Read Southern Kisi Īsi̍kīāā 25 Bible Online

Īsi̍kīāā 25 - Southern Kisi bible

Īsi̍kīāā 25

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, mūlī hɔ̄lla̍ kūmbū A̍mɔ᷅ŋndo̍. Mā di̍mu̍l wāŋnda̍ A̍mɔ̄ŋ a̍ nyɛ̄ pālāa̍ ko̍māl ni̍ŋ nda̍ wo̍ o̍kɔ̄ɔ̄.

³Di̍mu̍l nda̍ māā, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ di̍mi̍ ma̍a̍, wāŋnda̍ A̍mɔ̄ŋ, dɛ̍nɛ̍ pa̍lāā bɛ̄ndōo̍ chō le̍ nya̍, fo̍ndōle̍, le̍ nyɛ̄ nya̍ tōsa̍ wo̍. Bōōndi̍i̍ ya̍a̍mɔ̍ɔ̍wa̍ hu᷄ŋ de᷅l lɛ̄ŋndē I̍sɔ̄lūɛ̍i̍le̍ŋ chōo̍, ma̍ mɛ̄ī le̍ pɔ̄m, ma̍ tɛ̄ɛ̄mbūū chīɛ̄ī ni̍ kāsīo̍o̍ lābɛ̄ɛ̄, ndu̍yɛ̍ ma̍ bīī wāŋnda̍ Chu̍dā kpo̍u̍ ma̍ kūā a̍ nda̍ o̍ bīyɔ̄ɔ̍ ni᷄ŋ nde̍, nya̍ kpo̍u̍ mi̍ lā dūāūnu᷄ŋ nya̍a̍le̍.

⁴Le̍ he̍ī, nya̍ bɛ̍ɛ̍ I̍ cho̍ nya̍ mālɔ̄ɔ̄ kāa̍la̍ cho̍ bā pāa̍le̍ŋ lē chāŋndo̍ la̍ŋ o̍ bā, mā hu᷄ŋ bi̍ī lɛ̄ŋndē nyāle̍ŋ. Ā chō dɔ̍ɔ̍ŋgɔ̍la̍ŋ kīōlɔ̄ɔ̄ o̍ lɛ̄ŋndē nyāle̍ŋ ni᷄ŋ, mā cha᷄l lo̍ŋ. Ā chō tɔ̄lɔ̄ɔ̄lā nya̍la̍ŋ dīo̍, ndu̍yɛ̍ mā ko᷄l mɛ̄ɛ̄mā chɔ̄lūāā nyāa̍.

⁵I̍ cho̍ tōsā mī Lu̍a̍bā, chi̍e̍e̍ nyā le̍bo᷅llo̍, mbō sīmnu᷄ŋ nāa̍ nda̍ bāāyīāā nyɔ̍mi̍a̍a̍ ndāa̍ wa̍. Lɛ̄ŋndē A̍mɔ̄ŋnde̍ŋ kpo̍u̍, lē chō sīmnɔ᷄ŋ na̍a̍ chɔ̄lūāā ndāa̍ ā hīnī wa̍. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁶“Di̍mu̍l nda̍ māā, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ nyɛ̄ ya̍ I̍ di̍mi̍ wo̍ cho̍ ho̍ō ni̍. Wāŋnda̍ A̍mɔ̄ŋ, lā tu᷄l I̍sɔ̄lūɛ̍i̍ya̍ yɛ̄le̍ŋ. Mɛ̄ɛ̍ nya̍ tūēī māā ya̍a̍mɔ̍ɔ̍wa̍ yēm nda̍, mi̍ lā tīām bāla̍ŋ, mi̍ lā hūūlū a̍ nya̍a̍lo̍o̍.

⁷Le̍ he̍ī, I̍ chō nya̍ hūnɔ̄ɔ̄ dɛ̍nɛ̍ pa̍lāā bɛ̄ndōo̍ tūsī chōo̍. I̍ cho̍ nya̍ mālɔ̄ɔ̄ lɛ̄ŋnde̍ o̍ bā, mā pūŋga̍ nyɛ̄m nyāa̍ŋ kpo̍u̍ mā kūɛ̄nu᷄ŋ a̍ mu̍ŋ. I̍ cho̍ nya̍ tɛ̄ɛ̄mbūū kpo̍u̍, mī so̍li̍ nya̍ lɛ̄ŋnde̍ tɛ̄ɛ̄ŋ, mī to̍sa̍ lā ve᷅ lɛ̍ lēlɛ̄ŋ a̍ bā nyā le̍. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmī āā, “Dɛ̍nɛ̍ pa̍lāā bɛ̄ndōo̍ chō le̍ wāŋnda̍ Mo̍wa̍bī, kāni̍ fo̍ndōle̍, le̍ mɛ̄ɛ̍ nda̍ chūa̍ lɛ̄ŋndē Chu̍dāle̍ŋ māā lɛ̄ŋnde̍ ī pīlɛ̍i̍ yɛ̍. Le̍ he̍ī, chi̍e̍e̍ŋ ndāāŋ bɛ̍ndu᷄ŋ cho̍ o̍ pɛ̄ŋgu̍la̍ lɛ̄ŋndē ndāle̍ŋ, ma̍ tīīnda᷄ŋ mu̍ŋ le̍ lɛ̄ŋndē ndāle̍ŋ māndāa̍ wo̍ŋ ki̍nɛ̍i̍, mu̍ŋ yɔ̍nūŋ ni̍ māā, Bɛ̍tī Chɛ̍su̍i̍mɔ̍tī, a̍ Bāāl Mīɔ̄ŋ, a̍ Kīlīa̍a̍tīm, I̍ cho̍ mu̍ŋ mālɔ̄ɔ̄ ya̍a̍mɔ̍ɔ̍wa̍ o̍ bā, mā hu᷄ŋ de᷅l mu̍ŋ chōo̍.

¹⁰Chi̍e̍e̍ŋ mu̍ŋ, lātūlu̍ a̍ lɛ̄ŋndē A̍mɔ̄ŋnde̍ŋ, I̍ cho̍ mu̍ŋ mālɔ̄ɔ̄ wānāa̍ cho̍ bā pāa̍le̍ŋ lē chāŋndo̍ wa̍ o̍ bā, mā tɛ̄ɛ̄mbu̍u̍ mu̍ŋ, mī to̍sa̍ fɛ̍ɛ̍ŋ a̍ fɛ̍ɛ̍ŋ, wāŋnda̍ lōōnūŋ ndɛ̍ a̍ mu̍ŋ o̍kɔ̄ɔ̄ le̍.

¹¹I̍ cho̍ wāŋnda̍ Mo̍wa̍bī nyɛ̄ pālāa̍ tūsī chōo̍, o̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

¹²Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmī āā, “Lɛ̄ŋndē I̍dɔ̄mnde̍ŋ lē mīŋgu̍l wāŋnda̍ Chu̍dā māa̍ wɔ̍ɔ̍ŋndo̍, ma̍ tōsā yɔ̄ŋ wɔ̄ɔ̍ŋ bɛ̄ndōo̍ o̍ nda̍ māa̍ ko̍ŋ mīŋgūllo̍ ni᷄ŋ.

¹³Le̍la̍ŋ, nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ wo̍ cho̍ ho̍ō ni̍. I̍ cho̍ lɛ̄ŋndē I̍dɔ̄mnde̍ŋ nyɛ̄ pālāā bɛ̄ndōo̍ tūsī chōo̍, wāna̍ chi̍e̍e̍ ni̍, chɔ̄lū ni̍, mī di̍u̍ nda̍ kpo̍u̍. Lɛ̄ŋndē I̍dɔ̄mnde̍ŋ kpo̍u̍, chɔ̍ŋ Tɛ̍māŋ chi̍e̍e̍, mbō kūɛ̄ Dɛ̍dāŋ, I̍ cho̍ tōsā mī lē sīmnu᷄ŋ pɔ᷅m, ndu̍yɛ̍ wānā o̍ wāna̍ cho̍ lo̍ŋ, mā dīu̍ nda̍ ā mɔ̄ɔ̄ŋ fāŋndo̍ŋ.

¹⁴Nyɛ̄ o̍ nyɛ̄ nda̍ tōsa̍ a̍ wāŋnda̍ I̍sɔ̄lūɛ̄ī, nda̍ bɛ̍ɛ̍, I̍ cho̍ tōsā mī wāŋnda̍ I̍sɔ̄lūɛ̄ī a̍ mi̍ŋgu̍l nda̍ māa̍ ko̍ŋ. I̍ cho̍ tu̍mbe̍ dɔ̍ɔ̍nɔ᷄ŋ a̍ nda̍, ndu̍yɛ̍ dɛ̍nɛ̍ pa̍lāā ya̍ I̍ kɛ̍ɛ̍si̍a̍a̍ le̍ nda̍ tūsīo̍o̍ chōo̍ wo̍, mī tu̍si̍ nda̍ ndu̍ chōo̍ kpo̍u̍, mī mi̍ŋgu̍l nda̍ māa̍.” Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ so̍ō ni̍.

¹⁵Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmī āā, “Wāŋnda̍ Fīli̍i̍tīāŋ a̍ mi̍ŋgu̍l wāŋnda̍ Chu̍dā māa̍ wɔ̍ɔ̍ŋndo̍, a̍ nɛ̄īyɔ᷄ŋ bɛ̍ndōo̍ le̍ nda̍ tɛ̄ɛ̄mbūūwo̍, le̍ ya̍a̍mɔ̍ɔ̍le̍ pa̍a̍ndūle̍ cho̍ nda̍ tɛ̄ɛ̄ŋ nde̍ŋ.

¹⁶Le̍la̍ŋ, nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ wo̍ cho̍ ho̍ō ni̍. I̍ cho̍ lɛ̄ŋndē Fīli̍i̍tīāāle̍ŋ nyɛ̄ pālāā bɛ̄ndōo̍ tūsī chōo̍, wānā o̍ wāna̍ cho̍ lo̍ŋ, mī ba̍su̍ nda̍ tɛ̍ɛ̍. Wānā o̍ wāna̍ lo̍ yōōmū o̍ lɛ̄ŋndē Fīli̍i̍tīāāle̍ŋ ni᷄ŋ, o̍ pēe̍ mɛ̄ŋmā īhɛ᷄llo̍ hōlnɔ᷄ŋndo̍, I̍ cho̍ nda̍ tɛ̄ɛ̄mbūū kpo̍u̍.

¹⁷I̍ cho̍ hūnɔ̄ɔ̄ tu̍mbe̍ dɔ̍ɔ̍nɔ᷄ŋ a̍ wāŋnda̍ Fīli̍i̍tīāŋ ō kālā ka̍lā, mī hu̍ŋ tu̍sī nda̍ dɛ̍nɛ̍ pa̍lāā bɛ̄ndōo̍ chōo̍, mī mi̍ŋgu̍l nda̍ māa̍. O̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”