Read Southern Kisi Chɛ̄lūīma̍yā 48 Bible Online

Chɛ̄lūīma̍yā 48 - Southern Kisi bible

Chɛ̄lūīma̍yā 48

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ kē ya̍ yōōŋgōo̍ a̍ lɛ̄ŋndē Mo̍wa̍bīle̍ŋ o̍kɔ̄ɔ̄. Nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō dīmi̍ a̍ lɛ̄ŋndē Mo̍wa̍bīle̍ŋ o̍kɔ̄ɔ̄ wo̍ cho̍ ho̍ō ni̍. Mbo̍ dīmī āā, “Dɛ̍nɛ̍ pa̍lāā bɛ̄ndōo̍ ō chō le̍ wāŋnda̍ Ni̍bɔ̄ chi̍e̍e̍, fo̍ndōle̍, chi̍e̍e̍ ndāa̍ chō hūnɔ̄ɔ̄ tāmbu̍ mbō lo̍ pɔ̄m. Si̍ɔ̍mbu̍la̍ bɛ̄ndūla̍ŋ lā chō hūnɔ̄ɔ̄ wāŋnda̍ Kīlīa̍a̍tīm chi̍e̍e̍ bi̍yɔ̄ɔ̄, fo̍ndōle̍ ya̍a̍mɔ̍ɔ̍wa̍ chō hūnɔ̄ɔ̄ chi̍e̍e̍ ndāa̍ dēlɔ̄ɔ̄ chōo̍ mā bīī ndu̍. Fo̍ndāŋndā ndāla̍ ka̍lā ka̍lā lā nda̍ tīīnda̍ŋ le̍ nda̍ māndāa̍ la̍ŋ kpo̍u̍ ā chō la̍ŋ pēsī pēsī mī si̍ɔ̍mbu̍la̍ŋ lā bīī nda̍.

²Bɛ̄ɛ̄le̍ wāŋnda̍ nda̍ a̍a̍ ke᷅ Mo̍wa̍bī mā sāŋgālā ndu̍ le̍ŋ, lē chūū. Wāŋnda̍ yīi̍ lɛ̄ŋndē Mo̍wa̍bīle̍ŋ de̍fo̍o̍ Hɛ̍si̍bɔ̄ŋ chi̍e̍e̍ le̍ le̍ŋ tɛ̄ɛ̄mbūūwo̍.” Ā dīmu̍la᷅ŋ āā, “Ŋ̄ kɔ̄ŋnu᷅ŋ mī ŋ̄ kɔ̍ tɛ̍ɛ̍mbūū lɛ̄ŋndē lēŋ mī ŋ̄ chīi̍ a̍ le̍ŋ.” Nya̍ wāŋnda̍ o̍ chi̍e̍e̍ nɔ̍ dīōla̍ŋ āā Chi̍e̍e̍ Wānāā sēēmɛ̍i̍ya̍ wo̍, nya̍ bɛ̍ɛ̍ lā chō hūnɔ̄ɔ̄ mēī kpi᷅li̍, lā nɔ̍lā ni̍ŋ nī lā sōō ba̍kō le̍, fo̍ndōle̍, nya̍ bɛ̍ɛ̍ ya̍a̍mɔ̍ɔ̍wa̍ chō nya̍ tīsā kɔ̄ɔ̄lī a̍ mɔ̄ɔ̄ŋ fāŋndo̍ŋ.

³Lā ya᷄ŋ ndɔ̍ ni᷅la̍ŋ mī lā tūēī wāŋnda̍ Ho̍lɔ̍nīm chi̍e̍e̍ cha̍ŋnda̍ŋ le̍ wāna̍ ma̍lā nda̍ wo̍. Ā chō cha᷄ŋnda̍ŋ kpe̍e̍kpe̍i̍, fo̍ndōle̍ a̍ sūɛ̍i̍ wɔ̍ɔ̍ŋ i̍ cho̍ yɔ̄nɔ᷄ŋndo̍ lo̍ŋ nde̍, ndu̍yɛ̍ a̍ tɛ̄ɛ̄mbūū nda̍ cho̍ nda̍ wo̍.

⁴Lɛ̄ŋndē Mo̍wa̍bīle̍ŋ lē tāmbu̍. Wāŋnda̍ Mo̍wa̍bī chūāā ndāa̍ chō cha᷄ŋnda̍ŋ kpe̍e̍kpe̍i̍.

⁵Ha̍ā chō hēēlōo̍ a̍ nɛ̄i̍ ku̍ɛ̄ Lu̍hi̍tī chi̍e̍e̍ wo̍ a̍ cha᷄ŋnda̍ŋ chōo̍ cho̍o̍ kpe̍le̍ŋ kpe̍le̍ŋ, ndu̍yɛ̍ mi̍ cha᷄ŋnda̍ŋ la᷅ŋ lā wā sūɛ̍i̍ o̍ nɛ̄i̍ tu̍u̍su̍ Ho̍lɔ̍nīm chi̍e̍e̍ wo̍, a̍ dɛ̍nɛ̍ ta̍mbɛ̍i̍ bɛ̍ndu̍ cho̍ yɔ̄nɔ᷄ŋndo̍ wo̍.

⁶Wāŋnda̍ lā nyāānu̍ŋ, yɔ̄ŋi̍ yōōmūlā nyāla̍ŋ lā tāmbu̍. Lā nyāānu̍ŋ kpe̍e̍kpe̍i̍ mɛ̄ɛ̍ sōfɛ̍lɛ̍ yōndōo̍ ō nyāānu̍ŋ nu̍a̍ā yɛ̍.

⁷Wāŋnda̍ Mo̍wa̍bī lā tīīnda̍ŋ kpa̍āya̍ nyāa̍ ndu̍yɛ̍ a̍ sūltā nyāla̍ŋ le̍ nya̍ chīīndīa̍a̍, kɛ̍ nya̍ bɛ̍ɛ̍ ā hīŋ lākɔ̄ a̍ nya̍ o̍ bīyɔ̄ɔ̍ ni᷄ŋ. Mɛ̄lɛ̄ka̍ nya̍ nɔ̍ dīōla̍ŋ āā Chɛ̍mɔ̍sī wo̍ ō hīŋ lākɔ̄ o̍ bīyɔ̄ɔ̍ ni᷄ŋ, lātūlu̍ a̍ wānāa̍ so̍lī sa̍lāa̍ o̍ ndu̍ lo̍ wa̍, ndu̍yɛ̍ a̍ wānāā ndūāā bɛ̍ndūa̍a̍.

⁸Chi̍e̍e̍ o̍ chi̍e̍e̍ cho̍ o̍ lɛ̄ŋnde̍ŋ nde᷅ŋ ni᷄ŋ, wānāā tɛ̄ɛ̄mbāa̍ ā chō ndu̍ hūnɔ̄ɔ̄ chīŋa̍la᷅ŋ a̍ sɔ̍ŋgɔ̄ɔ̍. Ndu̍yɛ̍ chi̍o̍o̍ŋ o̍ lɛ̄ŋnde̍ŋ nde᷅ŋ ni᷄ŋ ki̍nɛ̍i̍, ō pīlɛ̍ bɛ̍ɛ̍ ō nɔ̍lā ni̍ŋ mbō hɛ̄lu᷄ŋ te̍. Lɛ̄ŋndē dɛ̍ŋgbɛ̍ ni̍, lɛ̄ŋndē dɛ̍ŋgbɛ̍le̍ cho̍ o̍ pēmbo᷄ŋ tɛ̄ɛ̄ŋ ni̍, ā chō mu̍ŋ tɛ̄ɛ̄mbūū kpo̍u̍, mī ŋ̄ sīmnu᷄ŋ pɔ᷅mnda̍ŋ. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.

⁹Tē wāŋnda̍ Mo̍wa̍bī nda̍ a̍a̍ sɔ̍lā pɛ̍ ku᷅mba᷅ŋnda̍ŋ, ā wa̍ chɔ̄nɔ᷄ŋ cho̍o̍ māā lāyōū, le̍ mī nda̍ a̍a̍ ke̍le̍ŋa̍ fāŋa᷄ŋ Mo̍wa̍bī, fo̍ndōle̍, chi̍e̍e̍ŋ nda̍ŋ kpo̍u̍ ŋ̄ chō hūnɔ̄ɔ̄ pīɔ̄l mī ŋ̄ sīmnu᷄ŋ pɔ᷅mnda̍ŋ, nāa̍ wāna̍ chi̍e̍e̍ o̍ che᷅l te̍ wa̍.

¹⁰Wānā o̍ wānā Mɛ̄lɛ̄ka̍ Ya̍a̍wɛ̄ɛ̄ o̍ ve᷅mm le̍ kpe̍ku̍ ndɔ̄ɔ̍ ho̍ō sōlīo̍o̍, tē ō kɛ̄ɛ̍ ndu̍ sōlī a̍ kɔ̄l ndɔ̄ɔ̍ kpo̍u̍ pɛ̍, sēndi̍o̍o̍ ō chō ndu̍ chōo̍. Wānā o̍ wāna̍ kɛ̍si̍ mūɛ̄ī ndūɛ̍i̍ fāŋnde̍ pɛ̍, mbō kɛ̄ɛ̍ lākɔ̄ wānāā o̍ nɔ̍ le̍ dīūwo̍ wa̍ dīū pɛ̍, sēndi̍o̍o̍ chō ndu̍ chōo̍.

¹¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Kāni̍ bɛ̍ɛ̍ mi̍ lɛ̄ŋndē Mo̍wa̍bī le̍ŋ lē wā, le̍ te̍le̍ŋ o̍ te̍le̍ŋ lē chōŋnu᷄ŋ o̍ kɔ̄l nyūlōo̍ ni᷄ŋ. Mɛ̄ɛ̍ nda̍ dūāū nu̍a̍ā mūɛ̄īya̍ŋ o̍ kpɛ̍ɛ̍nɛ̍i̍ māmūɛ̄īye̍ ni᷄ŋ le̍ mī mā cha᷄l mī mā wa̍ mūɛ̄īmā kɛ̄ndɛ̄ kɛ̍ndɛ̄ a̍ mu̍lī māŋ o̍ nyɛ̄ o̍ nyɛ̄ chēle̍ŋ ni᷄ŋ te̍ yɛ̍, le̍nde̍ Mo̍wa̍bī cho̍ŋnu̍ŋ o̍ bā ndɔ̄ɔ̍ chōo̍ ni̍, kāni̍ bɛ̍ɛ̍ ō ku̍e̍ wɔ̍ o̍ lēchɛ̄ ni̍ŋ te̍. Ndu̍yɛ̍ mūɛ̄īmā wāā nu̍a̍ā, yēēlā ndɔ̄ɔ̍ ō fe̍ŋāŋ le̍cho̍o̍ le̍, le̍ te̍le̍ŋ o̍ te̍le̍ŋ mā wā ma̍ kɛ̍ndɛ̄ kɛ̍ndɛ̄.

¹²Kɛ̍ ndu̍yɛ̍ te̍le̍ŋ cho̍ fūūlūū, ya̍ Mɛ̍lɛ̍ka̍ Ya̍a̍wɛ̄ɛ̄ I̍ cho̍ pūa̍a̍ vīōmɔ̄ɔ̄ mā hu᷄ŋ hu̍lū mūɛ̄īya̍ŋ māŋ, ma̍ŋ ma̍ yɔ̍nūŋ ni̍ māā Mo̍wa̍bī. Ā chō hūnɔ̄ɔ̄ mūɛ̄īya̍ŋ māŋ chūūŋūū, ndu̍yɛ̍ mā pēsi̍ pe̍si̍ kpɛ̍ɛ̍nɛ̍ŋ mūɛ̄īya̍ŋ māŋ mā chō ni᷄ŋ ndo̍ŋ wɔ̍ wɔ̍.

¹³O̍ ko̍ŋ, si̍ɔ̍mbu̍la̍ŋ lā chō wāŋnda̍ Mo̍wa̍bī bīyɔ̄ɔ̄, fo̍ndōle̍, mɛ̄lɛ̄ka̍ nda̍ nda̍ tīīnda̍ŋ ndo̍, ndu̍ yɔ̍nūŋ māā Chɛ̍mɔ̍sī ni̍, ō nɔ̍lā ni̍ŋ mbō chīīndi̍a̍a̍ nda̍ le̍. Mɛ̄ɛ̍ wāŋnda̍ I̍sɔ̄lūɛ̄ī a̍ dɔ̍ū tīīnda᷄ŋndo̍ o̍ mɛ̄lɛ̄ka̍ nda̍ nāūwo̍ ni᷄ŋ Bɛ̍tɛ̄ɛ̄l chi̍e̍e̍, mi̍ si̍ɔ̍mbu̍la̍ lā hu᷄ŋ bi̍ī nda̍ a̍ ndu̍ yɛ̍, le̍nde̍ i̍ yɔ̍nūŋ ni̍ŋ a̍ wāŋnda̍ Mo̍wa̍bī ni̍.

¹⁴Pūa̍a̍ Mo̍wa̍bī, hēēlɔ᷄ŋ yɛ̄ɛ̄nɛ̍ nya̍ chō yɛ̄, mī lā dīmī āā, ‘Ku̍u̍ba̍a̍ chɔ̄ūwa̍ na̍a̍ ŋ̄ chō ni̍, ŋ̄ chō pūa̍a̍ kpāāyāā bɛ̍ndū o̍ sɔ̍ŋgɔ̄ɔ̍ ni᷄ŋ.’

¹⁵Wānāā tɛ̄ɛ̄mbāā chō hūnɔ̄ɔ̄ lɛ̄ŋndē Mo̍wa̍bīle̍ŋ tɛ̄ɛ̄mbūū a̍ chi̍e̍e̍ŋ ndɔ̄ŋ bɛ̍ndo̍ŋ lātūlu̍. Chūāā pīāāndūāā kɛ̄ndɛ̄ kɛ̍ndīa̍a̍ cho̍ lɛ̄ŋnde᷅ŋ nda̍ kpo̍u̍ ā chō nda̍ hūnɔ̄ɔ̄ dīū.” Māsā bɛ̍ndōo̍, o̍ nɔ̍ dīōla̍ŋ āā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, nyɛ̄ o̍ di̍mi̍ wo̍ cho̍ ko̍ŋ ni̍.

¹⁶Mbo̍ hīāū lāchī a̍ sūɛ̍i̍, mbo̍ dīmi̍ āā, “Te̍le̍ŋ dɛ̍nɛ̍ pa̍lāā bɛ̄ndōo̍ hīŋ Mo̍wa̍bī tōlɔ̄ɔ̄ chōo̍ wo̍ ō chō ni᷅ŋ kpɛ̍ɛ̍lūŋ. Te̍le̍ŋ Mo̍wa̍bī o̍ hi᷅ŋ sīmnɔ᷄ŋ pɔ᷅mndo̍ wo̍, ō bēndu̍ lɛ̍ le̍.”

¹⁷“Mɔ̍nɛ̍i̍ bīi̍ nya̍ le̍ lɛ̄ŋndē Mo̍wa̍bīle̍ŋ, nya̍ lɛ̄ŋīi̍ ba̍lu̍ Mo̍wa̍bī ve̍ kpo̍u̍, nya̍ wānā o̍ wāna̍ si̍nā a̍ tɔ̍ɔ̍ bɛ̍ndū lɛ̄ŋnde̍ŋ nde᷅ŋ o̍kɔ̄ɔ̄. Lā dīmi̍ māā, māsāle̍ kpāāyāle̍ bɛ̄ndūlē lɛ̄ŋnde̍ŋ nde᷅ŋ lē pīɔ̍l fɔ̍. Māsāle̍ ndɔ̄le̍ lēbɛ̄ɛ̄le̍ŋ lē mɛ̄ɛ̄lu̍, māsāle̍ kpāāyāle̍ bɛ̄nde̍ŋ.

¹⁸Nya̍ wāŋnda̍ Di̍bɔ̄ŋ chi̍e̍e̍, lā chɔ᷄ŋ o̍ fo̍ndāŋ nya̍ lēbīɔ̍ɔ̍ mī lā cha᷄l lɛ̄ŋ o̍ chu̍ndo̍o̍ ni᷄ŋ. Kāni̍ fo̍ndōle̍, ya̍a̍mɔ̍ɔ̍wa̍ tɛ̍ɛ̍mbūū ni̍ŋ Mo̍wa̍bī wa̍, nya̍ bɛ̍ɛ̍ ā chō hēlɔ̄ɔ̄ o̍ nya̍ lo̍, mā chīŋa̍la᷅ŋ nya̍. Chi̍e̍e̍ŋ nya᷄ŋ nɔ̍ sāāsāla̍ ka̍lā la̍ŋ ndo̍ŋ kpo̍u̍, ā chō mu̍ŋ tɛ̄ɛ̄mbūū.

¹⁹Nya̍ wānāa̍ cho̍ A̍lo̍yā chi̍e̍e̍ wa̍, lā kɔ̍ si᷅m o̍ nɛ̄ī mī lā tōfa̍ wānāā ya̍a̍mɔ̍ɔ̍wa̍ sōli̍ ma̍ wā nyāānɔ᷄ŋndo̍ wa̍. Lā nyūna̍ wɔ̍ wa̍nāa̍ cho̍ nyāānɔ᷄ŋndo̍ wa̍. Lā nyūna̍ nda̍ mā chɔ᷄m nya̍ nyɛ̄ yɔ̍nu̍ŋ o̍ lɛ̄ŋndē ndāle̍ŋ ni᷄ŋ ndo̍.

²⁰Tē lā nyūna̍ nda̍ pɛ̍, ā chō nya̍ dīmūl māā, lɛ̄ŋndē Mo̍wa̍bīle̍ŋ lē pīɔ̍l. Mo̍wa̍bī o̍ chu̍ū bɛ̍ɛ̍. Lā cha᷄ŋ le̍ Mo̍wa̍bī mī lā kōŋu̍l chōo̍ cho̍o̍ kpe̍le̍ŋ. Lā dīmu̍l wa̍nāa̍ ho̍lnu̍ŋ pi̍o̍o̍ A̍nɔ̄ŋ nda̍ kpo̍u̍ māā Mo̍wa̍bī o̍ ta̍mbu̍.”

²¹“Dɛ̍nɛ̍ pa̍lāā bɛ̄ndōo̍ hīŋ le̍ chi̍e̍e̍ŋ cho̍ o̍ dɛ̍ŋgbɛ̍la̍ŋ ni᷄ŋ o̍ pēmbēi̍ chōo̍ wo̍ŋ kpo̍u̍. Mu̍ŋ yɔ̍nūŋ ni̍ māā Ho̍lɔ̄ŋ, a̍ Cha̍sɛ̄ɛ̄, a̍ Mɛ̍fa̍a̍tī,

²²a̍ Di̍bɔ̄ŋ, a̍ Ni̍bɔ̄, a̍ Bɛ̄tī Dībīla̍tīm,

²³a̍ Kīlīa̍a̍tīm, a̍ Bɛ̄tīka̍mūl, a̍ Bɛ̄ti̍mīɔ̄ŋ,

²⁴a̍ Ki̍li̍ɔ̍ɔ̍tī, o̍ ko̍ŋ kɔ̍ɔ̍lī, a̍ Bɔ̍si̍lūā. Chi̍e̍e̍ o̍ chi̍e̍e̍ cho̍ o̍ lɛ̄ŋndē Mo̍wa̍bīle̍ŋ ni᷄ŋ ndo̍ŋ, ŋ̍ cho̍ la̍nda̍ŋ la̍nda̍ŋ ndo̍ŋ ni̍, ŋ̍ cho̍ māchɛ̄lū wo̍ŋ ni̍, dɛ̍nɛ̍ pa̍lāā bɛ̄ndōo̍ hīŋ le̍ mu̍ŋ kpo̍u̍.

²⁵Mo̍wa̍bī, dīāllūŋ ndɔ̄ŋ ka̍la̍ŋ ŋ̄ chūū. Kpāāya̍ ndɔ̄ɔ̍ ō mɛ̄ɛ̄lu̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

²⁶Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Lā tōsa̍ mī Mo̍wa̍bī o̍ yɔ̍nu̍ŋ mɛ̄ɛ̍ mūɛ̄īya̍ŋ mā bīī nu̍a̍ā wāŋndo̍ yɛ̍, fo̍ndōle̍, le̍ mɛ̄ɛ̍ o̍ si̍mu̍l la̍ mbo̍ hēēlū ndu̍ pi̍la̍ yɛ̍. Lā tōsa̍ mī Mo̍wa̍bī o̍ yɔ̍nu̍ŋ, mɛ̄ɛ̍ wāŋnda̍ ō kōl nu̍a̍ā mbō kūūsu̍u̍, mbō līnda̍ŋ a̍ kūīsī kōŋ kpo̍u̍ yɛ̍. Lā tōsa̍ ndu̍ bɛ̍ɛ̍ mbō sīmnu᷄ŋ nyɛ᷅ māmāā.

²⁷Mo̍wa̍bī, yi̍ya̍ŋ ndɔ̍, nūm bɛ̍ɛ̍ le̍nde̍ ko̍ni̍ le̍ ŋ̄ sīīŋgu̍u̍ I̍sɔ̄lūɛ̍i̍ nyɛ̄ māmāā le̍? Ma̍ lō o̍ ko̍ŋ, ma̍ chīī ndu̍ bɛ̄ɛ̄, mbo̍ yɔ̄nu᷄ŋ nu̍m o̍ hɔ̄l, mɛ̄ɛ̍ nda̍ bīī nu̍a̍ā wāŋndo̍ o̍ vīīle̍ŋ mbō yɔ̄nu̍ŋ nyɛ᷅ fo̍ndō fu̍u̍ wa᷅ŋnda̍ o̍ hɔ̄l lɛ̍.

²⁸Wāŋnda̍ Mo̍wa̍bī, lā ma᷄l chi̍e̍e̍ŋ nya̍ŋ mī lā kɔ̍ cha᷅l o̍ pōūta̍ŋ tɛ̄ɛ̄ŋ. Lā kɔ̍ cha᷅l o̍ pōūta̍ŋ tɛ̄ɛ̄ŋ lo̍ŋ, mɛ̄ɛ̍ pīīŋnda̍ ā tāŋgūl nu̍a̍ā wāa̍ŋnde̍ o̍ būūlōo̍ sōndōo̍ mā wa̍ lo̍ŋ yɛ̍.

²⁹I̍ tūēī a̍ mɛ̄ɛ̍ Mo̍wa̍bī o̍ cho̍ lɛ̄ŋndē yōŋgālē bɛ̄ndū yɛ̍. Mo̍wa̍bī o̍ cho̍ lɛ̄ŋndē yōŋgālē bɛ̄ndū. Lɛ̄ŋndē hēēla᷄ŋ nde̍ bɛ̍ndūle̍ŋ Mo̍wa̍bī cho̍ ni̍, lɛ̄ŋndē wa̍su̍le̍ bɛ̍ndūle̍ŋ le̍ cho̍ ni̍, lɛ̄ŋndē chu̍a̍nu̍ŋ le̍ bɛ̍ndū mi̍ lē hīāū lɛ̄ŋīī tūɛ̍i̍ kpo̍u̍ le̍ŋ.

³⁰Ya̍ Mɛ̍lɛ̄ka̍ Ya̍a̍wɛ̄ɛ̄, I̍ si̍nā māā lɛ̄ŋndē Mo̍wa̍bīle̍ŋ lɛ̄ŋnde̍ nɔ̍ le̍bɛ̍ɛ̄ le̍ wānā o̍ wānā le̍ le̍ŋ le̍ cho̍ ni̍. Kɛ̍ ndu̍yɛ̍ hēēlɔ᷄ŋ o̍ hēēlɔ᷄ŋ le̍ cho̍, fo̍ndō fu̍u̍ ko̍ni̍. Nyɛ̄ o̍ nyɛ̄ le̍ cho̍ tōsāa̍, ō cho̍ lo᷅ le̍.

³¹Le̍la̍ŋ cha᷄ŋndo̍ kpe̍e̍kpe̍i̍ ya̍ I̍ cho̍ le̍ Mo̍wa̍bī ni̍, mī ko̍ŋgu̍l kpe̍le̍ŋ. I̍ cho̍ cha᷄ŋ le̍ lɛ̄ŋndē Mo̍wa̍bīle̍ŋ kpo̍u̍, ndu̍yɛ̍ mī cha̍ŋ le̍ wāŋnda̍ Kīāā Hɛ̄lu̍ɛ̍sī.

³²O̍o̍ wāŋnda̍ Si̍bi̍māā, I̍ cha᷅ŋ ni̍ŋ le̍ nya̍ mbō hīōū bɛ̍ɛ̍ mɛ̄ɛ̍ ya̍ I̍ cha̍ŋ le̍ Cha̍sɛ̄ɛ̄ yɛ̍. Lā chō māchūāā mɛ̄ɛ̍ yɔ̄mīī mākīle̍pīi̍ye̍ ī chō nu̍a̍ā yɛ̍. Yɔ̄mnde̍ he̍ī mī ī na᷄ŋ te̍i̍ mī lɛ̄ūwūŋ ndɔ̍ŋ ŋ̄ fūūlūū o̍ pēe̍ nɔ̍ nya̍ā yōōmāā le̍ wo̍, ndu̍yɛ̍ mī ī ta̍ŋ mī ī fūūlu̍u̍ Cha̍sɛ̄ɛ̄ di̍. Kɛ̍ ndu̍yɛ̍ wānāā tɛ̄ɛ̄mbāa̍ ā hu᷄ŋ tɛ̍ɛ̍mbūū yɔ̄mīī nyɛ̄i̍ ku̍ām a̍ sīālte̍ŋ nde̍ ndu̍yɛ̍ a̍ kīle̍pīi̍ma̍ nya̍ŋ kpo̍u̍.

³³Nya̍a̍le̍ wāŋnda̍ nda̍ a̍a̍ to̍sā pa̍a̍ndū ndu̍yɛ̍ mā tōsā kɔ᷅l kɛ̄ndɔ̄ɔ̍ o̍ lɛ̄ŋīī nyɛ̄i̍ tɔ̄lɔ̄ɔ̄la̍ŋ lā nāŋ nda̍ŋ ndo̍ kpo̍u̍, I̍ cho̍ ndu̍ chīī. Fo̍ndāŋndā nyāla̍ nya̍ tōōsīāā mu̍ɛ̍īya̍ŋ kpo̍u̍, mūɛ̄īmā ve᷅m lɛ̍ ni̍ŋ to̍o̍sīa̍ŋ lo̍ŋ te̍. Kūūlīāālā kɔ̄l kɛ̄ndɛ̄lā wāŋnda̍ nda̍ a̍a̍ ku̍u̍līāā pa̍a̍ndū o̍ mūɛ̄īya̍ŋ tōōsi̍a̍a̍ ni᷄ŋ nda᷄ŋ kpo̍u̍ lā chūū. Wāŋnda̍ ā wā ni̍ŋ de̍ŋīo̍o̍ chōo̍ cho̍o̍, kɛ̍ ō ve᷅m ni̍ŋ de̍ŋī kɔ̄l kɛ̄ndɛ̄ le̍.

³⁴Wāŋnda̍ Hɛ̍si̍bɔ̄ŋ chi̍e̍e̍ a̍ wāŋnda̍ Īlīa̍a̍lɛ̄ɛ̄ chi̍e̍e̍ a̍ cho̍ cha᷄ŋnda̍ŋ kpe̍e̍kpe̍i̍. Dīōmndā ndāla̍ŋ lā chō fūūlūūwo̍ Cha̍ha̍sī chi̍e̍e̍ di̍. Wānāa̍ cho̍ So̍wā chi̍e̍e̍ wa̍ bɛ̍ɛ̍ ā chō nda̍ dīōmnda̍ŋ tūēīyɔ̄ɔ̍. O̍ ko̍ŋ kɔ̍ɔ̍lī, wānāa̍ cho̍ Ho̍lɔ̍nīm chi̍e̍e̍ pɔ̍, a̍ Ɛ̄kīla̍tī Sīɛ̄līsi̍i̍yā chi̍e̍e̍ wa̍, nda̍ bɛ̍ɛ̍ ā chō cha᷄ŋnda̍ wāŋnda̍ ha̍ā tūēīyɔ̄ɔ̍. Pēē bɛ̍ndōo̍ Ni̍mi̍lūīm bɛ̍ɛ̍ ō vēla̍ sɛ̍ɛ̍ŋ.

³⁵Wānā o̍ wāna̍ cho̍ o̍ lɛ̄ŋndē Mo̍wa̍bīle̍ŋ ni̍ŋ mā sōlī sa̍lāla̍ lu̍a̍māā la̍ŋ o̍ fo̍ndāŋndā ndāla̍ lāsōōlu̍u̍la̍ŋ o̍ mɛ̄lɛ̄ka̍a̍ ndāā ka̍ŋ ndo̍, I̍ cho̍ hūnɔ̄ɔ̄ chīī a̍ nda̍ kpo̍u̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

³⁶Mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Le̍la̍ŋ mɔ̍nɛ̍i̍ bɛ̍ndu̍e̍i̍ chō ya̍ o̍ kɔ̄l nūu̍ ni᷄ŋ le̍ lɛ̄ŋndē Mo̍wa̍bīle̍ŋ ndu̍yɛ̍ a̍ wāŋnda̍ Kīāā Hɛ̄lu̍ɛ̍sī chi̍e̍e̍. Mɛ̄ɛ̍ wāŋnda̍ ā sōlī nu̍a̍ā chōndu̍ŋ bīīsi̍o̍o̍ŋ o̍ sɛ̄ŋnde̍ ni᷄ŋ yɛ̍, le̍nde̍ ya̍ I̍ cho̍ cha᷄ŋndo̍ o̍ kɔ̄l nūu̍ ni᷄ŋ le̍ wāŋnda̍ ha̍ā ni̍, fo̍ndōle̍, sūltā ndāla̍ nda̍ a̍a̍ chu̍u̍ŋgi̍a̍a̍ la̍ŋ ki̍nɛ̍i̍, ya̍a̍mɔ̍ɔ̍wa̍ ā kūɛ̄nu᷄ŋ a̍ la̍ŋ.

³⁷Wāŋnda̍ Mo̍wa̍bī kpo̍u̍ ā sēndi̍ yu̍ŋgu̍lta̍ŋ ndu̍yɛ̍ ma̍ sēndi̍ vɛ̄lɛ̄ sīɛ̍i̍yo̍ŋ kpo̍u̍ le̍ kɔ̄ltā ndāla̍ ta̍mbɛ̍i̍la̍ŋ chɔ̄mndo̍. Ā tɛ̄ɛ̄ndi̍a̍a̍ bālā ndāla̍ŋ ndu̍yɛ̍ ma̍ yīīnu᷄ŋ nyɛ᷅lā lābɛ̍kīla̍ŋ o̍ lāchāŋ.

³⁸Cha᷄ŋnda̍ kɔ̄ltā tāmbɛ̍i̍la̍ŋ lā tīu̍ o̍ lɛ̄ŋndē Mo̍wa̍bīle̍ŋ ni᷄ŋ kpo̍u̍. Cha᷄ŋnda̍ŋ lā tīu̍ o̍ chīɛ̄īla̍ŋ chōo̍ nāa̍ wāŋnda̍ cha᷅l la̍, ndu̍yɛ̍ a̍ o̍ bɛ̍ɛ̄la̍ŋ kpo̍u̍. Kāni̍ fo̍ndōle̍, mɛ̄ɛ̍ kpɛ̍ɛ̍nɛ̍i̍ pi̍ɔ̍lɛ̍i̍ye̍ ī wā nu̍a̍ā wānā nɔ᷅ kpe̍ku̍ a̍ ndi̍ le̍ yɛ̍, le̍nde̍ ya̍ Mɛ̍lɛ̄ka̍ tɛ̄ɛ̄mbu̍u̍ Mo̍wa̍bī ni̍.

³⁹Lɛ̄ŋndē Mo̍wa̍bīle̍ŋ lē sīmnu᷄ŋ pɔ᷅mndo̍. Wāŋnda̍ Mo̍wa̍bī a̍ cho̍ cha᷄ŋnda̍ŋ kpe̍e̍kpe̍i̍. Si̍ɔ̍mbu̍la̍ bɛ̄ndūla̍ŋ lā bīī lɛ̄ŋndē Mo̍wa̍bīle̍ŋ. Lɛ̄ŋndē Mo̍wa̍bīle̍ŋ lē sīmnu᷄ŋ nyɛ᷅ māmāā. Lɛ̄ŋīi̍ ba̍lu̍ le̍ŋ nde̍ ki̍nɛ̍i̍, sīōōŋīī bɛ̄ndūe̍i̍ bīī nda̍ a̍ nyɛ̍ yɔ̍nūŋ a̍ le̍ŋ ndo̍.”

⁴⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Mɛ̄ɛ̍ kōōŋndo̍ ō kēlēŋā nu̍a̍ā tōlɔ̄ɔ̍ su̍lūlū a̍ kūmba᷅ŋnda̍ŋ lā pɛ̄ɛ̄ŋgāā fɛ̍ɛ̄ le̍ nyɔ̄ɔ̍ kēlēŋā chūa̍a̍ yɛ̍, le̍nde̍ wānāa̍ de᷅l ni̍ŋ Mo̍wa̍bī chōo̍ wa̍ ā hūŋ ni̍ŋ ni̍.

⁴¹Ā chō hūnɔ̄ɔ̄ chi̍e̍e̍ŋ bɛ̍ndo̍ŋ, o̍ lɛ̄ŋndē Mo̍wa̍bīle̍ŋ ni̍ŋ bi̍yɔ̄ɔ̄, ndu̍yɛ̍ mā bīī fo̍ndāŋndā kālā ka̍lālā wāŋnda̍ Mo̍wa̍bī a̍ ti̍i̍nda̍ŋ le̍ nda̍ māndāa̍ la̍ŋ. Tē pāa̍le̍ le̍ŋ lē fūūlu̍u̍ pɛ̍, sīōōŋīī bɛ̄ndūe̍i̍ ī chō so̍vɛ̄i̍ya̍ Mo̍wa̍bī bīyɔ̄ɔ̄, mī kɔ̄lta̍ŋ lā yɔ̄nu̍ŋ nda̍ ni᷄ŋ pu̍lāŋ pūlāŋ, mɛ̄ɛ̍ wānā la̍nɔ̍ nda̍ sɔ̄ɔ̄ŋgūū ho̍ō īkɛ̄i̍ le̍ vīōlɔ̄ɔ̍ wo̍ ō wā yɛ̍.

⁴²Lɛ̄ŋndē Mo̍wa̍bīle̍ŋ lē chō hūnɔ̄ɔ̄ tāmbu̍, ndu̍yɛ̍ fɛ̍ɛ̍ŋ a̍ fɛ̍ɛ̍ŋ bɛ̍ɛ̍ wānā tu̍i̍ī lɛ̍ ni̍ŋ a̍ wāŋnda̍ Mo̍wa̍bī o̍kɔ̄ɔ̄ le̍, fo̍ndōle̍, le̍ mɛ̄ɛ̍ nda̍ sīmu̍l la̍, ma̍ chūānu̍ŋ a̍ bɛ̍ndū mbo̍ hīāū ya̍ Mɛ̍lɛ̄ka̍ Ya̍a̍wɛ̄ɛ̄ yɛ̍.

⁴³Wāŋnda̍ Mo̍wa̍bī, sɔ̄ɔ̍ŋ mu᷅ŋ, mu̍ŋ wa᷅ ni̍ŋ nya̍ lāchī ni̍. Sɔ̄ɔ̍ŋ to̍sā mī sīōōŋīī bɛ̄ndūe̍i̍ ī bīī nya̍ wo̍ŋ, a̍ so̍o̍ŋnda̍ ya̍a̍mɔ̍ɔ̍wa̍ ā tūūlūl nya̍ ni̍ŋ le̍ mī lā dēli̍ lēni᷄ŋ nda̍ŋ, a̍ yāŋɔ̄ɔ̄lā nda̍ yēŋ nya̍ ni̍ŋ le̍ mī lā hāu̍ la̍ŋ.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

⁴⁴MI̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Ndu̍yɛ̍ sɔ̄ɔ̄ŋ mu᷅ŋ, wānā o̍ wa̍nā nɔ̍lā ni̍ŋ mbō chīi̍ mu̍ŋ hīɔ̄lɔ᷄ŋ te̍, tē sɔ̄ɔ̍ŋ to̍sā mī sīōōŋīī bɛ̄ndūe̍i̍ ī bīī wānā wo̍ŋ ŋ̄ nɔ̄la̍ ni̍ ma̍ hīālu᷄ŋ, ō kɔ̍ de᷅l o̍ so̍o̍ŋndo̍ ni̍ŋ. Tē a̍ kīndi̍ ki̍ndi̍ pɛ̍, mā fūla̍ o̍ so̍o̍ŋ ko̍ŋ ni᷄ŋ, ō kɔ̍ ha̍ū vɛ̄lɛ̄ o̍ yāŋɔ̄ɔ̄le̍ŋ. Tē wɔ̄sī kōŋ ō fūūlu̍u̍ pɛ̍, wɔ̄sī ya̍ I̍ kɛ̍ɛ̍si̍a̍a̍ le̍ lɛ̄ŋndē Mo̍wa̍bīle̍ŋ nyɛ̄ pālāa̍ tūsīo̍o̍ wo̍, nyɛ̄ ya̍ I̍ to̍sā ni̍ŋ mbō yɔ̄nu̍ŋ a̍ wāŋnda̍ Mo̍wa̍bī wo̍, ndu̍ wa᷅ ni̍ŋ ko̍ŋ ni̍.

⁴⁵Wānāa̍ wa᷅ ni̍ŋ chɔ̍ūwo̍ nyāānɔ᷄ŋndo̍ wa̍ ā fūūlūū ni̍ŋ Hɛ̍si̍bɔ̄ŋ chi̍e̍e̍, nāa̍ Māsāa̍ Si̍hɔ̄ŋ o̍ wa̍ īchāli̍ māā māsā wa̍, mā yēēma̍ mālāa̍ kɛ̍ ā sɔ̍lā ni̍ŋ ma̍lā o̍ mālā le̍, fo̍ndōle̍, Hɛ̍si̍bɔ̄ŋ bɛ̍ɛ̍ o̍ wa᷅ ni̍ŋ o̍ yīŋ. Yīŋnde̍ŋ lē chō hūnɔ̄ɔ̄ pɛ̄ŋgu̍la̍ lɛ̄ŋndē Mo̍wa̍bīle̍ŋ tɛ̄ɛ̄mbūū, ndu̍yɛ̍ mī lē tɛ̄ɛ̄mbu̍u̍ chi̍e̍e̍ŋ cho̍ o̍ pēmbo᷄ŋ chōo̍ wo̍ŋ kpo̍u̍ nāa̍ wānāa̍ ke̍lū yōŋgāla̍ŋ māā ā chāā chɔ̍ūwo̍ wa̍ ā chō ku̍ndāla̍ŋ nda̍.

⁴⁶Wāŋnda̍ Mo̍wa̍bī, nyɛ̄ pālāā bɛ̄ndōo̍ ō hīŋ le̍ nya̍. Nya̍ wānāa̍ so̍o̍lūū mɛ̄lɛ̄ka̍ nya̍ nɔ̍ dīōla̍ŋ āā Chɛ̍mɔ̍sī wo̍ wa̍ ki̍nɛ̍i̍, ā chō nya̍ tɛ̄ɛ̄mbūū kpo̍u̍. Ndu̍yɛ̍ chūāūwāā nyāā la̍a̍ndūa̍a̍ a̍ chūāūwāā nyāā pi̍a̍a̍ndūa̍a̍ kpo̍u̍, ā chō lākɔ̄ a̍ nda̍ o̍ bīyɔ̄ɔ̍ ni᷄ŋ.

⁴⁷“Kɛ̍ ndu̍yɛ̍ te̍le̍ŋ cho̍ fūūlūū, I̍ cho̍ vɛ̄lɛ̄ tōsā mī lɛ̄ŋndē Mo̍wa̍bīle̍ŋ lē mīīŋgu̍ vɛ̄lɛ̄ mī lē na᷄ŋ māā pāāndū.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ māā ō chō yɔ̄nɔ᷄ŋ a̍ lɛ̄ŋndē Mo̍wa̍bīle̍ŋ ki̍nɛ̍i̍ yo̍, ndu̍ cho̍ ko̍ŋ ni̍.