Read Southern Kisi Chɛ̄lūīma̍yā 8 Bible Online

Chɛ̄lūīma̍yā 8 - Southern Kisi bible

Chɛ̄lūīma̍yā 8

¹A̍ te̍le̍ŋ ko̍ŋ, māsāā bɛ̍ndūa̍a̍ ke̍e̍ku̍ Chu̍dā wa̍ ki̍nɛ̍i̍, a̍ wāŋ bɛ̄ndūa̍a̍ wa̍ nda̍ wa̍llo̍ o̍ bā bɛ̄ŋgu̍ wa̍, o̍ ko̍ŋ kɔ̍ɔ̍lī, a̍ wānāā ndāā so̍līāā lāsa̍lāa̍, a̍ wānāā nda̍ a̍a̍ di̍mī sɔ̍ɔ̍ŋ wa̍ā lāchīo̍ŋ nda̍, ndu̍yɛ̍ a̍ wānāā tūa̍a̍ kpo̍u̍ Chūlu̍sɛ̄lɛ̄m, ā chō hūnɔ̄ɔ̄ sɛ̄īla̍ ndāla̍ŋ kūūmbūū mā sōōlu̍u̍ pāālā nda̍la̍ŋ kpo̍u̍.

²Pāālā ndāla̍ŋ lā wā ni̍ŋ la̍ sɛ̍ŋīa̍ŋ lɛ᷅ŋ, mī lā wa̍ lā mālāā nyɛ̄m nda̍ a̍a̍ so̍o̍lūū māā mɛ̄lɛ̄ka̍a̍ ndā wo̍ŋ lāchī, ŋ̍ cho̍ o̍ ha̍la̍a̍ ni᷄ŋ ndo̍ŋ, mu̍ŋ yɔ̍nūŋ māā pāa̍le̍ŋ a̍ pāŋge̍i̍ a̍ lōo̍ŋ ni̍. Nyɔ̄ɔ̍ mu᷅ŋ nda̍ a̍a̍ ka̍a̍la̍ ni̍ māā mɛ̄lɛ̄ka̍a̍ nda̍ mā sāāŋgīāl mu̍ŋ, ndu̍yɛ̍ mā nyūnā mu̍ŋ dīōm le̍ nyɛ̄ nda̍ hāū ba᷅ wo̍, o̍ ko̍ŋ kɔ̍ɔ̍lī mā sōōlūū mu̍ŋ. Kɛ̍ ndu̍yɛ̍ nyɛ̄m mu᷅ŋ lāchī pāālā ndāla̍ŋ lā chō hūnɔ̄ɔ̄ wā lā sɛ̄ŋīa̍ŋ ni̍, wānā o̍ wānā chɔ̍ɔ̍vīāā ni̍ŋ nda̍ŋ mbō chɔ᷅ la̍ŋ te̍, mī lā wa̍ lā mālāā lo̍ŋ māā lāpōō.

³Tē I̍ hu̍ŋ tu̍sī lɛ̄ŋndē dɛ̍nɛ̍ wɔ̍ɔ̍ŋnde̍ŋ nde᷅ŋ nyɛ̄ pālāa̍ chōo̍ pɛ̍, wānā tūa̍a̍ lo᷅ ni̍ŋ bɛ̍ɛ̍ yo̍o̍mū o̍ lɛ̄ŋnde̍ŋ nde᷅ŋ ni᷄ŋ mī to̍sa̍ mā sɛ̄ŋi̍ŋ a̍ nda̍ o̍ lɛ̄ŋīī che̍le̍ŋnde̍ ni᷄ŋ nda̍, nyɛ̄ pālāa̍ wa̍ ni̍ŋ nda̍ cho̍o̍ ha̍a̍a̍, pīɔ̍mndo̍ nda̍ hīāū ni̍ŋ ye̍e̍mā. Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ya̍ so̍ō ni̍.

⁴Mi̍ Mɛ̄lɛ̄ka̍ lō o̍ ko̍ŋ mbo̍ di̍mūl la̍ āā, “Chɛ̄lūīma̍yā, di̍mu̍l wa̍nāā nīa̍a̍ ha̍ā māā nyɛ̄ Mɛ̍lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍, ō dīmi̍ māā, vɛ̄ɛ̄ tē wāŋndo̍ ō lo̍ kɔ̄la̍ŋ pɛ̍ mbō bo᷄ŋ mbō de᷄l, ō cho̍ chɔ̍nɔ᷄ŋndo̍ le̍ o̍ cha᷅ŋ te̍, lo̍ŋ o̍ lo᷅ i̍hi̍ni̍ ni̍? Tē wāŋndo̍ ō wa̍ kɔ̄la̍ŋ īnɛ̍ pɛ̍ mbō pɔ̄u̍ nɛ̍īyo̍, ō cho̍ mi̍i̍ŋgōo̍ le̍ o̍ mi̍i̍ŋgū a̍ mākɔ̄ɔ̄ mbō kɔ̍ kɔ᷅ o̍ nɛ̄ī kpe̍e̍kpe̍i̍yo̍ le̍? Mīīŋgōo̍ o̍ mi̍i̍ŋgū a̍ ma̍kɔ̄ɔ̄ ni̍.

⁵Kɛ̍ vɛ᷅ mi̍ nya̍ wānāā nīa̍a̍ lā kɛ̄ɛ̄ ya̍ I̍ so̍o̍ bɛ̍ɛ̍ nāa̍ nya̍ chūā lā mi̍i̍ŋgū ya̍ o̍ ībūŋ te̍? Nyɛ̄m fo̍ndō fo̍ndo̍ŋ hu̍ī wa̍nā wo̍ŋ, mi̍ lā lō o̍ ko̍ŋ mi̍ lā hīāū lāchī a̍ tīīnda᷄ŋ nyāa̍ dɔ̄wɔ̄ɔ̍ o̍ mu̍ŋ ni̍ŋ māā mɛ̄lɛ̄ka̍a̍ nya̍, lā chɛ᷅l mī lā mīīŋgu̍ ya̍ o̍ ībūŋ te̍.

⁶I̍ cho̍ nya̍ nīla̍ŋ yāŋɔ̄ɔ̍, kɛ̍ I̍ cho̍ tu̍e̍i̍yɔ̄ɔ̄ mī wānā o̍ wānā o̍ sɔ̍lɔ̍la̍ŋ tɛ̍ɛ̍mbūū ndɔ̄ɔ̍ le̍. Le̍ wāna̍ hu᷅ŋ bɛ̍ɛ̍ nu̍a̍ā o̍ ndu̍ pi̍la̍ ni̍ŋ mī sīōōŋnde̍ bīī ndu̍, mbō chɔ̄ɔ̄mu̍u̍ yɔ̄ŋ ndɔ̄ wɔ̍ɔ̍ŋndo̍ wo̍, wānā ko̍ŋ ō cho̍ nya̍ tɛ̄ɛ̄ŋ te̍. Nya̍ kpo̍u̍ mi̍ wānā o̍ wānā o̍ wa᷅ kɔ᷄ŋnda̍ŋ o̍ nɛ̄i̍ ndɔ̍ o̍ ye̍e̍ma̍ wo̍ chōo̍ mɛ̄ɛ̍ pūa̍a̍ o̍ su̍a̍ā chɔ̄ūwa̍ chōo̍ a̍ sɛ̍ŋīŋ nu̍a̍ā o̍ chɔ̄ūwo̍ mī wānā o̍ wānā o̍ chu̍a̍ nɛ̄īyo̍ o̍ ndɔ̍ɔ̍ yɛ̍.

⁷Yōūwāa̍ ba̍lū bɛ̍ɛ̍ ha̍ā a̍ te̍le̍ŋnda̍ŋ o̍ wɔ̄sīo̍o̍ ni᷄ŋ nda̍ kpo̍u̍, ā sīnā te̍le̍ŋnda̍ nda̍ nɔ̄ mā fāŋa̍ŋ o̍ fo̍ndāŋndā ndāla̍ŋ mā kūɛ̄ o̍ fo̍ndāŋndā chēle̍ŋ nda̍ŋ, ndu̍yɛ̍ ā sīnā vɛ̍lɛ̄ te̍le̍ŋnda̍ nda̍ nɔ̄ mā mīīŋgu̍ o̍ fo̍ndāŋndā ndāla̍ŋ nda̍ŋ. Kɛ̍ nya̍ wānāā nīa̍a̍ I̍sɔ̄lūɛ̄ī nya̍ Ī cho̍ le̍nde̍ a̍ nya̍ le̍. Sāwāla̍ ya̍ Mɛ̍lɛ̄ka̍ Ya̍a̍wɛ̄ɛ̄ I̍ ke̍ nya̍ la̍ŋ lā chɛ᷄l mī lā sīna̍ nyɛ̄ sāwāla̍ la̍ŋ lā dīmu̍l nya̍ le̍ to̍sāa̍ wo̍ le̍.

⁸Lā chɛ᷄ŋ pɛ̍ lā dīmi̍ āā, ‘ŋ̄ nɔ̄ kɔ̄l kālo̍o̍ ō bɔ̄ɔ̍. Sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ kpo̍u̍ ō pīlɛ̍ bɛ̍ɛ̍ cho̍ mī ŋ̄ kɛ̄ɛ̍ ndu̍ sīnā le̍.’ Kɛ̍ wānāā nyāa̍ pɛ̍ɛ̍kū wa᷅ŋnda̍ sāwāla̍ nīla̍ŋ nda̍ ā bīī ma̍ mūlī sāwāla̍ nīla̍ŋ bāla̍ŋ mīŋgīo̍o̍ a̍ mākɔ̄ɔ̄.

⁹Kɛ̍ ndu̍yɛ̍ te̍le̍ŋ cho̍ fūūlu̍u̍, mī si̍ɔ̍mbu̍la̍ŋ lā hu᷄ŋ bi̍ī wānāa̍ di̍mi̍ ka̍ŋ māā ā chō wānāā kɔ̄l kālu̍a̍a̍ bɛ̍ndū wa̍. Kɔ̄lta̍ŋ lā chō nda̍ hūnɔ̄ɔ̄ tāmbu̍ ndu̍yɛ̍ mā hu᷄ŋ bi̍ī nda̍ kpo̍u̍ mā kūɛ̄ a̍ nda̍ o̍ lɛ̄ŋīī chēle̍ŋnde̍ ni᷄ŋ. Tē wāŋnda̍ ha̍ā ā kɛ̄ɛ̍ dīōmndā ya̍ Mɛ̍lɛ̄ka̍ Ya̍a̍wɛ̄ɛ̄ I̍ di̍mu̍l nda̍ la̍ŋ pɛ̍, mɛ̄ɛ̍ ɔ̍ɔ̄ kɔ̄l kālu̍ nda̍ dīmi̍ ni᷅ŋ māā ā nɔ̄ wo̍? Ā nɔ̍ kɔ̍l kālu̍ o̍ kɔ̄l kālu̍ le̍.

¹⁰Le̍ he̍ī, I̍ cho̍ tōsā mī lāāndāā ndāa̍ ā hu᷄ŋ si̍mnu᷄ŋ la̍a̍ndāā wāŋ pīāāndūāā chēle̍ŋ, ndu̍yɛ̍ mī to̍sa̍ mī ya̍a̍mɔ̍ɔ̍wa̍ ndāa̍ cho̍ nda̍ hūnɔ̄ɔ̄ yōmɔ̄ɔ̄ wa̍ ā hu᷄ŋ chu̍ā chīɔ̄ɔ̄ŋ nda᷄ŋ kpo̍u̍. Wānā o̍ wāna̍ cho̍ lɛ̄ŋnde̍ŋ nde᷅ŋ, nda̍ kpo̍u̍ ma̍ sīmnu᷄ŋ wa̍nāā dɛ̍nɛ̍ wɔ̍ɔ̍ŋāā bɛ̄ndū. Wānā su̍lāā ni̍, wānā ta̍mbɛ̍i̍ ni̍, nda̍ kpo̍u̍ hɔ̄lte̍ŋ lūɛ̄īyɔ̄ɔ̍ o̍ nyɛ̄m pi̍la̍ŋ mā dīā nyɛ᷅m pi̍la̍ŋ a̍ lāka̍fā. Wānāa̍ su̍a̍ā bɛ̍ɛ̍ le̍ ya̍ wa̍ a̍ wānāa̍ so̍lī sa̍lāla̍ŋ o̍ ya̍ lo̍ wa̍, nda̍ kpo̍u̍ nyɛ̄ pīlɛ̍ kōŋ ko̍ nda̍ chō chōo̍ ni̍.

¹¹Dɛ̍nɛ̍ pa̍lāā cho̍ wānāā nīa̍a̍ chōo̍ mbo̍ wā nda̍ fūūlūūwo̍ wo̍, ā chi᷄ ndu̍ bɛ̍ɛ̍ nyɛ᷅ o̍ nyɛ̄ le̍. Tē ā bīī pɛ̍ ā dīmu̍l wāŋndā chōōla̍ŋ āā, ‘Lā bu̍u̍la̍ŋ te̍, kɔ̄l nyūlōo̍ chō wā.’

¹²Kɛ̍ a̍ sɔ̄ɔ̍ŋ wɔ̍ɔ̍ŋ nda̍ chō mu᷅ŋ tōsāa̍ wo̍ŋ kpo̍u̍, mi̍ si̍ɔ̍mbu̍la̍ ka̍lāla̍ŋ lā wā nda̍? Lāsi̍ɔ̍mbu̍ o̍ lāsi̍ɔ̍mbu̍ la̍ cho̍ nda̍ bɛ̍ɛ̍ le̍. Hɔ̄lla̍ nda̍ ā vēsɛ̍i̍ sɛ̍ɛ̍ŋ. Le̍ he̍ī, tē te̍le̍ŋ ya̍ I̍ tu̍sī ni̍ŋ wa᷅ŋnda̍ o̍ lɛ̄ŋnde̍ŋ nde᷅ŋ ni᷄ŋ nyɛ᷅ pālāa̍ chōo̍ wo̍ ō fūūlu̍u̍ pɛ̍, nda̍ kpo̍u̍ ā chō hūnɔ̄ɔ̄ wā ā tɛ̄ɛ̄mbāā mɛ̄ɛ̍ wāŋnda̍ ā pīli̍a̍a̍ ā wā ni̍ŋ a̍ tɛ̍ɛ̍mbāā yɛ̍. Tē te̍le̍ŋ ko̍ŋ ō fūūlu̍u̍ pɛ̍, mɛ̄ɛ̄lu̍la̍ ndāla̍ŋ la̍ŋ la̍ wa᷅ ni̍ŋ la̍ŋ ni̍. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”

¹³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “I̍ cho̍ chīī a̍ wāŋnda̍ ha̍ā. Wāŋnda̍ ha̍ā ā chō ko̍ mɛ̄ɛ̍ wāŋndo̍ ō tūāl nu̍a̍ā yɔ̄m kīle̍pīi̍yo̍ ō ku᷅m te̍ yɛ̍. Mɛ̄ɛ̍ yɔ̄m fi̍kīi̍yo̍ ō wā nu̍a̍ā ō ku᷅m te̍, ndu̍yɛ̍ mī pēi̍ ndūɛ̍i̍ ī wa̍ ī vēsɛ̍i̍ yɛ̍, le̍nde̍ nda̍ chō ni̍. Le̍ he̍ī, mɛ̄ɛ̍ mī to̍sa̍ mī wāŋnda̍ o̍ lɛ̄ŋndē chēle̍ŋ ni̍ŋ a̍ hu̍ŋ po̍o̍ndā lɛ̄ŋndē ya̍ I̍ ke̍ nda̍ le᷅ŋ nde᷅ŋ, mā chūa̍ le̍ŋ māā nyɛ̄ ndā.[1] Ya̍ Mɛ̍lɛ̄ka̍ Ya̍a̍wɛ̄ɛ̍ so̍ō ni̍.”

¹⁴Tē te̍le̍ŋ ko̍ŋ ō fūūlu̍u̍ pɛ̍, wānāa̍ Mɛ̄lɛ̄ka̍a̍ ā wā ni̍ŋ di᷅mu̍la᷅ŋndo̍ āā, “ŋ̄ cha̍lnūŋ ndɛ̄ na̍nu᷄ŋ te̍. Ŋ̄ chūūŋgi̍āŋ nāa̍ pi᷅lɛ̍ mī ŋ̄ nyāānu̍ŋ o̍ chi̍e̍e̍ŋ nɔ̍ sāāsāla̍ŋ ndo̍ŋ. Tē lo̍ŋ na̍a̍ ŋ̄ wa̍ lākɔ̄ wu᷄ ni̍, ŋ̄ kɔ̍ wu᷅ lo̍ŋ. Ŋ̄ sīnā ni᷅ŋ māā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō chīi̍ na̍a̍ yāmɛ̍i̍ kīlūl le̍ mī ŋ̄ sɔ̄la̍ pīɔ̍mndo̍. Ō ke̍ na̍a̍ nyɛ̄ wɔ̄ɔ̍ŋndo̍ le̍ mī ŋ̄ ko᷄l ndu̍ mī ŋ̄ vī, fo̍ndōle̍ le̍ yɔ̄ŋ wɔ̄ɔ̍ŋ na̍a̍ ŋ̄ tōsa̍ a̍ ndu̍ wo̍.

¹⁵Ŋ̄ wa̍ yīya᷄ŋndo̍ māā ŋ̄ chō kɔ̄l nyūlōo̍ sɔ̄lā, kɛ̍ ŋ̄ sɔ̄la̍ kɔ᷅l nyūlū o̍ kɔ̄l nyūlū le̍. Mi̍ ŋ̄ wā yīya᷄ŋndo̍ māā te̍le̍ŋ ndu̍ o̍o̍ fu̍u̍lūū ni̍ŋ mī na̍a̍ ŋ̍ se̍ŋgū a̍ nāa̍ ho̍ō. Kɛ̍ sɔ̄ɔ̍ŋ lu̍e̍ī na̍a̍ sīōōŋīī bɛ̄ndūe̍i̍ yo̍ŋ mu̍ŋ ko̍ni̍ ŋ̍ wa̍ na̍a̍ kōmāllo̍ ni̍.

¹⁶Ya̍a̍mɔ̍ɔ̍wa̍a̍ nāa̍ cho̍ na̍a̍ hūnɔ̄ɔ̍ dēlɔ̄ɔ̍ chōo̍ wa̍ ā fūūlu̍u̍ ni᷅ŋ Da᷅ŋ chi̍e̍e̍. Su̍a̍ā chɔ̄ūwāā nda̍ chō hūnɔ̄ɔ̍ lēcho̍ō wa̍ ā lo̍ lo̍ŋ mi̍ ŋ̄ wā nda̍ tūēīyɔ̄ɔ̍ hūnɔ̄ɔ̍ a̍ yōōmūla̍ŋ īfūū fūūve̍. Ā chō hūnɔ̄ɔ̍ a̍ bɔ̄ɔ̄lūūwo̍ kpe̍e̍kpe̍i̍. Wāŋnda̍ kpo̍u̍ sīōōŋīī bɛ̄ndūe̍i̍ bīī nda̍ ma̍ wā nyīīyāa̍ kpa᷅kpā a̍ nyɛ̄ su̍a̍a̍ ā chō tōsāa̍ wo̍. Ya̍a̍mɔ̍ɔ̍wa̍ hi̍ŋ le̍ mā de᷄l lɛ̄ŋndē nāāle̍ŋ chōo̍ mā tɛ̄ɛ̄mbu̍u̍ le̍ŋ kpo̍u̍ a̍ nyɛ̄ o̍ nyɛ̍ cho̍ lēni᷄ŋ. Chi̍e̍e̍ nāā bɛ̍ndōo̍ kpo̍u̍ ā chō ndu̍ hūnɔ̄ɔ̄ tɛ̄ɛ̄mbūū, ndu̍yɛ̍ mā dīu̍ wānā o̍ wāna̍ cho̍ lēni᷄ŋ.”

¹⁷Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo̍ o̍ ko̍ŋ mbo̍ dīmī āā, “Wāŋnda̍ Chu̍dā, I̍ cho̍ nya̍ kɛ̄ūwāā wɔ̄ɔ̍ŋ wɔ̄ɔ̍ŋ nda̍ mālɔ̄ɔ̄ tɛ̄ɛ̄ŋ. Kɛ̄ūwāā wɔ̄ɔ̍ŋāa̍ nya̍ nɔ̍lā ni̍ŋ mī lā tōsa̍ nyɛ̄ o̍ nyɛ̄ a̍ nda̍ le̍ wa̍, nda̍ ya̍ I̍ cho̍ nya̍ mālɔ̄ɔ̄ tɛ̄ɛ̄ŋ ni̍, mā lɔ̄ɔ̄vi̍a̍a̍ nya̍ mā dīu̍ nya̍.”

¹⁸Mi̍ Chɛ̄lūīma̍yā o̍ di̍mī āā, “Mɔ̍nɛ̍i̍ cho̍ o̍ kɔ̄l nūu̍ ni᷄ŋ le̍ wānāā nīa̍a̍ ve̍ ī chō i̍ bɔ̄ɔ̍. Kɔ̄l nūu̍ ō tāmbu̍ ha̍a̍a̍, I̍ si̍nā mɛ̍ɛ̍ mɛ̍ɛ̍ ya̍ I̍ yɔ᷅ŋ te̍.

¹⁹Wānāā nīa̍a̍ chō cha᷄ŋndo̍ kpe̍e̍kpe̍i̍. Bā o̍ bā ya̍ I̍ hi̍o̍u̍ o̍ lɛ̄ŋnde̍ŋ nde᷅ŋ ni᷄ŋ, I̍ cho̍ tūēīyɔ̄ɔ̍ wāŋnda̍ cha᷄ŋnda̍ŋ. Ā chō dīmīo̍o̍ māā, bāā mālɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍l ni᷅ŋ sa̍a̍yɔ̍ŋ nu̍a̍ā ni̍? Bāā māsā bɛ̍ndōo̍ le̍ Sa̍a̍yɔ̍ŋ o̍ cho̍ lɛ̍ Sa̍a̍yɔ̄ŋ te̍?” Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ māsa̍ ndā bɛ̍ndōo̍ wo̍ ō mūlī nda̍ dīōm āā, “Nya̍ pi̍la̍ to̍sa̍ ni̍, mi̍ ya̍ Mɛ̍lɛ̄ka̍ dūāūnu᷄ŋ tu̍mbe̍ a̍ nya̍, fo̍ndōle̍, le̍ mɛ̄ɛ̍ nya̍ kɛ̄ɛ̍ ya̍ mi̍ lā mūli᷄ŋ nyɛ᷅m nya̍ pi̍la̍ tōōsīāā wo̍ŋ, a̍ nyɛ̄m fo̍ndōŋ wāŋnda̍ o̍ lɛ̄ŋīī chēle̍ŋnde̍ ni᷄ŋ a̍ pi̍ɛ̍ī yo̍ŋ sōōlūūwo̍ māā Mɛ̄lɛ̄ka̍a̍ nyā yɛ̍.”

²⁰Wāŋnda̍ chō ŋɔ̄ɔ̄chīa̍ŋnda̍ŋ kpe̍e̍kpe̍i̍ a̍ nyɛ̄ pālāa̍ mā dīmī āā, “Wɔ̄ɔ̄le̍ŋ lē chūū, mi̍ sīālte̍ŋ lē hūŋ vɛ̄lɛ̄ mi̍ lē hīāū, ŋ̄ sɔ̄la̍ wa᷅na̍ pi̍ŋī na̍a̍ le̍.”

²¹Dɛ̍nɛ̍ pa̍lāa̍ to᷅l wānāā nīa̍a̍ chōo̍ wo̍, ya̍ bɛ̍ɛ̍ dɛ̍nɛ̍ nī pa̍lāa̍ o̍ cho̍ ni̍. Le̍ he̍ī, mɔ̍nɛ̍i̍ bīī ya̍ le̍ wānāā nīa̍a̍, kɔ̄l nūu̍ ō tāmbu̍ ō bɔ̄ɔ̍.

²²Dɛ̍nɛ̍ pa̍lāa̍ to᷅l wānāā nīa̍a̍ chōo̍ wo̍, ō chō māchūāā mɛ̄ɛ̍ pāū ko̍lo̍ŋ bɛ̍ndōo̍ ō wā nu̍a̍ā wāŋndo̍ yɛ̍. O̍ lɛ̄ŋndē Ki̍li̍a̍a̍dīle̍ŋ ni᷄ŋ bɛ̍ɛ̍ I̍ la̍a̍la̍ŋ māā wānā cho̍ lo̍ŋ o̍ ma̍lā nda̍ pāūwo̍ ho̍ō chīɔ̄ū wo̍ le̍. Mɛ̄ɛ̍ wānā o̍ wānā cho̍ mbō nɔ̄la̍ nda̍ pāūwo̍ ho̍ō chīɔ̄ū le̍?