Read Southern Kisi Chɛ̄lūīma̍yā 7 Bible Online

Chɛ̄lūīma̍yā 7 - Southern Kisi bible

Chɛ̄lūīma̍yā 7

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ vɛ̄lɛ̄ ya̍ Chɛ̄lūīma̍yā yōōŋgū chēle̍ŋ. Mbo̍ dīmūl lā āā,

²“Kɔ̍ si᷅m o̍ chīɛ̍i̍ ya̍ Mɛ̍lɛ̄ka̍ Ya̍a̍wɛ̄ɛ̄ wo̍ dīō mā di̍mu̍l wāŋnda̍ yōōŋgōo̍ ho̍ō.” Di̍mu̍l nda̍ māā, nya̍ wāŋnda̍ Chu̍dā, nya̍ wānā o̍ wāna̍ cho̍ hūnɔ̄ɔ̍ na̍ŋ le̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍, lā ya᷄ŋ ni᷅la̍ŋ mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍.

³Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō dīmi̍ āā, “Wāŋnda̍ Chu̍dā, lā māŋga̍la̍ ka̍a̍lā nyāla̍ŋ, ndu̍yɛ̍ mī lā pɛ̄ŋgi̍ sɔ̄ɔ̍ŋ nya̍ chō tōsāa̍ wo̍ŋ tōsāa̍. Ko̍ŋ to̍sā ni̍, mī ya̍ Mɛ̍lɛ̄ka̍ tōsa̍ mī lā hīōū lāchī a̍ cha᷄lle̍ o̍ lɛ̄ŋnde̍ŋ nde᷅ŋ ni᷄ŋ.”

⁴Wāŋnda̍ chō dīmīo̍o̍ āā, “Nyɛ̄ o̍ nyɛ̄ ō yɔ̍nūŋ na̍a̍ na̍nu᷄ŋ te̍, fo̍ndōle̍ Mɛ̄lɛ̄ka̍ Ya̍a̍wɛ̄ɛ̄ chīɛ̄ī ndɔ̄ɔ̍ cho̍ ho̍ō ni̍. Chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ kpe̍e̍kpe̍i̍ cho̍ ho̍ō ni̍.” Kɛ̍ lā du̍a̍ū tīīnda᷄ŋndo̍ o̍ nyɛ̄ wāŋnda̍ ā chō ko̍ŋ di̍mīo̍o̍ wo̍ ni᷄ŋ te̍, fo̍ndōle̍, hūīyo̍ ko̍ni̍ nda̍ chō nya̍ ni̍.

⁵Lā māŋga̍la̍ ka̍ālā nyāla̍ŋ ndu̍yɛ̍ mī lā pɛ̄ŋgi̍ sɔ̄ɔ̍ŋ wɔ̍ɔ̍ŋ nya̍ chō tōsāa̍ wo̍ŋ tōsāa̍, o̍ ko̍ŋ kɔ̍ɔ̍lī, mī lā wa̍ sa̍kpō nya̍ pi̍la̍ tɛ̄ɛ̄ŋ vēllāa̍ vēllē.

⁶Wānāā lēkāa̍wa̍a̍ cho̍ nya̍ tɛ̄ɛ̄ŋ nda̍ ni̍, vīi̍ya̍a̍ cho̍ nya̍ tɛ̄ɛ̄ŋ nda̍ ni̍, o̍ ko̍ŋ kɔ̍ɔ̍lī, a̍ wāŋ lāāndūāā pīāāndūāā ndāa̍ ā vī wa̍, lā pɛ̄ŋgi̍ nda̍ nyɛ̄ pālāa̍ tūsīo̍o̍ chōo̍, ndu̍yɛ̍ o̍ ko̍ŋ kɔ̍ɔ̍lī, mī lā pɛ̄ŋgi̍ wa̍nāa̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wa̍ dīūwo̍ o̍ lɛ̄ŋnde̍ŋ nde᷅ŋ ni᷄ŋ. O̍ ko̍ŋ kɔ̍ɔ̍lī, nyɛ̄ o̍ nyɛ̄ nya̍ sōōlūū māā mɛ̄lɛ̄ka̍a̍ nyā, mu̍ŋ yɔ̍nūŋ māā nyɛ᷄m cho̍ mu᷅ŋ ŋ̄ nɔ̍ tɔ̍nɔ̄ o̍ tɔ̄nɔ̄ le̍ mɛ̄ɛ̍ le̍ nya̍ nyɛ̄ pālāa̍ chūūwo̍ wo̍ŋ ni̍, mu̍ŋ kpo̍u̍ mī lā pɛ̄ŋgi̍ mu̍ŋ sōōlūūwo̍.

⁷Tē lā chɛ᷄l pɛ̍ mī lā māŋga̍la̍ŋ, I̍ cho̍ tōsā mī lā hīōū lāchī a̍ cha᷄lle̍ o̍ lɛ̄ŋnde̍ŋ nde᷅ŋ ni᷄ŋ, lē I̍ ke̍ le᷅ŋ sīndɛ̄ fi̍nyāā nyāā ma̍māa̍ le̍ fɛ̍ɛ̍ŋ a̍ fɛ̍ɛ̍ŋ nde̍ŋ.

⁸“Wāŋnda̍ Chu̍dā, nyɛ̄ o̍ nyɛ̍ cho̍ dīmi᷄ŋndo̍, ndu̍yɛ̍ mi̍ lā dūāū tīīnda᷄ŋ nyāa̍ o̍ ndu̍ ni̍ŋ, hūīnɔ᷄ŋndo̍ ko̍ni̍ nya̍ chō ni̍, ŋ̄ cho̍ sɔ̍ɔ̍ŋ yɔ̍nu̍ŋ te̍.

⁹Lā chō vīīle̍ŋ yɔ̄ŋndo̍, ndu̍yɛ̍ o̍ ko̍ŋ kɔ̍ɔ̍lī, mī lā dīū wa᷅ŋndā chīe̍e̍ya̍, mī lā sūūndā a̍ wānāā nya̍ cho̍ o̍ nɔ̄ ni̍ŋ nya̍ nda̍ā le̍ wa̍, ndu̍yɛ̍ mī lā mēnāŋ o̍ chōōla̍ŋ chōo̍, o̍ ko̍ŋ kɔ̍ɔ̍lī, mī lā lūām nyɛ᷅m chu᷅ŋ kɛ̄ndɔ̍ŋ o̍ mɛ̄lɛ̄ka̍ Bāāl lo̍, ndu̍yɛ̍ mī lā sōōlūū nyɛ᷅m nya̍ a̍a̍ si̍nā bɛ̍ɛ̍ pa̍a̍ndū le̍ wo̍ŋ māā mɛ̄lɛ̄ka̍a̍ nyā.

¹⁰Sɔ̄ɔ̍ŋ mu᷅ŋ kpo̍u̍ mu̍ŋ ya̍ Mɛ̍lɛ̄ka̍ tu᷄l yɛ̄le̍ŋ tūl bɛ̄ndōo̍ ni̍. Kɛ̍ mi̍ lā wā mu᷅ŋ kpo̍u̍ to̍sāa̍ o̍ ko̍ŋ kɔ̍ɔ̍lī, mī lā hūŋ ya̍ si᷄mnda᷄ŋ lāchī o̍ chīɛ̄īyo̍ ho̍ō ni᷄ŋ, chīɛ̄ī ya̍ Mɛ̍lɛ̄ka̍ pīla̍ hɛ̍li̍ ho̍ō mi̍ si̍i̍ŋgūū ndu̍ māā chīɛ̄ī nī wo̍, mī lā dīmi̍ āā, ‘Mbɔ̄ nyɛ̄ o̍ nyɛ̄ ō yɔ̍nūŋ na̍a̍ na̍nu᷄ŋ te̍.’

¹¹Wāŋnda̍ Chu̍dā, bāā lā yēēma̍ mī lā sīīŋgu̍u̍ chīɛ̄īyo̍ ho̍ō, ō ya̍ pi̍la̍ I̍ hɛ̍li̍ ho̍ō mi̍ si̍i̍ŋgūū ndu̍ chīɛ̄ī nī wo̍ fo̍ndāŋ vīīya̍ ā vīāŋnūŋ ndo̍? Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nya̍ chō tōsāa̍, I̍ cho̍ chɔ̄ɔ̍ kpo̍u̍.

¹²Kɛ̍ ndu̍yɛ̍ lā kɔ̍ wɔ̍ Si̍lɔ̄ɔ̄ chi̍e̍e̍, mī lā kɔ̍ mɛ̍ɛ̍ŋnda᷄ŋ fo̍ndā ya̍ i̍i̍ hɛ̍lī ko̍ŋ le̍ ya̍ sōōlūūwo̍ lo̍ŋ ndo̍. Le̍ yɔ̄ŋ wɔ̄ɔ̍ŋ wānāā nīa̍a̍ I̍sɔ̄lūɛ̄ī a̍ to̍sa̍ wo̍, lā kɔ̍ mī lā kɔ̍ chɔ᷅ nyɛ̄ ya̍ I̍ to̍sa̍ a̍ fo̍ndāŋ kōŋ ndo̍.

¹³Bōōndi̍i̍ nya̍ wa̍ sɔ̄ɔ̍ŋ mu᷅ŋ kpo̍u̍ to̍sāa̍ ve̍, mi̍ si̍lā nya̍ le̍ te̍le̍ŋnda̍ fa̍ŋgā fa̍ŋgā, kɛ̍ lā chɛ᷄l mī lā ya᷄ŋ ya̍ lānī le̍. Ya̍ i̍i̍ so̍o̍ bɛ̍ɛ̍ nāa̍ nya̍, nya̍ a̍a̍ ye᷅ŋ ya̍ lānī le̍.

¹⁴Le̍ he̍ī, nyɛ̄ ya̍ I̍ to̍sa̍ a̍ fo̍ndā nī so̍o̍lāa̍ Si̍lɔ̄ɔ̄ chi̍e̍e̍ wo̍, mɛ̄ɛ̍ mī to̍sa̍ ndu̍ a̍ chīɛ̄īyo̍ ho̍ō, chīɛ̍i̍ cho̍ ho̍ō le̍ ya̍ mi̍ lā tīīnda᷄ŋ ndu̍ le̍ nya̍ māndāa̍ wo̍. Nyɛ̍ yɔ̍nu̍ŋ a̍ fo̍ndā nī so̍o̍la̍a̍ Si̍lɔ̄ɔ̄ wo̍, mɛ̄ɛ̍ mbō yɔ̄nu̍ŋ a̍ fo̍ndāa̍ ho̍ō, ndu̍ yɔ̍nūŋ māā fo̍ndā ya̍ I̍ hɛ̍li̍ ho̍ō mi̍ ke᷅ nya̍ ndu̍ nya̍ fi̍nyāā nyāā ma̍māa̍ wo̍ ni̍.

¹⁵I̍ cho̍ tōsā mā hu᷄ŋ kɔ̍ndū nya̍ kpo̍u̍ mā kūɛ̄ a̍ nya̍ o̍ chɛ̄le̍ŋ ni᷄ŋ, le̍ mī to̍sa̍ mī lā fāŋa̍ŋ ya̍ o̍ hɔ̄l, mɛ̄ɛ̍ ya̍ I̍ to̍sa̍ a̍ wānāya᷅ŋ nya̍ŋ wāŋnda̍ I̍sɔ̄lūɛ̄ī yɛ̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”

¹⁶Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Le̍la̍ŋ Chɛ̄lūīma̍yā, nyu̍nā ya̍ dīōm le̍ wāŋnda̍ ha̍ā le̍. Bi̍ī īmɔ̍nɛ̍ le̍ nda̍ mā cha̍ŋ nāa̍ ya̍ chu̍a̍ le̍ nda̍ le̍. Nyɔ̍ɔ̍lū ya̍ le̍ nda̍ le̍, fo̍ndōle̍ so̍o̍ bɛ̍ɛ̍ nāa̍ ya̍ chu̍a̍ I̍ ye᷅ŋ nu̍m lānī le̍.

¹⁷Nūm pi̍la̍ bɛ̍ɛ̍ ā chō chɔ̄ɔ̍ nyɛ̄ wāŋnda̍ ha̍ā ā chō tōsāa̍ o̍ chi̍o̍o̍ŋ Chu̍dā a̍ o̍ bɛ̍ɛ̄la̍ŋ Chūlu̍sɛ̄lɛ̄m kpo̍u̍ wo̍.

¹⁸Tē ā wa̍ bēe̍dīi̍yo̍ bɛ̄ɛ̄ndīa̍a̍ le̍ ndu̍ sa̍lāa̍ sōlīo̍o̍ o̍ mɛ̄lɛ̄ka̍ ndā la̍a̍ndōo̍ lo̍ pɛ̍, ō nda̍ vēēlū āā Māsāa̍ chōo̍ cho̍o̍ wo̍, wānā pɔ̍nɔ̍ ni̍, wānā la̍nɔ̍ ni̍ chūāāmbɔ̄ ni̍ nda̍ kpo̍u̍ a̍ to̍o̍sīāā bēe̍dīi̍yo̍ ho̍ō ni̍. Tē chūāāmbūa̍a̍ nda̍ tīŋgū yɔ̄mnde̍ pɛ̍, wāŋ pīāāndūa̍a̍ nda̍ kīīsu̍u̍ yīŋnde̍ŋ, o̍ ko̍ŋ kɔ̍ɔ̍lī wāŋ lāāndūa̍a̍ nda̍ tōōsi̍a̍a̍ bēe̍dīi̍yo̍. Ndu̍yɛ̍ o̍ ko̍ŋ kɔ̍ɔ̍lī, mā kūā mu̍ɛ̍īya̍ŋ tālāa̍ o̍ nyɛ̄m chēle̍ŋ nda̍ sōōlūū māā mɛ̄lɛ̄ka̍a̍ ndā wo̍ŋ lo̍, le̍ hāli̍ kpe̍ŋ mā tōsa̍ mī ya̍ Mɛ̍lɛ̄ka̍ tāmbū kɔ̄l.

¹⁹Kɛ̍ ndu̍yɛ̍ yīya᷄ŋ ndāa̍ cho̍ ni̍ māā ya̍ nda̍ chō kɔ̄llo̍ tɛ̄ɛ̄mbūūwo̍ ni̍? Ō cho̍ ya̍ le̍ nda̍ chō kɔ̄l tɛ̄ɛ̄mbūū le̍, nda̍ pi̍la̍ cho̍ dɛ̍nɛ̍ pa̍lāa̍ vēēlɔ᷄ŋndo̍ o̍ lēbōllo̍, ni̍ ndu̍yɛ̍ mī si̍ɔ̍mbu̍la̍ bɛ̄ndūla̍ŋ lā hu᷄ŋ bi̍ī nda̍.

²⁰Le̍la̍ŋ ya̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ nyɛ̄ ya̍ I̍ di̍mi̍ wo̍ cho̍ ho̍ō ni̍. I̍ cho̍ hūnɔ̄ɔ̄ tu̍mbe̍ dɔ̍ɔ̍nɔ᷄ŋ o̍ ka̍lā ka̍lā a̍ fo̍ndāa̍ ho̍ō. Wāna̍ chi̍e̍e̍ ni̍, chɔ̄lū ni̍, nda̍ kpo̍u̍ I̍ cho̍ nda̍ hūnɔ̄ɔ̄ dɛ̍nɛ̍ pa̍lāa̍ tūsī chōo̍, ndu̍yɛ̍ o̍ ko̍ŋ kɔ̍ɔ̍lī, mī tɛ̍ɛ̍mbu̍u̍ kpe̍le̍la̍ īyɔ̄mnda̍ŋ a̍ tɔ̄lɔ̄ɔ̄la̍ŋ o̍ chīɔ̍ɔ̍ŋ ni᷄ŋ kpo̍u̍. Tu̍mbe̍ ya̍ I̍ du̍a̍u̍nūŋ ni̍ŋ a̍ fo̍ndāa̍ ho̍ō wo̍ ō nɔ᷅ ni̍ŋ la̍mɛ̍ɛ̍lu̍ le̍.”

²¹Mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō hīāū lāchī a̍ sūɛ̍i̍, mbo̍ dīmī āā, “Wāŋnda̍ Chu̍dā, lā hīo̍u̍ la̍chi̍ a̍ sa̍lālā nyāla̍ŋ sōlīo̍o̍, kɛ̍ I̍ ye̍e̍ma̍ sa̍lā o̍ sa̍lā nya̍ le̍. Sa̍lālā nyāla̍ lūāmāāla̍ŋ bɛ̍ɛ̍ lā sōli̍ mī nya̍ pi̍la̍ dīā vīsīŋ mu᷅ŋ.

²²Bōōndi̍i̍ ya̍ I̍ so̍li̍ fi̍nyāā nyāā ma̍māa̍ o̍ chɛ̄le̍ŋ ni̍ŋ I̍chi̍pī ve̍, I̍ di̍mu̍l nda̍ le̍ sa̍lā o̍ sa̍lā sōlī nāa̍ ya̍ chu̍a̍ le̍, sa̍lā lūāmāā ni̍, sa̍lā yɔ̄ŋāā ni̍.”

²³Nyɛ̄ ya̍ I̍ di̍mu̍l nda̍ le̍ tōsāa̍ wo̍ wa̍ ho̍ō ni̍, mi̍ di̍mūl nda̍ a̍a̍, “Lā tūsi̍ŋ o̍ dīōm nūu̍ bɛ̄ŋgu̍, ko̍ŋ to̍sā ni̍ mī wa̍ Mɛ̄lɛ̄ka̍ nyā, ndu̍yɛ̍ mī nya̍ bɛ̍ɛ̍ wa̍ wānāā nī. Nyɛ̄ o̍ nyɛ̄ ya̍ I̍ di̍mu̍l nya̍ le̍ tōsāa̍, lā hīo̍u̍ la̍chi̍ a̍ ndu̍ tōsāa̍, ko̍ŋ to̍sā ni̍ mī nyɛ̄ o̍ nyɛ̄ wa̍ ō kɛ̄ndɛ̄ a̍ nya̍.”

²⁴“Kɛ̍ fi̍nyāā nyāā ma̍māa̍ ā chɛ᷄l mā tūsi̍ŋ o̍ dīōm nūu̍ bɛ̄ŋgu̍ le̍, kɛ̄lɛ̄ŋgāā ni᷅ŋ te̍ mā ya᷄ŋ ya̍ bɛ̍ɛ̍ la̍ni̍. Yīya᷄ŋ bōllē kāla̍ wa̍ o̍ kɔ̄ltā ndāla̍ yɔ̄ŋ wɔ̄ɔ̍ŋnda̍ŋ ni᷄ŋ ndo̍ ndu̍ ko̍ni̍ nda̍ tōl kɔ̄ɔ̄lī ni̍. Sɔ̄ɔ̍ŋ kɛ̍ndɛ̄ŋ nda̍ a̍a̍ nɔ̍ mī nda̍ a̍a̍ hi̍o̍ū lāchī a̍ tōsāa̍ wo̍ŋ kpo̍u̍, ma̍ pūɛ̍ɛ̍ŋ a̍ mu̍ŋ, ma̍ mīīŋgū sɔ̄ɔ̍ŋ wɔ̍ɔ̍ŋ nda̍ a̍a̍ to̍sā pa̍a̍ndū wo̍ŋ tōsāa̍.

²⁵Chɔ̍ŋ a̍ te̍le̍ŋ fi̍nyāā nyāā ma̍māa̍ ā fūla̍ o̍ chɛ̄le̍ŋ ni̍ŋ I̍chi̍pī wo̍ mbo̍ bīya᷅ŋ a̍ pāa̍le̍ hāūle̍ŋ nde̍ŋ, le̍ te̍le̍ŋ o̍ te̍le̍ŋ I̍ cho̍ bu̍ɛ̍i̍yāā nīa̍a̍ vīōmɔ̄ɔ̍ a̍ yōōŋgūla̍ŋ nāa̍ nya̍ wāŋnda̍ I̍sɔ̄lūɛ̄ī chu̍a̍, nda̍ yɔ̍nūŋ māā wānāa̍ su̍a̍ā le̍ ya̍ Mɛ̍lɛ̄ka̍ wa̍ ni̍.

²⁶Kɛ̍ nya̍ ni̍, fi̍nyāā nyāā ma̍māa̍ ni̍, lā chɛ᷄l mī lā tūēī ya̍ dīōm te̍, kɛ̄lɛ̄ŋgāā ni᷅ŋ te̍ mī lā ya᷄ŋ ya̍ bɛ̍ɛ̍ ni᷅la̍ŋ. Mi̍ lā lō o̍ ko̍ŋ, mi̍ lā hīāū lāchī a̍ bōllē kālāle̍ŋ tōsāa̍ a̍ ya̍. Ndu̍yɛ̍ yɔ̄ŋ wɔ̄ɔ̍ŋ nya̍ nya̍ tōsa̍ wo̍ bɛ̍ɛ̍ hi̍o̍ū a̍ ō fi̍nyāā nyāā ma̍māa̍ ā tōsa̍ wo̍.”

²⁷Mi̍ Mɛ̄lɛ̄ka̍ lō o̍ ko̍ŋ mbo̍ dīmūl la̍ āā, “Le̍la̍ŋ mī di̍mu̍l nu̍m Chɛ̄lūīma̍yā, di̍mu̍l bɛ̍ɛ̍ wa᷅ŋnda̍ ha̍ā yōōŋgū ya̍ I̍ cho̍ nu̍m ho̍ō dɔ̄wɔ̄ɔ̍ o̍ sōndō le̍ nda̍ wo̍, ā cho̍ nu̍m lānī yāŋɔ̄ɔ̄ le̍. Yo̍nda̍ bɛ̍ɛ̍ nāa̍ nda̍ chūa̍ kpe̍le̍ŋ ā cho̍ nu̍m dīōm tūēīyɔ̄ɔ̄ le̍.”

²⁸Le̍la̍ŋ di̍mu̍l nda̍ āā, “Nya̍ wāŋnda̍ lɛ̄ŋnde̍ŋ nde᷅ŋ, nya̍ so̍li̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm ni̍ mi̍ lā kɛ̄ɛ̄ le̍ sīlā ndɔ̄ɔ̍ chūa̍a̍. O̍ lɛ̄ŋnde̍ŋ nde᷅ŋ ni᷄ŋ ki̍nɛ̍i̍, wāna̍ tōnya̍a̍ ō pīlɛ̍ bɛ̍ɛ̍ wānā se̍e̍lūŋ ndɛ̍ ndu̍ nya̍ tɛ̄ɛ̄ŋ te̍. Tōnya̍ kālāa̍ bɛ̍ɛ̍ wānā tu̍i̍ī lɛ̍ ndu̍ nya̍ o̍ lāsōndō le̍.”

²⁹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ Chūlu̍sɛ̄lɛ̄m, lā cha᷄ŋ cha̍ŋ īmɔ̍nɔ̍ɔ̍. Lā sēndi̍ yu̍ŋgu̍lta̍ŋ le̍ kɔ̄ltā nyāla̍ ta̍mbɛ̍i̍la̍ŋ chɔ̄mndo̍. Lā he᷄l o̍ pēmbo᷄ŋ chōo̍ mī lā kɔ̍ so̍lī chōndu̍ŋ bīīsi̍o̍o̍ŋ, fo̍ndōle̍ ya̍ Mɛ̍lɛ̄ka̍ Ya̍a̍wɛ̄ɛ̄ I̍ dɔ̍u̍nu̍ŋ tu̍mbe̍ a̍ nya̍ yu̍ŋgo̍o̍ ho̍ō ō kālā ka̍lā, mi̍ kɛ̍ɛ̄ nya̍, ndu̍yɛ̍ mi̍ ma᷅l nya̍ o̍ bā nyāa̍ chōo̍.

³⁰Wāŋnda̍ Chu̍dā, ya̍ o̍ hɔ̄l kpe̍e̍kpe̍i̍ nda̍ hu᷄ŋ to̍sā ni᷅ŋ yɔ̄ŋ wɔ̄ɔ̍ŋndo̍ ni̍. Nyɛ̄m nda̍ sōōlūū māā mɛ̄lɛ̄ka̍a̍ ndā, mi̍ ya̍ Mɛ̍lɛ̄ka̍ tūl mu̍ŋ yɛ̄le̍ŋ tūl bɛ̄ndōo̍ wo̍ŋ, ō cho̍ lɛ̍ le̍ ya̍ kīɔ̍ɔ̍ le̍, kɛ̍ ma̍ chūā mu̍ŋ ma̍ hu᷄ŋ kɛ̍sī mu̍ŋ kpe̍e̍kpe̍i̍ o̍ chīɛ̍i̍ cho̍ le̍ ya̍ Mɛ̍lɛ̄ka̍ wo̍ ni᷄ŋ, o̍ ko̍ŋ, ma̍ tōsā mi̍ chīɛ̄ī nūu̍ ō sīmnu᷄ŋ fo̍ndāŋ nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

³¹“O̍ ko̍ŋ kɔ̍ɔ̍lī, ma̍ kɔ̍ ta̍ŋgūl fo̍ndāŋ lāsōōlu̍u̍ nda̍ vēēlū āā To̍fɛ̍tī wo̍, o̍ lɛ̄ŋndē dɛ̍ŋgbɛ̍le̍ŋ Hi̍nɔ̄m, mā kūā chu̍a̍u̍wāā ndāā la̍a̍ndūa̍a̍ a̍ chūāū ndāā wa̍ŋ pīāāndūa̍a̍ lōmɔ̄ɔ̍ lo̍ŋ māā lāsa̍lā o̍ dīōlā nīla̍ ni᷄ŋ. Ndu̍yɛ̍ ō cho̍ bɛ̍ɛ̍ ya̍ le̍ ve᷅m nda̍ sūɛ̍i̍ wɔ̍ɔ̍ŋīī bɛ̄ndīī wāā le̍nde̍ to̍sā le̍. Ō cho̍ bɛ̍ɛ̍ su̍ɛ̍i̍ ya̍ Mɛ̍lɛ̄ka̍ de᷄l bɛ̍ɛ̍ kɔ᷅l le̍ tōsā le̍.

³²Kɛ̍ ndu̍yɛ̍ mī di̍mu̍l nya̍ wāŋnda̍ Chu̍dā, te̍le̍ŋ cho̍ fūūlūū wāŋnda̍ ve̍e̍lū lɛ̍ ni̍ŋ fo̍ndāŋ lāsōōlu̍u̍ ko̍ŋ āā To̍fɛ̍tī le̍, kɛ̄lɛ̄ŋgāā le̍ mā vēēlu̍ fo̍ndāŋ o̍ cho̍ ko̍ŋ ndo̍ āā lɛ̄ŋndē dɛ̍ŋgbɛ̍le̍ŋ Hi̍nɔ̄m. Kɛ̍ ā vēēlū ni̍ŋ fo̍ndāŋ kōŋ kpo̍u̍ āā lɛ̄ŋndē dɛ̍ŋgbɛ̍le̍ nda̍ dīu̍ wāŋndā dīū bɛ̄ndōo̍ wo̍, fo̍ndōle̍ te̍le̍ŋ fu̍u̍lūū ni̍ŋ ā chɔ̄ ni̍ŋ wa᷅ŋndā chīe̍e̍ya̍ lo̍ŋ ha̍a̍a̍, fo̍ndā o̍ fo̍ndā ō ve᷅m lɛ̍ ni̍ŋ le̍ nda̍ chɔ̄ le̍.

³³Yōūwa̍ a̍ vīsīāā yōndūa̍a̍ nda̍ wa᷅ ni̍ŋ di̍a̍llūŋ wāŋndā chīe̍e̍ya̍ dīo̍o̍ ni̍, ndu̍yɛ̍ wāŋndo̍ ō pīlɛ̍ bɛ̍ɛ̍ ō lo᷅ ni̍ŋ yo̍o̍mū o̍ tu̍a̍ū ni̍ŋ nda̍ le̍.

³⁴Lɛ̄ŋndē Chu̍dāle̍ŋ lē chō hūnɔ̄ɔ̄ pīɔ̄l mī lē lo̍ pɔ̄m. Chōndu̍ŋ nya̍a̍le̍ŋ wāŋnda̍ sōlī o̍ nɔ̄la̍ kɛ̍sīāāla̍ŋ chōo̍ o̍ bɛ̍ɛ̄la̍ŋ Chūlu̍sɛ̄lɛ̄m, a̍ o̍ chi̍o̍o̍ŋ Chu̍dā kpo̍u̍ wo̍ŋ te̍le̍ŋ cho̍ fūūlūū wānā tu̍i̍ī lɛ̍ ni̍ŋ mu̍ŋ te̍. Kɔ̄l kɛ̄ndɛ̄ o̍ kɔ̄l kɛ̄ndɛ̄ wāŋnda̍ tōsā, ko̍ŋ kpo̍u̍ ō chō hūnɔ̄ɔ̄ chūwɔ̄ɔ̄.”