Read Southern Kisi Īsi̍kīāā 30 Bible Online

Īsi̍kīāā 30 - Southern Kisi bible

Īsi̍kīāā 30

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, so̍o̍ nāa̍ wāŋnda̍ I̍chi̍pī chu̍a̍, mā di̍mu̍l nda̍ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ wo̍. Cha̍ŋ le̍ wāŋnda̍ I̍chi̍pī, mā di̍mi̍ māā, pāa̍le̍ dɛ̍nɛ̍ pa̍lāālē bɛ̄ndūle̍ŋ lē fūūlu̍u̍.

³Pāa̍le̍ŋ lē hīŋ fūūlūūwo̍, pāa̍le̍ Mɛ̄lɛ̄ka̍ Ya̍a̍wɛ̄ɛ̄ le̍ŋ lē chō ni᷅ŋ kpɛ̍ɛ̍lūŋ, pāa̍le̍ nyūmnda̍ŋ mā tūāl ni̍ŋ nde̍ŋ, pāa̍le̍ nyɛ̄ pālāā bɛ̄ndōo̍ ō wā ni̍ŋ le̍ lɛ̄ŋnde̍ le̍ŋ.

⁴Ya̍a̍mɔ̍ɔ̍wa̍ chō hūnɔ̄ɔ̄ lɛ̄ŋndē I̍chi̍pīle̍ŋ dēlɔ̄ɔ̄ chōo̍ a̍ sɔ̍ŋgɔ̍ɔ̍, ndu̍yɛ̍, mī dɛ̍nɛ̍ pa̍lāā bɛ̄ndōo̍ ō tōl o̍ lɛ̄ŋndē Īto̍o̍pīāāle̍ŋ ni᷄ŋ. Wānāā bɔ̄ɔ̍ bɔ̍ɔ̍ o̍ lɛ̄ŋndē I̍chi̍pīle̍ŋ ni᷄ŋ ā chō nda̍ hūnɔ̄ɔ̄ dīū a̍ mɔ̄ɔ̄ŋ fāŋndo̍ŋ. Sūl o̍ su᷄l cho̍ o̍ lɛ̄ŋndē I̍chi̍pīle̍ŋ ni᷄ŋ, ya̍a̍mɔ̍ɔ̍wa̍ chō mu̍ŋ hūnɔ̄ɔ̄ pūŋgā mā kūɛ̄nu᷄ŋ a̍ mu̍ŋ. Lɛ̄ŋndē I̍chi̍pīle̍ŋ lē chō hūnɔ̄ɔ̄ pīɔ̄l mī lē lo̍ pɔ̄m.

⁵“Wāŋnda̍ I̍chi̍pī a̍ chu̍ā ni̍ŋ so̍vɛ̄i̍ya̍ Īto̍o̍pīāā, a̍ ha̍ā Li̍dīāā, a̍ Li̍bīāā, a̍ Ālu̍e̍e̍bīāā, a̍ ha̍ā Ku̍bī, ndu̍yɛ̍, mā chūa̍ vɛ̄lɛ̄ so̍vɛ̄i̍ya̍ wānāā nīa̍a̍ I̍sɔ̄lūɛ̄ī tɛ̍ɛ̄ŋ, le̍ nda̍ hūnɔ̄ɔ̍ sɔ̍ŋgɔ̄ɔ̍ mālāa̍. Kɛ̍ nda̍ kpo̍u̍ ya̍a̍mɔ̍ɔ̍wa̍ chō nda̍ hūnɔ̄ɔ̄ dīū.”

⁶Di̍mu̍l wa᷅ŋnda̍ I̍chi̍pī māā, ya̍ Mɛ̍lɛ̄ka̍ Ya̍a̍wɛ̄ɛ̄ I̍ di̍mi̍ a̍a̍, “So̍vɛ̄i̍ya̍a̍ dīāllūŋ kālāā bɛ̄ndūāā wāŋnda̍ I̍chi̍pī a̍ ti̍i̍nda̍ŋ le̍ nda̍ māndāa̍, ma̍ wā yōŋgāa̍ kīōlɔ̄ɔ̍ wa̍, I̍ cho̍ tōsā mā hu᷄ŋ di̍ū nda̍ kpo̍u̍ a̍ mɔ̄ɔ̄ŋ fāndo̍ŋ. Chɔ̍ŋ Mi̍ki̍dɔ̄ɔ̄ chi̍e̍e̍ ba᷅ lūāŋndo̍, mbō kūɛ̄ a̍ A̍si̍wāŋ chi̍e̍e̍ ba᷅ tōūwo̍, lo̍ŋ kpo̍u̍ ā wā ni̍ŋ nda̍ dīūwo̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.

⁷Lɛ̄ŋndē I̍chi̍pīle̍ŋ kpo̍u̍ lē chō hūnɔ̄ɔ̄ ītāmu̍, mī lē sīmnu᷄ŋ pɔ᷅m, mɛ̄ɛ̍ lɛ̄ŋnde̍ o̍ chi̍e̍ēŋndo̍ ni᷄ŋ i̍ si̍mnu̍ŋ pɔ᷅mnda̍ŋ yɛ̍. Chi̍e̍e̍ŋ cho̍ o̍ lɛ̄ŋndē I̍chi̍pīle̍ŋ ni᷄ŋ ndo̍ŋ, ŋ̄ chō hūnɔ̄ɔ̄ pīɔ̄l mɛ̄ɛ̍ chi̍o̍o̍ŋ o̍ chi̍e̍ēŋndo̍ ni᷄ŋ ŋ̍ pi̍ɔ̍l lɛ̍, mī ŋ̄ sīmnu᷄ŋ pɔ᷅mnda̍ŋ.

⁸I̍ cho̍ lɛ̄ŋndē I̍chi̍pīle̍ŋ mālɔ̄ɔ̄ o̍ yīŋ, ndu̍yɛ̍ wānāā nda̍ tīīnda̍ŋ le̍ nda̍ mālāa̍ wa̍, mī to̍sa̍ mā dīu̍ nda̍. O̍ ko̍ŋ, mī wāŋnda̍ I̍chi̍pī a̍ si̍na̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁹“Tē pāa̍le̍ le̍ŋ lē fūūlu̍u̍ pɛ̍, mī dɛ̍nɛ̍ pa̍lāā kōŋ ō tōl wāŋnda̍ I̍chi̍pi̍ chōo̍, I̍ cho̍ ki̍i̍la̍a̍ nya̍a̍nūŋ nya̍a̍nɔ᷄ŋ bɛ̍ndōo̍ wa̍ vīōmɔ̄ɔ̄, mā kūɛ̄ o̍ dɛ̄ndɛ̄la̍ bɛ̍ndūla̍ŋ ni᷄ŋ, mā kɔ̍ di̍mūl wāŋnda̍ Īto̍o̍pīāā a̍ nyɛ̍ yɔ̍nu̍ŋ a̍ lɛ̄ŋndē I̍chi̍pīle̍ŋ ndo̍. Wāŋnda̍ Īto̍o̍pīāā a̍ yi̍ya̍ŋ māā ya̍a̍mɔ̍ɔ̍wa̍ nɔ̍lā mā chīŋa̍la᷅ŋ nda̍ le̍, kɛ̍ tē ā hu᷄ŋ di̍mūl nda̍ a̍ mɛ̄ɛ̍ ya̍a̍mɔ̍ɔ̍wa̍ ā yēm I̍chi̍pī yɛ̍ pɛ̍, sīōōŋīī bɛ̄ndūe̍i̍ chō nda̍ bīyɔ̄ɔ̄. Ī lo̍ nya̍ o̍ kɔ̄l, he̍ī chō yɔ̄nɔ᷄ŋ.”

¹⁰Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ āā, “Sūl o̍ su᷄l cho̍ o̍ lɛ̄ŋndē I̍chi̍pīle̍ŋ ni᷄ŋ, I̍ cho̍ la̍ŋ mālɔ̄ɔ̄ Māsāa̍ Nābi̍u̍kānɛ̍ɛ̍sā o̍ bā, māsāa̍ Ba̍bi̍lɔ̄ŋ, mbō hu᷄ŋ kɔ̍ndū la̍ŋ kpo̍u̍ mbō kūɛ̄nu᷄ŋ a̍ la̍ŋ.

¹¹Ndu̍ ni̍, so̍vɛ̄i̍ya̍a̍ ndūa̍a̍ ni̍, ā vēsa̍ kɔ̄l ā hīōū lɛ̄ŋnde̍ kpo̍u̍. I̍ cho̍ nda̍ vīōmɔ̄ɔ̄ mā hu᷄ŋ de᷅l lɛ̄ŋndē I̍chi̍pīle̍ŋ chōo̍, mā tɛ̄ɛ̄mbu̍u̍ le̍ŋ. Ā chō I̍chi̍pi̍ chīŋa̍la᷅ŋ a̍ mɔ̄ɔ̄ŋ fāŋndo̍ŋ, mā tōsa̍ mī wāŋ vīlɛ̍i̍ya̍ ā tīu̍ o̍ lɛ̄ŋndē I̍chi̍pīle̍ŋ ni᷄ŋ kpo̍u̍.

¹²I̍ cho̍ tōsā mī Pēē bɛ̍ndōo̍ Na̍īl, o̍ ve̍la̍, ndu̍yɛ̍ mī ma̍l lɛ̄ŋndē I̍chi̍pīle̍ŋ wānāā dɛ̍nɛ̍ wɔ̍ɔ̍ŋnda̍ o̍ bā. I̍ cho̍ tōsā mī wānāā lēkāa̍wa̍ ā mīŋgi̍ lɛ̄ŋndē I̍chi̍pīle̍ŋ pɔ̄m, ndu̍yɛ̍ nyɛ̄ o̍ nyɛ̍ cho̍ lo̍ŋ, mā tɛ̄ɛ̄mbu̍u̍ ndu̍ kpo̍u̍. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”

¹³Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ āā, “Nyɛ̄ o̍ nyɛ̍ cho̍ Mɛ̍mfi̍sī chi̍e̍e̍ o̍ lɛ̄ŋndē I̍chi̍pīle̍ŋ ni᷄ŋ, mī wāŋnda̍ I̍chi̍pī a̍ so̍o̍lūū mu̍ŋ māā mɛ̄lɛ̄ka̍a̍ nda̍, a̍ nyɛ̄m nda̍ tōōsi̍a̍a̍ mā sōōlūū mu̍ŋ ndo̍ŋ, I̍ cho̍ mu̍ŋ tɛ̄ɛ̄mbūū kpo̍u̍. I̍ cho̍ tōsā lɛ̄ŋndē I̍chi̍pīle̍ŋ kpo̍u̍, lē nɔ᷅ ni̍ŋ wa̍nā o̍ wāna̍ wa᷅ le̍ŋ chīla̍ŋ te̍, ndu̍yɛ̍ mī to̍sa̍ mī sīōōŋīī bɛ̄ndūe̍i̍ bīī wāŋnda̍ I̍chi̍pī kpo̍u̍.

¹⁴Lɛ̄ŋndē I̍chi̍pīle̍ŋ bā tōūwo̍ ki̍nɛ̍i̍, I̍ cho̍ tōsā mī lē tāmbu̍ mī lē sīmnu᷄ŋ pɔ᷅m, ndu̍yɛ̍ mī ma̍l So̍wāŋ o̍ yīŋ, chi̍e̍e̍ cho̍ bā lūāŋndo̍ wo̍, mbō ŋūɛ̄, o̍ ko̍ŋ kɔ̍ɔ̍lī, mī tu̍si̍ wāŋnda̍ Ti̍bi̍sī chi̍e̍e̍ nyɛ᷅ pālāa̍ chōo̍, o̍ cho̍ chi̍e̍e̍ le̍bo᷅llo̍ wo̍.

¹⁵Chi̍e̍e̍ cho̍ ō bɛ̄ɛ̄ndīāā ō kālā ka̍lā, mi̍ lɛ̄ŋndē I̍chi̍pīle̍ŋ lē tīīnda᷄ŋ ndu̍ le̍ le̍ŋ māndāa̍ wo̍, ndu̍ yɔ̍nūŋ ni̍ māā Pɛ̍lu̍sīɔ̄m, I̍ cho̍ ndu̍ nyɛ̄ pālāa̍ tūsī chōo̍ a̍ tu̍mbe̍ bɛ̍ndū ya̍ I̍ dɔ̍ɔ̍nu᷄ŋ ndo̍, ndu̍yɛ̍ mī tɛ̍ɛ̍mbu̍u̍ wāŋnda̍ Ti̍bi̍sī chi̍e̍e̍.

¹⁶I̍ cho̍ lɛ̄ŋndē I̍chi̍pīle̍ŋ mālɔ̄ɔ̄ o̍ yīŋ, ndu̍yɛ̍, mī to̍sa̍ mī kɔ̄l tāmbɛ̍i̍ bɛ̍ndōo̍ ō kōma̍l wāŋnda̍ Pɛ̍lu̍sīɔ̄m. Ya̍a̍mɔ̍ɔ̍wa̍ chō sāāsa̍ ba̍lu̍ Ti̍bi̍sī wo̍ pēsī pēsī, mā lūɛ̄ī ku̍ndā bɛ̄ndōo̍ mā kɔ̍ bi̍ī chi̍o̍o̍.

¹⁷Chūāā pīāāndūa̍a̍ Hɛ̄līo̍o̍po̍līī ni̍, a̍ ha̍ā Būba̍si̍tīī, ā chō nda̍ hūnɔ̄ɔ̄ dīū a̍ mɔ̄ɔ̄ŋ fāŋndo̍ŋ, ndu̍yɛ̍, mā bīu̍ wāŋnda̍ ā tūa̍a̍ mā kūɛ̄ a̍ nda̍ o̍ bīyɔ̄ɔ̍ ni᷄ŋ.

¹⁸Wāŋnda̍ I̍chi̍pī a̍ wa̍ wānāā yōŋgāā bɛ̄ndū, kāni̍ fo̍ndōle̍, le̍ kpāāyā bɛ̍ndū nda̍ a̍a̍ nɔ̍ wo̍. Kɛ̍ I̍ cho̍ kpāāyā ko̍ŋ tɛ̄ɛ̄mbūū mī yōŋga̍ ndā ko̍ŋ mɛ̄ɛ̄lu̍, ndu̍yɛ̍ mī to̍sa̍ mī nyūmmā bɛ̄ndūa̍ŋ mā tōl Ta̍fa̍nī chi̍e̍e̍ i̍pa̍la̍ de̍ŋ. Nyūmnda̍ŋ mā chō tōlɔ̄ɔ̄ o̍ lɛ̄ŋndē I̍chi̍pīle̍ŋ ni᷄ŋ kpo̍u̍. Wānā o̍ wāna̍ lo᷅ ni̍ŋ yo̍o̍mū o̍ lɛ̄ŋndē I̍chi̍pīle̍ŋ ni᷄ŋ, ā chō nda̍ hūnɔ̄ɔ̄ bīū mā kūɛ̄ a̍ nda̍ o̍ bīyɔ̄ɔ̍ ni᷄ŋ.

¹⁹I̍ cho̍ wāŋnda̍ I̍chi̍pi̍ nyɛ̄ pālāā bɛ̄ndōo̍ tūsī chōo̍ mbō fūūlu̍u̍ nda̍ mɛ̍ɛ̄. O̍ ko̍ŋ, wāŋnda̍ I̍chi̍pī a̍ cho̍ sīnā māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

²⁰Wɔ̄sī na̍a̍ ŋ̄ chīŋa̍ wɔ̄sīla̍ŋ tɔ̍ a̍ ō pīlɛ̍ o̍ bīyɔ̄ɔ̍ ni᷄ŋ ndo̍, pāŋgi̍i̍ tāse̍i̍ o̍ wɔ̄sī kōŋ ni᷄ŋ, lɔ̄mā lē ŋɔ᷄mmɛ̍ū, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²¹Mbo̍ dīmūl la̍ āā, “Wāna̍ chi̍o̍o̍ Īsi̍kīāā, I̍ ye᷅m māsā bɛ̍ndōo̍ I̍chi̍pī bāa̍. Kɛ̍ ndu̍yɛ̍ ā yīi̍ ndu̍ bā kālāa̍ a̍ lākpɛ̄ndɛ̍ le̍ mbō mīīŋgu̍ sīmu̍l te̍. Le̍la̍ŋ ō nɔ̍lā lɛ̍ mbō bīī mūɛ̄ī ndūɛ̍i̍ fāŋnde̍ o̍ bā le̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ ndūa̍a̍ le̍.

²²Le̍la̍ŋ, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyɛ̄ ya̍ I̍ di̍mi̍ wo̍ cho̍ ni̍. I̍ cho̍ Māsā bɛ̍ndōo̍ I̍chi̍pi̍ nyɛ̄ pālāa̍ tūsī chōo̍. I̍ cho̍ ndu̍ bāla̍ŋ yīmī, bā ya̍ ye᷅m ndu̍ wo̍ ni̍, a̍ bā kɛ̍ndi̍a̍a̍ lo̍ wo̍. Ndu̍yɛ̍ I̍ cho̍ tōsā ō nɔ̍lā lɛ̍ mbō sāa̍ mūɛ̄ī fāŋnde̍ a̍ bā le̍.

²³I̍ cho̍ wāŋnda̍ I̍chi̍pi̍ sɛ̄ŋī o̍ lɛ̄ŋnde̍ ni᷄ŋ, mī to̍sa̍ mā tīu̍ o̍ chi̍e̍ēŋndo̍ ni᷄ŋ kpo̍u̍.

²⁴I̍ cho̍ māsāa̍ Ba̍bi̍lɔ̄ŋ kpāāyāa̍ kē, mī sɔ̍ɔ̄ ndu̍ mūɛ̄ī ni̍i̍ fāŋnde̍ o̍ bā. Kɛ̍ māsāa̍ I̍chi̍pī ndu̍, I̍ cho̍ ndu̍ bāla̍ŋ yīmī, ndu̍yɛ̍ mbō cha᷄ŋ cha᷄ŋ īmɔ̍nɔ̍ɔ̍ māsāa̍ Ba̍bi̍lɔ̄ŋ lāchī, mɛ̄ɛ̍ nda̍ yɔ̄ŋūl nu̍a̍ā wāŋndo̍ mbō wa̍ pīɔ̍mndo̍ yɛ̍.

²⁵I̍ cho̍ māsā bɛ̍ndōo̍ Ba̍bi̍lɔ̄ŋ kpāāyāa̍ kē, le̍ sɔ̍ŋgɔ̄ɔ̍ a̍ lɛ̄ŋndē I̍chi̍pīle̍ŋ. Kɛ̍ māsā bɛ̍ndōo̍ I̍chi̍pī ndu̍, mī to̍sa̍ bālā ndɔ̄la̍ŋ lā nɔ᷅ kpāāyā le̍. Tē I̍ sɔ̍ɔ̄ māsāa̍ Ba̍bi̍lɔ̄ŋ mūɛ̄ī fāŋnde̍ o̍ bā pɛ̍, mbō chīŋa̍la᷅ŋ I̍chi̍pi̍, o̍ ko̍ŋ wānā o̍ wānā cho̍ sīnā ni̍, māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

²⁶I̍ cho̍ wāŋnda̍ I̍chi̍pī sɛ̄ŋī o̍ lɛ̄ŋnde̍ ni᷄ŋ, mī to̍sa̍ mā tīu̍ o̍ chi̍e̍ēŋndo̍ ni᷄ŋ kpo̍u̍. O̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”