Read Southern Kisi Īsi̍kīāā 15 Bible Online

Īsi̍kīāā 15 - Southern Kisi bible

Īsi̍kīāā 15

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, yɔ̄m kīle̍pīi̍yo̍, vɛ̄ɛ̄ wānā tu̍ū ndu̍ a̍ yɔ̄mnde̍ ī pīlɛ̍i̍ o̍ būndɔ̍ɔ̍ ni᷄ŋ?

³Wānā to̍o̍sīāā nyɛ᷅ chēle̍ŋ a̍ yɔ̄mndo̍ ho̍ō? Sīōndōōle̍ŋ bɛ̍ɛ̍ wānā nɔ̍lā mā to̍sa̍ a̍ ndu̍ le̍ nyɛ̄ lāndɔ̄ɔ̍?

⁴Yɔ̄mndo̍ ho̍ō ō fūla̍ o̍ kōmɔ̄ɔ̄ ndɔ̄ɔ̍ kɔ̄ɔ̄lī, le̍ dɔ̄wɔ̄ɔ̍ o̍ yīŋ ko̍ni̍ o̍ bɛ̍nda̍ ni̍. Ndu̍yɛ̍, ā yɔ᷄ŋ bɛ̍ɛ̍ mbō ŋūɛ̄ a̍ lɛ̄ūwūŋ ndɔ̄ɔ̍ŋ kpo̍u̍, wānā nɔ̍lā mā so̍li̍ŋ kpe̍ku̍ a̍ pūltā ndɔ̄la̍ŋ?

⁵Yɔ̄ŋndo̍ ho̍ō, wāŋnda̍ nɔ̍ lɛ̍ kpe̍ku̍ o̍ kpe̍ku̍ che᷅le̍ŋ a̍ ndu̍ le̍. Ndu̍yɛ̍ ā dɔ̄u̍ ndu̍ bɛ̍ɛ̍ o̍ yīŋ mbō ŋūɛ̄, wāŋnda̍ nɔ̍ kpe̍ku̍ o̍ kpe̍ku̍ a̍ pūltā ndɔ̄la̍ŋ te̍.”

⁶Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Mɛ̄ɛ̍ yɔ̄m kīle̍pīi̍yo̍ ō wā nu̍a̍ā yɔ̄mnde̍ tɛ̄ɛ̄ŋ o̍ būndɔ̍ɔ̍ ni᷄ŋ, mɛ̄ɛ̍ le̍ dɔ̄wɔ̄ɔ̍ o̍ yīŋ ko̍ni̍ o̍ cho̍ ni̍ yɛ̍, le̍nde̍ ya̍ I̍ to̍sā ni̍ŋ a̍ wāŋnda̍ Chūlu̍sɛ̄lɛ̄m ni̍.

⁷I̍ cho̍ nda̍ dɛ̍nɛ̍ pa̍lāā bɛ̄ndōo̍ tūsī chōo̍. Ā hɛ̄lu᷄ŋ o̍ yīŋnde̍ŋ ni᷄ŋ ma̍ chīndā, kɛ̍ yīŋnde̍ŋ lē chō nda̍ tɛ̄ɛ̄mbūū. Tē I̍ tu̍si̍ nda̍ dɛ̍nɛ̍ pa̍lāa̍ chōo̍ pɛ̍, o̍ ko̍ŋ nda̍ chō sīnā ni̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁸I̍ cho̍ tōsā mī lɛ̄ŋnde̍ŋ lē pīɔ̍l mī lē lo̍ fo̍ndō, kāni̍ fo̍ndōle̍, le̍ mɛ̄ɛ̍ nda̍ kɛ̄ɛ̍ wāa̍ sa̍kpō ya̍ Mɛ̍lɛ̄ka̍ o̍ hɔ̄l lɛ̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍ ndu̍ cho̍ ko̍ŋ ni̍.