Read Southern Kisi Chɛ̄lūīma̍yā 6 Bible Online

Chɛ̄lūīma̍yā 6 - Southern Kisi bible

Chɛ̄lūīma̍yā 6

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Wāŋnda̍ Bɛ̍ŋnja̍mīŋ, lā nyāānu̍ŋ yɔ̄ŋi̍ nya̍ sɔ̄la̍ pi̍ɔ̍mndo̍. Lā ma᷄l Chūlu̍sɛ̄lɛ̄m mī lā nyāānu̍ŋ. Lā hɔ᷄ŋ bu̍lu̍ chɔ̄ūwo̍ Tɛ̄ko̍wā chi̍e̍e̍. Lā chɔ᷄m ta̍a̍māsi̍o̍o̍ chōo̍ cho̍o̍ Bɛ̍tī Hāchɛ̍lūɛ̄m chi̍e̍e̍ le̍ mī wāŋnda̍ kpo̍u̍ a̍ si̍na̍ māā chɔ̄ūwo̍ hīŋ. Dɛ̍nɛ̍ pa̍lāā bɛ̄ndōo̍ ō chō chɔ̄nɔ᷄ŋndo̍ bā lūāŋndo̍ mbo̍ wā hūnɔ̄ɔ̍. Ya̍a̍mɔ̍ɔ̍wa̍a̍ tɛ̍ɛ̍mbūū ni̍ŋ nya̍ tɛ̄ɛ̄mbūū bɛ̄ndōo̍ wa̍ ā chō o̍ nɛ̄ī.

²Mi̍ chē bɛ̍ɛ̍ mi̍ Sa̍a̍yɔ̄ŋ o̍ wa᷅ chi̍e̍e̍ kɛ̍ndɛ̄ bɛ̄ndū, ndu̍yɛ̍ mbo̍ wā ō yɔ̄ŋga᷄ŋ o̍ ya̍ lo̍, kɛ̍ I̍ cho̍ tōsā mbō tāmbu̍.

³Māsāā bɛ̍ndūa̍a̍ ā chō hūnɔ̄ɔ̄ a̍ pūa̍a̍ ndāa̍ chɔ̄ūwa̍ le̍ mā hu᷄ŋ chi᷅ŋa̍la᷅ŋ ndu̍ a̍ sɔ̍ŋgɔ̄ɔ̍. Ā chō hūnɔ̄ɔ̄ a̍ pūa̍a̍ ndāa̍ mā hu᷄ŋ to̍ndū tɛ̍ndɛ̄i̍la̍ ndāla̍ŋ chi̍o̍o̍ ō bālāā si̍lɔ̍. Ndu̍yɛ̍ nāa̍ māsā o̍ māsā o̍ ye̍e̍mā ni̍ŋ le̍ dɔ̍ɔ̍ŋgɔ̍ɔ̍ kīōlɔ̄ɔ̄ nda̍ pūa̍a̍ ndūa̍a̍ chɔ̄ūwa̍ wa̍, lo̍ŋ o̍ ki̍a̍lū ni̍ŋ ni̍.

⁴Ā dīmūl ni̍ŋ pūa̍a̍ ndāa̍ chɔ̄ūwa̍ āā, ‘Tē ŋ̄ fūūlu̍u̍ Chūlu̍sɛ̄lɛ̄m īdīi̍yo̍ pɛ̍, ŋ̄ de᷄l nda̍ chōo̍ a̍ pāa̍le̍ ka̍lā le̍ŋ. Kɛ̍ tē ŋ̄ yāla̍ fu̍u̍lūū le̍,

⁵ŋ̄ de᷄l nda̍ chōo̍ a̍ nyūmnda̍ŋ, ndu̍yɛ̍ mī ŋ̄ tɛ̄ɛ̄mbu̍u̍ sāāsāla̍ ndāla̍ŋ kpo̍u̍.’ ”

⁶Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmu̍l ya̍a̍mɔ̍ɔ̍wa̍ āā, “Lā kīōlu̍ yɔ᷅mnde̍ le̍ sāāsa̍ ba̍lu̍ Chūlu̍sɛ̄lɛ̄m ndo̍ tɛ̄ɛ̄mbūūwo̍. Lā dēŋgēla̍ pu̍u̍lōo̍ ō kpākīo̍o̍ hōlnɔ᷄ŋndo̍ le̍ kēe̍la̍ŋ lēcho̍ō mī lā tōl o̍ kpākīo̍o̍ lēni᷄ŋ mī lā bīī chi̍o̍o̍. Chūlu̍sɛ̄lɛ̄m o̍ nɔ̍ mbō sɔ̄la̍ dɛ̍nɛ̍ pa̍lāā bɛ̄ndōo̍, fo̍ndōle̍, le̍ dɛ̍nɛ̍ wɔ̍ɔ̍ŋ bɛ̄ndu̍ bi̍ī mbo̍ pīā o̍ chi̍o̍o̍ ho̍ō ni᷄ŋ ndo̍.

⁷Mɛ̄ɛ̍ mɛ̄ŋnda̍ŋ mā būlī nu̍a̍ā lɛ̄ŋ mī mā tīu̍ kpo̍u̍ yɛ̍, le̍nde̍ yɔ̄ŋ wɔ̄ɔ̍ŋndo̍ ō tīu̍ Chūlu̍sɛ̄lɛ̄m kpo̍u̍ ni̍. Bā o̍ bā wānā hi̍o̍u̍ Chūlu̍sɛ̄lɛ̄m, sɔ̍ŋgɔ̄la̍ŋ a̍ nyɛ̄m tāmbɛ̍i̍yo̍ŋ kpo̍sōŋ ko̍ni̍ wānā cha᷅ ni̍. Bā o̍ bā ya̍ I̍ to̍fa̍, wānāa̍ cho̍ pīɔ̍mnda̍ŋ a̍ nāāla̍ŋ nda̍ a̍ wānāā nda̍ chō bōōlūūwo̍ wa̍ nda̍ kpo̍sōŋ ya̍ I̍ cha᷅ ni̍.

⁸Wāŋnda̍ Chūlu̍sɛ̄lɛ̄m, sīlā mɛ̄ɛ̄lāa̍ kpɔ̍ŋ ya̍ I̍ cho̍ ni᷅ŋ ho̍ō a̍ nya̍ dɛ̍nɛ̍ pa̍lāa̍ tūsīo̍o̍ chōo̍ ni̍. Tē lā ye᷄ŋ ni᷅la̍ŋ o̍ sīlāa̍ ho̍ō bɛ̄ŋgu̍ mī lā tūsi̍ŋ o̍ dīōm nūu̍ bɛ̄ŋgu̍ le̍, I̍ cho̍ nya̍ bā nūu̍ fāŋā chōo̍ mī ma̍l nya̍ wa̍ŋ wa̍ŋ, ndu̍yɛ̍ mī to̍sa̍ mī lɛ̄ŋndē nya̍le̍ŋ lē pīɔ̍l mī lē sīmnu᷄ŋ pɔ᷅m nāa̍ wāna̍ chi̍e̍e̍ o̍ wāna̍ chi̍e̍e̍ o̍ ve᷅m lɛ̍ le̍ wa̍.”

⁹Mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmūl la̍ āā, “Chɛ̄lūīma̍yā, ya̍a̍mɔ̍ɔ̍wa̍ chō hūnɔ̄ɔ̄ I̍sɔ̄lūɛ̍i̍ya̍a̍ tu̍a̍a̍ lo̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ nda̍ dēlɔ̄ɔ̄ chōo̍ mā dīndi̍ nda̍ tɛ̍ɛ̍. Mɛ̄ɛ̍ nda̍ kēndī nu̍a̍ā kīle̍pīi̍ya̍ŋ, mā pɔ̄mpɔ̍mbɔ̍ ma̍ lo᷅ le̍cho̍ō wa̍ŋ bɛ̍ɛ̍ mā dīndi̍ ma̍ŋ tɛ̍ɛ̍ yɛ̍, le̍nde̍ i̍ yɔ̍nūŋ ni̍ŋ a̍ nda̍ ni̍.”

¹⁰Mi̍ lo᷅ o̍ ko̍ŋ mi̍ di̍mūl Mɛ̄lɛ̄ka̍ a̍a̍, “Mɛ̄lɛ̄ka̍, wāŋnda̍ ha̍ā ā chō wānāā bōlīī kālāā bɛ̄ndū, ā cho̍ wa̍nāa̍ tu̍e̍ī nu̍m dīōm te̍. Yōōŋgūlā nūm Mɛ̄lɛ̄ka̍ Ya̍a̍wɛ̄ɛ̄ ŋ̄ yɔ̄ŋ nda̍ la̍ŋ ā chā la̍ŋ ko̍ bɛ̍ɛ̍ āā sɔ̄ɔ̍ŋ ma̍ma᷄ŋ ni̍. Le̍la̍ŋ I̍ so̍o̍ bɛ̍ɛ̍ nāa̍ nda̍ chūā mī si̍la̍ nda̍, ā ye᷅ŋ ya̍ lānī le̍.

¹¹Ō cho̍ ko̍ nu᷅m te̍ dɔ̍u̍nu᷄ŋ tu̍mbe̍ a̍ wāŋnda̍ ha̍ā le̍ Mɛ̄lɛ̄ka̍ Ya̍a̍wɛ̄ɛ̄. Ya̍ bɛ̍ɛ̍ I̍ dɔ̍u̍nu̍ŋ tu̍mbe̍ a̍ nda̍ ha̍a̍a̍, I̍ nɔ̍lā lɛ̍ mī hi̍o̍u̍ lāchī a̍ bīūwɔ᷄ŋndo̍ le̍.” Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Chɛ̄lūīma̍yā, I̍ cho̍ to̍sā mī nyɛ̄ pālāā bɛ̄ndōo̍ ō tōl wāŋnda̍ ha̍ā chōo̍ kpo̍u̍, le̍ nda̍ chɔ̄mndo̍ māā I̍ dɔ̍u̍nu̍ŋ tu̍mbe̍ a̍ nda̍ o̍ ka̍lā ka̍lā. Chūāāmbūa̍a̍ pi̍sūl o̍ bɛ̍ɛ̄la̍ŋ nda̍ ni̍, chūāā pīāāndūa̍a̍ di̍i̍nūŋ ku̍ndāla̍ŋ nda̍ ni̍, nda̍ kpo̍u̍ to̍sa̍ mī dɛ̍nɛ̍ pālāa̍ o̍ kōma̍l nda̍. Tē te̍le̍ŋ ko̍ŋ ō fūūlu̍u̍ pɛ̍, pɔ̍nɔ̍ɔ̍ a̍ la̍nɔ̍ɔ̍ ā chō nda̍ hūnɔ̄ɔ̄ mɔ̄sɔ̄ŋā bīyɔ̄ɔ̄ mā kūɛ̄ a̍ nda̍. Ndu̍yɛ̍ o̍ ko̍ŋ kɔ̍ɔ̍lī, bɛ̄ndūāā yūvɛ̍i̍ya̍ bɛ̍ɛ̍ ā nɔ̍lā ni̍ŋ mā fūla̍ o̍ dɛ̍nɛ̍ pa̍lāā kōŋ ni᷄ŋ te̍.

¹²Wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ, I̍ cho̍ nda̍ nyɛ̄ pālāā bɛ̄ndōo̍ tūsī chōo̍. Chīɛ̄īlā ndāla̍ŋ kpo̍u̍ ya̍a̍mɔ̍ɔ̍wa̍ chō la̍ŋ hūnɔ̄ɔ̄ pōōndīāā, ndu̍yɛ̍ o̍ ko̍ŋ kɔ̍ɔ̍lī, mā pōōndi̍a̍a̍ chīɔ̄ɔ̄ŋ nda᷄ŋ a̍ lāāndāā ndāa̍ kpo̍u̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ di̍mi̍ ni̍ māā he̍ī ī chō yɔ̄nɔ᷄ŋ a̍ nda̍ o̍ lɛ̄ŋnde̍ŋ nde᷅ŋ ni᷄ŋ.

¹³Wānā o̍ wāna̍ cho̍ lɛ̄ŋnde̍ŋ nde᷅ŋ, nda̍ kpo̍u̍ ā sīmnu᷄ŋ wa̍nāā lēhɔ̄llāā bɛ̄ndū le̍ wāŋnda̍ sɔ̄ɔ̍ŋ wɔ̍ɔ̍ŋndo̍ tōsāllo̍. Wānā su̍lāā ni̍, wānā ta̍mbɛ̍i̍ ni̍, nda̍ kpo̍u̍ ka̍fāla̍ŋ wāŋnda̍ tōsāllo̍ mā dīā nyɛ᷅m pi̍la̍ŋ a̍ lēdīɔ̄ɔ̄mū. Wānāa̍ su̍a̍ā bɛ̍ɛ̍ le̍ ya̍ wa̍, a̍ wānāā nīāā so̍līāā lāsa̍lāa̍ nda̍ kpo̍u̍ wāŋnda̍ hūīyo̍ mā dīā nyɛ᷅m pi̍la̍ŋ a̍ lāka̍fā.

¹⁴Dɛ̍nɛ̍ pa̍lāā cho̍ wānāā nīa̍a̍ chōo̍ mbo̍ wā nda̍ fūūlūūwo̍ wo̍, ā chi᷄ ndu̍ bɛ̍ɛ̍ nyɛ᷅ o̍ nyɛ̄ le̍. Tē ā bīī pɛ̍ ā dīmu̍l wāŋndā chōōla̍ŋ āā, ‘Lā bu̍u̍la̍ŋ te̍, kɔ̄l nyūlōo̍ chō wā.’

¹⁵Kɛ̍ a̍ sɔ̄ɔ̍ŋ wɔ̍ɔ̍ŋ nda̍ chō mu᷅ŋ tōsāa̍ wo̍ŋ kpo̍u̍, mi̍ si̍ɔ̍mbu̍la̍ ka̍lāla̍ŋ lā wā nda̍? Lāsi̍ɔ̍mbu̍ o̍ lāsi̍ɔ̍mbu̍ la̍ cho̍ nda̍ bɛ̍ɛ̍ le̍. Hɔ̄lla̍ nda̍ ā vēsɛ̍i̍ sɛ̍ɛ̍ŋ. Le̍ he̍ī, tē te̍le̍ŋ ya̍ I̍ tu̍sī ni̍ŋ wa᷅ŋnda̍ o̍ lɛ̄ŋnde̍ŋ nde᷅ŋ ni᷄ŋ nyɛ᷅ pālāa̍ chōo̍ wo̍ ō fūūlu̍u̍ pɛ̍, nda̍ kpo̍u̍ ā chō hūnɔ̄ɔ̄ wā ā tɛ̄ɛ̄mbāā mɛ̄ɛ̍ wāŋnda̍ ā pīli̍a̍a̍ ā wā ni̍ŋ a̍ tɛ̍ɛ̍mbāā yɛ̍. Tē te̍le̍ŋ ko̍ŋ ō fūūlu̍u̍ pɛ̍, mɛ̄ɛ̄lu̍la̍ ndāla̍ŋ la̍ŋ la̍ wa᷅ ni̍ŋ la̍ŋ ni̍. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”

¹⁶Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Wāŋnda̍ I̍sɔ̄lūɛ̄ī, te̍le̍ŋndo̍ cho̍ ho̍ō ni̍ mī lā pɛ̄ŋgi̍ hīōūwɔ̄ɔ̍ lāchī a̍ sɔ̄ɔ̍ŋ wɔ̍ɔ̍ŋndo̍ŋ tōsāa̍ mī lā yīya̍ŋ. Lā lōōnu̍ŋ a̍ nɛ̄i̍ bɛ̄ndūāā māsīndīa̍a̍ ā wa̍ chōo̍ wo̍, lā nūūwa̍ nɛ̍i̍ cho̍ nɛ̄i̍ tōnya̍a̍ wo̍ mī lā tōl nɛ̄ī ko̍ŋ kɔ̄ɔ̄lī. Ko̍ŋ to̍sā ni̍ mī nyi̍nāā nyāa̍ ā sɔ̄la̍ pɛ̄ŋgīo̍o̍.” Kɛ̍ mi̍ nya̍ wāŋnda̍ I̍sɔ̄lūɛ̄ī a̍ di̍mī āā, “Sāko̍, ŋ̄ ku̍ē o̍ nɛ̄ī ko̍ŋ chōo̍ le̍?”

¹⁷Mi̍ hɛ̍lī wānāa̍ su̍a̍ā le̍ ya̍ Mɛ̍lɛ̄ka̍ wa̍, mi̍ kɛ̍sī nda̍ nya̍ chōo̍ māā wānāā mɛ̄ŋgɛ̄lāā. Ma̍ dīmūl nya̍ le̍ mī lā ya᷄ŋ nīla̍ŋ o̍ bu̍lu̍ kpūndɛ̍ nda̍ chō hɔ̄ŋndo̍ le̍ nya̍ sīlāa̍ wo̍. Kɛ̍ mi̍ lā dīmī āā, “Sāko̍, ŋ̄ ye᷅ŋ ndu̍ lānī le̍.”

¹⁸“Le̍la̍ŋ nya̍ wāŋnda̍ o̍ lɛ̄ŋnde̍ ni᷄ŋ kpo̍u̍ lā ya᷄ŋ ni᷅la̍ŋ. Lā tōfa̍ mī lā chē nyɛ̍ cho̍ hūnɔ̄ɔ̄ yɔ̄nɔ᷄ŋ a̍ wānāā nīa̍a̍ wo̍.

¹⁹Nya̍ wāŋnda̍ o̍ chi̍e̍ēŋndo̍ ni᷄ŋ kpo̍u̍ lā ya᷄ŋ ni᷅la̍ŋ. I̍ bɛ̍ɛ̍ndi̍a̍ŋ le̍ mī to̍sa̍ mī kpūndɛ̍ bɛ̄ndōo̍ ō tōl wānāā nīa̍a̍ chōo̍. Dɛ̍nɛ̍ wɔ̍ɔ̍ŋ o̍ dɛ̍nɛ̍ wɔ̍ɔ̍ŋ nda̍ kɛ̄ɛ̄si̍a̍a̍ a̍ kɔ̄ltā ndāla̍ŋ ma̍ tōsā ndu̍, le̍ ndu̍ ya̍ I̍ hi᷅ŋ nda̍ nyɛ̄ pālāa̍ tūsī chōo̍ ni̍. Le̍ sa̍bū he̍ī ī chō yɔ̄nɔ᷄ŋ a̍ nda̍ wo̍ cho̍ ni̍, māā le̍ mɛ̄ɛ̍ nda̍ kɛ̄ɛ̍ le̍ ya̍ dīōmndo̍ tūēīyɔ̄ɔ̍, ndu̍yɛ̍ ma̍ kɛ̄ɛ̄ le̍ sāwāla̍ nīla̍ŋ chūa̍a̍ yɛ̍.

²⁰Wāŋnda̍ I̍sɔ̄lūɛ̄ī, ya̍ Mɛ̍lɛ̄ka̍ būūla̍ŋ bɛ̍ɛ̍ a̍ nyɛ̄m chūŋ kɛ̄ndɛ̄ŋ nya̍ chāŋ o̍ lɛ̄ŋndē Si̍ɛ̍bāle̍ŋ ni᷄ŋ mī lā lūām o̍ ya̍ lo̍ wo̍ŋ te̍. Chūɛ̄īmā chūŋ kɛ̄ndɛ̄ mā nya̍ fūlā o̍ lɛ̄ŋīī lēvīlle̍ ni᷄ŋ mī lā yɔ̄ŋgū ma̍ŋ o̍ ya̍ lo̍ māā sa̍lā wa̍ŋ, I̍ chi̍ bɛ̍ɛ̍ ma̍ŋ nyɛ̄ o̍ nyɛ̄ le̍. Sa̍lālā nyāla̍ lu̍a̍māā la̍ŋ ki̍nɛ̍i̍, I̍ chɛ᷅l la̍ŋ te̍. Sa̍lā o̍ sa̍lā nya̍ sōlī o̍ ya̍ lo̍, ō pīlɛ̍ bɛ̍ɛ̍ cho̍ mbō hīni̍ ya̍ kɔ̄l te̍.”

²¹Le̍ he̍ī, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ nya̍ o̍kɔ̄ɔ̄ wo̍ cho̍ ho̍ō ni̍, ō dīmi̍ āā, “I̍ cho̍ nyɛ̍ to̍sā nya̍ kpo̍u̍ mī lā kōōnda᷅ŋ ndu̍ mī lā de᷄l mī lā chūu̍ wo̍ kɛ̄sī nya̍ lāchī. Fi̍nyāa̍ a̍ chūāūwāā ndūa̍a̍ lātūlu̍, ā kōōnda᷅ŋ ni̍ŋ nyɔ̍ɔ̍ ho̍ō mā de᷄l mā chūu̍. Wānāa̍ na̍a̍ŋa᷅ŋ nda̍ a̍ wānāā nda̍ chīɛ̄ɛ̄li̍āŋ nda̍, nda̍ kpo̍u̍ ā chō hūnɔ̄ɔ̄ chūū.”

²²Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍, ō dīmi̍ āā, “Wāŋnda̍ Chūlu̍sɛ̄lɛ̄m, ya̍a̍mɔ̍ɔ̍wa̍ chō chɔ̄nɔ᷄ŋndo̍ o̍ lɛ̄ŋnde̍ŋ bā lūāŋndo̍ ma̍ wā hūnɔ̄ɔ̍ le̍ nya̍ dēlɔ̄ɔ̍ chōo̍. Lɛ̄ŋndē kpāāyāle̍ bɛ̄ndūle̍ cho̍ o̍ chi̍e̍ēŋndo̍ mɛ̄ɛ̄lu̍la̍ŋ pɔ̍ le̍ŋ lē bɛ̄ɛ̄ndi̍a̍ŋ le̍ nya̍ hūnɔ̄ɔ̍ chīŋa̍la᷅ŋndo̍ a̍ sɔ̍ŋgɔ̄ɔ̍.

²³Ā bɛ̄ɛ̄ndi̍a̍ŋ a̍ chīɔ̄ūlā ndāla̍ŋ ndu̍yɛ̍ a̍ ba̍lta̍ ndāla̍ŋ le̍ nya̍ hūnɔ̄ɔ̍ dīūwo̍. Ndu̍yɛ̍ wāŋnda̍ ha̍ā ā chō wānāā kɔ̄ltā vēsɛ̍i̍ bɛ̍ndū, īnyīɛ̍ɛ̍ bɛ̍ɛ̍ ā nɔ̍ le̍. Ā chō hūnɔ̄ɔ̍ o̍ su̍a̍ā chɔ̄ūwa̍ chōo̍ kpe̍e̍kpe̍i̍ le̍ nya̍ chīŋa̍la᷅ŋ ndo̍. Tē wānā tu̍e̍ī su̍a̍ā nda̍ chō hūnɔ̄ɔ̍ chōo̍ wa̍ īdīkī dīkīe̍i̍ pɛ̍, to̍fa̍ wɔ̍ ko̍ mɛ̄ɛ̍ Pēe̍ Mɛ̄ŋmā Īhɛ᷄llo̍ ō wā nu̍a̍ā īyōkpa᷄ŋ yo̍kpa᷄ŋ bɛ̍ndūe̍i̍ yɛ̍. Ā chō hūnɔ̄ɔ̍ ā bɛ̄ɛ̄ndīa̍ŋnda̍ kpe̍e̍kpe̍i̍ le̍ hūnɔ̄ɔ̍ Chūlu̍sɛ̄lɛ̄m tɛ̄ɛ̄mbūūwo̍.”

²⁴I̍ cho̍ tūēīyɔ̄ɔ̍ wāŋnda̍ dīmīo̍o̍ āā, “Wānāā nda̍ chō ha̍ā dīmīo̍o̍ wa̍ ŋ̄ tūēī a̍ nda̍ o̍kɔ̄ɔ̄. Sīōōŋīī bɛ̄ndūe̍i̍ ī bīī na̍a̍ a̍ nda̍. Mɔ̍nɛ̍i̍ bɛ̍ndūe̍i̍ pɛ̄ o̍ kɔ̄ltā nāāla̍ŋ ni᷄ŋ. Kɔ̄lta̍ŋ lā hīīlu̍ŋ na̍a̍ kpo̍u̍. Ī yɔ̄nu̍ŋ ko̍ a̍ na̍a̍ mɛ̄ɛ̍ wānā la̍nɔ̍ɔ̍ te̍le̍ŋ ndɔ̄ vi̍a̍lāa̍ ō fūūlūū nu̍a̍ā mbō wa̍ a̍ sīōōŋīī bɛ̄ndūīī kēŋ yɛ̍.

²⁵Wānā o̍ wānā ku̍ā o̍ chīɔ̍ɔ̍ŋ ni̍ŋ te̍. Wānā di̍ām bɛ̍ɛ̍ nɛ̍ī mā kūɛ̄ bā o̍ bā le̍, fo̍ndōle̍ ya̍a̍mɔ̍ɔ̍wa̍ ā chō ni᷅ŋ ā tīūwāā kpo̍u̍, ā bɛ̄ɛ̄ndīa̍ŋ a̍ mɔ̄ɔ̄ŋ nda̍ŋ le̍ wāna̍ nda̍ chā nu̍a̍ā mā dīī nu̍m ndo̍. Bā o̍ bā wānā hi̍o̍u̍ ni᷅ŋ, o̍ sīōōŋīī bɛ̄ndūe̍i̍ ni̍ŋ ko̍ na̍a̍ ŋ̄ chō ni᷅ŋ ni̍.”

²⁶Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl wānāā ndūa̍a̍ a̍a̍, “Lā wōūnu̍ŋ nyɛ̍lā lābɛ̍kīla̍ŋ le̍ kɔ̄ltā nyāla̍ ta̍mbɛ̍i̍la̍ŋ chɔ̄mndo̍, ndu̍yɛ̍ mī lā de᷄l o̍ pūlta̍ŋ ni᷄ŋ mī lā mūlu̍ mu̍lu̍ŋ a̍ cha᷄ŋndo̍. Lā cha᷄ŋ mī lā kōŋu̍l chōo̍ cho̍o̍ kpe̍le̍ŋ mɛ̄ɛ̍ wāŋndo̍ chūālē ndɔ̄le̍ pi᷅lɛ̍ le̍ŋ lē kīōlū ndu̍ o̍ bā nu̍a̍ā so̍, mbō wa̍ cha᷄ŋ īmɔ̍nɛ̍ ko̍ŋ yɛ̍, fo̍ndōle̍, wānāa̍ cho̍ nya̍ hūnɔ̄ɔ̄ tɛ̄ɛ̄mbūūwo̍ wa̍ ā chō nya̍ hūnɔ̄ɔ̄ dēlɔ̄ɔ̄ chōo̍ o̍ lēpīlɛ̍ ni᷄ŋ kpe̍.”

²⁷Mi̍ Mɛ̄lɛ̄ka̍ dīmūl la̍ āā, “Chɛ̄lūīma̍yā, I̍ si̍i̍ŋgu̍u̍ nu̍m māsīīŋgūāā mɛ̄ɛ̍ wāna̍ to̍sā wa̍llo̍ a̍ chīli̍ŋndo̍ŋ ndo̍ ō chō yɛ̍, ndu̍yɛ̍ mi̍ si̍i̍ŋgūū wāŋnda̍ I̍sɔ̄lūɛ̄ī māā ŋ̄chīli̍ŋ le̍ mā tōsa̍ wa̍llo̍ a̍ nda̍ mī nūm pi̍la̍ chē wānāā nda̍ chō wa̍.

²⁸Wāŋnda̍ I̍sɔ̄lūɛ̄ī wānāā bōlīī kālāā bɛ̄ndūa̍a̍ nda̍ chō ni̍, wānāa̍ bi̍ī ma̍ sōlī ya̍ dīɔ̄m nda̍ wāŋnda̍ ha̍ā ā chō ni̍. Ā cho̍ wa̍nāā wānā nɔ̍la̍ lākɔ̄l mūlī le̍. Kɔ̄ltā ndāla̍ŋ kālo̍o̍ to̍fa̍ wɔ̍ ko̍ mɛ̄ɛ̍ chīli̍ŋi̍i̍ būlɔ̍ŋsīi̍ye̍ ī chō nu̍a̍ā yɛ̍. Nda̍ kpo̍u̍ wānāā lāka̍fāā bɛ̄ndūa̍a̍ nda̍ chō ni̍, le̍ te̍le̍ŋ o̍ te̍le̍ŋ mā bālū a̍ chāāŋāā ndāa̍ o̍ lāsōndō mā dīmī sɔ̍ɔ̍ŋ lāchōōwa̍ŋ a̍ nda̍ o̍kɔ̄ɔ̄.

²⁹Wāŋnda̍ I̍sɔ̄lūɛ̄ī a̍ cho̍ māchūāā mɛ̄ɛ̍ ka̍ni̍i̍ hu̍mbūi̍ ni̍ŋ te̍ ve̍ ī wā nu̍a̍ā yɛ̍. Ka̍ni̍i̍ hu̍mbūe̍i̍ tē ī ni᷄ŋ te̍, mɛ̄ɛ̍ mɛ̄ɛ̍ wāna̍ to̍sā wa̍llo̍ a̍ ka̍ni̍e̍i̍yo̍ ō kīndi̍ ki̍ndi̍ le̍ ndi̍ dīndīo̍o̍ a̍ yīŋnde̍ŋ ō nɔ̍lā le̍. O̍ ko̍ŋ, tē ō sāālu̍ŋ pɛ̍ māā ī cho̍ ka̍ni̍i̍ de̍ndū le̍, vīōūwɔ̄ɔ̍ ko̍ni̍ o̍ vi̍a̍ū ndi̍ ni̍.

³⁰Mɛ̄ɛ̍ nda̍ kɛ̄ɛ̄ nu̍a̍ā ka̍ni̍i̍ hu̍mbūī wāā le̍nde̍i̍ mā vīōū ndi̍ yɛ̍, le̍nde̍ ya̍ Mɛ̍lɛ̄ka̍ Ya̍a̍wɛ̄ɛ̄ ya̍ I̍ kɛ̍ɛ̄ ni̍ŋ wa᷅ŋnda̍ I̍sɔ̄lūɛ̄ī ni̍.”