Read Southern Kisi Īsi̍kīāā 13 Bible Online

Īsi̍kīāā 13 - Southern Kisi bible

Īsi̍kīāā 13

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ vɛ̄lɛ̄ yōōŋgū chēle̍ŋ.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, wa̍nāa̍ su̍a̍ā ha̍ā le̍ Mɛ̄lɛ̄ka̍, mā dīmūl wa᷅ŋnda̍ sɔ̄ɔ̍ŋ wa̍ā lāchīŋ nda̍ pi̍la̍ kɛ̄ɛ̄sīāā wo̍ŋ, mā dīmī māā ya̍ Mɛ̍lɛ̄ka̍ ve᷅mm nda̍ ni̍ wa̍, di̍mu̍l nda̍ mā ya᷄ŋ nīla̍ŋ mā tūēī nyɛ̄ pālāā ya̍ Mɛ̍lɛ̄ka̍ Ya̍a̍wɛ̄ɛ̄ cho̍ nda̍ tūsī chōo̍ wo̍.

³“Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyɛ̄ ya̍ I̍ di̍mi̍ wo̍ cho̍ ho̍ō ni̍. Wānāa̍ su̍a̍ā le̍ Mɛ̄lɛ̄ka̍ā dīɔ̄māa̍ cho̍ ha̍ā yōōŋgūla̍ŋ kɛ̄ɛ̄sīa̍a̍, mā dīmūl wa᷅ŋnda̍ la̍ŋ, ndu̍yɛ̍ ō ve᷅ ya̍ le̍ ve᷅m nda̍ le̍ wa̍, kpūndɛ̍ bɛ̄ndōo̍ chō le̍ nda̍.

⁴Wāŋnda̍ I̍sɔ̄lūɛ̄ī, wānāa̍ nyāa̍ su̍a̍ā le̍ Mɛ̄lɛ̄ka̍ wa̍, ā chō māchūāā mɛ̄ɛ̍ tūŋāā yōndūa̍a̍ ā wā nu̍a̍ā o̍ pɔ̄mnda̍ŋ ni᷄ŋ yɛ̍.

⁵Wāŋnda̍ ha̍ā nda̍ a̍a̍ nɔ̍ ni̍ mī nda̍ a̍a̍ ma̍nda̍ fo̍ndāŋndā pīɔ̄lɛ̍i̍la̍ cho̍ o̍ sāāsāa̍ la̍ŋ, ɔ̄ɔ̄ mī nda̍ a̍a̍ mi̍ŋgi̍ sāāsāa̍ tāŋgūl le̍ wāŋnda̍ I̍sɔ̄lūɛ̄ī, māā tē pāa̍le̍ Mɛ̄lɛ̄ka̍ Ya̍a̍wɛ̄ɛ̄ le̍ŋ le̍e̍ fu̍u̍lu̍u̍ pɛ̍, mī sɔ̍ŋgɔ̍ɔ̍ ndu̍ o̍o̍ wa̍ I̍sɔ̄lūɛ̄ī, māā sāāsā ko̍ŋ ndu̍ o̍o̍ nɔ̍lā mī ndu̍ o̍o̍ ma̍nda̍ I̍sɔ̄lūɛ̄ī, kɛ̍ ā tōsa̍ ke̍ŋ te̍.

⁶Wāŋnda̍ ha̍ā ā chō nya̍ yi̍lāŋndā lāchōōwā la̍ŋ chɔ̄mndo̍, ndu̍yɛ̍ mā dīmūl nya̍ sɔ̄ɔ̍ŋ wa̍ā lāchīŋ lāchōōwa᷄ŋ. Mā dīmūl nya̍ māā ya̍ Mɛ̍lɛ̄ka̍ Ya̍a̍wɛ̄ɛ̍ so̍ō nāa̍ nda̍ chūā ni̍, kɛ̍ chōōla̍ŋ ko̍ni̍ nda̍ wā nya̍ dīmūllo̍ ni̍, ō ve᷅m ya̍ le̍ su̍a̍ā nāa̍ nda̍ chūā le̍. Ndu̍yɛ̍ ma̍ yīyāŋ māā ya̍ Mɛ̍lɛ̄ka̍ chō tōsā mī sɔ̄ɔ̍ŋ mu̍ŋ ŋ̄ chīŋa̍ lāsōndō.

⁷Nya̍ wānāa̍ su̍a̍ā ha̍ā le̍ Mɛ̄lɛ̄ka̍ wa̍, yi̍lāŋndā nya̍ chō chɔ̄ɔ̍ ki̍nɛ̍i̍ la̍ŋ, yi̍lāŋndā lāchōōwāla̍ŋ la̍ cho̍ ni̍. Ndu̍yɛ̍, sɔ̄ɔ̍ŋ wa̍ā lāchīŋ nya̍ chō dīmīo̍o̍ ki̍nɛ̍i̍ mī lā dīmī māā ya̍ Mɛ̍lɛ̄ka̍ Ya̍a̍wɛ̄ɛ̍ ve᷅m nya̍ ni̍ wo̍ŋ, chōōla̍ŋ ko̍ni̍ ŋ̍ cho̍ ni̍. Ō cho̍ ya̍ le̍ cho̍ nya̍ yōōŋgūlā lāŋ kīo̍o̍ le̍.”

⁸Le̍la̍ŋ nya̍ wānāa̍ su̍a̍ā ha̍ā le̍ Mɛ̄lɛ̄ka̍ wa̍, lā ya᷄ŋ ni᷅la̍ŋ mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍. Ō dīmi̍ āā, “Nya̍ wāŋnda̍ ha̍ā, ya̍ Mɛ̄lɛ̄ka̍ Ya̍a̍wɛ̄ɛ̄ I̍ ta̍mbu̍ kɔ̄l a̍ nya̍, kāni̍ fo̍ndōle̍, le̍ yi̍lāŋndā lāchōōwālā nya̍ chō wāŋnda̍ dīmūllo̍, mī lā dīmūl nda̍ sɔ̄ɔ̍ŋ wa̍ā lāchīŋ lāchōōwa᷄ŋ nda̍ŋ.

⁹Le̍ he̍ī, nya̍ wānāa̍ su̍a̍ā ha̍ā le̍ Mɛ̄lɛ̄ka̍ wa̍ ki̍nɛ̍i̍, nya̍ cho̍ ha̍ā wāŋnda̍ yi̍lāŋndā lāchōōwāla̍ŋ chɔ̄mndo̍, mī lā dīmūl nda̍ yōōŋgūlā lāchōōwāla̍ŋ nda̍, I̍ cho̍ nya̍ nyɛ̄ pālāa̍ tūsī chōo̍. I̍ cho̍ tōsā nya̍ wānāa̍ su̍a̍ā ka̍ŋ le̍ Mɛ̄lɛ̄ka̍ wa̍ ki̍nɛ̍i̍, lā ve᷅ wa̍nāā nīa̍a̍ tɛ̄ɛ̄ŋ o̍ chūūŋgi̍āŋndā ndāla̍ŋ chōo̍ le̍. Dīōlā nyāla̍ŋ lā ve᷅ lɛ̍ ni̍ŋ la̍ po̍o̍nyīāā o̍ yāu̍ I̍sɔ̄lūɛ̍i̍ya̍ ni᷄ŋ te̍. I̍ cho̍ tōsā nya̍ ki̍nɛ̍i̍, wāŋndo̍ ō pīlɛ̍ bɛ̍ɛ̍ ō mi̍i̍ŋgū lɛ̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ te̍. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ni̍.

¹⁰“Wāŋnda̍ ha̍ā ā hūi̍ wānāā nīa̍a̍ ma̍ fāŋā nda̍ o̍ nɛ̄i̍ tōnya̍a̍ chōo̍. Ā bīī pɛ̍ ā dīmu̍l wāŋnda̍ māā, kɔ̄l nyūlōo̍ ō wā ni̍ŋ le̍ nya̍. Kɛ̍ wāŋnda̍ sɔ̍lā kɔ᷅l nyūlū kōŋ te̍. Tē wāŋnda̍ ā tāŋgu̍l tāŋgūl wɔ̄ɔ̍ŋndo̍ pɛ̍, wānāa̍ su̍a̍ā ha̍ā le̍ Mɛ̄lɛ̄ka̍ wa̍ nda̍ sūu̍ pɔ̄u̍ hu̍mbōo̍ o̍ tāŋgūl kōŋ.

¹¹Le̍la̍ŋ di̍mu̍l wa̍nāa̍ su̍a̍ā ha̍ā le̍ Mɛ̄lɛ̄ka̍ wa̍, a̍ su̍u̍ pɔ̄u̍ hu̍mbo̍o̍ o̍ tāŋgūllo̍ ho̍ō wa̍, māā tāŋgūl nda̍ sūu̍ pɔ̄u̍wo̍ wo̍ ō chō hūnɔ̄ɔ̄ dēlɔ̄ɔ̄. I̍ cho̍ pīɔ̄ɔ̄ bɛ̄ndōo̍ yɔ̄ŋ, a̍ lōōŋ ŋ̍kpu̍ŋgba᷄ŋ o̍ tāŋgūllo̍ ho̍ō chōo̍, ndu̍yɛ̍, mī yɔ̍ŋ hūēīyīī bɛ̄ndūe̍i̍, mī ī hu᷄ŋ lɔ̍ɔ̄ ndu̍ mbō kōmba̍.”

¹²O̍ ko̍ŋ, wāŋnda̍ kpo̍u̍ ā chō nya̍ māmɔ̄ɔ̄ mā dīmi̍ āā, “Ɛ̄ɛ̄ kɛ̍ tāŋgūllo̍ ho̍ō, a̍ pɔ̄u̍ hu̍mbū nda̍ sūu̍ ndu̍ ho̍ō, ma̍ bɛ̄ɛ̄ndīāā ndu̍ wo̍ o̍ de̍l ni̍?”

¹³Le̍la̍ŋ, nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍ cho̍ ho̍ō ni̍. Ō dīmi̍ āā, “I̍ cho̍ tōsā mī hūēīyīī bɛ̄ndūe̍i̍ ī hɔ᷄ŋ a̍ tu̍mbe̍ bɛ̍ndū ya̍ I̍ dɔ̍ɔ̍nu᷄ŋ ndo̍, mī to̍sa̍ mī pīɔ̄ɔ̄ bɛ̄ndōo̍ ō sīa̍, lātūlu̍ a̍ lōōŋ kpu̍ŋgba᷄ŋ, mī tɛ̍ɛ̍mbu̍u̍ tāŋgūllo̍ ho̍ō.

¹⁴I̍ cho̍ tāŋgūl nda̍ sūu̍ ho̍ō pɔ̄u̍ hu̍mbōo̍ kpo̍u̍ wo̍ pīɔ̄lɔ̄ɔ̄ wɔ̍ wɔ̍, mī chīīyīī o̍ si̍m chōo̍ ve̍ ī chɔ̄mnu̍ŋ kpe̍nde̍ke̍le̍. Ō chō kōmbā mbō dīu̍ wānāa̍ cho̍ lēni᷄ŋ nda̍ kpo̍u̍. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹⁵“I̍ cho̍ tu̍mbe̍ dɔ̍ɔ̍nɔ᷄ŋ o̍ ka̍lā ka̍lā a̍ tāŋgūllo̍ ho̍ō, ndu̍yɛ̍ a̍ wānāa̍ su̍u̍ ndu̍ pɔ̄u̍ hu̍mbōo̍ wa̍, mā sīna̍ lūsu̍l tu̍mbe̍ nūu̍. I̍ cho̍ nya̍ dīmūl a̍a̍, ‘Tāŋgūl nya̍ sūu̍ pɔ̄u̍ hu̍mbōo̍ wo̍ ō tāmbu̍. Ndu̍yɛ̍ nya̍ wānāa̍ su̍u̍ ndu̍ pɔ̄u̍ hu̍mbōo̍ wa̍ bɛ̍ɛ̍, lā cho᷄ lɛ̍ le̍,

¹⁶nya̍ yɔ̍nūŋ ni̍ māā nya̍ wānāa̍ su̍a̍ā le̍ Mɛ̄lɛ̄ka̍ wa̍ I̍sɔ̄lūɛ̍i̍. Lā chō sɔ̄ɔ̍ŋ wa̍ā lāchīo̍ŋ dīmīo̍o̍ a̍ Chūlu̍sɛ̄lɛ̄m o̍kɔ̄ɔ̄, ndu̍yɛ̍ mī lā chā yi̍lāŋnda̍ŋ māā kɔ̄l nyūlōo̍ ō wā ni̍ŋ Chūlu̍sɛ̄lɛ̄m, kɛ̍ kɔ̄l nyūlū nya̍ dīmi̍ wo̍ ō ve᷅ le̍.’ ” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̍ndōo̍ ō dīmi̍ wo̍ cho̍ ko̍ŋ ni̍.

¹⁷O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Wāna̍ chi̍o̍o̍ Īsi̍kīāā, kɔ̍ vɛ̍lɛ̄ nāa̍ wāŋ lāāndūa̍a̍ I̍sɔ̄lūɛ̄ī chu̍a̍, a̍ cho̍ ha̍ā wāŋnda̍ sɔ̄ɔ̍ŋ wa̍ā lāchīŋ nda̍ pi̍la̍ kɛ̄ɛ̄sīāā wo̍ŋ dīmūllo̍ wa̍, mā di̍mu̍l nda̍ a̍ nyɛ̄ pālāa̍ ko̍māl ni̍ŋ nda̍ wo̍ o̍kɔ̄ɔ̄.

¹⁸Di̍mu̍l nda̍ māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, dīmi̍ āā, “Dɛ̍nɛ̍ pa̍lāā bɛ̄ndōo̍ chō le̍ nya̍ wāŋ lāāndūa̍a̍ ha̍ā, nya̍ cho̍ ha̍ā wāŋnda̍ kōo̍wa̍ŋ tōōsīāllo̍ le̍ bāāyīa̍ŋndo̍ o̍ lābā, ndu̍yɛ̍ mī lā tōōsīāl wa᷅ŋnda̍ kōlāla̍ i̍pɛ̍ŋgɛ̍la̍ŋ le̍ yīīnɔ᷄ŋndo̍ o̍ lēbōl, le̍ mɛ̄ɛ̍ nda̍ tīū wa᷅ŋnda̍ bā yɛ̍ wa̍. Lā yēēma̍ mī lā tɛ̄ɛ̄mbu̍u̍ yōōmūlā wānāā nīa̍a̍, mī lā māndā yo̍o̍mūlā wāŋnda̍ ā pīli̍a̍a̍, le̍ mī lā sɔ̄la̍ tɔ̄nɔ̄ɔ̍?

¹⁹Lā chō ya̍ bɛ̄ɛ̄la̍ŋ tɛ̄ɛ̄mbūūwo̍ wānāā nīa̍a̍ tɛ̄ɛ̄ŋ, le̍ ba̍a̍līi̍ŋ ta̍a̍ni̍ŋ ndo̍ŋ, ndu̍yɛ̍ a̍ le̍ bēe̍dīi̍ bi̍ŋgī bi̍ŋgīo̍o̍. Wānāa̍ nɔ̍ mā sɔ̄la̍ pīɔ̍m te̍ wa̍, mī lā dīū nda̍, ndu̍yɛ̍ wānāa̍ nɔ̍ mā sɔ̄la̍ pīɔ̍mnda̍ŋ nda̍, mī lā chīīndīāā ka̍ŋ. Lā bīī pɛ̍ lā dīmu̍l wānāā nīa̍a̍ chōōla̍ŋ, ndu̍yɛ̍ mī wānāā nīa̍a̍ lāāla̍ŋ a̍ nyɛ̄ nya̍ dīmī ko̍ŋ ndo̍.”

²⁰Le̍la̍ŋ nya̍ wāŋ lāāndūa̍a̍ ha̍ā, lā ya᷄ŋ ni᷅la̍ŋ mī lā tūēī nyɛ̄ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ wo̍. Ō dīmi̍ āā, “Nya̍ wāŋ lāāndūa̍a̍ ha̍ā, ya̍ Mɛ̍lɛ̄ka̍ I̍ cho̍ nya̍ nyɛ̄ pālāa̍ tūsī chōo̍, kāni̍ fo̍ndōle̍ le̍ sɔ̄ɔ̍ŋ nyāa̍ŋ mākōŋgo̍ŋ bɛ̍ndūŋ nya̍ chō tōsāa̍, mi̍ lā wā yōōmūlā wāŋnda̍ tɛ̄ɛ̄mbūūwo̍ wo̍ŋ. I̍ cho̍ nya̍ kōo̍ma̍ ma̍ŋ pōōndīāā o̍ lāchōŋgu̍, mī to̍sa̍ mī wānāā nya̍ yēēma̍ le̍ yōōmūlā ndāla̍ŋ tɛ̄ɛ̄mbūūwo̍ wa̍ ā chīnda̍, mɛ̄ɛ̍ yōūwo̍ chīndā nu̍a̍ā o̍ yāŋɔ̄ɔ̄le̍ŋ yɛ̍.

²¹Kōlāla̍ i̍pɛ̍ŋgɛ̍la̍ nya̍ tōōsīāā le̍ yīīnɔ᷄ŋndo̍ o̍ lēbōl la̍ŋ, I̍ cho̍ la̍ŋ nya̍ sɛ̄ɛ̄sīāā o̍ lēbōl, ndu̍yɛ̍ mī so̍li̍ wānāā nīa̍a̍ cho̍ o̍ kpāāya̍ nya̍ mākōŋgo̍ ko̍ŋ bɛ̄ŋgu̍ wa̍, mī to̍sa̍ fɛ̍ɛ̍ŋ a̍ fɛ̍ɛ̍ŋ ā ve᷅m lɛ̍ o̍ kpāāyā ko̍ŋ bɛ̄ŋgu̍, mī lā bīī nda̍ mɛ̄ɛ̍ nya̍ yēēmā yɛ̍ le̍. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

²²“Wānāa̍ cho̍ŋnu̍ŋ sa̍kpō wa̍, ā ya̍ i̍i̍ ye̍e̍ma̍ bɛ̍ɛ̍ mī sūɛ̍i̍ kɔ̄l tāmbɛ̍i̍ ndi̍i̍ ko̍ma̍l nda̍ bɛ̍ɛ̍ le̍ wa̍, mi̍ lā tɛ̄ɛ̄mbūū nda̍ kɔ̄lta̍ŋ a̍ chōōlā nyāla̍ŋ. Ndu̍yɛ̍, mī lā lūēī wa̍nāā dɛ̍nɛ̍ wɔ̍ɔ̍ŋnda̍ yōōmūa̍ŋ, mī lā tōsā ā nɔ̍lā mā mūli̍ŋ mī yōōmūlā ndāla̍ŋ lā sɔ̄la̍ chīndāa̍ le̍.

²³Le̍la̍ŋ nya̍ wāŋ lāāndūa̍a̍ su̍a̍ā ha̍ā le̍ Mɛ̄lɛ̄ka̍ wa̍, te̍le̍ŋ cho̍ fūūlūū lā chi᷅ lɛ̍ ni̍ŋ yi̍lāŋndā nyāla̍ lāchōōwāla̍ŋ, ndu̍yɛ̍ mī lā dīmu̍l wāŋnda̍ yōōŋgūlā lāchōōwāla̍ŋ te̍. I̍ cho̍ wānāā nīa̍a̍ sōlī o̍ kpāāya̍ nyāa̍ bɛ̄ŋgu̍. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”