Read Southern Kisi Cha᷄ŋ Īmɔ̍nɛ̍ Chɛ̄lūīma̍yā Wo̍ 2 Bible Online

Cha᷄ŋ Īmɔ̍nɛ̍ Chɛ̄lūīma̍yā Wo̍ 2 - Southern Kisi bible

Cha᷄ŋ Īmɔ̍nɛ̍ Chɛ̄lūīma̍yā Wo̍ 2

¹Māsānɔ̄ɔ̍ Mɛ̄lɛ̄ka̍ dɔ̄ɔ̄nu᷄ŋ mi̍ nyūmnda̍ŋ mā tūāl Sa̍a̍yɔ̄ŋ chi̍e̍e̍. Bɛ̄ɛ̄le̍ I̍sɔ̄lūɛ̄ī ndu̍ o̍o̍ nɔ̍ le̍ŋ, mbo̍ fāŋa̍ ndu̍ le̍ŋ chōo̍ ba̍ū. Pāa̍le̍ o̍ dɔ̍u̍nu᷄ŋ tu̍mbe̍ a̍ I̍sɔ̄lūɛ̄ī le̍ŋ, nāa̍ ndūāā kɛ̍sīāā ŋ̄pēlūa̍a̍ cho̍ o̍ chi̍e̍ēŋndo̍ chōo̍ wa̍ bɛ̍ɛ̍, ndu̍ yɔ̍nūŋ māā chīɛ̄ī ndɔ̄ɔ̍ ni̍, ō lōōnu̍ŋ bɛ̍ɛ̍ a̍ ndu̍ le̍.

²Fo̍ndālā chālāāla̍ yu̍ŋgu̍ Che̍kɔ̍pū wo̍ kpo̍u̍, ō chīi̍ la̍ŋ tɛ̄ɛ̄mbūū, ndu̍yɛ̍ īnyīɛ̍ɛ̍ bɛ̍ɛ̍ i̍ ve̍ ndu̍ le̍. A̍ tu̍mbe̍ bɛ̍ndū o̍ dɔ̍u̍nu᷄ŋ ndo̍, chi̍e̍e̍ŋ wa̍ ŋ̄ bɛ̄ɛ̄ndīāā ŋ̄ ka̍lā ka̍lā Chu̍dā le̍ yɔ̄ŋi̍ ya̍a̍mɔ̍ɔ̍wa̍a̍ ā lūɛ̍i̍ yo̍ŋ, mbo̍ tɛ̄ɛ̄mbūū mu̍ŋ kpo̍u̍. Ō pɛ̄l māsāle̍ŋ Chu̍dā ndu̍yɛ̍ a̍ wānāā ndūāā bɛ̍ndūa̍a̍ lātūlu̍, mbo̍ mīŋgī le̍ŋ lɛ̄ŋ mɛ̍ mɛ̍, mbo̍ chīī le̍ŋ lābɛ̄ɛ̄.

³A̍ tu̍mbe̍ ka̍lā ka̍lā ndu̍ o̍o̍ dɔ̍u̍nu᷄ŋ ndo̍, kpāāya̍ I̍sɔ̄lūɛ̄ī ndu̍ o̍o̍ nɔ̍ wo̍ kpo̍u̍, mbo̍ chīī a̍ ndu̍. Mɛ̄ɛ̍ o̍ che᷅ mi̍ ya̍a̍mɔ̍ɔ̍wa̍ ā sāa̍ I̍sɔ̄lūɛ̍i̍ a̍ sɔ̍ŋgɔ̍ɔ̍, mbo̍ fāŋā I̍sɔ̄lūɛ̍i̍ bāa̍ chōo̍. Mɛ̄ɛ̍ yīŋndē bɛ̍ndūle̍ŋ lē tɛ̄ɛ̄mbūū nu̍a̍ā nyɔ̄ɔ̍ŋ o̍ fo̍ndāa̍ bālɔ̄ɔ̍ kpo̍u̍ yɛ̍, le̍nde̍ o̍ tɛ̍ɛ̍mbu̍u̍ yu̍ŋgu̍ Che̍kɔ̍pū wo̍ ni̍.

⁴Ō kīndū chīɔ̄ū ndɔ̄ɔ̍ a̍ kpāāya̍ ndɔ̄ɔ̍ kpo̍u̍, le̍ na̍a̍ chīŋa̍la᷅ŋndo̍ a̍ chīŋɔ̍ma̍ ndūa̍a̍ŋ māā ya̍a̍mɔ̍ɔ̍wa̍a̍ ndɔ̄. Chūāūwāā nāa̍ na̍a̍ ŋ̍ tōfā mī nyɔ̄ɔ̍ ō hɛ̄na̍ŋ na̍a̍ wa̍, nda̍ kpo̍u̍ ō chīi̍ nda̍ dīū. Ō dɔ̄ɔ̄nu᷄ŋ tu̍mbe̍ a̍ Sa̍a̍yɔ̄ŋ o̍ ka̍lā ka̍lā, mbo̍ wā ndu̍ tɛ̄ɛ̄mbūūwo̍, mɛ̄ɛ̍ yīŋndē bɛ̄ndūle̍ŋ lē wā nu̍a̍ā o̍ fo̍ndāa̍ mī lē wa᷄ nyɔ̄ɔ̍ŋ tɛ̄ɛ̄mbūūwo̍ yɛ̍.

⁵Māsānɔ̄ɔ̍ Mɛ̄lɛ̄ka̍ o̍ si̍mnu᷄ŋ māā ya̍a̍mɔ̍ɔ̍nɔ̍ le̍ I̍sɔ̄lūɛ̄ī, mbo̍ tɛ̄ɛ̄mbūū ndu̍. Fo̍ndāŋndā lēmāsāla̍ŋ I̍sɔ̄lūɛ̄ī kpo̍u̍, ō chīi̍ la̍ŋ tɛ̄ɛ̄mbūū. Ndu̍yɛ̍ chi̍e̍e̍ŋ wa̍ ŋ̄ bɛ̄ɛ̄ndīāā ŋ̄ kālā ka̍lā le̍ yɔ̄ŋi̍ ya̍a̍mɔ̍ɔ̍wa̍ ā lūɛ̍i̍ yo̍ŋ, mu̍ŋ kpo̍u̍ ō tōsa̍ mi̍ ŋ̄ sīmnu᷄ŋ pɔ᷅mnda̍ŋ. Ō lūe̍i̍ wāŋnda̍ Chu̍dā kɔ̄l tāmbɛ̍i̍ nɔ̍ la̍mɛ̍ɛ̍lu̍ le̍ wo̍, ndu̍yɛ̍ mbo̍ tōsā lɔ̍ɔ̍ o̍ lɔ̍ɔ̍ cha᷄ŋ īmɔ̍nɔ̍ɔ̍ ō chu̍ū lɛ̍ le̍ nda̍ le̍.

⁶Chīɛ̄ī ndɔ̍ cho̍ le̍ ndu̍ sōōlūūwo̍ lēni᷄ŋ ndo̍ ō pēsi̍ ndu̍ wɔ̍ wɔ̍, mɛ̄ɛ̍ nda̍ pūūsīāā nu̍a̍ā yɛ̄kpɔ̍ɔ̍ o̍ kpe̍lo̍o̍ ni᷄ŋ yɛ̍. Fo̍ndā ndɔ̍ wānāā ndūa̍a̍ ā bīī bɔ᷅ŋa᷅ŋnda̍ŋ ndo̍, ō tōsa̍ mbo̍ sīmnu᷄ŋ fo̍ndō fōndo̍. Bɔ̄ŋa᷅ŋndā bɛ̄ndūla̍ŋ kpo̍u̍, a̍ bɔ̄ŋa᷅ŋndā pāa̍le̍ pɛ̍ŋgīāā la̍ŋ, ō tōsa̍ wānā o̍ wānā o̍ yi̍yāŋ ndɛ̍ bɛ̍ɛ̍ a̍ la̍ŋ o̍kɔ̄ɔ̄ le̍. Māsā bɛ̍ndōo̍ ni̍, wānā so̍līāā lāsa̍lāa̍ ni̍, nda̍ kpo̍u̍ tu̍mbe̍ ndɔ̍ o̍ dɔ̍u̍nu᷄ŋ ndo̍ ō fūūlu̍u̍ nda̍ mɛ̍ɛ̄.

⁷Māsānɔ̄ɔ̍ Mɛ̄lɛ̄ka̍ kɛ̄ɛ̍ ma̍āŋ ndɔ̄ɔ̍, ndu̍yɛ̍ chīɛ̄ī ndɔ̄ɔ̍ bɛ̍ɛ̍ mbo̍ kɛ̄ɛ̄ ndu̍. Sāāsāla̍ ba̍lu̍ fo̍ndāŋndā lēmāsāla̍ŋ Chu̍dā la̍ŋ, mbo̍ māl ya̍a̍mɔ̍ɔ̍wa̍a̍ le̍ mā pēsi̍ pe̍si̍ la̍ŋ. Wānā a̍a̍ tu̍e̍ī ya̍a̍mɔ̍ɔ̍wa̍ kūūlīa̍a̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ tɛ̄ɛ̄mbūūwo̍ ni᷄ŋ pɛ̍, nu̍a̍ā ŋ̄ chā āā mɛ̄ɛ̍ kūūlīāāla̍ŋ lā wā nu̍a̍ā lo̍ŋ o̍ pāa̍le̍ bɔ̄ŋa᷅ŋ dīāā nyɛ̄ dīāā bɛ̍ndūle̍ŋ chōo̍ yɛ̍ ni̍.

⁸Mɛ̄lɛ̄ka̍ Ya̍a̍wɛ̄ɛ̄ pi̍la̍ kɛ̍sɛ̍ kɛ̍sɛ̍ ndu̍ o̍o̍ kɛ̍ɛ̍si̍a̍a̍ le̍ sāāsāa̍ Sa̍a̍yɔ̍ŋ tɛ̄ɛ̄mbūūwo̍ ni̍. Mbo̍ tūū sāāsā ko̍ŋ pɛ̄ŋgu̍la̍ ndu̍ o̍o̍ nɔ̍ le̍ mɛ̄ɛ̄lōo̍ a̍ tɛ̄ɛ̄mbūūwo̍ la̍ŋ chɛ̍ chɛ̍. Fo̍ndāŋndā vīlɛ̄īlā kālā ka̍lā la̍ wa̍ Chūlu̍sɛ̄lɛ̄m nda̍ŋ ni̍, sāāsa̍ ba̍lu̍ Chūlu̍sɛ̄lɛ̄m ndo̍ ni̍, la̍ŋ kpo̍u̍ lā chō ni᷅ŋ lā dēlāā lɛ̄ŋ.

⁹Dīōlā sāāsā ko̍ŋ lā chō ni᷅ŋ lā kūmbāā o̍ pūūlōo̍ bɛ̄ŋgu̍. Su̍lu̍ku̍lā nda̍ a̍a̍ ki̍i̍ndīāā di̍o̍la̍ lāŋ nda̍ŋ kpo̍u̍, lā chūū ītāmu̍. Māsā bɛ̍ndōo̍ ni̍, wānāā bɛ̄ndūa̍a̍ wa̍ ndu̍ wa̍llo̍ o̍ bā bɛ̄ŋgu̍ wa̍ ni̍, nda̍ kpo̍u̍ a̍ kūɛ̄ a̍ nda̍ o̍ lɛ̄ŋīī chēle̍ŋnde̍ ni᷄ŋ o̍ bīyɔ̄ɔ̍ ni᷄ŋ. Sāwā o̍ sāwā o̍ cho̍ lɛ̍ le̍. Ndu̍yɛ̍ wānāa̍ su̍a̍ā le̍ Mɛ̄lɛ̄ka̍ wa̍ bɛ̍ɛ̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ lɛ̍ nda̍ yi̍lāŋ o̍ yi̍lāŋ chɔ̄m te̍.

¹⁰Wāŋ bɛ̄ndūa̍a̍ Sa̍a̍yɔ̄ŋ chi̍e̍e̍ a̍ cho̍ īchāli̍ lɛ᷅ŋ, a̍ me̍i̍yāā do̍ŋ do̍ŋ. Ā chō īchāli̍ lɛ᷅ŋ a̍ nyɛ̄lā lābɛ̍kīla̍ŋ lēkɔ̄ɔ̍, ndu̍yɛ̍ ma̍ dūāūnu᷄ŋ chu̍ndo̍o̍ o̍ lēbōl le̍ kɔ̄ltā ndāla̍ ta̍mbɛ̍i̍la̍ŋ chɔ̄mndo̍. Chūāā lāāndūa̍a̍ Chūlu̍sɛ̄lɛ̄m a̍ cha᷄l ma̍ tūndu᷄ŋ bo᷅lle̍ o̍ lābɛ̄ŋgu̍ ni̍ŋ a̍ si̍ɔ̍mbu̍la̍ŋ.

¹¹Hɔ̄lta̍ŋ lā yɔ̄nu̍ŋ ya̍ dɔ̍fɔ̍ŋ dɔ̍fɔ̍ŋ a̍ cha᷄ŋndo̍. Kɔ̄l nūu̍ ō chō o̍ sāŋgāa̍ ni᷄ŋ bɔ̄ɔ̍. Mɔ̍nɛ̍i̍ bɛ̍ndūe̍i̍ ī chō bɔ̄ɔ̍ o̍ kɔ̄l nūu̍ ni᷄ŋ, fo̍ndōle̍ le̍ wānāā nīa̍a̍ nda̍ chō tɛ̄ɛ̄mbūūwo̍ wa̍. Chūāāmbūāā pɔ̄mbūa̍a̍ ni̍, chɛ̄lɛ̄kpi̍a̍a̍ le̍ndīa̍a̍ ni̍, ā chō ā wōvɛ̍i̍ya̍ o̍ bɛ̍ɛ̄la̍ŋ Chūlu̍sɛ̄lɛ̄m.

¹²Ā chō cha᷄ŋnda̍ŋ kālāa̍ ndāa̍ o̍ lānī kpe̍e̍kpe̍i̍, mā dīmūl nda̍ āā, “Lā ke̍ na̍a̍ nyɛ̄ dīa̍a̍ ndu̍yɛ̍ a̍ mɛ̄ŋmā kōla᷄ŋ.” Mɛ̄ɛ̍ nda̍ yɔ̄ŋūl nu̍a̍ā pūa̍a̍ chɔ̄ūwa̍ o̍ sɔ̍ŋgɔ̄ɔ̍ ni᷄ŋ, mā wa̍ īhīni̍ a̍ wo̍wɛ̍i̍ya̍ yɛ̍, le̍nde̍ nda̍ chō īhīni̍ o̍ bɛ̍ɛ̄la̍ŋ ā wōvɛ̍i̍ya̍ a̍ yīa̍a̍ŋ ni̍. Ā chō wūnɔ᷄ŋndo̍ kālāa̍ ndāa̍ o̍ lābā du̍ɛ̍ɛ̍ŋ, lāū bɛ̍ɛ̍ ā cho̍ le̍.

¹³O̍o̍ Chūlu̍sɛ̄lɛ̄m, ō yɛ̄ɛ̍nɛ̍ kpe̍e̍kpe̍i̍ ya̍ I̍ cho̍ yɛ̄ dīmī a̍ nūm o̍kɔ̄ɔ̄? A̍ nɛ̄ɛ̍nɛ̍ ya̍ I̍ cho̍ yɛ̄ nu̍m tūū? Chūlu̍sɛ̄lɛ̄m, a̍ dɛ̍nɛ̍ pa̍lāa̍ kūɛ̍ɛ̍nɛ̍ ya̍ I̍ tu̍ū yɛ̄ dɛ̍nɛ̍ pa̍lāa̍ cho̍ nu̍m chōo̍ wo̍, mī nɔ̍la̍ mī nyɔ̍ɔ̍lu̍ nu̍m? Dɛ̍nɛ̍ nu̍m pālāa̍ ō nɔ̍ la̍mɛ̍ɛ̍lu̍ le̍, ō chō māchūāā mɛ̄ɛ̍ pēe̍ mɛ̄ŋmā īhɛ᷄llo̍ ō chō nu̍a̍ā yɛ̍. Wānā o̍ wānā nɔ̍lā mbō mīŋgi̍ nu̍m sīmī le̍.

¹⁴Wānāā nūm a̍ su̍a̍ā le̍ Mɛ̄lɛ̄ka̍ wa̍ ā hūi̍ nu̍m, a̍ yi̍lāŋndā lāchōōwālā nda̍ wa̍ chɔ̄ɔ̍ la̍ŋ. Ā nɔ̄la̍ mā chɔ̄ɔ̄mu̍u̍ yɔ̄ŋndā nūmnda̍ wɔ̍ɔ̍ŋnda̍ŋ, le̍ mā tōsa̍ mā mi̍i̍ŋgu̍ ō kɛ̄ndɛ̄ māā pāāndū le̍. Ma̍ lō o̍ ko̍ŋ ma̍ hūī nu̍m a̍ yi̍lāŋndā lāchōōwālā nda̍ wa̍ chɔ̄ɔ̍ la̍ŋ.

¹⁵Wānā o̍ wāna̍ cho̍ hīōūwɔ̄ɔ̍, ā chō Chūlu̍sɛ̄lɛ̄m dāātīa̍a̍, ndu̍yɛ̍ mā mām ndu̍ le̍ nyɛ̍ yɔ̍nu̍ŋ a̍ ndu̍ wo̍. Ā chō ndu̍ pɛ̄ɛ̄sāa̍ mā hīīlūū bo᷅lle̍, mā dīmī āā, “Chi̍e̍e̍ hi̍o̍ū chi̍o̍o̍ŋ kpo̍u̍ na̍ŋɔ̄ɔ̄, ndu̍yɛ̍ mbo̍ tōsā mi̍ chi̍e̍ēŋndo̍ kpo̍u̍ o̍ wa᷅ a̍ nya̍a̍lo̍o̍ wo̍, ndu̍ cho̍ ni᷅ŋ ho̍ō ni̍?”

¹⁶Chūlu̍sɛ̄lɛ̄m, ya̍a̍mɔ̍ɔ̍wa̍a̍ nu̍mnda̍ kpo̍u̍, ā pīla̍ nu̍m sōndōla̍ŋ kɔ̄ɔ̄lī a̍ nu̍m yīōūla̍ŋ, Ā chō nu̍m dāātīa̍a̍, mā sīɔ̄ɔ̄ndīāā nu̍m, mā dīmī āā, “Ŋ̄ chīi̍ ndu̍ tɛ̄ɛ̄mbūū! Pāa̍le̍ŋ nde᷅ŋ kpe̍e̍kpe̍i̍ na̍a̍ ŋ̄ wa̍ chūmndo̍ ni̍, ndu̍yɛ̍ ŋ̄ chīi̍ nyɛ̍ na̍a̍ ŋ̍ ye̍e̍ma̍ wo̍ tōsā.”

¹⁷Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ nyɛ̄ ndu̍ o̍o̍ kɛ̍ɛ̍si̍a̍a̍ wo̍ tōsā. Nyɛ̄ o̍ nyɛ̄ o̍ kɔ̍ŋgɔ̍la̍ŋ sīndɛ̄ pa̍ le̍ tōsāa̍, ō chīi̍ ndu̍ tōsā. Ō chīi̍ nya̍ tɛ̄ɛ̄mbūū, ndu̍yɛ̍ īnyīɛ̍ɛ̍ bɛ̍ɛ̍ I̍ bi̍i̍ ndu̍ le̍ nya̍ le̍. Ō tōsa̍ mi̍ ya̍a̍mɔ̍ɔ̍wa̍a̍ nyāa̍ ā dūāūnu᷄ŋ nya̍a̍le̍ le̍ nyɛ̍ yɔ̍nu̍ŋ a̍ nya̍ wo̍. Ō tōsa̍ mi̍ ya̍a̍mɔ̍ɔ̍wa̍a̍ nyāa̍ ā chɔ̄ɔ̄lū kpāāyāa̍ sɔ̄lā.

¹⁸Wāŋnda̍ Sa̍a̍yɔ̄ŋ, lā kōŋu̍l cho̍o̍ cho̍o̍ kpe̍le̍ŋ nāa̍ Māsānɔ̄ɔ̍ Mɛ̄lɛ̄ka̍ chūā. Mɛ̍mi̍a̍ŋ mā to᷄l nya̍ mī mā kūɛ̄ kōŋgi̍la̍ŋ, īdīi̍ a̍ īchɔ̄l, mɛ̄ɛ̍ pēēla̍ pɔ̍mbɔ̄la̍ŋ lā hīāū nu̍a̍ā yɛ̍. Lā pɛ̍ŋgī a̍ cha᷄ŋndo̍ le̍. Lā ke᷅ hɔ̄ltā nyāla̍ŋ pɛ̄ŋgī o̍ pɛ̄ŋgi̍ a̍ cha᷄ŋndo̍ le̍.

¹⁹Lā wa̍ chɔ̍nɔ᷄ŋndo̍ īchɔ̄l, mī lā kāndu̍ cha̍ŋndo̍ a̍ te̍le̍ŋ wānāā māndāā chīe̍e̍ya̍ ā kāndū wa̍li̍ ndāa̍ wo̍ ki̍nɛ̍i̍. Lā pīɛ̍i̍ Ma̍sānɔ̄ɔ̍ Mɛ̄lɛ̄ka̍ a̍ kɔ̄ltā nyāla̍ŋ kpo̍u̍. Lā hēēlu̍ ba᷅la̍ŋ chōo̍ cho̍o̍, mī lā pīɛ̍i̍ ndu̍ le̍ mbō chīīndi̍a̍a̍ yōōmūlā chūāūwāā nyāa̍, chūāūwāā nyāa̍ cho̍ īhīni̍ o̍ bɛ̍ɛ̄la̍ŋ ā wōūvɛ̍i̍ya̍ a̍ yīa̍a̍ŋ nda̍.

²⁰O̍o̍ Mɛ̄lɛ̄ka̍ Ya̍a̍wɛ̄ɛ̄, nūm pi̍la̍ yi̍ya̍ŋ ndɔ̍ mā to̍fa̍ wānāā ŋ̄ chō ha̍ā sāŋgāa̍ tūsīo̍o̍ chōo̍ wa̍. Bāā ō wā o̍ kɛ̍ndɛ̄ mī kālāa̍ ŋ̄chūāūwa̍ ā dē chu̍a̍u̍wāā ndāa̍, chūāūwāa̍ nda̍ lo̍ ha̍ā kūɛ̍i̍ a̍ nda̍ ma̍ sōlī nda̍ lēni᷄ŋ nda̍? Ɔ̄ɔ̄, bāā ō wā o̍ kɛ̍ndɛ̄ mā dīu̍ wānāā sōlīāā lāsa̍lāa̍, a̍ wānāa̍ su̍a̍ā le̍ Mɛ̄lɛ̄ka̍ wa̍ o̍ chīɛ̄ī nu̍m di̍a̍ndāa̍ ni᷄ŋ?

²¹Chūāāmbɔ̄ ni̍, bɛ̄ndū ni̍, kpo̍u̍ ā chō īhīni̍ o̍ bɛ̍ɛ̄la̍ŋ a̍ vi̍lɛ̍i̍ya̍ o̍ chu̍ndo̍o̍ ni᷄ŋ. Chūāā pīāāndūa̍a̍, a̍ chūāā lāāndūa̍a̍, ya̍a̍mɔ̍ɔ̍wa̍ ā dīu̍ nda̍ a̍ mɔ̄ɔ̄ŋ fāŋndo̍ŋ. Pāa̍le̍ ŋ̄ dɔ̄ɔ̄nu᷄ŋ tu̍mbe̍ a̍ nda̍ le̍ŋ ma̍ dīū nda̍, īnyīɛ̍ɛ̍ bɛ̍ɛ̍ a̍ tu̍i̍i̍nu̍ŋ nda̍ le̍.

²²Mɛ̄ɛ̍ ŋ̄ vēēlū nu̍a̍ā wāŋnda̍ nāa̍ pi᷅lɛ̍ le̍ bɔ̄ŋa᷅ŋ dīāā nyɛ̄ dīa̍a̍ bɛ̄ndōo̍ yɛ̍, le̍nde̍ ŋ̄ chūūŋgi̍a̍a̍ ya̍a̍mɔ̍ɔ̍wa̍a̍ nīa̍a̍ ni̍ le̍ mā hu᷄ŋ lu̍e̍ī ya̍ sīōōŋīī bɛ̄ndūe̍i̍ bā o̍ bā fe̍e̍ ya̍ I̍ mu̍li̍ŋ. Pāa̍le̍ ŋ̄ dɔ̄ɔ̄nu᷄ŋ tu̍mbe̍ le̍ŋ Mɛ̄lɛ̄ka̍ Ya̍a̍wɛ̄ɛ̄, wānā o̍ wānā o̍ nɔ̍la̍ mbō hɛ̄lu᷄ŋ te̍, kɛ̄lɛ̄ŋgāā ni᷅ŋ te̍, mī wānā lo̍ yōōmū. Chūāā nīa̍a̍ ya̍ I̍ ma̍nda̍ mi̍ sōlī nda̍ lēni᷄ŋ nda̍, ya̍a̍mɔ̍ɔ̍nɔ̍ nūu̍ ō chīi̍ nda̍ dīū kpo̍u̍.