni᷄ŋ kpo̍u̍. Ku̍u̍ba̍a̍ nyāa̍ nda̍ pi̍la̍ ā wā ni̍ŋ ke̍īyo̍ kūndi̍āŋndo̍ mā dēl di̍ōm pi̍lɛ̍ a̍ sīōōŋīī bɛ̄ndūi̍ bi̍ī ni̍ŋ nda̍ ve̍.

¹³Bōōndi̍i̍ Nābi̍u̍kānɛ̍ɛ̍sā māsā bɛ̍ndōo̍ Ba̍bi̍lɔ̄ŋ o̍ bɛ̍ɛ̍ndi̍a̍ŋ le̍ lɛ̄ŋndē I̍chi̍pīle̍ŋ chīŋa̍la᷅ŋndo̍ a̍ sɔ̍ŋgɔ̄ɔ̍ ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍ yōōŋgōo̍ a̍ hūnɔ̄ɔ̍ Nābi̍u̍kānɛ̍ɛ̍sā wo̍ o̍kɔ̄ɔ̄. Mbo̍ dīmūl la̍ āā,

¹⁴“Yo̍nda̍ yo̍o̍ŋgōo̍ ho̍ō I̍chi̍pī, o̍ chi̍o̍o̍ŋ mu᷅ŋ, mu̍ŋ yɔ̍nūŋ ni̍ māā Mi̍ki̍dɔ̄ɔ̄ a̍ Mɛ̍mfi̍sī, a̍ Tāpāni̍hɛ̍sī. Di̍mu̍l nda̍ māā, lā bɛ̄ɛ̄ndi̍a̍ŋ ndu̍yɛ̍ mī lā si᷄m o̍ fo̍ndāŋndā nyāla̍ŋ le̍ sɔ̍ŋgɔ̍ɔ̍. Lɛ̄ŋīi̍ ba̍lu̍ nya̍ ve̍ kpo̍u̍, ya̍a̍mɔ̍ɔ̍wa̍ chō ndi̍ hūnɔ̄ɔ̄ tɛ̄ɛ̄mbūū.

¹⁵Wāŋnda̍ I̍chi̍pī, vɛ᷅ mi̍ A̍ pi̍sī, mɛ̄lɛ̄ka̍ nyāa̍ ō dēl? Vɛ᷅, nāū nya̍ nya̍ sōōlūū māā mɛ̄lɛ̄ka̍ nyā wo̍ ō nɔ̍lā mbō si᷄m te̍? Ō nɔ̍lā mbō si᷄m kpo̍so̍ŋ te̍, kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ nyi̍ndū ndu̍ mbo̍ dēl.

¹⁶So̍vɛ̄i̍ya̍a̍ nyāa̍ ā chō kīlta̍ŋ kpe̍e̍kpe̍i̍, ā chō bōŋī bōŋīo̍o̍ mā dēlī dēlī, o̍ de᷅l ko̍ cha᷄ŋ ndɔ̄ di̍mūl ndu̍ māā, ke̍le̍ŋa̍ chɔ̍ŋ chɔ̍ chɔ̍ ŋ̄ mīīŋgu᷅ŋ o̍ lɛ̄ŋndē nāāle̍ŋ ni᷄ŋ, nāa̍ nda̍ vēlū na̍a̍ wa̍, o̍ wānāā nāa̍ lo̍. Ŋ̄ nyāānu̍ŋ mī ŋ̄ hɛ̄lu᷄ŋ ya̍a̍mɔ̍ɔ̍wa̍ ha̍ā, yɔ̄ŋi̍ nda̍ dīu̍ na̍a̍ a̍ mɔ̄ɔ̄ŋ nda̍ŋ fāŋndo̍ŋ.”

¹⁷“Wāŋnda̍ chō hūnɔ̄ɔ̄ īsɔ̄ɔ̍ a̍ māsāa̍ I̍chi̍pī o̍kɔ̄ɔ̄, mā dīmi̍ āā, ‘Mbɔ̄ bɔ̄ɔ̄lūū fo̍ndō fu̍u̍ ko̍ o̍ cho̍ ni̍. Te̍le̍ŋ ndu̍ o̍o̍ nɔ̍ mī ndu̍ o̍o̍ to̍sa̍ nyɛ̄ wo̍, ō tōsa̍ nyɛ᷅ o̍ nyɛ̄ a̍ te̍le̍ŋ ko̍ŋ te̍.’

¹⁸Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, o̍ cho̍ māsāa̍ le̍ Chi̍e̍ēŋndo̍ wo̍ ō dīmi̍ māā, ya̍ Mɛ̄lɛ̄ka̍ I̍ te̍ŋnu᷄ŋ, I̍ cho̍ wāŋndo̍ vīōmɔ̄ɔ̄ mbō hu᷄ŋ chi᷅ŋa̍la᷅ŋ lɛ᷅ŋndē I̍chi̍pīle̍ŋ a̍ sɔ̍ŋgɔ̍ɔ̍. Wānā ko̍ŋ mɛ̄ɛ̍ Pēmbīī Ta̍bɔ̄ɔ̄ve̍ ī bāndu̍ nu̍a̍ā mi̍ ī hīāū pēmbo᷄ŋ ŋ̄ pūm yɛ̍, le̍nde̍ o̍ hi̍a̍ū ni̍ŋ nya̍ ni̍. Mɛ̄ɛ̍ Pēmbīī Ka̍mɛ̄lve̍ ī chō nu̍a̍ā o̍ Pēe̍ Mɛ̄ŋmā Īhɛ᷄llo̍ chōo̍ mi̍ Pēe̍ Mɛ̄ŋmā Īhɛ᷄llo̍ ō wā lēbɛ̄ŋgu̍ pɔ̍ pɔ̍ yɛ̍, le̍nde̍ nya̍ wā ni̍ŋ a̍ ndu̍ ni̍.

¹⁹Wāŋnda̍ I̍chi̍pī, lā tōōsi̍a̍a̍ wo̍lɔ̄ɔ̄lā nyāla̍ŋ mī lā bɛ̄ɛ̄ndi̍a̍ŋ le̍ kɔ̄la̍ŋ o̍ chɛ̄le̍ŋ ni̍ŋ. Kāni̍ fo̍ndōle̍, ya̍a̍mɔ̍ɔ̍wa̍ chō hūnɔ̄ɔ̄ Mɛ̍mfi̍si̍ tɛ̄ɛ̄mbūū mbō sīmnu᷄ŋ pɔ᷅mndo̍. Mɛ̍mfi̍sī cho̍ hūnɔ̄ɔ̄ sīmnɔ᷄ŋ māā po̍l, nāa̍ wāna̍ chi̍e̍e̍ o̍ wāna̍ chi̍e̍e̍ o̍ che᷅l te̍ wa̍.

²⁰I̍chi̍pī o̍ chō māchūāā mɛ̄ɛ̍ nāū fɔ̍ŋndɔ̍ kɛ̍ndɛ̄ kɛ̍ndɔ̄ɔ̍ ō wā nu̍a̍ā yɛ̍. Kɛ̍ pūa̍a̍ chɔ̄ūwa̍ chō fūlā bā lūāŋndo̍ mā hu᷄ŋ chi᷅ŋa̍la᷅ŋ ndu̍ mɛ̄ɛ̍ yɔ̍lu̍a̍a̍ bɛ̍ndūa̍a̍ ā lāālū nu̍a̍ā nāūwo̍ a̍ ndu̍ kīsī kīsīo̍o̍ yɛ̍.

²¹So̍vɛ̄i̍ya̍a̍ o̍ hi̍o̍ū kɔ̄ɔ̄lī, le̍ ndu̍ sɔ̍ŋgɔ̄ɔ̍ mālāa̍ wa̍, mɛ̄ɛ̍ nāūwāā chēlu̍lɛ̍i̍ya̍a̍ bɛ̍ndūa̍a̍ ā wā nu̍a̍ā, kɔ̄la̍ŋ bɛ̍ɛ̍ ā nɔ̍lā la̍ŋ te̍ yɛ̍, le̍nde̍ nda̍ yɔ̄nu̍ŋ ni̍. Nda̍ kpo̍u̍ ā mūli̍ŋ ma̍ nyāānu̍ŋ, ā nɔ̄la̍ mā sīmu̍l ya̍a̍mɔ̍ɔ̍wa̍ le̍. Pāa̍le̍ kpūndɛ̍ lē bɛ̄ŋnde̍ŋ lē fūūlu̍u̍ le̍ nda̍. Pāa̍le̍ nda̍ tɛ̄ɛ̄mbūū nda̍ le̍ŋ lē fūūlu̍u̍.

²²Wāŋnda̍ I̍chi̍pī a̍ cho̍ nyāānɔ᷄ŋndo̍ kpe̍e̍kpe̍i̍, mɛ̄ɛ̍ kɛ̄ūwo̍ ō wōōlū nu̍a̍ā a̍ wāŋnda̍ mbō mūli̍ŋ mbō tīmbi̍ pi̍li̍li̍ yɛ̍, le̍nde̍ nda̍ chō ya̍a̍mɔ̍ɔ̍wa̍a̍ ndāa̍ nyāānɔ᷄ŋndo̍ ni̍, fo̍ndōle̍ ya̍a̍mɔ̍ɔ̍wa̍ chō ni᷅ŋ nda̍ fi̍ɔ̍ɔ̍ fi̍ɔ̍ɔ̍. Ya̍a̍mɔ̍ɔ̍wa̍ chō hūnɔ̄ɔ̍ a̍ chōo̍ŋ o̍ lābā le̍ nda̍ chīŋa̍la᷅ŋndo̍ a̍ mu̍ŋ, mɛ̄ɛ̍ wāŋnda̍ ā chīŋa̍la᷅ŋ nu̍a̍ā yɔ̄mnde̍ le̍ ndi̍ kīīŋūūwo̍ yɛ̍.

²³Mɛ̄ɛ̍ wāŋnda̍ ā chīŋa̍la᷅ŋ nu̍a̍ā būndɔ̍ɔ̍ a̍ chi̍o̍o̍ŋ mā pɛ̄l ndu̍ yɛ̍, le̍nde̍ nda̍ chō nda̍ chīŋa̍la᷅ŋ ni̍. So̍vɛ̄i̍ya̍a̍ ya̍a̍mɔ̍ɔ̍wa̍a̍ ndāa̍ cho̍ nda̍ hūnɔ̄ɔ̍ chīŋa̍la᷅ŋndo̍ wa̍, ā hīōū mɛ̄ɛ̍ so̍o̍nu̍a̍a̍ ā wā nu̍a̍ā ku̍ndā bɛ̄ndōo̍ ā chu̍ū chɔ᷅m te̍ yɛ̍. Ā wā nu̍a̍ā yɛ̍.

²⁴Si̍ɔ̍mbu̍la̍ bɛ̄ndūla̍ŋ lā chō hūnɔ̄ɔ̄ wāŋnda̍ I̍chi̍pi̍ bīyɔ̄ɔ̄. I̍chi̍pī cho̍ hūnɔ̄ɔ̄ wā ō mālāā pūa̍a̍ cho̍ o̍ lɛ̄ŋnde̍ cho̍ bā lūāŋndo̍ le̍ŋ nda̍ o̍ bā.”

²⁵Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ wo̍, ō dīmi̍ āā, “A̍mɔ̄ŋ, mɛ̄lɛ̄ka̍ wāŋnda̍ o̍ chi̍e̍e̍ bɛ̍ndōo̍ Ti̍bi̍sī a̍ pi̍ɛ̍īyo̍ ni̍, a̍ mɛ̄lɛ̄ka̍a̍ pīli̍a̍a̍ kpo̍u̍ I̍chi̍pī, ndu̍yɛ̍ a̍ lɛ̄ŋnde̍ I̍chi̍pīle̍ŋ kpo̍u̍, I̍ cho̍ ndā nyɛ̄ pālāa̍ tūsī chōo̍. Māsā bɛ̍ndōo̍ I̍chi̍pī ni̍, a̍ wāŋ bɛ̄ndūāā lēlɛ̄ŋnda̍ ā pīli̍a̍a̍, ndu̍yɛ̍ a̍ wānā o̍ wāna̍ dɔ̍ū tīīnda᷄ŋndo̍ o̍ nda̍ ni᷄ŋ, I̍ cho̍ nda̍ nyɛ̄ pālāā bɛ̄ndōo̍ tūsī chōo̍.

²⁶I̍ cho̍ nda̍ mālɔ̄ɔ̄ ya̍a̍mɔ̍ɔ̍wa̍a̍ ndāa̍ o̍ bā, a̍ cho̍ kīndīo̍o̍ le̍ nda̍ dīūwo̍ wa̍, nda̍ yɔ̍nūŋ māā Nābi̍u̍kānɛ̍ɛ̍sā, māsāa̍ le̍ Ba̍bi̍lɔ̄ŋ nda̍ pūa̍a̍ ndūa̍a̍ chɔ̄ūwa̍ ni̍. Kɛ̍ ndu̍yɛ̍ te̍le̍ŋ cho̍ vɛ̄lɛ̄ fūūlūū, I̍ cho̍ tōsā mī wāŋndā chīe̍e̍ya̍ ā mīīŋgu̍ vɛ̄lɛ̄ I̍chi̍pī mā cha᷄l lo̍ŋ māā pāāndū. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”

²⁷Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Kɛ̍ nya̍ fu̍la̍ o̍ pūlāle̍ bu̍ɛ̍ī nūu̍ Che̍kɔ̍pūle̍ŋ chōo̍ wa̍, lā yɔ᷅ŋ īsīōōŋ te̍. Lā ta̍mbū kɔ̄l te̍, nya̍ wāŋnda̍ I̍sɔ̄lūɛ̄ī. I̍ cho̍ nya̍ chīīndīāā mī so̍li̍ nya̍ o̍ lɛ̄ŋndē sūmīāltē lēŋ ni᷄ŋ. Wānāa̍ fu̍la̍ o̍ pūlāle̍ nyāle̍ŋ chōo̍ wa̍ ā chō hūnɔ̄ɔ̄ fūlā o̍ chɛ̄lē nda̍ cho̍ ni᷄ŋ nde̍ŋ ni᷄ŋ mā mīīŋgu̍ o̍ lɛ̄ŋndē ndāle̍ŋ ni̍ŋ. Yu̍ŋgu̍ Che̍kɔ̍pū wo̍, ā chō hūnɔ̄ɔ̄ mīīŋgū o̍ lɛ̄ŋndē nda̍le̍ŋ ni̍ŋ ndu̍yɛ̍ mā wānu̍ŋ a̍ kɔ̄l nyūlū, o̍ ko̍ŋ kɔ̍ɔ̍lī, mā wānu̍ŋ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍, wānā o̍ wānā to̍sā ni̍ŋ mī sīōōŋīī bīī nda̍ le̍.

²⁸Le̍la̍ŋ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍. Lā yɔ᷅ŋ īsīōōŋ te̍ nya̍ yu̍ŋgu̍ bu̍ɛ̍ī nūu̍ Che̍kɔ̍pū wo̍, fo̍ndōle̍ ya̍ Mɛ̍lɛ̄ka̍ Ya̍a̍wɛ̄ɛ̄ chō a̍ nya̍ hɔ̍lāā tūlu̍. Lɛ̄ŋīī ya̍ I̍ to̍sa̍ mi̍ lā sɛ̄ŋi᷄ŋ ni̍ŋ nde̍ kpo̍u̍, I̍ cho̍ ndi̍ hūnɔ̄ɔ̄ tɛ̄ɛ̄mbūū. Kɛ̍ nya̍ nya̍ I̍ chi̍ī ni̍ŋ nya̍ tɛ̄ɛ̄mbūū le̍. Le̍ yɔ̄ŋ wɔ̄ɔ̍ŋ nya̍ tōsa̍ wo̍, I̍ cho̍ nya̍ nyɛ̄ pālāa̍ tūsī chōo̍ le̍ mī si̍la̍ nya̍. I̍ me᷅l nya̍ le̍ nyɛ̄ nya̍ tōsa̍ wo̍ mī kɛ̍ɛ̍ nya̍ nyɛ̄ pālāa̍ tūsī chōo̍ le̍. Kɛ̍ ndu̍yɛ̍ tē I̍ wa̍ nya̍ nyɛ̄ pālāa̍ tūsī chōo̍ pɛ̍, I̍ cho̍ ndi̍ tōsā o̍ nɛ̄ī sa̍kpōo̍ chōo̍.”