Read Southern Kisi Īsi̍kīāā 24 Bible Online

Īsi̍kīāā 24 - Southern Kisi bible

Īsi̍kīāā 24

¹Wɔ̄sī na̍a̍ ŋ̄ chīŋa̍ wɔ̄sīla̍ŋ lā ŋɔ̍ma̍hīɔ̍ɔ̍lu̍ o̍ bīyɔ̄ɔ̍ ni᷄ŋ Ba̍bi̍lɔ̄ŋ nde̍, pāŋgi̍i̍ tɔ̍ ve̍ o̍ wɔ̄sī kōŋ ni᷄ŋ o̍ mālɔ̄ tɔ̍ wa̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, po̍o̍nyi̍a̍a̍ pāa̍le̍ŋ nde᷅ŋ, māā pāa̍le̍ŋ nde̍ŋ kpe̍e̍kpe̍i̍ Māsā bɛ̄ndōo̍ Ba̍bi̍lɔ̄ŋ nda̍ so̍vɛ̄i̍ya̍a̍ ndūa̍a̍ ā chō Chūlu̍sɛ̄lɛ̄m dɔ̄wɔ̄ɔ̄ o̍ pi̍ŋndo̍ ni᷄ŋ ni̍, le̍ ndu̍ bīyɔ̄ɔ̍.

³Le̍la̍ŋ, di̍mu̍l wa̍nāa̍ si̍mu̍l la̍ ha̍ā wa̍ tālo̍o̍ ho̍ō, māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ I̍ dīmi̍ māā, kɛ̍si̍ kpɛ̍ɛ̍nɛ̍i̍ o̍ yīŋ, mā dɔ̄ū mɛ̄ŋnda̍ŋ lēni᷄ŋ.

⁴O̍ ko̍ŋ, ma̍ bīī sāā che̍lu̍lɛ̍i̍ kɛ̍ndɛ̄ kɛ̍ndɔ̄ɔ̍ sāā nu̍mnda̍ tɛ̄ɛ̄ŋ, mā dīī ndu̍, mā sɛ̄ŋ ndu̍. Ndu̍yɛ̍ mā chu̍a̍ vīsīŋ kɛ̄ndɛ̄ kɛ̍ndɔ᷄ŋ, mā dɔ̄ū o̍ kpɛ̍ɛ̍nɛ̍i̍ he̍ī ni᷄ŋ, chōŋgu̍la̍ŋ, a̍ lɔ̄lūla̍ŋ, a̍ pāālā ndɔ̄la̍ŋ lātūlu̍, mā dɔ̄ū yɔ̄mnde̍ lēbɛ̄ŋgu̍ mī ī ŋo᷄l nyɛ̄ kɛ̄ndɛ̄ kɛ̍ndɛ̄.”

⁵

⁶Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍ āā, “Nyɛ̄ pālāā bɛ̄ndōo̍ chō le̍ chi̍e̍e̍ di̍yāā ŋ̄wāŋndā chīe̍e̍ wo̍ ho̍ō. Ō chō māchūāā mɛ̄ɛ̍ kpɛ̍ɛ̍nɛ̍i̍ ī wā nu̍a̍ā ī sɔ̄vɛ̍i̍ le̍ni̍ŋ, sɔ̄wā kōŋ ō fe̍ŋā te̍ yɛ̍. Vi̍si᷄ŋ cho̍ o̍ kpɛ̍ɛ̍nɛ̍i̍ he̍ī ni᷄ŋ ndo̍ŋ kpo̍u̍, ā chō mu̍ŋ sōlī ŋ̍ pi̍lɛ̍ŋ pi̍lɛ̍ŋ, ndu̍yɛ̍ ā ve᷅ ni̍ŋ hɛ̍lī le̍.

⁷Wāŋndā chīe̍e̍ya̍a̍ nda̍ dīu̍ o̍ chi̍o̍o̍ ho̍ō ni᷄ŋ nda̍, kōo̍ma̍ ndāa̍ŋ mā chō wɔ̄ lo̍ŋ, kāni̍ fo̍ndōle̍, o̍ pōūwo̍ chōo̍ nda̍ wa̍ nda̍ dīūwo̍ ni̍, ā dīu̍ nda̍ nāa̍ chu̍ndo̍o̍ chō wa̍, mī kōo̍ma̍ ndāa̍ŋ mā mɔ̄ya̍ mɔ̍ya̍, mā vēŋ ma̍ŋ te̍.

⁸Le̍ mī dɔ̍ɔ̍nu᷄ŋ tu̍mbe̍, mī mi̍ŋgu̍l wāŋnda̍ ha̍ā māa̍, nyɛ̄ kōŋ ya̍ I̍ to̍sa̍ ni̍, mi̍ kōo̍ma̍ wānāā nda̍ dīu̍ wa̍ mā wā o̍ pōūwo̍ chōo̍, mā mɔ̄ya̍ mɔ̍ya̍ lɛ᷅ŋ te̍.”

⁹Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Dɛ̍nɛ̍ pa̍lāā bɛ̄ndōo̍ ō wā ni̍ŋ le̍ chi̍e̍e̍ di̍yāā ŋ̄wāŋndā chīe̍e̍ wo̍ ho̍ō. Ya̍ pi̍la̍ kpe̍e̍kpe̍i̍ cho̍ hūnɔ̄ɔ̄ yɔ̄mnde̍ dēŋgēlā ku̍ndā bɛ̄ndōo̍ ni̍, le̍ Chūlu̍sɛ̄lɛ̄m mālɔ̄ɔ̍ o̍ yīŋ mbō ŋūɛ̄.

¹⁰De̍ŋge̍la̍ yɔ᷅mnde̍ nāa̍ pi᷅lɛ̍, mā ki̍i̍su̍u̍ yīŋnde̍ŋ. Ndu̍yɛ̍ mā ya̍u̍ vīsīŋ mu᷅ŋ, mī ŋ̄ lo̍ ŋōlɔ̄ɔ̍ mī mɛ̄ŋnda̍ŋ mā vēla̍ sɛ̍ɛ̍ŋ, mī ŋ̄ ŋūɛ̄ a̍ pāālā lāŋ lātūlu̍.

¹¹O̍ ko̍ŋ kɔ̍ɔ̍lī, mā tu̍si̍ kpɛ̍ɛ̍nɛ̍i̍ fo̍ndūe̍i̍ ke̍ŋ o̍ dɛ̄ŋgūlta̍ŋ chōo̍, mī ī lo̍ lo̍ŋ, mī ī dīū wa᷅ŋ, le̍ mī hɔ̄ɔ̄ni̍i̍ ke̍ŋ lēni᷄ŋ kpe̍de̍ i̍ ŋu̍ɛ̄, mī kpɛ̍ɛ̍nɛ̍i̍ ī dēndū lēni᷄ŋ.

¹²Kɛ̍ ndu̍yɛ̍, kpɛ̍ɛ̍nɛ̍i̍ he̍ī, ī cho̍ chu̍wɔ̄ɔ̍ dīōndɔ̄ɔ̍ lēni᷄ŋ te̍.

¹³Chūlu̍sɛ̄lɛ̄m, yēēmɛ̍i̍ nu̍m ī sūūndɛ̍i̍ye̍, ndi̍ cho̍ hɔ̄ɔ̄ni̍i̍ lo̍ ke̍ŋ o̍ kpɛ̍ɛ̍nɛ̍i̍ ni᷄ŋ nde̍ ni̍. I̍ ki̍ndi̍ le̍ nu̍m dīndīo̍o̍, kɛ̍ nɔ̄ɔ̄lā nūmndo̍ ō dīndu̍ le̍. Ndu̍yɛ̍ a̍ di̍ndū lɛ̍ ni̍ŋ te̍, ha̍a̍a̍ mī tu̍mbe̍ ya̍ I̍ dɔ̍ɔ̍nu᷄ŋ a̍ nūm, mi̍ tu̍sī nu̍m nyɛ̄ pālāa̍ chōo̍ wo̍, ō pɔ̄lu̍l.

¹⁴Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍. Ndu̍yɛ̍, ī chō yɔ̄nɔ᷄ŋ, I̍ cho̍ ndi̍ tōsā. I̍ si̍ŋgī di̍ōm nūu̍ le̍, I̍ me᷅l ndi̍ le̍, ndu̍yɛ̍ I̍ ma̍ŋgālā kɔ᷅l nūu̍ le̍. I̍ cho̍ nu̍m yāmɛ̍i̍ kīlūl mɛ̄ɛ̍ kūɛ̍ɛ̍la̍ nu̍mnda̍ŋ lā chō, ma̍ wā sɔ̄ɔ̍ŋ tōsāa̍ yɛ̍.” Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ndu̍ so̍ō ni̍.

¹⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

¹⁶Mbo̍ dīmūl la̍ āā, “Wāna̍ chi̍o̍o̍ Īsi̍kīāā, wānā nu̍m ŋ̄ kāāla̍ kāālā bɛ̄ndōo̍ wo̍, I̍ cho̍ yōōmū ndɔ̄ɔ̍ chūā o̍ lēpīlɛ̍ ni᷄ŋ kpe̍. Kɛ̍ ndu̍yɛ̍, ō wu᷄ bɛ̍ɛ̍, mɔ̍nɛ̍i̍ bi̍ī nu̍m, ɔ̄ɔ̄ mā cha̍ŋ, ɔ̄ɔ̄ mī mɛ̍mɛ̍ma̍ to᷅l nu̍m le̍ pīɔ̍m ndɔ̄ɔ̍ le̍.

¹⁷Hi̍i̍līāā, kɛ̍ he̍e̍lu̍ chōo̍ cho̍o̍ le̍. To̍sā īsɔ̄ɔ̍ o̍ īsɔ̄ɔ̍ chɔ᷅m māā mɔ̍nɛ̍i̍ chō nu̍m le̍ pīɔ̍m ndɔ̄ɔ̍ le̍. Wo̍u̍nu̍ŋ mɔ̍si̍l nu̍m vīlɛ̄īyo̍, ndu̍yɛ̍ mī kɔ̄vɛ̄i̍la̍ nu̍mnda̍ŋ lā wa᷄ nu̍m o̍ ŋ̄pēlū. Ha̍ndu᷄ŋ la̍ba̍ o̍ lēbōl, ɔ̄ɔ̄ mā dē nyɛ̄ dīāā wānāā nyɔ̄ɔ̍ ō pālā wa̍ ā dīā wo̍ le̍.”

¹⁸O̍ ko̍ŋ kɔ̍ɔ̍lī, īdīi̍yo̍ mi̍ su̍a̍ā nāa̍ wāŋnda̍ chūā. Nyūmnda̍ŋ tōlɔ̄ɔ̍ īchɔ̄llo̍, mi̍ la̍a̍ nūu̍ ō wūnu᷄ŋ. Ndu̍yɛ̍ mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ to̍sā mɛ̄ɛ̍ Mɛ̄lɛ̄ka̍ dīmu̍l la̍ le̍ tōsāa̍ yɛ̍.

¹⁹Mi̍ wāŋnda̍ nyūnā ya̍ āā, “Īsi̍kīāā, chɔ̍m na̍a̍ le̍ sa̍bū ŋ̄ tōsa̍ he̍ī yo̍.”

²⁰O̍ ko̍ŋ, mi̍ di̍mūl nda̍ a̍a̍, “Mɛ̄lɛ̄ka̍ Ya̍a̍wɛ̄ɛ̄ o̍ so̍ō nāa̍ ya̍ chu̍a̍ mbo̍ dīmūl la̍,

²¹le̍ mī di̍mu̍l nya̍ wāŋnda̍ I̍sɔ̄lūɛ̄ī kpo̍u̍ yo̍o̍ŋgōo̍ ho̍ō. Ō dīmi̍ āā, ‘Lā chō yōŋgāa̍ kīōlɔ̄ɔ̍ a̍ chīɛ̄ī ni̍ kāsīo̍o̍ māā ō nɔ̄lā mbō mānda̍ nya̍. O̍ chi̍e̍ēŋndo̍ ni᷄ŋ kpo̍u̍, nyɛ̄ nya̍ hāndu̍ kɔ̄llo̍ chōo̍ wo̍, ndu̍ cho̍ chīɛ̄ī ko̍ŋ ni̍, ndu̍yɛ̍ mi̍ lā būūla̍ŋ le̍ ndu̍. Kɛ̍ ndu̍yɛ̍, I̍ cho̍ tōsā mī chīɛ̄ī kōŋ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Ndu̍yɛ̍ chūāūwāā nyāa̍ nya̍ mɛ̄ī ni̍ŋ kɔ̍ɔ̍lī Chūlu̍sɛ̄lɛ̄m nda̍, ā chō nda̍ dīū o̍ chɔ̄ūwo̍ ni᷄ŋ.

²²Ndu̍yɛ̍ nyɛ̄ nya̍ chē ho̍ō mi̍ Īsi̍kīāā to̍sā wo̍, ndu̍ yɔ̍nūŋ ni̍ŋ nya̍ ni̍. Lā nɔ̍lā ni̍ŋ mī lā hāndu̍ŋ ba᷅la̍ŋ o̍ lēbōl, ɔ̄ɔ̄ mī lā dē nyɛ̄ dīāā wānāa̍ nyɔ̄ɔ̍ pālā wa̍ ā dīā wo̍, le̍ pīɔ̍m chūāūwāā nyāā ka̍ŋ te̍.

²³Mɔ̍si̍lta̍ nyāla̍ vi̍lɛ̄īla̍ŋ lā wā ni̍ŋ nya̍ o̍ lēbōl, mī kɔ̄vɛ̄i̍la̍ nyāla̍ŋ lā wa᷄ o̍ ŋ̄pēlū. Kɛ̍ lā che᷅ŋ ni̍ŋ, ɔ̄ɔ̄ mī mɔ̍nɛ̍i̍ bi̍ī nya̍ le̍. Kɛ̍ kɔ̄l tāmbɛ̍i̍ bɛ̍ndōo̍ ō wā ni̍ŋ le̍ nya̍, kāni̍ fo̍ndōle̍, le̍ yɔ̄ŋndā nyāla̍ wɔ̍ɔ̍ŋnda̍ŋ, ndu̍yɛ̍ mī lā wa᷄ kūŋnda̍ŋ vēllāa̍ vēllē a̍ nyɛ̄ nɛ̄īyāa̍.

²⁴Le̍la̍ŋ, nyɛ̄ o̍ nyɛ̄ nya̍ chē mi̍ Īsi̍kīāā to̍sā, ō chō māchūāā tāāmāsi̍o̍o̍ a̍ nyɛ̍ yɔ̍nūŋ ni̍ŋ a̍ nya̍ wo̍. Nyɛ̄ o̍ nyɛ̄ o̍ to̍sa̍, le̍nde̍ i̍ yɔ̍nūŋ ni̍ŋ a̍ nya̍ ni̍. Tē he̍ī yɔ̄nu̍ŋ pɛ̍, o̍ ko̍ŋ nya̍ chō sīnā ni̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ni̍.’ ”

²⁵Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Wāna̍ chi̍o̍o̍ Īsi̍kīāā, wāŋnda̍ I̍sɔ̄lūɛ̄ī a̍ dɔ̍ū tīīnda᷄ŋ ndāa̍ kpo̍u̍ o̍ chīɛ̄ī ni̍ kāsīo̍o̍ ni᷄ŋ, ma̍ wā yōŋgāa̍ kīōlɔ̄ɔ̍ a̍ ndu̍ māā ndu̍ cho̍ fo̍ndāŋ kālā ka̍la̍ ma̍ndā nda̍ wo̍ ni̍. Ā chūa̍ ndu̍ māā ndu̍ to̍sā ni̍ mā dɔ̄ɔ̄nu᷄ŋ nya̍a̍le̍, ndu̍yɛ̍ mā wa᷄ wānāā lēbɛ̄ɛ̄. Ndu̍ cho̍ kɔ̄l ndāa̍ kpo̍u̍ ni̍, nyɛ̄ nda̍ hāndu̍ hɔ̄lte̍ŋ chōo̍ wo̍. Kɛ̍ I̍ cho̍ hūnɔ̄ɔ̄ chīɛ̄īyo̍ ho̍ō tɛ̄ɛ̄mbūū, ndu̍yɛ̍ chūāūwāā ndāa̍ kpo̍u̍, ā pīāāndūa̍a̍, a̍ ā lāāndūa̍a̍, mī di̍u̍ nda̍.

²⁶A̍ te̍le̍ŋ ko̍ŋ, wāŋndo̍ chō hīɔ̄lɔ᷄ŋ mbō hīŋ a̍ kīlta̍ŋ mbō hu᷄ŋ do̍o̍nu᷄ŋ nu̍m ko̍na̍ a̍ nyɛ̍ yɔ̍nu̍ŋndo̍ o̍kɔ̄ɔ̄.

²⁷Pāa̍le̍ nda̍ chō nu̍m yōōŋgōo̍ ho̍ō hūnɔ̄ɔ̄ dīmūl le̍ŋ, pāa̍le̍ le̍ŋ sōndōo̍ chō nu̍m kūmbi᷄ŋ ni̍ mā sōō, a̍ ve᷅ lɛ̍ o̍ sōndō kūmbāā ni᷄ŋ te̍. Le̍la̍ŋ nu᷄m cho̍ wā tāāmāsi̍o̍o̍ le̍ nda̍ ni̍. O̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”