Read Southern Kisi Chɛ̄lūīma̍yā 5 Bible Online

Chɛ̄lūīma̍yā 5 - Southern Kisi bible

Chɛ̄lūīma̍yā 5

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋndā Chūlu̍sɛ̄lɛ̄m lā bālu̍ o̍ nɛ̄īla̍ bɛ̄ndūla̍ŋ Chūlu̍sɛ̄lɛ̄m kpo̍u̍ mī nya̍ pi̍la̍ mɛ̄ɛ̄ndi̍a̍ŋ. Lā kɔ̍ o̍ lɔ̍ɔ̍la̍ŋ ni᷄ŋ mī lā kēēla̍ hɔ̄lla̍ kpo̍u̍. Chūlu̍sɛ̄lɛ̄m kpo̍u̍ tē lā sāālu̍ŋ wa᷅ŋndo̍ ō pīlɛ̍ bɛ̍ɛ̍ pɛ̍ o̍ cho̍ sa̍kpō, ndu̍yɛ̍ mbo̍ wā wāna̍ tōnya̍ ya̍ Mɛ̍lɛ̄ka̍ o̍ hɔ̄l lo̍ pɛ̍, yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nya̍ wāŋnda̍ Chūlu̍sɛ̄lɛ̄m a̍ to̍sa̍, I̍ ma̍l nya̍ kpo̍u̍ le̍ ndu̍.

²Mi̍ chē bɛ̍ɛ̍ tē lā wa̍ būŋga᷄ŋ chūa̍a̍ ō kālā ka̍lā pɛ̍ lā vēēlu̍ dīōlā nīla̍ŋ ya̍ Mɛ̍lɛ̄ka̍ Ya̍a̍wɛ̄ɛ̄, kɛ̍ o̍ chōōla̍ŋ chōo̍ ko̍ni̍ nya̍ chūā bu̍ŋgāŋ mu᷅ŋ ni̍.”

³O̍o̍ Mɛ̄lɛ̄ka̍ Ya̍a̍wɛ̄ɛ̄, ya̍ Chɛ̄lūīma̍yā I̍ si̍nā māā yēēmɛ̍i̍ nu̍mnde̍ kpe̍e̍kpe̍i̍ i̍ cho̍ ni̍ māā wānāā nūmnda̍ ā wa̍ nu̍m o̍ hɔ̄l sa̍kpō. Le̍ yɔ̄ŋndā ndāla̍ wɔ̍ɔ̍ŋnda̍ŋ, ma̍ tūsī nda̍ nyɛ̄ pālāa̍ chōo̍ le̍ mā si̍la̍ nda̍, kɛ̍ ā ye᷄ŋ nu̍m lānī le̍. Ma̍ tɛ̄ɛ̄mbūū wānāā bɔ̄ɔ̍ bɔ̍ɔ̍ nda̍ tɛ̄ɛ̄ŋ le̍ nyɛ̄ nda̍ tōsa̍ wo̍, le̍ hāli̍kpe̍ŋ mā mīŋgi̍ nda̍ o̍ nɛ̄ī, kɛ̍ ā tūi̍i̍ nu̍m dīōm te̍. Ma̍ bīī ma̍ tōsā bōllē kālāle̍ŋ, ā chɛ᷄l mā ma᷄l yɔ̄ŋndā ndāla̍ wɔ̍ɔ̍ŋnda̍ŋ te̍.

⁴Mi̍ di̍mī o̍ kɔ̄l ni̍ŋ a̍a̍, “Wāŋnda̍ ha̍ā wānāā tāmbɛ̍i̍ya̍ nda̍ chō ni̍, ā nɔ̍ kɔ̍l kālu̍ o̍ kɔ̄l kālu̍ le̍. A̍ tōsa̍ dīɔ̄mīī bɛ̄ndū. Ā si̍nā nɛ̍i̍ Mɛ̄lɛ̄ka̍ Ya̍a̍wɛ̄ɛ̄ o̍ ye̍e̍ma̍ nda̍ mā kūɛ̄ lēchōo̍ wo̍ le̍, ā si̍nā sa̍wāla̍ Mɛ̄lɛ̄ka̍ ndāa̍ le̍.

⁵Le̍ he̍ī, I̍ cho̍ lākɔ̄ nāa̍ wānāa̍ cho̍ nda̍ chīla̍ŋ nda̍ chūā mī kɔ̍ so̍ō nāa̍ nda̍ chūā, kāni̍ fo̍ndōle̍, nda̍ nda̍ sīnā nɛ̍i̍ Mɛ̄lɛ̄ka̍ Ya̍a̍wɛ̄ɛ̄ o̍ ye̍e̍ma̍ nda̍ mā kūɛ̄ lēchōo̍ wo̍, ā sīnā sa̍wāla̍ Mɛ̄lɛ̄ka̍ ndāa̍ ō ke̍ nda̍ la̍ŋ.” Kɛ̍ nda̍ bɛ̍ɛ̍ ma̍ kɛ̄ɛ̄ le̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ wo̍ nīla̍ŋ yāŋɔ̄ɔ̍, ma̍ kɛ̄ɛ̄ māā Mɛ̄lɛ̄ka̍ nɔ᷅ nda̍ kpāāyā cho̍o̍ le̍.

⁶Le̍ he̍ī, kpɔ̍kūŋnda̍ chō fūlā o̍ būndɔ̍ɔ̍ ni᷄ŋ mā hu᷄ŋ chi᷅ŋa̍la᷅ŋ nda̍. Vīsīāā bīyāa̍ ā chō chɔ̄nɔ᷄ŋ o̍ po̍llo̍ ni᷄ŋ mā hu᷄ŋ sɛ̍ɛ̍sīāā nda̍. Tāmbi̍lla̍ chō hūnɔ̄ɔ̄ mā hu᷄ŋ hi̍nī mɛ̄ŋgɛ̄lāa̍ o̍ chi̍e̍e̍ŋ ndāŋ bɛ̍ndū bɛ̄ndo᷄ŋ īkɛ̄i̍, le̍ wāna̍ cho̍ fūlā mā de᷄l ndu̍ chōo̍ mā sɛ̄ɛ̄si̍a̍a̍ ndu̍ wo̍. Kāni̍ fu̍u̍le̍ le̍ yɔ̄ŋndā wɔ̄ɔ̍ŋndā bɛ̄ŋndā wāŋnda̍ Chūlu̍sɛ̄lɛ̄m a̍ to̍sa̍ a̍ Mɛ̄lɛ̄ka̍ la̍ŋ, le̍ mɛ̄ɛ̍ nda̍ bīī ma̍ wā hīōūwɔ̄ɔ̍ lāchī a̍ ndu̍ dīōmndo̍ kīɔ̍ɔ̍ le̍ te̍le̍ŋ o̍ te̍le̍ŋ o̍ yɛ̍.

⁷Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Wāŋnda̍ Chu̍dā, vɛ̄ɛ̍nɛ̍ ya̍ Mɛ̍lɛ̄ka̍ māl lɛ̍ nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ tē lā māŋga̍la̍ŋ te̍? I̍ me᷅l nya̍ le̍ la̍ŋ te̍. Chūāā nyāa̍ bīī nda̍ kpo̍u̍ ma̍ kɛ̄ɛ̄ ya̍, ma̍ mūli᷄ŋ nyɛ᷅m fo̍ndō fo̍ndo᷄ŋ sōōlūūwo̍ māā mɛ̄lɛ̄ka̍a̍ ndā. Mɛ̄ɛ̍ yīa̍a̍ŋ mā bīī nda̍, mi̍ lo᷅ o̍ ko̍ŋ mi̍ ke᷅ nda̍ nyɛ̄ dīa̍a̍ ta̍u̍ ta̍u̍ mɛ̄ɛ̍ kpɛ̍ nda̍ yēēma̍ yɛ̍. Kɛ̍ ma̍ kɛ̄ɛ̄ ya̍, ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ nda̍, mɛ̄ɛ̍ wānā la̍nɔ̍ɔ̍ ō mɛ̍ī nu̍a̍ā pɔ̍nɔ̍ ndɔ̄ mbō tōl wāŋ pīāāndūāā chēle̍ŋnda̍ kɔ̄ɔ̄lī le̍ tīɔ̄mɔ̄ɔ̍ yɛ̍.

⁸Mɛ̄ɛ̍ su̍a̍ā pīāāndūa̍a̍ ā pūm nu̍a̍ā mā wa̍ a̍ yēēmɛ̍i̍ bɛ̍ndūe̍i̍ le̍ hēlɔ̄ɔ̍ yɛ̍, le̍nde̍ nda̍ wa̍ ni̍. Le̍nde̍ yēēmɛ̍i̍ ī wā nda̍ ni̍ le̍ mā wa̍ a̍ wānāā nda̍ chīɛ̄ɛ̄li̍āŋ nda̍ lāāndāā ndāa̍.”

⁹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Vɛ̄ɛ̍nɛ̍ wāŋnda̍ ā wā yɛ̍ dɛ̍nɛ̍ wɔ̍ɔ̍ŋ wāā nu̍a̍ā tōsāa̍ I̍ tu̍sī nda̍ dɛ̍nɛ̍ pa̍lāa̍ chōo̍ le̍ nyɛ̄ nda̍ tōsa̍ wo̍ le̍? Dɛ̍nɛ̍ pa̍lāa̍ ya̍ I̍ tu̍sī nda̍ chōo̍ ni̍. Lɛ̄ŋnde̍ŋ lē ve᷅m yɔ᷅ŋ wɔ̄ɔ̍ŋ wāā nu̍a̍ā tōsāa̍ mī kɛ̍ɛ̍ lɛ̄ŋndē lēŋ dɛ̍nɛ̍ pa̍lāa̍ tūsī chōo̍ le̍ yɔ̄ŋ ndā wɔ̍ɔ̍ŋndo̍ le̍.

¹⁰Le̍ he̍ī, I̍ cho̍ ya̍a̍mɔ̍ɔ̍wa̍ mālɔ̄ɔ̄ mā kīīŋu̍u̍ yɔ̄mīī ndɛ̄i̍ ku̍a̍mɛ̄i̍ o̍ kpe̍le̍la̍ ndāla̍ īyɔ̄mnda̍ŋ ni᷄ŋ, kɛ̍ ndu̍yɛ̍ mī di̍mu̍l nda̍ māā ā tɛ̍ɛ̍mbūū ndi̍ kpo̍u̍ le̍. I̍ cho̍ ya̍a̍mɔ̍ɔ̍wa̍ dīmūl mā kīli̍ ki̍li̍ lɛ̄ūwūŋ yɔ̄mīī ndɛ̄i̍ ku̍a̍mɛ̄i̍, kāni̍ fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄, wāŋnda̍ ha̍ā ā cho̍ lɛ̍ wānāā nī le̍.

¹¹Wāŋnda̍ I̍sɔ̄lūɛ̄ī ni̍, a̍ wāŋnda̍ Chu̍dā, ā bīī ma̍ kɛ̄ɛ̄ le̍ ya̍ dīōmndo̍ tūēīyɔ̄ɔ̍ o̍ nɛ̄ī o̍ nɛ̄ī ni̍ŋ. Ya̍ Mɛ̍lɛ̄ka̍ Ya̍a̍wɛ̄ɛ̄ nyɛ̄ ya̍ I̍ di̍mi̍ wo̍ cho̍ ho̍ō ni̍”

¹²Wāŋnda̍ I̍sɔ̄lūɛ̄ī a̍ sɛ̍ɛ̍ŋgi̍a̍a̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ nda̍ o̍kɔ̄ɔ̄ wo̍, ma̍ wā dīmīo̍o̍ āā, “Mbɔ̄ chōōla̍ŋ ko̍ nda̍ chō dīmīo̍o̍ ni̍, Mɛ̄lɛ̄ka̍ cho̍ na̍a̍ nyɛ̄ o̍ nyɛ̄ yɔ̄ŋ te̍. Dɛ̍nɛ̍ pa̍lāā o̍ dɛ̍nɛ̍ pa̍lāā ō cho̍ na̍a̍ kōmāl te̍. Chɔ̄ū o̍ chɔ̄ū ō ko̍māl na̍a̍ lɛ̄ŋnde̍ŋ te̍, kɛ̄lɛ̄ŋgāā ni᷅ŋ te̍ mī yīmā de᷄l lɛ̄ŋnde᷅ŋ.

¹³Nyɛ̄ o̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ ā chō dīmīo̍o̍, hūēīye̍ ko̍ni̍ o̍ cho̍ ni̍, ō cho̍ yo̍o̍ŋgu̍ tōnya̍ fu̍la̍ o̍ Mɛ̄lɛ̄ka̍ lo̍ le̍. Ndu̍yɛ̍ lāsa̍a̍le̍ o̍ lāsa̍a̍le̍ nda̍ chō sūɛ̍i̍, nda̍ pi̍la̍ la̍ cho̍ yɔ̄nɔ᷄ŋ ni̍.”

¹⁴Le̍la̍ŋ lā tūe̍i̍ nyɛ᷅ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmu̍l la̍ wo̍. Ō dīmi̍ āā, “Chɛ̄lūīma̍yā, le̍ nyɛ̄ wāŋnda̍ ha̍ā ā dīmi̍ ho̍ō wo̍, I̍ cho̍ tōsā mī dīōmnda̍ nīla̍ fu̍lā ni̍ŋ nu̍m o̍ sōndō la̍ŋ lā sīmnu᷄ŋ yi᷅ŋndē bɛ̄ŋnde̍ŋ. Ndu̍yɛ̍ mī to̍sa̍ mī wāŋnda̍ I̍sɔ̄lūɛ̄ī a̍ si̍mnu᷄ŋ māā yɔ̄mīī vēsɛ̍i̍ le̍ mī yīŋndē lēŋ lē lōm nda̍ kpo̍u̍.”

¹⁵Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ āā, “Wāŋnda̍ I̍sɔ̄lūɛ̄ī, I̍ cho̍ ya̍a̍mɔ̍ɔ̍wa̍ vīōmɔ̄ɔ̄ chɔ̄nɔ᷄ŋndo̍ o̍ lɛ̄ŋndē lēvīlte̍ŋ ni᷄ŋ mā hu᷄ŋ de᷅l nya̍ chōo̍. Pūa̍a̍ chɔ̄ūwa̍ o̍ lɛ̄ŋndē kpāāyāle̍ bɛ̄ŋnde̍ŋ ni̍ŋ, a̍ cho̍ o̍ lɛ̄ŋnde̍ cho̍ ni᷅ŋ kāni̍ ma̍si̍ndɛ̄ le̍ŋ ni᷄ŋ nda̍, ā nya̍ si̍nā bɛ̍ɛ̍ su̍ɛ̍i̍ ma̍ŋgālɛ̄ī nda̍ dīmī le̍ wa̍, nda̍ ya̍ I̍ cho̍ vīōmɔ̄ɔ̄ ni̍ mā hu᷄ŋ chi᷅ŋa̍la᷅ŋ nya̍ a̍ sɔ̍ŋgɔ̍ɔ̍.

¹⁶Ndu̍yɛ̍ so̍vɛ̄i̍ya̍ ha̍ā pūa̍a̍ ndāa̍ sɔ̍ŋgā a̍ chīɔ̄ūla̍ŋ nda̍ ā chō so̍vɛ̄i̍ya̍a̍ kpāāyāā bɛ̍ndū, ā nɔ̍ i̍nyi̍ɛ̍ɛ̍ o̍ īnyīɛ̍ɛ̍ le̍ wāna̍ chi̍o̍o̍ dīyɔ̄ɔ̍ le̍.

¹⁷Ā chō nya̍ hūnɔ̄ɔ̄ dēlɔ̄ɔ̄ chōo̍ mā pōōndi̍a̍a̍ chīɔ̄ɔ̄ŋ nya᷄ŋ a̍ nyɛ̄ nyā di̍a̍a̍ kpo̍u̍. So̍vɛ̄i̍ya̍a̍ nyāa̍ wa᷅ŋ lāāndūa̍a̍ kpo̍u̍ ā chō nda̍ hūnɔ̄ɔ̄ dīū, ndu̍yɛ̍ chɔ̄lūāā nyāa̍ bɛ̍ɛ̍, lāsāā ni̍, lānāū ni̍, mā pōōndi̍a̍a̍, o̍ ko̍ŋ kɔ̍ɔ̍lī mā tɛ̄ɛ̄mbu̍u̍ yɔ̄mīī nyɛ̄i̍ mākīle̍pīi̍ye̍ a̍ yɔ̄mīī nyɛ̄i̍ māfi̍kīi̍ ye̍ kpo̍u̍. Chi̍e̍e̍ŋ nya̍ŋ nɔ̍ kpākīla̍ ka̍lā ka̍lā lābɛ̄ŋnda̍ŋ mi̍ lā tīīnda᷄ŋ mu̍ŋ ndo̍ŋ kpo̍u̍ ā chō mu̍ŋ hūnɔ̄ɔ̄ tɛ̄ɛ̄mbūū.”

¹⁸Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Kɛ̍ ndu̍yɛ̍, ā yɔ̍ŋ bɛ̍ɛ̍ mī te̍le̍ŋ ko̍ŋ ō fūūlu̍u̍, I̍ tɛ̍ɛ̍mbūū ni̍ŋ wa̍nāā nīa̍a̍ kpo̍u̍ le̍, ā ti᷄ŋ ā lō ni̍ŋ yo̍o̍mū.

¹⁹Tē a̍ lo᷅ ni̍ŋ ka̍ŋ yo̍o̍mū wa̍ ā hu᷄ŋ nyu̍nā pɛ̍ āā, ‘Vɛ᷅ mi̍ Mɛ̄lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ nāa̍, o̍ to̍sā mu᷅ŋ ki̍nɛ̍i̍ a̍ na̍a̍?’ Nūm Chɛ̄lūīma̍yā a̍ di̍mu̍l nda̍ āā, ‘Le̍ mɛ̄ɛ̍ nya̍ kɛ̄ɛ̍ Mɛ̄lɛ̄ka̍, mi̍ lā mūli᷄ŋ nyɛ᷅m wāŋnda̍ o̍ lɛ̄ŋīī chēle̍ŋnde̍ ni᷄ŋ a̍ so̍o̍lūū māā mɛ̄lɛ̄ka̍a̍ ndā wo̍ŋ sōōlūūwo̍ o̍ lɛ̄ŋndē nyāle̍ŋ ni᷄ŋ yɛ̍, le̍la̍ŋ mu᷅ŋ yɔ̄nu̍ŋ a̍ nya̍ ni̍. Ā chō lākɔ̄ a̍ nya̍ o̍ chɛ̄le̍ŋ ni᷄ŋ o̍ lɛ̄ŋndē sūmīālte̍ŋ ni᷄ŋ, mī lā kɔ̍ sa̍a̍ŋgīāl wānāā chēle̍ŋnda̍.’ ”

²⁰Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Kɔ̍ yo̍ndā yōōŋgōo̍ ho̍ō o̍ wānāa̍ fu̍la̍ o̍ pūlāle̍ Che̍kɔ̍pūle̍ŋ chōo̍ wa̍ lo̍ kpo̍u̍, nda̍ yɔ̍nūŋ ni̍ māā wa᷅ŋnda̍ Chu̍dā. Di̍mu̍l nda̍ kpo̍u̍ mā tūēī. Yōōŋgū ko̍ŋ cho̍ ho̍ō ni̍ māā,

²¹lā ya᷄ŋ ni᷅la̍ŋ mī lā tūēī, nya̍ dīɔ̄mnda̍ ha̍ā, nya̍ nɔ̍ ha̍ā kɔ̄l kālu̍ o̍ kɔ̄lu̍ le̍ wa̍. Lā nɔ̄ hɔ̄lta̍ŋ kɛ̍ lā chi᷅ a̍ la̍ŋ te̍, mi̍ lā nɔ̄ nīla̍ŋ kɛ̍ lā tu̍i̍ī a̍ la̍ŋ te̍.

²²Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ cho̍ sūɛ̍i̍ ni̍. Sīōōŋnde̍ bi̍ī nya̍ le̍ ya̍ Mɛ̍lɛ̄ka̍ le̍? Tē si᷄m ya̍ lāchī pɛ̍, sīōōŋīī bi̍ī nya̍ mī lā nyīīya̍ kpa̍kpā le̍? Ya̍ Mɛ̍lɛ̄ka̍ mɛ̄ɛ̍ ya̍ I̍ to̍o̍si̍a̍a̍ Pēe̍ Mɛ̄ŋmā Īhɛ᷄llo̍, mi̍ kɛ̍sī si̍o̍ōŋnde̍ nāa̍ o̍ mɛ̍ɛ̍lu̍ wa̍ chɛ̍chɛ̍ māā pɛ̄ŋgu̍. Ndu̍yɛ̍ le̍ fɛ̍ɛ̍ŋ a̍ fɛ̍ɛ̍ŋ, Pēe̍ Mɛ̄ŋmā Īhɛ᷄llo̍ ō nɔ̍lā mbō hīōū pɛ̄ŋgu̍ ya̍ I̍ kɛ̍su̍l ndu̍ ko̍ŋ ndo̍ le̍. Mɛ̄ɛ̍ mɛ̄ɛ̍ Pēe̍ Mɛ̄ŋmā Īhɛ᷄llo̍ ō hu᷄ŋ a̍ kpāāyāā bɛ̍ndōo̍, ō hi̍ū pɛ̍ŋgu̍ ko̍ŋ te̍, ō hu᷄ŋ bɛ̍ɛ̍ a̍ hi̍i̍lɛ̍i̍ bɛ̍ndūe̍i̍ mbō wa̍ īkpōku̍ kpo᷅ku̍i̍ bɛ̍ndūe̍i̍, ō nɔ̍lā mbō hīōū pɛ̍ŋgu̍ ko̍ŋ te̍.

²³Kɛ̍ nya̍ lā ye᷄ŋ ya̍ lānī māā pīo̍o̍ ho̍ō le̍. Mi̍ lā lō o̍ ko̍ŋ mi̍ lā tōsā bōllē kālāle̍ŋ a̍ ya̍, ndu̍yɛ̍ mi̍ lā sīmūl la̍ sīmūllo̍ pīla̍. Mi̍ lā bīī mi̍ lā kɛ̄ɛ̄ ya̍ mi̍ lā mūli̍ŋ nyɛ᷅m chēle̍ŋndo̍ŋ kɔ̄ɔ̄lī.

²⁴Wɔ̄sī o̍ wɔ̄sī, bōōndi̍i̍ chīɔ̄ɔ̄ŋ nya̍ŋ yēēmā pi̍ɔ̍ɔ̍ ve̍, bōōndi̍i̍ ke̍ŋ ya̍ I̍ yɔ᷅ŋ pi̍ɔ̍ɔ̍ o̍ chīɔ̄ɔ̄ŋ nya᷄ŋ ni᷄ŋ ni̍, mī to̍sa̍ mī lā sɔ̄la̍ nyɛ̄ dīa̍a̍ ta̍u̍ ta̍u̍. Kɛ̍ mu̍ŋ kpo̍u̍ lā nɔ̄la̍ mī lā kɛ̄si̍ŋ mu̍ŋ o̍ kɔ̄l mī lā nɔ̄ sīōōŋnde̍ le̍ ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ le̍.

²⁵Le̍ he̍ī, mi̍ yɔ̄ŋndā nyāla̍ wɔ̍ɔ̍ŋnda̍ŋ lā tōsā mu᷅ŋ kpo̍u̍ lā sɔ̍lā lɛ̍ ya̍ mu̍ŋ o̍ bā le̍. Dɛ̍nɛ̍ o̍ dɛ̍nɛ̍ kɛ̍ndɛ̄ nya̍ a̍a̍ nɔ̍ mī nya̍ a̍a̍ sɔ̍la̍ ya̍ o̍ bā, sɔ̄ɔ̍ŋ wɔ̍ɔ̍ŋ nya̍ chō tōsāa̍ wo̍ŋ ŋ̄ tūŋ nya̍ mu̍ŋ.

²⁶“Wānāā dɛ̍nɛ̍ wɔ̍ɔ̍ŋnda̍ ā chō wānāā nīa̍a̍ tɛ̄ɛ̄ŋ o̍ lɛ̄ŋnde̍ŋ nde᷅ŋ ni᷄ŋ. Mɛ̄ɛ̍ wāŋnda̍ ā tūāndū nu̍a̍ā yāla̍ yōūwa̍ le̍ nda̍ bīyɔ̄ɔ̍ mā hīni̍ chūmndo̍ yɛ̍, le̍nde̍ nda̍ chāl wa᷅ŋnda̍ chūmndo̍ le̍ nda̍ nyɛ̄ pālāa̍ tūsīo̍o̍ ni̍. Mɛ̄ɛ̍ wāŋndo̍ ō yēŋ nu̍a̍ā vīsīa̍a̍ yāŋɔ̄ɔ̄la̍ŋ yɛ̍, le̍nde̍ nda̍ yēŋ wa᷅ŋnda̍ yāŋɔ̄ɔ̄la̍ŋ o̍ kāŋgālāa̍ ni᷄ŋ ni̍ le̍ mā bīī wāŋnda̍.

²⁷Mɛ̄ɛ̍ wāŋnda̍ bīī nu̍a̍ā yōūwa̍ mā pēi̍ nda̍ o̍ ko̍līi̍la̍ŋ ni᷄ŋ yɛ̍, le̍nde̍ chīɛ̄īlā ndāla̍ŋ lā chō lā pīāā a̍ nyɛ̄m nda̍ chō wa᷅ŋnda̍ sɔ̄lāa̍ o̍ lābā o̍ nda̍ hūīyo̍ ni᷄ŋ ndo̍ŋ ni̍. O̍ ko̍ŋ, ma̍ bīī ma̍ sūl sūllo̍ pīla̍ ndu̍yɛ̍ ma̍ sīmnu᷄ŋ wa̍nāā kpāāyāā bɛ̍ndū.

²⁸Le̍ te̍le̍ŋ o̍ te̍le̍ŋ wāŋnda̍ ha̍ā nyɛ̄ dīa̍a̍ dīo̍o̍ mɛ̄ɛ̍ nda̍ yēēmā yɛ̍, mā chēlūl chēlu̍llo̍ pīla̍. Yɔ̄ŋndā ndāla̍ wɔ̍ɔ̍ŋnda̍ŋ ā nɔ̍ pɛ̍ŋgu̍ o̍ pɛ̄ŋgu̍ a̍ la̍ŋ tōsāa̍ le̍. Vīi̍ya̍a̍ ā nɔ̍ bɛ̍ɛ̍ di̍la̍ ndāla̍ŋ ā ke᷅ nda̍ la̍ŋ te̍, o̍ ko̍ŋ kɔ̍ɔ̍lī, wānāā tāmbɛ̍i̍ya̍a̍ wāŋnda̍ chō nyɛ̄ pālāa̍ tūsīo̍o̍ chōo̍ wa̍ mā kīlūl nda̍ yāma᷅ŋ lāka̍fa᷄ŋ”

²⁹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Vɛ̄ɛ̍nɛ̍ wāŋnda̍ wā yɛ̍ sɔ̄ɔ̍ŋ wɔ̍ɔ̍ŋ wāā nu̍a̍ā tōsāa̍ I̍ tu̍sī nda̍ nyɛ̄ pālāa̍ chōo̍ le̍? Dɛ̍nɛ̍ pa̍lāa̍ ya̍ I̍ tu̍sī nda̍ chōo̍ ni̍. Lɛ̄ŋnde̍ŋ lē ve᷅m yɔ᷅ŋ wɔ̄ɔ̍ŋ wāā nu̍a̍ā tōsāa̍ mī ma̍l lɛ᷅ŋndē lēŋ I̍ tu̍sī le̍ŋ nyɛ̄ pālāa̍ chōo̍ le̍ nyɛ̄ nda̍ tōsa̍ wo̍ le̍.

³⁰Sɔ̄ɔ̍ŋ cho̍ yɔ̄nɔ᷄ŋndo̍ lɛ̄ŋnde̍ŋ nde᷅ŋ ndo̍ŋ, ŋ̄ chō sɔ̄ɔ̍ŋ wɔ̍ɔ̍ŋ bɛ̄ndū, ŋ̄ chō sɔ̄ɔ̍ŋ bi̍ī wa̍nā kɔ̄ndɔ̄fi̍li̍.

³¹Wānāa̍ di̍mi̍ māā wānāa̍ su̍a̍ā le̍ ya̍ wa̍ nda̍ chō ni̍ wa̍ ā chō wāŋnda̍ sɔ̄ɔ̍ŋ wa̍ā lāchīŋ lāchōōwa̍ŋ dīmūllo̍, ndu̍yɛ̍ o̍ ko̍ŋ kɔ̍ɔ̍lī, mi̍ wānāā sōlīāā lāsa̍lāa̍, ā wā wāŋnda̍ bīyɔ̄ɔ̍ mɛ̄ɛ̍ wānāa̍ su̍a̍ā le̍ ya̍ Mɛ̍lɛ̄ka̍ wa̍ ā dīmūl nda̍ yɛ̍. Ndu̍yɛ̍ wānāā nīa̍a̍ bɛ̍ɛ̍ ma̍ chɛ̄la᷅ŋ a̍ nda̍ a̍ nyɛ̄ nda̍ chō ho̍ō tōsāa̍ wo̍. Kɛ̍ ndu̍yɛ̍ tē mɛ̄ɛ̄lu̍la̍ŋ lā fūūlu̍u̍ pɛ̍, I̍ si̍nā mɛ̄ɛ̍ nda̍ yɔ̄ŋ ni̍ŋ yɛ̍ le̍.”