Read Southern Kisi Chɛ̄lūīma̍yā 50 Bible Online

Chɛ̄lūīma̍yā 50 - Southern Kisi bible

Chɛ̄lūīma̍yā 50

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍ chūā, mbo̍ kē ya̍ yōōŋgōo̍ a̍ Ba̍bi̍lɔ̄ŋ o̍kɔ̄ɔ̄, lɛ̄ŋndē wāŋnda̍ Ba̍bi̍lɔ̄ŋ. Mbo̍ dīmūl la̍ āā,

²“Di̍mi̍ yo̍o̍ŋgōo̍ ho̍ō o̍ lɛ̄ŋnde̍ ni᷄ŋ. Yo̍nda̍ ndu̍ mī wāŋnda̍ tūēī. He̍e̍lu̍ kōlā i̍pɛ̍ŋgɔ̍ɔ̍ chōo̍ cho̍o̍ mā kūā a̍ yōōŋgōo̍ ho̍ō yōndāa̍. Vi᷅ŋ wāŋnda̍ ndu̍ le̍, di̍mu̍l nda̍ ndu̍. Yo̍nda̍ māā, ya̍a̍mɔ̍ɔ̍wa̍ ā bīī Ba̍bi̍lɔ̄ŋ. Ā pēsi̍ pe̍si̍ Ma̍a̍dɔ̍kī wɔ̍ wɔ̍, mɛ̄lɛ̄ka̍ wāŋnda̍ Ba̍bi̍lɔ̄ŋ. Ya̍a̍mɔ̍ɔ̍wa̍ ā tōsa̍ mi̍ si̍ɔ̍mbu̍la̍ŋ lā bīī Ba̍āl, mɛ̄lɛ̄ka̍ ndāa̍. Ā pēsi̍ pe̍si̍ mɛ̄lɛ̄ka̍a̍ wāŋnda̍ Ba̍bi̍lɔ̄ŋ ma̍ tɛ̄ɛ̄mbūū nda̍ kpo̍u̍.

³Lɛ̄ŋnde̍ cho̍ bā lūāŋndo̍ le̍ŋ lē hīŋ le̍ Ba̍bi̍lɔ̄ŋ dēlɔ̄ɔ̍ chōo̍. Lɛ̄ŋnde̍ŋ nde᷅ŋ lē chō Ba̍bi̍lɔ̄ŋ pīɔ̄lɔ̄ɔ̄ mī Ba̍bi̍lɔ̄ŋ o̍ si̍mnu᷄ŋ mɛ̄ɛ̍ po̍llo̍ ō chō nu̍a̍ā yɛ̍. Wāna̍ chi̍e̍e̍ ni̍, vīsī ni̍, nda̍ kpo̍u̍ ā chō nyāānɔ᷄ŋ. Ba̍bi̍lɔ̄ŋ o̍ cho̍ sīmnɔ᷄ŋ nāa̍ nyɛ̄ o̍ nyɛ̄ yōōmāā ō che᷅l te̍ wa̍.”

⁴Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Tē te̍le̍ŋ ko̍ŋ ō fūūlu̍u̍ pɛ̍ a̍ pāa̍le̍ le̍ŋ, wāŋnda̍ I̍sɔ̄lūɛ̄ī a̍ wāŋnda̍ Chu̍dā a̍ cho̍ chūūŋgi̍āŋ na̍a̍ pīlɛ̍ mā hīŋ a̍ cha᷄ŋndo̍, mā wa̍ nɛ̄īla̍ŋ nūūwāa̍ le̍ hūnɔ̄ɔ̍ nāa̍ ya̍ Mɛ̍lɛ̄ka̍ ndāa̍ Ya̍a̍wɛ̄ɛ̄ chu̍a̍.

⁵Ā nyūnā ni̍ŋ wa᷅ŋnda̍ le̍ mā chɔ᷄m nda̍ nɛ̄i̍ he̍l Sa̍a̍yɔ̍ŋ ndo̍, ndu̍yɛ̍ mā mūli̍ŋ hu̍nɔ̄ɔ̍ kūmbū kōŋ. Ā wā ni̍ŋ di᷅mu̍la᷅ŋndo̍ māā, lā ŋ̄ hūŋnu᷅ŋ mī ŋ̄ hu᷄ŋ yi̍i̍nūŋ kpe̍ma̍a̍ a̍ Mɛ̄lɛ̄ka̍ Ya̍a̍wɛ̄ɛ̄, kpe̍ma̍ wa᷅ na̍a̍ tɛ̄ɛ̄ŋ na̍a̍ nda̍ le̍ fɛ̍ɛ̍ŋ a̍ fɛ̍ɛ̍ŋ, ŋ̄ pu̍ɛ̍ɛ̍nūŋ a̍ ndu̍ le̍ wo̍.

⁶“Wānāā nīa̍a̍ ā chō māchūāā mɛ̄ɛ̍ sāa̍ lāāsīāŋ nu̍a̍ā yɛ̍. Wānāa̍ wa̍ nda̍ chīla̍ŋnda̍ ā sɔ̄ɔ̄ndi̍a̍a̍ nda̍ mɛ̄ɛ̍ wānā ma̍ndāā lāsāa̍ ō māl nu̍a̍ā sāa̍ mā lāāsi̍a̍ŋ mā wa̍ bālɔ̄ɔ̍ o̍ pēmbo᷄ŋ chōo̍ yɛ̍. Mɛ̄ɛ̍ sāa̍ ā lāāsīāŋ nu̍a̍ā ā si̍nā lɛ̍ fo̍ndā ndāa̍ ā si̍nā lɛ̍ nɛ̄īyo̍ le̍ mīīŋgōo̍ le̍ yɛ̍, le̍nde̍ wānāā nīa̍a̍ ā chō ni̍.

⁷Wānā o̍ wāna̍ chɔ̍ nda̍, chīŋa̍la᷅ŋndo̍ o̍ chi᷅ŋa̍la᷅ŋ nda̍ ni̍. Mī ya̍a̍mɔ̍ɔ̍wa̍a̍ ndāa̍ ā kēī di̍mīo̍o̍ āā, ‘Ŋ̄ chīŋa̍la᷅ŋ nda̍ bɛ̍ɛ̍ ō ve᷅m yɔ᷅ŋ wɔ̄ɔ̍ŋ te̍ na̍a̍ ŋ̄ tōsā le̍. Kāni̍ fo̍ndōle̍, wāŋnda̍ ha̍ā ā tōsa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ bu̍u̍la̍ŋ le̍ nda̍ mbō tōsāl nda̍ nyɛ̄ o̍ nyɛ̄ wo̍, Mɛ̄lɛ̄ka̍ Ya̍a̍wɛ̄ɛ̄, ō fi̍nyāā ndāā ma̍māa̍ nda̍ a̍a̍ ti̍i̍nda̍ŋ le̍ nda̍ mālāa̍ wo̍.’

⁸“Wāŋnda̍ I̍sɔ̄lūɛ̄ī, lā fūla̍ Ba̍bi̍lɔ̄ŋ mī lā nyāānu̍ŋ. Lā ma᷄l lɛ᷅ŋndē wāŋnda̍ Ba̍bi̍lɔ̄ŋ. Lā wa̍ wa̍nāā tāsi̍a̍a̍ le̍ mālɔ̄ɔ̍.

⁹Kāni̍ fo̍ndōle̍, I̍ cho̍ tōsā mī wāŋnda̍ o̍ lɛ̄ŋīī kpāāyɛ̄ī bɛ̄ndūi̍i̍ cho̍ bā lūāŋndo̍ ve̍ ni᷄ŋ a̍ yu̍sa̍ kɔ̄lta̍ŋ mā hu᷄ŋ de᷅l Ba̍bi̍lɔ̄ŋ chōo̍. Ā chō yīīna᷅ŋ mā hu᷄ŋ de᷅l lɛ̄ŋndē Ba̍bi̍lɔ̄ŋ nde̍ŋ chōo̍ mā bīī le̍ŋ. Wāŋnda̍ ha̍ā sɔ̍ŋgɔ̄ɔ̍ pi̍la̍ nda̍ chāā a̍ chīɔ̄ūlā ndāla̍ŋ ni̍. Chīɔ̄ūlā ndāla̍ŋ tē ā wūu̍ pɛ̍, ā bi̍ndū le̍.

¹⁰Ya̍a̍mɔ̍ɔ̍wa̍ chō hūnɔ̄ɔ̄ Ba̍bi̍lɔ̄ŋ pūŋgā mā kūɛ̄nu᷄ŋ a̍ nyɛ̄m wāŋnda̍ Ba̍bi̍lɔ̄ŋ kpo̍u̍. Ndu̍yɛ̍ wānāa̍ pu̍ŋgā ni̍ŋ Ba̍bi̍lɔ̄ŋ nda̍, ā sɔ̄lā ni̍ŋ nyɛ᷅ o̍ nyɛ̄ nda̍ yēēma̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

¹¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ Ba̍bi̍lɔ̄ŋ, lā pūŋga̍ lɛ̄ŋndē nīle̍ŋ ndu̍yɛ̍ mi̍ lā wā nya̍a̍lo̍o̍ kpe̍e̍kpe̍i̍ mī lā tōsā kɔ᷅l kɛ̄ndɛ̄ bɛ̄ndōo̍. Mɛ̄ɛ̍ nāūva̍ ā wā nu̍a̍ā dīo̍la̍ŋ mā wa̍ hūūlōo̍ īpu̍lu̍lu̍ pu̍lu̍lūe̍i̍ yɛ̍, le̍nde̍ nya̍ chō bālɔ̄ɔ̍ a̍ nya̍a̍lo̍o̍ ni̍. Mɛ̄ɛ̍ su̍a̍a̍ ā wā nu̍a̍ā īnɛ̍ mā wa̍ cha᷄ŋnda̍ ndāla̍ la̍ŋ yɛ̍, le̍nde̍ nya̍ chō bālɔ̄ɔ̍ a̍ bɔ̄ɔ̄lūū kɔ̄l kɛ̄ndɛ̄ bɛ̄ndōo̍ ni̍.

¹²Kɛ̍ ndu̍yɛ̍, si̍ɔ̍mbu̍la̍ bɛ̄ndūla̍ŋ lā chō hūnɔ̄ɔ̄ chi̍e̍e̍ nyā bɛ̍ndo̍o̍ bīyɔ̄ɔ̄. Ō chō hūnɔ̄ɔ̄ lābɛ̄ɛ̄ ta̍mbu̍. Ō chō hūnɔ̄ɔ̄ dɔ̄ɔ̄na̍ŋ chi̍o̍o̍ŋ tɛ̄ɛ̄ŋ kpo̍u̍ o̍ lɛ̄ŋnde̍ ni᷄ŋ. Mɛ̄ɛ̍ po̍llo̍ ō wā nu̍a̍ā mɛ̄ŋnde̍ŋ bɛ̍ɛ̍ wānā se̍e̍lūŋ lo̍ŋ te̍ yɛ̍, le̍nde̍ o̍ si̍mnūŋ ni̍ŋ ni̍.

¹³Ya̍ Mɛ̄lɛ̄ka̍ Ya̍a̍wɛ̄ɛ̄ cho̍ hūnɔ̄ɔ̄ tu̍mbe̍ dɔ̍u̍nɔ᷄ŋ a̍ chi̍e̍e̍ nyāa̍ mī to̍sa̍ mbō sīmnu᷄ŋ nāa̍ wāna̍ chi̍e̍e̍ o̍ che᷅l te̍ wa̍. I̍ cho̍ tōsā mbō tāmbu̍ mbō sīmnu᷄ŋ pɔ᷅mndo̍. Wānā o̍ wāna̍ ke̍e̍kū ni̍ŋ Ba̍bi̍lɔ̄ŋ, tē ō chē Ba̍bi̍lɔ̄ŋ pɛ̍, kɔ̄ndɔ̄fi̍llo̍ chō ndu̍ bīyɔ̄ɔ̄ mbō hāndu̍ŋ ba̍a̍ o̍ sōndō, fo̍ndōle̍ a̍ nyɛ̍ yɔ̍nūŋ ni̍ŋ kpɛ̍ a̍ ndu̍ wo̍.

¹⁴“Pūa̍a̍ sɔ̍ŋgā a̍ chīɔ̄ūla̍ŋ nda̍, lā kɔ̍ ba̍lū Ba̍bi̍lɔ̄ŋ mī lā dɔ̄ū ndu̍ o̍ pi̍ŋndo̍ ni᷄ŋ mī lā bɛ̄ɛ̄ndi̍a̍ŋ le̍ ndu̍ chīŋa̍la᷅ŋndo̍. Lā chīŋa̍la᷅ŋ ndu̍ a̍ chīŋɔ̍ma̍ nya̍ŋ, lā kɛ̍sī chīŋɔ̍le̍ŋ lē pīlɛ̍ bɛ̍ɛ̍ mī lā kɛ̄ɛ̍ le̍ŋ wūū Ba̍bi̍lɔ̄ŋ te̍, fo̍ndōle̍, Ba̍bi̍lɔ̄ŋ o̍ to̍sa̍ yɔ̄ŋ wɔ̄ɔ̍ŋndo̍ a̍ ya̍ Mɛ̍lɛ̄ka̍ Ya̍a̍wɛ̄ɛ̄.

¹⁵Lā bālu̍ ndu̍ kpɔ̍kɔ̍su̍ mī lā dēŋi̍ chōo̍ cho̍o̍ le̍ ndu̍ chīŋa̍la᷅ŋndo̍. Ba̍bi̍lɔ̄ŋ o̍ cho̍ ni᷅ŋ ō yɔ̄ŋgɔ᷄ŋ nāa̍ nya̍ chūā le̍ mī lā bīī ndu̍. Sāāsāla̍ ba̍lu̍ ndu̍ la̍ŋ lā chō ni᷅ŋ lā pēsī pēsīāā mi̍ lā mīīŋgū lɛ̄ŋ mɛ̍ mɛ̍. Nyɛ̄ wāŋnda̍ Ba̍bi̍lɔ̄ŋ a̍ to̍sa̍ wo̍ māa̍ ko̍ŋ ya̍ Mɛ̍lɛ̄ka̍ Ya̍a̍wɛ̄ɛ̄ cho̍ nda̍ mīŋgūllo̍ ni̍. Lā mīŋgu̍l Ba̍bi̍lɔ̄ŋ māa̍. Nyɛ̄ o̍ to̍sa̍ a̍ chāānda̍ wo̍, ndu̍ bɛ̍ɛ̍ lā tōsa̍l ndu̍ ndu̍.

¹⁶Lā tōsa̍ wa̍li̍ o̍ wa̍li̍ īchīɛ̄ɛ̄ ō to̍sa᷄ŋ ndɛ̍ Ba̍bi̍lɔ̄ŋ te̍, kɛ̄lɛ̄ŋgāāle̍, mī wi̍tīi̍ŋ ki̍a̍lāā wa᷄ lɛ̄ Ba̍bi̍lɔ̄ŋ. Wānāā lēkāa̍ cho̍ Ba̍bi̍lɔ̄ŋ nda̍, sīōōŋnde̍ chō nda̍ hūnɔ̄ɔ̄ bīyɔ̄ɔ̄ le̍ ya̍a̍mɔ̍ɔ̍wa̍ mā nyāānu̍ŋ, mī wānā o̍ wānā mi̍i̍ŋgu̍ o̍ lɛ̄ŋndē ndɔ̄le̍ŋ ni᷄ŋ.”

¹⁷Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍sɔ̄lūɛ̄ī o̍ cho̍ māchūāā māā sāa̍ ku̍ndā, ā kpɔ̍kūŋnda̍ ā tīsā ha̍ā chōo̍ māā pūūsi̍a̍a̍ nda̍ wa̍. Tē ō wa̍ māā yɔ̄ŋɔ̄ɔ̄ pɛ̍, I̍sɔ̄lūɛ̄ī o̍ cho̍ māchūāā mɛ̄ɛ̍ sāa̍ kpɔ̍kūŋndo̍ ō dīī ho̍ō wo̍ o̍ wā yɛ̍. Māsāa̍ Āsi̍i̍līāā fɛ̍ɛ̍ŋ de̍l ndu̍ chōo̍ mbo̍ dīī ndu̍ mbo̍ dīā vīsīŋ ndɔ̍ŋ kpo̍u̍. Mɛ̄ɛ̍ ndu̍ fa̍ŋa̍ŋ, mi̍ Māsāa̍ Nābi̍u̍kānɛ̍ɛ̍sā, māsāa̍ le̍ Ba̍bi̍lɔ̄ŋ ndu̍ hu᷅ŋ pe̍sī pāālā o̍ mɛ̍i̍ la̍ŋ mbo̍ sɔ̄ɔ̄sīāā.

¹⁸Le̍la̍ŋ nyɛ̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō dīmi̍ wo̍ cho̍ ho̍ō ni̍. I̍ cho̍ Māsā Bɛ̍ndōo̍ Nābi̍u̍kānɛ̍ɛ̍sā, māsāa̍ le̍ Ba̍bi̍lɔ̄ŋ nda̍ lɛ̄ŋndē ndɔ̄le̍ŋ nyɛ̄ pālāā bɛ̄ndōo̍ tūsī chōo̍, mɛ̄ɛ̍ ya̍ I̍ to̍sa̍ a̍ māsāa̍ o̍ lɛ̄ŋndē Āsi̍i̍līāāle̍ŋ ni᷄ŋ yɛ̍.

¹⁹Ndu̍yɛ̍ mī lo̍ o̍ ko̍ŋ, mī mi̍ŋgī wāŋnda̍ I̍sɔ̄lūɛ̄ī o̍ lɛ̄ŋndē ndāle̍ kɛ̍ndɛ̄ kɛ̍ndɛ̄ le̍ŋ ni᷄ŋ. Wāŋnda̍ I̍sɔ̄lūɛ̄ī a̍ wa᷅ ni̍ŋ vɛ̍lɛ̄ wa̍lta̍ ndāla̍ŋ tōsāa̍ o̍ Pēmbīī Ka̍mɛ̄lve̍ chōo̍ a̍ o̍ būngɛ̄ī Ba̍sīāŋnde̍ ni̍ŋ mā wa̍ tɔ̄lɔ̄ɔ̄lā ndāla̍ŋ dīo̍o̍ māā pāāndū. Ndu̍yɛ̍ nyɛ̄ o̍ nyɛ̄ nda̍ yēēmā ni̍ŋ tɔ̄lɔ̄ɔ̄lā ndāla̍ŋ ni᷄ŋ, ā wā ni̍ŋ ndu̍ sɔ̄lāa̍ o̍ būŋgɛ̄ī E̍fi̍lūēmnde̍ ni̍ŋ a̍ o̍ būŋgɛ̄ī Ki̍li̍a̍a̍dīve̍ ni̍ŋ mā hīni̍ kɔ̄l mɛ̍ɛ̄.

²⁰Tē te̍le̍ŋ ko̍ŋ ō fūūlu̍u̍ pɛ̍, mī pāa̍le̍ le̍ŋ lē fūūlu̍u̍, wānā ba̍lū ni̍ŋ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍, a̍ o̍ lɛ̄ŋndē Chu̍dāle̍ŋ ni᷄ŋ, a̍ se̍e̍lūŋ ni̍ŋ yɔ᷅ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ wāŋnda̍ tɛ̄ɛ̄ŋ te̍. Kāni̍ fo̍ndōle̍, wānāa̍ lo᷅ ni̍ŋ yo̍o̍mū wa̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍ I̍ cho̍ nda̍ mālɔ̄ɔ̄ le̍ ndu̍ kpo̍u̍. Ya̍ Mɛ̍lɛ̄ka̍ Ya̍a̍wɛ̄ɛ̄ so̍ō ni̍.”

²¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Lā kɔ̍ de᷅l wāŋnda̍ Mɛ̄lu̍a̍tēm chōo̍ a̍ wāŋnda̍ Pɛ̍kɔ̍dī. Lā nyāānu̍ŋ nda̍ kɔ̄ɔ̄lī, mī lā dīu̍ nda̍ ndu̍yɛ̍ mī lā tɛ̄ɛ̄mbu̍u̍ nda̍ kpo̍u̍. Lā tōsa̍ nyɛ᷅ o̍ nyɛ̄ ya̍ I̍ di̍mu̍l nya̍ le̍ tōsāa̍ a̍ nda̍. Ya̍ Mɛ̄lɛ̄ka̍ Ya̍a̍wɛ̄ɛ̄ ya̍ so̍ō ni̍.”

²²Mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Bɔ̄ɔ̄lūū bɛ̄ndū chɔ̄ūwo̍ ō chō sūɛ̍i̍ o̍ lɛ̄ŋnde̍ Ba̍bi̍lɔ̄ŋnde̍ŋ ni᷄ŋ kpo̍u̍. Nyɛ̄ tāmbɛ̍i̍ bɛ̍ndōo̍ chō yɔ̄nɔ᷄ŋndo̍ kpe̍e̍kpe̍i̍.

²³Ba̍bi̍lɔ̄ŋ, lɛ̄ŋndē kpāāyā le̍ wa̍ māā ku̍ndū wa̍, le̍ lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍ pe̍sīo̍o̍ le̍ŋ, lē pīɔ̍l mi̍ lē sāŋnu᷄ŋ. Wāŋnda̍ o̍ lɛ̄ŋnde̍ ni᷄ŋ kpo̍u̍ kɔ̄ndɔ̄fi̍llo̍ bīī nda̍ ma̍ hāndu᷄ŋ ba᷅la̍ŋ o̍ sōndō.

²⁴Ba̍bi̍lɔ̄ŋ, a̍ si̍mu̍l la̍, ya̍ Mɛ̍lɛ̄ka̍ Ya̍a̍wɛ̄ɛ̄, kɛ̍ I̍ ye̍ŋ nu̍m yāŋɔ̄ɔ̄le̍ŋ, a̍ si̍na̍ le̍ ma̍ hāū. A̍ ha̍u̍ o̍ yāŋɔ̄ɔ̄lē nīle̍ŋ, mi̍ bi̍ī nu̍m.

²⁵Ya̍ Mɛ̍lɛ̄ka̍ Ya̍a̍wɛ̄ɛ̄ I̍ ku̍mbi̍ bɔ̄lɔ̍ ni̍ ya̍ I̍ du̍a̍ū wo̍lɔ̄ɔ̄lā nīla̍ chɔ̄ūla̍ŋ ndo̍ mi̍ so̍lī wōlɔ̄ɔ̄lā nīla̍ chɔ̄ūla̍ŋ la̍ŋ la̍ yɔ̍nūŋ māā tu̍mbe̍ nūu̍ ni̍, le̍ sɔ̍ŋgɔ̄ɔ̍ a̍ nya̍. Kāni̍ fu̍u̍le̍, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ nɔ̍ kpāāyāa̍ kpo̍u̍ wo̍ I̍ nɔ̍ wa̍llo̍ le̍ tōsāa̍ o̍ lɛ̄ŋndē Ba̍bi̍lɔ̄ŋ nde̍ŋ ni᷄ŋ.

²⁶Wāŋnda̍ lā fūla̍ o̍ fo̍ndāŋndā yɛ̍ yɛ̍la̍ŋ mī lā hu᷄ŋ de᷅l Ba̍bi̍lɔ̄ŋ chōo̍. Lā pēsi̍ fo̍ndāŋndā nda̍ kɛ̄sī nyɛ᷅ ndā dīa̍a̍ la̍ŋ mī l ā pūŋga̍ ndu̍. Lā tōsa̍ mī Ba̍bi̍lɔ̄ŋ o̍ si̍mnu᷄ŋ be̍mbe̍la̍ŋ kpo̍sōŋ. Lā tɛ̄ɛ̄mbu̍u̍ ndu̍ kpo̍u̍, lā mɛ̍ī nyɛ̄ o̍ nyɛ̄ le̍.

²⁷Lā dīu̍ so̍vɛ̄i̍ya̍a̍ ndāa̍ kpo̍u̍. Lā tōsa̍ mī nda̍ bɛ̍ɛ̍ a̍ sɔ̍la̍ pīɔ̍mndo̍. Dɛ̍nɛ̍ pa̍lāā bɛ̄ndōo̍ ō chō le̍ nda̍, fo̍ndōle̍, nda̍ bɛ̍ɛ̍ pāa̍le̍ ndāle̍ŋ lē fūūlu̍u̍, pāa̍le̍ nda̍ nɔ̄ le̍ nyɛ̄ pālāa̍ sɔ̄lāa̍ le̍ŋ.”

²⁸Wāŋnda̍ chō Ba̍bi̍lɔ̄ŋ mālɔ̄ɔ̍ ma̍ wā nyāānɔ᷄ŋndo̍ kpe̍e̍kpe̍i̍. Ā chō kɔ̄la̍ŋ Chūlu̍sɛ̄lɛ̄m, le̍ mā kɔ̍ chɔ᷅m wāŋnda̍ a̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍ ō mīŋgu̍l wāŋnda̍ Ba̍bi̍lɔ̄ŋ māa̍ le̍ nyɛ̄ nda̍ tōsa̍ a̍ chīɛ̄ī ndɔ̄ɔ̍ wo̍ yɛ̍.

²⁹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Lā chūūŋgi̍a̍a̍ pu̍a̍a̍ nyāa̍ sɔ̍ŋgā a̍ chīɔ̄ūla̍ŋ nda̍ kpo̍u̍ na̍a̍ pi᷅lɛ̍, le̍ kɔ̄la̍ŋ Ba̍bi̍lɔ̄ŋ chīŋa̍la᷅ŋndo̍. Lā kɔ̍ ba̍lū Ba̍bi̍lɔ̄ŋ mī lā dɔ̄ū ndu̍ o̍ pi̍ŋndo̍ ni᷅ŋ kpɔ̍kɔ̍su̍. Lā ma᷅l wānā o̍ wānā mbō hɛ̄lu᷄ŋ te̍. Lā ke̍ Ba̍bi̍lɔ̄ŋ pāāwā o̍ nɔ̍ le̍ sɔ̄lāa̍ le̍ sɔ̄ɔ̍ŋ wɔ̍ɔ̍ŋ o̍ to̍sa̍ ki̍nɛ̍i̍yo̍ŋ ndo̍. Ndu̍ bɛ̍ɛ̍ lā tōsa̍l ndu̍ nyɛ̄ o̍ to̍sa̍l chāāŋnda̍ wo̍, fo̍ndōle̍, le̍ mɛ̄ɛ̍ o̍ to̍sa̍ yōŋgāa̍ a̍ ya̍ Mɛ̍lɛ̄ka̍ Ya̍a̍wɛ̄ɛ̄, I̍sɔ̄lūɛ̍i̍ya̍ Mɛ̄lɛ̄ka̍ ndā di̍a̍ndāa̍ mbo̍ sīmūl la̍ yɛ̍.

³⁰Le̍ he̍ī, tē pāa̍le̍ le̍ŋ lē fūūlu̍u̍ pɛ̍, ā wā ni̍ŋ chu̍a̍ā pīāāndūa̍a̍ o̍ chi̍o̍o̍ ho̍ō ni᷄ŋ di̍ūwo̍ o̍ nɛ̄īla̍ bɛ̄ndūla̍ŋ chōo̍, ndu̍yɛ̍ o̍ ko̍ŋ kɔ̍ɔ̍lī, so̍vɛ̄i̍ya̍ kpo̍u̍ mā tɛ̄ɛ̄mbu̍u̍ nda̍.

³¹“Nya̍ wāŋnda̍ Ba̍bi̍lɔ̄ŋ, lā chō wānāā yōŋgāā bɛ̍ndū, le̍ he̍ī, ya̍ Mɛ̍lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍ tu᷄l nya̍ lēyɛ̄. Ndu̍yɛ̍ pāa̍le̍ nyāle̍ŋ lē fūūlu̍u̍, te̍le̍ŋ ya̍ I̍ hi᷅ŋ nya̍ nyɛ̄ pālāa̍ tūsī chōo̍ wo̍ ndu̍ fu̍u̍lu̍u̍ ho̍ō ni̍.

³²Lɛ̄ŋndē nyāle̍ yōŋgālē bɛ̄ŋnde̍ŋ lē chō hūnɔ̄ɔ̄ dēlɔ̄ɔ̄, ndu̍yɛ̍ fɛ̍ɛ̍ŋ a̍ fɛ̍ɛ̍ŋ wānā o̍ wānā nɔ̍lā ni̍ŋ mbō mīŋgi̍ le̍ŋ sīmī le̍. Chi̍e̍e̍ŋ ndɔ̄ŋ bɛ̍ndo᷄ŋ kpo̍u̍ I̍ cho̍ tōsā mī ŋ̄ hu᷄ŋ ŋɔ᷅, ndu̍yɛ̍ nyɛ̄ o̍ nyɛ̍ cho̍ chi̍e̍e̍ŋ mu̍ŋ ŋ̄ bālāā, mu̍ŋ kpo̍u̍ mī ŋ̄ ŋūɛ̄.”

³³Mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō hīāū lāchī a̍ sūɛ̍i̍ mbo̍ dīmi̍ āā, “Ya̍a̍mɔ̍ɔ̍wa̍ de᷄l wāŋnda̍ I̍sɔ̄lūɛ̄ī a̍ wāŋnda̍ Chu̍dā chōo̍ ma̍ tūsī nda̍ dɛ̍nɛ̍ pa̍lāa̍ chōo̍. Ā bīī nda̍ ma̍ sīīŋgūū nda̍ chīa̍a̍ ndu̍yɛ̍ ma̍ kūka᷄ŋ nda̍ chōo̍, ā yēēma̍ mā ma᷄l nda̍ le̍.

³⁴Kɛ̍ ndu̍yɛ̍ wāna̍ ndā pi̍ŋīa̍a̍ wāna̍ kpāāyāa̍ o̍ cho̍ ni̍. Wānā ko̍ŋ dīōlā ndɔ̄la̍ŋ āā, Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍. Wānā ko̍ŋ chō sūŋgɔ̄ɔ̄ le̍ nda̍, mbō pīŋi̍ nda̍, ndu̍yɛ̍ mbō lo̍ o̍ ko̍ŋ mbō hīŋ a̍ kɔ̄l nyūlōo̍ o̍ chi̍e̍ēŋndo̍ ni᷄ŋ kpo̍u̍. Kɛ̍ wāŋnda̍ Ba̍bi̍lɔ̄ŋ nda̍ mbō tōsa̍ ā sɔ̄la̍ kɔ᷅l nyūlū le̍.”

³⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Mūɛ̄ī fāŋnde̍ ī hi̍ŋ wāŋnda̍ Ba̍bi̍lɔ̄ŋ kpo̍u̍ di̍ū. Wānā o̍ wāna̍ cho̍ Ba̍bi̍lɔ̄ŋ, I̍ chō nda̍ dīū, ndu̍yɛ̍ mī ī dīu̍ wānāā ndāā bɛ̍ndūa̍a̍ a̍ wānāā nda̍a̍ kɔ̄l kālu̍a̍a̍ kpo̍u̍.

³⁶Mūɛ̄ī fāŋnde̍ ī hīŋ wānāā dīmīāā sɔ̄ɔ̍ŋ wa̍ā lāchīāā lāchōōwāa̍ Ba̍bi̍lɔ̄ŋ di̍ū. Wāŋnda̍ ha̍ā ā chō hūnɔ̄ɔ̄ sīmnɔ᷄ŋ di̍ɔ̍māā bɛ̄ndū bɛ̍ndū. Mūɛ̄ī fāŋnde̍ ī hīŋ ku̍u̍ba̍a̍ chɔ̄ūwa̍ Ba̍bi̍lɔ̄ŋ dīū. Sīōōŋīī bɛ̄ndūe̍i̍ ī chō nda̍ hūnɔ̄ɔ̄ bīyɔ̄ɔ̄.

³⁷Mūɛ̄ī fāŋnde̍ ī hīŋ su̍a̍ā chɔ̄ūwa̍ Ba̍bi̍lɔ̄ŋ a̍ nyɛ̄lā su̍a̍a̍ ā nāŋ nda̍ŋ tɛ̄ɛ̄mbūū, ndu̍yɛ̍ mī ī tɛ̄ɛ̄mbu̍u̍ so̍vɛ̄i̍ya̍a̍ fu̍la̍ o̍ lɛ̄ŋīī chēle̍ŋnde̍ ni᷅ŋ ma̍ hūŋ le̍ nda̍ mālāa̍ wa̍ kpo̍u̍. Pūa̍a̍ chɔ̄ūwa̍ ha̍ā ā chō hūnɔ̄ɔ̄ sīmnɔ᷄ŋ mɛ̄ɛ̍ wāŋ lāāndūa̍a̍ ā chō nu̍a̍ā ā nɔ̍ kpa̍a̍yā le̍ yɛ̍. Mūɛ̄ī fāŋnde̍ ī hīŋ sūltā wāŋnda̍ Ba̍bi̍lɔ̄ŋ tɛ̍ɛ̍mbūū. Nyɛ̄ o̍ nyɛ̄ nda̍ nɔ̄, ya̍a̍mɔ̍ɔ̍wa̍ chō mu̍ŋ pūŋgā kpo̍u̍.

³⁸I̍ cho̍ tōsā mī pīɔ̍ɔ̍ kɛ̄ɛ̍ le̍ sīa̍a̍ o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ kpo̍u̍, mī pēēla̍ŋ Ba̍bi̍lɔ̄ŋ kpo̍u̍ la̍ vēēli̍a̍a̍ sɛ̍ɛ̍ŋ sɛ̍ɛ̍ŋ. Kāni̍ fo̍ndōle̍, lɛ̄ŋndē Ba̍bi̍lɔ̄ŋnde̍ŋ lē chō lē pīāā a̍ nyɛ̄m nda̍ sōōlūū māā mɛ̄lɛ̄ka̍a̍ ndā wo̍ŋ. Wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ, nda̍ kpo̍u̍ ā sīmnu᷄ŋ ni᷅ŋ māā wānāā sēēmɛ̍i̍, a̍ nyɛ̄m chēle̍ŋndo̍ŋ mu᷅ŋ sōōlūūwo̍.

³⁹“Le̍ he̍ī, Ba̍bi̍lɔ̄ŋ o̍ cho̍ hūnɔ̄ɔ̄ sīmnɔ᷄ŋ pɔ᷅mndo̍ nāa̍ tūŋāā yōndūa̍a̍ a̍ hu̍a̍a̍ ā chāl la̍. Ō chō hūnɔ̄ɔ̄ sīmnɔ᷄ŋ na̍a̍ vīsīāā yōndūa̍a̍ po̍lla̍ ā chāl la̍. Ō chō hūnɔ̄ɔ̍ sīmnɔ᷄ŋ fo̍ndāŋ wāna̍ chi̍e̍e̍ o̍ che᷅l lɛ̍ kpo̍sōŋ te̍ wo̍, chɔ̍ŋ a̍ te̍le̍ŋndo̍ ho̍ō mbō kūɛ̄ a̍ le̍ fɛ̍ɛ̍ŋ a̍ fɛ̍ɛ̍ŋ.

⁴⁰Mɛ̄ɛ̍ ya̍ Mɛ̍lɛ̄ka̍ tɛ̄ɛ̄mbu̍u̍ So̍dɔ̄m a̍ Kōmo̍o̍lūā, ndu̍yɛ̍ a̍ chi̍e̍e̍ŋ chi̍ɛ̍ɛ̍li̍āŋ a̍ mu̍ŋ ndo̍ yɛ̍, le̍nde̍ ya̍ I̍ tɛ̍ɛ̍mbūū ni̍ŋ Ba̍bi̍lɔ̄ŋ ni̍, mī to̍sa̍ mbō sīmnu᷄ŋ fo̍ndāŋ wāna̍ chi̍e̍e̍ o̍ wāna̍ chi̍e̍e̍ o̍ che᷅l lɛ̍ lo̍ŋ le̍ fɛ̍ɛ̍ŋ a̍ fɛ̍ɛ̍ŋ te̍ wo̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.

⁴¹Lā tōfa̍ wɔ̍, pūa̍a̍ chɔ̄ūwa̍ ā chō chɔ̄nɔ᷄ŋndo̍ bā lūāŋndo̍ ma̍ wā hūnɔ̄ɔ̍. Lɛ̄ŋndē kpāāyāle̍ bɛ̄ŋnde̍ŋ a̍ māsāā bɛ̍ndūāā bɔ̄ɔ̍ bɔ̍ɔ̍ ā bɛ̄ɛ̄ndi̍a̍ŋ ma̍ wā hūnɔ̄ɔ̍ le̍ Ba̍bi̍lɔ̄ŋ chīŋa̍la᷅ŋndo̍ a̍ sɔ̍ŋgɔ̄ɔ̍, fūlāa̍ o̍ fo̍ndāŋndā lēvīltā bɛ̄ŋnda̍ŋ.

⁴²Pūa̍a̍ ndāa̍ chɔ̄ūwa̍ ā chō hūnɔ̄ɔ̍ ā bɛ̄ɛ̄ndīa̍ŋ a̍ chīɔ̄ūlā ndāla̍ŋ ndu̍yɛ̍ o̍ ba̍lta̍ ndāla̍ŋ. Ndu̍yɛ̍ pūa̍a̍ ha̍ā kɔ̄l vēsɛ̍i̍yo̍ pīla̍ nda̍ nɔ̄ ni̍, ā nɔ̍ i̍nyi̍ɛ̍ɛ̍ o̍ īnyīɛ̍ɛ̍ le̍. Ā chō hūnɔ̄ɔ̍ kpe̍e̍kpe̍i̍ o̍ su̍a̍a̍ chōo̍. Wānā tu̍e̍ī nda̍ hūnɔ̄ɔ̍ īkpūūve̍ pɛ̍, to̍fa̍ wɔ̍ ko̍ mɛ̄ɛ̍ mɛ̄ŋnda̍ŋ o̍ Pēe̍ Mɛ̄ŋmā Īhɛ᷄llo̍ mā wā nu̍a̍ā bɔ̄ɔ̄lūū bɛ̍ndōo̍ yɛ̍. Ā chō hūnɔ̄ɔ̍ ā bɛ̄ɛ̄ndīa̍ŋnda̍ kpe̍e̍kpe̍i̍ le̍ nya̍ hūnɔ̄ɔ̍ chīŋa̍la᷅ŋndo̍, nya̍ wāŋnda̍ Ba̍bi̍lɔ̄ŋ.

⁴³Māsāa̍ Ba̍bi̍lɔ̄ŋ o̍ tu̍e̍ī yōōŋgōo̍ a̍ nda̍ o̍kɔ̄ɔ̄ mi̍ kpɛ̍īyo̍ ō bīī ndu̍. Mɔ̍nɛ̍i̍ bɛ̍ndūe̍i̍ ī pɛ̄ o̍ kɔ̄l ndɔ̄ɔ̍ ni᷄ŋ cha̍. Mɛ̄ɛ̍ wāna̍ yo᷄llo̍ te̍le̍ŋ ndɔ̄ vi̍a̍lāa̍ ō fūūlūū nu̍a̍ā mī nyɛ̄ nɛ̄īyāa̍ ō wa̍ ndu̍ chōo̍ yɛ̍, le̍nde̍ o̍ yɔ̍nu̍ŋ ni̍.

⁴⁴“Mɛ̄ɛ̍ kpɔ̍kūŋndo̍ ō fūlā nu̍a̍ā fa̍ŋ o̍ būndɛ̍ Chɔ̍ɔ̍dāŋ ndo̍ ni᷄ŋ mbō tīsa̍ sāa̍ chōo̍ o̍ fo̍ndā māndāā lāsāa̍ yɛ̍, le̍nde̍ ya̍ Mɛ̍lɛ̄ka̍ Ya̍a̍wɛ̄ɛ̄ chi᷅ŋa̍la᷅ŋ ni̍ŋ wa᷅ŋnda̍ Ba̍bi̍lɔ̄ŋ ni̍, mī to̍ū nda̍ mī so̍li̍ nda̍ o̍ nda̍ lo̍ chi̍e̍e̍ o̍ lē pīlɛ̍ ni᷄ŋ kpe̍. O̍ ko̍ŋ, mi̍ hɛ̍li̍ wāna̍ ya̍ I̍ ye̍e̍mā le̍ hɛ̄līo̍o̍ wo̍ mī kɛ̍si̍ ndu̍ nda̍ chōo̍ māā māsā. Ō nɛ̄ɛ̍nɛ̍ cho̍ yɛ̄ māā ya̍ Mɛ̍lɛ̄ka̍? Ō nɛ̄ɛ̍nɛ̍ nɔ̍lā yɛ̍ mbō sīmu̍l la̍? Māsa̍ kūɛ̍ɛ̍nɛ̍ cho̍ yɛ̄ mbō si᷄m ya̍ o̍ hɔ̄l? Wānā ko̍ŋ ō cho̍ le̍

⁴⁵Le̍la̍ŋ lā ya᷄ŋ ni᷅la̍ŋ mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ kɛ̍ɛ̍si̍a̍a̍ le̍ tōsāa̍ a̍ Ba̍bi̍lɔ̄ŋ ndo̍, ndu̍yɛ̍ mī lā tūe̍i̍ nyɛ̄ o̍ tu̍u̍ le̍ tōsāa̍ a̍ wāŋnda̍ Ba̍bi̍lɔ̄ŋ ndo̍. Ō dīmi̍ māā wāŋnda̍ ha̍ā chūāūwāā ndāā pɔ̍mbūa̍a̍ bɛ̍ɛ̍, ya̍a̍mɔ̍ɔ̍wa̍ ā chō nda̍ hūnɔ̄ɔ̄ wā nda̍ sɛ̄ɛ̄sūūwo̍, le̍ kɔ̄la̍ŋ a̍ nda̍. Fo̍ndāŋndā wāŋnda̍ ha̍ā lā chō hūnɔ̄ɔ̄ pīɔ̄l mī lā lo̍ fo̍ndō, mī sīōōŋnde̍ bīī wānā o̍ wānā.

⁴⁶Bīyɔ̄ɔ̄ ya̍a̍mɔ̍ɔ̍wa̍ ā chō hūnɔ̄ɔ̄ Ba̍bi̍lɔ̄ŋ ndo̍, chi̍e̍ēŋndo̍ kpo̍u̍ ō chō hīīlɔ᷄ŋ. Ndu̍yɛ̍ cha᷄ŋnda̍ wāŋnda̍ Ba̍bi̍lɔ̄ŋ a̍ wa᷅ ni̍ŋ nda̍ŋ wāŋnda̍ o̍ lɛ̄ŋīī bɔ̄ɔ̍ bɔ̍ɔ̍ a̍ wa᷅ ni̍ŋ nda̍ŋ tūēīyɔ̄ɔ̍.”