Read Southern Kisi Chɛ̄lūīma̍yā 47 Bible Online

Chɛ̄lūīma̍yā 47 - Southern Kisi bible

Chɛ̄lūīma̍yā 47

¹Lɔ̍ɔ̍ pa̍ mi̍ māsā bɛ̍ndōo̍ I̍chi̍pī o̍ chi᷅ŋa̍la᷅ŋ Ka̍a̍sā, chi̍e̍e̍ Fīli̍i̍tīāŋnda̍ a̍ sɔ̍ŋgɔ̄ɔ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍ chūa̍, mbo̍ kē ya̍ yōōŋgōo̍ a̍ lɛ̄ŋndē Fīli̍i̍tīāŋnde̍ŋ o̍kɔ̄ɔ̄.[7]

²Yōōŋgū Mɛ̄lɛ̄ka̍ Ya̍a̍wɛ̄ɛ̄ o̍ ke̍ ya̍ wo̍ cho̍ ho̍ō ni̍. Mbo̍ dīmī āā, “Ya̍a̍mɔ̍ɔ̍wa̍ ā chūūŋgi̍āŋ ba᷅ lūāŋndo̍ mɛ̄ɛ̍ mɛ̄ŋmā hūna᷄ŋ mā chūūŋgi̍āŋ nu̍a̍ā yɛ̍. Ā chō hūnɔ̄ɔ̄ a̍ kpāāyā bɛ̍ndōo̍ mɛ̄ɛ̍ tīndi̍le̍ kpāāyāle̍ bɛ̍ndūle̍ŋ lē wā nu̍a̍ā hīōūwɔ̄ɔ̍ yɛ̍. Ā chō hūnɔ̄ɔ̄ lɛ̄ŋndē Fīli̍i̍tīāā le̍ŋ chūā kpo̍u̍ a̍ nyɛ̄ o̍ nyɛ̍ cho̍ lēni᷄ŋ. Chi̍e̍e̍ŋ bɛ̍ndo̍ŋ kpo̍u̍ ŋ̄ chō hūnɔ̄ɔ̄ lō, lātūlu̍ a̍ wānā o̍ wāna̍ cho̍ lēni᷄ŋ. Wānāā o̍ wāna̍ cho̍ o̍ lɛ̄ŋndē lēŋ ni᷄ŋ, ā wā ni̍ŋ cha̍ŋnda̍ŋ kpe̍e̍kpe̍i̍ le̍ wāna̍ ma̍lā nda̍ wo̍. Wānā o̍ wāna̍ o̍ wa᷅ ni̍ŋ cha̍ŋ īmɔ̍nɔ̍ɔ̍.

³Hūnɔ̄ɔ̄ ya̍a̍mɔ̍ɔ̍wa̍a̍ ha̍ā ā wā ni̍ŋ o̍ su̍a̍ā chɔ̄ūwa̍ chōo̍ a̍ o̍ nyɛ̄lā nyāāna᷄ŋ nda̍ su̍a̍a̍ ā nāŋ nda̍ŋ ni᷄ŋ ndo̍, īkūbū kūbūī su̍a̍ā ndāa̍ ā wā ni̍ŋ nde̍, a̍ hūnɔ̄ɔ̄ nyɛ̄lā lāŋ lā wā ni̍ŋ a̍ īdi̍kī dīkīe̍i̍, a̍ īwōku̍ wo̍ku̍i̍i̍ la̍ wa᷅ ni̍ŋ nde̍, sīōōŋīī bɛ̄ndūe̍i̍ chō wāŋnda̍ bīyɔ̄ɔ̄ mā nyāānu̍ŋ. Fi̍nyāa̍ bɛ̍ɛ̍ ā wā ni̍ŋ ki᷅lta̍ŋ, ā nɔ̍lā ni̍ŋ mā mūli̍ŋ mā tōfa̍ŋ chu̍a̍ā ndāa̍ a̍ mākɔ̄ɔ̄ le̍, ā nɔ᷅ ni̍ŋ kpāāyā o̍ kpāāyāā mā nɔ̍la̍ mā māla̍ nda̍ le̍.

⁴Kāni̍ fo̍ndōle̍ te̍le̍ŋ ya̍ I̍ hi᷅ŋ wāŋnda̍ Fīli̍i̍tīāā kpo̍u̍ tɛ̍ɛ̍mbūū wo̍ o̍ fūūlu̍u̍. Wānā o̍ wāna̍ cho̍ Ta̍a̍yā chi̍e̍e̍ a̍ Sa̍i̍dɔ̄ŋ chi̍e̍e̍, ma̍ wā wāŋnda̍ Fīli̍i̍tīa̍a̍ mālāa̍, te̍le̍ŋ ya̍ I̍ hi᷅ŋ nda̍ tɛ̄ɛ̄mbūū kpo̍u̍ wo̍ ō fūūlu̍u̍. Ya̍ Mɛ̍lɛ̄ka̍ Ya̍a̍wɛ̄ɛ̄, te̍le̍ŋ ya̍ I̍ hi᷅ŋ wāŋnda̍ Fīli̍i̍tīa̍a̍ tɛ̄ɛ̄mbūūwo̍ cho̍ ho̍ō ni̍, nda̍ yɔ̍nūŋ ni̍, māā Fīli̍i̍tīāŋāa̍ tūa̍a̍ lo̍ ha̍ā yōōmū ma̍ wā Ki̍le̍tī chi̍e̍e̍ ō Pēe̍ Mɛ̄ŋmā Īhɛ᷄llo̍ hōlnɔ᷄ŋndo̍ wa̍.

⁵Dɛ̍nɛ̍ pālāā bɛ̄ndōo̍ chō hūnɔ̄ɔ̄ wāŋnda̍ Ka̍a̍sā chi̍e̍e̍ to̍lɔ̄ɔ̄ chōo̍, mā sēndi̍ yu̍ŋgu̍lta̍ŋ, le̍ kɔ̄l ndā ta̍mbɛ̍i̍yo̍ chɔ̄mndo̍. Wāŋnda̍ A̍si̍kɛ̍lɔ̄ŋ chi̍e̍e̍ a̍ cho̍ hūnɔ̄ɔ̄ mēī kpu᷅li̍, ā nɔ̍lā ni̍ŋ mā sōō ba̍kō le̍, a̍ nyɛ̄ pālāa̍ wa᷅ nda̍ ni̍ŋ cho̍o̍ wo̍. O̍o̍ wāŋnda̍ Fīli̍i̍tīāā, nya̍ wānā tūa̍a̍ lo̍ ha̍ā yōōmū wa̍, bāā lā sāŋga̍ wɔ̍ a̍ dīāllūŋ nya᷄ŋ tɛ̄ɛ̄ndīa̍a̍, le̍ kɔ̄l nyā ta̍mbɛ̍i̍yo̍ chɔ̄mndo̍ le̍?

⁶I̍ cho̍ nya̍ tūēīyɔ̄ɔ̍ cha᷄ŋnda̍ŋ mī lā dīmī māā, kpo̍o̍ mūɛ̄ī fāŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ he̍ī! Mɛ̄ɛ̍ a̍ cho̍ wɔ̍ pɛ̍ŋgī a̍ na̍a̍ tɛ̄ɛ̄mbūūwo̍ le̍? Mi̍i̍ŋgu̍ ni᷅ŋ o̍ bōo̍ ni᷄ŋ mā pɛ̍ pɛ̍ŋgi̍ wɔ̍ ni᷅ŋ fɔ̍?

⁷Kɛ̍ ndu̍yɛ̍ vɛ̄ɛ̍nɛ̍ I̍ nɔ̍lā yɛ̍ mī ī pɛ̄ŋgi̍, ya̍ Mɛ̍lɛ̄ka̍ Ya̍a̍wɛ̄ɛ̄ ke̍ ndi̍ wa̍llo̍ le̍ tōsāa̍? Ī nɔ̍lā mī ī pɛ̄ŋgi̍ le̍. Ya̍ Mɛ̍lɛ̄ka̍ vēm ndi̍ le̍ mī ī chīŋa̍la᷅ŋ wa᷅ŋnda̍ A̍si̍kɛ̍lɔ̄ŋ, ndu̍yɛ̍ a̍ wānāa̍ cho̍ o̍ Pēe̍ Mɛ̄ŋmā Īhɛ᷄llo̍ hōlnɔ᷄ŋndo̍ o̍ lɛ̄ŋnde̍ŋ nde᷅ŋ ni᷄ŋ nda̍.”