Read Southern Kisi Īsi̍kīāā 2 Bible Online

Īsi̍kīāā 2 - Southern Kisi bible

Īsi̍kīāā 2

¹Mbo̍ dīmī āā, “Wāna̍ chi̍o̍o̍ Īsi̍kīāā, chɔ̍ŋ mā si̍m mā tūēī nyɛ̄ ya̍ I̍ cho̍ nu̍m dīmūllo̍.”

²Mɛ̄ɛ̍ ya̍ I̍ tu̍e̍ī dīōmndo̍ ho̍ō, o̍ lēpīlɛ̍ ni᷄ŋ kpe̍ mi̍ nyi̍na̍ Mɛ̄lɛ̄ka̍a̍ tūāl la̍ kɔ̄ɔ̄lī. Mbo̍ chūā ya̍ mbo̍ sīmī ya̍. Ndu̍yɛ̍ mi̍ dīōmndo̍ hīāū lāchī a̍ sūɛ̍i̍ nāa̍ ya̍ chu̍a̍.

³Mbo̍ dīmūl la̍ āā, “Wāna̍ chi̍o̍o̍ Īsi̍kīāā, I̍ cho̍ nu̍m vīōmɔ̄ɔ̍ nāa̍ wāŋnda̍ I̍sɔ̄lūɛ̄ī chu̍a̍. Wāŋnda̍ I̍sɔ̄lūɛ̄ī a̍ sīmūl la̍ ndu̍yɛ̍ ma̍ kɛ̄ɛ̄ ya̍ dīōm. Mɛ̄ɛ̍ fi̍nyāā ndāā ma̍māa̍ ā sīmu̍l la̍ sīndɛ̄ mā kɛ̄ɛ̄ nyɛ̄ ya̍ I̍ di̍mu̍l nda̍ wo̍ tōsāa̍ yɛ̍, le̍nde̍ ko̍ni̍ nda̍ bɛ̍ɛ̍ nda̍ sīmu̍l la̍ ni̍, ndu̍yɛ̍ mɛ̄ɛ̍ na̍a̍ ŋ̄ sūāā nu̍a̍ā yɛ̍ bɛ̍ɛ̍ ā chō wɔ̄ ya̍ ā sīmūlāā.

⁴Wāŋnda̍ ha̍ā, wānāā bōlīī kālāa̍ nda̍ chō ni̍, ā cho̍ wa̍nāa̍ tu̍e̍ī ya̍ dīōm te̍. Le̍la̍ŋ ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ cho̍ nu̍m hɛ̄līo̍o̍ mi̍ wa᷅ nu̍m vīōmɔ̄ɔ̍ nāa̍ nda̍ chūā, mā kɔ̍ di̍mūl nda̍ nyɛ̄ o̍ nyɛ̄ ya̍ I̍ cho̍ nu̍m dɔ̄wɔ̄ɔ̄ o̍ sōndō.

⁵Wāŋnda̍ ha̍ā ā sīmūl la̍, ma̍ kɛ̄ɛ̄ ya̍ dīōm. Le̍la̍ŋ kɔ̍ mā kɔ̍ di̍mūl nda̍ nyɛ̄ ya̍ I̍ cho̍ nu̍m dɔ̄wɔ̄ɔ̄ o̍ sōndō le̍ nda̍ dīmūl lo̍ wo̍. Ā ya᷄ŋ nu̍m lānī ā ya᷅ŋ nu̍m lānī le̍ nūm di̍mu̍l nda̍ su̍e̍e̍, ā chō sīnā māā wāna̍ su̍a̍ā le̍ Mɛ̍lɛ̄ka̍ wo̍ ō chō nda̍ tɛ̄ɛ̄ŋ.

⁶“Le̍la̍ŋ nūm wāna̍ chi̍o̍o̍ Īsi̍kīāā, sīōōŋīī bi̍ī nu̍m te̍. I̍ si̍nā māā kɔ̍ bɛ̍ɛ̍ mā kɔ̍ so̍ō nāa̍ nda̍ chūā, ā cho̍ nu̍m lānī yāŋɔ̄ɔ̄ le̍. Yɔ᷅ŋ īsīōōŋ le̍ dīōmndā nda̍ chō nu̍m wā dīmūllo̍ la̍ŋ te̍. Ā wā ni̍ŋ ma̍wa̍ā nda̍ tɛ̄ɛ̄ŋ mɛ̄ɛ̍ wāŋndo̍ ō lu̍ɛ̍ī nu̍a̍ā o̍ yōndō ŋ̄yɔ̄ bɛ̄ndōo̍ ni᷄ŋ, ndu̍yɛ̍ mbō wa᷄ ŋge̍e̍ma̍a̍ tɛ̄ɛ̄ŋ yɛ̍. Sīōōŋīī bi̍ī nu̍m le̍ dīōmndā nda̍ wā ni̍ŋ nu̍m dīmūllo̍ la̍ŋ, ɔ̄ɔ̄ mɛ̄ɛ̍ nda̍ wā nu̍m ni̍ŋ to̍fāa̍ yɛ̍ le̍, kāni̍ fo̍ndōle̍, wāna̍ si̍mu̍l la̍ wa̍ nda̍ chō ni̍.

⁷Nyɛ̄ o̍ nyɛ̄ ya̍ I̍ cho̍ nu̍m dɔ̄wɔ̄ɔ̄ o̍ so̍ndō, kɔ̍ mā kɔ̍ di̍mūl nda̍ ndu̍. I̍ si̍nā māā ā cho̍ nu̍m lānī yāŋɔ̄ɔ̄ le̍, fo̍ndōle̍ wānāa̍ si̍mu̍l la̍ wa̍ nda̍ chō ni̍. Kɛ̍ ndu̍yɛ̍ ā ya᷄ŋ nu̍m lānī, ā ya᷅ŋ nu̍m lānī le̍, nūm di̍mu̍l nda̍ su̍e̍e̍.

⁸“Wāna̍ chi̍o̍o̍ Īsi̍kīāā, ya̍ŋ ya̍ nīla̍ŋ nyɛ̄ kɛ̄ndɛ̄ kɛ̍ndɛ̄ mā tūēī nyɛ̄ ya̍ I̍ cho̍ nu̍m dīmūllo̍. Tu̍āl wāŋnda̍ ha̍ā kɔ̄ɔ̄lī nūm bɛ̍ɛ̍ mā si̍mu̍l la̍ māā nda̍ le̍. Ka̍nya̍ so̍ndōo̍ mā dē nyɛ̄ ya̍ I̍ cho̍ nu̍m kē wo̍.”

⁹O̍ ko̍ŋ kɔ̍ɔ̍lī, mi̍ cha᷅ bāa̍ ō sīɛ̄ndīāā ya̍ o̍ hɔ̄l, mbo̍ sāā yāu̍ si̍mbūlāa̍.

¹⁰O̍ ko̍ŋ, mi̍ bā kōŋ ō tīmbī yāu̍wo̍ ho̍ō. Yāu̍wo̍ ho̍ō, ō wa̍ ō pōōnyīāā lēni᷄ŋ a̍ kɔ̄ɔ̍ kpo̍u̍. Dīōmndā kɔ̄l tāmbɛ̍i̍la̍ bɛ̄ndūla̍ŋ, a̍ dīōmndā cha᷄ŋnda̍ īmɔ̍nɛ̍ la̍ŋ, a̍ dīōmndā kpūndɛ̍la̍ŋ, la̍ŋ kpo̍so̍ŋ la̍ wa̍ lā pōōnyīāā o̍ yāu̍wo̍ ho̍ō chōo̍ ni̍.