Read Southern Kisi Īsi̍kīāā 22 Bible Online

Īsi̍kīāā 22 - Southern Kisi bible

Īsi̍kīāā 22

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, a̍ bɛ̍ɛ̍ndi̍a̍ŋ le̍ mā ki̍lu̍l Chūlu̍sɛ̄lɛ̄m, chi̍e̍e̍ cho̍ ho̍ō ō pīāā a̍ wānāā dīyāā ŋ̄wāŋndā chīe̍e̍ya̍ wo̍ yāmɛ̍i̍ le̍ ndu̍ nyɛ̄ pālāa̍ tūsīo̍o̍ chōo̍? Chɔ̍m Chūlu̍sɛ̄lɛ̄m sɔ̄ɔ̍ŋ wɔ̍ɔ̍ŋ o̍ to̍sa̍ ki̍nɛ̍i̍ yo̍ŋ, sɔ̄ɔ̍ŋ ya̍ Mɛ̍lɛ̄ka̍ tu᷄l yɛ̄le̍ŋ tūl bɛ̄ndōo̍ wo̍ŋ.

³Di̍mu̍l chi̍o̍o̍ ho̍ō māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, di̍mi̍ ma̍a̍, Chūlu̍sɛ̄lɛ̄m, nūm chi̍e̍e̍ di̍u̍ ho̍ō wāŋndā chīe̍e̍ya̍ dīū bɛ̄ndōo̍, ma̍ tōsā mi̍ nyɛ̄m chēle̍ŋndo̍ŋ sōōlūūwo̍, ŋ̄ sīīŋgūū nu̍m ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l lo̍, te̍le̍ŋ nyɛ̄ pālāā bɛ̄ndōo̍ ō tūāl nu̍m ni̍ŋ cho̍o̍ wo̍ ō chō o̍ nɛ̄ī.

⁴Ā chō ni᷅ŋ ō yāālāā le̍ nyɛ̄ pālāa̍ sɔ̄lāa̍, kāni̍ fo̍ndōle̍, le̍ wāŋndā chīe̍e̍ya̍a̍ ŋ̄ dīu̍, ndu̍yɛ̍ mi̍ nyɛ̄m ŋ̄ tōōsi̍a̍a̍ māā mɛ̄lɛ̄ka̍ā nūm ndo̍ŋ, ŋ̄ tōsā ma̍ sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l lo̍. A̍ to̍sa̍ mi̍ pāa̍le̍ nyɛ̄ pālāa̍ ō tūāl nu̍m ni̍ŋ cho̍o̍ le̍ŋ, lē wā ni᷅ŋ kpɛ̍ɛ̍lūŋ. Bōōndi̍i̍ ya̍ I̍ kɛ̍ɛ̍si̍a̍a̍ le̍ nūmnde̍ ī fūūlu̍u̍. Nyɛ̄ kōŋ ya̍ I̍ to̍sa̍ ni̍ ma̍ sīmnu᷄ŋ nyɛ᷅ māmāā lɛ̄ŋnde̍ o̍ hɔ̄l, mi̍ lɛ̄ŋnde̍ kpo̍u̍ i̍ pɛ̍ɛ̍sā nu̍m.

⁵Lɛ̄ŋīi̍ cho̍ nu̍m māchɛ̄lū ve̍ ni̍, i̍ cho̍ nu̍m lēvīl le̍ ni̍, I̍ cho̍ tōsā mī ī hu᷄ŋ ma᷅m nu̍m, mī ī chē nu̍m nyɛ̄ fo̍ndō fu̍u̍, kāni̍ fo̍ndōle̍, lā chō wānāā yɔ̄ŋ wɔ̄ɔ̍ŋ bɛ̄ndū, ndu̍yɛ̍ mi̍ chi̍e̍e̍ nyāa̍ wā o̍ pīāā a̍ kpūndɛ̍la̍ŋ.

⁶Wāŋ bɛ̄ndūāā I̍sɔ̄lūɛ̍i̍ya̍ kpo̍u̍, le̍ mɛ̄ɛ̍ nda̍ nɔ̄ kpāāyāa̍ yɛ̍, mi̍ wānā o̍ wānā o̍ si̍mnu᷄ŋ wa̍nā di̍yāā ŋ̄wāŋndā chīe̍e̍.

⁷Wānā o̍ wāna̍ cho̍ Chūlu̍sɛ̄lɛ̄m, ō nɔ̍ le̍bɛ̍ɛ̍ le̍ wānāa̍ ve̍lū ndu̍ wa̍ le̍. Wānāā lēkāa̍wa̍a̍ cho̍ nya̍ tɛ̄ɛ̄ŋ nda̍, mi̍ lā wā nda̍ ka̍fāla̍ŋ tōsāllo̍, wāŋ lāāndūāā pīāāndūāā ndāa̍ ā vī wa̍, a̍ vīi̍ya̍a̍ nɔ̍ lɛ̍ ŋ̄fi̍nyā le̍ wa̍, mi̍ lā wā nda̍ bīyɔ̄ɔ̄ wɔ̍ɔ̍ŋndo̍, mī lā tūsī nda̍ dɛ̍nɛ̍ pa̍lāa̍ chōo̍.

⁸Nyɛ̄m ni̍ŋ kāsīo̍ŋ, mi̍ lā tɛ̄ɛ̄mbūū mu̍ŋ lābɛ̄ɛ̄. Ndu̍yɛ̍, pāa̍le̍ nīle̍ pɛ̍ŋgīāāle̍ŋ bɛ̍ɛ̍, lā chɛ᷄l mī lā kɛ̄si̍ le̍ŋ lēbɛ̄ɛ̄ le̍.

⁹Wāŋnda̍ ā chō chōōla̍ŋ dīmīo̍o̍ a̍ chāāŋāā ndāa̍ o̍kɔ̄ɔ̄, le̍ mī chāāŋāā ndāā ka̍ŋ ā sɔ̄la̍ pīɔ̍mndo̍. Ndu̍yɛ̍ mi̍ nya̍ pūmnda̍ wā nyɛ̄ dīāā nda̍ sōōlūū sa̍lāla̍ŋ o̍ mɛ̄lɛ̄ka̍a̍ lo̍ wa̍ dīo̍o̍. O̍ ko̍ŋ kɔ̍ɔ̍lī, mi̍ pūa̍a̍ ā wā sɔ̄ɔ̍ŋ su̍u̍ndɛ̍i̍ wɔ̍ɔ̍ŋ bɛ̄ndūŋ ya̍ Mɛ̄lɛ̄ka̍ tu᷄l lēyɛ̄ wo̍ŋ tōsāa̍.

¹⁰Pūa̍a̍ pūm, lāāndāa̍ fi̍nyāā ndāa̍, a̍ nda̍, nda̍ kūā hi̍ni̍la̍ŋ ni̍. Ndu̍yɛ̍, mi̍ ā pūm ā wā hīni̍la̍ŋ a̍ wāŋ lāāndūa̍a̍ bōōndi̍i̍ nda̍ chā te̍le̍ŋ ndāa̍ ve̍.

¹¹Pūa̍a̍ ā pūm ā chō sɔ̄ɔ̍ŋ ya̍ Mɛ̍lɛ̍ka̍ tu᷄l yɛ̄le̍ŋ ndo̍ŋ tōsāa̍, hīni̍la̍ŋ a̍ lāāndāā chāāŋāā ndāa̍. Ndu̍yɛ̍, mi̍ ā pūm ā wā hīni̍la̍ŋ a̍ lāāndāā pūa̍a̍ ndāa̍, mi̍ ā pūm ā wā hīni̍la̍ŋ a̍ yēmāa̍ ndāa̍ fi̍nyāā pīli̍a̍a̍.

¹²Wāŋnda̍ chō wāŋnda̍ lūɛ̄īyɔ̄ɔ̄lā ni᷄ŋ nda̍ŋ bīyɔ̄ɔ̍ o̍ lābā, le̍ chāāŋāā ndāa̍ dīūwo̍. Mi̍ ā pūm ā wā chāāŋāā ndāā I̍sɔ̄lūɛ̍i̍ya̍ ka̍fāla̍ŋ tōsāllo̍, ba̍na̍sīi̍la̍ŋ nda̍ hēndūllo̍, mī nyɛ̄ sɔ̄lāa̍ kūī nda̍ chōo̍, mī nda̍ sūl le̍ni̍ŋ. O̍ ko̍ŋ mi̍ lā pūɛ̄ɛ̄nu᷄ŋ a̍ ya̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍ cho̍ ko̍ŋ ni̍.

¹³Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Le̍la̍ŋ nya̍ wāŋnda̍ I̍sɔ̄lūɛ̄ī, I̍ cho̍ tu̍mbe̍ dɔ̍ɔ̍nɔ᷄ŋ a̍ nya̍ o̍ ka̍lā ka̍lā mī tu̍u̍lu̍l nya̍ bɔ̄ta̍a̍, kāni̍ fo̍ndōle̍, le̍ ka̍fālā nya̍ chō wāŋnda̍ tōsāllo̍ mī lā sɔ̄lā tɔ̍nɔ̄la̍ŋ lēni᷄ŋ, ndu̍yɛ̍ mī lā dīū wa᷅ŋnda̍ nya̍ tɛ̄ɛ̄ŋ nda̍.

¹⁴Ndu̍yɛ̍, tē I̍ hu̍ŋ dɔ̍ɔ̍nu̍ŋ tu̍mbe̍ a̍ nya̍ pɛ̍, mī chi̍i̍ a̍ nya̍ kpo̍u̍, yōōmūa̍ŋ mā chō nya̍ fūlā po̍, kpāāyā o̍ kpāāyā lā nɔ᷅ lɛ̍ le̍. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍. Ndu̍yɛ̍, Ī chō yɔ̄nɔ᷄ŋ mɛ̄ɛ̍ ya̍ I̍ di̍mi̍ yɛ̍.

¹⁵I̍ cho̍ tōsā mā hu᷄ŋ sɛ̍ŋi᷄ŋ a̍ nya̍ o̍ lɛ̄ŋnde̍ ni᷄ŋ mī lā tīu̍ o̍ kāa̍la̍ŋ ni᷄ŋ kpo̍u̍. O̍ ko̍ŋ, sɔ̄ɔ̍ŋ nɔ̍ɔ̍lɛ̍ɛ̍ŋ nya̍ chō mu᷅ŋ tōsāa̍ wo̍ŋ, mī chi̍i̍ a̍ mu̍ŋ kpo̍u̍.

¹⁶I̍ cho̍ tōsā mā tɛ̄ɛ̄mbu̍u̍ nya̍ lābɛ̄ɛ̄ o̍ lɛ̄ŋnde̍ ni᷄ŋ. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

¹⁷O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍, mbo̍ dīmūl la̍ āā,

¹⁸“Wāna̍ chi̍o̍o̍ Īsi̍kīāā, wāŋnda̍ I̍sɔ̄lūɛ̄ī a̍ si̍mnu᷄ŋ māā chīli̍ŋi̍i̍ fo̍ndūe̍i̍, ndu̍yɛ̍ māā pōōlā īchīli̍ŋ, mɛ̄ɛ̍ nda̍ dīndī nu̍a̍ā chīli̍ŋi̍i̍ hu̍mbūe̍i̍ a̍ yīŋnde̍ŋ mī pōōlā lāŋ lā fūla̍ yɛ̍.

¹⁹Le̍la̍ŋ, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ nyɛ̄ ya̍ I̍ di̍mi̍ a̍ wāŋnda̍ Chūlu̍sɛ̄lɛ̄m o̍kɔ̄ɔ̄ wo̍ ho̍ō ni̍. Wāŋnda̍ Chūlu̍sɛ̄lɛ̄m, mi̍ chē bɛ̍ɛ̍ mi̍ lā wā māā pōōlā īchīli̍ŋ, kɛ̍ I̍ cho̍ nya̍ chūūŋgīāā kpo̍u̍, mī mi̍ŋgi̍ nya̍ Chūlu̍sɛ̄lɛ̄m kɔ᷅llo̍.

²⁰Mɛ̄ɛ̍ sūma̍a̍ te̍e̍ŋgīāā chi̍li̍ŋndo̍ŋ nda̍ ā chūūŋgīāā nu̍a̍ā ka̍ni̍ŋ hu̍mbo᷄ŋ, a̍ ka̍pāla̍ŋ, a̍ chīli̍ŋu̍ŋ yɔ̍ŋa᷄ŋ, a̍ li̍īyo̍ŋ, a̍ ti᷅ŋndo̍ŋ, mā dɔ̄ū mu̍ŋ o̍ yīŋ, mā sɛ̄ndi̍ yīŋnde̍ŋ lēbɛ̄ŋgu̍ le̍ mu̍ŋ tēēŋgīa̍a̍ yɛ̍, le̍nde̍ ya̍ I̍ du̍a̍u̍nūŋ ni̍ŋ tu̍mbe̍ a̍ nya̍ o̍ ka̍lā ka̍lā ni̍, mī chu̍u̍ŋgi̍a̍a̍ nya̍ mī dɔ̍ū nya̍ o̍ yīŋ, mī te̍e̍ŋgi̍a̍a̍ nya̍.

²¹I̍ cho̍ nya̍ chūūŋgīāā nāa̍ pi᷅lɛ̍ kpo̍u̍, mī dɔ̍ū nya̍ o̍ yīŋ, mī sɛ̍ndi̍ yīŋndē nīle̍ tu̍mbe̍le̍ŋ, mī lā tēŋga̍ lo̍ŋ.

²²Lā chō tēŋgā o̍ yīŋ, mɛ̄ɛ̍ wānāa̍ te̍e̍ŋgīāā chi̍li̍ŋndo̍ŋ nda̍ ā tēēŋgīāā nu̍a̍ā ka̍ni̍i̍ hu̍mbūe̍i̍ yɛ̍. O̍ ko̍ŋ, mī lā sīna̍ māā ya̍ Mɛ̍lɛ̄ka̍ Ya̍a̍wɛ̄ɛ̄, ya̍ dɔ̍ɔ̍nu᷄ŋ tu̍mbe̍ a̍ nya̍ ni̍ mi̍ tu̍sī nya̍ nyɛ̄ pālāa̍ chōo̍.”

²³O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²⁴Mbo̍ dīmūl la̍ āā, “Wāna̍ chi̍o̍o̍ Īsi̍kīāā, di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍, I̍ di̍mi̍ ma̍a̍, wāŋnda̍ I̍sɔ̄lūɛ̄ī, lɛ̄ŋndē nyāle̍ŋ lē cho̍ le̍ di̍a̍ndāā le̍, le̍la̍ŋ I̍ dɔ̍ɔ̍nu᷄ŋ tu̍mbe̍ a̍ nya̍ o̍ ka̍lā ka̍lā, ndu̍yɛ̍ I̍ cho̍ nya̍ nyɛ̄ pālāa̍ tūsī chōo̍, pīɔ̄ɔ̄ o̍ pīɔ̄ɔ̄ se᷅ ni̍ŋ o̍ lɛ̄ŋndē nyāle̍ŋ ni᷄ŋ te̍.

²⁵Wāŋ bɛ̄ndūāā I̍sɔ̄lūɛ̍i̍ya̍ a̍ cho̍ māchūāā mɛ̄ɛ̍ kpɔ̍kūŋndo̍ ō dēl nu̍a̍ā vīsīo̍o̍ chōo̍, mbō wa̍ ndu̍ pɛ̄ɛ̄līa̍a̍ chōo̍, mbō sɛ̄ɛ̄si̍a̍a̍ ndu̍ yɛ̍. Ā tɛ̄ɛ̄mbu̍u̍ yōōmūlā wāŋndā chīe̍e̍ya̍, ma̍ pōōndīāā nyɛ̄m wāŋnda̍, ndu̍yɛ̍ a̍ nyɛ̄m nda̍ŋ ba̍āŋ kāla᷄ŋ. Wāŋ lāāndūāā bɔ̄ɔ̍ bɔ̍ɔ̍ ma̍ tōsā ma̍ vīīkūū pīāāndūa̍a̍.

²⁶Wānāā ndāā so̍līāā lāsa̍lāa̍, ā chō sāwāla̍ nīla̍ŋ tɛ̄ɛ̄mbūūwo̍, ndu̍yɛ̍, mā sōlī nyɛ᷅m ni᷄ŋ kāsīo̍ŋ o̍ ba̍a̍ ni᷄ŋ. Ā nɔ̍lā lɛ̍ mā chɔ᷄m yɛ̍ yi̍ɔ̍ɔ̍ nyɛ̄m kāsīo̍ŋ tɛ̄ɛ̄ŋ a̍ nyɛ̄m yɔ̄ŋa᷄ŋ te̍, kɛ̄lɛ̄ŋgāāle̍ mā chɔ᷄m wāŋnda̍ yɛ̍ yi̍ɔ̍ɔ̍ nyɛ᷄m cho̍ ŋ̍ di̍a̍ndāā ya̍ Mɛ̍lɛ̄ka̍ o̍ hɔ̄l te̍ wo̍ŋ tɛ̄ɛ̄ŋ, a̍ ŋ̍ cho̍ ŋ̄ dīāndāā wo̍ŋ. Ndu̍yɛ̍ ma̍ tɛ̄ɛ̄mbūū pāa̍le̍ nīle̍ pɛ̍ŋgīāāle̍ŋ lābɛ̄ɛ̄, ma̍ tōsā wāŋnda̍ ā nɔ̍ lɛ̍ lēbɛ̄ɛ̄ le̍ ya̍ le̍.

²⁷Wāŋ bɛ̄ndūa̍a̍ Chūlu̍sɛ̄lɛ̄m a̍ cho̍ māchūāā mɛ̄ɛ̍ vīsīāā bīyāa̍ ā dēl nu̍a̍ā vīsīo̍o̍ chōo̍, mā sɛ̄ɛ̄si̍a̍a̍ ndu̍ yɛ̍. Ā chō yōōmūlā wāŋndā chīe̍e̍ya̍ tɛ̄ɛ̄mbūūwo̍, le̍ mā sɔ̄la̍ tɔ̄nɔ̄ɔ̍ o̍ ka̍fāla̍ŋ ni᷄ŋ.

²⁸Ndu̍yɛ̍, mi̍ wānāā ndāa̍ su̍a̍ā le̍ Mɛ̄lɛ̄ka̍ wa̍ ā wā sɔ̄ɔ̍ŋ nda̍ chō mu᷅ŋ to̍sāa̍ wo̍ŋ kūmbɔ̄ɔ̍, mɛ̄ɛ̍ nda̍ sūū nu̍a̍ā pɔ̄u̍ hu̍mbōo̍ o̍ chīɛ̄īyo̍ yɛ̍. Ā chō yi̍lāŋndā lāchōōwāla̍ŋ chɔ̄ɔ̍, mā dīmūl wa᷅ŋnda̍ yōōŋgūlā lāchōōwāla̍ŋ, mā dīmī māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ke̍ nda̍ yōōŋgūlā lāŋ ni̍. Ndu̍yɛ̍ ō cho̍ ya̍ Mɛ̍lɛ̄ka̍ Ya̍a̍wɛ̄ɛ̄ le̍ ke̍ nda̍ la̍ŋ te̍.

²⁹Wāŋnda̍ chō wāŋnda̍ ka̍fāla̍ŋ tōsāllo̍, ndu̍yɛ̍, mā pōōndīāā nda̍ nyɛ̄m ndāa̍ŋ o̍ lābā o̍ kāŋgālāa̍ ni᷄ŋ. Wānāā tāmbɛ̍i̍ya̍ ni̍, a̍ wānāā bāhāvɛ̍i̍ya̍, ma̍ wā nda̍ kīndīlāa̍. Ndu̍yɛ̍ ma̍ wā wānāā lēkāa̍wa̍a̍ cho̍ nda̍ tɛ̄ɛ̄ŋ nda̍ bīyɔ̄ɔ̄ wɔ̄ɔ̍ŋndo̍, le̍ mɛ̄ɛ̍ nda̍ chō mīālla̍ yɛ̍, ā sɔ̍lā di̍la̍ ndāla̍ŋ te̍.

³⁰Mi̍ ke̍e̍lā hɔ̄lte̍ŋ, le̍ wāna̍ ya̍ I̍ sa̍a̍lūŋ nda̍ tɛ̄ɛ̄ŋ mbō mīŋgi̍ sāāsāa̍ tāŋgūl, ndu̍yɛ̍ mbō si᷄m nāa̍ sāāsāa̍ ō chō o̍ pi̍ɔ̍lɛ̍i̍ya̍, le̍ lɛ̄ŋnde̍ŋ māndāa̍, yɔ̄ŋi̍ ya̍ I̍ tɛ̍ɛ̍mbu̍u̍ le̍ŋ. Kɛ̍ I̍ sɔ̍la̍ wa̍nā le̍.

³¹Le̍ he̍ī, I̍ cho̍ tu̍mbe̍ dɔ̍ɔ̍nɔ᷄ŋ o̍ ka̍lā ka̍lā a̍ nya̍, mī tɛ̍ɛ̍mbu̍u̍ nya̍ le̍ nyɛ̄ nya̍ tōsa̍ wo̍, mɛ̄ɛ̍ yīŋnde̍ŋ lē tɛ̄ɛ̄mbūū nu̍a̍ā nyɔ̄ɔ̍ yɛ̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ wo̍ cho̍ ko̍ŋ ni̍.