Read Southern Kisi Īsi̍kīāā 29 Bible Online

Īsi̍kīāā 29 - Southern Kisi bible

Īsi̍kīāā 29

¹Wɔ̄sī na̍a̍ ŋ̄ chīŋa̍ wɔ̄sīla̍ŋ tɔ̍ o̍ bīyɔ̄ɔ̍ ni᷄ŋ Ba̍bi̍lɔ̄ŋ nde̍, pāŋgi̍i̍ tɔ̍ ve̍ o̍ wɔ̄sī kōŋ ni᷄ŋ mālɔ̄ tɔ̍ a̍ lē dīi̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍ mbo̍ kē ya̍ yōōŋgōo̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, mu̍li̍ hɔ᷅lla̍ kūmbū Māsā bɛ̍ndōo̍ I̍chi̍pī, a̍ lɛ̄ŋndē I̍chi̍pīle̍ŋ, mā di̍mu̍l nda̍ a̍ nyɛ̄ pālāa̍ ko̍māl ni̍ŋ nda̍ wo̍ o̍kɔ̄ɔ̄.

³Di̍mu̍l nda̍ māā, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyɛ̄ ya̍ I̍ di̍mi̍ wo̍ cho̍ ho̍ō ni̍. Māsā bɛ̍ndōo̍ I̍chi̍pī, a̍ to̍sa̍ mi̍ ya̍ Mɛ̍lɛ̄ka̍ sīmnu᷄ŋ ya̍a̍mɔ̍ɔ̍nɔ̍ nu̍m. Ā chō māchūāā mɛ̄ɛ̍ kūī bɛ̄ndū bɛ̍ndōo̍ ō wā nu̍a̍ā o̍ pēēlo̍ yɛ̍. Ma̍ dūāūnu᷄ŋ yo̍ŋgāa̍, ma̍ dīmī māā Pēē Bɛ̍ndōo̍ Na̍īl kpo̍u̍ le̍ nūm o̍ cho̍ ni̍, ndu̍yɛ̍ māā nu᷄m to̍o̍si̍a̍a̍ ndu̍ a̍ bālā nūmnda̍ŋ ni̍.

⁴Le̍ he̍ī, I̍ cho̍ nu̍m do̍lu̍ŋndo̍ŋ bāā o̍ ya̍a̍lo̍o̍, mī so̍li̍ nu̍m o̍ pēēla̍ nu̍mnda̍ŋ ni᷄ŋ a̍ sūūwāa̍ cho̍ nu̍m ā bāāyīa̍ŋ o̍ kɛ̄kɛ̍u̍la̍ŋ nda̍ lātūlu̍. I̍ cho̍ nu̍m sōlī o̍ pēēla̍ la̍ŋ a̍ sūūwāa̍ cho̍ nu̍m ā bāāyīa̍ŋ o̍ kɛ̄kɛ̍u̍la̍ŋ ndā lātūlu̍ mī vi̍o̍ū nu̍m o̍ kɔ̄ŋgɔ̍.

⁵Nūm ni̍, sūūwāa̍ cho̍ o̍ pēēla̍ nu̍mnda̍ŋ nda̍ ni̍, I̍ cho̍ nya̍ sōlī, mī vi̍o̍ū nya̍ o̍ po̍li̍ ve̍sɛ̍i̍ bɛ̍ndōo̍ ni᷄ŋ. Dīāllūŋ nūmndo̍ŋ ŋ̄ chō wā ŋ̄ mālāā lɛ̄ŋ o̍ po̍li̍ ko̍ŋ ni᷄ŋ, wānā o̍ wānā o̍ chɔ᷅ ni̍ŋ mu̍ŋ te̍. I̍ cho̍ tōsā mā sīmnu᷄ŋ nyɛ̍ dīa̍a̍ le̍ vīsīāā yōndūa̍a̍, a̍ yōūwa̍.

⁶O̍ ko̍ŋ, mī wāŋnda̍ I̍chi̍pī kpo̍u̍ a̍ si̍na̍ māā, ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.” Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Wāŋnda̍ I̍chi̍pī, nya̍ wāŋnda̍ I̍sɔ̄lūɛ̄ī nda̍ a̍a̍ ti̍i̍nda̍ŋ ni̍ le̍ nda̍ mālāa̍, kɛ̍ lā wa̍ māwāā māā tīnda̍ nɔ̍ ho̍ō māyōōmū le̍ wo̍.

⁷Mɛ̄ɛ̍ wāŋnda̍ I̍sɔ̄lūɛ̄ī a̍ bi̍ī nya̍ o̍ bā, ma̍ tīīnda᷄ŋ nya̍ le̍ kɔ̄la̍ŋ, mi̍ lā yōm tɛ̄ɛ̄ŋ, mi̍ lā yɔ̄ŋūl nda̍ o̍ wɔ̄ɔ̄ŋnda̍ŋ, ndu̍yɛ̍ ma̍ sɔ̄lā yɔ̄ŋūlɔ᷄ŋnda̍ŋ o̍ lākɔ̄ɔ̄.

⁸Le̍ he̍ī, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyɛ̄ ya̍ I̍ di̍mi̍ wo̍ cho̍ ho̍ō ni̍. Wāŋnda̍ I̍chi̍pī, I̍ cho̍ tōsā mā hu᷄ŋ de᷅l nya̍ chōo̍ a̍ mɔ̄ɔ̄ŋ fāŋndo̍ŋ, ndu̍yɛ̍, mā dīu̍ nya̍ kpo̍u̍, wāna̍ chi̍e̍e̍ ni̍, chɔ̄lū ni̍.

⁹I̍ cho̍ tōsā mī lɛ̄ŋndē I̍chi̍pīle̍ŋ lē pīɔ̍l mī lē lo̍ pɔ̄m. O̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. “Māsāa̍ I̍chi̍pī, ma̍ dūāūnu᷄ŋ yo̍ŋgāa̍, ma̍ dīmī māā Pēē Bɛ̍ndōo̍ Na̍īl kpo̍u̍, māā le̍ nūm o̍ cho̍ ni̍, ndu̍yɛ̍ māā nu̍m to̍o̍si̍a̍a̍ ndu̍ ni̍.

¹⁰Le̍ he̍ī, nūm ni̍, pēēla̍ nu̍mnda̍ŋ ni̍, ya̍ Mɛ̍lɛ̄ka̍ I̍ tu̍l nya̍ lēyɛ̄. I̍ cho̍ tōsā mī lɛ̄ŋndē I̍chi̍pīle̍ŋ lē pīɔ̍l, mī lē lo̍ pɔ̄m. Lɛ̄ŋndē I̍chi̍pīle̍ŋ kpo̍u̍, chɔ̍ŋ Mi̍ki̍dɔ̄ɔ̄ chi̍e̍e̍, bā lūāŋndo̍, mbō kūɛ̄ a̍ chi̍e̍e̍ bɛ̍ndōo̍ A̍si̍wāŋ, bā tōūwo̍, mbō fūūlu̍u̍ o̍ pɛ̄ŋgu̍la̍ŋ a̍ lɛ̄ŋndē Īto̍o̍pīāāle̍ŋ, ko̍ŋ kpo̍u̍, ō chō sīmnu᷄ŋ po̍llo̍.

¹¹I̍ cho̍ tōsā vīsīo̍o̍ bɛ̍ɛ̍ ō nɔ̍lā ni̍ŋ mbō kēēku̍ o̍ lɛ̄ŋndē I̍chi̍pīle̍ŋ ni᷄ŋ te̍, kɛ̄lɛ̄ŋgāā ni᷅ŋ te̍, mī wāna̍ chi̍e̍e̍ ke̍e̍ku̍ lēni᷄ŋ. Le̍ wɔ̄sīla̍ŋ be̍le̍-hi̍ɔ̍ɔ̍lu̍ wāna̍ chi̍e̍e̍ bɛ̍ɛ̍ o̍ ve᷅ ni̍ŋ o̍ lɛ̄ŋndē I̍chi̍pīle̍ŋ ni᷄ŋ te̍.

¹²I̍ cho̍ tōsā mī lɛ̄ŋndē I̍chi̍pīle̍ŋ lē tāmbu̍, ndu̍yɛ̍ mī to̍sa̍ mī lē lo̍ pɔ̄m, mɛ̄ɛ̍ lɛ̄ŋnde̍ o̍ chi̍e̍ēŋndo̍ ni᷄ŋ i̍ si̍mnu᷄ŋ pɔ᷅mnda̍ŋ yɛ̍. Chi̍e̍e̍ŋ cho̍ o̍ lɛ̄ŋndē I̍chi̍pīle̍ŋ ni᷄ŋ ndo̍ŋ kpo̍u̍, ŋ̄ chō hūnɔ̄ɔ̄ pīɔ̄l, mɛ̄ɛ̍ chi̍o̍o̍ŋ o̍ chi̍e̍ēŋndo̍ ni᷄ŋ ŋ̍ pi̍ɔ̍l lɛ̍, mī ŋ̄ sīmnu᷄ŋ pɔ᷅mnda̍ŋ. Le̍ wɔ̄sīla̍ŋ be̍le̍-hi̍ɔ̍ɔ̍lu̍ wāna̍ chi̍e̍e̍ ve᷅ ni̍ŋ o̍ chi̍e̍e̍ŋ mu̍ŋ te̍. I̍ cho̍ wāŋnda̍ I̍chi̍pī sɛ̄ŋī o̍ lɛ̄ŋnde̍ ni᷄ŋ, mā wa᷄ o̍ kāa̍la̍ŋ ni᷄ŋ kpo̍u̍.”

¹³Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍. Mbo̍ dīmī āā, “Kɛ̍ tē wɔ̄sīla̍ŋ lā hīōū pɛ̍ be̍le̍-hi̍ɔ̍ɔ̍lu̍, bā o̍ bā wāŋnda̍ I̍chi̍pī a̍ cho̍ ā sɛ̄ŋīa̍ŋnda̍ o̍ lɛ̄ŋnde̍ ni᷄ŋ, I̍ cho̍ nda̍ chūūŋgīāā kpo̍u̍ na̍a̍ pi᷅lɛ̍,

¹⁴mī mi̍ŋgi̍ nda̍ o̍ lɛ̄ŋndē ndāle̍ŋ ni᷄ŋ, o̍ lɛ̄ŋndē I̍chi̍pīle̍ŋ bā tōū wo̍, nāa̍ nda̍ fūla̍ tūm nda̍. Ndu̍yɛ̍ I̍ cho̍ tōsā mī lɛ̄ŋndē I̍chi̍pīle̍ŋ lē mīīŋgu̍ māā pāāndū, kɛ̍ ndu̍yɛ̍, māsāle̍ŋ I̍chi̍pī le̍ ve᷅ lɛ̍ ni̍ŋ ma̍sāle̍ kpāāyā māā pāāndū le̍.

¹⁵Māsɛ̄i̍ o̍ chi̍e̍ēŋndo̍ ni᷄ŋ ki̍nɛ̍i̍, I̍ cho̍ tōsā mī māsāle̍ŋ I̍chi̍pī kpāāya̍ ndɔ̄ɔ̍ dɔ̄ɔ̄na̍ŋ nda̍ tɛ̄ɛ̄ŋ. I̍ cho̍ tōsā fɛ̍ɛ̍ŋ a̍ fɛ̍ɛ̍ŋ bɛ̍ɛ̍ lɛ̄ŋndē I̍chi̍pīle̍ŋ, lē nɔ̍ lɛ̍ lēlɛ̄ŋ o̍ lēlɛ̄ŋ kpa̍a̍yā cho̍o̍ le̍. I̍ cho̍ tōsā mī lē sīmnu᷄ŋ lɛ᷅ŋnde̍ nɔ̍ lɛ̍ tɔ̍ɔ̍ le̍ le̍ŋ, mī to̍sa̍ lēlɛ̄ŋ o̍ lēlɛ̄ŋ lē ve᷅ lɛ̍ le̍ŋ o̍ bā bɛ̄ŋgu̍ le̍.

¹⁶Lɛ̄ŋndē I̍sɔ̄lūɛ̍i̍le̍ŋ bɛ̍ɛ̍, lē ti̍i̍ndāŋ ndɛ̍ ni̍ŋ lɛ᷅ŋndē I̍chi̍pīle̍ŋ le̍ nda̍ mālā le̍. Ndu̍yɛ̍, tē I̍sɔ̄lūɛ̄ī o̍ hu̍ŋ mu̍li᷄ŋ nāa̍ I̍chi̍pī chu̍a̍ pɛ̍ le̍ mālāa̍, kɔ̄llo̍ chō I̍sɔ̄lūɛ̍i̍ dēlɔ̄ɔ̄ o̍ yɔ̄ŋ wɔ̄ɔ̍ŋ o̍ to̍sa̍ pāāndū le̍ I̍chi̍pi̍ tīīnda᷄ŋndo̍ le̍ ndu̍ mālāa̍ wo̍. O̍ ko̍ŋ, I̍sɔ̄lūɛ̄ī o̍ cho̍ sīnā māā ya̍ cho̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ni̍.”

¹⁷Wɔ̄sī na̍a̍ ŋ̄ chīŋa̍ wɔ̄sīla̍ŋ bi̍dīi̍ŋ a̍ lā ŋɔ᷄mmɛ̍ū o̍ bīyɔ̄ɔ̍ ni᷄ŋ Ba̍bi̍lɔ̄ŋ ndo̍, pāŋgi̍i̍ tāse̍i̍ o̍ wɔ̄sī kōŋ ni᷄ŋ, lɔ̄mā lēpīlɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍, mbo̍ kē ya̍ yōōŋgōo̍.

¹⁸Mi̍ Mɛ̄lɛ̄ka̍ dīmūl la̍ āā, “Bōōndi̍i̍ Māsāa̍ Nābi̍u̍kānɛ̍ɛ̍sā ho̍ō Ba̍bi̍lɔ̄ŋ o̍ sa̍a̍ Ta̍a̍yā a̍ sɔ̍ŋgɔ̄ɔ̍, mbo̍ wā kīndīo̍o̍ le̍ ndu̍ bīyɔ̄ɔ̍ ve̍, mi̍ Nābi̍u̍kānɛ̍ɛ̍sā to̍sā mi̍ so̍vɛ̄i̍ya̍a̍ ndūa̍a̍ ā sāŋgā sāŋgāa̍ pīla̍ o̍ sɔ̍ŋgɔ̄ kōŋ ni᷄ŋ, a̍ nyɔ̄ɔ̍ŋ vīlīo̍o̍. Mɛ̄ɛ̍ nda̍ vīli̍ nyɔ̄ɔ̍ te̍i̍, mi̍ yīīŋnde̍ chūū nda̍ o̍ lēbōl, ndu̍yɛ̍, chōŋgu̍la̍ŋ kpo̍u̍ mi̍ lā pēēŋgu᷄ŋ nda̍. Kɛ̍ sāŋgā o̍ sāŋgā nda̍ sāŋga̍ lo̍ŋ, ndu̍ ni̍, so̍vɛ̄i̍ya̍a̍ ndūa̍a̍ ni̍, ā sɔ̄la̍ tɔ̍nɔ̄ o̍ tɔ̄nɔ̄ lo̍ŋ te̍.

¹⁹Le̍la̍ŋ, nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmī wo̍ cho̍ ho̍ō ni̍. I̍ cho̍ lɛ̄ŋndē I̍chi̍pīle̍ŋ mālɔ̄ɔ̄ Māsāa̍ Nābi̍u̍kānɛ̍ɛ̍sā o̍ bā mbō hu᷄ŋ bi̍ī le̍ŋ. Sūl o̍ su᷄l cho̍ o̍ lɛ̄ŋndē I̍chi̍pīle̍ŋ ni᷄ŋ, Māsāa̍ Nābi̍u̍kānɛ̍ɛ̍sā nda̍ so̍vɛ̄i̍ya̍a̍ ndūa̍a̍ ā chō la̍ŋ hūnɔ̄ɔ̄ pūŋgā kpo̍u̍ mā kūɛ̄nu᷄ŋ a̍ la̍ŋ. Sāŋgā so̍vɛ̄i̍ya̍a̍ ndūa̍a̍ ā sāŋga̍ Ta̍a̍yā wo̍, mɛ̄ɛ̍ pāāwā ndāa̍ wa᷅ ni̍ŋ ko̍ŋ ni̍.

²⁰I̍ cho̍ Māsāa̍ Nābi̍u̍kānɛ̍ɛ̍sā nda̍ so̍vɛ̄i̍ya̍a̍ ndūa̍a̍ lɛ̄ŋndē I̍chi̍pīle̍ŋ kpo̍u̍ ma̍lɔ̄ɔ̄ o̍ bā, māā pāāwā ndā le̍ wa̍li̍ nda̍ tōsa̍ wo̍, kāni̍ fo̍ndōle̍, le̍ ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ nda̍ wa̍ wa̍llo̍ ni̍.

²¹“Tē te̍le̍ŋ ko̍ŋ fūūlu̍u̍ pɛ̍, I̍ cho̍ tōsā mī wāŋnda̍ I̍sɔ̄lūɛ̄ī a̍ si̍mnu᷄ŋ wa̍nāā kpāāyāā bɛ̍ndū. Ndu̍yɛ̍, mī to̍sa̍ nūm Īsi̍kīāā mā si᷄m wāŋnda̍ kpo̍u̍ o̍ hɔ̄l mā sōō. O̍ ko̍ŋ, mī wāŋnda̍ I̍sɔ̄lūɛ̄ī a̍ si̍na̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”