Read Southern Kisi Īsi̍kīāā 10 Bible Online

Īsi̍kīāā 10 - Southern Kisi bible

Īsi̍kīāā 10

¹O̍ ko̍ŋ kɔ̍ɔ̍lī, mɛ̄ɛ̍ ya̍ I̍ to̍fa̍ nyɛ̄ tīīla᷄ŋ wa̍ nyāā yōōmāa̍ chōo̍ wo̍, mi̍ cha᷅ nyɔ̄ɔ̍ o̍ nyɛ̄ tīīla᷄ŋ ko̍ŋ chōo̍ māā kpe̍ŋgbe̍i̍ lēmāsā, ō tōōsīāā a̍ pōū ba̍ā kālā Sāfa̍lūɛ̄ wo̍.

²Mi̍ tu̍ɛ̍ī mi̍ Mɛ̄lɛ̄ka̍ dīmūl wāna̍ wa̍ ho̍ō o̍ dōvīa̍ŋ o̍ nyɛ̄lā kɛ̄ndɛ̄ kɛ̍ndɛ̄la̍ŋ ni᷄ŋ ndo̍ āā, “Kɔ̍ lu̍ɛ̍ī o̍ nyɛ̄lā tīīla᷄ŋnda̍ŋ nda̍ŋ tɛ̄ɛ̄ŋ, o̍ nyāā yōōmāa̍ ha̍ā bɛ̄ŋgu̍, mā kɔ̍ kɔ̍ndū dɛ̄ŋgūlta̍ŋ bāa̍ cha̍, mā sɛ̍ŋi̍ la̍ŋ Chūlu̍sɛ̄lɛ̄m.” O̍ ko̍ŋ, mi̍ cha᷅ wāna̍ wa̍ ho̍ō o̍ dōvīa̍ŋndo̍ kɔ̄la̍ŋ le̍ dɛ̄ŋgūlta̍ŋ kɔ̄ndɔ̄ɔ̍.

³Nyāā yōōmāa̍ ha̍ā ā wa̍ īsīsi̍ o̍ chīɛ̍i̍ Mɛ̄lɛ̄ka̍a̍ bā tōūwo̍. Mi̍ wāŋndo̍ ho̍ō kūā mbo̍ kɔ̍ lu̍ɛ̍ī nda̍ tɛ̄ɛ̄ŋ. Ndu̍yɛ̍, mi̍ cha᷅ mi̍ yu̍mbu̍ yu̍mbo̍o̍ hu᷄ŋ ku̍mbū la̍u̍ wa̍ lēni᷄ŋ, ō bālāā chīɛ̍i̍ Mɛ̄lɛ̄ka̍a̍ wo̍ kpo̍u̍.

⁴Mi̍ pa̍ŋgēle̍ chɔ᷅m na̍ŋɔ̄ɔ̄ bɛ̄ndu̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍, o̍ wa̍ nyāā yōōmāa̍ o̍ bōlle̍ŋ chōo̍ wo̍, ō fāŋa᷄ŋ mbo̍ kɔ̍ to᷅l o̍ dīō chīɛ̍i̍ Mɛ̄lɛ̄ka̍a̍. O̍ ko̍ŋ, mi̍ yu̍mbu̍ yu̍mbu̍ ba̍lū a̍ pa̍ŋgēle̍ kōŋ ndo̍ ō tīū chīɛ̄īyo̍ lēni᷄ŋ kpo̍u̍. Mi̍ pa̍ŋgēlo̍o̍ ho̍ō tīū o̍ la̍u̍ wa̍ ho̍ō lēni᷄ŋ ndo̍ kpo̍u̍.

⁵Mɛ̄ɛ̍ nyāā yōōmāa̍ ha̍ā ā wa̍ kɔ̄la̍ŋ, kūmba᷅ŋndā nda̍ wa̍ nu̍a̍ā lɔ̄ɔ̍ la̍ŋ, wānā a̍a̍ tu̍e̍ī bɔ̄ɔ̄lūū kōŋ pɛ̍, a̍a̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō wā sūɛ̍i̍ ni̍, mi̍ dīōm ndɔ̄ɔ̍ wa̍ kɔ̄la̍ŋ a̍ bɔ̄ɔ̄lūū bɛ̄ndōo̍. Wānā a̍a̍ lo᷅ o̍ la̍ūwo̍ o̍ bɛ̍ɛ̄ pɔ̍, mī wānā a̍a̍ tu̍e̍ī bɔ̄ɔ̄lūū kōŋ.

⁶Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l wāna̍ wa̍ ho̍ō o̍ dōvīa̍ŋ o̍ nyɛ̄lā kɛ̄ndɛ̄ kɛ̍ndɛ̄la̍ŋ ni᷄ŋ, le̍ mbō kɔ̍ lu̍ɛ̍ī o̍ nyɛ̄lā nyāāna᷄ŋ nda̍ŋ tɛ̄ɛ̄ŋ, mbō kɔ̄ndū dɛ̄ŋgūlta̍ŋ o̍ nyāā yōōmāa̍ bɛ̄ŋgu̍ wo̍, mi̍ wānā ko̍ŋ kūā mbo̍ kɔ᷄ si᷅m nyɛ̄lā tīīla᷄ŋnda̍ŋ ō pīlɛ̍ īkɛ̄i̍.

⁷O̍ ko̍ŋ, mi̍ cha᷅ mi̍ nyāā yōōmāa̍ ha̍ā ō pi̍lɛ̍ sīɛ̄ndī bāa̍, mbo̍ kūāndū dɛ̄ŋgūlta̍ŋ o̍ yīŋnde̍ wa̍ nda̍ tɛ̄ɛ̄ŋ nde̍ŋ, mbo̍ dūāū la̍ŋ wāna̍ wa̍ ho̍ō ō dōvīa̍ŋndo̍ o̍ lābā, mi̍ wānā ko̍ŋ fūlā a̍ la̍ŋ o̍ lābā.

⁸Ndu̍yɛ̍ nyāā yōōmāa̍ ha̍ā yɛ̍, ō kɛ᷅ o̍ kɛ᷅ ndu̍ o̍o̍ nɔ̍ nyɔ̄ɔ̍ o̍ kūmba᷅ŋndo̍ bɛ̄ŋgu̍ māā bā wāna̍ chi̍e̍e̍.

⁹Ndu̍yɛ̍, nyāā yōōmāa̍ ha̍ā, mi̍ cha᷅ nyɛ̄lā tīīla᷄ŋnda̍ŋ īkɛ̄i̍ la̍ hi̍ɔ̍ɔ̍lu̍, ō kɛ᷅ o̍ kɛ᷅ nyɛ̄ tīīla᷄ŋndo̍ ō wa̍ ndu̍ īkɛ̄i̍ o̍ pi᷅lɛ̍. Nyɛ̄lā tīīla᷄ŋnda̍ŋ nda᷅ŋ wānā a̍a̍ che᷅ la̍ŋ dīōndɔ̄ɔ̍ īŋɛ̄lɛ̄ŋgi̍ ŋɛ̍lɛ̄ŋgi̍e̍i̍ pɛ̍, āā pōū ba̍ā kālāa̍ nda̍ bɛ̄ɛ̄ndi̍a̍a̍ ni̍.

¹⁰Ndu̍yɛ̍ nyɛ̄lā tīīla᷄ŋnda̍ŋ nda᷅ŋ, la̍ŋ hi̍ɔ̍ɔ̍lu̍ kpo̍u̍ nyɛ̄ pīlɛ̍ kpe̍ la̍ wa̍ ni̍. La̍ŋ hi̍ɔ̍ɔ̍lu̍ kpo̍u̍, ō kɛ᷅ o̍ kɛ᷅ wānā a̍a̍ che᷅ pɛ̍ āā nyɛ̄ tīīla᷄ŋ che᷅le̍ŋ ō wa̍ lēni᷄ŋ ni̍.

¹¹Nyāā yōōmāa̍ ha̍ā kpēŋgūŋ hi̍ɔ̍ɔ̍lu̍ŋ nda̍ mūli̍ hɔ̄lla̍ wo̍ŋ kpo̍u̍, nda̍ a̍a̍ ku̍ā i̍kpe̍ŋgū o̍ īkpēŋgū. Ndu̍yɛ̍ bā o̍ bā nda̍ wa᷄ kɔ̄la̍ŋ pɛ̍, kɔ̄la̍ŋ sa̍kpō, ō kɛ᷅ o̍ kɛ᷅ mu̍li̍ŋ te̍.

¹²Nyāā yōōmāa̍ ha̍ā, hɔ̄lta̍ŋ lā wa̍ nda̍ lā tīūwāā lēkɔ̄ɔ̍ kpo̍u̍, o̍ lākɔ̄ɔ̄ ni̍, o̍ lābā ni̍, a̍ o̍ kūmba᷅ŋnda̍ŋ kpo̍u̍. O̍ ko̍ŋ kɔ̍ɔ̍lī, nyɛ̄lā tīīla᷄ŋnda̍ wa̍ nda̍ la᷅ŋ īkɛ̄i̍, ō kɛ᷅ o̍ kɛ᷅ ō pīlɛ̍ la̍ŋ bɛ̍ɛ̍, la̍a̍ nɔ̍ hɔ̄lta̍ŋ o̍ kpēŋgo᷄ŋ kpo̍u̍.

¹³O̍ ko̍ŋ kɔ̍ɔ̍lī, mi̍ tu̍ɛ̍ī mi̍ wāŋndo̍ vēēlū nyɛ̄lā tīīla᷄ŋnda̍ŋ nda᷅ŋ āā, “Nyɛ̄lā tīīla᷄ŋnda̍ ke̍lēŋā māā hūēīyīī īfēlēŋ fēle᷄ŋ nda̍ŋ, la̍ŋ la̍ cho̍ la᷅ŋ ni̍.”

¹⁴Nyāa̍ ha̍ā ō kɛ᷅ o̍ kɛ᷅ ndu̍ o̍o̍ nɔ̍ hɔ̄lla̍ sālā hīɔ̍ɔ̍lu̍, hɔ̄lāā tāsi̍a̍a̍ māā hɔ̄lāā nāū tōōyē, hɔ̄lāā di̍i̍ŋ ndūa̍a̍ māā hɔ̄lāā wāna̍ chi̍e̍e̍, hɔ̄lāā yāa̍ ndūa̍a̍, māā hɔ̄lāā kpɔ̍kūŋ, hɔ̄lāā hīɔ̍ɔ̍lu̍a̍a̍ māā hɔ̄lāā kōvɛ̍

¹⁵Nyāā ha̍ā, nda̍ ko̍ni̍ ya̍ I̍ che᷅ o̍ Pīo̍o̍ Chɛ̍bāā i̍kɛ̍i̍ ni̍. O̍ ko̍ŋ, mi̍ nyāā yōōmāa̍ ha̍ā ā cha᷄ŋ cho̍o̍ cho̍o̍ o̍ hūēīye̍ ni᷄ŋ.

¹⁶Ndu̍yɛ̍ nyāā yōōmāa̍ ha̍ā ni̍, nyɛ̄lā tīīla᷄ŋnda̍ wa̍ nda̍ īkɛ̄i̍ la̍ŋ ni̍, kɔ̄la̍ŋ dīōm pīlɛ̍ kpɛ̍kpɛ̄lɛ̄ɛ̄. Tē nyāā yōōmāa̍ ha̍ā ā bīī dɔ̍ɔ̍ kɔ̄la̍ŋ pɛ̍, la̍ŋ bɛ̍ɛ̍ la̍ bi̍ī kɔ̄la̍ŋ. Tē ā pɛ̄ɛ̄ŋga̍ kūmba᷅ŋnda̍ŋ pɛ̍ mā chɛ᷄ŋ cho̍o̍ cho̍o̍, la̍ŋ bɛ̍ɛ̍ la̍ chɛ̍ŋ cho̍o̍ cho̍o̍ a̍ nda̍ lātūlu̍, lā fe̍ŋāŋ nda̍ īkɛ̄i̍ le̍.

¹⁷Tē nyāā yōōmāa̍ ha̍ā nda̍ a̍a̍ si̍m pɛ̍, la̍ŋ bɛ̍ɛ̍ la̍ si̍m, tē ā chɛ᷄ŋ cho̍o̍ pɛ̍, la̍ŋ bɛ̍ɛ̍ la̍ŋ chɛ̍ŋ cho̍o̍, kāni̍ fo̍ndōle̍, nyāā yōōmāa̍ ha̍ā, kpāāya̍ ndāa̍, ō wa̍ o̍ nyɛ̄lā tīīla᷄ŋnda̍ŋ nda᷅ŋ chōo̍.

¹⁸O̍ ko̍ŋ kɔ̍ɔ̍lī, mi̍ cha᷅ mi̍ pa̍ŋgēle̍ bɛ̄ndu̍ chɔ᷅m na̍ŋɔ̄ɔ̄ bɛ̄ndu̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍, o̍ wa̍ o̍ dīō chīɛ̍i̍ Mɛ̄lɛ̄ka̍a̍ wo̍, mbo̍ fāŋa᷄ŋ mbo̍ kɔ̍ la̍ndu᷄ŋ nya̍ā yōōmāa̍ ha̍ā chōo̍.

¹⁹O̍ ko̍ŋ, I̍ lo̍ tōfāa̍, mi̍ cha᷅ mi̍ nyāā yōōmāā hīɔ̍ɔ̍lu̍a̍a̍ ha̍ā ā pɛ̄ɛ̄ŋgā kūmba᷅ŋnda̍ŋ ma̍ cha᷄ŋ o̍ hūēīye̍ ni᷄ŋ, lātūlu̍ a̍ nyɛ̄lā tīīla᷄ŋnda̍ wa̍ nda̍ la̍ŋ i̍kɛ̍i̍ la̍ŋ. Ma̍ kɔ̍ to᷅l o̍ dīō sāāsā chīɛ̍i̍ Mɛ̄lɛ̄ka̍a̍ bā pāa̍le̍ŋ lē chāŋndo̍. Pa̍ŋgēle̍ bɛ̄ndu̍ chɔ᷅m na̍ŋɔ̄ɔ̍ Mɛ̄lɛ̄ka̍a̍ wo̍ ō wa̍ nda̍ ō lānda᷄ŋ chōo̍.

²⁰Mɛ̄ɛ̍ ya̍ I̍ chi̍i̍ nyāā yōōmāā ha̍ā mɛ̄ɛ̄ndīa̍ŋ, mi̍ si̍nā māā nyāā yōōmāā ya̍ I̍ che᷅ o̍ Pīo̍o̍ Chɛ̍bāā i̍kɛ̍i̍, mi̍ Mɛ̄lɛ̄ka̍ I̍sɔ̄lūɛ̍i̍ya̍ ō wā nda̍ chōo̍ wa̍, māā nda̍ ya̍ I̍ che᷅ vɛ̄lɛ̄ chɔ̄ɔ̍ ho̍ō ni̍.

²¹Nyāa̍ ha̍ā ō kɛ᷅ o̍ kɛ᷅ ndu̍ o̍o̍ nɔ̍ hɔ̄lla̍ sālā hīɔ̍ɔ̍lu̍, a̍ kūmba᷅ŋnda̍ŋ lā hīɔ̍ɔ̍lu̍, a̍ nyɛ̄la̍ŋ nda̍ o̍ kūmba᷅ŋnda̍ŋ bɛ̄ŋgu̍ māā bālā wāna̍ chi̍e̍e̍.

²²Nyāā yōōmāa̍ ya̍ I̍ che᷅ o̍ Pīo̍o̍ Chɛ̍bāā i̍kɛ̍i̍ ya̍, mɛ̄ɛ̍ mɛ̄ɛ̍ hɔ̄lāā ndāa̍ ā wa̍, le̍nde̍ ko̍ni̍ ha̍ā bɛ̍ɛ̍ hɔ̄lāā ndāa̍ ā wa̍ ni̍. Ndu̍yɛ̍ kɔ̄lā pīlɛ̍ la̍ŋ kpe̍ nda̍ a̍a̍ ku̍ā ni̍, nda̍ bɛ̍ɛ̍ kūmbū nda̍ wā kɔ᷅la̍ŋ ndo̍, ō kɛ᷅ kɛ᷅, kɔ̄la̍ŋ sa̍kpō.