Read Southern Kisi Cha᷄ŋ Īmɔ̍nɛ̍ Chɛ̄lūīma̍yā Wo̍ 4 Bible Online

Cha᷄ŋ Īmɔ̍nɛ̍ Chɛ̄lūīma̍yā Wo̍ 4 - Southern Kisi bible

Cha᷄ŋ Īmɔ̍nɛ̍ Chɛ̄lūīma̍yā Wo̍ 4

¹Ko̍o̍līi̍ di̍a̍ndɛ̄ī bɛ̄ndūe̍i̍ ī fūla̍ o̍ ba̍ā ni᷄ŋ fɔ̍. Ko̍o̍līi̍ kɛ̍ndɛ̄ kɛ̍ndɛ̄ī bɛ̄ndūe̍i̍ ī sīmnu᷄ŋ nyɛ᷅ fo̍ndōo̍. Pōūtā dīāndāāla̍ wa̍ o̍ chīɛ̍i̍ Mɛ̄lɛ̄ka̍a̍ la̍ŋ, lā chō lā sɛ̄ŋīa̍ŋnda̍ŋ o̍ bɛ̍ɛ̄la̍ŋ.

²Chūāā pīāāndūa̍a̍ Sa̍a̍yɔ̄ŋ a̍ wa̍ māwāā mɛ̄ɛ̍ ko̍o̍līi̍ye̍ ī wā nu̍a̍ā yɛ̍, Kɛ̍ mɛ̄ɛ̍ kpɛ̍ɛ̍nɛ̍i̍ pūūlūe̍i̍ ī wā nu̍a̍ā yɛ̍, le̍nde̍ wāŋnda̍ ā chē ni᷅ŋ nda̍ nyɛ̄ fo̍ndō fu̍u̍ ni̍.

³Tūŋāā yōndūa̍a̍ cho̍ ha̍ā wa̍ bɛ̍ɛ̍ mā wɛ̄si̍ chūāūwāā ndāa̍. Kɛ̍ ko̍msa̍a̍ Chūlu̍sɛ̄lɛ̄m nda̍ nda̍, mɛ̄ɛ̍ so̍ni̍kɔ̄nɔ̄ɔ̍ ō dūāū nu̍a̍ā pēlta̍ŋ o̍ po̍llo̍ ni᷄ŋ mbō mɛ̄i̍ la̍ŋ lo̍ŋ yɛ̍, le̍nde̍ nda̍ vēsa̍ kɔ̄llo̍ a̍ chūāūwāā ndāa̍ ni̍.

⁴Chūāūwāā ndāa̍ tē bo̍lōla̍ŋ lā vēsa̍ nda̍ pɛ̍ te̍i̍, dīɔ̄ɔ̄mūe̍i̍ ī bāāli̍āŋ nda̍ o̍ lāsōndō le̍ mɛ̄ɛ̄mā lēpɛ̄ŋnda̍ŋ. Chūāūwāā ndāa̍ ā chō kēīyo̍ nyɛ̄ dīa̍a̍ pīɛ̄īle̍ŋ, kɛ̍ wānā o̍ wa᷅na̍ o̍ ke᷅ nda̍ le̍.

⁵Wānāā nda̍ a̍a̍ di̍ā pa̍a̍ndū nyɛ̄ dīāā wānāā sūlāa̍ wa̍, ā chō ni᷅ŋ hāū mɔ̍nɛ̍i̍ bīyɔ̄ɔ̍ o̍ nɛ̄īla̍ŋ le̍ nyɛ̄ dīāā lēpɛ̄ŋndo̍. Wānāā nda̍ mānda̍ o̍ chīɛ̄īlā lēmāsāla̍ŋ ni᷄ŋ nda̍, ā chō ni᷅ŋ hāū nyɛ̍ dīa̍a̍ kēīyo̍ nūūvīa̍a̍ o̍ sa᷄lta̍ŋ chōo̍.

⁶Dɛ̍nɛ̍ pa̍lāa̍ to᷅l Chūlu̍sɛ̄lɛ̄m chōo̍ nda̍ wānāā ndūa̍a̍ wo̍, ō hīōū dɛ̍nɛ̍ pa̍lāa̍ to᷅l wāŋnda̍ So̍dɔ̄m chōo̍ wo̍, ō Mɛ̄lɛ̄ka̍ tɛ̄ɛ̄mbūū o̍ lēpīlɛ̍ ni᷄ŋ kpe̍ wo̍.

⁷Wānāā bɛ̄ndūa̍a̍ Chūlu̍sɛ̄lɛ̄m, ka̍ālā ndāla̍ŋ la̍ wa̍ māwāā lā dīāndāā, mɛ̄ɛ̍ fe̍ŋgbɔ̍ɔ̍ ō wā nu̍a̍ā yɛ̍. Ā wa̍ wānāā dīāllūŋ kālā, ma̍ wā wānāā kpāāyā bɛ̍ndū, ndu̍yɛ̍ le̍ te̍le̍ŋ o̍ te̍le̍ŋ ā wānu̍ŋ kɛ̍ndīa̍a̍ che̍che̍ŋ.

⁸Kɛ̍ tē wānā che᷅ nda̍ ni᷅ŋ o̍ bɛ̍ɛ̄la̍ŋ pɛ̍, a̍ si̍nā lɛ̍ nda̍ le̍, a̍ mɛ̄ɛ̍ nda̍ māŋga̍la̍ŋ yɛ̍. Ā yɔ̄nu̍ŋ a̍ ti̍ŋī kpi̍lo̍ māā ma̍ŋga̍. Ā vēsa̍ ma̍ yɔ̄nu᷄ŋ pa̍āla̍ŋ kpo̍sōŋ, ā yɔ̄nu̍ŋ mɛ̄ɛ̍ nyāānda̍ŋ ve̍sɛ̍i̍yo̍ŋ ŋ̄ wā nu̍a̍ā yɛ̍.

⁹Ā nda̍ dīu̍ o̍ chɔ̄ūwo̍ ni᷄ŋ nda̍, nda̍ hi̍o̍ū pīɔ̍m kɛ̍ndɔ̄ɔ̍ sɔ̄lā, a̍ ā yīa̍a̍ŋ mā dīu̍ wa̍, yīa̍a̍ŋ mā lo᷄ nda̍ sɔ̄ɔ̄sīa̍a̍ ha̍a̍a̍ ma̍ sɔ̄lā pīɔ̍mnda̍ŋ.

¹⁰Bōōndi̍i̍ wānāā nīa̍a̍ ha̍ā ā wa̍ chūūwo̍ a̍ yīa̍a̍ŋ ndu̍yɛ̍ a̍ chɔ̄ūwo̍ ve̍, kālāa̍ ŋ̄chūāūwāā bɔ̄ɔ̍ bɔ̍ɔ̍, a̍ nda̍ a̍a̍ nɔ̍ kāālāa̍ le̍ chūāūwāā ndāa̍ wa̍, mɛ̄ɛ̍ nyɔ̄ɔ̍ kīndū nda̍ te̍i̍, chūāūwāā ndāā ka̍ŋ nda̍ yāu̍ ni̍ ma̍ dīā.

¹¹Mɛ̄lɛ̄ka̍ Ya̍a̍wɛ̄ɛ̄ o̍ chɔ̍m kpe̍e̍kpe̍i̍ māā ō dɔ̄ɔ̄nu᷄ŋ tu̍mbe̍ o̍ ka̍lā ka̍lā. Ō tōsa̍ mi̍ Sa̍a̍yɔ̄ŋ o̍ sa̍ndū, ndu̍yɛ̍ mbo̍ ŋūā a̍ chīyūŋ ndɔ̄ɔ̍ŋ kpo̍u̍, a̍ tu̍mbe̍ ka̍lā ka̍lā o̍ dɔ̍u̍nu᷄ŋ a̍ ndu̍ wo̍.

¹²Māsāā bɛ̍ndūa̍a̍ o̍ chi̍e̍ēŋndo̍ ni᷄ŋ bɛ̍ɛ̍ kɛ̍sɛ̍ kɛ̍sɛ̍, ɔ̄ɔ̄ wāŋnda̍ o̍ chi̍e̍ēŋndo̍ ni᷄ŋ, nda̍ a̍a̍ la̍a̍la̍ŋ māā ya̍a̍mɔ̍ɔ̍wa̍ ā nɔ̄lā mā kēēku̍ o̍ dīōlā sāāsāla̍ŋ Chūlu̍sɛ̄lɛ̄m mā lūɛ̄ī mā bīī chi̍o̍o̍ le̍.

¹³Kɛ̍ ndu̍yɛ̍, ō cho̍ fu̍u̍ le̍ he̍ī ī yɔ̄nu̍ŋ a̍ Chūlu̍sɛ̄lɛ̄m te̍, le̍ yɔ̄ŋndā wɔ̄ɔ̍ŋndā wānāa̍ su̍a̍ā le̍ Mɛ̄lɛ̄ka̍ wa̍, ndu̍yɛ̍ a̍ wānāa̍ sōlīāā lāsa̍lāa̍ ā tōsa̍ la̍ŋ. Wānāa̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wa̍, ma̍ lō o̍ ko̍ŋ ma̍ dīū nda̍.

¹⁴Ndu̍yɛ̍ mɛ̄ɛ̍ wānāā sūmɛ̍i̍ya̍ ā bālū nu̍a̍ā yɛ̍, le̍nde̍ nda̍ chō ni᷅ŋ bālɔ̄ɔ̍ o̍ bɛ̍ɛ̄la̍ŋ ītāmu̍ ta̍mu̍e̍i̍ ni̍. Ā sīmnu᷄ŋ a̍ nɔ̍ɔ̍lɛ̍i̍ Mɛ̄lɛ̄ka̍ o̍ hɔ̄l a̍ kōo̍ma̍ wāŋndā chīe̍e̍ya̍, wānā o̍ wānā o̍ pi̍la̍ŋ ndɛ̍ dōmāla̍ ndāla̍ŋ te̍.

¹⁵Wāŋnda̍ chɔ̄ɔ̍ nda̍ hūnɔ̄ɔ̍ la̍nda̍ŋ mā dīmu̍l nda̍ chōo̍ cho̍o̍ āā, “Lā sɔ̍ɔ̍ŋgūū na̍a̍ īkɛ̄i̍ le̍, lā chō ā nɔ̄ɔ̄lɛ̍i̍ Mɛ̄lɛ̄ka̍ o̍ hɔ̄l. Lā kɔ̍, lā pi̍la̍ŋ na̍a̍ le̍.” Le̍ he̍ī, ma̍ sīmnu᷄ŋ wa̍nāā bālāā o̍ lɛ̄ŋnde̍ ni᷄ŋ, ā nɔ̍ na̍a̍ nda̍ cha᷄l te̍. Lɛ̄ŋndē nda̍ kūā ko̍, wāŋnda̍ lo̍ŋ a̍ dīmu̍la᷅ŋ āā, “Wāŋnda̍ ha̍ā ā wa᷅ lɛ̄ na̍a̍ tɛ̄ɛ̄ŋ te̍.”

¹⁶Mɛ̄lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ sɛ̍ŋi̍ nda̍ le̍nde̍ o̍ lɛ̄ŋnde̍ ni᷄ŋ ni̍. Ō būūla̍ŋ ndɛ̍ a̍ nda̍ le̍. Ō nɔ̍ lɛ̍ lēbɛ̄ɛ̄ o̍ lēbɛ̄ɛ̄ le̍ wānāā sōlīāā lāsa̍lāa̍ ha̍ā le̍. Ō nɔ̍ lɛ̍ nyīnā cha̍ā le̍ wānāā bɛ̄ndūa̍a̍ ha̍ā le̍.

¹⁷Mɛ̄ɛ̍ na̍a̍ ŋ̄ tōfa̍ o̍ nɛ̄ī te̍i̍ le̍ mālāa̍, mi̍ ŋ̄ sāŋgā, ŋ̄ sɔ̍lā wa̍nā o̍ wāna̍ ma̍lā na̍a̍ le̍. Lɛ̄ŋnde̍ nɔ̍lā bɛ̍ɛ̍ mī lē māla̍ na̍a̍ le̍ le̍ŋ, le̍ŋ na̍a̍ ŋ̄ wa᷄ chūmndo̍ ni̍ le̍ na̍a̍ mālāa̍.

¹⁸Ya̍a̍mɔ̍ɔ̍wa̍a̍ nāa̍ ā wa̍ na̍a̍ mɛ̄ŋgɛ̄lāa̍ bā o̍ bā fe̍e̍, o̍ bɛ̍ɛ̄la̍ŋ bɛ̍ɛ̍ na̍a̍ ŋ̍ ke̍lā lɛ̍ le̍. Mi̍ pālɛ̍i̍ na̍a̍ ŋ̍ nɔ̍ le̍ wāa̍ yōōmū ve̍ ī chūū, mi̍ mɛ̄ɛ̄lu̍la̍ nāāla̍ŋ lā fūūlūū.

¹⁹Mɛ̄ɛ̍ kōwɔ̍ɔ̍ ō kēlēŋā nu̍a̍ā tōlɔ̄ɔ̍ le̍ nyɔ̄ɔ̍ chūa̍a̍ yɛ̍, le̍nde̍ ya̍a̍mɔ̍ɔ̍wa̍a̍ nāa̍ ā tīsa̍ na̍a̍ chōo̍ ni̍. Ma̍ tīsā na̍a̍ kīlta̍ŋ kɔ̄ɔ̄lī o̍ pēmbo᷄ŋ chōo̍, ma̍ vīŋi᷄ŋ na̍a̍ lāchī o̍ lɛ̄ŋndē po̍lte̍ŋ ni᷄ŋ.

²⁰Māsā bɛ̍ndū Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ mbo̍ kē na̍a̍, mi̍ ndu̍ o̍o̍ nɔ᷅ yōōmūlā nāāla̍ŋ o̍ bā wo̍, ma̍ bīī ndu̍ o̍ yāŋɔ̄ɔ̄le̍ nda̍ ye᷄ŋ ndu̍ le̍ŋ. Ndu̍ na̍a̍ ŋ̍ ti̍i̍nda̍ŋ ni̍ māā, ō nɔ̄lā mbō ma̍nda̍ na̍a̍, lɛ̄ŋīi̍ ba̍lu̍ na̍a̍ ve̍ ī nɔ̍lā mī lūēēlu̍l na̍a̍ a̍ sɔ̍ŋgɔ̄ le̍.

²¹Nya̍ wāŋnda̍ I̍dɔ̄m a̍ nya̍ wāŋnda̍ o̍ lɛ̄ŋndē U̍sīle̍ŋ ni᷄ŋ, lā dɔ̄ɔ̄nu̍ŋ nya̍a̍le̍ kpe̍e̍kpe̍i̍ mī lā tōsa̍ kɔ̄l kɛ̄ndɔ̄ɔ̍, mɛ̄ɛ̍ nya̍ yēēma̍ yɛ̍. Kɛ̍ ndu̍yɛ̍ nya̍ bɛ̍ɛ̍ lā nɔ̄ mī lā ko᷄l o̍ tāāla̍ dɛ̍nɛ̍ pa̍lāa̍ ho̍ō ni᷄ŋ. Lā chō mūɛ̄īma̍ cho̍ lēni᷄ŋ nda̍ŋ kōlɔ̄ɔ̄, ndu̍yɛ̍ mī mā bīī nya̍, mī lā sōli̍ nyɛ̄la̍ŋ mī lā bālu̍ fo̍ndō.

²²Wāŋnda̍ Sa̍a̍yɔ̄ŋ, lā chīi̍ pāāwā nya̍ a̍a̍ nɔ̍ le̍ sɔ̄lāa̍ le̍ yɔ̄ŋndā nyāla̍ wɔ̍ɔ̍ŋnda̍ŋ ndo̍ sɔ̄lā. Mɛ̄lɛ̄ka̍ Ya̍a̍wɛ̄ɛ̄ o̍ cho̍ lɛ̍ nya̍ kɛ̄sī o̍ bīyɔ̄ɔ̍ ni᷄ŋ o̍ lɛ̄ŋīī chēle̍ŋnde̍ ni᷄ŋ te̍. Kɛ̍ nya̍ wāŋnda̍ I̍dɔ̄m, nya̍ bɛ̍ɛ̍ Mɛ̄lɛ̄ka̍ hīŋ nya̍ nyɛ̄ pālāa̍ tūsī chōo̍, le̍ yɔ̄ŋndā nyāla̍ wɔ̍ɔ̍ŋnda̍ŋ. Ō hīŋ yɔ̄ŋndā nyāla̍ wɔ̍ɔ̍ŋnda̍ŋ chɔ̄ɔ̄mūū kpe̍nde̍ke̍le̍.