Read Southern Kisi Īsi̍kīāā 14 Bible Online

Īsi̍kīāā 14 - Southern Kisi bible

Īsi̍kīāā 14

¹Ō wa̍ a̍ te̍le̍ŋ pi᷅lɛ̍, mi̍ wāŋ bɛ̄ndūāā I̍sɔ̄lūɛ̄ī, a̍ ti᷄ŋ hūŋ nāa̍ ya̍ chu̍a̍, le̍ mī nyu̍na̍l nda̍ Mɛ̄lɛ̄ka̍ Ya̍a̍wɛ̄ɛ̄ dīōm.

²O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍.

³Mbo̍ dīmūl la̍ āā, “Wāna̍ chi̍o̍o̍ Īsi̍kīāā, I̍ nɔ̍lā mī mu̍li̍ wāŋ bɛ̄ndūa̍a̍ I̍sɔ̄lūɛ̍i̍ dīōm te̍, kāni̍ fo̍ndōle̍, ā kɛ̄ɛ̍ ya̍ ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā ndā. Ndu̍yɛ̍ mi̍ nyɛ̄m mu᷅ŋ tōsā ma̍ sīmnu᷄ŋ wa̍nāā yɔ̄ŋ wɔ̄ɔ̍ŋ.

⁴“Le̍la̍ŋ so̍o̍ nāa̍ nda̍ chūā mā di̍mu̍l nda̍ māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ māā, wāŋnda̍ I̍sɔ̄lūɛ̄ī, nya̍ wānā o̍ wāna̍ kɛ̍ɛ̍ ya̍, mi̍ lā dūāū kɔ̄ltā nyāla̍ŋ kpo̍u̍ o̍ nyɛ̄m chēle̍ŋndo̍ŋ sōōlūūwo̍ ni᷄ŋ, ndu̍yɛ̍, mi̍ nyɛ̄m mu᷅ŋ ŋ̄ tōsā mi̍ lā sīmnu᷄ŋ wa̍nāā yɔ̄ŋ wɔ̄ɔ̍ŋ, tē lā hīŋ nāa̍ wāna̍ su̍a̍ā le̍ Mɛ̄lɛ̄ka̍ wo̍ chūā pɛ̍, le̍ mbō nyūna̍ ya̍ dīōm le̍ nya̍, ya̍ pi̍la̍ kpe̍e̍kpe̍i̍ I̍ cho̍ nya̍ dīōm mūlī, o̍ bɛ̍ndā a̍ mɛ̄lɛ̄ka̍ā nya̍ chō ka̍ŋ so̍o̍lūūwo̍ wa̍ wo̍.

⁵Ndu̍yɛ̍ mi̍ chē bɛ̍ɛ̍ mi̍ Mɛ̄lɛ̄ka̍ā kāŋ ā fāŋā nya̍ kɔ̄lta̍ŋ o̍ ya̍lo̍ ni̍, kɛ̍ mūlī ya̍ I̍ cho̍ nya̍ kē wo̍, nāa̍ pu̍m ndɔ̍ɔ̍, mī nya̍ wāŋnda̍ I̍sɔ̄lūɛ̄ī mī lā mūli̍ vɛ̄lɛ̄ kɔ̄ltā nyāla̍ŋ o̍ ya̍ lo̍.

⁶“Di̍mu̍l wa᷅ŋnda̍ I̍sɔ̄lūɛ̄ī, māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ I̍ di̍mi̍ ma̍a̍, wāŋnda̍ I̍sɔ̄lūɛ̄ī, lā ma᷄l yɔ̍ŋndā nyāla̍ wɔ̍ɔ̍ŋnda̍ŋ, mī lā mūli̍ kɔ̄ltā nyāla̍ŋ o̍ ya̍ lo̍. Lā ma᷄l nyɛ᷅m chēle̍ŋndo̍ŋ sōōlūūwo̍, ndu̍yɛ̍, mī lā sōli̍ bāla̍ŋ o̍ sɔ̄ɔ̍ŋ wɔ̍ɔ̍ŋ nya̍ chō tōsāa̍ wo̍ŋ ni᷄ŋ, sɔ̄ɔ̍ŋ ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ.

⁷“Wāŋnda̍ I̍sɔ̄lūɛ̄ī, nya̍ wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ, ō wa̍ wa̍nāā lēkāa̍wa̍a̍ cho̍ nya̍ tɛ̄ɛ̄ŋ nda̍ ni̍, nya̍ pi̍la̍ I̍sɔ̄lūɛ̍i̍ya̍ ni̍, wānā o̍ wānā kɛ̍ɛ̍ ya̍ pɛ̍ mbō mūli̍ŋ nyɛ᷅m chēle̍ŋndo̍ŋ sōōlūūwo̍, ndu̍yɛ̍, mi̍ nyɛ̄m mu᷅ŋ tōsā mbo̍ sīmnu᷄ŋ wa᷅na̍ yɔ̄ŋ wɔ̄ɔ̍ŋ, tē wānā wa̍ā le̍nde̍ o̍ hi᷅ŋ nāa̍ wāna̍ su̍a̍ā le̍ Mɛ̄lɛ̄ka̍ wo̍ chūā, le̍ mbō nyūna̍ ya̍ dīōm le̍ ndu̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ pi̍la̍, cho̍ ndu̍ dīōm mūlī ni̍.

⁸Wānā wāā le̍nde̍ kīɔ̍ɔ̍ ya̍ Mɛ̍lɛ̄ka̍ kɛ̄ɛ̄ ndu̍ ni̍, mī so̍li̍ ndu̍ wānāā nīa̍a̍ tɛ̄ɛ̄ŋ po̍, mbō wa᷄ māā tāāmāsi̍ le̍ wānāā tūa̍a̍ kpo̍u̍, ndu̍yɛ̍ mī wāŋnda̍ bālu̍ a̍ ndu̍ o̍ lāsōndō. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁹“Le̍la̍ŋ tē lā chē pɛ̍ mī wānāā nyāa̍ su̍a̍ā le̍ Mɛ̍lɛ̄ka̍ wa̍ ō pīlɛ̍ ō dīmi̍ yōōŋgōo̍, kɛ̍ mī nyɛ̄ o̍ di̍mi̍ ko̍ŋ māā ō chō yɔ̄nɔ᷄ŋ ndo̍ ō yɔ̄nu̍ŋ te̍, mɛ̄ɛ̍ ya̍ Mɛ̍lɛ̄ka̍ Ya̍a̍wɛ̄ɛ̍ hu̍i̍ ndu̍ ni̍. Ndu̍yɛ̍ wānāā nyāa̍ su̍a̍ā ka̍ŋ le̍ Mɛ̍lɛ̄ka̍ mā dīmī yo̍o̍ŋgūlā wāā le̍nde̍ wa̍ ki̍nɛ̍i̍, I̍ cho̍ nda̍ hūnɔ̄ɔ̄ tɛ̄ɛ̄mbūū kpo̍u̍, mi̍ so̍li̍ nda̍ wānāā nīa̍a̍ tɛ̄ɛ̄ŋ I̍sɔ̄lūɛ̄ī.

¹⁰Ndu̍yɛ̍ wānāa̍ su̍a̍ā ka̍ŋ le̍ Mɛ̄lɛ̄ka̍ wa̍ ni̍, a̍ wānāa̍ ku̍ā o̍ wānāā kāŋ ndo̍ le̍ mā nyūna̍ ya̍ dīōm nda̍, nda̍ kpo̍u̍ ya̍ I̍ tu̍sī nyɛ᷅ pālāā pīlɛ̍ kōŋ chōo̍ ni̍.

¹¹Ko̍ŋ cho̍ tōsā ni̍, fɛ̍ɛ̍ŋ a̍ fɛ̍ɛ̍ŋ bɛ̍ɛ̍ nya̍ wāŋnda̍ I̍sɔ̄lūɛ̄ī, lā kɛ̍ɛ̄ lɛ̍ ya̍ mī lā fāŋa̍ŋ o̍ nɛ̄i̍ nūu̍ chōo̍ le̍. Ndu̍yɛ̍, yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nya̍ a̍a̍ to̍sā pa̍a̍ndū mi̍ lā sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l, lā to̍sā lɛ̍ ndu̍ le̍. Lā chō hūnɔ̄ɔ̄ sīmnɔ᷄ŋ wa̍nāā nī, ndu̍yɛ̍ mī ya̍ bɛ̍ɛ̍ I̍ si̍mnu᷄ŋ Mɛ̍lɛ̄ka̍ nyā. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.”

¹²O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍ā.

¹³Mbo̍ dīmūl la̍ āā, “Wāna̍ chi̍o̍o̍ Īsi̍kīāā, lēlɛ̄ŋ o̍ lēlɛ᷄ŋ le̍ kɛ̍ɛ̍ wāa̍ sa̍kpō a̍ ya̍ Mɛ̍lɛ̄ka̍ pɛ̍, dɛ̍nɛ̍ pa̍lāa̍ ya̍ I̍ tu̍sī le̍ŋ chōo̍ ni̍, mī to̍sa̍ mī nyɛ̄ dīa̍a̍ chūū o̍ lɛ̄ŋndē lēŋ ni᷄ŋ kpo̍u̍, mī yīmā bɛ̄ndūa̍ŋ mā de᷅l lo̍ŋ. Ndu̍yɛ̍ wāna̍ chi̍e̍e̍ ni̍, chɔ̄lū ni̍, mā sɔ̄la̍ pīɔ̍mndo̍.

¹⁴Mi̍ chē bɛ̍ɛ̍ Nu̍u̍wā ni̍, Da̍a̍ni̍ɛ̍ɛ̄ ni̍, a̍ Cho̍o̍bū, mi̍ nda̍ a̍a̍ wa᷅ wānāā sa̍kpō ya̍ Mɛ̄lɛ̄ka̍ o̍ hɔ̄l, kɛ̍ nda̍ a̍a̍ yɔ̍ŋ bɛ̍ɛ̍ mī nda̍ a̍a̍ wa̍ o̍ lɛ̄ŋndē lēŋ ni᷄ŋ, nda̍ a̍a̍ nɔ̍lā mī nda̍ a̍a̍ chi̍i̍ndi̍a̍a̍ yōōmūlā wānāā kāŋ le̍ sa̍kpōyɛ̍ī ndɛ̄i̍ le̍, nda̍ pi̍la̍ ko̍ni̍ nda̍ a̍a̍ chi̍ndā ni̍ŋ ni̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍ cho̍ ko̍ŋ ni̍.

¹⁵Mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Tē ko̍ŋ te̍, I̍ yɔ̍ŋ vīsīāā bīyāa̍ o̍ lɛ̄ŋndē lēŋ ni᷄ŋ le̍ mā kɔ̍ di̍ū wānāa̍ cho̍ lo̍ŋ nda̍, ndu̍yɛ̍ mā tōsa̍ mī lɛ̄ŋnde̍ŋ lē lo᷄ fo̍ndō, wānā o̍ wānā nɔ̍lā mbō kēēku̍ lo̍ŋ te̍, le̍ sīōōŋīī vīsīāā bīyāa̍.

¹⁶Nda̍ a̍a̍ yɔ̍ŋ bɛ̍ɛ̍ mī wānāā yāa̍wa̍ ha̍ā nda̍ a̍a̍ wa̍ o̍ lɛ̄ŋndē lēŋ ni᷄ŋ, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, chūāūwāā ndāa̍ bɛ̍ɛ̍ nda̍ a̍a̍ nɔ̍lā mī nda̍ a̍a̍ chi̍i̍ndi̍a̍a̍ le̍. Nda̍ pi̍la̍ ko̍ni̍ nda̍ a̍a̍ chi̍ndā ni̍ŋ ni̍, kɛ̍ lɛ̄ŋnde̍ŋ nde̍ŋ, mī le̍e̍ lo̍ fo̍ndō.

¹⁷“Tē ko̍ŋ te̍, I̍ to̍sa̍ ya̍a̍mɔ̍ɔ̍wa̍ hu᷄ŋ de᷅l lɛ̄ŋndē lēŋ chōo̍ ā tɛ̄ɛ̄mbu̍u̍ le̍ŋ kpo̍u̍ a̍ mɔ̄ɔ̄ŋ fāŋndo̍ŋ. Nyɛ̄ o̍ nyɛ̄ yōōmāa̍ cho̍ o̍ lɛ̄ŋndē lēŋ ni᷄ŋ, wāna̍ chi̍e̍e̍ ni̍, chɔ̄lū ni̍, nda̍ kpo̍u̍ mī to̍sa̍ mā dīu̍ nda̍.

¹⁸Nda̍ a̍a̍ yɔ̍ŋ bɛ̍ɛ̍ mī wānāā yāa̍wa̍ ha̍ā nda̍ a̍a̍ wa̍ o̍ lɛ̄ŋndē lēŋ ni᷄ŋ, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, chūāūwāā ndāa̍ bɛ̍ɛ̍ nda̍ a̍a̍ nɔ̍lā mī nda̍ a̍a̍ chi̍i̍ndi̍a̍a̍ le̍. Nda̍ pi̍la̍ ko̍ni̍ nda̍ a̍a̍ chi̍ndā ni̍ŋ ni̍.

¹⁹“Tē ko̍ŋ te̍, I̍ dɔ̍ɔ̍nu᷄ŋ tu̍mbe̍ a̍ nda̍ o̍ ka̍lā ka̍lā, I̍ tu̍si̍ nda̍ nāā wɔ̄ɔ̍ŋ bɛ̄ndōo̍ chōo̍, I̍ di̍u̍ nda̍ dīūwo̍ pīla̍, wāna̍ chi̍e̍e̍ ni̍, chɔ̄lū ni̍, I̍ ba̍su̍ nda̍ tɛ̍ɛ̍.

²⁰Nda̍ a̍a̍ yɔ̍ŋ bɛ̍ɛ̍ mī Nu̍u̍wā, a̍ Da̍a̍ni̍ɛ̍ɛ̄, a̍ Cho̍o̍bū, nda̍ a̍a̍ wa̍ o̍ lɛ̄ŋndē lēŋ ni᷄ŋ, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, chūāūwāā ndāa̍ bɛ̍ɛ̍ nda̍ a̍a̍ nɔ̍lā mī nda̍ a̍a̍ chi̍i̍ndi̍a̍a̍ le̍. Nda̍ pi̍la̍ ko̍ni̍ nda̍ a̍a̍ chi̍ndā ni̍ŋ ni̍ le̍ sa̍kpōyɛ̍ī ndɛ̄i̍.”

²¹Le̍la̍ŋ nyɛ̄ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍ cho̍ ho̍ō ni̍. Ō dīmi̍ āā, “I̍ cho̍ Chūlu̍sɛ̄lɛ̄m dɛ̍nɛ̍la̍ pa̍lāālā wɔ̄ɔ̍ŋnda̍ŋ tūsī chōo̍ la̍ŋ hi̍ɔ̍ɔ̍lu̍, ya̍a̍mɔ̍ɔ̍wa̍ chō nda̍ hūnɔ̄ɔ̄ dēlɔ̄ɔ̄ chōo̍, mī yīmā bɛ̄ndūa̍ŋ mā tōl nda̍ chōo̍, mī vīsīāā bīyāa̍ tīu̍ o̍ lɛ̄ŋndē ndāle̍ŋ ni᷄ŋ, ndu̍yɛ̍ mī nāālā wɔ̄ɔ̍ŋnda̍ŋ lā tīu̍ nda̍ tɛ̄ɛ̄ŋ. O̍ ko̍ŋ, wāna̍ chi̍e̍e̍ ni̍, chɔ̄lū ni̍, mī tɛ̍ɛ̍mbu̍u̍ nda̍.

²²Kɛ̍ ndu̍yɛ̍, I̍ chi̍ī ni̍ŋ wa᷅ŋnda̍ Chūlu̍sɛ̄lɛ̄m dīū kpo̍u̍ le̍. Wāŋnda̍ ā ti᷄ŋ ā lō ni̍ŋ yo̍o̍mū Chūlu̍sɛ̄lɛ̄m. Kɛ̍ ndu̍yɛ̍ a̍ lo᷅ ni̍ŋ ka̍ŋ yo̍o̍mū, ma̍ kīndī ma̍ chīīndīāā pūa̍a̍ ndāa̍, a̍ chūāūwāā ndāā la̍a̍ndūa̍a̍ wa̍, tē ā hīŋ nāa̍ nya̍ chūā pɛ̍, mī lā chīi̍ ka̍a̍lā ndāla̍ŋ a̍ kēlā ndāla̍ŋ chɔ̍, lā chō sīnā māā wānāā yɔ̄ŋ wɔ̄ɔ̍ŋnda̍ kpe̍e̍kpe̍i̍ nda̍ chō ni̍. O̍ ko̍ŋ, mī lā sīna̍ māā dɛ̍nɛ̍ pa̍lāā ya̍ I̍ tu̍si̍ wāŋnda̍ Chūlu̍sɛ̄lɛ̄m chōo̍ wo̍, māā ō nɛ̄ī kpe̍e̍kpe̍i̍ ya̍ I̍ to̍sa̍ ndi̍ ni̍.

²³Tē wāŋnda̍ ha̍ā ā kōma̍l nya̍ pɛ̍, mī lā chē ka̍ālā ndāla̍ŋ a̍ kēlālā ndāla̍ŋ, lā chō sīnā māā nyɛ̄ o̍ nyɛ̄ ya̍ I̍ to̍sa̍ a̍ nda̍, māā le̍ sa̍bū kpe̍e̍kpe̍i̍ ya̍ I̍ to̍sa̍ ndu̍ ni̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍ cho̍ ko̍ŋ ni̍.