Read Southern Kisi Īsi̍kīāā 28 Bible Online

Īsi̍kīāā 28 - Southern Kisi bible

Īsi̍kīāā 28

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, di̍mu̍l Ma̍sā bɛ̍ndōo̍ Ta̍a̍yā, māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyɛ̄ ya̍ I̍ di̍mi̍ wo̍ cho̍ ho̍ō ni̍. Nūm Māsāa̍ Ta̍a̍yā, ā chō māsa̍ yōŋgā bɛ̍ndū. Ma̍ chūāŋnu᷄ŋ o̍ bɛ̍ndū, māā mɛ̄lɛ̄ka̍a̍ ŋ̄ chō ni̍. Ma̍ dīmī māā o̍ kpe̍ŋgbe̍i̍ mɛ̄lɛ̄ka̍a̍ ā chāl chōo̍ ŋ̄ chō īchāli̍ ni̍, o̍ pēe̍ mɛ̄ŋmā īhɛ᷄llo̍ tɛ̄ɛ̄ŋ. Ndu̍yɛ̍, mi̍ chē bɛ̍ɛ̍ ma̍ chūāŋnu᷄ŋ māā ā chō wāna̍ kɔ̄l kālu̍ bɛ̍ndū māā mɛ̄lɛ̄ka̍, kɛ̍ wāna̍ chi̍o̍o̍ ko̍ni̍ ŋ̄ chō ni̍, a̍ cho̍ mɛ̍lɛ̄ka̍ le̍.

³A̍ yi̍ya̍ŋ māā ā nɔ̄ kɔ̄l kālo̍o̍ ma̍ hīāū Da̍a̍ni̍ɛ̍ɛ̄, ndu̍yɛ̍ īsɔ̄ɔ̍ o̍ īsɔ̄ɔ̍ cho̍ mī ī vēŋnu᷄ŋ nu̍m te̍.

⁴Ndu̍yɛ̍, mi̍ kɔ̄l kālu̍ ŋ̄ nɔ̄ ko̍ŋ ndo̍, a̍ sīnā pɛ̄ŋgu̍ ŋ̄ nɔ̄ wo̍ tōsā ma̍ sūl sūllo̍ pīla̍, a̍ ko̍o̍līi̍yo̍ŋ ndu̍yɛ̍, a̍ ka̍ni̍ŋ hu̍mbo̍ŋ.

⁵Le̍ kɔ̄l kālu̍ bɛ̍ndū ŋ̄ nɔ̄ o̍ yākōle̍ŋ ni᷄ŋ ndo̍, ma̍ sūl sūllo̍ pīla̍. Ndu̍yɛ̍, mi̍ sūl nūm ko̍ŋ tōsā mi̍ kɔ̄l nūmndo̍ pīā a̍ yōŋgā bɛ̍ndōo̍.

⁶“Le̍la̍ŋ, ya̍ŋ ni᷅la̍ŋ mā tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō chō nu̍m dīmūl lo̍. Le̍ chūāŋnɔ᷄ŋ ŋ̄ chāūŋnu̍ŋ māā ā nɔ̄ kɔ̄l kālo̍o̍ māā mɛ̄lɛ̄ka̍ wo̍,

⁷I̍ cho̍ tōsā mī wānāā lēkāa̍wa̍ ā hu᷄ŋ de᷅l nu̍m chōo̍, wānāā kɔ̄l vēsɛ̍i̍ya̍a̍ bɛ̍ndūa̍a̍. Nyɛ̄ o̍ nyɛ̄ kɛ̄ndɛ̄ ŋ̄ chūūŋgi̍a̍a̍ o̍ kɔ̄l kālu̍ nu̍mndo̍ ni᷄ŋ, a̍ sīnā nūm pɛ̍ŋgo̍o̍, ā chō mu̍ŋ tɛ̄ɛ̄mbūū kpo̍u̍ a̍ mɔ̄ɔ̄ŋ fāŋndo̍ŋ.

⁸Ā chō nu̍m hūnɔ̄ɔ̄ lɔ̄ɔ̄vīāā a̍ mɔ̄ɔ̄ŋ fāŋndo̍ŋ mā dīī nu̍m, ndu̍yɛ̍ o̍ pēe̍ mɛ̄ŋma̍ īhɛ᷄llo̍ tɛ̄ɛ̄ŋ sɛ̄ī nu̍mndo̍ ō wā ni̍ŋ ni̍.

⁹Bōōndi̍i̍ ya̍a̍mɔ̍ɔ̍wa̍ chō nu̍m dēlɔ̄ɔ̍ chōo̍ le̍ nu̍m dīyɔ̄ɔ̍ ve̍, ā yīyāŋ ndɛ̍ ni̍ŋ pa̍ kɛ᷅ māā mɛ̄lɛ̄ka̍ ŋ̄ chō ni̍? Bōōndi̍i̍ wānāa̍ cho̍ nu̍m dīyɔ̄ɔ̄ wa̍ ā sīmūl nu̍m ni̍ŋ nde̍, o̍ ko̍ŋ ŋ̄ chō sīnā ni̍ māā wāna̍ chi̍o̍o̍ ko̍ni̍ ŋ̄ chō ni̍.

¹⁰Wānāā lēkāa̍wa̍ ā chō nu̍m dīyɔ̄ɔ̄ mɛ̄ɛ̍ nda̍ dīī wa̍nāa̍ so̍o̍lūū ya̍ le̍ wa̍ yɛ̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ya̍ so̍ō ni̍.”

¹¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̍lɛ̄ nāa̍ ya̍ chu̍a̍.

¹²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, cha̍ŋ le̍ Māsāa̍ Ta̍a̍yā, le̍ dɛ̍nɛ̍ pa̍lāa̍ tu̍āl ni̍ŋ ndu̍ chōo̍ wo̍. Di̍mu̍l ndu̍ māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ nyɛ̄ ya̍ I̍ di̍mi̍ wo̍ cho̍ ho̍ō ni̍. Māsāa̍ Ta̍a̍yā, a̍ wa̍ māwāā wūndu̍le̍ŋ le̍ wāŋnda̍ kpo̍u̍. A̍ wa̍ wāna̍ kɔ̄l kālu̍ bɛ̍ndū, ndu̍yɛ̍ mɛ̄ɛ̍ ŋ̄ wa̍ wāna̍ kɔ̄l kālu̍, le̍nde̍ nūm o̍o̍ na̍ŋ vɛ̄lɛ̄.

¹³Nāa̍ nu̍m ā chālāa̍ wa̍ I̍dɛ̄ŋ ni̍, o̍ kpe̍le̍ nūu̍ ni᷄ŋ. Ndu̍yɛ̍ nyɛ̄m nūm chu̍ɛ̍i̍na᷄ŋ ndo̍ŋ, a̍ pōūtā ba̍ā kālālā yɛ̍ yɛ̍la̍ŋ ŋ̍ wa̍ ŋ̄ tōōsīāā ni̍, lɔ̍bīla̍ŋ, a̍ da̍a̍mɔ̄ŋndo̍ŋ, a̍ to̍pa̍sīla̍ŋ, a̍ bɛ̍ɛ̍lūīla̍ŋ, a̍ kāāne̍līāŋ nda̍ŋ, a̍ cha̍si̍pāā, a̍ sāfa̍lūɛ̄la̍ŋ, a̍ ɛ̍mɛ̍lu̍e̍e̍dīla̍ŋ, a̍ ka̍nɛ̍tīla̍ŋ. Ndu̍yɛ̍ nyɛ̄m nūm o̍o̍ ba̍i̍yīāŋ ndo̍ŋ, a̍ ko̍o̍līi̍yo̍ŋ ŋ̍ wa̍ ŋ̄ tōōsīāā ni̍. Ndu̍yɛ̍, pāa̍le̍ ŋ̄ vēlu᷄ŋ o̍ chi̍e̍ēŋndo̍ chōo̍ le̍ŋ, nyɔ̄ɔ̍ŋ mu᷅ŋ ŋ̄ wa̍ ni᷅ŋ ŋ̄ bɛ̄ɛ̄ndīāā le̍ nūm.

¹⁴A̍ wa̍ māwāā ō tōōsīāā māā ki̍i̍la̍nɔ̍ Mɛ̄lɛ̄ka̍, a̍ kūmba᷅ŋnda̍ŋ. Mi̍ hɛ̍lī nu̍m le̍ mā wa̍ wānā ma̍ndāā kpe̍lo̍o̍ ho̍ō. O̍ pēmbīī ni̍i̍ kāsīe̍i̍ chōo̍ nāa̍ nu̍m ā chālāa̍ ā wa̍ ni̍, mā bālū o̍ pōūtā ŋɛ̄lɛ̄ŋgi̍ ŋɛ̍lɛ̄ŋgi̍la̍ŋ wa̍ dīōndɔ̄ɔ̍ māā lēyīŋnda̍ŋ tɛ̄ɛ̄ŋ.

¹⁵Chɔ̍ŋ a̍ te̍le̍ŋ ŋ̄ vēlu᷄ŋ ndo̍, ka̍ālā nūmnda̍ŋ lā wa̍ sa̍kpō, kɛ̍ mi̍ te̍le̍ŋ pu̍m fūūlūū, ma̍ sīmnu᷄ŋ wa᷅na̍ yɔ̄ŋ wɔ̄ɔ̍ŋ bɛ̄ndū.

¹⁶Mɛ̄ɛ̍ ŋ̄ sīmnu᷄ŋ wa᷅na̍ lēyākō bɛ̄ndū, ma̍ kāndū wāŋnda̍ ka̍fāla̍ŋ tōsāllo̍, ndu̍yɛ̍ ma̍ sīmnu᷄ŋ wa᷅na̍ yɔ̄ŋ wɔ̄ɔ̍ŋ. O̍ ko̍ŋ, ma̍ sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l, ndu̍yɛ̍ mi̍ tu̍a̍ū nu̍m o̍ pēmbīī ni̍i̍ kāsīe̍i̍ chōo̍. Nu᷄m wa̍ māā ki̍i̍la̍nɔ̍, ma̍ wa̍ kpe̍lo̍o̍ ho̍ō māndāa̍ wo̍, mi̍ so̍lī nu̍m lo̍ŋ, nāa̍ ŋ̄ wa̍ o̍ pōūtā ŋɛ̄lɛ̄ŋgi̍ ŋɛ̍lɛ̄ŋgi̍la̍ tɛ̄ɛ̄ŋ nda̍, la̍ wa̍ dīōndɔ̄ɔ̍ mā lēyīŋ nda̍ŋ.

¹⁷Le̍ mɛ̄ɛ̍ nūm o̍o̍ na̍ŋ yɛ̍, ma̍ sīmnu᷄ŋ wa᷅na̍ yōŋgā bɛ̄ndu̍. Ma̍ tɛ̄ɛ̄mbūū kɔ̄l kālu̍ nu̍m bɛ̄ndōo̍ le̍ tɔ̍ɔ̍ kɛ̍ndɔ̄ɔ̍. O̍ ko̍ŋ, mi̍ tu̍sī nu̍m lɛ̄ŋ, mi̍ chɔ̍ɔ̍mūū nu̍m kpe̍nde̍ke̍le̍ ma̍sāā bɛ̍ndūa̍a̍ o̍ hɔ̄l, le̍ mā ma᷄m nu̍m.

¹⁸Ma̍ tōsā yɔ̄ŋndā wɔ̄ɔ̍ŋndā bɔ̄ɔ̍ bɔ̍ɔ̍, ndu̍yɛ̍ ma̍ sīmnu᷄ŋ wa̍nā lāka̍fā o̍ yākōle̍ nu̍mnde̍ŋ ni᷄ŋ. O̍ ko̍ŋ, ma̍ tōsā, fo̍ndāŋndā lāsōōlu̍u̍la̍ nu̍mnda̍ŋ kpo̍u̍, mi̍ lā sīmnu᷄ŋ la̍ nɔ̍ɔ̍lɛ̍i̍. Le̍ he̍ī, mi̍ ma᷅l fo̍ndāŋ ŋ̄ wa̍ wo̍ o̍ yīŋ, ma̍ ŋūā, ma̍ sīmnu᷄ŋ pu᷅lta̍ŋ, mi̍ wānā o̍ wānā cha᷅.

¹⁹Wānāā nda̍ a̍a̍ si̍nā nu̍m o̍ lɛ̄ŋīī yɛ̍ yɛ̍i̍ ni᷄ŋ nda̍ kpo̍u̍, mɛ̄ɛ̍ nda̍ tūēī a̍ nyɛ̍ yɔ̍nu̍ŋ a̍ nūm ndo̍, mi̍ sīōōŋīī bɛ̄ndūe̍i̍ bīī nda̍. Māsāa̍ Ta̍a̍yā, mɛ̄ɛ̄lu̍la̍ nu̍mndā wɔ̄ɔ̍ŋ wɔ̄ɔ̍ŋnda̍ŋ lā fūūlu̍u̍. Ndu̍yɛ̍ fɛ̍ɛ̍ŋ a̍ fɛ̍ɛ̍ŋ a̍ mi̍i̍ŋgū lɛ̍ mā si̍m te̍.”

²⁰O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²¹Mbo̍ dīmūl la̍ āā, “Wāna̍ chi̍o̍o̍ Īsi̍kīāā, mu̍li̍ hɔ᷅lla̍ kūmbū Sa̍i̍dɔ̄ŋ ndo̍, mā di̍mu̍l Sa̍i̍dɔ̄ŋ a̍ nyɛ̄ pālāa̍ ko̍māl ni̍ŋ ndu̍ wo̍ o̍kɔ̄ɔ̄.

²²Di̍mu̍l Sa̍i̍dɔ̄ŋ māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ nyɛ̄ ya̍ I̍ di̍mi̍ wo̍ cho̍ ho̍ō ni̍. Sa̍i̍dɔ̄ŋ, a̍ to̍sa̍ mi̍ ya̍ Mɛ̍lɛ̄ka̍ sīmnu᷄ŋ ya̍a̍mɔ̍ɔ̍nɔ̍ nu̍m. Ndu̍yɛ̍, nyɛ̄ ya̍ I̍ cho̍ tōsā a̍ nūm ndo̍, ndu̍ cho̍ tōsā ni̍, mī wāŋnda̍ kpo̍u̍ a̍ ke̍ ya̍ bɛ̄ɛ̄le̍ŋ. I̍ cho̍ nu̍m dɛ̍nɛ̍ pa̍lāā bɛ̄ndōo̍ tūsī chōo̍, o̍ ko̍ŋ, mī wāŋnda̍ sīna̍ māā ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ kāsīo̍o̍ ya̍ I̍ cho̍ ni̍.

²³I̍ cho̍ tōsā mī nāālā wɔ̄ɔ̍ŋndā bɛ̄ndūla̍ŋ lā hu᷄ŋ de᷅l nu̍m chōo̍, ndu̍yɛ̍ mī to̍sa̍ mī kōo̍ma̍ wāŋndā chīe̍e̍ya̍ mā kūɛ̄ kōŋgi̍la̍ŋ lɛ̄ŋ o̍ bɛ̍ɛ̄la̍ŋ. I̍ cho̍ tōsā, mī ya̍a̍mɔ̍ɔ̍wa̍ hu᷄ŋ wa᷅ wāŋnda̍ dīūwo̍ bā o̍ bā fe̍e̍, mī wāŋ vīlɛ̍i̍ya̍ ā tīu̍ si̍lɔ̍. O̍ ko̍ŋ, mā si̍na̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

²⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Kɛ̍ wāŋnda̍ I̍sɔ̄lūɛ̄ī nda̍ nda̍, lɛ̄ŋīi̍ cho̍ nda̍ ī bālāā mi̍ ī tūl nda̍ yɛ̄le̍ŋ nde̍, Ī cho̍ tōsā, lɛ̄ŋīī kēŋ ī ve᷅ lɛ̍ māā ŋ̄yɔ̄, kɛ̄lɛ̄ŋgāā māā yɔ̄mīī ŋ̄yɔ̄, le̍ nda̍ yɔ̄ŋūl te̍. O̍ ko̍ŋ, mī wāŋnda̍ sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

²⁵Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍. Mbo̍ dīmī āā, “I̍ cho̍ wāŋnda̍ I̍sɔ̄lūɛ̍i̍ sōlī o̍ lɛ̄ŋīī nda̍ wa̍ ā sɛ̄ŋīa̍ŋnde̍ ni᷄ŋ, mī chu̍u̍ŋgi̍a̍a̍ nda̍ nāa̍ pi᷅lɛ̍, mī to̍sa̍ mī wāŋnda̍ sīna̍ māā wāna̍ kāsīo̍o̍ ya̍ I̍ cho̍ ni̍. Wāŋnda̍ I̍sɔ̄lūɛ̄ī a̍ cho̍ mīīŋgū mā cha᷄l o̍ lɛ̄ŋndē ndāle̍ŋ ni᷄ŋ, lɛ̄ŋndē ya̍ I̍ ke̍ bu̍ɛ̍ī nūu̍ Che̍kɔ̍pū le̍ŋ.

²⁶I̍sɔ̄lūɛ̍i̍ya̍ ā wānūŋ ni̍ŋ i̍cha̍li̍ a̍ kɔ̄lta̍ŋ lā nyūlū vi̍li̍, wānā o̍ wānā nɔ̍lā ni̍ŋ mbō yɔ᷄ŋ nda̍ nyɛ̄ le̍. Ā wānūŋ ni̍ŋ chīɛ̄īlā ndā ta̍ŋgūl, ndu̍yɛ̍ mā tōsā kpe̍le̍la̍ ndāla̍ īyɔ̄mnda̍ŋ. Lɛ̄ŋīi̍ cho̍ he̍ī nda̍ ī bālāā, mi̍ ī wā nda̍ pɛ̄ɛ̄sāa̍, mi̍ ī chūā nda̍ māā wānāā fo̍ndō fu̍u̍ ve̍, I̍ cho̍ ndi̍ nyɛ̄ pālāā bɛ̄ndōo̍ tūsī chōo̍. O̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”