Read Southern Kisi Īsi̍kīāā 27 Bible Online

Īsi̍kīāā 27 - Southern Kisi bible

Īsi̍kīāā 27

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ nāa̍ ya̍ chu̍a̍. Mbo̍ dīmūl la̍ āā,

²“Wāna̍ chi̍o̍o̍ Īsi̍kīāā, so̍li̍ chōndi̍i̍ bīīsi̍e̍i̍ he̍ī a̍ Ta̍a̍yā o̍kɔ̄ɔ̄,

³chi̍e̍e̍ cho̍ ho̍ō ō tāŋgūlāā o̍ pēe̍ mɛ̄ŋmā īhɛ᷄llo̍ kɔ̄ŋgɔ̍, mi̍ wāŋnda̍ o̍ pēēla̍ bɛ̄ndūla̍ŋ kɔ̄ŋgɔ̍ kpo̍u̍ a̍ wa᷅ hūnɔ̄ɔ̍ yākōle̍ŋ lo̍ŋ ndo̍. Di̍mu̍l Ta̍a̍yā māā ya̍ Mɛ̍lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍ dīmi̍ māā, o̍o̍ Ta̍a̍yā, le̍ mɛ̄ɛ̍ ŋ̄ na᷄ŋ nāŋɔ̄ɔ̄ bɛ̄ndōo̍ yɛ̍, le̍la̍ŋ ŋ̄ kēlū yōŋgāa̍ ni̍.

⁴Pɛ̄ŋgu̍la̍ nu̍mnda̍ŋ o̍ pēe̍ mɛ̄ŋmā īhɛ᷄llo̍ tɛ̄ɛ̄ŋ pɔ̍ la̍ cho̍ ni̍. Ndu̍yɛ̍, mi̍ wānāa̍ ta̍ŋgu̍l nu̍m nda̍ ā bɛ̄ɛ̄ndīāā nu̍m nyɛ̄ kɛ̄ndɛ̄ kɛ̍ndɛ̄, māā dɛ̄ndɛ̄ bɛ̍ndu̍ ku̍ā o̍ mɛ̄ŋnda̍ŋ chōo̍ wo̍.

⁵Pɛ̄ŋgɔ̍ŋ yɔ̄mīī fa̍āve̍ o̍ Pēmbīī Ha᷅mnde̍ chōo̍, a̍ mu̍ŋ nda̍ bɛ̄ɛ̄ndi̍a̍a̍ nu̍m ni̍. Yɔ̄m vīlɛ̄ī bɛ̄ndū nda̍ sīmi̍ o̍ dɛ̄ndɔ̄ɔ̍ ho̍ō ni᷄ŋ le̍ kōlā bɛ̍ndu̍ ma̍lā nu̍m le̍ kɔ̄la̍ŋ ndo̍ kīndɔ̄ɔ̍ wo̍, a̍ yɔ̄m si̍dāā wo̍ Le̍ba̍nɔ̄ŋ nda̍ bɛ̄ɛ̄ndi̍a̍a̍ ndu̍ ni̍.

⁶Pɛ̄ŋgɔ̍ŋ bɛ̍ndūŋ nda̍ kɛ̄si̍ nu̍m a̍ mākɔ̄ɔ̄ le̍ nu̍m bōlle̍ŋ mūlīo̍o̍ wo̍ŋ, a̍ yɔ̄mīī ɔ̍kū ve̍ Ba̍sīāŋ nda̍ tōōsi̍a̍a̍ mu̍ŋ ni̍. O̍ ko̍ŋ kɔ̍ɔ̍lī, pɛ̄ŋgɔ̍ŋ nda̍ pɛ̄ŋgɛ̍la̍ lēni᷄ŋ ndo̍ŋ, a̍ yɔ̄mīī pa̍īŋnde̍ Sa̍i̍pūlɔ̄ɔ̄ nda̍ tōōsi̍a̍a̍ mu̍ŋ ni̍. Ndu̍yɛ̍, ma̍ bɛ̄ɛ̄ndīāā nu̍m lēni᷄ŋ kpo̍u̍ a̍ chīŋīī kāmɛ̄i̍.

⁷Kōlāla̍ bɛ̍ndūlā nda̍ tōndū le̍ nu̍m mālāa̍ le̍ kɔ̄la̍ŋ chɔ̍ chɔ̍ la̍ŋ, a̍ kōlāla̍ kɛ̍ndɛ̄ kɛ̍ndɛ̄la̍ŋ I̍chi̍pī nda̍ tōōsi̍a̍a̍ la̍ŋ ni̍, lā lūāā lēchōo̍ nyɛ̍ kɛ̄ndɛ̄ kɛ̍ndɛ̄. Wānā a̍a̍ lo᷅ kɔ̍ɔ̍lī kɔ̍ɔ̍lī po̍lo̍ŋ mā chē kōlāla̍ŋ nda᷅ŋ. Yɛ̄kpɛ̍ pɔ̍mbɔ̄ nda̍ tāŋgu̍l nu̍m o̍ bōlle̍ŋ chōo̍ wo̍, kōlāla̍ kɛ̍ndɛ̄ kɛ̍ndɛ̄lā nda̍ chɛ᷄ŋ Sa̍i̍pūlɔ̄ɔ̄, o̍ pēe̍ mɛ̄ŋmā īhɛ᷄llo̍ kɔ̄ŋgɔ̍, lā tōōsi̍a̍a̍, a̍ fūŋi̍i̍ bu᷅li̍īye̍, ndu̍yɛ̍ a̍ fūŋi̍i̍ bɔ̍ɔ̄lɛ̍ī la̍ŋ, a̍ la̍ŋ nda̍ tōōsi̍a̍a̍ ndu̍ ni̍.

⁸Pūa̍a̍ Sa̍i̍dɔ̄ŋ chi̍e̍e̍, a̍ ha̍ā A̍a̍va̍dī, nda̍ nda̍ a̍a̍ ku̍ā a̍ nūm ni̍. Ndu̍yɛ̍ pūa̍a̍ nu̍mnda̍ Ta̍a̍yā, ā nda̍ a̍a̍ nɔ̍ tāāsi̍o̍o̍ a̍ mɛ̄ŋnda̍ŋ o̍kɔ̄ɔ̄ wa̍, nda̍ wa̍ nu̍m bōlle̍ŋ ni̍.

⁹Pūa̍a̍ Ba̍bi̍lɔ̄ŋ, a̍ pɛ̍ɛ̍ku̍ a̍ dɛ̄ndɛ̄la̍ bɛ̍ndūla̍ŋ tōōsīa̍a̍ o̍kɔ̄ɔ̄ wa̍, nda̍ to̍o̍si̍a̍a̍ nu̍m ni̍. Dɛ̄ndɛ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ, fūlāa̍ bā o̍ bā fe̍e̍ le̍ hūnɔ̄ɔ̍ yākōle̍ŋ tōsāa̍ o̍ nūm ni̍ŋ. Wāŋnda̍ hūnɔ̄ɔ̍ a̍ nyɔ̄ɔ̍ŋ mā sīŋgāfīlā a̍ nyɛ̄m chēle̍ŋndo̍ŋ.”

¹⁰“Nūm Ta̍a̍yā, so̍vɛ̄i̍ya̍ Pa̍a̍sīāā, a̍ Li̍dīāā, a̍ Li̍bīāā, nda̍ wa̍ so̍vɛ̄i̍ya̍a̍ nu̍m ā lēlɛ̄ŋnda̍ ni̍. So̍vɛ̄i̍ya̍ ha̍ā, mā lɛ̄ɛ̄ndu̍u̍ nyɛ̄lā ndāla̍ ka̍lā ka̍lālā so̍vɛ̄i̍ya̍ bīī o̍ lābā le̍ nda̍ māndāa̍ la̍ŋ, a̍ mɔ̍si̍lta̍ ndāla̍ chɔ̄ūla̍ŋ o̍ dɔ̍ɔ̍ŋgɔ̍lā ndāla̍ŋ kpo̍u̍. Nyɛ̄ ko̍ŋ to̍sa̍ ni̍ ma̍ sīmnu᷄ŋ chi̍e̍e̍ kɛ̍ndɛ̄ bɛ̄ndū.

¹¹So̍vɛ̄i̍ya̍ A̍a̍va̍dī, nda̍, nda̍ a̍a̍ ma̍ndā sa̍a̍sa̍ ba̍lu̍ nu̍m ndo̍ ni̍. O̍ ko̍ŋ kɔ̍ɔ̍lī, pūa̍a̍ Ka̍ma̍dī, nda̍ nda̍ a̍a̍ ma̍ndā fo̍ndāŋndā kālā ka̍lā wa̍ le̍ mɛ̄ŋgɛ̄lāa̍ le̍ ya̍a̍mɔ̍ɔ̍wa̍ la̍ŋ ni̍. So̍vɛ̄i̍ya̍ ha̍ā, mī nda̍ a̍a̍ lɛ̍ɛ̍ndu̍u̍ nyɛ̄lā ndāla̍ ka̍lā ka̍lālā so̍vɛ̄i̍ya̍ sɔ̄ŋgā o̍ lābā le̍ nda̍ māndāa̍ la̍ŋ o̍ sāāsāa̍, mī nda̍ a̍a̍ ba̍lu̍ la̍ŋ kpɔ̍kɔ̍su̍. Nyɛ̄ ko̍ŋ to̍sa̍ ni̍ ma̍ sīmnu᷄ŋ chi̍e̍e̍ kɛ̍ndɛ̄ bɛ̄ndū.

¹²“Wāŋnda̍ mālɔ̄ɔ̍ o̍ lɛ̄ŋndē Sīpe᷅ŋnde̍ŋ ni᷄ŋ mā hūŋ ya̍kōle̍ŋ o̍ nūm ndo̍. Tē ā wa᷄ hu̍nɔ̄ɔ̍ pɛ̍, ā hīŋ a̍ ka̍ni̍ŋ hu̍mbo̍ŋ, a̍ chīli̍ŋndo̍ŋ, a̍ tɛ᷅ŋ ndo̍ŋ, a̍ li̍īyo̍ŋ mā sīŋgāfīlā a̍ nyɛ̄m nūm kɛ̍ndɛ̄ kɛ̍ndɔ᷄ŋ.

¹³Wāŋnda̍ Ki̍li̍sī ni̍, a̍ wāŋnda̍ Tu̍bāā, a̍ wāŋnda̍ Mɛ̍si̍ɛ̍kī, nda̍ kpo̍u̍ hūnɔ̄ɔ̍ a̍ chīa̍a̍ ndāa̍, ndu̍yɛ̍ a̍ nyɛ̄m ndāa̍ŋ ŋ̄būlɔ̍ŋsīi̍yo̍ŋ, mā sīŋgāfīlā a̍ nyɛ̄m nūmndo̍ŋ.

¹⁴Wāŋnda̍ mālɔ̄ɔ̍ Bɛ̄tī To̍ka̍māā mā hūŋ a̍ su̍a̍ā ndāa̍ wa̍lla̍, a̍ su̍a̍ā chɔ̄ūwa̍, ndu̍yɛ̍ a̍ chɔ̄lūāā yɛ̄yi̍i̍ mu̍ūli̍āŋnda̍, mā hūŋ si̍ŋgāfīlā a̍ nyɛ̄m nūm kɛ̍ndɛ̄ kɛ̍ndɔ̍ŋ.

¹⁵Wāŋnda̍ fūlāa̍ o̍ lɛ̄ŋndē Lu̍o̍di̍sīle̍ŋ ni᷄ŋ, mā hūŋ nyɔ̍ɔ̍ŋ pīōndɔ̄ɔ̄ o̍ nūmndo̍. O̍ ko̍ŋ kɔ̍ɔ̍lī, lɛ̄ŋīi̍ ho̍lnu̍ŋ mɛ᷅ŋnda̍ŋ nde̍, ī bɔ̄ɔ̍ bɔ̍ɔ̍ hūnɔ̄ɔ̍ a̍ chīŋūŋ kāma᷄ŋ, a̍ yɔ̄mīī ba̍ā kālɛ̄ī kɛ̄ndɛ̄ kɛ̍ndɛ̄i̍, mā hūŋ si̍ŋgāfīlā a̍ nyɛ̄m nūmndo̍ŋ.

¹⁶Wāŋnda̍ chɔ̄nɔ᷄ŋndo̍ o̍ lɛ̄ŋndē Si̍i̍lūīāle̍ŋ ni᷄ŋ mā hūŋ le̍ nyɛ̄m nyāāŋ kɛ̍ndɛ̄ŋ bɛ̄ndo̍ŋ pīōndɔ̄ɔ̍. Tē ā wa̍ hūnɔ̄ɔ̍ pɛ̍, ā hīŋ a̍ pōūtā ba̍ā kālālā ɛ̍mɛ̍lu̍e̍e̍dī la̍ŋ, a̍ kōlāla̍ bɔ̍ɔ̄la̍ā la̍ŋ, a̍ kōlāla̍ cho̍ lā lūāā lēchōo̍ nyɛ̍ kɛ̍ndɛ̄ kɛ̍ndɛ̄ la̍ŋ, a̍ kōlāla̍ kɛ̍ndɛ̄ kɛ̍ndɛ̄lā chēle̍ŋ, a̍ pōūtā ba̍ā kālālā ko̍lūāā la̍ŋ, a̍ lā lɔ̍bīla̍ŋ, mā hūŋ si̍ŋgāfīlāa̍ a̍ nyɛ̄m nūm kɛ̍ndɛ̄ kɛ̍ndɔ᷄ŋ.

¹⁷O̍ ko̍ŋ kɔ̍ɔ̍lī, wāŋnda̍ Chu̍dā ni̍, wāŋnda̍ I̍sɔ̄lūɛ̄ī ni̍, nda̍ kpo̍u̍ hūnɔ̄ɔ̍ a̍ wi̍tīi̍ŋ ndāāŋ sɛ̍nɛ̄īyo̍ŋ, a̍ līa̍a̍ŋ, a̍ chūɛ̄īmā ɔ̄li̍fīi̍ya̍ŋ, a̍ nyɛ̄m chūŋ kɛ̄ndɛ̄ŋ bɛ̄ndo̍ŋ, mā hūŋ si̍ŋgāfīlā a̍ nyɛ̄m nūm kɛ̍ndɛ̄ŋ bɛ̄ndo̍ŋ.

¹⁸“Wāŋnda̍ fūlāa̍ Dāma̍si̍kɔ̍ɔ̄ chi̍e̍e̍, mā hūŋ le̍ nyɛ̄m nu̍m lēyāko᷄ŋ, a̍ nyɛ̄m nūm pīla̍ to̍o̍sīāā wo̍ŋ pīōndɔ̄ɔ̍. Tē ā wa᷄ hūnɔ̄ɔ̍ pɛ̍, ā hīŋ a̍ mūɛ̄īmā mākīle̍pīi̍ma̍ kɛ̍ndɛ̄ kɛ̍ndīa̍ŋ, mā nda̍ tōōsīāā Hɛ̍li̍bɔ̄ŋ nda̍ŋ, ndu̍yɛ̍, a̍ yīīŋīī sāā nda̍ tōōsīāā Sa̍hāā ve̍, mā hu᷄ŋ si̍ŋgāfīlā a̍ nyɛ̄m mu᷅ŋ. Chīli̍ŋu̍ŋ kɛ̍ndɛ̄ kɛ̍ndɔ᷄ŋ kpo̍u̍, ndu̍yɛ̍, a̍ nyɛ̄m nda̍ dūāū o̍ lāmndo̍ wo̍ŋ, hūnɔ̄ɔ̍ a̍ mu̍ŋ mā sīŋgāfīlā a̍ nyɛ̄m nūmndo̍ŋ.

¹⁹

²⁰Wāŋnda̍ chɔ̄ŋnɔ᷄ŋndo̍ Dɛ̍dāŋ, mā hūŋ a̍ kōlāla̍ kɛ̍ndɛ̄ kɛ̍ndɛ̄lā nda̍ pɛ̄ŋgɛ̄lā su̍a̍a̍ o̍ lākɔ̄ɔ̄ le̍ cha᷄lle̍ lēchōo̍ la̍ŋ, mā sīŋgāfīlā a̍ nyɛ̄m nūmndo̍ŋ.

²¹Wāŋnda̍ Ālu̍e̍e̍bīāā ni̍, wāŋ bɛ̄ndūa̍a̍ o̍ lɛ̄ŋndē Kɛ̍dāāle̍ŋ ni᷄ŋ ni̍, nda̍ kpo̍u̍ hūnɔ̄ɔ̍ a̍ sāa̍ ndāā fɔ̍ŋndu̍a̍a̍, a̍ sāā ko̍ndu̍a̍a̍, a̍ chūīŋāā ndāa̍ mā hūŋ mɛ̍īyo̍ mī nūm kē nda̍ nyɛ̄m nu̍m lēyāko᷄ŋ.

²²Le̍ nyɛ̄m kɛ̄ndɛ̄ kɛ̍ndɛ̄ŋ ŋ̄ nɔ̄ wo̍ŋ, wāŋnda̍ fūlāa̍ o̍ lɛ̄ŋndē Si̍ɛ̍bāle̍ŋ, a̍ lɛ̄ŋndē Lu̍a̍a̍māle̍ŋ, mā hūŋ a̍ pōūtā ba̍ā kālāla̍ŋ, a̍ ko̍o̍līi̍yo̍ŋ, ndu̍yɛ̍, a̍ nyɛ̄m kɛ̄ndɛ̄ kɛ̍ndɛ̄ŋ nda̍ dūāū o̍ lāmndo̍ wo̍ŋ, mā hūŋ si̍ŋgāfīlāa̍ a̍ nyɛ̄m nūmndo̍ŋ.

²³Wāŋnda̍ Ha̍lūāŋ chi̍e̍e̍ ni̍, ha̍ā Ka̍nɛ̄ɛ̄ ni̍, a̍ ha̍ā I̍dɛ̄ŋ, a̍ wānāā lēyākūāā bɛ̄ndūa̍a̍ Si̍ɛ̍bā, a̍ wāŋnda̍ A̍sīɔ̄ɔ̄ chi̍e̍e̍, a̍ ha̍ā Chi̍li̍ma̍dī, nda̍ kpo̍u̍ mālɔ̄ɔ̍ mā hūŋ ya̍kōle̍ŋ tōsāa̍ o̍ nūm ndo̍.

²⁴Wāŋnda̍ ha̍ā kpo̍u̍, hūnɔ̄ɔ̍ a̍ dōmāla̍ kɛ̍ndɛ̄ kɛ̍ndɛ̄lā bɛ̄ŋnda̍ŋ, a̍ kōlāla̍ ba̍ā kālāla̍ŋ, a̍ kōlāla̍ nɔ̍ pa̍tāŋndā kɛ̄ndɛ̄ kɛ̍ndɛ̄la̍ŋ nda̍ŋ, a̍ nyɛ̄lā kɛ̄ndɛ̄ kɛ̍ndɛ̄lā nda̍ pɛ̄ŋgɛ̄lā lɛ᷅ŋ chīɛ̄ī ni̍ŋ, mi̍ lā nɔ̄ kɔ̄ɔ̍le̍ yɛ̍ yɛ̍le̍ŋ nda̍ŋ, lā pɛ̄mbīāā kpo̍lo̍ka̍ a̍ yūēī, le̍ la̍ŋ māndāa̍. Nyɔ̄ɔ̍ŋ mu᷅ŋ kpo̍u̍, hūnɔ̄ɔ̍ a̍ mu̍ŋ mā hūŋ mu̍ŋ pīsīo̍o̍ o̍ nūmndo̍, mī nda̍ pīāndū nyɛ᷅m nūmndo̍ŋ.

²⁵Dɛ̄ndɛ̄la̍ tɔ̍ɔ̍ma̍la̍ ku̍ā o̍ mɛ̄ŋnda̍ŋ chōo̍ la̍ŋ, la̍ŋ la̍ a̍a̍ ku̍ā a̍ nyɛ̄m nūmndo̍ŋ o̍ lɛ̄ŋīī yɛ̍ yɛ̍i̍ ni᷄ŋ ni̍. A̍ wa̍ māā dɛ̄ndɛ̄ bɛ̍ndu̍ ku̍ā o̍ mɛ̄ŋnda̍ŋ chōo̍ wo̍. Ma̍ pēī wōlɔ̄ɔ̄lā lūsu̍lɛ̍i̍la̍ŋ lēni᷄ŋ cha̍.

²⁶Kɛ̍ mɛ̄ɛ̍ wānāa̍ wa̍ kɔ̄la̍ŋ a̍ ndu̍ wa̍, ā fūūlu̍u̍ o̍ pēe̍ mɛ̄ŋmā īhɛ᷄llo̍ tɛ̄ɛ̄ŋ, mī hūēīyīi̍ bɛ̄ndūi̍i̍ cha᷅ŋ ba᷅ pāa̍le̍ŋ lē chāŋndo̍ ve̍ ī hu᷄ŋ lɔ̍ɔ̄ ndu̍.

²⁷Ndu̍yɛ̍, nyɛ̄ o̍ nyɛ̍ wa̍ lēni᷄ŋ, nyɛ̄m nu᷄m lēyākōŋ bɛ̄ndo᷄ŋ ni̍, a̍ wānāa̍ wa̍ kɔ̄la̍ŋ a̍ dɛ̄ndɔ̄ɔ̍ ho̍ō wa̍, a̍ wānāa̍ to̍o̍si̍a̍a̍ ndu̍ wa̍, a̍ wānāā nūm a̍ lēyākūa̍a̍, a̍ so̍vɛ̄i̍ya̍a̍ wa̍ lēni᷄ŋ nda̍, nda̍ kpo̍u̍ ma̍ lō o̍ pēēlo̍ pa̍a̍le̍ le̍ŋ.

²⁸Chi̍e̍e̍ŋ ho̍lnu̍ŋ pe̍e̍ mɛ̄ŋmā īhɛ᷄llo̍ wo̍ŋ, wānāa̍ cho̍ lo̍ŋ nda̍, mɛ̄ɛ̍ nda̍ tūēī wānāa̍ wa̍ lōo̍ o̍ pēēlo̍ wa̍ cha᷄ŋnda̍ŋ chōo̍ cho̍o̍, nda̍ kpo̍u̍ ma̍ nyīīyā kpa̍kpā a̍ sīōōŋnde̍.”

²⁹“Wānāa̍ to̍sā wa̍llo̍ o̍ dɛ̄ndɛ̄la̍ bɛ̄ndūla̍ŋ ni᷄ŋ nda̍ kpo̍u̍, a̍ fūla̍ o̍ dɛ̄ndɛ̄la̍ ndāla̍ŋ ni᷄ŋ. Wānāa̍ si̍nā a̍ mɛ̄ŋnda̍ŋ o̍kɔ̄ɔ̄ wa̍, a̍ wānāa̍ ku̍ā a̍ dɛ̄ndɛ̄la̍ŋ nda̍, ā fūla̍ o̍ dɛ̄ndɛ̄la̍ ndāla̍ŋ ni᷄ŋ ma̍ sīm o̍ pīo̍o̍ kɔ̄ŋgɔ̍.

³⁰Kɔ̄lta̍ŋ lā tāmbu̍ nda̍, ā kōŋu̍l nu̍m chōo̍ kpe̍le̍ŋ a̍ cha᷄ŋndo̍. Ā dɔ̄ūnu᷄ŋ chu̍ndo̍o̍ o̍ lēbōl, ndu̍yɛ̍ ma̍ yūūlīa̍ŋ o̍ pūlta̍ŋ ni᷄ŋ.

³¹Ā sēndi̍ yu̍ŋgu̍lta̍ŋ le̍ nūm, ndu̍yɛ̍ ma̍ wōōnu᷄ŋ nyɛ̍lā lābɛ̍kīla̍ŋ. Kɔ̄lta̍ŋ lā tāmbu̍ nda̍ kpe̍e̍kpe̍i̍, ndu̍yɛ̍ ma̍ wā nu̍m cha᷄ŋndo̍ chōo̍.

³²Ā kōŋu̍l cho̍o̍ cho̍o̍ kpe̍le̍ŋ, ndu̍yɛ̍ mā wā chōndi̍i̍ bīīsi̍e̍i̍ sōlīo̍o̍ a̍ nūm o̍kɔ̄ɔ̄ āā, ‘Kāni̍ bɛ̍ɛ̍, ɔ̍ɔ̄ chi̍e̍e̍ o̍ chi̍e̍e̍ sɔ̍la̍ tɛ̄ɛ̄mbūūwo̍ o̍ pēe̍ mɛ̄ŋmā īhɛ᷄llo̍ tɛ̄ɛ̄ŋ māā Ta̍a̍yā wo̍?

³³Mɛ̄ɛ̍ dɛ̄ndɛ̄la̍ nu̍mnda̍ ku̍ā o̍ mɛ̄ŋnda̍ŋ chōo̍ la̍ŋ lā hīŋ a̍ nyɛ̄m nu᷄m lēyāko᷄ŋ, ma̍ kē lɛ̄ŋīī bɔ̄ɔ̍ bɔ̍ɔ̍ nyɛ᷅m nda̍ a̍a̍ ha̍u̍ bā wo̍ŋ. Ma̍ tōsā mi̍ māsāā bɛ̍ndūa̍a̍ bā o̍ bā fe̍e̍ a̍ su᷅l, a̍ nyɛ̄m nūm su̍lāŋ bɛ̄ndo᷄ŋ, ndu̍yɛ̍ a̍ nyɛ̄m nu᷄m lēyāko᷄ŋ.

³⁴Kɛ̍ ndu̍yɛ̍ hūēīyīī bɛ̄ndūe̍i̍ ī tɛ̄ɛ̄mbu̍u̍ nu̍m o̍ pēe̍ mɛ̄ŋmā īhɛ᷄llo̍ tɛ̄ɛ̄ŋ, o̍ fo̍ndāŋ yīŋgi̍lɛ̍i̍ bɛ̍ndōo̍. Ndu̍yɛ̍ nyɛ̄m nu̍m lēyāko᷄ŋ kpo̍u̍, a̍ wānāa̍ to̍sā wa̍llo̍ o̍ nūm ni̍ŋ nda̍, ā lo̍ o̍ pēēlo̍.’

³⁵“Wānāa̍ ho̍lnu̍ŋ pe̍e̍ mɛ̄ŋmā īhɛ᷄llo̍ wa̍ kpo̍u̍, sīōōŋīī bɛ̄ndūe̍i̍ bīī nda̍ ma̍ nyīīyā kpa̍kpā a̍ nyɛ̍ yɔ̍nūŋ a̍ nūm ndo̍. Māsāa̍ ndāā bɛ̍ndūa̍a̍ kpo̍u̍, kpɛ̍īyo̍ bīī nda̍. Ā nyāāndi̍a̍a̍ hɔ̄lla̍ a̍ sīōōŋnde̍.

³⁶Wānāā nda̍ a̍a̍ to̍sā ya̍kōle̍ŋ a̍ nūmnda̍, ā sīɔ̄ɔ̄ndi̍a̍a̍ nu̍m. Mɛ̄ɛ̄lu̍la̍ nu̍mndā wɔ̄ɔ̍ŋ wɔ̍ɔ̍ŋnda̍ŋ lā fūūlu̍u̍, ndu̍yɛ̍ fɛ̍ɛ̍ŋ a̍ fɛ̍ɛ̍ŋ a̍ mi̍i̍ŋgū lɛ̍ mā si̍m te̍.”