Read Southern Kisi Īsi̍kīāā 23 Bible Online

Īsi̍kīāā 23 - Southern Kisi bible

Īsi̍kīāā 23

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ sūa̍a̍ vɛ̄lɛ̄ nāa̍ ya̍ chu̍a̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, chūā pu᷄m wa̍ ni̍, mbo̍ vīālū wāŋ lāāndūa̍a̍ ā ŋīɔ̍ɔ̍ŋ.

³Mɛ̄ɛ̍ nda̍ pɛ̄ mɛ̄ɛ̄ya̍ŋ, mi̍ pūa̍a̍ sāā pīsu̍lta̍ŋ a̍ nda̍, ma̍ hīvi᷄ŋ nda̍ kɔ̄ɔ̄lī. O̍ ko̍ŋ, ma̍ sīmnu᷄ŋ wa᷅ŋ lāāndūāā tīāmāa̍ I̍chi̍pī.

⁴Ndu̍yɛ̍ chūāāmbūa̍a̍ ha̍ā, o̍ wa̍ wānā ba̍nāa̍ wo̍ dīōlā ndɔ̄la̍ŋ āā Ōho̍lā, o̍ wa̍ chūāāmbɔ̄ɔ̍ wo̍ dīōla̍ŋ āā Ōhōli̍bā. Chūāāmbūa̍a̍ ha̍ā, nda̍ ŋi̍ɔ̍ɔ̍ŋ kpo̍u̍, mi̍ chu̍ā nda̍ o̍ nɔ̄ɔ̍ ni᷄ŋ. Ndu̍yɛ̍ nda̍ ŋi̍ɔ̍ɔ̍ŋ kpo̍u̍ ma̍ vīlūl la̍ chūāūwa̍, ā pīāāndūa̍a̍, a̍ ā lāāndūa̍a̍. Ōho̍lā, ndu̍ si̍m le̍ Sāme̍e̍līāā, mi̍ Ōhōli̍bā ndu̍ si᷅m le̍ Chūlu̍sɛ̄lɛ̄m.

⁵Ndu̍yɛ̍ Ōho̍lā, a̍ wā o̍ wa̍ ko̍ŋ ya̍ o̍ bā o̍ nɔ̄ɔ̍ ni᷄ŋ ndo̍ kpo̍u̍, mbo̍ hīāū lāchī a̍ wāa̍ wānā la̍nɔ̍ su̍u̍ndɛ̍i̍. Ndu̍yɛ̍ mbo̍ nɔ̄ yēēmɛ̍i̍ su̍u̍ndɛ̍i̍ bɛ̍ndūe̍i̍ le̍ sa̍ma̍a̍ ndūa̍a̍, Āsi̍i̍līāŋnda̍.

⁶Ku̍u̍ba̍a̍ chɔ̄ūwa̍ Āsi̍i̍līāā, ā nda̍ a̍a̍ wo̍u̍nūŋ ko̍lāla̍ bɔ̍ɔ̄la̍lā kɛ̄ndɛ̄ kɛ̍ndɛ̄ la̍ŋ, ndu̍yɛ̍ mi̍ nda̍ a̍a̍ nɔ᷅ tɔ̍ɔ̍ bɛ̍ndōo̍, o̍ ko̍ŋ kɔ̍ɔ̍lī, ma̍ wā wānāā bɛ̄ndūa̍a̍ o̍ so̍vɛ̄i̍le̍ŋ ni᷄ŋ nda̍, a̍ nda̍ ndu̍ o̍o̍ ti̍ām ni̍. Ndu̍yɛ̍ nda̍ kpo̍u̍, chūāā pīāāndūāā kɛ̄ndɛ̄ kɛ̍ndīa̍a̍ nda̍ wa̍ ni̍, ā nda̍ a̍a̍ ku̍ā o̍ su̍a̍ā chɔ̄ūwa̍ chōo̍ wa̍.

⁷So̍vɛ̄i̍ya̍ Āsi̍i̍līāā, wānāā ndāā bɛ̍ndūa̍a̍ kpo̍u̍, mbo̍ tīām a̍ nda̍. Ndu̍yɛ̍, ō fūla̍ o̍ ko̍ŋ kɔ̍ɔ̍lī, nyɛ̄m wāŋnda̍ ha̍ā nda̍ a̍a̍ so̍o̍lūū māā mɛ̄lɛ̄ka̍ā ndā wo̍ŋ, ndu̍ bɛ̍ɛ̍ nyɛ̄m mu᷅ŋ ko̍ni̍ ndu̍ o̍o̍ so̍o̍lūū ni᷅ŋ ni̍. O̍ ko̍ŋ, mbo̍ sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l.

⁸Ka̍ā sūūndɛ̍i̍ o̍ ka̍ndu̍ I̍chi̍pī, bōōndi̍i̍ mɛ̄ɛ̄ya̍ŋ mā pɛ̄ ndu̍ ve̍, ka̍ā kōŋ ko̍ni̍ o̍ wa̍ hīōūwɔ̄ɔ̍ lāchī a̍ tōsāa̍ ni̍. Bōōndi̍i̍ mɛ̄ɛ̄ya̍ŋ mā pɛ̄ ndu̍ ve̍, mi̍ pūa̍a̍ hīvi᷄ŋ ndu̍ kɔ̄ɔ̄lī, mā hīnī a̍ ndu̍ mɛ̄ɛ̍ nda̍ yēēmā yɛ̍.

⁹O̍ ko̍ŋ, mi̍ ma᷅l ndu̍ sa̍ma̍a̍ ndūa̍a̍ o̍ bā, Āsi̍i̍līāŋnda̍, ā ndu̍ o̍o̍ nɔ̍ yēēmɛ̍i̍ su̍u̍ndɛ̍i̍ bɛ̍ndūe̍i̍ le̍ nda̍ wa̍.

¹⁰Mi̍ Āsi̍i̍līāŋnda̍ ha̍ā ā yūŋgā ndu̍, ma̍ mɛ̄ī ndu̍ fo̍ndō, mɛ̄ɛ̍ nda̍ vēlū ndu̍ yɛ̍. Ndu̍yɛ̍, ma̍ dīī ndu̍ a̍ mūɛ̄ī fāŋnde̍. O̍ ko̍ŋ kɔ̍ɔ̍lī, ma̍ bīū chūāūwāā ndūāā pi̍a̍a̍ndūa̍a̍ a̍ ā lāāndūa̍a̍, ma̍ kūā a̍ nda̍ o̍ bīyɔ̄ɔ̍ ni᷄ŋ. Mi̍ wāŋ lāāndūa̍a̍ ā wā bālɔ̄ɔ̍ a̍ ndu̍ o̍ lāsōndō, a̍ nyɛ̍ yɔ̍nu̍ŋ a̍ ndu̍ wo̍.

¹¹“Ndu̍yɛ̍ nyɛ̄ o̍ nyɛ̍ yɔ̍nu̍ŋ Ōho̍lā, mi̍ Ōhōli̍bā pɔ̍mbɔ̄ ndɔ̄ o̍ cha᷅. Kɛ̍ ndu̍ bɛ̍ɛ̍, ndu̍ o̍o̍ hi̍o̍ū yɔ̄ŋ wɔ̄ɔ̍ŋ a̍ bɛ̄ ndɔ̄. Ndu̍ o̍o̍ nɔ̍ yēēmɛ̍i̍ wānā pɔ̍nɔ̍ɔ̍, mbō bālū su̍u̍ndāa̍ mbo̍ hīāū bɛ̄ ndɔ̄.

¹²Ndu̍ bɛ̍ɛ̍, mbo̍ tūāl so̍vɛ̄i̍ya̍a̍ Āsi̍i̍līāŋnda̍ kɔ̄ɔ̄lī, mbo̍ nɔ̄ yēēmɛ̍i̍ sūūndɛ̍i̍ bɛ̍ndūe̍i̍ le̍ nda̍. Ku̍u̍ba̍a̍ chɔ̄ūwa̍ Āsi̍i̍līāā, ā nda̍ a̍a̍ wo̍u̍nūŋ ko̍lāla̍ kɛ̍ndɛ̄ kɛ̍ndɛ̄la̍ŋ, mi̍ nda̍ a̍a̍ nɔ᷅ tɔ̍ɔ̍, ndu̍yɛ̍, ma̍ wā wānāā bɛ̄ndūa̍a̍ o̍ so̍vɛ̄i̍le̍ŋ ni᷄ŋ nda̍, a̍ nda̍ ndu̍ o̍o̍ tīām ni̍. Ndu̍yɛ̍ nda̍ kpo̍u̍, chūāā pīāāndūāā kɛ̄ndɛ̄ kɛ̍ndīa̍a̍ nda̍ wa̍ ni̍, ā nda̍ a̍a̍ ku̍ā o̍ su̍a̍ā chɔ̄ūwa̍ chōo̍ wa̍.

¹³O̍ ko̍ŋ, mi̍ cha᷅ māā ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Kāni̍ fu̍u̍le̍, ndu̍ bɛ̍ɛ̍ mbo̍ tūāl kāa̍la̍ bɛ̄ ndɔ̄ la̍ŋ kɔ̄ɔ̄lī.

¹⁴“Mi̍ Ōhōli̍bā o̍ hi̍a̍ū lāchī bālɔ̄ɔ̍ sūūndāa̍. O̍ ko̍ŋ, mbo̍ chā wūndu̍ma̍ so̍vɛ̄i̍ya̍ Ba̍bi̍lɔ̄ŋ mā tūūlīāā o̍ chīɛ̄īyo̍, ma̍ bɛ̄ɛ̄ndīāā ma̍ŋ a̍ nyɛ̄ sīāŋāa̍ kpo̍u̍.

¹⁵Mbo̍ chā yāūvi̍i̍ kɛ̍ndɛ̄ kɛ̍ndɛ̄i̍ wa̍ nda̍ ī kānda᷄ŋ o̍ lāchāŋ nde̍, a̍ mɔ̍si̍lta̍ vi̍lɛ̄īla̍ wa̍ nda̍ o̍ lēbōlta̍ŋ. Mɛ̄ɛ̍ o̍ mɛ̍ɛ̍nda̍ŋ wu̍ndu̍a̍ŋ māŋ kpo̍u̍, mbo̍ chā ma̍ŋ so̍vɛ̄i̍ya̍ Ba̍bi̍lɔ̄ŋ yɛ̍ŋgɛ̍sɛ̍ɛ̍.

¹⁶Dīmīo̍o̍ nu̍a̍ā mbo̍ chā wūndu̍ma̍ pūa̍a̍ ha̍ā, mi̍ yēēmɛ̍i̍ bīī ndu̍ le̍ nda̍. O̍ ko̍ŋ, mbo̍ vīām ki̍i̍la̍a̍ o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ, le̍ mā kɔ᷄ ve̍e̍lūl ndu̍ pūa̍a̍ ha̍ā.

¹⁷O̍ ko̍ŋ kɔ̍ɔ̍lī, mi̍ pūa̍a̍ Ba̍bi̍lɔ̄ŋ a̍ hu᷅ŋ, ma̍ hu᷄ŋ hi̍nī a̍ ndu̍. Mɛ̄ɛ̍ nda̍ hīni̍ a̍ ndu̍ te̍i̍, ma̍ tōsā mbo̍ sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Mɛ̄ɛ̍ o̍ si̍mnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l, mi̍ yēēmɛ̍i̍ wānā pɔ̍nɔ̍ɔ̍ fūlā ndu̍, ō chɛ᷄l lɛ̍ mā wa̍ a̍ ndu̍ le̍.

¹⁸Mbo̍ yɔ̄ŋgu᷄ŋ o̍ pūa̍a̍ lo̍ kpo̍u̍. Ndu̍yɛ̍ ō ve̍ lɛ̍ bɛ̍ɛ̍ ndi̍ tōsā o̍ vīōŋnɔ᷄ŋ ni᷄ŋ te̍, kpe̍nde̍ke̍le̍ o̍ wa̍ ndi̍ ni᷅ŋ tōsāa̍ ni̍. O̍ ko̍ŋ, ndu̍ bɛ̍ɛ̍ mi̍ ka̍ā ndɔ̄ɔ̍ kūīsi᷄ŋ ya̍ kɔ̄l, mɛ̄ɛ̍ ka̍a̍ bɛ̄ndɔ̄ɔ̍ kūīsi̍ŋ ya̍ kɔ̄l lɛ̍.

¹⁹Kɛ̍ mbo̍ chɔ̄ɔ̄lū bɛ̍ɛ̍ si̍mnɔ᷄ŋ wa̍nā la̍nɔ̍ su̍u̍ndɛ̍i̍ bɛ̍ndōo̍, mbo̍ hīāū bɛ̍ɛ̍ māā pāāndū. Nyɛ̄ o̍ nyɛ̄ o̍ wa̍ tōsāa̍, bōōndi̍i̍ o̍ wa̍ wɔ̄ chūāāmbɔ̄ lāāndū, o̍ lɛ̄ŋndē I̍chi̍pīle̍ŋ ni᷄ŋ nde̍, mbō bālū su̍u̍ndāa̍ ve̍, mbō hīāū ni᷅ŋ lāchī pu᷅ŋ a̍ ndu̍ tōsāa̍.

²⁰Wāŋ pīāāndūāā nda̍ a̍a̍ nɔ̍ yēēmɛ̍i̍ wānā la̍nɔ̍ɔ̍ nɔ̍ bɛ̄ndōo̍ māā chūīŋ tōōyē, mā chīī chi̍ī bɛ̍ndōo̍ māā tūŋ nda̍, nda̍ ndu̍ o̍o̍ tu̍āl kɔ̍ɔ̍lī ni̍ le̍ hīnīla̍ŋ a̍ ndu̍.” (

²¹Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Ōhōli̍bā, nyɛ̄ o̍ nyɛ̄ ŋ̄ wa̍ tōsāa̍ o̍ lɛ̄ŋndē I̍chi̍pīle̍ŋ ni᷄ŋ, bōōndi̍i̍ ŋ̄ wa̍ wɔ̍ chūāāmbɔ̄ lāāndū ve̍, ndu̍ ko̍ni̍ ŋ̄ chō wɔ̄ hīōūwɔ̄ɔ̍ lāchī kɛ᷅ a̍ tōsāa̍ ni̍. Bōōndi̍i̍ ŋ̄ wa̍ o̍ lɛ̄ŋndē I̍chi̍pīle̍ŋ ni᷄ŋ mi̍ mɛ̄ɛ̄ya̍ŋ mā pīā nu̍m sɛ̄nɛ̄ī yɛ̍, ma̍ bīī ma̍ nɔ̄ yēēmɛ̍i̍ bɛ̍ndūe̍i̍ le̍ wāŋ pīāāndūa̍a̍, mi̍ pūa̍a̍ ā lō pīsu̍lta̍ŋ a̍ nūm, ma̍ hīvi᷄ŋ nu̍m kɔ̄ɔ̄lī.”)

²²Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Le̍la̍ŋ nūm Ōhōli̍bā, ya̍ŋ ni᷅la̍ŋ mā tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ wo̍. Sa̍ma̍a̍ nu̍mnda̍, ā ŋ̄ kɛ̄ɛ̍ ni᷅ŋ pāāndū wa̍ kpo̍u̍, I̍ cho̍ tōsā mā dɔ̄ɔ̄nu᷄ŋ tu̍mbe̍ a̍ nūm, mī chūūŋgi̍a̍a̍ nda̍ mā hu᷄ŋ ba̍lū nu̍m.

²³Po̍ o̍ po̍ nya̍ wa̍ nya̍ ndu̍, pūa̍a̍ Ba̍bi̍lɔ̄ŋ ni̍, pūa̍a̍ Cha̍a̍dī ni̍, pūa̍a̍ Pɛ̍kɔ̄ɔ̄ ni̍, pūa̍a̍ Su̍a̍ā ni̍, pūa̍a̍ Ku̍a̍ā ni̍, ndu̍yɛ̍, a̍ pūa̍a̍ Āsi̍i̍līāā kpo̍u̍, I̍ cho̍ nda̍ chūūŋgīāā nāa̍ pi᷅lɛ̍. So̍vɛ̄i̍ya̍a̍ chu̍a̍ā pīāāndūāā kɛ̄ndɛ̄ kɛ̍ndīa̍a̍ nɔ̍ ka̍ŋ tɔ̍ɔ̍, ndu̍yɛ̍ ma̍ wā wānāā bɛ̄ndūa̍a̍ o̍ so̍vɛ̄i̍le̍ŋ ni᷄ŋ, mā kūā o̍ su̍a̍ā chɔ̄ūwa̍ chōo̍ wa̍ ki̍nɛ̍i̍, I̍ cho̍ nda̍ hūnɔ̄ɔ̄ chūūŋgīāā kpo̍u̍ na̍a̍ pi᷅lɛ̍.

²⁴I̍ cho̍ tōsā mī pūa̍a̍ ha̍ā ā chūūŋgi̍a̍a̍ nyɛ̄lā su̍a̍ā ā nāŋ nda̍ŋ, a̍ nyɛ̄lā nyāāna᷄ŋnda̍ŋ lā pīlɛ̍ la̍ŋ, a̍ wāŋnda̍ ku̍ndā bɛ̄ndōo̍, mā chɛ᷄ŋ ba᷅ lūāŋndo̍, mā hu᷄ŋ de᷅l nu̍m chōo̍. Ā chō wā ā bɛ̄ɛ̄ndīa̍ŋ a̍ nyɛ̄lā so̍vɛ̄i̍ya̍ bīī o̍ lābā le̍ nda̍ māndāa̍ la̍ŋ, lā pɔ̄mbɔ̄la̍ŋ, a̍ lā bɛ̄ndūla̍ŋ, ndu̍yɛ̍ a̍ mɔ̍si̍lta̍ ndāla̍ chɔ̄ūla̍ŋ o̍ lēbōl. I̍ cho̍ nu̍m mālāā nda̍ o̍ bā, mā kīlu̍l nu̍m yāmɛ̍i̍ mɛ̄ɛ̍ sāwa̍ ndāa̍ dīmi̍ yɛ̍.

²⁵I̍ cho̍ tu̍mbe̍ dɔ̍ɔ̍nɔ᷄ŋ a̍ nūm, mī to̍sa̍ mā tūsi̍ nu̍m nyɛ̄ pālāa̍ chōo̍ a̍ tu̍mbe̍ nda̍ dūāūnūŋ ni̍ŋ a̍ nūm ndo̍. Ā chō nu̍m mi᷄ŋndo̍ kīōlɔ̄ɔ̄, ndu̍yɛ̍, mā kīli̍ nu̍m nīla̍ŋ, o̍ ko̍ŋ kɔ̍ɔ̍lī, mā dīu̍ chūāūwāā nūmnda̍, a̍ lo᷅ ni̍ŋ yo̍o̍mū wa̍. Chūāūwāā nūmnda̍, ā lāāndūa̍a̍ a̍ pīāāndūa̍a̍, ā chō nda̍ bīū mā kūɛ̄ a̍ nda̍, mā kɔ̍ lo᷅m nda̍.

²⁶O̍ ko̍ŋ kɔ̍ɔ̍lī, ā chō nu̍m nyɛ̄la̍ŋ sōōlūū lēkɔ̄ɔ̍, ndu̍yɛ̍ nyɛ̄m ba̍ā kālāŋ ŋ̄ bāāyīāŋ ndo̍ŋ mā kūɛ̄nu᷄ŋ a̍ mu̍ŋ.

²⁷Yēēmɛ̍i̍ su̍u̍ndɛ̍i̍ ŋ̄ chɛ᷄ŋ o̍ lɛ̄ŋndē I̍chi̍pīle̍ŋ ni᷄ŋ, mā bālū su̍u̍ndāa̍ ve̍, I̍ cho̍ tōsā mī nyɛ̄ o̍ nyɛ̄ mɛ̄ɛ̄lu̍. I̍ cho̍ tōsā a̍ nɔ᷅ lɛ̍ yēēmɛ̍i̍ su̍u̍ndɛ̍i̍ye̍ le̍ pūa̍a̍ I̍chi̍pī le̍, kɛ̄lɛ̄ŋgāā ni᷅ŋ te̍, mī kɔ̄l de᷄l nu̍m bɛ̍ɛ̍ o̍ nda̍lo̍.”

²⁸Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Ōhōli̍bā, sa̍ma̍a̍ nu̍mnda̍, ā ŋ̄ kɛ̄ɛ̍ ni᷅ŋ pāāndū wa̍ kpo̍u̍, I̍ cho̍ tōsā mā dɔ̄ɔ̄nu᷄ŋ tu̍mbe̍ a̍ nūm, mī chūūŋgi̍a̍a̍ nda̍ mā hu᷄ŋ ba̍lū nu̍m.

²⁹Ā chō nu̍m hūnɔ̄ɔ̄ yɛ̍le̍ŋ tūl, mā de᷄l nu̍m chōo̍, ndu̍yɛ̍ nyɛ̄ o̍ nyɛ̄ ŋ̄ sāŋga̍ le̍ ndu̍, mā pūŋga̍ mu̍ŋ kpo̍u̍ mā kūɛ̄nu᷄ŋ a̍ mu̍ŋ, mā mɛ̄i̍ nu̍m fo̍ndō, mɛ̄ɛ̍ nda̍ vēlū nu̍m yɛ̍. Mɛ̄ɛ̍ nūm o̍o̍ yu̍ŋgā nu̍m pi̍la̍ bōōndi̍i̍ ŋ̄ wa̍ sɔ̄ɔ̍ŋ wɔ̍ɔ̍ŋndo̍ŋ mu᷅ŋ tōsāa̍ ve̍ yɛ̍, le̍nde̍ ŋ̄ chō hūnɔ̄ɔ̄ wā ō yūŋgāā ni̍, bōōndi̍i̍ yɔ̄ŋndā nūmnda̍ wɔ̍ɔ̍ŋnda̍ŋ lā chɔ̄mnūŋ ni̍ŋ nde̍. Yēēmɛ̍i̍ su̍u̍ndɛ̍i̍ nūm o̍o̍ nɔ̍, mā bālū su̍u̍ndāa̍ ve̍,

³⁰mu̍ŋ chu̍u̍ nu̍m dɛ̍nɛ̍ pa̍lāa̍ ho̍ō ni̍. Ma̍ sīmnu᷄ŋ wa̍nā la̍nɔ̍ su̍u̍ndɛ̍i̍ a̍ lɛ̄ŋnde̍, le̍ nyɛ̄ sɔ̄lāa̍. Ndu̍yɛ̍, ma̍ tūāl nyɛ̄m nda̍ sōōlūūwo̍ŋ kɔ̄ɔ̄lī, o̍ ko̍ŋ, ma̍ sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l.

³¹Nyɛ̄ o̍ nyɛ̄ Ōho̍lā bɛ̍ nūm o̍ wa̍ tōsāa̍, nūm bɛ̍ɛ̍, ndu̍ ko̍ni̍ ŋ̄ tōl kɔ̄ɔ̄lī ni̍. Le̍ he̍ī, tāāla̍ dɛ̍nɛ̍ pa̍lāā o̍ ko̍l lēni᷄ŋ ndo̍, nūm bɛ̍ɛ̍ ā chō kōlɔ̄ɔ̄ lēni᷄ŋ.”

³²Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ō dīmi̍ āā, “Ōhōli̍bā, tāāla̍ dɛ̍nɛ̍ pa̍lāā bɛ̄ nūm o̍ ko̍l lēni᷄ŋ ndo̍, nūm bɛ̍ɛ̍ ā chō kōlɔ̄ɔ̄ o̍ tāālā ko̍ŋ ni᷄ŋ. Tāālā ko̍ŋ ō chō ō bɛ̄ndū, ndu̍yɛ̍ mbo̍ yīŋgīlā. Wāŋnda̍ kpo̍u̍, ā chō nu̍m māmɔ̄ɔ̄, mā chē nu̍m nyɛ̄ fo̍ndō fu̍u̍, kāni̍ fo̍ndōle̍, tāālā ko̍ŋ ō chō ō pīāā cha̍.

³³Ā chō hūnɔ̄ɔ̄ kōlɔ̄ɔ̄ o̍ tāālā ko̍ŋ ni᷄ŋ, mī mā bīī nu̍m, mā wa̍ a̍ mɔ̍nɛ̍i̍ bɛ̍ndūe̍i̍. Tāāla̍ Sāme̍e̍līāā bɛ̍ nūm ko̍l lēni᷄ŋ ndo̍, ō chō tāāla̍ bi̍ī wānā īsīōōŋ, ndu̍yɛ̍ mbo̍ wā tāāla̍ mɛ̍ī wa̍nā pɔ᷅m.

³⁴Ā chō kōlɔ̄ɔ̄ o̍ tāālā ko̍ŋ ni᷄ŋ, mā kōŋ ndu̍ kɔ̍kɔ̍, mā su̍i̍ŋgi̍ŋ yi̍īŋnde̍ o̍ lēbōl, ndu̍yɛ̍ mā tɛ̄ɛ̄ndi̍a̍ŋ mɛ̍ɛ̄ya̍ŋ. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.”

³⁵Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “A̍ kɛ̍ɛ̍ ya̍ ma̍ mūlūl la̍ kɔ̄ɔ̍. Le̍ he̍ī, ā chō dɛ̍nɛ̍ pa̍lāa̍ sɔ̄lā, kāni̍ fo̍ndōle̍, le̍ sɔ̄ɔ̍ŋ nu̍m sūūndɛ̍i̍ wɔ̍ɔ̍ŋndo̍ŋ, ndu̍yɛ̍, a̍ le̍ bālɔ̄ɔ̄ nūm o̍o̍ ba̍lū su̍u̍ndāa̍ wo̍.”

³⁶Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Wāna̍ chi̍o̍o̍ Īsi̍kīāā, a̍ bɛ̍ɛ̍ndi̍a̍a̍ le̍ mā ki̍lu̍l Ōho̍lā nda̍ Ōhōli̍bā yāmɛ̍i̍ le̍ nda̍ nyɛ̄ pālāa̍ tūsīo̍o̍ chōo̍? Mɛ̄ɛ̍ chɔ̍m nda̍ sɔ̄ɔ̍ŋ nda̍ tōsa̍ ki̍nɛ̍i̍ yo̍ŋ, sɔ̄ɔ̍ŋ ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ.

³⁷Ā tōsa̍ yɔ̄ŋ wɔ̄ɔ̍ŋ sūūndɛ̍i̍yo̍ a̍ ya̍, ndu̍ yɔ̍nūŋ ni̍ māā nyɛ̄m chēle̍ŋndo̍ŋ sōōlūūwo̍ māā mɛ̄lɛ̄ka̍ā ndā. Ndu̍yɛ̍ ma̍ dīū wāŋndā chīe̍e̍ya̍, ndu̍ yɔ̍nūŋ ni̍ māā chūāūwāā ndāa̍ nda̍ wa̍ sa̍lāla̍ŋ sōlīo̍o̍ māā nyɛ̄ dīāā o̍ mɛ̄lɛ̄ka̍ā ndāā ka̍ŋ ndo̍ wa̍, chūāūwāā na̍a̍ ŋ̄ vēlū na̍a̍ nda̍ā wa̍.

³⁸Ndu̍yɛ̍, ō cho̍ lɛ̍ le̍ ke̍ŋ te̍, kɛ̍, o̍ pāa̍le̍ pi᷅lɛ̍lē lēŋ chōo̍ kpe̍, ma̍ tɛ̄ɛ̄mbūū vɛ̄lɛ̄ chīɛ̍i̍ Mɛ̄lɛ̄ka̍a̍ lābɛ̄ɛ̄, o̍ ko̍ŋ kɔ̍ɔ̍lī, pāa̍le̍ pɛ̍ŋgīāālē ya̍ I̍ di̍mi̍ le̍ mā kɛ̄si̍ le̍ lēbɛ̄ɛ̄ le̍ŋ, ma̍ tɛ̄ɛ̄mbūū le̍ŋ lābɛ̄ɛ̄.

³⁹Ndu̍yɛ̍ o̍ pāa̍le̍ pi᷅lɛ̍lē lēŋ chōo̍, mɛ̄ɛ̍ nda̍ dīu̍ chūāūwāā ndāa̍, ma̍ sōlī nda̍ sa̍lāla̍ŋ, ma̍ kūā vɛ̄lɛ̄ o̍ chīɛ̄ī ni̍ kāsīo̍o̍ ni᷄ŋ, ma̍ kɔ̍ tɛ̍ɛ̍mbūū ndu̍ lābɛ̄ɛ̄, ma̍ tōsā mbo̍ sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l.

⁴⁰“O̍ ko̍ŋ kɔ̍ɔ̍lī, ma̍ vīām bɛ̍ɛ̍ ki̍i̍la̍a̍ o̍ lɛ̄ŋīī lēvīlle̍ ni᷄ŋ, le̍ mā kɔ̍ ve̍e̍lūl nda̍ pūa̍a̍, ndu̍yɛ̍ ma̍ hūŋ. Mɛ̄ɛ̍ pūa̍a̍ ha̍ā ā hīŋ, mi̍ wāŋ lāāndūa̍a̍ ha̍ā ā pūlu᷄ŋ fo̍, ma̍ sūūnu̍ŋ ti̍wu̍e̍i̍yo̍, ma̍ bāāyi̍a̍ŋ nyɛ᷅m ba̍ā kāla᷄ŋ le̍ kɔ̄la̍ŋ o̍ pūa̍a̍ ha̍ā lo̍.

⁴¹O̍ ko̍ŋ kɔ̍ɔ̍lī, mā chāl o̍ kpe̍ŋgbe̍i̍la̍ di̍fīɛ̄ɛ̄lā kɛ̄ndɛ̄ kɛ̍ndɛ̄la̍ŋ chōo̍, ma̍ kɛ̄si᷄ŋ ti̍bīi̍yo̍ nda̍ lāchī, ma̍ dōvī nyɔ̄ɔ̍ŋ lēcho̍ō, nyɛ̄m ni̍ŋ chūŋ kɛ̄ndɔ᷄ŋ, a̍ chūɛ̄īmā nīma̍ ɔ̄li̍fīi̍ya̍ŋ.

⁴²Ma̍ yɔ̄ŋ le̍ pūa̍a̍ ku̍ndā bɛ̄ndōo̍, fūlāa̍ o̍ lɛ̄ŋndē po̍lte̍ŋ ni᷄ŋ. Pūa̍a̍ ha̍ā kpo̍u̍, mi̍ mūɛ̄īya̍ŋ mā bīī nda̍, ma̍ wā kɔ̄l kɛ̄ndɛ̄ bɛ̄ndōo̍ tōsāa̍, ma̍ wā bɔ̄ɔ̄lūūwo̍. Mi̍ pūa̍a̍ ha̍ā ā wōū nda̍ kēla᷄ŋ o̍ lābā, ndu̍yɛ̍ ma̍ wōū nda̍ mɔ̍si̍lta̍ kɛ̍ndɛ̄ kɛ̍ndɛ̄la̍ŋ.”

⁴³O̍ ko̍ŋ, mi̍ di̍mī a̍a̍, “Wāŋ lāāndūa̍a̍ fu̍la̍ ni᷅ŋ ha̍ā o̍ ba̍a̍ ni᷄ŋ a̍ tīɔ̄mɔ̄ɔ̍ wa̍, mī pūa̍a̍ ha̍ā hīni̍ vɛ̄lɛ̄ a̍ nda̍?

⁴⁴Kɛ̍ mi̍ pūa̍a̍ ha̍ā ā hīāū lāchī a̍ kɔ̄la̍ŋ wāa̍ a̍ wāŋ lāāndūa̍a̍ ha̍ā, mɛ̄ɛ̍ nda̍ wā a̍ wāŋ lāāndūa̍a̍ ba̍lū su̍u̍ndāa̍ wa̍ yɛ̍. Ma̍ wā kɔ̄la̍ŋ hīni̍la̍ŋ a̍ Ōho̍lā, nda̍ Ōhōli̍bā, wāŋ lāāndūāā sūūndɛ̍i̍ya̍ ha̍ā.

⁴⁵Kɛ̍ pūa̍a̍ cho̍ sa̍kpō ya̍ Mɛ̍lɛ̄ka̍ o̍ hɔ̄l la̍, ā chō nda̍ hūnɔ̄ɔ̄ yāmɛ̍i̍ kīlūl le̍ sɔ̄ɔ̍ŋ su̍u̍ndɛ̍i̍ nda̍ chō mu᷅ŋ tōsāa̍ wo̍ŋ, ndu̍yɛ̍ a̍ wāŋndā chīe̍e̍ya̍a̍ nda̍ chō dīūwo̍ wa̍. Kāni̍ fo̍ndōle̍, wānāā tīāmāa̍ nda̍ chō ni̍, ndu̍yɛ̍ ma̍ wā wānāā dīyāā ŋ̄wāŋndā chīe̍e̍.”

⁴⁶Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ō hīāū lāchī a̍ sūɛ̍i̍, mbo̍ dīmī āā, “Le̍la̍ŋ ya̍a̍mɔ̍ɔ̍wa̍ lā chūūŋgi̍a̍a̍ so̍vɛ̄i̍ya̍a̍ nyāa̍ ku̍ndā bɛ̄ndōo̍, le̍ hūnɔ̄ɔ̍ wāŋ lāāndūāā ŋīɔ̍ɔ̍ŋnda̍ ha̍ā dēlɔ̄ɔ̍ chōo̍, mī lā lūe̍i̍ nda̍ sīōōŋīī bɛ̄ndūe̍i̍, ndu̍yɛ̍ mī lā pūŋga̍ nyɛ̄m ndāa̍ŋ.

⁴⁷Lā hu᷄ŋ de᷅l nda̍ chōo̍ ku̍ndā bɛ̄ndōo̍ a̍ mɔ̄ɔ̄ŋ fāŋndo̍ŋ, mī lā vīī vi̍i̍ nda̍ a̍ pōūta̍ŋ, mī lā dīu̍ chūāūwāā ndāa̍, ā pīāāndūa̍a̍ a̍ lāāndūa̍a̍, ndu̍yɛ̍, mī lu̍mi̍ chīɛ̄īlā ndāla̍ŋ.

⁴⁸I̍ cho̍ tōsā, o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍, mī yēēmɛ̍i̍ su̍u̍ndɛ̍i̍ bɛ̍ndūī kēŋ ī mɛ̄ɛ̄lu̍. Nyɛ̄ ya̍ I̍ cho̍ tōsā a̍ nya̍ wo̍, ndu̍ cho̍ wā sīlāa̍ le̍ wāŋ lāāndūāā tūa̍a̍ kpo̍u̍ ni̍, ā wo̍ū ba̍ o̍ sɔ̄ɔ̍ŋ su̍u̍ndɛ̍i̍yo̍ŋ ni᷄ŋ te̍.

⁴⁹I̍ cho̍ nya̍ nyɛ̄ pālāa̍ tūsī chōo̍ le̍ yɔ̄ŋ wɔ̄ɔ̍ŋ sūūndɛ̍i̍yo̍, a̍ yɔ̄ŋ wɔ̄ɔ̍ŋ sōōlāā nyɛ̄m chēle̍ŋ ndo̍, māā mɛ̄lɛ̄ka̍ā nyā. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ni̍.”