Read Southern Kisi Īsi̍kīāā 26 Bible Online

Īsi̍kīāā 26 - Southern Kisi bible

Īsi̍kīāā 26

¹Wɔ̄sī na̍a̍ ŋ̄ chīŋa̍ wɔ̄sīla̍ŋ tɔ̍, a̍ ō pīlɛ̍ o̍ bīyɔ̄ɔ̍ ni᷄ŋ Ba̍bi̍lɔ̄ŋ nde̍, pāa̍le̍ tāse̍le̍ŋ o̍ pāŋgi̍i̍ pu̍m ni᷄ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, wāŋnda̍ Ta̍a̍yā a̍ cho̍ Chūlu̍sɛ̄lɛ̄m māmɔ̄ɔ̍ ma̍ wā dīmīo̍o̍ āā, ‘Mbɔ̄ Chūlu̍sɛ̄lɛ̄m o̍ pi̍ɔ̍l. Chi̍e̍e̍ tɔ̍ɔ̍ma̍ bɛ̄ndōo̍ ho̍ō, nāa̍ wāŋnda̍ kpo̍u̍ a̍ hu᷅ŋ ya̍kōle̍ŋ nda̍ ō de᷄l mbo̍ lō pɔ̄m. Ndu̍yɛ̍, ha̍a̍a̍ mbo̍ pīɔ̄l, na̍a̍ wāŋnda̍ Ta̍a̍yā ŋ̍ cho̍ sīmnɔ᷄ŋ wa̍nāā tɔ̄nɔ̄.’

³“Le̍la̍ŋ, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ dɔ̍ɔ̍nu᷄ŋ tu̍mbe̍ a̍ nya̍ wāŋnda̍ Ta̍a̍yā. Ndu̍yɛ̍ I̍ cho̍ hūnɔ̄ɔ̄ a̍ lɛ̄ŋīī bɔ̄ɔ̍ bɔ̍ɔ̍ le̍ nya̍ chīŋa̍la᷅ŋndo̍, mɛ̄ɛ̍ mɛ̄ŋnda̍ŋ o̍ pēe̍ mɛ̄ŋmā īhɛ᷄llo̍ mā hūŋ nu̍a̍ā a̍ kpāāyā bɛ̍ndōo̍ yɛ̍.

⁴Ā chō hūnɔ̄ɔ̄ sāāsa̍ ba̍lu̍ Ta̍a̍yā wo̍ pēsī pēsī, ndu̍yɛ̍, fo̍ndāŋndā vīlɛ̄īlā nya̍ tāŋgu̍l le̍ mɛ̄ŋgɛ̄lāa̍ le̍ ya̍a̍mɔ̍ɔ̍wa̍ la̍ŋ, mā pēsī la̍ŋ, mā tɛ̄ɛ̄mbu̍u̍ la̍ŋ kpo̍u̍. I̍ cho̍ pūūlōo̍ Ta̍a̍yā chi̍e̍e̍ ko̍o̍ndīāā mī vi̍o̍ū, mbō lo̍ pōūta̍ŋ kpo̍so̍ŋ.

⁵I̍ cho̍ tōsā, mī Ta̍a̍yā o̍ si̍mnu᷄ŋ yo̍ndō ībūŋgāa̍ o̍ mɛ̄ŋnda̍ŋ tɛ̄ɛ̄ŋ, nāa̍ wāŋnda̍ tɛ̄ī ya̍lāla̍ ndāla̍ŋ nda̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍, ndu̍yɛ̍ ī chō yɔ̄nɔ᷄ŋ. I̍ cho̍ tōsā mī ya̍a̍mɔ̍ɔ̍wa̍ hu᷄ŋ de᷅l Ta̍a̍yā chōo̍, mā pūŋga̍ nyɛ̄m ndāa̍ŋ kpo̍u̍ mā kūɛ̄nu᷄ŋ a̍ mu̍ŋ.

⁶Ndu̍yɛ̍, chi̍e̍e̍ŋ ndāa̍ŋ cho̍ o̍ lɛ̄ŋndē kpe̍e̍kpe̍i̍ le̍ŋ ni᷄ŋ ndo̍ŋ ki̍nɛ̍i̍, wānā o̍ wāna̍ cho̍ lo̍ŋ, ā chō nda̍ dīū a̍ mɔ̄ɔ̄ŋ fāŋndo̍ŋ. O̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

⁷Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “I̍ cho̍ tōsā, mī Māsāa̍ Nābi̍u̍kānɛ̍ɛ̍sā, māsāa̍ Ba̍bi̍lɔ̄ŋ, māsa̍ hi̍o̍ū māsāa̍ kpo̍u̍ wo̍, mbō chɛ᷄ŋ ba᷅ lūāŋndo̍ a̍ su̍a̍ā chɔ̄ūwa̍, ndu̍yɛ̍ a̍ nyɛ̄lā su̍a̍a̍ ā nāŋnda̍ŋ, a̍ so̍vɛ̄i̍ya̍a̍ sɔ̍ŋgā o̍ su̍a̍a̍ chōo̍ wa̍, a̍ so̍vɛ̄i̍ya̍ ku̍ndā bɛ̄ndōo̍, mbō hu᷄ŋ chi᷅ŋa̍la᷅ŋ nya̍ wāŋnda̍ Ta̍a̍yā.

⁸Chi̍e̍e̍ŋ nyāāŋ pɔ̍mbɔ᷄ŋ cho̍ o̍ lɛ̄ŋndē kpe̍e̍kpe̍i̍ le̍ŋ ni᷄ŋ ndo̍ŋ ki̍nɛ̍i̍, wānā o̍ wāna̍ cho̍ lo̍ŋ, ō chō nda̍ dīū a̍ mɔ̄ɔ̄ŋ fāŋndo̍ŋ. Ō chō nya̍ hūnɔ̄ɔ̄ dɔ̄wɔ̄ɔ̄ o̍ pi̍ŋndo̍ ni᷄ŋ kpɔ̍kɔ̍su̍, mbo̍ dēŋge̍la̍ pūūlōo̍ o̍ sāāsa̍ nya̍ chi̍o̍o̍ bālɔ̄ɔ̍ chɛ̍chɛ̍, le̍ kēēkōo̍ lēcho̍ō mbō bīī chi̍o̍o̍. Ō chō hūnɔ̄ɔ̄ nyɛ̄lā kālā ka̍lālā pūa̍a̍ chɔ̄ūwa̍ bīī o̍ lābā le̍ nda̍ māndāa̍ la̍ŋ dēŋgēlā pūla᷄ŋ le̍ so̍vɛ̄i̍ya̍a̍ ndūa̍a̍ māndāa̍.

⁹Māsāa̍ Ba̍bi̍lɔ̄ŋ nda̍ so̍vɛ̄i̍ya̍a̍ ndūa̍a̍ ā chō hūnɔ̄ɔ̄ sāāsa̍ nyāa̍ chīŋa̍la᷅ŋ a̍ nyɛ̄lā nda̍ pēsī sa̍a̍sāa̍ la̍ŋ le̍ ndu̍ pīɔ̄lɔ̄ɔ̍. Ndu̍yɛ̍, fo̍ndāŋndā vīlɛ̄īlā nya̍ tāŋgu̍l le̍ mɛ̄ŋgɛ̄lāa̍ la̍ŋ, ā chō la̍ŋ hūnɔ̄ɔ̄ tɛ̄ɛ̄mbūū kpo̍u̍ a̍ nyɛ̄m pīāāndo᷄ŋ.

¹⁰Su̍a̍ā ndāa̍ chɔ̄ūwa̍ ā wā ni̍ŋ ku̍ndā bɛ̄ndū bɛ̍ndōo̍, kɔ̄lā nda̍ wā ni̍ŋ nda̍ŋ, chu̍ndu̍ cho̍ wā chɔ̄nɔ᷄ŋndo̍ wo̍ ō chō nya̍ kūmbɔ̄ɔ̄ kpo̍u̍. Pīɔ̄lɔ̄ɔ̄ nda̍ chō sāāsa̍ chi̍e̍e̍ nyāa̍ mā lūɛ̄ī o̍ nya̍lo̍ chi̍e̍e̍ a̍ kpāāyā bɛ̍ndo̍o̍ wo̍, so̍vɛ̄i̍ya̍a̍ cho̍ o̍ su̍a̍a̍ chōo̍ wa̍ bɔ̄ɔ̄lūū nda̍ wā ni̍ŋ ndo̍, a̍ īdīkī dīkīī nyɛ̄lā nyāāna᷄ŋ nda̍ŋ, a̍ nyɛ̄lā su̍a̍a̍ ā nāŋnda̍ŋ lā wā ni̍ŋ ndo̍, sāāsa̍ chi̍o̍o̍ kpo̍u̍ ō chō hīīlɔ᷄ŋ.

¹¹So̍vɛ̄i̍ya̍a̍ ndūa̍a̍ sɔ̍ŋgā o̍ su̍a̍ā chɔ̄ūwa̍ chōo̍ wa̍, ā chō tīū o̍ bɛ̍ɛ̄la̍ŋ kpo̍u̍. Ā chō wānāā nyāa̍ dīū a̍ mɔ̄ɔ̄ŋ fāŋndo̍ŋ, ndu̍yɛ̍ sūŋgbu̍ma̍ ka̍lā ka̍lā ma̍ nya̍ tīīnda̍ŋ le̍ nya̍ māndāa̍ wa̍ŋ kpo̍u̍, ā chō ma̍ŋ yīmī mī mā dēli̍ lɛ̄ŋ.

¹²O̍ ko̍ŋ kɔ̍ɔ̍lī, nyɛ̄ o̍ nyɛ̄ nya̍ nɔ̄, nyɛ̄m nyāāŋ su̍lāŋ bɛ̄ndo̍ŋ ni̍, a̍ nyɛ̄m nyāa̍ŋ lēyāko᷄ŋ, mu̍ŋ kpo̍u̍ ā chō mu̍ŋ pūŋgā mā kūɛ̄nu᷄ŋ a̍ mu̍ŋ. Sāāsa̍ ba̍lu̍ Ta̍a̍yā wo̍ kpo̍u̍ ā chō ndu̍ hūnɔ̄ɔ̄ pēsī pēsī, ndu̍yɛ̍, chīɛ̄īlā nyāla̍ kɛ̍ndɛ̄ kɛ̍ndɛ̄la̍ŋ mā pēsi̍ la̍ŋ kpo̍u̍. Ndu̍yɛ̍, pōūtā nya̍ tāŋgu̍l tāŋgūltā lāŋ nda̍ŋ ni̍, pɛ̄ŋgɔ̍ŋ mu̍ŋ ni̍, a̍ pūūlū ko̍ŋ kpo̍u̍, ā chō kōōndīāā kpo̍u̍ mā kɔ̍ vi̍o̍ū o̍ pēe̍ mɛ̄ŋmā īhɛ᷄llo̍ ni᷄ŋ.

¹³I̍ cho̍ tōsā fɛ̍ɛ̍ŋ a̍ fɛ̍ɛ̍ŋ bɛ̍ɛ̍ wānā o̍ wānā tu̍i̍ī lɛ̍ wāŋnda̍ ŋ̄chōndu̍ so̍lī Ta̍a̍yā le̍, kɛ̄lɛ̄ŋgāā ni᷅ŋ te̍, mī wānā tu̍e̍ī wānā la̍to̍wā lɔ̍ɔ̄.

¹⁴I̍ cho̍ tōsā mī Ta̍a̍yā ta̍mbu̍, mɛ̄ɛ̍ fōōfōla̍ŋ mī lā lo̍. Ō chō sīmnɔ᷄ŋ fo̍ndāŋ wāŋnda̍ tɛ̄ī ya̍lā la̍ŋ ndo̍, ndu̍yɛ̍ fɛ̍ɛ̍ŋ a̍ fɛ̍ɛ̍ŋ, ō mi̍i̍ŋgū lɛ̍ mbō si᷄m te̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.”

¹⁵Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ o̍ di̍mi̍ a̍ Ta̍a̍yā o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, “Nūm Ta̍a̍yā, wānāa̍ ho̍lnu̍ŋ pe̍e̍ mɛ̄ŋmā īhɛ᷄llo̍ wa̍ kpo̍u̍, ā chō tūēīyɔ̄ɔ̄ a̍ mɛ̄ɛ̍ ya̍a̍mɔ̍ɔ̍wa̍ yām nu̍m ni̍ŋ yɛ̍, mī sīōōŋīī bɛ̄ndūe̍i̍ bīī nda̍. Ā tūɛ̄ī ni̍ŋ a̍ wānāā bɛ̄ndūāā nda̍ dīū ni̍ŋ lo̍ŋ nda̍ o̍kɔ̄ɔ̄, ndu̍yɛ̍ mā tūēī wānāā nda̍ yɔ̄ŋūl ni̍ŋ nda̍ kūnda̍ŋ a̍ nyɛ̄ nɛ̄īyāa̍.

¹⁶Māsāā bɛ̍ndūa̍a̍ ho̍lnu̍ŋ pe̍e̍ mɛ̄ŋmā īhɛ᷄llo̍ wa̍ ki̍nɛ̍i̍, sīōōŋīī bɛ̄ndūe̍i̍ chō nda̍ hūnɔ̄ɔ̄ bīyɔ̄ɔ̄ a̍ nyɛ̍ yɔ̍nūŋ ni̍ŋ a̍ nūm ndo̍, nda̍ kpo̍u̍ mā chɛ᷄ŋ o̍ kpe̍ŋgbe̍i̍la̍ ndāla̍ lēmāsā la̍ŋ chōo̍. Ā chō dōmāla̍ ndāla̍ lēmāsāla̍ŋ sōlī, ndu̍yɛ̍ mā sōli̍ nyɛ̄lā kɛ̄ndɛ̄ kɛ̍ndɛ̄lā hūāūwāālā nda̍ wōōnu̍ŋ nda̍ŋ, mā cha᷄l lɛ̄ŋ a̍ nyīīyāa̍. Tē ā tūēī nyɛ̍ yɔ̍nūŋ ni̍ŋ a̍ nūm ndo̍ pɛ̍, sīōōŋīī bɛ̄ndūe̍i̍ chō nda̍ bīyɔ̄ɔ̄, ndu̍yɛ̍ le̍ te̍le̍ŋ o̍ te̍le̍ŋ ā wā ni̍ŋ nyi̍i̍yāa̍.

¹⁷Ā chō chōndi̍i̍ bīīsi̍e̍i̍ he̍ī sōlī a̍ nūm o̍kɔ̄ɔ̄, mā dīmi̍ māā, o̍o̍ Ta̍a̍yā, chi̍e̍e̍ tɔ̍ɔ̍ma̍ bɛ̄ndōo̍ ho̍ō a̍ de᷄l fɔ̍! Kpāāyā bɛ̍ndū nūm o̍o̍ nɔ̍ o̍ pēe̍ mɛ̄ŋmā īhɛ᷄llo̍ chōo̍ wo̍, kpāāyā ko̍ŋ ō hɛ̄lu᷄ŋ nu̍m fɔ̍. Nu̍m ni̍, wānāā nūmnda̍ ni̍, lā wa̍ wānāā kpāāyāā bɛ̍ndū o̍ pēēla̍ mɛ̄ŋmā īhɛ᷄lla̍ŋ chōo̍. Mi̍ lā tōsā, wānāa̍ ba̍lu̍ nya̍ wa̍ kpo̍u̍ mi̍ sīōōŋīī bɛ̄ndūe̍i̍ bīī nda̍ a̍ nya̍.

¹⁸Le̍ he̍ī, lɛ̄ŋīī ībūŋgɛ̄i̍ cho̍ o̍ pēe̍ mɛ̄ŋmā īhɛ᷄llo̍ tɛ̄ɛ̄ŋ nde̍, wānāa̍ cho̍ lo̍ŋ nda̍ kpo̍u̍ mɛ̄ɛ̍ nda̍ tūēī māā ya̍a̍mɔ̍ɔ̍wa̍ yēm nu̍m, mi̍ sīōōŋīī bɛ̄ndūe̍i̍ bīī nda̍ ma̍ nyīīyā. Nda̍ kpo̍u̍ mɛ̄ɛ̍ nda̍ tūēī māā ā chūū, mi̍ kɔ̄ndɔ̄fi̍llo̍ bīī nda̍ ma̍ nyīīyā.”

¹⁹Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍. Mbo̍ dīmī āā, “Nūm Ta̍a̍yā, I̍ cho̍ nu̍m tɛ̄ɛ̄mbūū, mā sīmnu᷄ŋ mɛ̄ɛ̍ chi̍o̍o̍ lō nu̍a̍ā pɔ̄m, wānā o̍ wānā ve᷅ lɛ̍ lo̍ŋ te̍ yɛ̍. I̍ cho̍ tōsā mī mɛ̄ŋmā yīŋgi̍lɛ̍i̍ma̍ bɛ̍ndūa̍ŋ mā hīŋ, mī mā mēl nu̍m chɔ̍ŋgɔ̍mu̍. Pēe̍ mɛ̄ŋmā īhɛ᷄llo̍ ō chō nu̍m hūnɔ̄ɔ̄ kūmbɔ̄ɔ̄ kpo̍u̍.

²⁰Ndu̍yɛ̍, I̍ cho̍ nu̍m yɔ̄ŋ o̍ wāŋ vīlɛ̍i̍ya̍ lo̍ chi̍e̍e̍, mī lā kɔ̍ wa᷅ lo̍ŋ, nya̍ wāŋ bɛ̄ndūāā māsīndīa̍a̍ lātūlu̍, a̍ ku̍ɛ̄ ni᷅ŋ lo̍ŋ si̍ndɛ̄ si̍ndɛ̄ wa̍. O̍ lɛ̄ŋndē le̍ŋ bɛ̄ŋgu̍ ŋ̄ chō ni᷅ŋ wā le̍ fɛ̍ɛ̍ŋ a̍ fɛ̍ɛ̍ŋ ni̍, o̍ fo̍nda᷄ŋ cho̍ ko̍ŋ māā pɔ̄m māsīndɛ̄ si̍ndɛ̄ wo̍, nya̍ wānāā māsīndīa̍a̍ lātūlu̍, a̍ vi᷅ lɔ̍ɔ̍ ko̍ŋ nda̍. Lo̍ŋ ŋ̄ chō wā le̍ fɛ̍ɛ̍ŋ a̍ fɛ̍ɛ̍ŋ ni̍, a̍ mi̍i̍ŋgū lɛ̍ mā sīmnu᷄ŋ chi̍e̍e̍ le̍, kɛ̄lɛ̄ŋgāā ni᷅ŋ te̍, mā mi̍i̍ŋgu̍ o̍ chi̍e̍ēŋndo̍ chōo̍ wa̍nāa̍ cho̍ yōōmū wa̍ tɛ̄ɛ̄ŋ.

²¹Wāŋnda̍ kpo̍u̍ sīōōŋīī bɛ̄ndūe̍i̍ chō nda̍ bīyɔ̄ɔ̄ a̍ nyɛ̍ yɔ̍nūŋ ni̍ŋ a̍ nūm ndo̍. Ndu̍yɛ̍, mɛ̄ɛ̄lu̍la̍ nu̍mnda̍ŋ la̍ŋ la̍ wa᷅ ni̍ŋ la̍ŋ le̍ fɛ̍ɛ̍ŋ a̍ fɛ̍ɛ̍ŋ ni̍. Wāŋnda̍ mɛ̄ɛ̄ndāŋ ni̍ŋ le̍ nūm, kɛ̍ ā se̍e̍lūŋ ni̍ŋ nu̍m te̍, kāni̍ fo̍ndōle̍, ā chō hūnɔ̄ɔ̄ lō le̍ fɛ̍ɛ̍ŋ a̍ fɛ̍ɛ̍ŋ. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.”