Read Southern Kisi Īsi̍kīāā 20 Bible Online

Īsi̍kīāā 20 - Southern Kisi bible

Īsi̍kīāā 20

¹Wɔ̄sī na̍a̍ ŋ̄ chīŋa̍ wɔ̄sīla̍ŋ lā ŋɔ᷄mmɛ̍ū o̍ bīyɔ̄ɔ̍ ni᷄ŋ ndo̍, pāŋgi̍i̍ ŋu̍ɛ̍ɛ̍nu̍e̍i̍ o̍ wɔ̄sī kōŋ ni᷄ŋ mālɔ̄ tɔ̍, mi̍ wāŋ bɛ̄ndūa̍a̍ I̍sɔ̄lūɛ̄ī a̍ hu᷅ŋ nāa̍ ya̍ chu̍a̍ le̍ mī nyu̍na̍l nda̍ Mɛ̄lɛ̄ka̍ Ya̍a̍wɛ̄ɛ̍ dīōm. Ma̍ hu᷄ŋ cha᷅l la̍ lāchī.

²O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍.

³Mbo̍ dīmūl la̍ āā, “Wāna̍ chi̍o̍o̍ Īsi̍kīāā, di̍mu̍l wa᷅ŋ bɛ̄ndūa̍a̍ I̍sɔ̄lūɛ̄ī māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, dīmi̍ māā, nya̍ wāŋ bɛ̄ndūa̍a̍ I̍sɔ̄lūɛ̄ī, le̍ ya̍ dīōmndo̍ nyūnāa̍ nya̍ hīŋ ni̍? Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, I̍ chɛ᷅l mī lā nyūna̍ ya̍ dīōm te̍.”

⁴Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmūl la̍ āā, “Wāna̍ chi̍o̍o̍ Īsi̍kīāā, a̍ bɛ̍ɛ̍ndi̍a̍ŋ mā ki̍lu̍l wāŋnda̍ ha̍ā yāmɛ̍i̍ le̍ nda̍ nyɛ̄ pālāa̍ tūsīo̍o̍ chōo̍? To̍sa̍ mā sīna̍ sɔ̄ɔ̍ŋ wɔ̍ɔ̍ŋ ya̍ Mɛ̍lɛ̍ka̍ tu᷄l yɛ̄le̍ŋ mi̍ fi̍nyāā ndāā ma̍māa̍ ā tōsā mu̍ŋ ndo̍ŋ.

⁵Di̍mu̍l nda̍ māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ nyɛ̄ ya̍ I̍ di̍mi̍ wo̍ cho̍ ho̍ō ni̍. Ya̍ hɛ̍li̍ I̍sɔ̄lūɛ̍i̍ ni̍, ndu̍yɛ̍ mi̍ me̍nāla᷄ŋ Che̍kɔ̍pū a̍ chūāūwāā ndūa̍a̍. Bōōndi̍i̍ nda̍ wa̍ I̍chi̍pī ve̍, mi̍ me̍nāla᷄ŋ nda̍, mi̍ di̍mūl nda̍ māā ya̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ wā Mɛ̄lɛ̄ka̍ ndā.

⁶A̍ te̍le̍ŋ ko̍ŋ ya̍ I̍ chu̍e̍l nda̍ būŋgɛ̄i̍ ni̍, māā I̍ cho̍ nda̍ sōlī o̍ lɛ̄ŋndē lēŋ ni᷄ŋ, mī ku̍ɛ̄ a̍ nda̍ o̍ lɛ̄ŋndē kɛ̄ndɛ̄lē bɛ̄ndūlē ya̍ I̍ hɛ̍li̍ le̍ nda̍ le̍ŋ ni᷄ŋ, lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ, mi̍ lē hīāū lɛ̄ŋnde̍ kpo̍u̍ na̍ŋɔ̄ɔ̄ le̍ŋ.

⁷Mi̍ di̍mūl nda̍ māā nyɛ̄m chēle̍ŋ nda̍ wa̍ sōōlūūwo̍ māā mɛ̄lɛ̄ka̍ā ndā, mi̍ ya̍ Mɛ̍lɛ̄ka̍ tūl mu̍ŋ yɛ̄le̍ŋ ndo̍ŋ, māā wānā o̍ wānā ā sōli̍ mu̍ŋ nda̍ tɛ̄ɛ̄ŋ, mā chīi̍ a̍ mu̍ŋ. Mi̍ di̍mūl nda̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, Mɛ̄lɛ̄ka̍ ndāa̍, māā ā tu̍āl nyɛ̄m wāŋnda̍ I̍chi̍pī a̍ wa̍ sōōlūūwo̍ māā mɛ̄lɛ̄ka̍ā ndā wo̍ŋ kɔ̄ɔ̄lī, mā sīīŋgu̍u̍ nda̍ pi̍la̍ ā nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l te̍.

⁸Kɛ̍ ma̍ sīmūl la̍, ma̍ kɛ̄ɛ̄ ya̍ dīōm. Nyɛ̄m ya̍ I̍ tu̍l yɛ̄le̍ŋ ma̍ wā mu̍ŋ sōōlūūwo̍ māā mɛ̄lɛ̄ka̍ā ndā wo̍ŋ, wānā o̍ wānā chɛ̍l mā sōli̍ mu̍ŋ nda̍ tɛ̄ɛ̄ŋ te̍, kɛ̄lɛ̄ŋgāā ni᷅ŋ te̍, mā ma᷄l nyɛ̄m wāŋnda̍ I̍chi̍pī nda̍ a̍a̍ so̍o̍lūū māā mɛ̄lɛ̄ka̍ā ndā wo̍ŋ sōōlūūwo̍. O̍ ko̍ŋ, mi̍ yi̍ya᷄ŋ le̍ mī dɔ̍ɔ̍nu᷄ŋ tu̍mbe̍ a̍ nda̍, mī tu̍si̍ nda̍ nyɛ̄ pālāa̍ chōo̍ o̍ lɛ̄ŋndē I̍chi̍pi̍le̍ŋ ni᷄ŋ lo̍ŋ.

⁹Kɛ̍ mi̍ ma̍ŋgālā kɔ̄l nūu̍, I̍ tu̍si̍ lɛ̍ nda̍ nyɛ̄ pālāā chōo̍ le̍, kāni̍ fo̍ndōle̍, yɔ̄ŋi̍ kāa̍la̍ wa̍ nda̍ lā bālāā la̍ŋ la̍a̍ tɛ̍ɛ̍mbu̍u̍ di̍o̍lā nīla̍ kāsī la̍ŋ lābɛ̄ɛ̄. Ndu̍yɛ̍ ya̍ i̍i̍ chi̍i̍ ni᷅ŋ nda̍ būŋgɛ̄i̍ chūe̍l kāa̍la̍ la̍ŋ o̍ hɔ̄l, māā I̍ so̍lī ni̍ŋ nda̍ I̍chi̍pī, mī ku̍ɛ̄ a̍ nda̍ o̍ lɛ̄ŋndē ya̍ I̍ chu̍e̍l nda̍ būŋgɛ̄i̍ le̍ŋ ni᷄ŋ.

¹⁰“O̍ ko̍ŋ kɔ̍ɔ̍lī, mi̍ so̍lī nda̍ I̍chi̍pī lo̍ŋ mi̍ hu᷅ŋ a̍ nda̍ o̍ lɛ̄ŋndē po̍lte̍ŋ ni᷄ŋ.

¹¹Mi̍ chɔ᷅m nda̍ nyɛ̄ nda̍ nɔ̄ le̍ tōsāa̍ wo̍, ndu̍yɛ̍ mi̍ pɛ̍ɛ̍kū nda̍ nyɛ̄ o̍ nyɛ̄ sāwāla̍ nīla̍ŋ lā dīmi̍. Mi̍ di̍mu̍l nda̍ māā wānā o̍ wāna̍ to̍sa̍ nyɛ̄ ya̍ I̍ di̍mī wo̍ pɛ̍, ndu̍yɛ̍, mā kɛ̍si̍ sāwāla̍ nīla̍ŋ, wānā ko̍ŋ ō hīōū lāchī a̍ wāa̍ yōōmū.

¹²O̍ ko̍ŋ kɔ̍ɔ̍lī, mi̍ di̍mūl nda̍ le̍ mā kɛ̄si̍ pāa̍le̍ nīle̍ pɛ̍ŋgīāāle̍ŋ lēbɛ̄ɛ̄ māā tāāmāsi̍, le̍ chɛ̄la᷅ŋ cho̍ na̍a̍ tɛ̄ɛ̄ŋ ndo̍, lē mā sīna̍ māā ya̍ Mɛ̍lɛ̄ka̍ Ya̍a̍wɛ̄ɛ̄, māā ya̍ si̍i̍ŋgu̍u̍ nda̍ wānāā kāsī ni̍.

¹³Kɛ̍ mi̍ wāŋnda̍ I̍sɔ̄lūɛ̄ī a̍ si̍mūl la̍ o̍ po̍llo̍ ni᷄ŋ. Mi̍ di̍mūl nda̍ māā tē wānā o̍ wānā to̍sa̍ nyɛ̄ ya̍ I̍ di̍mi̍ wo̍, ndu̍yɛ̍ mā kɛ̍si̍ sāwāla̍ nīla̍ŋ, māā ā hīōū lāchī a̍ wāa̍ yōōmū, kɛ̍ ma̍ kɛ̄ɛ̄ ya̍ dīōm. Ndu̍yɛ̍ pāa̍le̍ nīle̍ pɛ̍ŋgīāāle̍ŋ bɛ̍ɛ̍, ma̍ tɛ̄ɛ̄mbūū le̍ŋ lābɛ̄ɛ̄. O̍ ko̍ŋ, mi̍ kɛ̍ɛ̍sīāā le̍ mī ya̍ i̍i̍ dɔ̍ɔ̍nu᷄ŋ tu̍mbe̍ a̍ nda̍ mī ya̍ i̍i̍ tu̍si̍ nda̍ nyɛ̄ pālāa̍ chōo̍ o̍ po̍llo̍ ni᷄ŋ lo̍ŋ, mī ya̍ i̍i̍ chi̍i̍ nda̍ kpo̍u̍.

¹⁴Kɛ̍ mi̍ ma̍ŋgālā kɔ̄l nūu̍, I̍ tu̍si̍ lɛ̍ nda̍ nyɛ̄ pālāā chōo̍ le̍, kāni̍ fo̍ndōle̍, yɔ̄ŋi̍ kāa̍la̍ wa̍ nda̍ lā bālāā la̍ŋ la̍a̍ tɛ̍ɛ̍mbu̍u̍ di̍o̍lā nīla̍ kāsī la̍ŋ lābɛ̄ɛ̄, kāa̍la̍ che᷅ mi̍ so̍lī nda̍ I̍chi̍pī la̍ŋ.

¹⁵Kɛ̍ mi̍ me̍na᷄ŋ o̍ po̍llo̍ ni᷄ŋ lo̍ŋ, māā I̍ chɛ᷅l mī wāŋnda̍ ha̍ā ā lūɛ̄ī o̍ lɛ̄ŋndē ya̍ I̍ chu̍e̍l nda̍ būŋgɛ̄i̍ le̍ŋ ni᷄ŋ te̍, le̍ŋ le̍ yɔ̍nūŋ ni̍ māā lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ, mi̍ lē hīāū lɛ̄ŋnde̍ kpo̍u̍ na̍ŋɔ̄ɔ̄ le̍ŋ.

¹⁶Le̍ sa̍bū ya̍ I̍ me̍na̍ŋ ko̍ŋ ndo̍ cho̍ ni̍, māā le̍ mɛ̄ɛ̍ nda̍ kɛ̄ɛ̍ nyɛ̄ ya̍ I̍ di̍mu̍l nda̍ wo̍ tōsāa̍, ma̍ tɛ̄ɛ̄mbūū sāwāla̍ nīla̍ŋ, ndu̍yɛ̍ ma̍ tɛ̄ɛ̄mbūū pāa̍le̍ nīle̍ pɛ̍ŋgīāāle̍ŋ lābɛ̄ɛ̄ yɛ̍. Ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍, yɔ̄ŋi̍ nda̍ sōōlu̍u̍ ya̍.

¹⁷“Kɛ̍, mi̍ tu̍i̍i̍nu᷄ŋ nda̍ īnyīɛ̍ɛ̍, I̍ tɛ̍ɛ̍mbu̍u̍ nda̍, ɔ̄ɔ̄ mī chi̍i̍ nda̍ kpo̍u̍ o̍ po̍llo̍ ni᷄ŋ te̍.

¹⁸O̍ ko̍ŋ kɔ̍ɔ̍lī, mi̍ di̍mūl chūāūwāā ndāa̍ o̍ po̍llo̍ ni᷄ŋ lo̍ŋ a̍a̍, ‘Lā tu̍āl ka̍ālā fi̍nyāā nyāa̍ kɔ̄ɔ̄lī, ɔ̄ɔ̄ mī lā chūa̍ sāwāla̍ ndāla̍ŋ te̍. Lā so̍o̍lūū nyɛ̄m fi̍nyāā nyāa̍ nda̍ a̍a̍ so̍o̍lūū wo̍ŋ, mī lā sīmnu᷄ŋ a̍ nɔ̍ɔ̍lɛ̍i̍ ya̍ o̍ hɔ̄l te̍.

¹⁹Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ cho̍ Mɛ̄lɛ̄ka̍ nyāa̍ ni̍. Lā tōsa̍ nyɛ᷅ o̍ nyɛ̄ ya̍ I̍ di̍mu̍l nya̍, ndu̍yɛ̍ mī lā chūa̍ sāwāla̍ nīla̍ŋ.

²⁰Lā kɛ̄si̍ pa̍a̍le̍ nīle̍ pɛ̍ŋgīāāle̍ŋ lēbɛ̄ɛ̄, le̍ wāa̍ māā tāāmāsi̍ le̍ chɛ̄la᷅ŋ cho̍ na̍a̍ tɛ̄ɛ̄ŋ ndo̍, le̍ mī lā sīna̍ māā ya̍ Mɛ̍lɛ̄ka̍ Ya̍a̍wɛ̄ɛ̄, ya̍ cho̍ Mɛ̄lɛ̄ka̍ nyāa̍ ni̍.’

²¹“Kɛ̍ chūāā ndāā ka̍ŋ, nda̍ bɛ̍ɛ̍ ma̍ bīī ma̍ sīmūl la̍. Mi̍ di̍mūl nda̍ māā tē wānā o̍ wānā to̍sa̍ nyɛ̄ ya̍ I̍ di̍mi̍ wo̍ pɛ̍, ndu̍yɛ̍ mā kɛ̍si̍ sāwāla̍ nīla̍ŋ, māā ā hīōū lāchī a̍ wāa̍ yōōmū, kɛ̍ ma̍ kɛ̄ɛ̄ ya̍ dīōm. Ndu̍yɛ̍ pāa̍le̍ nīle̍ pɛ̍ŋgīāāle̍ŋ bɛ̍ɛ̍, ma̍ tɛ̄ɛ̄mbūū le̍ŋ lābɛ̄ɛ̄. O̍ ko̍ŋ, mi̍ kɛ̍ɛ̍sīāā le̍ mī ya̍ i̍i̍ dɔ̍ɔ̍nu᷄ŋ tu̍mbe̍ a̍ nda̍, mī ya̍ i̍i̍ tu̍si̍ nda̍ nyɛ̄ pālāa̍ chōo̍ o̍ po̍llo̍ ni᷄ŋ lo̍ŋ.

²²Kɛ̍ mi̍ ma̍ŋgālā kɔ̄l nūu̍, I̍ tu̍si̍ lɛ̍ nda̍ nyɛ̄ pālāā chōo̍ le̍. Kāni̍ fo̍ndōle̍, yɔ̄ŋi̍ kāa̍la̍ wa̍ nda̍ lā bālāā la̍ŋ la̍a̍ tɛ̍ɛ̍mbu̍u̍ di̍o̍lā nīla̍ kāsī la̍ŋ lābɛ̄ɛ̄, kāa̍la̍ che᷅ mi̍ so̍lī nda̍ I̍chi̍pī la̍ŋ.

²³O̍ ko̍ŋ kɔ̍ɔ̍lī, mi̍ me̍na᷄ŋ vɛ̍lɛ̄ o̍ po̍llo̍ ni᷄ŋ lo̍ŋ, māā, mɛ̄ɛ̍ mī to̍sa̍ mī ya̍a̍mɔ̍ɔ̍wa̍ hu᷄ŋ sɛ̍ŋi᷄ŋ a̍ wāŋnda̍ I̍sɔ̄lūɛ̄ī o̍ kāa̍la̍ŋ ni᷄ŋ, mī to̍sa̍ mī I̍sɔ̄lūɛ̍i̍ya̍ tīu̍ o̍ lɛ̄ŋnde̍ ni᷄ŋ kpo̍u̍.

²⁴Le̍ sa̍bū ya̍ I̍ me̍na̍ŋ ko̍ŋ ndo̍ cho̍ ni̍, māā le̍ mɛ̄ɛ̍ nda̍ kɛ̄ɛ̍ nyɛ̄ ya̍ I̍ di̍mu̍l nda̍ wo̍ tōsāa̍, ma̍ tɛ̄ɛ̄mbūū sāwāla̍ nīla̍ŋ, ndu̍yɛ̍ ma̍ tɛ̄ɛ̄mbūū pāa̍le̍ nīle̍ pɛ̍ŋgīāāle̍ŋ lābɛ̄ɛ̄ yɛ̍. Ma̍ mūli᷄ŋ nyɛ᷅m chēle̍ŋ fi̍nyāā ndāa̍ nda̍ a̍a̍ so̍o̍lūū wo̍ŋ sōōlūūwo̍.

²⁵“Ndu̍yɛ̍ ō fūla̍ o̍ ko̍ŋ kɔ̍ɔ̍lī, mi̍ ke᷅ nda̍ sāwāla̍ bɛ̍nda̍ le̍ la̍ŋ, ndu̍yɛ̍ mi̍ di̍mūl nda̍ nyɛ̄ nda̍ tōsā mā sɔ̄la̍ dɛ̍nɛ̍ pa̍lāa̍, ā hi̍ū la̍chi̍ a̍ wāa̍ yōōmū le̍ wo̍.

²⁶Mi̍ to̍sā ma̍ lūām chūāūwāā ndāā ta̍sīa̍a̍ sa̍lāla̍ŋ, o̍ ko̍ŋ, ma̍ sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Le̍ sa̍bū ya̍ I̍ to̍sa̍ he̍ī yo̍ cho̍ ni̍, māā le̍ mī ya̍ i̍i̍ tɛ̍ɛ̍mbu̍u̍ nda̍, ndu̍yɛ̍ mī to̍sa̍ mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

²⁷“Le̍la̍ŋ, wānā chi̍o̍o̍ Īsi̍kīāā, so̍o̍ nāa̍ wāŋnda̍ I̍sɔ̄lūɛ̄ī chu̍a̍ mā di̍mu̍l nda̍ māā, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyɛ̄ ya̍ I̍ di̍mi̍ wo̍ cho̍ ho̍ō ni̍. Wāŋnda̍ I̍sɔ̄lūɛ̄ī, fi̍nyāā nyāā ma̍māa̍ ā ve᷄ sa̍kpō ya̍ Mɛ̍lɛ̄ka̍ o̍ hɔ̄l te̍, ndu̍yɛ̍ o̍ he̍ī ni᷄ŋ, ma̍ dātā ya̍.

²⁸Ya̍ hi᷅ŋ a̍ nda̍ o̍ lɛ̄ŋndē ya̍ I̍ chu̍e̍l nda̍ būŋgɛ̄i̍ le̍ŋ ni᷄ŋ ni̍. Mɛ̄ɛ̍ nda̍ chē pēmbo᷄ŋ, a̍ yɔ̄mīī pūīyɛ̄i̍, ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ lo̍ŋ, mā sōlī sa̍lāla̍ŋ o̍ nyɛ̄m mu᷅ŋ, mā lūām nyɛ᷅m chūŋ kɛ̄ndɔ᷄ŋ o̍ mu̍ŋ, le̍ mā nɛ̄ŋi̍ mu̍ŋ kɔ̄l, ndu̍yɛ̍ mā tālā mu̍ɛ̍īmā mākīle̍pīi̍ya̍ŋ lɛ̄ŋ māā sa̍lā.

²⁹Mi̍ nyu̍nā nda̍ a̍a̍, ‘Le̍ yɛ̄ɛ̍nɛ̍ nya̍ chō yɛ̄ kɔ̄la̍ŋ o̍ fo̍ndāŋndā lāsōōlu̍u̍ la̍ŋ?’ Mɛ̄ɛ̍ nyɛ̄ ko̍ŋ to̍sa̍ ni̍, mi̍ wāŋnda̍ kē fo̍ndāŋ kōŋ dīōla̍ŋ āā, ‘Ba̍a̍mā.’[1]

³⁰Le̍la̍ŋ, di̍mu̍l wa᷅ŋnda̍ I̍sɔ̄lūɛ̄ī, māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ nyɛ̄ ya̍ I̍ di̍mi̍ wo̍ cho̍ ho̍ō ni̍. Wāŋnda̍ I̍sɔ̄lūɛ̄ī, vɛ᷅ mi̍ lā tūāl ka̍ālā fi̍nyāā nyāā ma̍māa̍ kɔ̄ɔ̄lī, nya̍ bɛ̍ɛ̍ mi̍ lā mūli᷄ŋ nyɛ᷅m ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ sōōlūūwo̍, mi̍ lā sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l?

³¹Pāa̍le̍ hāūle᷅ŋ bɛ̍ɛ̍, lā chō hīōūwɔ̄ɔ̍ lāchī a̍ nyɛ̄m chēle̍ŋndo̍ŋ sōōlūūwo̍, mī lā lūām chūāūwāā nyāa̍ sa̍lāla̍ŋ o̍ nyɛ̄m mu᷅ŋ, o̍ ko̍ŋ, mi̍ lā sīīŋgūū nya̍ pi̍la̍ ā nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l. Kɛ̍ a̍ ko̍ŋ kpo̍u̍, mī lā hūŋ ya̍ dīōmndo̍ nyūnāa̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, I̍ chɛ᷅l mī lā nyūna̍ ya̍ dīōm le̍ nyɛ̄ o̍ nyɛ̄ le̍.

³²Wāŋnda̍ I̍sɔ̄lūɛ̄ī, nyɛ̄ nya̍ yīya̍ŋ o̍ kɔ̄ltā nyāla̍ŋ ni᷄ŋ ndo̍ ō yɔ̍nūŋ te̍. Yīya᷄ŋ nyāa̍ cho̍ ni̍ māā nya̍ bɛ̍ɛ̍ mī lā wa̍ mɛ̄ɛ̍ lɛ̄ŋīī chēle̍ŋnde̍ ī chō yɛ̍, mī lā wa᷄ mɛ̄ɛ̍ kāa̍la̍ŋ o̍ lɛ̄ŋnde̍ ni᷄ŋ la̍ cho̍ yɛ̍, mī lā wa᷄ yɔ̄mnde̍ a̍ pōūta̍ŋ sōōlūūwo̍ māā mɛ̄lɛ̄ka̍ā nyā.”

³³Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, I̍ cho̍ hūnɔ̄ɔ̄ tu̍mbe̍ dɔ̍ɔ̍nɔ᷄ŋ o̍ ka̍lā ka̍lā, ndu̍yɛ̍ mī chɔ̍m nya̍ māā wāna̍ kpāāyā bɛ̍ndōo̍ ya̍ I̍ cho̍ ni̍. I̍ cho̍ hūnɔ̄ɔ̄ tōsā a̍ kpāāya̍ ni̍ bɛ̍ndōo̍, nya̍ kpo̍u̍ mī wa̍ nya̍ māsāa̍ chōo̍.

³⁴I̍ cho̍ nya̍ hūnɔ̄ɔ̄ sōlī wāŋnda̍ tɛ̄ɛ̄ŋ, nāa̍ nya̍ chō ā sɛ̄ŋīa̍ŋ o̍ lɛ̄ŋīī yɛ̍ yɛ̍i̍ ni᷄ŋ nda̍, mī chu̍u̍ŋgi̍a̍a̍ nya̍ nāa̍ pi᷅lɛ̍. I̍ cho̍ tu̍mbe̍ dɔ̍ɔ̍nɔ᷄ŋ o̍ ka̍lā ka̍lā, mī chɔ̍m nya̍ māā ya̍ Mɛ̍lɛ̄ka̍, wāna̍ kpāāyā bɛ̍ndōo̍ ya̍ I̍ cho̍ ni̍.

³⁵I̍ cho̍ hūnɔ̄ɔ̄ a̍ nya̍ o̍ lɛ̄ŋndē po̍lte̍ cho̍ kāa̍la̍ŋ tɛ̄ɛ̄ŋ nde̍ŋ ni᷄ŋ. Lo̍ŋ ya̍ I̍ cho̍ nya̍ hūnɔ̄ɔ̄ yāmɛ̍i̍ kīlūl nya̍ pi̍la̍ o̍ hɔ̄l kpe̍nde̍ke̍le̍ ni̍, le̍ nya̍ nyɛ̄ pālāa̍ tūsīo̍o̍ chōo̍.

³⁶Mɛ̄ɛ̍ ya̍ I̍ ki̍lu̍l fi̍nyāā nyāā ma̍māa̍ sīndɛ̄ yāmɛ̍i̍ o̍ po̍llo̍ ni᷄ŋ, o̍ lɛ̄ŋndē I̍chi̍pīle̍ŋ ni᷄ŋ, mi̍ tu̍sī nda̍ nyɛ̄ pālāa̍ chōo̍ yɛ̍, le̍nde̍ ya̍ I̍ ki̍lūl ni̍ŋ nya̍ yāmɛ̍i̍ ni̍, mī tu̍si̍ nya̍ nyɛ̄ pālāā bɛ̄ndōo̍ chōo̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍ cho̍ ko̍ŋ ni̍.

³⁷Mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “I̍ cho̍ tōsā mī lā mānda̍ kpe̍ma̍ cho̍ na̍a̍ tɛ̄ɛ̄ŋ ndo̍. Ndu̍yɛ̍ I̍ cho̍ nya̍ pīɔ̄ū tɛ̄ɛ̄ŋ, wānāā tōnya̍a̍ a̍ wānāā dɛ̍nɛ̍ wɔ̍ɔ̍ŋnda̍, mɛ̄ɛ̍ wānā ma̍ndāā lāsāa̍ ō pīɔ̄ū nu̍a̍ā sāa̍ ndūa̍a̍ yɛ̍.

³⁸Wānā o̍ wāna̍ si̍mūl la̍, ndu̍yɛ̍, a̍ wānāā dɛ̍nɛ̍ wɔ̍ɔ̍ŋnda̍ ki̍nɛ̍i̍, I̍ cho̍ hūnɔ̄ɔ̄ chīī a̍ nda̍ mī so̍li̍ nda̍ nya̍ tɛ̄ɛ̄ŋ kpo̍u̍. I̍ cho̍ nda̍ sōlī o̍ lɛ̄ŋīī nda̍ chō ni᷄ŋ nde̍, kɛ̍ ndu̍yɛ̍ ā mi̍i̍ŋgū lɛ̍ ni̍ŋ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ te̍. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

³⁹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Le̍la̍ŋ nya̍ wāŋnda̍ I̍sɔ̄lūɛ̄ī, mɛ̄ɛ̍ nya̍ kɛ̄ɛ̍ ya̍ dīōm yɛ̍, lā hīo̍u̍ la̍chi̍ a̍ nyɛ̄m chēle̍ŋndo̍ŋ sōōlūūwo̍ māā mɛ̄lɛ̄ka̍ā nya̍. Kɛ̍ ndu̍yɛ̍ te̍le̍ŋ cho̍ fūūlūū, lā hi̍ū lɛ̍ ni̍ŋ la̍chi̍ a̍ nyɛ̄m mu᷅ŋ sōōlūūwo̍, mī lā sōlī sa̍lāla̍ŋ o̍ mu̍ŋ, mī lā tɛ̄ɛ̄mbūū di̍o̍lā nīla̍ kāsī la̍ŋ lābɛ̄ɛ̄ le̍.

⁴⁰Tē te̍le̍ŋ ko̍ŋ fūūlu̍u̍ pɛ̍, nya̍ I̍sɔ̄lūɛ̍i̍ya̍ kpo̍u̍ o̍ pēmbīī nīi̍ kāsīe̍i̍ chōo̍, pēmbīī vīlɛ̄īye̍ I̍sɔ̄lūɛ̄ī, lo̍ŋ nya̍ wā ni̍ŋ kɔ᷅la̍ŋ ya̍ sōōlūūwo̍ ni̍, mī lā sāāŋgi̍a̍l la̍. Ya̍ Mɛ̍lɛ̄ka̍, I̍ hi̍nī ni̍ŋ kɔ᷅l a̍ nya̍, ndu̍yɛ̍ mī bi̍ī sa̍lālā nya̍la̍ŋ. Lo̍ŋ ya̍ I̍ ye̍e̍mā ni̍ŋ nya̍ ni̍ mī lā wa̍ sa̍lāla̍ŋ sōlīo̍o̍ o̍ ya̍lo̍, ndu̍yɛ̍ mī lā yɔ̄ŋgū ke̍lā nyāla̍ kɛ̍ndɛ̄ kɛ̍ndɛ̍ la̍ŋ, ndu̍yɛ̍ a̍ sa̍lālā kāsīla̍ŋ.

⁴¹Le̍la̍ŋ, bā o̍ bā nya̍ chō ā sɛ̄ŋīa̍ŋnda̍ o̍ lɛ̄ŋnde̍ ni᷄ŋ, I̍ cho̍ nya̍ hūnɔ̄ɔ̄ chūūŋgīāā kpo̍u̍ na̍a̍ pi᷅lɛ̍ mī mi̍ŋgi̍ nya̍ o̍ lɛ̄ŋndē nyāle̍ŋ ni᷄ŋ. I̍ hi̍nī ni̍ŋ kɔ᷅l a̍ nya̍ mɛ̄ɛ̍ nda̍ sōlī nu̍a̍ā sa̍lālā lūāmāā la̍ŋ o̍ ya̍lo̍, mī hi̍ni̍ kɔ̄l a̍ la̍ŋ yɛ̍. Ndu̍yɛ̍ I̍ to̍sā ni̍ŋ mī wāŋnda̍ o̍ lɛ̄ŋnde̍ ni᷄ŋ a̍ si̍na̍ māā Mɛ̄lɛ̄ka̍ kāsīo̍o̍ ya̍ I̍ cho̍ ni̍.

⁴²I̍ cho̍ nya̍ sōlī nāa̍ nya̍ chō wa̍, mī mi̍ŋgi̍ nya̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, lɛ̄ŋndē ya̍ I̍ chu̍e̍l sīndɛ̄ fi̍nyāā nyāā ma̍māa̍ būŋgɛ̄i̍ le̍ nda̍ kīo̍o̍ le̍ŋ. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁴³O̍ ko̍ŋ, nya̍ pi̍la̍ chō hūnɔ̄ɔ̄ īchāli̍ mī lōōnu̍ŋ ku̍ɛ̍ɛ̍la̍ nyāla̍ŋ, a̍ nyɛ̄ o̍ nyɛ̄ nya̍ tōsa̍, mi̍ lā sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Sɔ̄ɔ̍ŋ dɛ̍nɛ̍ wɔ̍ɔ̍ŋ nya̍ tōsa̍ ki̍nɛ̍i̍ yo̍ŋ, lā chō hūnɔ̄ɔ̄ yīya᷄ŋ a̍ mu̍ŋ, mī kɔ̄lta̍ŋ lā tāmbu̍ nya̍.

⁴⁴Wāŋnda̍ I̍sɔ̄lūɛ̄ī, le̍ mī dīōlā nīla̍ŋ lā sɔ̄la̍ bɛ̄ɛ̄le̍ŋ, I̍ cho̍ nya̍ bīyɔ̄ɔ̄ mɛ̄ɛ̍ nya̍ chō wānāā dɛ̍nɛ̍ wɔ̍ɔ̍ŋ, mi̍ lā wā wānāā lāka̍fā yɛ̍ le̍. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̍ ni̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ wo̍ cho̍ ko̍ŋ ni̍.

⁴⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

⁴⁶Mbo̍ dīmūl la̍ āā, “Wāna̍ chi̍o̍o̍ Īsi̍kīāā, mu̍li̍ hɔ᷅lla̍ kūmbū bā tōūwo̍, mā sōō a̍ bā tōūwo̍ o̍kɔ̄ɔ̄, ndu̍yɛ̍ mā di̍mu̍l būndɛ̍ cho̍ bā tōūwo̍ wo̍ a̍ nyɛ̄ pālāa̍ ko̍māl ni̍ŋ ndu̍ wo̍ o̍kɔ̄ɔ̄.

⁴⁷Di̍mu̍l bu̍ndɔ̍ɔ̍ ho̍ō māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ nyɛ̄ ya̍ I̍ di̍mi̍ wo̍ cho̍ ho̍ō ni̍. Nūm būndɔ̍ɔ̍ ho̍ō, ya̍ŋ ni᷅la̍ŋ mā tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍. I̍ cho̍ nu̍m mālɔ̄ɔ̄ o̍ yīŋ, ndu̍yɛ̍ yɔ̄m o̍ yɔ̍m cho̍ o̍ nūm ni̍ŋ, yɔ̄m pūīyāā ni̍, yɔ̄m vēsɛ̍i̍ ni̍, mī yīŋnde̍ŋ lē bāsu̍ ndi̍ tɛ̍ɛ̍. Yīŋndē bɛ̄ndūlē wānā nɔ̍lā nyu̍mī le̍ le̍ŋ, lē wā ni̍ŋ sa̍nde̍i̍, mī lē tɛ̄ɛ̄mbu̍u̍ nyɛ̄ o̍ nyɛ̄, chɔ̍ŋ ba᷅ tōūwo̍ ha̍a̍a̍ kɔ̍ ba᷅ lūāŋndo̍.

⁴⁸Wāŋnda̍ chi̍e̍ēŋndo̍ kpo̍u̍ ā chō hūnɔ̄ɔ̄ sīnā māā ya̍ Mɛ̍lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ ma̍l nu̍m o̍ yīŋ ni̍. Ndu̍yɛ̍ tē a̍ hu̍ŋ sa̍ā o̍ yīŋ pɛ̍, wānā o̍ wānā nɔ̍lā ni̍ŋ mbō nyūmi̍ nu̍m te̍.”

⁴⁹Mɛ̄ɛ̍ Mɛ̄lɛ̄ka̍ chīi̍ ya̍ dīōmnda̍ŋ nda᷅ŋ dīmūl, mi̍ ŋɔ̍ɔ̍chīa̍ŋ nāa̍ ndu̍ chu̍a̍ mi̍ di̍mūl ndu̍ a̍a̍, “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, wāŋnda̍ ā chō ni᷅ŋ dīmīo̍o̍ māā, yōōŋgūlā ya̍ I̍ di̍mī ki̍nɛ̍i̍ la̍ŋ, māā o̍ tāle̍la̍ŋ ni᷄ŋ ya̍ I̍ di̍mī la̍ŋ ni̍.”