Read Southern Kisi Chɛ̄lūīma̍yā 9 Bible Online

Chɛ̄lūīma̍yā 9 - Southern Kisi bible

Chɛ̄lūīma̍yā 9

¹A̍a̍a̍, mī bōllē nīle̍ŋ le̍e̍ wa̍ māā so̍o̍ŋ māmɛ̄ŋ, mī mɛ̍mɛ̍ma̍ fūla̍ ya̍ o̍ lāhɔ̄l la̍ŋ ma̍a̍ wa̍ pēē hi̍a̍u̍wāā, ya̍ i̍i̍ sa̍ŋgā ni̍ŋ a̍ cha᷄ŋndo̍ le̍. Īdīi̍ ni̍, īchɔ̄l ni̍, ya̍ i̍i̍ wa᷅ ni̍ŋ cha̍ŋndo̍, le̍ wānāā nīa̍a̍ nda̍ dīū di̍ū bɛ̄ndōo̍ wa̍.

²A̍a̍a̍, mī ya̍ i̍i̍ sɔ̍la̍ yīya̍a̍ o̍ po̍llo̍ ni᷄ŋ, nāa̍ ya̍ i̍i̍ ku̍a̍ŋnūŋ mī ya̍ i̍i̍ kɔ̍ cha̍lnu᷄ŋ nda̍. Wānāā nīa̍a̍ kɛ̍ɛ̍ ha̍ā Mɛ̄lɛ̄ka̍ le̍ nyɛ̄m chēle̍ŋndo̍ŋ sōōlūūwo̍, o̍ ko̍ŋ kɔ̍ɔ̍lī, ma̍ chɛ̄la᷅ŋ le̍ sɔ̄ɔ̍ŋ wɔ̍ɔ̍ŋndo̍ŋ tōsāa̍ wa̍, I̍ wa̍ nda̍ fāŋa᷄ŋ i̍kɛ̍i̍ ba̍ū mī ya̍ i̍i̍ kɔ̍ cha̍lnu᷄ŋ ndo̍ŋ pɔ̍.

³Le̍ te̍le̍ŋ o̍ te̍le̍ŋ wāŋnda̍ ha̍ā ā chō ā bɛ̄ɛ̄ndīa̍ŋnda̍ le̍ chōōla̍ŋ dīmu̍la᷅ŋndo̍ mā hūīya᷅ŋ. Ke̍ŋ cho̍ ni᷅ŋ ī pīāā o̍ lɛ̄ŋnde̍ŋ nde᷅ŋ ni᷄ŋ ni̍. Wānā o̍ wānā cho̍ lɛ̍ tōnya̍ o̍ tōnya̍ dīmī le̍. Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wānāā nīa̍a̍ yɔ̄ŋndā wɔ̄ɔ̍ŋnda̍ŋ mīīŋga᷅ŋ bɛ̍ɛ̍ ā mi̍īŋga᷅ŋ kɔ̍ɔ̍lī a̍ la̍ŋ tōsāa̍ le̍, ā chō ho̍ō chīīyo̍ tōsāa̍ mā sāā ho̍ō.”

⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Le̍la̍ŋ a̍ te̍le̍ŋndo̍ ho̍ō, wānā o̍ wānā mɛ̄ɛ̍ mā ma̍nda̍ŋ a̍ cha᷄ŋ nu̍m nya̍ nāāŋa᷅ŋ ndo̍. Pɔ̄mbɔ̄ nūm bɛ̍ɛ̍ kɛ̄lɛ̄ŋgāā bɛ̄ nūm, a̍ do̍ū lɛ̍ ko̍ ti̍i̍nda᷄ŋndo̍ o̍ ndu̍ ni̍ŋ te̍. Wāŋndo̍ wāna̍ nda̍ chō wānāyɛ̍i̍yo̍ mbō hūi̍ ndu̍, mɛ̄ɛ̍ i̍ yɔ̍nu̍ŋ Che̍kɔ̍pū tɛ̍ɛ̄ŋ nda̍ bɛ̄ ndɔ̄ yɛ̍. Wāŋndo̍ chāa̍ŋ ndɔ̍ nda̍ nāāŋa᷅ŋ ndo̍, a̍ ndu̍ o̍ sōndō o̍ ba̍lū ni̍, bā o̍ hi̍a̍ū ko̍ ō sūāā su̍ɛ̍i̍ wɔ̍ɔ̍ŋnde̍ a̍ ndu̍ o̍kɔ̄ɔ̄.

⁵Wānā o̍ wānā cho̍ lɛ̍ mbō dīmu̍l chāa̍ŋ ndɔ̍ tōnya̍a̍ le̍, hūīya᷅ŋndo̍ tu̍ŋ wāŋnda̍ ā chō ni᷅ŋ ni̍, mā tōsa̍la᷅ŋ ka̍fāla̍ŋ vēllāa̍ vēllē. Dīɔ̄ɔ̄mūe̍i̍ wāŋnda̍ o̍ lāsōndō, ī nɔ̍lā lɛ̍ mī ī dīmi̍ tōnya̍ o̍ tōnya̍ le̍, mɛ̄ɛ̍ chōōla̍ŋ. Yɔ̄ŋndā wɔ̄ɔ̍ŋnda̍ŋ, tōsāa̍ tu̍ŋ wāŋnda̍ ā chō la̍ŋ ni̍, ndu̍yɛ̍ wāŋndo̍ ō pīlɛ̍ bɛ̍ɛ̍ ō de᷅l bɛ̍ɛ̍ kɔ᷅l le̍ mbō māŋga̍la̍ŋ te̍.

⁶Nyɛ̄ pālāa̍ tu̍ŋ nda̍ tūsi̍āŋ chōo̍ ni̍, mā hūīya᷅ŋ ve̍llāa̍ vēllē. Nda̍ kpo̍u̍, ma̍ lō o̍ ko̍ŋ ma̍ kɛ̄ɛ̄ ya̍, wāŋndo̍ ō pi̍lɛ̍ bɛ̍ɛ̍ o̍ chu̍e̍ ya̍ māā Mɛ̄lɛ̄ka̍ ndɔ̄ le̍.”

⁷Le̍la̍ŋ nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ wo̍ cho̍ ho̍ō ni̍, ō dīmi̍ āā, “I̍ cho̍ hūnɔ̄ɔ̄ kɔ̄ltā wānāā nīa̍a̍ dīndī mɛ̄ɛ̍ wāna̍ to̍sā wa̍llo̍ a̍ chīli̍ŋnde̍ wo̍ ō dīndī nu̍a̍ā chīli̍ŋnde̍ a̍ yīŋnde̍ŋ yɛ̍, ndu̍yɛ̍ mī tōfa̍ nda̍ le̍ mī si̍na̍ tē kɔ̄ltā ndāla̍ŋ lā dēndū pɛ̍ a̍ tōnya̍. Wānāā nīa̍a̍ ha̍ā ā tōsa̍ yɔ̄ŋ wɔ̄ɔ̍ŋndo̍ a̍ ya̍, I̍ nɔ̍ ba᷅ o̍ bā chēle̍ŋ mī bi̍ī nda̍ chōo̍ le̍, mɛ̄ɛ̍ o̍ bā kōŋ chōo̍.

⁸Wāŋnda̍ ha̍ā dīɔ̄ɔ̄mūīī ndɛ̄i̍, mɛ̄ɛ̍ chīŋu̍a̍ŋ mā wɔ̄u̍ nu̍a̍ā wɔ̄ɔ̄lē bɛ̄ŋnde̍ŋ, tē ā vɛ̄ wāŋndo̍ a̍ ma̍ŋ pɛ̍ ō sɔ̄la̍ pīɔ̍mndo̍ yɛ̍, le̍nde̍ i̍ wɔ̍u̍ ni̍. Tē ō pīlɛ̍ chē chāa̍ŋ ndɔ̍ pɛ̍, ō sōō nāa̍ ndu̍ chu̍a̍ nyɛ̄ kɛ̄ndɛ̄ kɛ̍ndɛ̄, kɛ̍ yāŋɔ̄ɔ̄le̍ŋ ko̍ni̍ o̍ wa᷅ cha̍a̍ŋ ndɔ̄ ko̍ŋ yēŋndo̍ ni̍ le̍ mbo̍ tūsi̍ ndu̍ nyɛ̄ pālāa̍ chōo̍.

⁹Vɛ̄ɛ̍nɛ̍ wāŋnda̍ ā wā yɛ̍ yɔ̄ŋ wɔ̄ɔ̍ŋ wāā nu̍a̍ā tōsāa̍ I̍ tu̍sī nda̍ nyɛ̄ pālāa̍ chōo̍ le̍ nyɛ̄ nda̍ tōsa̍ wo̍ le̍? Dɛ̍nɛ̍ pa̍lāa̍ ya̍ I̍ tu̍sī nda̍ chōo̍ ni̍. Lɛ̄ŋndē wāā nu̍a̍ā nyɛ̄ pālāā bɛ̄ndōo̍ ya̍ I̍ ha̍ndū le̍ŋ chōo̍ ni̍, mī mi̍ŋgu̍l nda̍ māa̍ le̍ nyɛ̄ nda̍ tōsa̍ wo̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”

¹⁰“Le̍la̍ŋ ya̍ Chɛ̄lūīma̍yā, I̍ cho̍ cha᷄ŋ le̍ pēmbo᷄ŋ Chūlu̍sɛ̄lɛ̄m, ndu̍yɛ̍ mī ko̍ŋu̍l kpe̍le̍ŋ le̍ nāa̍ ma̍ndāā lāchɔ̄lūa̍a̍ Chūlu̍sɛ̄lɛ̄m, kāni̍ fo̍ndōle̍, fo̍ndāŋndā lāŋ kpo̍u̍ lā chō hūnɔ̄ɔ̄ vēsā mī lā sīmnu᷄ŋ po̍llo̍. Lā chō hūnɔ̄ɔ̄ sīmnɔ᷄ŋ fo̍ndāŋndā wāna̍ chi̍e̍e̍ o̍ ke̍e̍kū bɛ̍ɛ̍ le̍ la̍ŋ. Chɔ̄lūāā nda̍ māndā lo̍ŋ nda̍ ō pīlɛ̍ bɛ̍ɛ̍ wānā tu̍i̍ī ni̍ŋ ndu̍ cha᷄ŋndo̍ lo̍ŋ te̍. Yōū ni̍, vīsī ni̍, nda̍ kpo̍u̍ ā chō hūnɔ̄ɔ̄ pīɔ̄l, ō pīlɛ̍ bɛ̍ɛ̍ wānā chi᷅ ni̍ŋ ndo̍ŋ pi̍lo᷄ŋ te̍.”

¹¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ tōsā mī Chūlu̍sɛ̄lɛ̄m o̍ pi̍ɔ̍l mbō sīmnu᷄ŋ pɔ᷅m. Ō chō hūnɔ̄ɔ̄ sīmnɔ᷄ŋ nāa̍ tūŋāā yōndūa̍a̍ ā wā ni̍ŋ nda̍. Ndu̍yɛ̍ o̍ ko̍ŋ kɔ̍ɔ̍lī, chi̍o̍o̍ŋ Chu̍dā kpo̍u̍, I̍ cho̍ tōsā mī ŋ̄ hu᷄ŋ si̍mnu᷄ŋ pɔ᷅mnda̍ŋ, nāa̍ wāna̍ chi̍e̍e̍ o̍ wāna̍ chi̍e̍e̍ o̍ ve᷅m ni̍ŋ te̍ wa̍.”

¹²Ō nɛ̄ɛ̍nɛ̍ nɔ᷅ yɛ̍ ni̍ŋ kɔ̍l kālo̍o̍ mbō sīna̍ nyɛ᷄ yɔ̍nu̍ŋ ni̍ŋ ho̍ō wo̍ pɛ̄ŋgu̍? Ō nɛ̄ɛ̍nɛ̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍m yɛ̍ ni̍ŋ ndi̍ mī wānā ko̍ŋ ō nɔ̄la̍ mbō tɛ̄ɛ̄si̍a̍l wāŋnda̍ a̍ ndi̍? Ō nɛ̄ɛ̍nɛ̍ si̍nā yɛ̍ ni̍ŋ le̍ sa̍bū Mɛ̄lɛ̄ka̍ tōsā ni̍ŋ mī lɛ̄ŋnde̍ŋ nde᷅ŋ lē tāmbū tāmbi̍i̍ bɛ̍ndūī wāā nu̍a̍ā mī lē sīmnu᷄ŋ pɔ᷅m, nāa̍ wāna̍ chi̍e̍e̍ o̍ ke̍e̍kū bɛ̍ɛ̍ le̍ wa̍? Wānā ko̍ŋ ō cho̍ le̍.

¹³Kɛ̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍, ō dīmi̍ āā, “Le̍ mɛ̄ɛ̍ wānāā nīa̍a̍ ā kɛ̄ɛ̍ le̍ pɛ̄ɛ̄kūlā nīla̍ ya̍ I̍ pɛ̍ɛ̍ku̍ nda̍ la̍ŋ tōlɔ̄ɔ̍ kɔ̄ɔ̄lī, ndu̍yɛ̍ ma̍ kɛ̄ɛ̄ ya̍ dīōm ā chɛ᷄l mā tōl sāwāla̍ nīla̍ŋ kɔ̄ɔ̄lī le̍ yɛ̍, nyɛ̄ ko̍ŋ to̍sa̍ ni̍ mi̍ he̍ī ī wā nda̍ hūnɔ̄ɔ̄ yɔ̄nɔ᷄ŋ.

¹⁴Wāŋnda̍ ha̍ā, nyɛ̄ fi̍nyāā ndāā ma̍māa̍ ā pɛ̄ɛ̄ku̍ nda̍ wo̍, ndu̍ ko̍ni̍ nda̍ tōl kɔ̄ɔ̄lī ni̍. Ma̍ lō o̍ ko̍ŋ ma̍ tōsā bōllē kālāle̍ŋ a̍ ya̍, nda̍ bɛ̍ɛ̍ ma̍ kɛ̄ɛ̄ ya̍, ma̍ mūli᷄ŋ Bāāl wa̍ sōōlūūwo̍ māā mɛ̄lɛ̄ka̍a̍ ndā.

¹⁵Le̍la̍ŋ lā ya᷄ŋ ni᷅la̍ŋ mī lā tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō dīmi̍ le̍ tōsāa̍ wo̍.” Ō dīmi̍ āā, “I̍ cho̍ wānāā nīa̍a̍ nyɛ̄ dīāā lōlɛ̍i̍ bɛ̍ndōo̍ kē mā dē ndu̍, ndu̍yɛ̍ o̍ ko̍ŋ kɔ̍ɔ̍lī, mī ke̍ nda̍ nyɛ̄ wɔ̄ɔ̍ŋ di̍ī wa̍nā wo̍ mā ko᷄l ndu̍.

¹⁶I̍ cho̍ sɛ̄ŋī o̍ lɛ̄ŋīī chēle̍ŋnde̍ ni᷄ŋ, lɛ̄ŋīī fi̍nyāā ndāā ma̍māa̍ nda̍ a̍a̍ si̍nā bɛ̍ɛ̍ le̍ ve̍, kɛ̄lɛ̄ŋgāā ni᷅ŋ te̍ mī nda̍ tūēī yɔ̄ bɛ̍ɛ̍ a̍ ndi̍ o̍kɔ̄ɔ̄. I̍ cho̍ ya̍a̍mɔ̍ɔ̍wa̍ vīōmɔ̄ɔ̄ mā hu᷄ŋ de᷅l nda̍ chōo̍ ndu̍yɛ̍ mī to̍sa̍ mā lo̍ sɔ̍ŋgɔ̄ɔ̍ a̍ nda̍ ha̍a̍a̍ mbō lo̍ o̍ ko̍ŋ mī chi̍i̍ a̍ nda̍ kpo̍u̍.”

¹⁷Mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō hīāū lāchī a̍ sūɛ̍i̍, mbo̍ dīmī āā, “Wāŋnda̍ Chūlu̍sɛ̄lɛ̄m, lā sīna̍ ni̍ko̍ māā sūɛ̍i̍ kōma̍l nya̍ kpe̍e̍kpe̍i̍. Le̍la̍ŋ lā vēēlu̍ pɔ̍ɔ̍ wāŋ lāāndūa̍a̍ cha̍ā cha̍ŋndo̍ wa̍[2] mā hu᷄ŋ ma̍lā nya̍ cha᷄ŋndo̍. Lā yɔ̍ŋ le̍ wāŋ lāāndūa̍a̍ cha̍ā cho̍ndu̍ŋ bīīsi̍o̍o̍ŋ chāā bɛ̄ndōo̍ sōlīo̍o̍ wa̍ mā hīŋ.”

¹⁸Mi̍ wāŋnda̍ dīmī āā, “Lā vēēlu̍l na̍a̍ wāŋ lāāndūa̍a̍ so̍lī cho̍ndu̍ŋ bīīsi̍o̍o̍ŋ nda̍ chɔ̍chɔ̍ mā hu᷄ŋ so̍lūl na̍a̍ chōndo̍ŋ. Ŋ̄ lō ni̍ŋ cha̍ŋndo̍ ha̍a̍a̍ mī mɛ̍mi̍a̍ŋ mā līīvi̍a̍a̍ na̍a̍ būŋndo̍ŋ, ndu̍yɛ̍ mī hɔ̄lta̍ŋ lā yɔ̄nūŋ na̍a̍ dɔ̍fɔ̍ŋ dɔ̍fɔ̍ŋ bɛ̍ndū.”

¹⁹I̍ cho̍ cha᷄ŋnda̍ŋ tūēīyɔ̄ɔ̍ Sa̍a̍yɔ̄ŋ chi̍e̍e̍ kpe̍e̍kpe̍i̍. Wāŋnda̍ chō dīmīo̍o̍ o̍ cha᷄ŋndo̍ ni᷄ŋ āā, “Kpūndɛ̍ bɛ̄ndo̍o̍ ō kōma̍l na̍a̍ fɔ̍! Si̍ɔ̍mbu̍la̍ bɛ̄ndūla̍ŋ lā hīŋ na̍a̍ bīyɔ̄ɔ̄. Ŋ̄ hīŋ fo̍ndāŋndā nāāla̍ŋ mālɔ̄ɔ̄ fɔ̍, chīɛ̄īlā nāāla̍ŋ kpo̍u̍ lā sīmnu᷄ŋ fo̍ndō fōndo̍la̍ŋ.”

²⁰“Nya̍ wāŋ lāāndūa̍a̍ Chūlu̍sɛ̄lɛ̄m, lā ya᷄ŋ ni᷅la̍ŋ nyɛ̄ kɛ̄ndɛ̄ kɛ̍ndɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍. Lā tūe̍i̍ nyɛ᷅ Mɛ̄lɛ̄ka̍ dīmi̍ wo̍. Lā pɛ̄ɛ̄ku̍ pɔ̍ɔ̍ chūāā nyāā la̍a̍ndūa̍a̍ mɛ̄ɛ̍ nda̍ chāŋ yɛ̍, ndu̍yɛ̍ o̍ ko̍ŋ kɔ̍ɔ̍lī, mī nya̍ pi̍la̍ pɛ̄ɛ̄ka᷅ŋ pɔ̍ɔ̍ mɛ̄ɛ̍ wānā so̍lī cho̍ndu̍ŋ bīīsi̍o̍ŋ yɛ̍.

²¹Chi̍e̍e̍ na̍a̍ ndu̍ o̍o̍ nɔ̍ sāāsāla̍ŋ lā bālāā kpɔ̍kɔ̍su̍ le̍ na̍a̍ māndāa̍ pīɔ̍mndo̍ ndu̍ o̍o̍ ko̍māl na̍a̍ le̍. Kɛ̍ mi̍ pīɔ̍mndo̍ kēēkū o̍ wu̍ndɛ̄i̍la̍ sāāsā ko̍ŋ, mbo̍ lūēēlūl na̍a̍. Pīɔ̍mndo̍ tōsa̍ chūāā nāa̍ nda̍ a̍a̍ pi̍sūl o̍ bɛ̍ɛ̄la̍ŋ nda̍ kpo̍u̍ wānā chi᷅ lɛ̍ nda̍ le̍. Chūāā nāā pi̍a̍a̍ndūāā nda̍ a̍a̍ chu̍ūŋgi̍āŋ pa̍a̍ndū o̍ fo̍ndāŋndā lābɔ̄ŋa᷅ŋnda̍ŋ nda̍ kpo̍u̍ ā chu̍ūŋgi̍āŋ ndɛ̍ lo̍ŋ te̍.”

²²Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wānāā vīlɛ̍i̍ya̍ ā wā ni̍ŋ a̍ sɛ̍ŋīa̍ŋ mā wa̍ ā tīūwāā bā o̍ bā fe̍e̍. Mɛ̄ɛ̍ pōōla̍ŋ lā wā nu̍a̍ā lā sɛ̄ŋīa̍ŋ lā tīūwāā bā o̍ bā fe̍e̍ o̍ fo̍ndāa̍ yɛ̍, le̍nde̍ nda̍ wā ni̍ŋ ni̍. Mɛ̄ɛ̍ wāŋnda̍ wā nu̍a̍ā wi̍tīi̍yo̍ŋ kīōlɔ̄ɔ̍ mā yīū mu̍ŋ kpɔ̄ŋnda̍ŋ kɛ̍ wānā o̍ wānā ve̍ nda̍ kɔ̄ɔ̄lī le̍ mu᷅ŋ dīyɔ̄ɔ̄ le̍, mī kpɔ̄ŋnda̍ ŋ̄wi̍tīi̍la̍ la̍ŋ lā wa̍ lā sɛ̄ŋīa̍ŋ kpo̍u̍ yɛ̍, le̍nde̍ nda̍ wā ni̍ŋ a̍ sɛ̍ŋīa̍ŋ ni̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ māā ya̍ I̍ di̍mi̍ wo̍ ndu̍ ho̍ō ni̍.

²³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmī āā, “Wānāa̍ nɔ̍ kɔ̄l kālo̍o̍ wa̍, ā ki̍a̍lū yōŋgā a̍ kɔ̄l kālu̍ ndāa̍ le̍. Wānāā nɔ̍ kpāāyāa̍ wa̍ bɛ̍ɛ̍ ā ki̍a̍lū yōŋgā a̍ kpāāya̍ ndāa̍ le̍. Wānāā sūlāa̍ bɛ̍ɛ̍ ā ki̍a̍lū yōŋgā a̍ sūltā ndāla̍ŋ te̍.

²⁴Wānā o̍ wānā ye̍e̍ma̍ pɛ̍ yo̍ŋgā ki̍o̍lɔ̄ɔ̄, wānā ko̍ŋ ō kīōlu̍ yo̍ŋgā le̍ mɛ̄ɛ̍ o̍ si̍nā wa᷅na̍ ya̍ I̍ cho̍ wo̍ yɛ̍, ndu̍yɛ̍ a̍ le̍ mɛ̄ɛ̍ o̍ si̍nā ya̍ pɛ̍ŋgu̍ yɛ̍. Kāni̍ fo̍ndōle̍ kāālā nūu̍ le̍ fɛ̍ɛ̍ŋ a̍ fɛ̍ɛ̍ŋ o̍ cho̍ ni̍. Sɔ̄ɔ̍ŋ sa̍kpo̍ŋ a̍ sɔ̄ɔ̍ŋ tōnya̍ŋ mu̍ŋ ya̍ I̍ hi̍nī kɔ᷅l le̍ tōsāa̍ ni̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”

²⁵“Te̍le̍ŋ cho̍ fūūlūū mī tu̍si̍ wāŋnda̍ ha̍ā nyɛ̄ pālāa̍ chōo̍, nda̍ yɔ̍nūŋ ni̍ māā wāŋnda̍ I̍chi̍pī a̍ wāŋnda̍ Chu̍dā, a̍ wāŋnda̍ I̍dɔ̄m, a̍ wāŋnda̍ A̍mɔ̄ŋ, a̍ wāŋnda̍ Mo̍wa̍bī, ndu̍yɛ̍ a̍ wānāa̍ cho̍ o̍ lɛ̄ŋndē po̍lte̍ŋ ni᷄ŋ nda̍, wānāā ki̍lī ha̍ā yīīŋnde̍ nda̍ o̍ lēbōl mā mɛ̄i̍ ndi̍ ī bīŋgī bi̍ŋgī wa̍. Wāŋnda̍ ha̍ā kpo̍u̍ ā chō ā hīvīāā, kɛ̍ kpe̍ma̍ cho̍ a̍ hīvīo̍o̍ o̍kɔ̄ɔ̄ wo̍ ā kɛ̄si̍ ndu̍ le̍. Wāŋnda̍ ha̍ā ni̍, a̍ wāŋnda̍ I̍sɔ̄lūɛ̄ī, hīvī yɔ̄ŋāa̍ ho̍ō ko̍ni̍ nda̍ sɔ̄la̍ ni̍, kɛ̍ kɔ̄ltā ndāla̍ŋ lā cho̍ la̍ hi̍vīāā le̍.”