Read Southern Kisi Cha᷄ŋ Īmɔ̍nɛ̍ Chɛ̄lūīma̍yā Wo̍ 5 Bible Online

Cha᷄ŋ Īmɔ̍nɛ̍ Chɛ̄lūīma̍yā Wo̍ 5 - Southern Kisi bible

Cha᷄ŋ Īmɔ̍nɛ̍ Chɛ̄lūīma̍yā Wo̍ 5

¹O̍o̍ Mɛ̄lɛ̄ka̍ Ya̍a̍wɛ̄ɛ̄, lo̍o̍nu̍ŋ nyɛ᷅ yɔ̍nu̍ŋ a̍ na̍a̍ ki̍nɛ̍i̍ yo̍, Nūm pi̍la̍ to̍fa̍ mā chē si̍ɔ̍mbu̍la̍ ko̍ma̍l na̍a̍ la̍ŋ.

²Lɛ̄ŋndē nāāle̍ ŋ̄ ke̍ nāā māā nyɛ̄m na̍a̍ ŋ̄kɛ᷅ le̍ŋ, lē chō ni᷅ŋ hāū mi̍ālla̍ o̍ bā. Wānāā lēkāa̍wa̍ ā chīi̍ chīɛ̄īlā nāāla̍ŋ chūā.

³Ŋ̄ sīmnu᷄ŋ ni᷅ŋ vīi̍ya̍a̍ nɔ̍ ŋ̍fi̍nyā le̍ wa̍. Kālāa̍ nāa̍, wāŋnda̍ chīi̍ pīāāndāā ndāa̍ dīū.

⁴Mɛ̄ŋmā kōla᷄ŋ bɛ̍ɛ̍ mɛ̄ɛ̍ mī ŋ̄ pēndū ni᷅ŋ, yɔ̄mnde̍ le̍ yāūwo̍ bɛ̍ɛ̍, mɛ̄ɛ̍ mī ŋ̄ pēndū ni᷅ŋ ndi̍.

⁵Ya̍a̍mɔ̍ɔ̍wa̍a̍ nāa̍ ā chō na̍a̍ tōūwɔ̄ɔ̍ kpe̍e̍kpe̍i̍. Ŋ̄ chō ni᷅ŋ ā sāŋgɛ̍i̍ya̍, kɛ̍ yɔ̄ndī bɛ̍ɛ̍ ā cho̍ na̍a̍ mālɔ̄ɔ̄ mī ŋ̄ pɛ̄ŋgi̍ le̍.

⁶Le̍ nyɛ̄ dīāā na̍a̍ ŋ̄ dīā wo̍ bɛ̍ɛ̍, mɛ̍ɛ̍ mi̍ ŋ̄ lūɛ̄ī wāŋnda̍ I̍chi̍pī a̍ wāŋnda̍ Āsi̍i̍līāā o̍ bā bɛ̄ŋgu̍.

⁷Fi̍nyāā nāa̍ ā tōsa̍ yɔ̄ŋ wɔ̄ɔ̍ŋndo̍, ndu̍yɛ̍ ā cho̍ lɛ̍ hāū i̍cha̍li̍ le̍. Kɛ̍ le̍ yɔ̄ŋ wɔ̄ɔ̍ŋ nda̍ tōsa̍ ko̍ŋ ndo̍, mi̍ ŋ̄ wā nyɛ̄ pālāa̍ sɔ̄lāa̍.

⁸Wānāa̍ cho̍ o̍ chɛ̄le̍ŋ ni᷄ŋ wa̍nāā chēle̍ŋ nda̍ o̍ bā wa̍, nda̍ cho̍ ni᷅ŋ hāū na̍a̍ māsāa̍ chōo̍ ni̍. Ndu̍yɛ̍ wānā o̍ wānā cho̍ mbō sōli̍ na̍a̍ nda̍ o̍ bā le̍.

⁹Yōndōla̍ŋ ni᷄ŋ kpo̍u̍ wāŋnda̍ chō bālɔ̄ɔ̍ a̍ mɔ̄ɔ̄ŋ fāŋndo̍ŋ o̍ lābā le̍ wāŋnda̍ dēlɔ̄ɔ̍ chōo̍. Le̍ mī ŋ̄ sɔ̄la̍ nyɛ̄ dīāā na̍a̍ ŋ̄ dīā wo̍, mɛ̄ɛ̍ mī ŋ̄ pīsī yōōmūlā nāāla̍ŋ chi̍.

¹⁰Yīa̍a̍ŋ mā tōsa̍ mi̍ dīāllo̍ŋ ŋ̄ tūūlū na̍a̍, mɛ̄ɛ̍ wāŋndo̍ ō wā nu̍a̍ā īchāli̍ o̍ yīŋndē bɛ̍ndūle̍ŋ da̍ŋga̍la̍ yɛ̍.

¹¹Lāāndāā nāa̍, mi̍ ya̍a̍mɔ̍ɔ̍wa̍ lō o̍ ko̍ŋ ma̍ kpūūvīāā nda̍ Sa̍a̍yɔ̄ŋ chi̍e̍e̍. Chūāūwāā nāa̍ nda̍ a̍a̍ si̍nā wɔ̍ sūɛ̍i̍ wānā pɔ̍nɔ̍ le̍ wa̍, ma̍ lō o̍ ko̍ŋ ma̍ kpu̍u̍vīāā nda̍ o̍ chi̍o̍o̍ŋ Chu̍dā.

¹²Wānāā nāā bɛ̍ndūa̍a̍, mi̍ ya̍a̍mɔ̍ɔ̍wa̍ ā lāndū nda̍ ma̍ dīū nda̍. Wānā o̍ wānā nɔ̍ lɛ̍ lēbɛ̄ɛ̄ le̍ wānāā nāā ba̍nāa̍ le̍.

¹³Chūāā nāā pi̍a̍a̍ndūa̍a̍ mi̍ ya̍a̍mɔ̍ɔ̍wa̍ sīmī nda̍ sūa̍a̍ŋ chūīyo̍, ndu̍yɛ̍, mi̍ pūa̍a̍mbūa̍a̍ nda̍ wa̍ sāŋgāa̍ o̍ yɔ̄mīī lākpɔ̄ŋnde̍ bɛ̍ŋgu̍.

¹⁴Wāŋ bɛ̄ndūa̍a̍ ā che᷅l lɛ̍ o̍ dīō sāāsa̍ chi̍o̍o̍ māā pāāndū le̍, chūāā pīāāndūa̍a̍ bɛ̍ɛ̍, ā lo̍ō lɛ̍ nyɛ̄ chāa̍ māā pāāndū le̍.

¹⁵Kɔ̄l kɛ̄ndɛ̍ wa̍ o̍ yōōmūlā nāāla̍ŋ ni᷄ŋ ndo̍, ō chūū, yōlā na̍a̍ ŋ̍ ya᷅ pa̍a̍ndū la̍ŋ bɛ̍ɛ̍, lā sīmnu᷄ŋ ni᷅ŋ sūɛ̍i̍ īmɔ̍nɛ̍.

¹⁶Bɛ̄ɛ̄le̍ wa̍ na̍a̍ chōo̍ le̍ŋ lē chūū. Ŋ̄ tōsa̍ yɔ̄ŋ wɔ̄ɔ̍ŋndo̍, dɛ̍nɛ̍ pa̍lāā bɛ̄ndōo̍ ō tōl na̍a̍ chōo̍.

¹⁷Le̍ he̍ī kɔ̄ltā nāāla̍ŋ lā chō o̍ sāŋgāa̍ ni᷄ŋ ni̍. Ŋ̄ nɔ̍lā lɛ̍ mī ŋ̄ chē wa̍la̍ŋ te̍, a̍ mɛ̍mɛ̍ma̍ cho̍ na̍a̍ o̍ lāhɔ̄l la̍ŋ.

¹⁸Kāni̍ fo̍ndōle̍, Pēmbīī Sa̍a̍yɔ̄ŋnde̍, ī sīmnu̍ŋ pɔ᷅mndo̍. Ī sīmnu᷄ŋ nāa̍ tūŋāā yōndūa̍a̍ ā wā wa̍.

¹⁹Kɛ̍ nūm Mɛ̄lɛ̄ka̍ Ya̍a̍wɛ̄ɛ̄, nu᷄m cho̍ māsā bɛ̍ndōo̍ le̍ fɛ̍ɛ̍ŋ a̍ fɛ̍ɛ̍ŋ ni̍, ndu̍yɛ̍ māsāle̍ nu̍mnde̍ lē chō le̍ fɛ̍ɛ̍ŋ a̍ fɛ̍ɛ̍ŋ.

²⁰Vɛ᷅ ma̍ pūɛ̄ɛ̄nu᷄ŋ a̍ na̍a̍ nu̍a̍ā le̍ fɛ̍ɛ̍ŋ a̍ fɛ̍ɛ̍ŋ? Vɛ᷅ ma̍ kɛ̄ɛ̄ na̍a̍ nu̍a̍ā le̍ te̍le̍ŋ vi̍lɛ̄ī?

²¹Yāndi̍i̍ Mɛ̄lɛ̄ka̍ Ya̍a̍wɛ̄ɛ̄, mi̍ŋgi̍ŋ na̍a̍ nu̍m o̍ ībūŋ. Mi̍ŋgi̍ na̍a̍ bɛ̄ɛ̄le̍ nāāle̍ pa̍a̍ndūle̍ŋ o̍ bā.

²²Bāā kīɔ̍ɔ̍ ko̍ni̍ ŋ̄ chīi̍ ni᷅ŋ na̍a̍ nu̍a̍ā ni̍? Mɛ̄ɛ̍ tu̍mbe̍ ŋ̄ dɔ̄ɔ̄nu᷄ŋ a̍ na̍a̍ wo̍, ō nɔ̍ la̍mɛ̍ɛ̍lu̍ le̍?