Read Southern Kisi Īsi̍kīāā 16 Bible Online

Īsi̍kīāā 16 - Southern Kisi bible

Īsi̍kīāā 16

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍, mbo̍ dīmūl la̍ āā,

²“Wāna̍ chi̍o̍o̍ Īsi̍kīāā, chɔ̍ɔ̍mu̍u̍ Chūlu̍sɛ̄lɛ̄m, mā chɔ̍m ndu̍ sɔ̍ɔ̍ŋ wɔ̍ɔ̍ŋ o̍ to̍sa̍ wo̍ŋ, ŋ̄ ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ.

³Di̍mu̍l ndu̍ māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ I̍ di̍mi̍ ma̍a̍, chūlu̍sɛ̄lɛ̄m, tē ō wa̍ māā yɔ̄ŋɔ̄ɔ̄ pɛ̍, o̍ lɛ̄ŋndē Ke̍nāŋnde̍ŋ ni᷄ŋ ō fūla̍ tūm ni̍, lo̍ŋ ŋ̄ vēlu᷄ŋ ni̍. Fi̍nyā nūm, A̍mɔ̍lu̍a̍i̍tīi̍nɔ̍ɔ̍ o̍ wa̍ ni̍, kālā nu̍m yɛ̄, Hi̍ta̍i̍tīi̍nɔ̍ɔ̍ o̍ wa̍ ni̍.

⁴Mɛ̄ɛ̍ nda̍ vēlū nu̍m, bɛ̄ɛ̄ndīāā o̍ bɛ̄ɛ̄ndīāā ā bɛ̄ɛ̄ndi̍a̍a̍ nu̍m, mɛ̄ɛ̍ nda̍ vīālū nu̍a̍ā chɛ̄lɛ̄kpɔ̍ɔ̍ mā tōōsi̍a̍a̍ ndu̍ pūle̍ŋ, ndu̍yɛ̍ mā pūlū ndu̍ a̍ si̍ɔ̍ɔ̍, mā sūu̍ ndu̍ chūɛ̄īya̍ŋ, o̍ ko̍ŋ kɔ̍ɔ̍lī mā mɔ̄ɔ̄si̍a̍a̍ ndu̍ mɔ̍ɔ̍su̍ mɔ̍ɔ̍su̍ o̍ kōlāla̍ŋ ni᷄ŋ yɛ̍ le̍.

⁵Wānā o̍ wānā ve̍ mī nyīɛ̍ɛ̍ye̍ bīī ndu̍ le̍ nūm mbō bɛ̄ɛ̄ndi̍a̍a̍ nu̍m bɛ̄ɛ̄ndīāā nda̍ bɛ̄ɛ̄ndīāā chɛ̄lɛ̄kpɔ̍ɔ̍ wo̍ le̍. Mɛ̄ɛ̍ nda̍ vēlū nūm, wānā o̍ wānā ndu̍ o̍o̍ hɛ̍na̍ŋ a̍ nūm te̍, ma̍ chūā nu̍m le̍nde̍, ma̍ kɔ̍ ma᷅l nu̍m yōndōo̍ ni᷄ŋ na̍a̍ kpa̍yāŋnda̍.

⁶“I̍ lo̍ hīōūwɔ̄ɔ̍, mi̍ ko̍māl nu̍m īhīni̍ yu̍u̍līa̍ŋndo̍, ā chō le̍nde̍ o̍ li̍ndɛ̍i̍ mɛ̄ɛ̍ nda̍ vēlū nu̍m yɛ̍. Mɛ̄ɛ̍ ya̍ I̍ ko̍māl nu̍m, I̍ chɛ̍l mā vī le̍.

⁷O̍ ko̍ŋ, mi̍ māndā nu̍m mi̍ so̍lī nu̍m lēni᷄ŋ, mɛ̄ɛ̍ wāŋndo̍ tūāl nu̍a̍ā tɔ̄lɔ̄ɔ̍, mbō lo̍ kūɛ̍i̍ a̍ ndu̍ ko̍ŋ, mbō sōli̍ ndu̍ lēni᷄ŋ yɛ̍. Ndu̍yɛ̍, ma̍ hīndū ma̍ sīmnu᷄ŋ chu̍ā lāāndū. Mi̍ mɛ̄ɛ̄ya̍ŋ mā pīā nu̍m o̍ ībūŋ nyɛ̄ kɛ̄ndɛ̄ kɛ̍ndɛ̄, ndu̍yɛ̍, mi̍ yīīŋnde̍ chīīŋīāā nu̍m o̍ lēbōl kpo̍u̍. Kɛ̍ ndu̍yɛ̍ a̍ wa̍ wɔ̄ fo̍ndō, nyɛ̄ o̍ nyɛ̄ ve̍ nu̍m lēkɔ̄ɔ̍ le̍.

⁸“Mɛ̄ɛ̍ ya̍ I̍ wa̍ hīōūwɔ̄ɔ̍ te̍le̍ŋndo̍ ō pīlɔ̍ɔ̍, mi̍ ko̍māl nu̍m, nu̍m o̍o̍ fu̍u̍lu̍u̍ ni᷅ŋ te̍le̍ŋ ŋ̄ hīōū wānā pɔ̍nɔ̍ kɔ̍ɔ̍lī. Kɛ̍ a̍ wa̍ wɔ̄ le̍nde̍ fo̍ndō. O̍ ko̍ŋ, mi̍ so̍lī dōma̍ nūu̍ mi̍ ku̍mbū nu̍m īsūla̍. Mi̍ ka̍a̍lā nu̍m, mi̍ ŋ̄ yīī kpe̍ma̍a̍ na̍a̍ nūm, ndu̍yɛ̍ ma̍ sīmnu᷄ŋ la̍a̍ ni̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ wo̍ cho̍ ko̍ŋ ni̍.

⁹“Mɛ̄ɛ̍ ya̍ I̍ ko̍ma̍l nu̍m, a̍ wa̍ le̍nde̍ o̍ li̍ndɛ̍i̍ mɛ̄ɛ̍ nda̍ vēlū nu̍m yɛ̍, mi̍ pu̍lū nu̍m fo̍, mi̍ su̍ū nu̍m chūɛ̄īya̍ŋ.

¹⁰O̍ ko̍ŋ kɔ̍ɔ̍lī, mi̍ so̍lī kōlāla̍ kɛ̍ndɛ̄ kɛ̍ndɛ̄lā nda̍ hɔ̄ū lēchōo̍ nyɛ᷅ kɛ̄ndɛ̄ kɛ̍ndɛ̄la̍ŋ, a̍ kɔ̄vɛ̄i̍la̍ yāu̍ vīsīo̍o̍ ō kɛ̄ndɛ̄ kɛ̍ndɔ̄ɔ̍, a̍ kōlā kɛ̍ndɛ̄ kɛ̍ndɔ̄ɔ̍ le̍ yīīnɔ᷄ŋndo̍ o̍ lēbōl, a̍ dōmā vi̍lɛ̄ī kɛ̄ndɛ̄ kɛ̍ndɔ̄ɔ̍ mi̍ chu̍ɛ̍i̍ nu̍m.

¹¹Mi̍ chu̍ā yɔ̄lɔ̍ŋ a̍ kēla᷄ŋ lābāa̍ŋ mi̍ do̍vī nu̍m.

¹²O̍ kōŋ kɔ̍ɔ̍lī, mi̍ ba̍ā nu̍m kēlɛ̄i̍ o̍ mi᷄ŋndo̍, mi̍ wo̍ū nu̍m kēla̍ŋ o̍ lānī, ndu̍yɛ̍ mi̍ wo̍ū nu̍m mɔ̍si̍l kɛ̍ndɛ̄ kɛ̍ndɛ̄ bɛ̄ndōo̍.

¹³Mi̍ do̍vī nu̍m a̍ ko̍o̍līi̍yo̍ŋ, ndu̍yɛ̍ a̍ nyɛ᷄m cho̍ ŋ̄ tōōsīāā a̍ ka̍ni̍ŋ hu̍mbo᷄ŋ ndo̍ŋ. Ndu̍yɛ̍ nyɛ̄lā kɛ̄ndɛ̄ kɛ̍ndɛ̄la̍ŋ, a̍ dōmā vi̍lɛ̄ī kɛ̄ndɛ̄ kɛ̍ndɔ̄ɔ̍, a̍ nyɛ̄la̍ nda̍ hɔ̄ū lēchōo̍ nyɛ̍ kɛ̄ndɛ̄ kɛ̍ndɛ̄la̍ŋ, la̍ŋ nūm o̍o̍ wo̍u̍nūŋ ni̍. Nyɛ̄ nūm di̍a̍a̍ wa̍ bēe̍dīi̍ nda̍ tōōsīāā a̍ kōlō kɛ̍ndɛ̄ kɛ̍ndɔ̄ɔ̍ wo̍, a̍ līa̍a̍ŋ, a̍ chūɛ̄īmā ɔ̄li̍fīi̍ya̍ŋ ni̍. Ma̍ sīmnu᷄ŋ wa̍nā la̍nɔ̍ kɛ̍ndɛ̄ kɛ̍ndɛ̄ bɛ̄ndū, wānā a̍a̍ che᷅ nu̍m pɛ̍, āā wānā la̍nɔ̍ ma̍sāa̍ ni̍, a̍ nāŋɔ̄ɔ̍.

¹⁴Mi̍ tɔ̍ɔ̍ nu̍mndo̍ tīū o̍ lɛ̄ŋnde̍ ni᷄ŋ kpo̍u̍ a̍ nāŋɔ̄ɔ̍. Mi̍ bɛ̍ɛ̍ndīāā nu̍m, mi̍ to̍sā ma̍ sīmnu᷄ŋ wa̍nā la̍nɔ̍ lēbɛ̄ɛ̄ bɛ̄ndū.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍ cho̍ ko̍ŋ ni̍.

¹⁵Mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Kɛ̍ nūm Chūlu̍sɛ̄lɛ̄m, ma̍ pūūlu᷄ŋ na̍ŋɔ̄ɔ̄ nūmndo̍, a̍ tɔ̍ɔ̍ nūm o̍o̍ nɔ̍ wo̍, ma̍ sīmnu᷄ŋ wa̍nā la̍nɔ̍ su̍u̍ndɛ̍i̍, ma̍ tūāl wāŋ pīāāndūāā bāla᷄ŋnda̍ kɔ̄ɔ̄lī.

¹⁶Ma̍ chūā nyɛ̄lā ba̍ā kālālā ya̍ I̍ ke̍ nu̍m le̍ chūɛ̄ɛ̄nɔ᷄ŋndo̍ la̍ŋ, ma̍ bɛ̄ɛ̄ndīāā fo̍ndā nu̍m lāsōōlu̍u̍wo̍ nyɛ̄ kɛ̄ndɛ̄ kɛ̍ndɛ̄. Lo̍ŋ pūa̍a̍ nda̍ a̍a̍ ku̍ā ni᷅ŋ wāa̍ a̍ nūm ni̍. Sɔ̄ɔ̍ŋ ŋ̄ tōsa̍ wo̍ŋ, kāni̍ bɛ̍ɛ̍ ŋ̄ wāā le̍nde̍ ŋ̍ yɔ̍nu̍ŋ ndɔ̍ le̍, ndu̍yɛ̍ ŋ̄ yɔ̍nūŋ ndɛ̍ le̍.

¹⁷Nyɛ̄m ŋ̄ko̍o̍līi̍ŋ, a̍ nyɛ̄m ka̍ni̍ŋ hu̍mbūŋ ya̍ I̍ ke̍ nu̍m le̍ chūɛ̄ɛ̄nɔ᷄ŋndo̍ wo̍ŋ, ma̍ chūā mu̍ŋ ma̍ tōōsīāā nyɔ̄ɔ̍ŋ māā vēla᷅ŋ ŋ̄wāŋ pīāāndū, ma̍ tōsā mɛ̄ɛ̍ wānā la̍nɔ̍ su̍u̍ndɛ̍i̍yo̍ ō tōsā yɛ̍, mā sōōlūū mu̍ŋ.

¹⁸Nyɛ̄lā ba̍ā kālālā ya̍ I̍ ke̍ nu̍m lā hūāūwāā lēchōo̍ nyɛ̍ kɛ̄ndɛ̄ kɛ̍ndɛ̄ le̍ chūɛ̄ɛ̄nɔ᷄ŋndo̍ la̍ŋ, ma̍ chūā la̍ŋ ma̍ wōū mɛ̄lɛ̄ka̍ā nūm a̍a̍ ka̍ŋ. Chūɛ̄īmā ɔ̄li̍fīi̍mā ya̍ I̍ ke̍ nu̍m nda̍ŋ ni̍, nyɛ̄m chūŋ kɛ̄ndɛ̄ŋ ya̍ I̍ ke̍ nu̍m ndo̍ŋ ni̍, mu̍ŋ kpo̍u̍ ma̍ chūā ma̍ sōlī sa̍lāla̍ŋ o̍ nda̍ lo̍.

¹⁹Nyɛ̄ dīāā ya̍ I̍ ke̍ nu̍m le̍ dīo̍o̍ wo̍, bēe̍dīi̍ nda̍ tōōsīāā a̍ kōlō kɛ̍ndɛ̄ kɛ̍ndɔ̄ɔ̍ wo̍, a̍ chūɛ̄īmā ɔ̄li̍fīi̍ya̍ŋ, a̍ līa̍a̍ŋ, ma̍ chūā ma̍ sōlī sa̍lāla̍ŋ o̍ mɛ̄lɛ̄ka̍ā nūm a̍a̍ ka̍ŋ ndo̍, le̍ mī chūŋ kōŋ kōma̍l nda̍ mā na᷄ŋ kɔ̄l.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍ cho̍ ko̍ŋ ni̍.

²⁰Mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Kɛ̄ɛ̄ ŋ̄ kɛ̄ɛ̍ ya̍ mā bālu̍ su̍u̍ndāa̍ wo̍, a̍ hi̍ni̍ kɔ̍l a̍ ke̍ŋ te̍. Ma̍ lō o̍ ko̍ŋ ma̍ chūā pūa̍a̍ nīa̍a̍, a̍ chūāūwāā nīāā la̍a̍ndūa̍a̍ na̍a̍ ŋ̄ vēlū na̍a̍ nūm nda̍, ma̍ sōlī nda̍ sa̍lāla̍ŋ o̍ mɛ̄lɛ̄ka̍ā nūm a̍a̍ ka̍ŋ ndo̍.

²¹

²²Hīōūwɔ̄ɔ̍ tu̍ŋ ŋ̄ chō lāchī a̍ sɔ̄ɔ̍ŋ ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ tōsāa̍ ni̍, mā bālu̍ su̍u̍ndāa̍. A̍ cho̍ yi̍ya᷄ŋ a̍ bōōndi̍i̍ nda̍ vēlū nu̍m, mi̍ ko̍māl nu̍m yūūlīa̍ŋndo̍ le̍nde̍ o̍ li̍ndɛ̍i̍yo̍ ve̍ le̍.”

²³Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Chūlu̍sɛ̄lɛ̄m, dɛ̍nɛ̍ pa̍lāā bɛ̄ndōo̍ chō le̍ nūm. Kpūndɛ̍ bɛ̄ndōo̍ wā ni̍ŋ le̍ nūm, kāni̍ fo̍ndōle̍ le̍ yɔ̄ŋ nūm wɔ̍ɔ̍ŋndo̍. Ō fūla̍ o̍ sɔ̄ɔ̍ŋ wɔ̍ɔ̍ŋ ŋ̄ tōsa̍ mu᷅ŋ ndo̍ŋ kɔ̄ɔ̄lī,

²⁴ma̍ lō o̍ ko̍ŋ ma̍ tīū fo̍ndāŋndā lāsōōlu̍u̍la̍ŋ tāŋgūllo̍, o̍ nɛ̄īla̍ŋ da̍ŋga̍la̍ le̍ mɛ̄lɛ̄ka̍ā nūmnda̍ sōōlūūwo̍, mā tōsā sɔ̍ɔ̍ŋ nu̍m tīāma᷄ŋ ndo̍ŋ.

²⁵Ma̍ tīū fo̍ndāŋndā lāsōōlu̍u̍la̍ŋ o̍ bɛ̍ɛ̄la̍ŋ kpo̍u̍, mā kūā na̍ŋɔ̄ɔ̄ nūmndo̍ pīsīo̍o̍ lo̍ŋ wa᷅ŋ pīāāndūa̍a̍ kɔ̄ɔ̄lī. Ma̍ yɔ̄ŋgu᷄ŋ nu᷅m pi̍la̍ o̍ wāŋ pīāāndūa̍a̍ bāla᷄ŋnda̍ lo̍, ma̍ sīmnu᷄ŋ wa̍nā su̍u̍ndɛ̍i̍ bɛ̄ndōo̍ o̍ tāndā kōŋ ni᷄ŋ kpo̍u̍.

²⁶Ndu̍yɛ̍, ma̍ yɔ̄ŋgu᷄ŋ vɛ̍lɛ̄ nūm pīla̍ o̍ wāŋnda̍ I̍chi̍pī lo̍, wānāā nya̍ chīɛ̄ɛ̄li̍āŋ nda̍, a̍ nɔ̍ yēēmɛ̍i̍ wānā la̍nɔ̍ɔ̍ nɔ̄ bɛ̄ndōo̍ wa̍, ma̍ tōsā mi̍ chɔ̍ɔ̍lū tu̍mbe̍ dɔ̍ɔ̍nɔ᷄ŋ a̍ nūm.

²⁷“O̍ ko̍ŋ, mi̍ tu̍sī nu̍m nyɛ̄ pālāa̍ chōo̍, mi̍ po̍o̍ndā lɛ̄ŋndē nūmnde̍ŋ lē ti᷄ŋ. Mi̍ ma᷅l nu̍m ya̍a̍mɔ̍ɔ̍wa̍a̍ nu̍mnda̍ o̍ bā, nda̍ yɔ̍nūŋ ni̍ māā Fīli̍i̍tīāŋnda̍. Wāŋnda̍ ha̍ā, mi̍ si̍ɔ̍mbu̍la̍ŋ lā bīī nda̍ a̍ ka̍ālā nūmnda̍ su̍u̍ndɛ̍i̍la̍ŋ. Ndu̍yɛ̍ mi̍ to̍sā ma̍ tōsā a̍ nūm mɛ̄ɛ̍ nda̍ yēēma̍ yɛ̍.

²⁸“Ma̍ lō vɛ̄lɛ̄ o̍ ko̍ŋ ma̍ yɔ̄ŋgu᷄ŋ nu᷅m pi̍la̍ o̍ wāŋ pīāāndūāā Āsi̍i̍līāŋnda̍ lo̍, kāni̍ fo̍ndōle̍, nūm o̍o̍ hi̍nī kɔ᷅l a̍ wānā pɔ̍nɔ̍ pi᷅lɛ̍ le̍. Ndu̍yɛ̍ a̍ yɔ̄ŋgɔ᷄ŋ ko̍ŋ o̍ nda̍lo̍ kpo̍u̍, a̍ hi̍ni̍ kɔ̍l te̍.

²⁹O̍ ko̍ŋ kɔ̍ɔ̍lī, ma̍ mūli᷄ŋ vɛ̍lɛ̄ Ba̍bi̍lɔ̄ŋnda̍ kɔ̄ɔ̄lī, wānāā lēyākūāā bɛ̄ndūa̍a̍, kɛ̍ nda̍ bɛ̍ɛ̍ mɛ̄ɛ̍ o̍ mɛ̄ɛ̍ nda̍ a̍a̍ wa̍ a̍ nūm, nda̍ a̍a̍ hi̍nī nu̍m kɔ̄l te̍.”

³⁰Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Chūlu̍sɛ̄lɛ̄m, yēēmɛ̍i̍ ti̍a̍mɛ̄ī bɛ̄ndūi̍ cho̍ o̍ kɔ̄l nūmndo̍ ni᷄ŋ nde̍ ī chō ī bɔ̄ɔ̍, ma̍ wā sɔ̄ɔ̍ŋ wɔ̍ɔ̍ŋ wāā nu̍a̍ā tōsāa̍, mɛ̄ɛ̍ wānā la̍nɔ̍ su̍u̍ndɛ̍i̍ nɔ̍ ho̍ō lāsi̍ɔ̍mbu̍ le̍ wo̍ ō tōsā sɔ̍ɔ̍ŋ yɛ̍.

³¹Ma̍ lō o̍ ko̍ŋ, ma̍ tīū fo̍ndāŋndā lāsōōlu̍u̍la̍ŋ tāŋgūllo̍ o̍ bɛ̍ɛ̄lālāŋ kpo̍u̍, le̍ mɛ̄lɛ̄ka̍a̍ nūmnda̍ sōōlūūwo̍, ndu̍yɛ̍ mā kūā sɔ̍ɔ̍ŋ nu̍m sūūndɛ̍i̍yo̍ŋ tōsāa̍ lo̍ŋ. Ndu̍yɛ̍ nūm a̍ ve̍ bɛ̍ɛ̍ to̍sā mɛ̄ɛ̍ wāŋ lāāndūa̍a̍ ba̍lū su̍u̍ndāa̍ le̍ nyɛ̄ sɔ̄lāa̍ wa̍ ā tōsā yɛ̍ le̍, kāni̍ fo̍ndōle̍, nūm a̍ ve̍ pu̍a̍a̍ nyɛ̍ o̍ nyɛ̄ bīyɔ̄ɔ̄ o̍ bā le̍ wāa̍ a̍ nūm te̍.

³²A̍ wa̍ māwāā māā wānā la̍nɔ̍ su̍u̍ndɛ̍i̍, o̍ nɔ̍ ho̍ō yēēmɛ̍i̍ le̍ wāŋ pīāāndūāā mīālla̍, ō ve᷅ le̍ pɔ̍nɔ̍ ndɔ̄ le̍ wo̍.

³³Wāŋ lāāndūa̍a̍ ba̍lū ti̍ɔ̍mɔ̄ɔ̍ wa̍, nyɔ̄ɔ̍ŋ pūa̍a̍ kē nda̍ ni̍ le̍ wāa̍ a̍ nda̍. Kɛ̍ nūm nūm, nūm pi̍la̍ nūm o̍o̍ ke᷅ pu̍a̍a̍ nyɔ̄ɔ̍ŋ ni̍ le̍ nda̍ dɛ̄ɛ̄nīa̍a̍, le̍ hāli̍kpe̍ŋ mā wa᷄ a̍ nūm.

³⁴Nūm tīɔ̄mɔ̄ɔ̄ nūmndo̍ ō wa᷄ te̍ŋge̍le̍ŋ, a̍ wāŋ lāāndūa̍a̍ pīli̍a̍a̍ a̍ ba̍lū ti̍ɔ̍mɔ̄ɔ̍ le̍ nyɛ̄ sɔ̄lāa̍ wa̍. Nūm wānā pɔ̍nɔ̍ ndu̍ o̍o̍ hi᷅ŋ nāa̍ nūm chu̍a̍ mbō nyūna̍ nu̍m te̍, nūm o̍o̍ ku̍ā pu̍a̍a̍ nyūnāa̍ ni̍, le̍ mā wa᷄ a̍ nūm. Nūm pūa̍a̍ nda̍ a̍a̍ pa̍a̍wā nu̍m te̍, nūm pi̍la̍ nūm o̍o̍ pa̍a̍wā pu̍a̍a̍ ni̍.”

³⁵Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Le̍la̍ŋ Chūlu̍sɛ̄lɛ̄m, nūm wānā la̍nɔ̍ su̍u̍ndɛ̍i̍yo̍ ho̍ō, ya̍ŋ ni᷅la̍ŋ mā tūēī nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍.”

³⁶Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ di̍mi̍ a̍a̍, “Chūlu̍sɛ̄lɛ̄m, le̍ te̍le̍ŋ o̍ te̍le̍ŋ a̍ wa̍ ō bɛ̄ɛ̄ndīa̍ŋ, le̍ mī pūa̍a̍ ā wa᷄ a̍ nūm. Mɛ̄ɛ̍ ŋ̄ wa̍ wānā la̍nɔ̍ su̍u̍ndɛ̍i̍ yɛ̍, ma̍ yūŋgā nūm pīla̍ sa̍ma̍a̍ nu̍mnda̍, a̍ nyɛ̄m nūm che᷅le̍ŋ ŋ̄ sōōlūū māā mɛ̄lɛ̄ka̍ā nūmndo̍ŋ o̍ hɔ̄l, ŋ̄ ya̍ Mɛ̍lɛ̄ka̍ tūl mu̍ŋ yɛ̄le̍ŋ ndo̍ŋ. Ma̍ dīū chūāūwāā nūmnda̍, ma̍ sōlī nda̍ sa̍lāla̍ŋ o̍ nyɛ̄m mu᷅ŋ ndo̍. Le̍la̍ŋ nūm bɛ̍ɛ̍, I̍ cho̍ nu̍m nyɛ̄ pālāa̍ tūsī chōo̍ mī di̍ī nu̍m mɛ̄ɛ̍ ŋ̄ tōsa̍ a̍ chāāŋnda̍ yɛ̍.

³⁷Le̍la̍ŋ, I̍ cho̍ sa̍ma̍a̍ nu̍mnda̍ kpo̍u̍ chu̍u̍ŋgīāā nāa̍ pi᷅lɛ̍, ā nūm o̍o̍ ka̍a̍la̍ kāālā bɛ̄ndōo̍ wa̍ ni̍, ā nūm o̍o̍ tu̍l ni᷅ŋ yɛ̄le̍ŋ nda̍ ni̍, mā hu᷄ŋ ba̍lū nu̍m si̍lɔ̍. O̍ ko̍ŋ, mī yu̍ŋga̍ nu̍m nda̍ o̍ hɔ̄l, nda̍ kpo̍u̍ mā chē nu̍m fo̍ndō.

³⁸I̍ cho̍ hūnɔ̄ɔ̄ tu̍mbe̍ dɔ̍ɔ̍nɔ᷄ŋ a̍ nūm o̍ ka̍lā ka̍la̍, le̍ mɛ̄ɛ̍ ŋ̄ sīmnu᷄ŋ la̍nɔ̍ su̍u̍ndɛ̍i̍ yɛ̍, a̍ le̍ wāŋndā chīe̍e̍ya̍a̍ ŋ̄ dīu̍ wa̍, mī ki̍lu̍l nu̍m yāmɛ̍i̍ le̍ nu̍m dɛ̍nɛ̍ pa̍lāa̍ tūsīo̍o̍ chōo̍ mī di̍ī nu̍m.

³⁹I̍ cho̍ nu̍m mālɔ̄ɔ̄ sa̍ma̍a̍ nu̍mnda̍ o̍ bā, ndu̍yɛ̍ fo̍ndāŋnda̍ lāsōōlu̍u̍la̍ ŋ̄ tāŋgu̍l le̍ mɛ̄lɛ̄ka̍a̍ nūmnda̍ sōōlūūwo̍, mā kūā sɔ̍ɔ̍ŋ nu̍m su̍u̍ndɛ̍i̍yo̍ŋ tōsāa̍ lo̍ŋ nda̍ŋ, mī sa̍ma̍a̍ nu̍mnda̍ ā pēsi̍ pe̍si̍ la̍ŋ kpo̍u̍. Ndu̍yɛ̍, nyɛ̄ o̍ nyɛ̄ chūɛ̄ɛ̄na᷄ŋ ŋ̄ nɔ̄, a̍ nyɛ̄m nu̍m ba̍ā kālāŋ ŋ̄ bāāyīāŋndo̍ŋ, a̍ chō mu̍ŋ pūŋgā kpo̍u̍ mā kūɛ̄nu᷄ŋ a̍ mu̍ŋ, mā mɛ̄i̍ nu̍m fo̍ndō fu̍u̍ mɛ̄ɛ̍ nda̍ vēlū nu̍m yɛ̍.

⁴⁰“Ā chō nu̍m hūnɔ̄ɔ̄ tōlɔ̄ɔ̄ chōo̍ ku̍ndā bɛ̄ndōo̍, mā vīī vi̍i̍ nu̍m a̍ pōūta̍ŋ, ndu̍yɛ̍, mā kīli̍ ki̍li̍ nu̍m ve̍e̍ ve̍e̍ a̍ mɔ̄ɔ̄ŋ ndāa̍ŋ fāŋndo̍ŋ.

⁴¹Chīɛ̄īlā nūmnda̍ŋ kpo̍u̍, a̍ chō la̍ŋ hūnɔ̄ɔ̄ mɛ̄lī o̍ yīŋ mī lā ŋūɛ̄. Ndu̍yɛ̍ wāŋ lāāndūāā ku̍ndāa̍ o̍ hɔ̄l nda̍ wā ni̍ŋ nu̍m dɛ̍nɛ̍ pa̍lāa̍ tūsīo̍o̍ chōo̍ ni̍, nda̍ kpo̍u̍ mā chē. I̍ cho̍ tōsā mā ma̍l tīɔ̄mɔ̄ɔ̍ bālɔ̄ɔ̍, ndu̍yɛ̍, mā pɛ̍ŋgi̍ wāŋ pīāāndūa̍a̍ dɛ̄ɛ̄nīa̍a̍ a̍ nyɔ̄ɔ̍ŋ le̍ mā wa᷄ a̍ nūm.

⁴²Nyɛ̍ to̍sā mī pɔ̍lu̍l kɔ̄llo̍, ndu̍ pīlɛ̍ kpe̍ cho̍ ko̍ŋ ni̍. Tē ke̍ŋ I̍ yɔ̍nu̍ŋ dɔ̍ɔ̍ pɛ̍, I̍ do̍o̍nūŋ ndɛ̍ tu̍mbe̍ a̍ nūm o̍ ka̍lā ka̍lā, ndu̍yɛ̍ mī pa̍ŋa̍la̍ nu̍m te̍.

⁴³Kūɛ̄ī ya̍ I̍ de᷅ a̍ nūm o̍ chɔ̄nɔ᷄ŋ nu̍mndo̍ ni᷄ŋ nde̍, a̍ nɔ̍la̍ mā lo̍o̍nu̍ŋ a̍ ndi̍ le̍. Ma̍ tōsā mi̍ du̍a̍u̍nu᷄ŋ tu̍mbe̍ a̍ nūm, a̍ sɔ̄ɔ̍ŋ wɔ̍ɔ̍ŋ ŋ̄ wa̍ tōsāa̍ ki̍nɛ̍i̍ yo̍ŋ. Le̍ he̍ī, I̍ cho̍ nu̍m dɛ̍nɛ̍ pa̍lāa̍ tūsī chōo̍, kāni̍ fo̍ndōle̍ le̍ yɔ̄ŋndā nūmnda̍ wɔ̍ɔ̍ŋnda̍ŋ. Ō cho̍ lɛ̍ le̍ sɔ̄ɔ̍ŋ wɔ̍ɔ̍ŋ ŋ̄ wa̍ mu᷅ŋ tōsāa̍, sɔ̄ɔ̍ŋ ya̍ I̍ tu̍l yɛ̄le̍ŋ tūl bɛ̄ndōo̍ wo̍ŋ te̍, kɛ̍ ma̍ mūli᷄ŋ vɛ̍lɛ̄ wāŋ pīāāndūāā chēle̍ŋnda̍ bālɔ̄ɔ̍ kɔ̄ɔ̄lī le̍ wāa̍ a̍ nu̍m.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ wo̍ cho̍ ko̍ŋ ni̍.

⁴⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Chūlu̍sɛ̄lɛ̄m, wāŋnda̍ chō hūnɔ̄ɔ̄ tālo̍o̍ dīmī a̍ nūm o̍kɔ̄ɔ̄ āā, ‘Ka̍ā kālāa̍ nɔ̄ wo̍, ndu̍ ko̍ni̍ chūā ndɔ̄ɔ̍ bɛ̍ɛ̍ ndu̍ to᷅l kɔ̍ɔ̍lī ni̍.’

⁴⁵Ka̍ā kālā nu̍m wa̍ chōo̍ wo̍, ndu̍ ko̍ni̍ ŋ̄ tōl ho̍ō kɔ̄ɔ̄lī ni̍. Mɛ̄ɛ̍ kālā nu̍m ndu̍ o̍o̍ tu̍l pɔ̍nɔ̍ ndɔ̍ lēyɛ̄ a̍ chūāūwāā ndūa̍a̍ yɛ̍, le̍nde̍ ko̍ni̍, nūm bɛ̍ɛ̍ nūm tu̍l pɔ̍nɔ̍ nu̍m lēyɛ̄ a̍ chūāūwāā nūmnda̍ ni̍. Ndu̍yɛ̍ bɛ̄ nūm ni̍, pɔ̄mbɔ̄ nūm ni̍, nda̍ bɛ̍ɛ̍ ka̍ā pīlɛ̍ kōŋ ko̍ni̍ nda̍ tōl kɔ̄ɔ̄lī ni̍, ma̍ tūl pīāāndūāā ndāa̍ a̍ chūāūwāā ndāa̍ lēyɛ̄. Kālā nya̍, Hi̍ta̍i̍tīi̍nɔ̍ɔ̍ o̍ wa̍ ni̍, fi̍nyā nyā, A̍mɔ̍lu̍a̍i̍tīi̍nɔ̍ɔ̍.

⁴⁶“Sāme̍e̍līāā bā lūāŋndo̍, a̍ chūāūwāā ndūāā la̍a̍ndūa̍a̍, ndu̍ cho̍ bɛ̄ nūm ni̍. Ndu̍yɛ̍, So̍dɔ̄m bā tōūwo̍, a̍ chūāūwāā ndūāā la̍a̍ndūa̍a̍, ndu̍ cho̍ pɔ̄mbɔ̄ nūm ni̍.

⁴⁷Ka̍ā o̍ ka̍ā wɔ̄ɔ̍ŋ chi̍o̍o̍ŋ mu᷅ŋ ŋ̄ wa̍ chōo̍, nūm bɛ̍ɛ̍ ma̍ tūāl ka̍ālā lāŋ kɔ̄ɔ̄lī, ndu̍yɛ̍ ō bēndu̍ bɛ̍ɛ̍ ti᷅ŋ te̍, mi̍ nūm tōsā bɛ̍ɛ̍ sɔ̍ɔ̍ŋ wɔ̍ɔ̍ŋ chēle̍ŋ ŋ̍ hi̍o̍ū bɛ̍ɛ̍ ka̍ālā ndāla̍ la̍ŋ lēwɔ̄ū wo̍ŋ.”

⁴⁸Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍ mbo̍ dīmī āā, “I̍ me̍na̍ŋ po̍, nūm ni̍, chūāūwāā nūm a̍a̍ la̍a̍ndūa̍a̍ ni̍, yɔ̄ŋ wɔ̄ɔ̍ŋ nya̍ tōsa̍ wo̍, So̍dɔ̄m wa̍nā nu̍m, nda̍ chūāūwāā ndūāā la̍a̍ndūa̍a̍, ā tōsa̍ ndu̍ le̍.

⁴⁹So̍dɔ̄m wa̍nā nu̍m, nda̍ chūāūwāā ndūāā la̍a̍ndūa̍a̍, wānāā yōŋgāa̍ nda̍ wa̍ ni̍, kāni̍ fo̍ndōle̍, le̍ mɛ̄ɛ̍ nda̍ a̍a̍ nɔ̍ nyɛ̄ dīa̍a̍ ta̍u̍ ta̍u̍, ma̍ wā a̍ kɔ̄l nyūlū yɛ̍. Ndu̍yɛ̍ ā māla̍ wa̍nāā tāmbɛ̍i̍ya̍ a̍ wānāa̍ bālā hāvɛ̍i̍ya̍ le̍.

⁵⁰Ma̍ sīmnu᷄ŋ wa̍nāā hɔ̄lāā hēēlāā bɛ̄ndū, ndu̍yɛ̍, sɔ̄ɔ̍ŋ ya̍ Mɛ̄lɛ̄ka̍ tu᷄l yɛ̄le̍ŋ tūl bɛ̄ndōo̍ wo̍ŋ, mu̍ŋ ko̍ni̍ nda̍ wa̍ tōsāa̍ le̍ te̍le̍ŋ o̍ te̍le̍ŋ ni̍. Mɛ̄ɛ̍ ya̍ I̍ che᷅ nyɛ̄ nda̍ wa̍ tōsāa̍ wo̍, mi̍ tɛ̍ɛ̍mbūū nda̍.

⁵¹“Kɛ̍ mī di̍mu̍l nu̍m Chūlu̍sɛ̄lɛ̄m, yɔ̄ŋ wɔ̄ɔ̍ŋ nūm to̍sa̍ wo̍, tɛ̄ndāa̍ tɛ̄ɛ̄ŋ bɛ̍ɛ̍ Sāme̍e̍līāā to̍sa̍ ndu̍ le̍. Sɔ̄ɔ̍ŋ wɔ̍ɔ̍ŋ ŋ̄ tōsa̍ mi̍ ya̍ Mɛ̍lɛ̄ka̍ tūl mu̍ŋ yɛ̄le̍ŋ tūl bɛ̄ndōo̍ wo̍ŋ, wānā tu̍ū mu̍ŋ bɛ̍ɛ̍ a̍ sɔ̄ɔ̍ŋ Sāme̍e̍līāā nda̍ So̍dɔ̄m a̍ to̍sa̍ wo̍ŋ te̍. Tē wānā tu̍u̍ sɔ̄ɔ̍ŋ wɔ̍ɔ̍ŋ ŋ̄ tōsa̍ wo̍ŋ, a̍ ŋ̄ wānāya᷅ŋ nūmndo̍ŋ mu᷅ŋ ā tōsa̍ wo̍ŋ pɛ̍, chūa̍a̍ wānā chu̍ā ndi̍ ni̍, māā nda̍ tōsa̍ bɛ̍ɛ̍ yɔ᷅ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ te̍.

⁵²Le̍la̍ŋ nūm Chūlu̍sɛ̄lɛ̄m, ā chō nu̍m hūnɔ̄ɔ̄ bɛ̄ɛ̄la̍ŋ tɛ̄ɛ̄mbūū, kāni̍ fo̍ndōle̍ yɔ̄ŋ wɔ̄ɔ̍ŋ ŋ̄ tōsa̍ wo̍ ō chō ō bɔ̄ɔ̍, ō hīōū yɔ̄ŋ wɔ̄ɔ̍ŋ Sāme̍e̍līāā a̍ So̍dɔ̄ŋ a̍ to̍sa̍ wo̍, wānāya᷅ŋ nūmndo̍ŋ. Tē wānā tu̍u̍ nyɛ̄ ŋ̄ tōsa̍ wo̍ a̍ nyɛ̄ nda̍ tōsa̍ wo̍ pɛ̍, dīmīo̍o̍ wānā di̍mī ni̍ māā nda̍ nda̍ tōsa̍ bɛ̍ɛ̍ yɔ᷅ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ te̍. Le̍la̍ŋ, ā chō hūnɔ̄ɔ̄ bɛ̄ɛ̄ chu̍wɔ̄ɔ̄ nūm Chūlu̍sɛ̄lɛ̄m, mī si̍ɔ̍mbu̍la̍ŋ lā bīī nu̍m, kāni̍ fo̍ndōle̍, mi̍ chē bɛ̍ɛ̍ mi̍ wānāya᷅ŋ nūmndo̍ŋ mu᷅ŋ ā wā wānāā yɔ̄ŋ wɔ̄ɔ̍ŋ ni̍, kɛ̍ ka̍ālā nūmnda̍ŋ lā tōsa̍ mi̍ wāŋnda̍ chūā nda̍ māā nda̍ chō bɛ̍ɛ̍ wa̍nāā kɛ̄ndɛ̄.”

⁵³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Te̍le̍ŋ cho̍ fūūlūū, Sāme̍e̍līāā ni̍, So̍dɔ̄m ni̍, a̍ chūāūwāā ndāā la̍a̍ndūa̍a̍ lātūlu̍, I̍ cho̍ nda̍ mīŋgī nɛ̄ŋī. Nyɛ̄ o̍ nyɛ̄ nda̍ a̍a̍ nɔ̍, I̍ cho̍ nda̍ mīŋgī o̍ bā, mī to̍sa̍ mā mīīŋgu̍ māā pāāndū. Ndu̍yɛ̍, nūm Chūlu̍sɛ̄lɛ̄m nūm bɛ̍ɛ̍, nyɛ̄ o̍ nyɛ̄ nūm o̍o̍ nɔ̍, I̍ cho̍ nu̍m mīŋgī o̍ bā, mī to̍sa̍ mā mi̍i̍ŋgu̍ māā pāāndū.

⁵⁴Chūlu̍sɛ̄lɛ̄m, ā chō hūnɔ̄ɔ̄ lābɛ̄ɛ̄ ta̍mbu̍, mī si̍ɔ̍mbu̍la̍ bɛ̍ndūla̍ŋ lā bīī nu̍m, kāni̍ fo̍ndōle̍, le̍ sɔ̄ɔ̍ŋ wɔ̍ɔ̍ŋ ŋ̄ tōsa̍ wo̍ŋ. Yɔ̄ŋndā nūmnda̍ wɔ̍ɔ̍ŋnda̍ŋ lā tōsa̍, mi̍ wānāya᷅ŋ nūmndo̍ŋ mu᷅ŋ nāŋ kɔ̄l māā nda̍ tōsa̍ bɛ̍ɛ̍ yɔ᷅ŋ wɔ̄ɔ̍ŋ te̍.

⁵⁵Wānāya᷅ŋ nūmndo̍ŋ, So̍dɔ̄m a̍ Sāme̍e̍līāā, a̍ chūāūwāā ndāā la̍a̍ndūa̍a̍, ā chō mīīŋgū māā pāāndū mɛ̄ɛ̍ nda̍ wa̍ yɛ̍. Ndu̍yɛ̍ nūm bɛ̍ɛ̍, nya̍ chūāūwāā nūm a̍ la̍a̍ndūa̍a̍, lā chō mīīŋgū māā pāāndū.

⁵⁶Chūlu̍sɛ̄lɛ̄m, a̍ wa̍ chi̍e̍e̍ yōŋgā bɛ̍ndū. Bōōndi̍i̍ ŋ̄ wa̍ lēcho̍ō ve̍, ma̍ chūā So̍dɔ̄m nyɛ̄ fo̍ndō fu̍u̍ nu̍m o̍ hɔ̄l.

⁵⁷Kɛ̍ ndu̍yɛ̍, nūm bɛ̍ɛ̍ yɔ̄ŋndā nūmnda̍ wɔ̍ɔ̍ŋndā ŋ̄ wa̍ vīōŋɔ̄ɔ̍ la̍ŋ lā chɔ̄mnu̍ŋ kpe̍nde̍ke̍le̍. Nūm bɛ̍ɛ̍ ā si̍mnu᷄ŋ nyɛ᷅ fo̍ndō lɛ̄ŋndē I̍dɔ̄mnde̍ŋ, a̍ lɛ̄ŋndē Fīli̍i̍tīāŋnde̍ŋ, a̍ lɛ̄ŋīi̍ ba̍lu̍ nu̍m mi̍ ī tūl nu̍m lēyɛ̄ ve̍ o̍ hɔ̄l.

⁵⁸Dɛ̍nɛ̍ wɔ̍ɔ̍ŋ o̍ dɛ̍nɛ̍ wɔ̍ɔ̍ŋ ŋ̄ tōsa̍, sɔ̄ɔ̍ŋ su̍u̍ndɛ̍i̍ ŋ̄ wa᷄ chōo̍ wo̍ŋ ni̍, a̍ sɔ̄ɔ̍ŋ wɔ̍ɔ̍ŋ ya̍ Mɛ̍lɛ̄ka̍ tu᷄l yɛ̄le̍ŋ ma̍ wā mu̍ŋ tōsāa̍ wo̍, ā nɔ̄ mā sɔ̍la̍ dɛ̍nɛ̍ pa̍lāā bɛ̄ndōo̍ le̍ ndu̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ wa̍ ho̍ō ni̍.

⁵⁹Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍ mbo̍ dīmī āā, “Chūlu̍sɛ̄lɛ̄m, I̍ cho̍ nu̍m bīyɔ̄ɔ̄ mɛ̄ɛ̍ ka̍ālā nūmnda̍ŋ lā chō yɛ̍, kāni̍ fo̍ndōle̍ le̍ mɛ̄ɛ̍ ŋ̄ tɛ̄ɛ̄mbu̍u̍ kpe̍ma̍ na̍a̍ ŋ̄ yīi̍ na̍a̍ nūm ndo̍, ma̍ fāŋa᷄ŋ o̍ dīōmndē na̍a̍ ŋ̄ mɛ̄i̍ le̍ŋ chōo̍ yɛ̍.

⁶⁰Kɛ̍ ndu̍yɛ̍, kpe̍ma̍ ya̍ I̍ yi̍i̍ a̍ nūm bōōndi̍i̍ ŋ̄ wa̍ ō pɔ̄mbɔ̄ ve̍, I̍ cho̍ nyɛ̍ di̍mi̍ŋ o̍ kpe̍ma̍ ko̍ŋ ni᷄ŋ ndo̍ tōsā, ndu̍yɛ̍ mī yi̍i̍ kpe̍ma̍ fɛ̍ɛ̍ŋ a̍ fɛ̍ɛ̍ŋ ndo̍ a̍ nūm.

⁶¹Tē te̍le̍ŋ ko̍ŋ fūūlu̍u̍ pɛ̍, I̍ cho̍ tōsā mī pɔ̄mbɔ̄ nūm a̍ bɛ̄ nūm, nda̍ yɔ̍nūŋ māā Sāme̍e̍līāā, a̍ So̍dɔ̄m ni̍, mā wa᷄ nu̍m o̍ bā bɛ̄ŋgu̍, mi̍ chē bɛ̍ɛ̍ ke̍ŋ ve̍ o̍ kpe̍ma̍ na̍a̍ ŋ̄ yīi̍ na̍a̍ nūm ndo̍ ni᷄ŋ te̍ ni̍. A̍ te̍le̍ŋ ko̍ŋ, nūm pi̍la̍ cho̍ hūnɔ̄ɔ̄ yīya᷄ŋ nyɛ᷅ ŋ̄ tōsa̍ wo̍, mī si̍ɔ̍mbu̍la̍ bɛ̄ndūla̍ŋ lā bīī nu̍m.

⁶²Le̍la̍ŋ, I̍ cho̍ hūnɔ̄ɔ̄ kpe̍ma̍a̍ mīŋgī yīī a̍ nūm, mā si̍na̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁶³Ndu̍yɛ̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ ŋ̄ tōsa̍, I̍ cho̍ nu̍m mālɔ̄ɔ̄ le̍ ndu̍. Kɛ̍ ndu̍yɛ̍ nūm pi̍la̍ cho̍ hūnɔ̄ɔ̄ yīya᷄ŋ nyɛ᷅ ŋ̄ tōsa̍ wo̍ mī si̍ɔ̍mbu̍la̍ bɛ̄ndūla̍ŋ lā bīī nu̍m, mā ha̍ndu̍ŋ ba̍a̍ o̍ sōndō.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍ cho̍ ko̍ŋ ni̍.