Read Southern Kisi Īsi̍kīāā 3 Bible Online

Īsi̍kīāā 3 - Southern Kisi bible

Īsi̍kīāā 3

¹Mi̍ Mɛ̄lɛ̄ka̍ lō o̍ ko̍ŋ mbo̍ dīmūl la̍ āā, “Wāna̍ chi̍o̍o̍ Īsi̍kīāā, bi̍i̍ ya̍u̍wo̍ ho̍ō mā dē ndu̍. O̍ ko̍ŋ, mā kūɛ̄ nāa̍ wāŋnda̍ I̍sɔ̄lūɛ̄ī chu̍a̍ mā kɔ̍ di̍mūl nda̍ nyɛ̄ o̍ nyɛ̄ ya̍ I̍ cho̍ nu̍m dīmūl.”

²Ndu̍yɛ̍, mi̍ ka̍nyā sōndōo̍. Mbo̍ kē ya̍ yāu̍wo̍ ho̍ō le̍ mī de᷅.

³Mbo̍ dīmūl la̍ āā, “Wāna̍ chi̍o̍o̍ Īsi̍kīāā, di̍o̍ ya̍u̍wo̍ ho̍ō mā pīm ndu̍ cha̍.” O̍ ko̍ŋ, mi̍ su̍ām yāu̍wo̍ ho̍ō. Yāu̍wo̍ ho̍ō, yēēlāa̍ nu̍a̍ā ŋ̄ chā āā līa̍a̍ŋ ni̍.

⁴Mi̍ Mɛ̄lɛ̄ka̍ dīmūl la̍ āā, “Wāna̍ chi̍o̍o̍ Īsi̍kīāā, kɔ̍ nāa̍ wāŋnda̍ I̍sɔ̄lūɛ̄ī chu̍a̍ mā kɔ̍ di̍mūl nda̍ nyɛ̄ o̍ nyɛ̄ ya̍ I̍ cho̍ nu̍m dɔ̄wɔ̄ɔ̄ o̍ sōndō le̍ nda̍.

⁵I̍ cho̍ nu̍m vīōmɔ̄ɔ̄ nāa̍ wānāā sūɛ̍i̍ ma̍ŋgālɛ̄ī chēle̍ŋ chūā, ā sūɛ̍i̍ ndɛ̄i̍ ma̍ŋgālɛ̄i̍ ī kēndū pɛ̄ŋgu̍ si̍nā wa̍ le̍. Nāa̍ wāŋnda̍ I̍sɔ̄lūɛ̄ī chu̍a̍ ya̍ I̍ cho̍ nu̍m vīōmɔ̄ɔ̍ ni̍.

⁶Ō cho̍ nāa̍ wānāā sɔ̄ɔ̍ŋ ma̍ŋgālāā chēle̍ŋ chūā, ā sɔ̄ɔ̍ŋ ndāāŋ ma̍ŋgāla᷄ŋ ŋ̄ kēndū pɛ̄ŋgu̍ si̍nā le̍ ya̍ I̍ cho̍ nu̍m vīōmɔ̄ɔ̄ le̍. Kɛ̍ ndu̍yɛ̍ nda̍ a̍a̍ yɔ̍ŋ bɛ̍ɛ̍ mī ya̍ i̍i̍ ve᷅m nu̍m nāa̍ wānāā wāā le̍nde̍ chu̍a̍, ā wa̍ nu̍m nīla̍ŋ yāŋɔ̄ɔ̄.

⁷Kɛ̍ wāŋnda̍ I̍sɔ̄lūɛ̄ī a̍ cho̍ nu̍m lānī yāŋɔ̄ɔ̄ le̍, kāni̍ fo̍ndōle̍, ā yēēma̍ mā tūēī ya̍ dīōm te̍. Wāŋnda̍ I̍sɔ̄lūɛ̄ī kpo̍u̍ wānāā bōlīī kālāā bɛ̄ndūa̍a̍ nda̍ chō ni̍, wānāa̍ si̍mu̍l la̍ wa̍.

⁸Kɛ̍ ndu̍yɛ̍ mɛ̄ɛ̍ nda̍ chō wānāā bōlīī kālā nu̍a̍ā, ndu̍yɛ̍ ma̍ wā wānāā kālā ka̍lā yɛ̍, nūm bɛ̍ɛ̍ le̍nde̍ ya̍ I̍ cho̍ nu̍m sīīŋgūū wāna̍ bo̍llē kālā nda̍ o̍ hɔ̄l ni̍, ndu̍yɛ̍ mī to̍sa̍ nu̍m mā sīmnu᷄ŋ wa̍nā ka̍lā ka̍lā.

⁹I̍ cho̍ tōsā mī kɔ̄l nūmndo̍ sīmu̍l, mbō wa̍ ō kālā ka̍lā māā pōū. Le̍la̍ŋ mɛ̄ɛ̍ mɛ̄ɛ̍ nda̍ nūa̍ nu̍m a̍ hɔ̄ltā sīāŋā, wo᷅ nda̍ le̍, sīōōŋīī bi̍ī nu̍m le̍ nda̍ le̍, kāni̍ fo̍ndōle̍, I̍ si̍nā māā wāna̍ si̍mu̍l la̍ wa̍ nda̍ chō ni̍.”

¹⁰Mi̍ Mɛ̄lɛ̄ka̍ hīāū lāchī a̍ sūɛ̍i̍ nāa̍ ya̍ chu̍a̍, mbo̍ dīmī āā, “Wāna̍ chi̍o̍o̍ Īsi̍kīāā, ya̍ŋ ni᷅la̍ŋ nyɛ̄ kɛ̄ndɛ̄ kɛ̍ndɛ̄ o̍ nyɛ̄ ya̍ I̍ cho̍ nu̍m dīmūl lo̍, ndu̍yɛ̍ mā kɛ̍si̍ŋ ndu̍ o̍ kɔ̄l nyɛ̄ kɛ̄ndɛ̄ kɛ̍ndɛ̄.

¹¹O̍ ko̍ŋ, mā kūɛ̄ nāa̍ wānāā nu̍mnda̍ chūā, ā nda̍ hīŋ ha̍ā o̍ bīyɔ̄ɔ̍ ni᷄ŋ nda̍, mā kɔ̍ di̍mūl nda̍ nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍. Ā ya᷄ŋ nu̍m lānī, ā ya᷅ŋ nu̍m lānī le̍.”

¹²O̍ ko̍ŋ kɔ̍ɔ̍lī, mi̍ Nyi̍na̍ Mɛ̄lɛ̄ka̍a̍ chūā ya̍ mbo̍ hēl a̍ ya̍ cho̍o̍ cho̍o̍. Mɛ̄ɛ̍ nāŋɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chɛ᷄ŋ o̍ fo̍ndāŋ ndɔ̄ɔ̍, mi̍ tu̍ɛ̍i̍nu̍ŋ bɔ̍ɔ̍lūū bɛ̄ndōo̍ ya̍ a̍ mākɔ̄ɔ̄ kpu̍ū.

¹³Kɔ̄lā nyāā yōōmāa̍ ha̍ā ā wa̍ nu̍a̍ā, mi̍ kūmba᷅ŋndā ndāla̍ŋ lā wā lūāāna᷅ŋndo̍ la̍ŋ, a̍ bɔ̄ɔ̄lūū nyɛ̄lā tīīla᷄ŋnda̍ŋ lā wa᷄ wo̍, mɛ̄ɛ̍ bɔ̄ɔ̄lūū bɛ̄ndū kōŋ ya̍ I̍ wa̍ ko̍ŋ tu̍e̍i̍nɔ᷄ŋndo̍ ya̍ a̍ mākɔ̄ɔ̄ ni̍, mɛ̄ɛ̍ lɛ̄ŋnde̍ŋ lē nyīīyā nu̍a̍ā yɛ̍.

¹⁴O̍ ko̍ŋ kɔ̍ɔ̍lī, mi̍ Nyi̍na̍ Mɛ̄lɛ̄ka̍a̍ ō chūā ya̍ mbo̍ kūā a̍ ya̍. Ndu̍yɛ̍ kpāāyā bɛ̍ndu̍ Mɛ̄lɛ̄ka̍ Ya̍a̍wɛ̄ɛ̄ wo̍, ō wa̍ ya̍ kɔ̄ɔ̄lī. Kɔ̄lā ya̍ I̍ wa̍ la̍ŋ, mi̍ ta̍mbū kɔ̄l ta̍u̍ ta̍u̍ ndu̍yɛ̍ mi̍ tu̍u̍lū kɔ̄l.

¹⁵Mɛ̄ɛ̍ ya̍ I̍ fu̍u̍lu̍u̍ Tɛ̄lī A̍bi̍bī chi̍e̍e̍ o̍ Pīo̍o̍ Chɛ̍bāā kɔ̍ŋgɔ̍, nāa̍ wāŋnda̍ Chu̍dā, ā nda̍ kūɛ̄ o̍ bīyɔ̄ɔ̍ ni᷄ŋ nda̍ ā wa̍ īchāli̍ wa̍, le̍ pālɛ̍i̍ ī ŋɔ᷄mmɛ̍ū I̍ wa̍ īchāli̍ lo̍ŋ, mi̍ yōōmūa̍ŋ mā fūlā ya̍ po̍ a̍ nyɛ̄ ya̍ I̍ che᷅ ndu̍yɛ̍ mi̍ tu̍ɛ̍ī yo̍.

¹⁶Mɛ̄ɛ̍ pālɛ̍i̍ ŋɔ̍mmɛ̍ūve̍ ī hīo̍u̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍. Mbo̍ dīmūl lā āā,

¹⁷“Wāna̍ chi̍o̍o̍ Īsi̍kīāā, I̍ si̍i̍ŋgu̍u̍ nu̍m ni̍ko̍ wa̍nā mɛ̍ŋgɛ̄lāā le̍ I̍sɔ̄lūɛ̄ī kpo̍u̍. Nyɛ̄ o̍ nyɛ̄ ya̍ I̍ dɔ̍ū nu̍m o̍ sōndō pɛ̍ le̍ mā kɔ̍ di̍mūl nda̍, kɔ̍ mā kɔ̍ di̍mūl nda̍, mā si̍la̍ nda̍.

¹⁸Tē I̍ dɔ̍ɔ̍ŋnu᷄ŋ tu̍mbe̍ a̍ wānāā yɔ̄ŋ wɔ̄ɔ̍ŋnda̍ pɛ̍, mī kɛ̍ɛ̍si̍a̍a̍ le̍ nda̍ dīūwo̍, mā ku̍e̍ mā kɔ̍ si̍lā nda̍ le̍ mā ma᷄l yɔ̄ŋndā ndāla̍ wɔ̍ɔ̍ŋnda̍ŋ mā chi̍i̍ndi̍a̍a̍ yōōmūlā ndāla̍ŋ te̍, mbō lo̍ o̍ ko̍ŋ mī wānāā kāŋ ā sɔ̄la̍ pīɔ̍mndo̍ le̍ yɔ̄ŋndā ndāla̍ wɔ̍ɔ̍ŋnda̍ŋ pɛ̍, nūm tɔ̍ɔ̍ya̍ŋ pīɔ̍m ndāa̍ ō wā cho̍o̍ ni̍.

¹⁹Kɛ̍ tē a̍ si̍la̍ nda̍ pɛ̍ mā kɛ̄ɛ̍ le̍ yɔ̄ŋndā ndāla̍ wɔ̍ɔ̍ŋnda̍ŋ mālɔ̄ɔ̍, mbō lo̍ o̍ ko̍ŋ mā sɔ̄la̍ pīɔ̍mndo̍ le̍ yɔ̄ŋndā ndāla̍ wɔ̍ɔ̍ŋnda̍ŋ pɛ̍, mɛ̄ɛ̍ nūm ba̍ŋa̍ yōōmū nūmndo̍.

²⁰“Tē wāna̍ cho̍ sa̍kpō ya̍ Mɛ̍lɛ̄ka̍ o̍ hɔ̄l lo̍ ō wōu̍ bāla̍ŋ o̍ yɔ̄ŋ wɔ̄ɔ̍ŋndo̍ tōsāa̍ ni᷄ŋ pɛ̍, mī dɔ̍ɔ̍nu᷄ŋ tu̍mbe̍ a̍ ndu̍, mā si̍la̍ ndu̍ le̍, mbō sɔ̄la̍ pīɔ̍mndo̍ pɛ̍, nūm tɔ̍ɔ̍ya̍ŋ pīɔ̍m ndɔ̄ɔ̍ ō wā cho̍o̍ ni̍, kāni̍ fo̍ndōle̍, a̍ si̍la̍ ndu̍ le̍. Ndu̍yɛ̍ nyɛ̄ o̍ nyɛ̄ kɛ̄ndɛ̄ o̍ to̍sa̍ I̍ lo̍o̍nūŋ a̍ ndu̍ le̍.

²¹Tē a̍ si̍la̍ wāna̍ cho̍ sa̍kpō wo̍ pɛ̍, māā ō wo̍ū bāa̍ o̍ yɔ̄ŋ wɔ̄ɔ̍ŋndo̍ ni᷄ŋ te̍, ndu̍yɛ̍ mbō tūēī nu̍m dīo̍m pɛ̍, hīōūwɔ̄ɔ̍ o̍ hi̍a̍ū la̍chi̍ a̍ wāa̍ yōōmū ni̍, ndu̍yɛ̍ nūm pi̍la̍ bɛ̍ɛ̍ mī yōōmū nūmndo̍ bāŋa̍ŋ.”

²²O̍ ko̍ŋ kɔ̍ɔ̍lī, mi̍ kpāāya̍ Mɛ̄lɛ̄ka̍ Ya̍a̍wɛ̄ɛ̄ wo̍ ō tūāl la̍ kɔ̄ɔ̄lī. Mi̍ Mɛ̄lɛ̄ka̍ dīmūl la̍ āā, “Chɔ̍ŋ mā kūɛ̄ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ. Lo̍ŋ ya̍ I̍ cho̍ lākɔ̄ īsɔ̄ɔ̍ nāa̍ nūm chu̍a̍ ni̍.”

²³O̍ ko̍ŋ kɔ̍ɔ̍lī, mi̍ cha̍ŋ mi̍ ku̍ā o̍ lɛ̄ŋndē dɛ̍ŋgbɛ̍le̍ŋ. Mɛ̄ɛ̍ ya̍ I̍ ku̍ɛ̄ lo̍ŋ, mi̍ cha᷅ vɛ̄lɛ̄ pa̍ŋgēle̍ bɛ̄ndu̍ chɔ᷅m na̍ŋɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍ ya̍ o̍ hɔ̄l, mɛ̄ɛ̍ ya̍ I̍ che᷅ ho̍ō Pēē Bɛ̍ndōo̍ Chɛ̍bāā i̍kɛ̍i̍ yɛ̍. O̍ ko̍ŋ, mi̍ ba᷅ŋ wūla̍ŋ, mi̍ fu̍u̍lūū hɔ̄lla̍ lɛ̄ŋ mɛ̍ɛ̄.

²⁴O̍ ko̍ŋ kɔ̍ɔ̍lī, mi̍ kpāāya̍ Nyi̍na̍ Mɛ̄lɛ̄ka̍a̍ ō tūāl la̍ kɔ̄ɔ̄lī, mbo̍ tōsā mi̍ cha̍ŋ mi̍ si᷅m. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Mi̍i̍ŋgu̍ chi̍e̍e̍ mā kɔ̍ lu̍ɛ̍ī o̍ nūmndo̍ chi̍ɛ̍ī ni̍ŋ mā ki̍nda̍ŋ di̍o̍o̍ kɔ̄ɔ̄lī.

²⁵Ndu̍yɛ̍ nūm wāna̍ chi̍o̍o̍ Īsi̍kīāā, ā chō nu̍m lākɔ̄ yīī a̍ nɔ̍lā ni̍ŋ mā fu̍la̍ o̍ bɛ̍ɛ̄ mā kūɛ̄ wāŋnda̍ tɛ̄ɛ̄ŋ te̍.

²⁶Ndu̍yɛ̍ ō fūla̍ o̍ ko̍ŋ kɔ̍ɔ̍lī, I̍ cho̍ tōsā mī dīɔ̄ɔ̄mūle̍ŋ lē bīīla᷅ŋ nu̍m o̍ sōndō, a̍ nɔ̍lā lɛ̍ mā kūɛ̄ mā kɔ̍ si̍lā wānāa̍ si̍mu̍l la̍ ha̍ā wa̍ le̍.

²⁷Kɛ̍ tē te̍le̍ŋ ko̍ŋ ō fūūlu̍u̍ pɛ̍, mī chi̍i̍ nu̍m nyɛ̄ o̍ nyɛ̄ ŋ̄ nɔ̄ le̍ nda̍ dīmūllo̍ dɔ̄wɔ̄ɔ̄ o̍ sōndō, I̍ cho̍ tōsā mā sōō. O̍ ko̍ŋ, nyɛ̄ o̍ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ chō nu̍m dɔ̄wɔ̄ɔ̄ o̍ sōndō, mā kɔ̍ di̍mūl nda̍ ndu̍ kpo̍u̍. Wāna̍ ye̍e̍ma̍ le̍ nu̍m nīla̍ŋ yāŋɔ̄ɔ̄ pɛ̍, ō ya᷄ŋ nu̍m nīla̍ŋ, wāna̍ ye̍e̍ma̍ le̍ nu̍m nīlā yāŋɔ̄ɔ̄ le̍, ō kɛ̄ɛ̍, kāni̍ fo̍ndōle̍ I̍ si̍nā māā wāŋnda̍ I̍sɔ̄lūɛ̄ī wānāa̍ si̍mu̍l la̍ wa̍ nda̍ chō ni̍.”