Read Southern Kisi Īsi̍kīāā 17 Bible Online

Īsi̍kīāā 17 - Southern Kisi bible

Īsi̍kīāā 17

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍, mbo̍ dīmūl la̍ āā,

²“Wāna̍ chi̍o̍o̍ Īsi̍kīāā, di̍mu̍l wa᷅ŋnda̍ I̍sɔ̄lūɛ̍i̍ tālo̍o̍ ho̍ō, mā tūēī.

³Di̍mu̍l nda̍ māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ māā, kōwɛ̍ bɛ̄ndū pu᷄m wa̍ ni̍, ndu̍ o̍o̍ nɔ̍ kūmba᷅ŋndā kpāāyāla̍ŋ lā bɛ̄ndū ku̍pūāā kūpūāā, ndu̍yɛ̍ lā wa᷄ lā pɛ̄ɛ̄ŋgāā. Ndu̍yɛ̍ ndu̍ o̍o̍ nɔ̍ bɔ̄ɔ̄lā kɛ̄ndɛ̄ kɛ̍ndɛ̄la̍ŋ o̍ bōlle̍ŋ ta̍u̍ ta̍u̍, a̍ kɔ̄ɔ̍le̍ŋ yɛ̍ yɛ̍. Mi̍ kōwɔ̍ɔ̍ ho̍ō mālnu᷄ŋ mbo̍ kūā o̍ Pēmbīī Le̍ba̍nɔ̄ŋnde̍ chōo̍, mbo̍ kɔ̍ yo᷅m yɔ̄m si̍dāā wo̍ bōlle̍ŋ.

⁴Mɛ̄ɛ̍ o̍ ye᷅m yɔ̄mndo̍ ho̍ō bōlle̍ŋ, mbo̍ kūā a̍ ndu̍ o̍ lɛ̄ŋndē wānāā lēyākūa̍a̍ ni᷄ŋ, mbo̍ kɔ̍ kɛ̍sī ndu̍ o̍ chi̍e̍e̍ lēyākō bɛ̄ndōo̍ ni᷄ŋ.

⁵O̍ ko̍ŋ kɔ̍ɔ̍lī, mbo̍ chūā ku̍lu̍ yɔ̄m pīlɛ̍ o̍ lɛ̄ŋnde̍ŋ ni᷄ŋ, mbo̍ kūā a̍ ndu̍ mbo̍ kɔ̍ tɔ᷅l ndu̍ o̍ lɛ̄ŋndē kɛ̄ndɛ̄lē tɔ̄lɔ̄ɔ̄la̍ŋ lā nāŋ nde̍ŋ chōo̍, o̍ fo̍ndāŋ māmɛ̄ŋndo̍, nāa̍ tɔ̄lɔ̄ɔ̍ ho̍ō ō hīndū chɔ̍ chɔ̍ wa̍.

⁶Mi̍ ku̍lu̍ yɔ̄mndo̍ ho̍ō ō wūl mbo̍ hīndū, ndu̍yɛ̍ mbo̍ sīmnu᷄ŋ yɔ᷅m mākīle̍pīi̍yo̍. Yɔ̄mndo̍ ho̍ō ndu̍ o̍o̍ be̍ndu̍ le̍, lɛ̄ŋ lɛ̄ŋ nu̍a̍ā o̍ wa̍ ō pɛ̄ŋgɛ̄la᷄ŋ ni̍. Ndu̍yɛ̍ lɛ̄ūwūŋ ndɔ̄ɔ̍ŋ kpo̍u̍, kūmbū kōwɔ̍ɔ̍ ho̍ō ō wa̍ wo̍, lo̍ŋ ŋ̍ mu̍li̍ hɔ̄lla̍ ni̍. Pūūndu̍ŋ ndɔ̍ŋ mi̍ ŋ̄ tūāl lɛ̄ŋ di̍ di̍. Mi̍ yɔ̄mndo̍ ho̍ō ō sōlī lɛ̄ūwo̍ŋ ta̍u̍ ta̍u̍, ndu̍yɛ̍ mbo̍ pūī pūīyo̍ pīla̍.

⁷“O̍ ko̍ŋ kɔ̍ɔ̍lī, mi̍ kōwɛ̍ bɛ̄ndū chēle̍ŋ ō hūŋ nāa̍ yɔ̄mndo̍ ho̍ō ō wa̍ wa̍. Ndu̍ bɛ̍ɛ̍ ndu̍ o̍o̍ nɔ̍ kūmba᷅ŋndā kpāāyāla̍ŋ lā bɛ̄ndū kūpūāā ku̍pūāā, a̍ bɔ̄ɔ̄la̍ŋ ndu̍ o̍ bōlle̍ŋ ta̍u̍ ta̍u̍. Yɔ̄mndo̍ ho̍ō ō lo᷄ īsīsi̍ nāa̍ o̍ wa̍ ō tūālāā wa̍, mbo̍ mūlī pūūndu᷅ŋ ndɔ̄ɔ̍ŋ a̍ lɛ̄ūwūŋ ndɔ̄ɔ̍ŋ kpo̍u̍ o̍ kōvɛ̍ hi᷅ŋ ho̍ō wo̍ lo̍, le̍ mī kōvɛ̍ kōŋ ō ke᷄ ndu̍ mɛ̄ŋnda̍ŋ mbō hīndū.

⁸Yɔ̄mndo̍ ho̍ō yɛ̍ o̍ lɛ̄ŋndē kɛ̄ndɛ̄ kɛ̍ndɛ̄le̍ŋ chōo̍ o̍ wa̍ ō tūālāā ni̍, nāa̍ ndu̍ o̍o̍ sɔ̍lā mɛ᷅ŋnda̍ŋ le̍ te̍le̍ŋ o̍ te̍le̍ŋ, mbō wa̍ lɛ̄ūwo̍ŋ sōlīo̍o̍, ndu̍yɛ̍ mbō wa̍ kōmɔ̄ɔ̍ nyɛ̄ kɛ̄ndɛ̄ kɛ̍ndɛ̄, mī ndu̍ o̍o̍ si̍mnu᷄ŋ yɔ᷅m tɔ̍ɔ̍ma̍ bɛ̄ndū wa̍.

⁹“Īsi̍kīāā, di̍mu̍l wāŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyūnā ya̍ I̍ nɔ̍ le̍ nda̍ wo̍ cho̍ ho̍ō ni̍, ‘Wāŋnda̍ I̍sɔ̄lūɛ̄ī, lā nɔ̄ o̍ kɔ̄l yɔ̄mndo̍ ho̍ō ō hīāū la̍chi̍ a̍ wāa̍ yōōmu̍? Ō cho̍ su̍ŋgɔ̄ɔ̍ le̍ kōvɛ̍ tāso̍o̍ ō sūŋgū ndu̍, mbo̍ kēēndu̍u̍ kīle̍pīi̍ma̍ cho̍ lēcho̍ō wa̍ŋ, ndu̍yɛ̍, mbō kīli̍ ki̍li̍ lɛ̄ūwūŋ ndɔ̄ɔ̍ŋ mbō ma᷄l mu̍ŋ lɛ̄ŋ mī ŋ̄ vēsa̍ le̍? Ndu̍yɛ̍ ō vɛ̍ bɛ̍ɛ̍ wa̍nāā dīāllūŋ kālā, ɔ̄ɔ̄ ku̍ndā bɛ̄ndū le̍ a̍ sɔ̍ɔ̍ŋgūū le̍ ndu̍ sūŋgɔ̄ɔ̄ le̍.

¹⁰Ndu̍yɛ̍ tē ā sūŋgū ndu̍ ni᷅ŋ pɛ̍, ā yɔ᷄ŋ bɛ̍ɛ̍ mā mīŋgi̍ ni᷅ŋ ndu̍ tɔ̄lɔ̄ɔ̄ o̍ fo̍ndā kōŋ, ō nɔ̍lā lɛ̍ mbō pēŋ te̍. Hūēīyīī tūu̍ cha᷅ŋ ba᷅ pāa̍le̍ŋ lē chāŋndo̍ ve̍, ndi̍ hɔ᷅ŋ ndu̍ ni̍ mbō lo̍ lo̍ŋ mbō vēsa̍.’ ”

¹¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā,

¹²“Nyu̍na̍ wa̍nāa̍ si̍mu̍l la̍ ha̍ā wa̍ tē ā si̍nā tɛ̍ɛ̍sīāā tālo̍o̍ ho̍ō le̍. Tālo̍o̍ ho̍ō tɛ̄ɛ̄sīāā ndɔ̄ɔ̍ cho̍ ho̍ō ni̍. Ō wa̍ a̍ te̍le̍ŋ pīlɛ̍, mi̍ Māsāa̍ Ba̍bi̍lɔ̄ŋ o̍ ma̍lnu᷄ŋ mbo̍ kɔ̍ de᷅l Chūlu̍sɛ̄lɛ̄m chōo̍ a̍ sɔ̍ŋgɔ̄ɔ̍. Ndu̍yɛ̍ mbo̍ yām Chūlu̍sɛ̄lɛ̄m, mbo̍ bīī Māsāa̍ Chūlu̍sɛ̄lɛ̄m, a̍ wānāā ndūāā bɛ̍ndūa̍a̍, mbo̍ kūā a̍ nda̍ o̍ bīyɔ̄ɔ̍ ni᷄ŋ Ba̍bi̍lɔ̄ŋ.

¹³Mɛ̄ɛ̍ o̍ ku̍ɛ̄ a̍ nda̍, mbo̍ hɛ̄lī wāŋndo̍ ō pīlɛ̍ o̍ yu̍ŋgu̍ lēmāsāa̍ Chu̍dā chōo̍, mbo̍ sīīŋgu̍u̍ ndu̍ māsāa̍. Ndu̍yɛ̍, mbo̍ yīī kpe̍ma̍a̍ a̍ ndu̍, o̍ ko̍ŋ kɔ̍ɔ̍lī, mbo̍ tōsā mi̍ māsā ko̍ŋ mēna̍la̍ŋ ndu̍ po̍, māā ō tɛ̍ɛ̍mbūū kpe̍ma̍ ko̍ŋ te̍. Ndu̍yɛ̍ wānāa̍ wa̍ lɛ̄ŋndē Chu̍dāle̍ŋ chīla̍ŋ nda̍ kpo̍u̍, nda̍ o̍ ku̍ɛ̄ o̍ bīyɔ̄ɔ̍ ni᷄ŋ ni̍,

¹⁴kāni̍ fo̍ndōle̍, ndu̍ o̍o̍ ye̍e̍ma̍ mī lɛ̄ŋndē Chu̍dāle̍ŋ le̍e̍ mi̍i̍ŋgu̍ lɛ̄ mī le̍e̍ si̍m te̍. Ndu̍ o̍o̍ ye̍e̍ma̍ māā kpe̍ma̍ nda̍ yīi̍ nda̍ māsā ko̍ŋ ndo̍, māā ndu̍ o̍o̍ ta̍mbū le̍.

¹⁵Kɛ̍ mi̍ wāna̍ Māsāa̍ Ba̍bi̍lɔ̄ŋ o̍ kɛ̍si̍ ho̍ō māsāa̍ Chu̍dā, mbo̍ yīī kpe̍ma̍a̍ a̍ ndu̍ wo̍, ō yēēmā le̍ Ma̍sāa̍ Ba̍bi̍lɔ̄ŋ sīmūllo̍, mbō fūla̍ ndu̍ o̍ bā bɛ̄ŋgu̍. Mbo̍ lō o̍ ko̍ŋ mbo̍ yɔ̄ŋ wāŋnda̍ nāa̍ māsāa̍ I̍chi̍pī chu̍a̍, le̍ mbō yɔ᷄ŋ ndu̍ su̍a̍ā chɔ̄ūwa̍, a̍ so̍vɛ̄i̍ya̍ ta̍u̍ ta̍u̍ le̍ sɔ̍ŋgɔ̄ɔ̍ a̍ māsāa̍ Ba̍bi̍lɔ̄ŋ. Wāŋnda̍ I̍sɔ̄lūɛ̄ī, lā nɔ̄ o̍ kɔ̄l māsāa̍ Chu̍dā o̍ nɔ̍lā mbō tīu̍ su̍ɛ̍i̍ wa̍ā le̍nde̍ ba̍? Tē wāŋndo̍ tōsa̍ sūɛ̍i̍ wa̍ā nu̍a̍ā pɛ̍, ō nɔ̄lā pa̍ mbō hɛ̄lu᷄ŋ? Ō nɔ̄lā mbō tɛ̄ɛ̄mbu̍u̍ kpe̍ma̍ nda̍ yīi̍yo̍, mbō hɛ̄lu᷄ŋ?”

¹⁶Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, Māsāa̍ Chu̍dā o̍ cho̍ lō o̍ bīyɔ̄ɔ̍ ni᷄ŋ Ba̍bi̍lɔ̄ŋ mbō vī, kāni̍ fo̍ndōle̍, le̍ mɛ̄ɛ̍ o̍ tɛ̍ɛ̍mbu̍u̍ kpe̍ma̍ nda̍ yīi̍ nda̍ wāna̍ si̍i̍ŋgu̍ ndu̍ māsāa̍ wo̍ yɛ̍, le̍ mɛ̄ɛ̍ o̍ fa̍ŋa̍ŋ o̍ sēndi̍ o̍ me̍na̍ŋ o̍ kpe̍ma̍ ko̍ŋ yīīyo̍ ni᷄ŋ ndo̍ chōo̍ yɛ̍.

¹⁷Bōōndi̍i̍ wāŋnda̍ Ba̍bi̍lɔ̄ŋ a̍ cho̍ lākɔ̄ Chūlu̍sɛ̄lɛ̄m bālɔ̄ɔ̄, mā dēŋge̍la̍ pūūlōo̍ o̍ sāāsa̍ chi̍o̍o̍ hōlnɔ᷄ŋndo̍ le̍ mā kēi̍ lēcho̍ō, mā kɔ̍ tɛ̍ɛ̍mbūū yōōmūlā fa̍ŋgā ve̍, mi̍ chē bɛ̍ɛ̍ mi̍ māsāa̍ I̍chi̍pī o̍ nɔ᷅ so̍vɛ̄i̍ya̍a̍ dīāllūŋ kālāa̍ ta̍u̍ ta̍u̍ ni̍, kɛ̍ ō nɔ̍lā ni̍ŋ mbō māla̍ māsāa̍ Chu̍dā sɔ̍ŋgɔ̄ɔ̍ a̍ wāŋnda̍ Ba̍bi̍lɔ̄ŋ te̍.

¹⁸Māsāa̍ Chu̍dā o̍ nɔ̍lā ni̍ŋ mbō hɛ̄lu᷄ŋ te̍, kāni̍ fo̍ndōle̍, le̍ mɛ̄ɛ̍ o̍ fa̍ŋa̍ŋ o̍ sēndi̍o̍o̍ chōo̍, ndu̍yɛ̍ mbo̍ tɛ̄ɛ̄mbūū kpe̍ma̍a̍, mbo̍ mūli᷄ŋ mu᷅ŋ kpo̍u̍ to̍sāa̍ yɛ̍.”

¹⁹Mɛ̄lɛ̄ka̍ dīmi̍ āā, “Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, mɛ̄ɛ̍ mī tu̍si̍ māsāa̍ Chu̍dā nyɛ̄ pālāa̍ bɛ̄ndōo̍ chōo̍, kāni̍ fo̍ndōle̍, le̍ kpe̍ma̍ o̍ yi̍i̍ mbo̍ mēna᷄ŋ a̍ dīōlā nīla̍ŋ, kɛ̍ mbo̍ tɛ̄ɛ̄mbūū kpe̍ma̍ ko̍ŋ ndo̍.

²⁰I̍ cho̍ ndu̍ yāŋɔ̄ɔ̄le̍ŋ yēŋ nāa̍ o̍ hi̍a̍ū wa̍ mbō hāu̍. Mī bi̍ī ndu̍, mī ku̍ɛ̄ a̍ ndu̍, Ba̍bi̍lɔ̄ŋ mī kɔ̍ tu̍sī ndu̍ nyɛ̄ pālāa̍ chōo̍ lo̍ŋ, le̍ mɛ̄ɛ̍ o̍ kɛ̍ɛ̍ wāa̍ sa̍kpō a̍ ya̍ yɛ̍.

²¹So̍vɛ̄i̍ya̍a̍ ndūa̍a̍ sɔ̍ŋgā sɔ̍ŋgā bɛ̄ndōo̍ wa̍, ya̍a̍mɔ̍ɔ̍wa̍ chō nda̍ hūnɔ̄ɔ̄ dīū a̍ mɔ̄ɔ̄ŋ fāŋndo̍ŋ, o̍ ko̍ŋ kɔ̍ɔ̍lī, a̍ cho̍ lō yōōmū wa̍, ma̍ sɛ̄ŋi᷄ŋ mī wānā o̍ wānā chu̍a̍ nɛ̄i̍ ndɔ̍. O̍ ko̍ŋ, mā sīna̍ māā ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”

²²Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Ya̍ pi̍la̍ I̍ cho̍ hūnɔ̄ɔ̄ yɔ̄m si̍dāā wo̍ yōmɔ̄ɔ̄, ō le̍nde̍ wa᷅ ko̍ŋ o̍ bōlle̍ŋ di̍ wo̍, ndu̍yɛ̍ mī ya̍ pi̍la̍ ku̍ɛ̄ a̍ ndu̍ o̍ pēmbīī vīlɛ̄īye̍ chōo̍, mī kɔ̍ tɔ᷅l ndu̍ o̍ pēmbēi̍ bōlle̍ŋ pɔ̍.

²³O̍ pēmbīī vīlɛ̄īye̍ chōo̍ I̍sɔ̄lūɛ̄ī, ya̍ I̍ cho̍ lākɔ̄ yɔ̄mndo̍ ho̍ō tɔ̄lɔ̄ɔ̄ ni̍, mbō sōli̍ lɛ̄ūwo̍ŋ, mbō kāndu̍ kōmɔ̄ɔ̍, ndu̍yɛ̍ yɔ̄mndo̍ ho̍ō ō chō sīmnɔ᷄ŋ yɔ᷅m tɔ̍ɔ̍ma̍ bɛ̄ndū. Yōūwāā su̍u̍ o̍ su̍u̍, a̍ wā ni̍ŋ kɔ᷅la̍ŋ cha᷄lle̍ o̍ wūndu̍ma̍ ndūa̍a̍ŋ bɛ̄ŋgu̍.

²⁴Yɔ̄m o̍ yɔ᷄m cho̍ o̍ lɛ̄ŋnde̍ŋ nde̍ŋ ni᷄ŋ, ī chō sīnā māā ya̍ Mɛ̍lɛ̄ka̍ Ya̍a̍wɛ̄ɛ̄, I̍ nɔ̍lā mī mi̍ŋgi̍ yɔ̄m vīlɛ̄īyo̍ ō bīŋgī, ndu̍yɛ̍ mī mi̍ŋgi̍ yɔ̄m bīŋgīo̍o̍ ō vīlɛ̄ī. Ī chō sīna̍ māā I̍ nɔ̍lā mī to̍sa̍ mī yɔ̄m pūīyāa̍ ō vēsa̍, ndu̍yɛ̍ mī to̍sa̍ mī yɔ̄m vēsɛ̍i̍yo̍ ō pūi̍. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍, ndu̍yɛ̍ I̍ cho̍ ndi̍ tōsā.”