Read Southern Kisi Chɛ̄lūīma̍yā 49 Bible Online

Chɛ̄lūīma̍yā 49 - Southern Kisi bible

Chɛ̄lūīma̍yā 49

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̍ɛ̄ o̍ ke᷅ ya̍ yōōŋgōo̍ a̍ lɛ̄ŋndē A̍mɔ̄ŋnde̍ŋ o̍kɔ̄ɔ̄. Nyɛ̄ o̍ di̍mi̍ a̍ A̍mɔ̄ŋ o̍kɔ̄ɔ̄ wo̍ cho̍ ho̍ō ni̍. Mbo̍ dīmī āā, “Bāā wāŋnda̍ I̍sɔ̄lūɛ̄ī a̍ vi̍lu̍ ŋ̍chu̍a̍u̍ le̍? Bāā chūā o̍ chūā lo̍ I̍sɔ̄lūɛ̄ī mbō lōo̍ lɛ̄ŋndē wānāā ndāa̍ le̍? Tē I̍sɔ̄lūɛ̄ī o̍ nɔ̍ ŋ̄chūāū pɛ̍, vɛ᷅ mi̍ wānāa̍ so̍o̍lūū ha̍ā Mo̍lɛ̍ki̍ wa̍ ā chūā būŋgɛ̄i̍ yu̍ŋgu̍ Ka̍a̍dī ve̍? Vɛ᷅ mi̍ wānāā ndāa̍ ā hu᷄ŋ cha᷅l o̍ chi̍e̍e̍ŋ wāŋnda̍ Ka̍a̍dī?

²Kɛ̍ ndu̍yɛ̍ te̍le̍ŋ cho̍ fūūlūū, I̍ cho̍ tōsā mī bɔ̄ɔ̄lūū chɔ̄ū bɛ̄ndōo̍ ō hu᷄ŋ wa᷅ sūɛ̍i̍ Lu̍a̍bā chi̍e̍e̍, o̍ cho̍ chi̍e̍e̍ le̍bo᷅llo̍ le̍ lɛ̄ŋndē A̍mɔ̄ŋnde̍ŋ ndo̍. Lu̍a̍bā o̍ cho̍ hūnɔ̄ɔ̄ sīmnɔ᷄ŋ pɔ᷅m. Ndu̍yɛ̍ chi̍e̍e̍ŋ pɔ̍mbɔ᷄ŋ ba̍lu̍ ndu̍ wo̍ŋ kpo̍u̍ ŋ̄ chō hūnɔ̄ɔ̄ ŋɔ̄. A̍ te̍le̍ŋ ko̍ŋ, wāŋnda̍ I̍sɔ̄lūɛ̄ī a̍ cho̍ hūnɔ̄ɔ̄ lɛ̄ŋndē ndāle̍ŋ pōōndā mā mīŋgi̍ le̍ŋ chūā.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

³MI̍ Mɛ̄lɛ̄ka̍ hīāū lāchī a̍ sūɛ̍i̍ āā, “Wāŋnda̍ Hɛ̍si̍bɔ̄ŋ chi̍e̍e̍, lā cha᷄ŋ mī lā kōŋu̍l chōo̍ cho̍o̍ kpe̍le̍ŋ, fo̍ndōle̍, E̍yāī chi̍e̍e̍ o̍ ta̍mbu̍. Nya̍ wāŋnda̍ Lu̍a̍bā, lā cha̍ŋ cho̍o̍ cho̍o̍ kpe̍le̍ŋ. Lā yīīnu̍ŋ nyɛ᷅lā lābɛ̍kīla̍ŋ o̍ lāchāŋ mī lā cha᷄ŋ cha̍ŋ īmɔ̍nɔ̍ɔ̍. Lā bālu̍ a̍ cha᷄ŋndo̍, chi̍o̍o̍ hēēlōo̍ mī lā tūūsū, fo̍ndōle̍, Mo̍lɛ̍kī, mɛ̄lɛ̄ka̍ nyāa̍ ō chō hūnɔ̄ɔ̄ lākɔ̄ o̍ chɛ̄le̍ŋ ni̍, lātūlu̍ nda̍ wānāā ndūāā so̍līāā lāsa̍lāa̍, ndu̍yɛ̍ a̍ wānāā ndūāā bɛ̍ndūa̍a̍ kpo̍u̍.

⁴Nya̍ wānāa̍ nɔ̍ ha̍ā tīīnda᷄ŋ o̍ ya̍ ni̍ŋ te̍ wa̍, bāā le̍ dɛ̍ŋgbɛ̍la̍ kɛ̍ndɛ̄ kɛ̍ndɛ̄lā nya̍ nɔ̄ mī tɔ̄lɔ̄ɔ̄la̍ŋ lā nāŋ lo̍ŋ nda̍ŋ le̍la̍ŋ nya̍ hēēlu̍ hɔ̄lla̍ ni̍? Kɛ̍ ndu̍yɛ̍ dɛ̍ŋgbɛ̍la̍ la̍ŋ kpo̍u̍ lā chō hūnɔ̄ɔ̄ sīmnɔ᷄ŋ yo̍ndōo̍. Lā lo̍ o̍ ko̍ŋ mi̍ lā tīīŋnda᷄ŋ su᷅ltā nyāla̍ŋ mī lā dīmī āā, ‘Ō nɛ̄ɛ̍nɛ̍ nɔ̍lā yɛ̍ mbō chīŋa̍la᷅ŋ na̍a̍?’

⁵Kɛ̍ ndu̍yɛ̍ I̍ cho̍ tōsā mī lɛ̄ŋīi̍ ba̍lu̍ nya̍ ve̍ ī lūe̍i̍ nya̍ sīōōŋīī bɛ̄ndūe̍i̍. Nya̍ kpo̍u̍ ā chō nya̍ hūnɔ̄ɔ̄ tōūwɔ̄ɔ̄ mā sōli̍ nya̍ o̍ lɛ̄ŋndēŋ nde᷅ŋ ni᷄ŋ. Wānā o̍ wānā wa᷅ ni̍ŋ ki᷅lta̍ŋ le̍ yōōmū ndɔ̄ɔ̍ chīīndīa̍a̍. Ndu̍yɛ̍ wānā o̍ wānā ve᷅m ni̍ŋ mbō mīŋgi̍ nya̍ chūūŋgīāā nāa̍ pi᷅lɛ̍ le̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̄, Māsānɔ̄ɔ̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō dīmi̍ wo̍ cho̍ ko̍ŋ ni̍.

⁶Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Kɛ̍ ndu̍yɛ̍, te̍le̍ŋ cho̍ fūūlūū, I̍ cho̍ tōsā mī lɛ̄ŋndē A̍mɔ̄ŋnde̍ŋ lē mīīŋgu̍ mī lē na᷄ŋ vɛ̄lɛ̄ māā pāāndū.”

⁷O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ yōōŋgōo̍ a̍ lɛ̄ŋndē I̍dɔ̄mnde̍ŋ o̍kɔ̄ɔ̄. Mbo̍ dīmī āā, “Bāā wāna̍ kɔ̄l kālu̍ o̍ wāna̍ kɔ̄l kālu̍ cho̍ lɛ̍ Tɛ̍māŋ chi̍e̍e̍ le̍? Bāā wānāā nda̍ a̍a̍ di̍mī to᷅nya̍a̍ wāŋnda̍ tɛ̄ɛ̄ŋ nda̍ cho̍ lɛ̍ wāŋnda̍ sīlā le̍? Bāā wānāā kɔ̄l kālu̍a̍a̍ ha̍ā chūūwo̍ nda̍ chūu̍ ni̍?

⁸Wāŋnda̍ Dɛ̍dāŋ, lā mūli̍ŋ mī lā nyāānu̍ŋ. Lā kɔ̍ vi̍ŋi᷄ŋ o̍ būūlūla̍ŋ ni᷄ŋ. Kāni̍ fu̍u̍le̍, dɛ̍nɛ̍ pa̍lāā o̍ dɛ̍nɛ̍ pa̍lāā ya̍ Mɛ̄lɛ̄ka̍ kɛ̄ɛ̄si̍a̍a̍ le̍ pūlāle̍ I̍i̍sɔ̄le̍ŋ tūsīo̍o̍ chōo̍, te̍le̍ŋ ya̍ I̍ nɔ̍ le̍ nda̍ ndu̍ tūsīo̍o̍ chōo̍ wo̍ ō fūūlu̍u̍.

⁹Wānāā kēndīāā mākīle̍pīi̍ya̍, tē ā kūɛ̄ kīle̍pīi̍ya̍ŋ kēndīo̍o̍ pɛ̍, mā mɛ̄i̍ mā ti᷄ŋ kɔ̄ɔ̄lī. Vīīya̍ bɛ̄ɛ̄, tē ā pɛ̄l dīō wāŋndo̍ īchɔ̄l pɛ̍, nyɛ̄m nda̍ yēēmā le̍ chūa̍a̍ wo̍ŋ, mu̍ŋ ko̍ni̍ nda̍ chūā ni̍, ŋ̄ tɔ᷄ŋ ki̍nɛ̍i̍ mā mɛ̄i̍ lo̍ŋ.

¹⁰Kɛ̍ wānāa̍ fu̍la̍ o̍ pūlāle̍ I̍i̍sɔ̄le̍ŋ chōo̍ wa̍ nda̍ nda̍, ī yɔ̍nūŋ ni̍ŋ le̍nde̍ a̍ nda̍ le̍. I̍ cho̍ lɛ̄ŋndē I̍dɔ̄mnde̍ŋ dīndī tɛ̍ɛ̍, ndu̍yɛ̍ fo̍ndāŋndā wāŋnda̍ ā vīŋīŋ nda̍ŋ mī chɔ̄ɔ̄mūūla̍ŋ kpe̍nde̍ke̍le̍, wānā o̍ wānā nɔ̍lā lɛ̍ mbō vēŋnu᷄ŋ te̍. Wānā o̍ wa᷅na̍ cho̍ I̍dɔ̄m, ā chō hūnɔ̄ɔ̄ nyɛ̄ pālāā bɛ̄ndōo̍ sɔ̄lā. Wāŋndo̍ ndu̍ pi̍la̍ ni̍, chūāā ndūa̍a̍ ni̍, wānāya᷅ŋ ndɔ̍ŋ ni̍, a̍ wānāā nda̍ chīɛ̄ɛ̄li̍āŋ nda̍, ā tɛ̄ɛ̄mbūū ni̍ŋ nda̍ kpo̍u̍, ō pīlɛ̍ bɛ̍ɛ̍ ā mɛ̍ī ni̍ŋ te̍.

¹¹Kɛ̍ ndu̍yɛ̍, vīi̍ya̍a̍ nyāa̍ lo᷅ ni̍ŋ yo̍o̍mū wa̍, I̍ cho̍ nda̍ māndā mī chi̍i̍ndi̍a̍a̍ yōōmūlā ndāla̍ŋ. Wāŋ lāāndūāā nyāa̍ pīāāndūāā ndāa̍ ā wū ni̍ŋ nda̍, ā tīīndāŋ ni̍ŋ ya̍ le̍ mī ma̍la̍ nda̍.”

¹²Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Wāŋnda̍ I̍dɔ̄m, tē wānāā nda̍ a̍a̍ nɔ̍ le̍ kōlɔ̄ɔ̍ o̍ tāāla̍ dɛ̍nɛ̍ pa̍lāa̍ ni᷄ŋ te̍ wa̍ ā ko᷄l o̍ tāālā ko̍ŋ ni᷄ŋ pɛ̍, ɔ̍ɔ̄ nya̍, lā nɔ̄ mī lā ko᷄l o̍ tāālā ko̍ŋ ni᷄ŋ mī tu̍sī nya̍ nyɛ̄ pālāā chōo̍.

¹³Ya̍ Mɛ̍lɛ̄ka̍ I̍ te̍ŋnu᷄ŋ, mɛ̄ɛ̍ mī to̍sa̍ mī Bɔ̍si̍lūā chi̍e̍e̍ o̍ lo̍ pɔ̄m. Wānā o̍ wānā cho̍ hūnɔ̄ɔ̄ Bɔ̍si̍lu̍a̍ chɔ̄ mī kɔ̄ndɔ̄fi̍llo̍ ō bīī ndu̍. Si̍ɔ̍mbu̍la̍ŋ bɛ̄ndūla̍ŋ lā chō hūnɔ̄ɔ̄ Bɔ̍si̍lu̍a̍ bīyɔ̄ɔ̄ ndu̍yɛ̍ mbō sīmnu᷄ŋ wa᷅ŋnda̍ o̍ lāsōndō māā tāāmāsi̍ le̍ wāŋnda̍ sēndi̍o̍o̍ hāndɔ̄ɔ̍ chōo̍. Ndu̍yɛ̍ o̍ ko̍ŋ kɔ̍ɔ̍lī, chi̍e̍e̍ŋ ndɔ̄ŋ pɔ̍mbɔ᷄ŋ kpo̍u̍ ŋ̄ chō hūnɔ̄ɔ̄ pīɔ̄l mī ŋ̄ sīmnu᷄ŋ pɔ᷅mnda̍ŋ le̍ fɛ̍ɛ̍ŋ a̍ fɛ̍ɛ̍ŋ.

¹⁴“Wāŋnda̍ I̍dɔ̄m, I̍ tu̍e̍ī yōōŋgū Mɛ̄lɛ̄ka̍ Ya̍a̍wɛ̄ɛ̄ o̍ yɔ̍ŋ a̍ nya̍ o̍kɔ̄ɔ̄ wo̍. Ō vēm ki̍i̍la̍nɔ̍ɔ̍ o̍ lɛ̄ŋnde̍ ni᷄ŋ, mbo̍ dīmūl lɛ̄ŋīī kēŋ āā, lā chūūŋgīāā pūa̍a̍ chɔ̄ūwāa̍ nyāa̍ na̍a̍ pi᷅lɛ̍ mī lā kɔ̍ chi᷅ŋa̍la᷅ŋ I̍dɔ̄m a̍ sɔ̍ŋgɔ̄ɔ̍. Lā chɔ̍ŋ le̍ kɔ̄la̍ŋ sɔ̍ŋgɔ̍ɔ̍ a̍ ndu̍.”

¹⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ tōsā mī kpāāya̍ nyāa̍ ō dɔ̄ɔ̄na̍ŋ lɛ᷅ŋnde̍ tɛ̄ɛ̄ŋ kpo̍u̍, ndu̍yɛ̍ mī to̍sa̍ mī lɛ̄ŋnde̍ chē nya̍ chɔ̍dɔ̄.

¹⁶Lā wa̍ wāŋnda̍ sīōōŋīī bɛ̄ndūe̍i̍ lūēīyo̍ le̍ mā wo̍ nya̍, ndu̍yɛ̍ mi̍ lā dūāūnu᷄ŋ yo̍ŋgāa̍, fo̍ndōle̍, le̍ mɛ̄ɛ̍ nya̍ chō o̍ fo̍nda᷄ŋ cho̍ o̍ pōūtā vīlɛ̄īla̍ŋ tɛ̄ɛ̄ŋ, ndu̍yɛ̍ mi̍ lā wā o̍ pēmbīī vīlɛ̄ī bɛ̄ndūe̍i̍ chōo̍ ve̍ yɛ̍, kɛ̍ lā hūi̍ nya̍ pi̍la̍. Mi̍ chē bɛ̍ɛ̍ mi̍ lā wā o̍ pēmbīī vīlɛ̄ī kēŋ chōo̍ lo̍ŋ, mɛ̄ɛ̍ kōya᷄ŋndo̍ ō tāŋgūl nu̍a̍ā wāa̍ŋndē ndɔ̄le̍ŋ chōo̍ pɔ̍ mbō wānu̍ŋ lo̍ŋ yɛ̍ ni̍, I̍ cho̍ nya̍ tūsī lo̍ŋ.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

¹⁷Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Wānā o̍ wānā cho̍ hūnɔ̄ɔ̄ I̍dɔ̄m chɔ̄ mi̍ sīōōŋīī bɛ̄ndūe̍i̍ ī bīī ndu̍. Wānā o̍ wāna̍ wa᷅ ni̍ŋ hi̍o̍u̍wɔ̄ɔ̍, kɔ̄ndɔ̄fi̍llo̍ chō nda̍ bīyɔ̄ɔ̄ mā hi᷄ŋ bōlle̍, a̍ nyɛ̍ yɔ̍nūŋ ni̍ŋ a̍ I̍dɔ̄m ki̍nɛ̍i̍ yo̍.

¹⁸Mɛ̄ɛ̍ So̍dɔ̄m a̍ Kōmo̍o̍lūā, lātūlu̍ a̍ chi̍e̍e̍ŋ ba̍lu̍ mu̍ŋ ndo̍ŋ ŋ̄ tāmbu̍ yɛ̍, le̍nde̍ I̍ yɔ̍nūŋ ni̍ŋ a̍ I̍dɔ̄m ni̍. I̍dɔ̄m o̍ cho̍ hūnɔ̄ɔ̄ sīmnɔ᷄ŋ nāa̍ wāna̍ chi̍e̍e̍ o̍ wāna̍ chi̍e̍e̍ o̍ che᷅l te̍ wa̍. Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

¹⁹Mɛ̄ɛ̍ kpɔ̍kūŋndo̍ ō fūlā nu̍a̍ā fa̍ŋ o̍ būndɛ̍ Chɔ̍ɔ̍dāŋ ndo̍ ni᷄ŋ, mbō tīsa̍ sāa̍ chōo̍ o̍ fo̍ndā māndāā lāsāa̍ yɛ̍, le̍nde̍ ya̍ I̍ chīŋa̍la᷅ŋ ni̍ŋ wa᷅ŋnda̍ I̍dɔ̄m ni̍, mī to̍ū nda̍, mī so̍li̍ nda̍ o̍ lɛ̄ŋnde̍ŋ nde᷅ŋ ni᷄ŋ o̍ lēpīlɛ̍ ni᷄ŋ kpe̍. O̍ ko̍ŋ mī hɛ̍li̍ wāna̍ ya̍ I̍ ye̍e̍ma̍ mbō wa̍ māsāa̍ lɛ̄ŋndē I̍dɔ̄mnde̍ŋ chōo̍ wo̍, mī kɛ̍si̍ ndu̍ lo̍ŋ. Ō nɛ̄ɛ̍nɛ̍ cho̍ yɛ̄ mbo̍ nɔ̄ kpāāyāa̍ māā ya̍ Mɛ̍lɛ̄ka̍? Ō nɛ̄ɛ̍nɛ̍ nɔ̍lā yɛ̍ mbō sīmu̍l la̍? Māsa̍ kūɛ̍ɛ̍nɛ̍ cho̍ yɛ̄ mbō si᷄m ya̍ o̍ hɔ̄l? Wānā ko̍ŋ ō chō le̍”

²⁰Le̍la̍ŋ lā ya̍ŋ ni᷅la̍ŋ mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ kɛ̍ɛ̍si̍a̍a̍ le̍ tōsāa̍ a̍ I̍dɔ̄m ndo̍, ndu̍yɛ̍ mī lā tūe̍i̍ vɛ̄lɛ̄ nyɛ̄ o̍ tu̍u̍ le̍ tōsāa̍ a̍ Tɛ̍māŋ ndo̍. Ō dīmi̍ āā, “Wāŋnda̍ ha̍ā, chūāā ndāā pɔ̍mbūa̍a̍ bɛ̍ɛ̍, ya̍a̍mɔ̍ɔ̍wa̍ ā chō nda̍ wā hūnɔ̄ɔ̄ sɛ̄ɛ̄sūūwo̍, le̍ kɔ̄la̍ŋ a̍ nda̍. Fo̍ndāŋndā wāŋnda̍ ha̍ā lā chō hūnɔ̄ɔ̄ pīɔ̄l mī lā lo̍ fo̍ndō, mī sīōōŋnde̍ bīī wānā o̍ wānā.

²¹Dēlɔ̄ɔ̄ lɛ̄ŋndē I̍dɔ̄mnde̍ŋ lē chō wo̍, chi̍e̍ēŋndo̍ kpo̍u̍ ō chō hīīlɔ᷄ŋ. Ndu̍yɛ̍ tē I̍dɔ̄m o̍ de̍l pɛ̍, cha᷄ŋnda̍ wāŋnda̍ I̍dɔ̄m a̍ wa᷅ ni̍ŋ nda̍ŋ, cha᷄ŋnda̍ ndāla̍ŋ lā wā ni̍ŋ wānāa̍ ho̍lnu̍ŋ pe̍e̍ si̍a̍ŋā mɛ̄ŋmā īhɛ᷄llo̍ pɔ̍ wa̍ kōmāllo̍.

²²Mɛ̄ɛ̍ kōya᷄ŋndo̍ ō tūāl nu̍a̍ā fɛ̍ɛ̄ a̍ kūmba᷅ŋnda̍ŋ lā pɛ̄ɛ̄ŋgāā le̍ nyɔ̄ɔ̍ kēlēŋā chūa̍a̍ yɛ̍, le̍nde̍ ya̍a̍mɔ̍ɔ̍wa̍ ā hūŋ ni̍ŋ le̍ Bɔ̍si̍lu̍a̍ dēlɔ̄ɔ̍ chōo̍ ni̍. Tē pāa̍le̍ le̍ŋ lē fūūlu̍u̍ pɛ̍, so̍vɛ̄i̍ya̍ I̍dɔ̄m kpo̍u̍ sīōōŋīī bɛ̄ndūe̍i̍ chō nda̍ bīyɔ̄ɔ̄ mī kɔ̄lta̍ŋ lā yɔ̄ŋndu̍ŋ nda̍ ni᷄ŋ pu̍lāŋ pūlāŋ mɛ̄ɛ̍ wāna̍ yo᷄l nda̍ sɔ̄ɔ̄ŋgūū ho̍ō īkɛ̄i̍ le̍ vīōlɔ̄ɔ̍ wo̍ ō wā nu̍a̍ā yɛ̍.”

²³Nyɛ̄ Mɛ̄lɛ̄ka̍ Ya̍a̍wɛ̄ɛ̄ dīmi̍ a̍ Dāma̍si̍kɔ̍ɔ̄ o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, “Wāŋnda̍ Ha̍ma̍tī chi̍e̍e̍, a̍ wāŋnda̍ A̍pa̍a̍dī chi̍e̍e̍ a̍ cho̍ būūla᷄ŋnda̍ŋ kpe̍e̍kpe̍i̍, fo̍ndōle̍ yōōŋgū nda̍ tūēī yo̍ ō cho̍ yo̍o̍ŋgū kɛ̄ndɛ̄ le̍. Sīōōŋīī bɛ̄ndūe̍i̍ ī bīī nda̍. Kɔ̄lta̍ŋ lā yɔ̄nu̍ŋ nda̍ ni̍ŋ yu̍lāŋ yūlāŋ, mɛ̄ɛ̍ Pēe̍ Mɛ̄ŋmā Īhɛ᷄llo̍ ō chō nu̍a̍ā ō pɛ̍ŋgī hi̍i̍lɔ᷄ŋndo̍ le̍ yɛ̍.

²⁴Sīōōŋnde̍ bīī wāŋnda̍ Dāma̍si̍kɔ̍ɔ̄ mi̍ dīāllo̍ŋ ŋ̄ wū nda̍ pɔ̍lī pɔ̍lī. Ā mūli̍ŋ ma̍ wā nyāānɔ᷄ŋndo̍ kpe̍e̍kpe̍i̍. Sīōōŋīī bɛ̄ndūe̍i̍ ī bīī nda̍. Kɔ̄lta̍ŋ lā tāmbu̍ nda̍ pɛ̍. Mɔ̍nɛ̍i̍ bɛ̍ndūe̍i̍ ī pɛ̄ o̍ kɔ̄ltā ndāla̍ŋ ni̍ŋ. Ā yɔ̄nu̍ŋ ko̍, mɛ̄ɛ̍ wānā la̍nɔ̍ɔ̍ te̍le̍ŋ ndɔ̄ vi̍a̍lāa̍ ō fūūlūū nu̍a̍ā mbō wa̍ o̍ sāŋgā kōŋ ni᷄ŋ yɛ̍.

²⁵Chi̍e̍e̍ tɔ̍ɔ̍ bɛ̍ndōo̍ ho̍ō, ō wānāā ndūa̍a̍ wa̍ ho̍ō a̍ kɔ̄l kɛ̄ndɛ̄ le̍ te̍le̍ŋ o̍ te̍le̍ŋ ndo̍ ō pīɔ̍l, mbo̍ lō pɔ̄m.

²⁶Tē pāa̍le̍ le̍ŋ lē fūūlu̍u̍ pɛ̍, chūāā pīāāndūa̍a̍ cho̍ chi̍o̍o̍ ho̍ō ni᷄ŋ nda̍ ā wā ni̍ŋ nda̍ dīūwo̍ o̍ nɛ̄īla̍ bɛ̄ndūla̍ŋ chōo̍, ndu̍yɛ̍ o̍ ko̍ŋ kɔ̍ɔ̍lī, so̍vɛ̄i̍ya̍a̍ ndāa̍ kpo̍u̍ mā tɛ̄ɛ̄mbu̍u̍ nda̍.

²⁷I̍ cho̍ tōsā mī sāāsa̍ ba̍lu̍ Dāma̍si̍kɔ̍ɔ̄ wo̍ ō sāa̍ o̍ yīŋ, ndu̍yɛ̍ o̍ ko̍ŋ kɔ̍ɔ̍lī, mī to̍sa̍ mī māsāa̍ Bɛ̄nīha̍da̍dī, fo̍ndāŋndā ndɔ̄la̍ lēmāsāla̍ ka̍lā ka̍lā la̍ŋ lā ŋūɛ̄.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ wo̍ cho̍ ko̍ŋ ni̍.

²⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍ mbo̍ kē ya̍ yōōŋgōo̍ le̍ yu̍ŋgu̍ Kɛ̍dāā wo̍, ndu̍yɛ̍ a̍ būŋgāŋ lēmāsa᷄ŋ Ha̍sɔ̄ɔ̄, ŋ̄ Māsāa̍ Nɛ̄bu̍kānɛ̍ɛ̍sā ho̍ō Ba̍bi̍lɔ̄ŋ ndu̍ o̍o̍ chīŋa̍la᷅ŋ mbo̍ yām mu̍ŋ ndo̍ŋ. Nyɛ̄ Mɛ̄lɛ̄ka̍ dīmi̍ wo̍ cho̍ ho̍ō ni̍. Mbo̍ dīmī āā, “Ya̍a̍mɔ̍ɔ̍wa̍ lā chɔ᷄ŋ mī lā kɔ̍ chi᷅ŋa̍la᷅ŋ yu̍ŋgu̍ Kɛ̍dāā wo̍. Lā kɔ̍ tɛ̍ɛ̍mbūū wānāa̍ cho̍ ka̍ŋ ba᷅ pāa̍le̍ŋ lē chāŋndo̍ wa̍.

²⁹Tɛ̄ndɛ̍i̍la̍ wāŋnda̍ ha̍ā ā lɔ̄l le̍ni̍ŋ nda̍ŋ kpo̍u̍ a̍ chɔ̄lūāā ndāa̍, wāŋnda̍ chō hūnɔ̄ɔ̄ lākɔ̄ŋnɔ᷄ŋ a̍ nda̍. Kōlāla̍ tɛ̍ndɛ̄i̍la̍ la̍ŋ ndu̍yɛ̍ a̍ nyɛ̄ o̍ nyɛ̄ kɛ̄ndɛ̄ nda̍ nɔ̄, ā chō hūnɔ̄ɔ̄ lākɔ᷄ŋ a̍ mu̍ŋ lātūlu̍ a̍ nyɔ̍mi̍a̍a̍ ndāa̍ kpo̍u̍. Wāŋnda̍ chō nda̍ hūnɔ̄ɔ̄ dīmūl chōo̍ cho̍o̍ āā, ‘Mbɔ̄ lā nɔ̍ ba᷅ o̍ bā nya̍ mūlīŋ te̍. Sɔ̄ɔ̍ŋ to̍sā mī sīōōŋīī bɛ̄ndūe̍i̍ ī bīī wānā wo̍ŋ ŋ̄ chō nya̍ ŋ̄ bālāā kpɔ̍kɔ̍su̍.’ ”

³⁰Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Wāŋnda̍ Ha̍sɔ̄ɔ̄, lā kēle̍ŋa̍ nya̍a̍nɔ᷄ŋ mī lā ma᷄l chi̍o̍o̍. Lā kɔ̍ vi̍ŋi᷄ŋ o̍ būūlūla̍ yi̍ŋgi̍lɛ̍i̍la̍ bɛ̄ndūla̍ŋ ni̍ŋ mī lā cha᷄l lo̍ŋ. Kāni̍ fo̍ndōle̍, Māsāa̍ Nɛ̄bu̍kānɛ̍ɛ̍sā o̍ cho̍ Ba̍bi̍lɔ̄ŋ ndo̍ ō yīi̍ nya̍ de̍fo̍o̍ le̍ nya̍ hūnɔ̄ɔ̍ chīŋa̍la᷅ŋndo̍. Ō chīi̍ kɛ̄ɛ̄sīāā le̍ nya̍ hūnɔ̄ɔ̍ dēlɔ̄ɔ̍ chōo̍.”

³¹Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ya̍a̍mɔ̍ɔ̍wa̍ āā, “Lā chɔ̍ŋ mī lā kɔ̍ chi᷅ŋa̍la᷅ŋ lɛ̄ŋnde̍ cho̍ le᷅ŋ o̍ kɔ̄l nyūlōo̍ ni᷄ŋ mi̍ lē yīya᷄ŋ māā wānā o̍ wānā nɔ̍lā mbō yɔ᷄ŋ nda̍ nyɛ̄ le̍ŋ le̍ŋ. Le̍ŋ le̍ yɔ̍nūŋ ni̍ māā lɛ̄ŋnde̍ cho̍ŋnu̍ŋ nde᷅ŋ lē būūla̍ŋ bɛ̍ɛ̍ le̍ dīōlā lākpākī nɔ̄ kɛ̄lɛ̄ŋgāāle̍, mī lē būūla̍ŋ le̍ yɔ̄mīī nda̍ kīīndīāā la̍di̍o̍ ve̍ le̍ŋ, lē wānāā ndūa̍a̍ ā chōŋnu᷄ŋ le᷅ŋ o̍ bā ā ndāa̍ chōo̍ le̍ŋ.

³²Nyɔ̍mi̍a̍a̍ wāŋnda̍ ha̍ā a̍ chɔ̄lūāā ndāa̍ ā pīli̍a̍a̍ kpo̍u̍, nya̍ nɔ̍ ni̍, lā pūŋga̍ nda̍ mī lā kūɛ̄nu᷄ŋ a̍ nda̍. I̍ cho̍ wānāa̍ ki̍lī ha̍ā yīīŋnde̍ mā mɛ̄i̍ ndi̍ ī bīŋgī bi̍ŋgī wa̍ sɛ̄ŋī mā tīu̍ bā o̍ bā fe̍e̍, ndu̍yɛ̍ mī to̍sa̍ mī nyɛ̄ pālāā bɛ̄ndōo̍ ō kōma̍l nda̍, chɔ̄nɔ᷄ŋndo̍ bā o̍ bā fe̍e̍.

³³Ha̍sɔ̄ɔ̄ o̍ cho̍ hūnɔ̄ɔ̄ pīɔ̄l mbō sīmnu᷄ŋ pɔ᷅mndo̍ le̍ fɛ̍ɛ̍ŋ a̍ fɛ̍ɛ̍ŋ. Ō chō hūnɔ̄ɔ̄ sīmnɔ᷄ŋ nāa̍ tūŋāā yōndūa̍a̍ ā chāl la̍. Wāna̍ chi̍e̍e̍ o̍ wāna̍ chi̍e̍e̍ o̍ che᷅l lɛ̍ ni̍ŋ Ha̍sɔ̄ɔ̄ chi̍e̍e̍ le̍.”

³⁴Mɛ̄ɛ̍ Sɛ̄dīka̍yā o̍ si̍mnu᷄ŋ ma̍sāa̍ le̍ Chu̍dā, mi̍ Mɛ̄lɛ̄ka̍ Ya̍a̍wɛ̄ɛ̄, o̍ su̍a̍ā nāa̍ ya̍ chu̍a̍ mbo̍ kē ya̍ yōōŋgōo̍ a̍ lɛ̄ŋndē Ɛ̍lāmnde̍ŋ o̍kɔ̄ɔ̄.

³⁵Nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ wo̍ cho̍ ho̍ō ni̍. Ō dīmī āā, “I̍ cho̍ pūa̍a̍ chɔ̄ūwa̍ Ɛ̍lām, a̍ sɔ̍ŋgā a̍ chīɔ̄ūla̍ŋ ma̍ tōsā mi̍ Ɛ̍lām o̍ si̍mnu᷄ŋ lɛ᷅ŋndē kpāāyā bɛ̍ndū wa̍ dīū kpo̍u̍.

³⁶I̍ cho̍ tōsā mī ya̍a̍mɔ̍ɔ̍wa̍ ā chɛ᷄ŋ o̍ chi̍e̍ēŋndo̍ kpēŋgūŋ hi̍ɔ̍ɔ̍lo̍ŋ mā hīŋ a̍ kpāāyā bɛ̍ndōo̍ mɛ̄ɛ̍ hūēīyīī bɛ̄ndūe̍i̍ ī hūŋ nu̍a̍ā yɛ̍, mā hu᷄ŋ de᷅l lɛ̄ŋndē Ɛ̍lāmnde̍ŋ chōo̍. I̍ cho̍ tōsā mī wāŋnda̍ Ɛ̍lām a̍ sɛ̍ŋi̍ŋ ba᷅ o̍ bā fe̍e̍ o̍ chi̍e̍ēŋndo̍ ni᷄ŋ. Lēlɛ̄ŋ o̍ lēlɛ̄ŋ lē lo᷅ ni̍ŋ o̍ chi̍e̍ēŋndo̍ ni᷄ŋ mī wānāā nda̍ sōlī ni̍ŋ o̍ lɛ̄ŋndē Ɛ̍lāmnde̍ŋ ni᷄ŋ nda̍ ā kɛ̄ɛ̍ lākɔ̄ lo̍ŋ te̍.

³⁷I̍ cho̍ tōsā mī sīōōŋīī bɛ̄ndūe̍i̍ ī bīī wāŋnda̍ Ɛ̍lām le̍ ya̍a̍mɔ̍ɔ̍wa̍a̍ ndāa̍, ya̍a̍mɔ̍ɔ̍wa̍a̍ ndāa̍ cho̍ nɛ̄īla̍ŋ nūūvīa̍a̍ le̍ nda̍ dīūwo̍ wa̍. I̍ cho̍ tu̍mbe̍ dɔ̍u̍nɔ᷄ŋ o̍ ka̍lā ka̍lā a̍ wāŋnda̍ Ɛ̍lām, mī tu̍si̍ nda̍ dɛ̍nɛ̍ pa̍lāa̍ chōo̍. I̍ cho̍ ya̍a̍mɔ̍ɔ̍wa̍ vīōmɔ̄ɔ̄ mā kɔ̍ di̍ū nda̍ mā bāsu̍ nda̍ tɛ̍ɛ̍.

³⁸Māsā ndā bɛ̍ndōo̍ ni̍, wānāā ndāā bɛ̍ndūa̍a̍ ni̍, I̍ cho̍ nda̍ dīū kpo̍u̍, mī lo̍ o̍ ko̍ŋ mī kɛ̍si̍ kpe̍e̍kpe̍i̍ ni̍ lēmāsāa̍ Ɛ̍lām chi̍e̍e̍.

³⁹Kɛ̍ ndu̍yɛ̍ te̍le̍ŋ cho̍ vɛ̄lɛ̄ fūūlūū, I̍ cho̍ tōsā mī lɛ̄ŋndē Ɛ̍lāmnde̍ŋ nāŋɔ̄ɔ̄ māā pāāndū.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.