Read Southern Kisi Īsi̍kīāā 32 Bible Online

Īsi̍kīāā 32 - Southern Kisi bible

Īsi̍kīāā 32

¹Wɔ̄sī na̍a̍ ŋ̄ chīŋa̍ wɔ̄sīla̍ŋ tɔ̍ a̍ lā tīɔ̍ɔ̍ŋ o̍ bīyɔ̄ɔ̍ ni᷄ŋ ndo̍, pāŋgi̍i̍ tɔ̍ a̍ ī ŋīi̍ŋ nde̍, lɔ̄mā lēpīlɛ̍ o̍ wɔ̄sī kōŋ ni᷄ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, so̍li̍ chōndi̍i̍ bīīsi̍e̍i̍ a̍ māsā bɛ̍ndōo̍ I̍chi̍pī o̍kɔ̄ɔ̄, mā di̍mu̍l ndu̍ māā, māsā bɛ̍ndōo̍ I̍chi̍pī, a̍ chu̍a̍ŋnu̍ŋ māā kpɔ̍kūŋndo̍ ŋ̄ chō lɛ̄ŋnde̍ tɛ̄ɛ̄ŋ ni̍. Kɛ̍ ā chō māchūāā māā kūī bɛ̄ndōo̍ o̍ pēe̍ mɛ̄ŋmā īhɛ᷄llo̍ ni᷄ŋ. Nāa̍ ŋ̄ chō o̍ pēēla̍ bɛ̍ndūla̍ŋ nda̍, mā li̍nda̍ mɛ̄ŋnda̍ŋ a̍ ŋ̄pēlū, mī mā sīmnu᷄ŋ lo̍o̍līo̍o̍.

³Le̍la̍ŋ, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ nyɛ̄ ya̍ I̍ di̍mi̍ wo̍ cho̍ ho̍ō ni̍. I̍ cho̍ wāŋnda̍ dīmūl ku̍ndā bɛ̄ndōo̍, mī ŋ̄ wūu̍ nu̍m yālāa̍ chōo̍ le̍ nu̍m bīyɔ̄ɔ̍. Ndu̍yɛ̍ mā na᷄ŋ nu̍m mā sōli̍ nu̍m o̍ kɔ̄ŋgɔ̍.

⁴I̍ cho̍ nu̍m vīōūwɔ̄ɔ̄ o̍ kɔ̄ŋgɔ̍ yo̍ndōo̍ ni᷄ŋ, ndu̍yɛ̍ mī to̍sa̍ mī yōūwa̍, a̍ vīsīa̍a̍ mā hu᷄ŋ di̍ō dīāllūŋ nūmndo̍ŋ.

⁵I̍ cho̍ dīāllūŋ nūmndo̍ŋ mālɔ̄ɔ̄ o̍ pēmbo᷄ŋ chōo̍, mī dīāllūŋ nūm si̍o̍vɛ̍i̍yo̍ŋ ŋ̄ tīu̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ kpo̍u̍.

⁶I̍ cho̍ tōsā mī lɛ̄ŋnde̍ŋ lē kūɛ̄ a̍ līwāa̍, mī lē fūūlu̍u̍ o̍ pēmbūŋ bɛ̄ndo᷄ŋ di̍, a̍ kōo̍ma̍ nu̍m ma̍ wa̍ ni̍ŋ kɔ᷅la̍ŋ kōŋgi̍o̍o̍ wa̍ŋ. Kōo̍ma̍ nu̍mnda̍ŋ mā kūā ni̍ŋ ko᷅ŋgi̍la̍ŋ o̍ pēēla̍ŋ.

⁷Ndu̍yɛ̍, pāa̍le̍ ya̍ I̍ tɛ̍ɛ̍mbūū ni̍ŋ nu̍m nde̍ŋ, I̍ cho̍ ha̍la̍a̍ kūmbɔ̄ɔ̄, mī lōo̍ŋ ŋ̄ lūɛ̄ī o̍ nyūmnda̍ŋ ni᷄ŋ. Pāa̍le̍ le̍ŋ, pu̍e̍e̍ŋ bɛ̍ɛ̍ wānā chi᷅ ni̍ŋ pāa̍le̍ŋ, kɛ̄lɛ̄ŋgāā ni᷅ŋ te̍, mī wānā che᷅ bɛ̍ɛ̍ pa̍ŋge̍i̍ īchɔ̄l.

⁸I̍ cho̍ nyɛ̄ wa̍wo̍ŋ cho̍ o̍ ha̍la̍a̍ ni᷄ŋ ndo̍ fāŋā, mī to̍sa̍ mī nyūmnda̍ŋ mā tōl o̍ lɛ̄ŋndē nyāle̍ŋ ni᷄ŋ kpi᷅ŋgbi̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.”

⁹“Tē I̍ hu̍ŋ tɛ̍ɛ̍mbūū nya̍ pɛ̍, ndu̍yɛ̍ mī to̍sa̍ mī yōōŋgū kōŋ ō tīu̍ kpo̍u̍, I̍ cho̍ tōsā, wāŋnda̍ o̍ lɛ̄ŋīī bɔ̄ɔ̍ bɔ̍ɔ̍ ni̍ŋ, mā būūla̍ŋ. Lɛ̄ŋīi̍ tu̍i̍i̍ yɔ̍ bɛ̍ɛ̍ a̍ nya̍ o̍kɔ̄ɔ̄ le̍ ve̍, sīōōŋnde̍ chō nda̍ bīyɔ̄ɔ̄ mā būūla̍ŋ.

¹⁰Nyɛ̄ ya̍ I̍ to̍sā ni̍ŋ a̍ nya̍ wo̍, lɛ̄ŋīī bɔ̄ɔ̍ bɔ̍ɔ̍, tē ā hu᷄ŋ tu̍e̍ī a̍ ndu̍ o̍kɔ̄ɔ̄ pɛ̍, kɔ̄ndɔ̄fi̍li̍ bɛ̄ndōo̍ chō nda̍ bīyɔ̄ɔ̄. Tē pāa̍le̍ ya̍ Mɛ̍lɛ̄ka̍ tūsī ni̍ŋ nya̍ nyɛ̄ pālāā kōŋ chōo̍ le̍ŋ lē fūūlu̍u̍ pɛ̍, māsāa̍ bɛ̍ndūa̍a̍ o̍ lɛ̄ŋnde̍ he̍ī ni᷄ŋ, sīōōŋnde̍ chō nda̍ bīyɔ̄ɔ̄, mā nyīīya̍ kpa̍kpā. Ā wā ni̍ŋ nyi̍i̍yāa̍ le̍ te̍le̍ŋ o̍ te̍le̍ŋ a̍ sīōōŋnde̍, ndu̍yɛ̍ mā būūla̍ŋ le̍ yōōmūlā ndāla̍ŋ.

¹¹“Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyɛ̄ ya̍ I̍ di̍mi̍ wo̍ cho̍ ho̍ō ni̍. Māsā bɛ̍ndōo̍ Ba̍bi̍lɔ̄ŋ o̍ cho̍ nya̍ hūnɔ̄ɔ̄ chīŋa̍la᷅ŋ a̍ mūɛ̄ī ndūɛ̍i̍ fāŋnde̍.

¹²I̍ cho̍ tōsā mī wānāā kpāāyāā bɛ̄ndūa̍a̍, wānāā kɔ̄l vēsɛ̍i̍ya̍a̍ bɛ̍ndūa̍a̍ o̍ chi̍e̍ēŋndo̍ ni᷄ŋ, mā hu᷄ŋ de᷅l nya̍ chōo̍ a̍ mɔ̄ɔ̄ŋ nda̍ŋ fāŋndo̍ŋ, mā dīu̍ wānāā bɔ̍ɔ̍ bɔ̍ɔ̍. Ā chō tōsā mī yōŋga̍ I̍chi̍pī ke̍lū wo̍ ō sīmnu᷄ŋ nyɛ᷅ fo̍ndō, ndu̍yɛ̍ mā dīu̍ wānāā bɔ̄ɔ̍ bɔ̍ɔ̍.

¹³Chɔ̄lūāā nyāa̍ o̍ pēēla̍ŋ kɔ̄ŋgɔ̍ kpo̍u̍, I̍ cho̍ nda̍ hūnɔ̄ɔ̄ tɛ̄ɛ̄mbūū. I̍ cho̍ tōsā nyɛ̄ o̍ nyɛ̄ o̍ nɔ̍lā lɛ̍ ni̍ŋ mbō hi᷄ŋ pēēla̍ŋ I̍chi̍pī mbō līnda̍ la̍ŋ te̍, wāna̍ chi̍e̍e̍ ni̍ chɔ̄lū ni̍.

¹⁴I̍ cho̍ tōsā mɛ̄ŋnda̍ŋ I̍chi̍pī ma̍ wa̍ mā dīāndāā wa̍la̍ŋ. Pēēla̍ŋ I̍chi̍pī lā wā ni̍ŋ hi̍o̍u̍wɔ̄ɔ̍ lā dīāndāā wa̍la̍ŋ māā māchūɛ̄ī. Ya̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.

¹⁵I̍ cho̍ tōsā lɛ̄ŋndē I̍chi̍pīle̍ŋ kpo̍u̍ mī lē pīɔ̍l, mī lē sīmnu᷄ŋ pɔ᷅m. Wānā o̍ wāna̍ cho̍ o̍ lɛ̄ŋndē I̍chi̍pīle̍ŋ ni᷄ŋ, I̍ cho̍ tōsā mā hu᷄ŋ di̍ū nda̍ kpo̍u̍. O̍ ko̍ŋ, mī wāŋnda̍ I̍chi̍pī a̍ si̍na̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹⁶Chōndi̍i̍ bīīsi̍e̍i̍ he̍ī, ndi̍ wa᷅ ni̍ŋ so̍li᷄ŋndo̍ a̍ nya̍ o̍kɔ̄ɔ̄ ni̍. Ndu̍yɛ̍ wāŋ lāāndūa̍a̍ o̍ lɛ̄ŋnde̍ ni᷄ŋ kpo̍u̍, ā wā ni̍ŋ chōndi̍i̍ he̍ī sōlīo̍o̍ le̍ I̍chi̍pī nda̍ wānāā ndūa̍a̍. Ya̍ Mɛ̍lɛ̄ka̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.”

¹⁷Wɔ̄sī na̍a̍ ŋ̄ chīŋa̍ wɔ̄sīla̍ŋ tɔ̍ ā lā tīɔ̍ɔ̍ŋ o̍ bīyɔ̄ɔ̍ ni᷄ŋ ndo̍, pāŋgi̍i̍ tāse̍i̍, mālɔ̄ tɔ̍ a̍ lē ŋūɛ̍ɛ̍nu̍ o̍ wɔ̄sī kōŋ ni᷄ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

¹⁸Mbo̍ dīmūl la̍ āā, “Wāna̍ chi̍o̍o̍ Īsi̍kīāā, cha̍ŋ le̍ wāŋnda̍ I̍chi̍pī kpo̍u̍, kāni̍ fo̍ndōle̍, dɛ̍nɛ̍ pa̍lāa̍ tu̍āl ni̍ŋ nda̍ chōo̍ wo̍ ō wā ni̍ŋ o̍ bɔ̍ɔ̍. To̍sa̍ mī wāŋnda̍ ha̍ā kūɛ̄ chi̍e̍e̍ pīɔ̍m, nāa̍ wāŋnda̍ o̍ lɛ̄ŋīī kpāāyɛ̄ī bɛ̄ndūe̍i̍ ni᷄ŋ kpo̍u̍ a̍ cho̍ ā chūūŋgi̍āŋ nda̍.

¹⁹Di̍mu̍l nda̍ māā, wāŋnda̍ I̍chi̍pī, lā hīu̍ lɛ̍ wānā o̍ wānā na̍ŋɔ̄ɔ̄ le̍. Le̍la̍ŋ lā kɔ̍ chi̍e̍e̍ pīɔ̍m mī lā kɔ̍ hi̍ni̍ lo̍ŋ, lātūlu̍ nya̍ wānāa̍ si̍nā Mɛ̍lɛ̄ka̍ le̍ wa̍.”

²⁰“Ā chō hūnɔ̄ɔ̄ wāŋnda̍ I̍chi̍pi̍ dīū, mɛ̄ɛ̍ nda̍ dīu̍ wāŋnda̍ ā pīli̍a̍a̍ a̍ mɔ̄ɔ̄ŋ fāŋndo̍ŋ yɛ̍. I̍chi̍pī o̍ cho̍ ni᷅ŋ ō mālāā ya̍a̍mɔ̍ɔ̍wa̍ o̍ bā, ā chō ndu̍ sāsɔ̄ɔ̄, nda̍ wānāā ndūa̍a̍ lātūlu̍ mā kūɛ̄ a̍ nda̍ chi̍e̍e̍ pīɔ̍m.

²¹Nya̍ ni̍, wānāa̍ hu᷅ŋ ni̍ŋ nya̍ sɔ̍ŋgɔ̍ɔ̍ mālāa̍ wa̍ ni̍, ā chō nya̍ hūnɔ̄ɔ̄ dīū. O̍ ko̍ŋ, māsāa̍ tɔ̍ɔ̍wa̍a̍ bɛ̍ndūāā nda̍ dīu̍ o̍ chɔ̄ūla̍ŋ ma̍ wā chi̍e̍e̍ pīɔ̍m nda̍, ā chō dīmu̍la᷅ŋ māā, wānāa̍ kɛ̍ɛ̍ ha̍ā Mɛ̄lɛ̄ka̍ wa̍, nda̍ bɛ̍ɛ̍ ā hīŋ chi̍e̍e̍ pīɔ̍m. Ya̍a̍mɔ̍ɔ̍wa̍ dīu̍ nda̍ a̍ mɔ̄ɔ̄ŋ fāŋndo̍ŋ ma̍ wā īhīni̍ na̍nu᷄ŋ.

²²“Āsi̍i̍līāā o̍ cho̍ ni᷅ŋ ndo̍ŋ, nda̍ so̍vɛ̄i̍ya̍a̍ ndūa̍a̍ kpo̍u̍. So̍vɛ̄i̍ya̍a̍ ndūa̍a̍ nda̍ dīu̍ a̍ mɔ̄ɔ̄ŋ fāŋndo̍ŋ nda̍, sɛ̄īla̍ ndāla̍ŋ lā chō ndu̍ lā bālāā si̍lɔ̍.

²³Sɛ̄īla̍ ndāla̍ŋ lā chō o̍ fo̍ndāŋ yīŋgi̍lɛ̍i̍ bɛ̍ndōo̍ chi̍e̍e̍ pīɔ̍m. Sɛ̄īla̍ so̍vɛ̄i̍ya̍a̍ ndūa̍a̍ lā chō ndu̍ bālāā si̍lɔ̍. Nda̍ kpo̍u̍ a̍ mɔ̄ɔ̄ŋ fāŋndo̍ŋ nda̍ dīu̍ nda̍ ni̍. So̍vɛ̄i̍ya̍a̍ ndūa̍a̍ ha̍ā, ma̍ tōsā mi̍ sīōōŋīī bɛ̄ndūe̍i̍ bīī wāŋnda̍ o̍ chi̍e̍ēŋndo̍ ni᷄ŋ kpo̍u̍.

²⁴“Ndu̍yɛ̍, lɛ̄ŋndē Ɛ̍lāmnde̍ŋ bɛ̍ɛ̍, lē chō lo̍ŋ, a̍ sɛ̄īla̍ so̍vɛ̄i̍ya̍a̍ ndūāā ku̍ndāā bɛ̄ndūa̍a̍ lābālāā. Pūa̍a̍ ha̍ā nda̍ a̍a̍ si̍nā Mɛ̍lɛ̄ka̍ le̍, ndu̍yɛ̍ nda̍ bɛ̍ɛ̍ ā wa̍ wānāā kpāāyāā bɛ̍ndū. Ma̍ tōsā mi̍ lɛ̄ŋīī fāŋgā fa̍ŋgā ī pīā a̍ sīōōŋīī bɛ̄ndūe̍i̍ le̍ nda̍. Kɛ̍ nda̍ bɛ̍ɛ̍ mi̍ ya̍a̍mɔ̍ɔ̍wa̍ dēl nda̍ chōo̍ ma̍ dīū nda̍ kpo̍u̍ mɛ̍ɛ̍ i̍ yɔ̍nu̍ŋ a̍ lɛ̄ŋīī fāŋgā fa̍ŋgā yɛ̍. Ma̍ wā ni᷅ŋ hāū i̍hi̍ni̍ chi̍e̍e̍ pīɔ̍m a̍ si̍ɔ̍mbu̍la̍ bɛ̍ndūla̍ŋ.

²⁵Ā chō īhīni̍ chi̍e̍e̍ pīɔ̍m nda̍ so̍vɛ̄i̍ya̍a̍ ndūa̍a̍ lātūlu̍, mi̍ sɛ̄īla̍ so̍vɛ̄i̍ya̍a̍ ndūa̍a̍ lā wā ndu̍ lā bālāā si̍lɔ̍. Nda̍ kpo̍u̍ a̍ mɔ̄ɔ̄ŋ fāŋndo̍ŋ nda̍ dīu̍ nda̍ ni̍, ndu̍yɛ̍ nda̍ a̍a̍ si̍nā ya̍ Mɛ̍lɛ̄ka̍ le̍. So̍vɛ̄i̍ya̍ ha̍ā ma̍ tōsā mi̍ sīōōŋīī bɛ̄ndūe̍i̍ bīī wāŋnda̍ o̍ chi̍e̍ēŋndo̍ ni᷄ŋ kpo̍u̍. Ndu̍yɛ̍ ā chō ni᷅ŋ hāū i̍hi̍ni̍ chi̍e̍e̍ pīɔ̍m, nda̍ wānāā wāŋnda̍ dīu̍ a̍ mɔ̄ɔ̄ŋ fāŋndo̍ŋ nda̍ lātūlu̍, a̍ si̍ɔ̍mbu̍la̍ bɛ̄ndūla̍ŋ.

²⁶“O̍ ko̍ŋ kɔ̍ɔ̍lī, lɛ̄ŋndē Mi̍si̍a̍kī le̍ŋ ni̍, a̍ lɛ̄ŋndē Tu̍bāā le̍ŋ, nda̍ bɛ̍ɛ̍ ā chō chi̍e̍e̍ pīɔ̍m, a̍ sɛ̄īla̍ so̍vɛ̄i̍ya̍a̍ ndāā ku̍ndāā bɛ̄ndūa̍a̍ lābālāā. Pūa̍a̍ ha̍ā nda̍ a̍a̍ si̍nā ya̍ Mɛ̍lɛ̄ka̍ le̍. Ma̍ tōsā mi̍ sīōōŋīī bɛ̄ndūe̍i̍ bīī wāŋnda̍ o̍ chi̍e̍ēŋndo̍ ni᷄ŋ kpo̍u̍.

²⁷Ndu̍yɛ̍ mɛ̄ɛ̍ pūa̍a̍ ha̍ā ā vi̍, ā chɔ᷄ nda̍ chɔ̄ lēbɛ̄ɛ̄, mɛ̄ɛ̍ nda̍ chɔ̍ wānāā kpāāyāā bɛ̍ndūāā māsīndīa̍a̍ yɛ̍ le̍. Wānāā kpāāyāā bɛ̍ndūāā māsīndīa̍a̍ ha̍ā ki̍nɛ̍i̍, mɛ̄ɛ̍ nda̍ wa̍ nda̍ chɔ̄ɔ̍, ma̍ chɔ̄ nda̍ ā dōvīa̍ŋ le̍nde̍ o̍ wōlɔ̄ɔ̄lā ndāla̍ chɔ̄ūla̍ŋ ni᷄ŋ, mɔ̄ɔ̄ŋ nda̍a̍ŋ fāŋndo̍ŋ ni̍, nyɛ̄lā kālā ka̍lālā so̍vɛ̄i̍ya̍ ā sɔ̄ŋgā o̍ lābā le̍ nda̍ māndāa̍ o̍ sɔ̍ŋgɔ̄ɔ̍ ni᷄ŋ nda̍ŋ ni̍, la̍ŋ kpo̍u̍ lā wa̍ nda̍ lā sāāyi̍a̍ŋ le̍kɔ̍ɔ̍ ma̍ chɔ̄ nda̍. Ma̍ tōsā mi̍ sīōōŋīī bɛ̄ndūe̍i̍ bīī wāŋnda̍ o̍ chi̍e̍ēŋndo̍ ni᷄ŋ kpo̍u̍.

²⁸“Wāŋnda̍ I̍chi̍pī, nyɛ̄ o̍ nyɛ̍ yɔ̍nu̍ŋ a̍ lɛ̄ŋīi̍ kɛ̍ɛ̍ he̍ī ya̍ Mɛ̍lɛ̄ka̍ ve̍, lɛ̄ŋīī nda̍ dīu̍ wānāā ndāa̍ a̍ mɔ̄ɔ̄ŋ fāŋndo̍ŋ nde̍, nya̍ bɛ̍ɛ̍ le̍nde̍ ko̍ni̍ i̍ yɔ̍nūŋ ni̍ŋ a̍ nya̍ ni̍.

²⁹“Māsā bɛ̍ndōo̍ le̍ I̍dɔ̄m ni̍, māsāa̍ ndūāā pɔ̍mbūa̍a̍ ni̍, nda̍ kpo̍u̍ ā chō hāū chi̍e̍e̍ pīɔ̍m. Wāŋnda̍ ha̍ā ā wa̍ wānāā kpāāyāā bɛ̍ndū o̍ chi̍e̍ēŋndo̍ ni᷄ŋ. Kɛ̍ a̍ kpāāya̍ ndā ko̍ŋ kpo̍u̍, mi̍ ya̍a̍mɔ̍ɔ̍wa̍a̍ ndāa̍ hu᷄ŋ de᷅l nda̍ chōo̍ ma̍ dīū nda̍, mɛ̄ɛ̍ i̍ yɔ̍nu̍ŋ a̍ lɛ̄ŋīi̍ kɛ̍ɛ̍ ya̍ Mɛ̍lɛ̄ka̍ ve̍ ī pīlɛ̍i̍ yɛ̍. Wāŋnda̍ ha̍ā ā chō hāū chi̍e̍e̍ pīɔ̍m, lātūlu̍ nda̍ wānāa̍ kɛ̍ɛ̍ ya̍ Mɛ̍lɛ̄ka̍ wa̍.

³⁰“Māsāā bɛ̍ndūa̍a̍ wa̍ bā lūāŋndo̍ wa̍ ni̍, a̍ wāŋnda̍ kpo̍u̍ o̍ lɛ̄ŋndē Sa̍i̍dɔ̄ŋnde̍ŋ ni᷄ŋ, nda̍ kpo̍u̍ ā chō chi̍e̍e̍ pīɔ̍m. Wāŋnda̍ ha̍ā, ā wa̍ wānāā kpāāyā bɛ̍ndū o̍ chi̍e̍ēŋndo̍ ni᷄ŋ. Ma̍ tōsā mi̍ sīōōŋīī bɛ̄ndūe̍i̍ bīī wāŋnda̍ o̍ chi̍e̍ēŋndo̍ ni᷄ŋ kpo̍u̍. Ndu̍yɛ̍ wāŋnda̍ ha̍ā ma̍ kɛ̄ɛ̄ ya̍. Kɛ̍ nda̍ kpo̍u̍ ā chō ni᷅ŋ hāū chi̍e̍e̍ pīɔ̍m a̍ si̍ɔ̍mbu̍la̍ bɛ̍ndūla̍ŋ, lātūlu̍ nda̍ wānāā nda̍ dīu̍ a̍ mɔ̄ɔ̄ŋ fāŋndo̍ŋ nda̍.

³¹“Tē Māsā bɛ̍ndōo̍ I̍chi̍pī o̍ ko̍ma̍l wāŋnda̍ ha̍ā kpo̍u̍ chi̍e̍e̍ pīɔ̍m pɛ̍, mi̍ chē bɛ̍ɛ̍ ma̍ dīū so̍vɛ̄i̍ya̍a̍ ndūa̍a̍ sɛ̍lɛ̍ bɛ̍ndōo̍ a̍ mɔ̄ɔ̄ŋ fāŋndo̍ŋ ni̍, kɛ̍ ō chō kɔ̄l nyɔ̄ɔ̄lāa̍ sɔ̄lā.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ wo̍ cho̍ ko̍ŋ ni̍.

³²“Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī māā, māsā bɛ̍ndōo̍ I̍chi̍pī o̍ to̍sa̍ mi̍ sīōōŋīī bɛ̄ndūe̍i̍ bīī wāŋnda̍ o̍ chi̍e̍ēŋndo̍ ni᷄ŋ. Kɛ̍ ndu̍ ni̍, so̍vɛ̄i̍ya̍a̍ ndūāā ku̍ndāā bɛ̄ndūa̍a̍ ni̍, ā chō nda̍ dīū a̍ mɔ̄ɔ̄ŋ fāŋndo̍ŋ, mā kɔ᷄ wa᷅ chi̍e̍e̍ pīɔ̍m, nda̍ wānāa̍ kɛ̍ɛ̍ ya̍ wa̍ lātūlu̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.”