Read Southern Kisi Īsi̍kīāā 33 Bible Online

Īsi̍kīāā 33 - Southern Kisi bible

Īsi̍kīāā 33

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, di̍mūl wa̍nāā nūmnda̍ māā ya̍ Mɛ̍lɛ̄ka̍ I̍ di̍mi̍ ma̍a̍, tē I̍ dɔ̍ɔ̍nu᷄ŋ tu̍mbe̍ a̍ lɛ̄ŋnde̍ŋ pɛ̍ le̍ yɔ̄ŋ ndā wɔ̍ɔ̍ŋndo̍, mī kɛ̍ɛ̍si̍a̍a̍ le̍ le̍ŋ mālɔ̄ɔ̍ ya̍a̍mɔ̍ɔ̍wa̍ o̍ bā, wānāa̍ cho̍ o̍ lɛ̄ŋndē lēŋ ni᷄ŋ nda̍ tē ā tūēī a̍ ndi̍ o̍kɔ̄ɔ̄ pɛ̍, hɛ̄līo̍o̍ nda̍ hɛ̄lī wa̍nā pi᷅lɛ̍ nda̍ tɛ̄ɛ̄ŋ ni̍, mā kɛ̄si̍ ndu̍ īnɛ̍, le̍ mbō wa̍ mɛ̄ŋgɛ̄lāa̍.

³Tē wānā ko̍ŋ ō chē ya̍a̍mɔ̍ɔ̍wa̍ hūnɔ̄ɔ̍ pɛ̍, ō hɔ᷄ŋ bu̍lo̍o̍, le̍ wāŋnda̍ dīmūllo̍ māā ya̍a̍mɔ̍ɔ̍wa̍ hi᷄ŋ.

⁴Wānā o̍ wāna̍ tu̍e̍ī bu̍lu̍ ko̍ŋ pɛ̍ mbō sāāla̍ŋ te̍, mī ya̍a̍mɔ̍ɔ̍wa̍ hu᷄ŋ di̍ī ndu̍, wānā ko̍ŋ ndu̍ pi̍la̍ tɔ̍ɔ̍ya̍ŋ pīɔ̍m ndɔ̄ɔ̍ ō wā cho̍o̍ ni̍,

⁵kāni̍ fo̍ndōle̍, ō tūēī bu̍lo̍o̍ ō sāāla̍ŋ te̍. Le̍la̍ŋ ndu̍ pi̍la̍ tɔ̍ɔ̍ya̍ŋ pīɔ̍m ndɔ̄ɔ̍ ō wā cho̍o̍ ni̍. Tē ndu̍ o̍o̍ ya̍ŋ nīla̍ŋ o̍ nyɛ̄ wānā mɛ̍ŋgɛ̄lāa̍ ō dīmi̍ wo̍ pɛ̍, yōōmū ndɔ̄ɔ̍ wa̍ chīndā.

⁶Kɛ̍ tē wānā mɛ̍ŋgɛ̄lāā nda̍ kɛ̄si̍ wo̍ ō chē ya̍a̍mɔ̍ɔ̍wa̍ hūnɔ̄ɔ̍ pɛ̍, mbō hɔ̍ŋ bu̍lo̍o̍ le̍ wāŋnda̍ dīmūllo̍ le̍, mbō lo̍ o̍ ko̍ŋ mī ya̍a̍mɔ̍ɔ̍wa̍ hu᷄ŋ de᷄l nda̍ chōo̍ mā dīu̍ nda̍, mī wānāā kāŋ ā lo̍ o̍ yɔ̄ŋndā ndāla̍ wɔ̍ɔ̍ŋnda̍ŋ ni᷄ŋ mā vī pɛ̍, wānā mɛ̍ŋgɛ̄lāā kōŋ, ndu̍ tɔ̍ɔ̍ya̍ŋ pīɔ̍m ndāa̍ ō wā cho̍o̍ ni̍.

⁷“Le̍la̍ŋ nūm wāna̍ chi̍o̍o̍ Īsi̍kīāā, I̍ si̍i̍ŋgu̍u̍ nu̍m māā wānā mɛ̄ŋgɛ̄lāa̍, le̍ wāŋnda̍ I̍sɔ̄lūɛ̄ī kpo̍u̍. Tē I̍ dɔ̍ū nu̍m nyɛ̄ o̍ nyɛ̄ o̍ sōndō pɛ̍ le̍ nda̍, mī di̍mu̍l nu̍m le̍ mā kɔ̍ si̍lā nda̍, ā nɔ̄ mā kɔ̍ si̍lā nda̍.

⁸Tē I̍ dɔ̍ɔ̍nu᷄ŋ tu̍mbe̍ a̍ wāna̍ yɔ̄ŋ wɔ̄ɔ̍ŋnda̍ pɛ̍, mī kɛ̍ɛ̍si̍a̍a̍ le̍ ndu̍ dīyɔ̄ɔ̍, mā ku̍e̍ mā kɔ̍ si̍lā ndu̍ mbō ma᷄l yɔ̄ŋndā ndɔ̄la̍ wɔ̍ɔ̍ŋnda̍ŋ te̍, mī wānā ko̍ŋ lo̍ o̍ yɔ̄ŋndā ndɔ̄la̍ wɔ̍ɔ̍ŋnda̍ŋ ni᷄ŋ mbō vī pɛ̍, nūm ya̍ I̍ ha̍ndū tɔ̍ɔ̍ya̍ŋ pīɔ̍m ndɔ̄ɔ̍ chōo̍ ni̍.

⁹Kɛ̍ tē a̍ si̍la̍ wāna̍ yɔ̄ŋ wɔ̄ɔ̍ŋndo̍ ho̍ō pɛ̍, mbō chɛ᷄l le̍ yɔ̄ŋndā ndɔ̄la̍ wɔ̍ɔ̍ŋnda̍ŋ mālɔ̄ɔ̍ le̍, mbō lo̍ lēni᷄ŋ mbō vī pɛ̍, mɛ̄ɛ̍ a̍ chi̍i̍ndi̍a̍a̍ nūm pi̍la̍.”

¹⁰Mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍. Mbo̍ dīmūl la̍ āā, “Wāna̍ chi̍o̍o̍ Īsi̍kīāā, wāŋnda̍ I̍sɔ̄lūɛ̄ī a̍ cho̍ ŋɔ̄ɔ̄chīa̍ŋndo̍ māā nyɛ̄ pālāa̍ to᷅l nda̍ chōo̍ le̍ yɔ̄ŋndā ndāla̍ wɔ̍ɔ̍ŋnda̍ŋ ndo̍ ō chō ō bɔ̄ɔ̍, māā ō hīōū nda̍ māyōōmū, ā nɔ̍lā mā fūla̍ lēni᷄ŋ te̍.

¹¹Īsi̍kīāā, di̍mu̍l wa᷅ŋnda̍ I̍sɔ̄lūɛ̄ī, māā Mɛ̄lɛ̄ka̍ dīmi̍ āā, ‘Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, I̍ ve᷅ a̍ kɔ̄l kɛ̄ndɛ̄ le̍ wāna̍ yɔ̄ŋ wɔ̄ɔ̍ŋndo̍ chɔ̄ɔ̍, mbō lo̍ o̍ yɔ̄ŋndɔ̄ wɔ̍ɔ̍ŋndo̍ ni᷄ŋ mbō vī le̍. I̍ ye̍e̍mā mī wāna̍ yɔ̄ŋ wɔ̄ɔ̍ŋndo̍ ō ma᷄l yɔ̄ŋ ndɔ̄ wɔ̍ɔ̍ŋndo̍, mbō hīōū lāchī a̍ wāa̍ yōōmū. Le̍la̍ŋ nya̍ wāŋnda̍ I̍sɔ̄lūɛ̄ī, lā ma᷄l yɔ̍ŋndā nyāla̍ wɔ̍ɔ̍ŋnda̍ŋ, mī lā mūli̍ŋ nāa̍ ya̍ Mɛ̍lɛ̄ka̍ chūā. Le̍ yɛ̄ɛ̍nɛ̍ nya̍ yēēma̍ yɛ̄ le̍ pīɔ̍mndo̍ sɔ̄lāa̍?’ ”

¹²“Wāna̍ chi̍o̍o̍ Īsi̍kīāā, di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ dīmi̍ māā, wāŋnda̍ I̍sɔ̄lūɛ̄ī, ā yɔ̍ŋ bɛ̍ɛ̍ mī wāŋndo̍ wa̍ wānā kɛ̍ndɛ̄ ya̍ Mɛ̍lɛ̄ka̍ o̍ hɔ̄l, kɛ̍ tē wānā ko̍ŋ fa̍ŋa̍ŋ o̍ nɛ̄i̍ tōnya̍a̍ chōo̍ pɛ̍, mbō mūli̍ŋ yɔ᷅ŋ wɔ̄ɔ̍ŋndo̍ tōsāa̍, wānā ko̍ŋ pīɔ̍mndo̍ o̍ sɔ̍lā ni̍. Ndu̍yɛ̍, dɛ̍nɛ̍ kɛ̍ndɛ̄ o̍ dɛ̍nɛ̍ kɛ̍ndɛ̄ wānā ko̍ŋ ndu̍ o̍o̍ to̍sa̍ pāāndū, ō nɔ̍lā mbō chīīndi̍a̍a̍ yōōmū ndɔ̄ɔ̍ le̍. Kɛ̍ tē ō wa̍ pɛ̍, mī wāna̍ yɔ̄ŋ wɔ̄ɔ̍ŋndo̍ ō ma᷄l yɔ̄ŋ ndɔ̄ wɔ̍ɔ̍ŋndo̍, mbō mūli̍ŋ nāa̍ ya̍ Mɛ̍lɛ̄ka̍ chūā, wānā ko̍ŋ chīīndīa̍a̍ ya̍ I̍ chi̍i̍ndīāā ndu̍ ni̍, mī ma̍l ndu̍ le̍ yɔ̄ŋ ndɔ̄ wɔ̍ɔ̍ŋndo̍. Kɛ̍ wāna̍ tōnya̍a̍ ndu̍, tē ō fāŋa̍ŋ o̍ nɛ̄i̍ tōnya̍a̍ chōo̍ pɛ̍, mbō wōu̍ bāla̍ŋ o̍ yɔ̄ŋ wɔ̄ɔ̍ŋndo̍ tōsāa̍ ni᷄ŋ, pīɔ̍mndo̍ o̍ sɔ̍lā ni̍.

¹³Ā yɔ᷄ŋ bɛ̍ɛ̍ mī chu̍e̍l wāna̍ tōnya̍a̍ būŋgɛ̄i̍, le̍ ndu̍ yōōmū vīlɛ̄īyo̍ kīo̍o̍, kɛ̍ tē wānā ko̍ŋ fa̍ŋa̍ŋ o̍ nɛ̄i̍ tōnya̍a̍ chōo̍ pɛ̍, mbō yīya̍ŋ māā tōnya̍ ndɔ̍ o̍ to̍sa̍ pāāndū wo̍, ō nɔ̄lā mbō chīīndi̍a̍a̍ ndu̍ pɛ̍, wānā ko̍ŋ pīɔ̍mndo̍ o̍ nɔ̍ ni̍ mbō sɔ̄la̍. Nyɛ̄ o̍ nyɛ̄ wānā ko̍ŋ ndu̍ o̍o̍ to̍sa̍ pa̍a̍ndū, ya̍ Mɛ̍lɛ̄ka̍ I̍ lo̍o̍nūŋ a̍ ndu̍ le̍, tōsāa̍ ya̍ I̍ to̍sā ni̍ mbō sɔ̄la̍ pīɔ̍mndo̍.

¹⁴Ndu̍yɛ̍ ā yɔ᷄ŋ bɛ̍ɛ̍, mī di̍mu̍l wāna̍ yɔ̄ŋ wɔ̄ɔ̍ŋndo̍, māā ō chō wu̍ le̍ yɔ̄ŋndā ndɔ̄la̍ wɔ̍ɔ̍ŋnda̍ŋ, kɛ̍ tē ō ma᷄l yɔ̄ŋndā ndɔ̄la̍ wɔ̍ɔ̍ŋnda̍ŋ pɛ̍, mbō mūli̍ŋ nyɛ̍ bɛ̍nda̍ wo̍ tōsāa̍,

¹⁵tē wāŋndo̍ lēndu̍l ndu̍ nyɔ̄ɔ̍ pɛ̍, ō ku̍u̍nāŋ nyɛ᷅ kōŋ te̍, tē ō chīīmbu̍u̍ nyɛ̄ pi̍la̍ pɛ̍, ō mīŋgi̍, ndu̍yɛ̍ mbō tōl sāwāla̍ to̍sā mbō hīōū lāchī a̍ wāa̍ yōōmū la̍ŋ kɔ̄ɔ̄lī pɛ̍, ndu̍yɛ̍, mbō pɛ̄ŋgi̍ yɔ̄ŋ wɔ̄ɔ̍ŋndo̍ tōsāa̍ pɛ̍, wānā ko̍ŋ hīōūwɔ̄ɔ̍ o̍ hi̍a̍ū la̍chi̍ a̍ wāa̍ yōōmū ni̍, ō vi᷅ le̍.

¹⁶Ndu̍yɛ̍, yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ wānā ko̍ŋ ō tōsa̍, mālɔ̄ɔ̍ ya̍ I̍ ma᷅l ndu̍ le̍ ndu̍ ni̍, mī chi̍i̍ndi̍a̍a̍ ndu̍, kāni̍ fo̍ndōle̍, le̍ mɛ̄ɛ̍ o̍ ma̍l yɔ̄ŋndā ndɔ̄la̍ wɔ̍ɔ̍ŋnda̍ŋ, mbo̍ mūli᷄ŋ sɔ̍ɔ̍ŋ bɛ̍nda̍ wo̍ŋ tōsāa̍ yɛ̍.”

¹⁷“Nyɛ̄ kōŋ wānāā nūmnda̍ I̍sɔ̄lūɛ̄ī a̍ di̍mi̍ ni̍ māā ya̍ Mɛ̍lɛ̄ka̍ I̍ se̍ndu̍ le̍. Kɛ̍ ndu̍yɛ̍, ō cho̍ ya̍ le̍ kɛ̍ɛ̍ sāndɔ̄ɔ̍ le̍, nda̍ wāŋnda̍ I̍sɔ̄lūɛ̄ī nda̍ se̍ndu̍ le̍ ni̍.

¹⁸Tē wāna̍ cho̍ sa̍kpō ya̍ Mɛ̍lɛ̄ka̍ o̍ hɔ̄l lo̍ ō fa̍ŋa̍ŋ o̍ nɛ̄i̍ tōnya̍a̍ chōo̍ pɛ̍, mbō mūli̍ŋ yɔ᷅ŋ wɔ̄ɔ̍ŋndo̍ tōsāa̍, pīɔ̍mndo̍ wānā ko̍ŋ ō sɔ̄lā ni̍.

¹⁹Ndu̍yɛ̍ tē wāna̍ yɔ̄ŋ wɔ̄ɔ̍ŋndo̍ ō ma᷄l yɔ̄ŋ ndɔ̄ wɔ̍ɔ̍ŋndo̍ pɛ̍, mbō mūli̍ŋ nyɛ᷅ cho̍ sa̍kpo̍ ya̍ Mɛ̍lɛ̄ka̍ o̍ hɔ̄l lo̍ tōsāa̍ pɛ̍, mɛ̄ɛ̍ wānā ko̍ŋ ō chīīndi̍a̍a̍ ndu̍ pi̍la̍.

²⁰Kɛ̍ mi̍ nya̍ wāŋnda̍ I̍sɔ̄lūɛ̄ī nya̍ dīmī māā ya̍ Mɛ̍lɛ̄ka̍ I̍ sēndu̍ le̍. Kɛ̍ ndu̍yɛ̍, nya̍ wāŋnda̍ I̍sɔ̄lūɛ̄ī, nyɛ̄ o̍ nyɛ̄ nya̍ chō tōsāa̍, lā chō hūnɔ̄ɔ̄ dɛ̍nɛ̍ pa̍lāā bɛ̄ndōo̍ sɔ̄lā le̍ ndu̍, wānā o̍ wānā mɛ̄ɛ̍ kūɛ̍ɛ̍la̍ nu̍mnda̍ŋ lā wā yɛ̍.”

²¹Wɔ̄sī na̍a̍ ŋ̄ chīŋa̍ wɔ̄sīla̍ŋ tɔ̍ a̍ lā tīɔ̍ɔ̍ŋ o̍ bīyɔ̄ɔ̍ ni᷄ŋ ndo̍, pāŋgi̍i̍ tɔ̍ve̍, mālɔ̄ tɔ̍ a̍ lē ŋūɛ̍ɛ̍nu̍ o̍ wɔ̄sī kōŋ ni᷄ŋ, mi̍ wānāa̍ hɛ̍lu᷄ŋ Chūlu̍sɛ̄lɛ̄m ma̍ nyāānu᷄ŋ nda̍, ō pīlɛ̍ kōmāl la̍ Ba̍bi̍lɔ̄ŋ. Mbo̍ hu᷄ŋ di̍mūl la̍ māā ya̍a̍mɔ̍ɔ̍wa̍ bīī Chūlu̍sɛ̄lɛ̄m.

²²Kɛ̍ lɔ̍ɔ̍pa̍ mi̍ yōōŋgōo̍ ho̍ō ō kōmāl la̍, īchɔ̄llo̍, mi̍ kpāāya̍ Mɛ̄lɛ̄ka̍ Ya̍a̍wɛ̄ɛ̄ wo̍ ō tūāl la̍ kɔ̄ɔ̄lī. O̍ ko̍ŋ, mi̍ Mɛ̄lɛ̄ka̍ kūmbī ya̍ sōndōo̍ le̍ mi̍ ka̍ndu̍ vɛ̄lɛ̄ sūɛ̍i̍. Mɛ̄ɛ̍ nda̍ hu᷄ŋ di̍mūl la̍ yōōŋgōo̍ ho̍ō īdīi̍yo̍, ya̍ i̍i̍ nɔ̍lā ni᷅ŋ mī ya̍ i̍i̍ so̍ō.

²³O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²⁴Mbo̍ dīmūl la̍ āā, “Wāna̍ chi̍o̍o̍ Īsi̍kīāā, wānāā lo̍ yōōmū o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, o̍ chi̍e̍e̍ŋ pɔ᷅mndo̍ŋ ni᷄ŋ nda̍, ā chō dīmīo̍o̍ āā, ‘E̍bīlāha᷅m o̍ wa̍ ndu̍ pīlɛ̍ kpe̍, mi̍ Mɛ̄lɛ̄ka̍ kē ndu̍ lɛ̄ŋndē I̍sɔ̄lūɛ̍i̍le̍ŋ kpo̍u̍ māā nyɛ̄ ndɔ̄. Nāa̍ wānā pi̍lɔ̍ɔ̍ ō sɔ̄la̍ wɔ̄ lɛ̄ŋnde̍ŋ nde᷅ŋ kpo̍u̍, bāā na̍a̍ ŋ̍ cho̍ ha̍ā ku̍ndā bɛ̄ndōo̍ wa̍ Mɛ̄lɛ̄ka̍ kɛ̄ɛ̄ na̍a̍ le̍ŋ kē ni̍ māā nyɛ̄ na̍a̍?’

²⁵“Di̍mu̍l wa᷅ŋnda̍ ha̍ā māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ āā, ‘Wāŋnda̍ I̍sɔ̄lūɛ̄ī, lā chō vīsīo̍ŋ dīo̍o̍ a̍ kōo̍wa̍ŋ lēni᷄ŋ, mī lā sōōlūū nyɛ᷅m chēle̍ŋndo̍ŋ māā mɛ̄lɛ̄ka̍ā nyā, ndu̍yɛ̍ mī lā dīū wa᷅ŋndā chīe̍e̍ya̍, le̍ sa̍bū yɛ̄ɛ̍nɛ̍ nya̍ yīyāŋ yɛ̍ māā lɛ̄ŋnde̍ŋ nde᷅ŋ lē wā le̍ nyɛ᷅ nya̍?

²⁶Mɔ̄ɔ̄ŋ nya̍ŋ fāŋndo̍ŋ, mu̍ŋ nya̍ tīīnda̍ŋ le̍ nya̍ mālāa̍ ni̍. Sɔ̄ɔ̍ŋ ya̍ Mɛ̍lɛ̄ka̍ tu᷄l yɛ̄le̍ŋ tūl bɛ̄ndōo̍ wo̍ŋ, mu̍ŋ nya̍ hīāū la̍chi̍ a̍ tōsāa̍ ni̍. Ndu̍yɛ̍, nya̍ kpo̍u̍ mi̍ lā wā sūūndāa̍ a̍ lāāndāā wānāā nya̍ chīɛ̄ɛ̄li̍āŋnda̍. Vɛ̄ɛ̍nɛ̍ lēŋnde̍ŋ lē wā yɛ̍ nyɛ̄ nyā?’

²⁷“Di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, mɛ̄ɛ̍ mī to̍sa̍ mī dɛ̍nɛ̍ pa̍lāā bɛ̄ndōo̍ ō tōl nda̍ chōo̍. Wānā o̍ wāna̍ lo̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, ma̍ wā o̍ chi̍e̍e̍ŋ pɔ᷅mndo̍ŋ ni᷄ŋ, ā chō nda̍ dīū a̍ mɔ̄ɔ̄ŋ fāŋndo̍ŋ. A̍ cho̍ yōndōla̍ŋ ni᷄ŋ nda̍, I̍ cho̍ tōsā mī vīsīa̍a̍ dē dīāllūŋ nda̍ŋ. Ā cho̍ vīŋi᷄ŋ o̍ fo̍ndāŋndā kālā ka̍lāla̍ cho̍ lā bɛ̄ɛ̄ndīāā le̍ nda̍ māndāa̍ la̍ŋ, a̍ o̍ būūlūla̍ŋ ni᷄ŋ nda̍, nāālā wɔ̄ɔ̍ŋnda̍ŋ la̍ cho̍ nda̍ dīū ni̍.

²⁸I̍ cho̍ tōsā mī lɛ̄ŋndē I̍sɔ̄lūɛ̍i̍le̍ŋ lē pīɔ̍l mī lē si̍mnu᷄ŋ pɔ᷅mndo̍, nāa̍ wāna̍ chi̍e̍e̍ o̍ che᷅l te̍ wa̍. O̍ ko̍ŋ, kpāāyā bɛ̍ndū wāŋnda̍ I̍sɔ̄lūɛ̄ī a̍ ti̍i̍nda̍ŋ ma̍ wā yōŋgāa̍ kīōlɔ̄ɔ̍ wo̍, mī kpāāya̍ ndā ko̍ŋ ō mɛ̄ɛ̄lu̍. Pēmbo᷄ŋ chō sīmnɔ᷄ŋ pɔ᷅mnda̍ŋ, nāa̍ wāna̍ chi̍e̍e̍ o̍ ke̍e̍kū bɛ̍ɛ̍ le̍ wa̍.

²⁹Lɛ̄ŋndē I̍sɔ̄lūɛ̍i̍le̍ŋ kpo̍u̍ I̍ cho̍ le̍ŋ hūnɔ̄ɔ̄ tɛ̄ɛ̄mbūū, mī to̍sa̍ mī lē sīmnu᷄ŋ pɔ᷅mndo̍, kāni̍ fo̍ndōle̍, le̍ sɔ̄ɔ̍ŋ wɔ̍ɔ̍ŋ nda̍ tōsa̍ wo̍ŋ, ŋ̄ ya̍ Mɛ̍lɛ̄ka̍ tu᷄l yɛ̄le̍ŋ tūl bɛ̄ndōo̍ wo̍ŋ. O̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

³⁰O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Wāna̍ chi̍o̍o̍ Īsi̍kīāā, wāŋnda̍ I̍sɔ̄lūɛ̄ī a̍ cho̍ sūɛ̍i̍ a̍ nūm o̍kɔ̄ɔ̄ kpe̍e̍kpe̍i̍, o̍ dīōlā sāāsa̍ chi̍o̍o̍ ni̍, a̍ o̍ chīɛ̄īlā ndāla̍ŋ dīōla̍ŋ. Ā chō dīmu̍la᷅ŋndo̍ āā, ‘Ŋ̄ kɔ̄ŋnu᷅ŋ lɛ̄ hāū, nāa̍ wāna̍ su̍a̍ā le̍ Mɛ̄lɛ̄ka̍ wo̍ chūā, mī ŋ̄ kɔ᷄ tu̍e̍ī yōōŋgū Mɛ̄lɛ̄ka̍ Ya̍a̍wɛ̄ɛ̄ o̍ ke̍ ndu̍ wo̍.’

³¹Ndu̍yɛ̍ nda̍ kpo̍u̍ mā kōōndi̍āŋ mā hīŋ nāa̍ nūm chu̍a̍ le̍ nu̍m nīla̍ŋ yāŋɔ̄ɔ̍. Mā hu᷄ŋ cha᷅l nu̍m lāchī māā wānāā nī, mā tūēī nyɛ̄ ŋ̄ dīmūl nda̍ wo̍, kɛ̍ ā chɛ᷅l mā tōsa̍ ndu̍ le̍. A̍ lāsōndō ko̍ni̍ nda̍ chɔ̄m ni̍ māā ā kāāla̍ ya̍, kɛ̍ kɔ̄ltā ndāla̍ŋ lā chōŋnu᷄ŋ o̍ tɔ̄nɔ̄la̍ nda̍ sɔ̄lā o̍ ka̍fāla̍ŋ ni᷄ŋ nda̍ŋ.

³²Ā chūa̍ nu̍m māchūāā mɛ̄ɛ̍ wāna̍ nyɛ̄ chāa̍ ō chō nu̍a̍ā yɛ̍. Mɛ̄ɛ̍ wāŋnda̍ chūūŋgi̍āŋ nu̍a̍ā le̍ hūnɔ̄ɔ̍ wāna̍ cha̍ā to̍wāa̍ chāā bɛ̄ndōo̍ lɔ̄ɔ̍ mbō sōlī cho̍ndu̍ŋ kɛ̍ndɔ̍ŋ ndo̍ nīla̍ŋ yāŋɔ̄ɔ̍ yɛ̍, le̍nde̍ nda̍ chūūŋgi̍āŋ na̍a̍ pi᷅lɛ̍ le̍ nu̍m hūnɔ̄ɔ̍ nīla̍ŋ yāŋɔ̄ɔ̍ ni̍. Kɛ̍ ndu̍yɛ̍ nyɛ̄ o̍ nyɛ̄ ŋ̄ dīmu̍l nda̍ le̍ tōsāa̍, ō pīlɛ̍ bɛ̍ɛ̍ ā chɛ᷅l mā tōsa̍ ndu̍ le̍.

³³Kɛ̍ tē nyɛ̄ ŋ̄ dīmi̍ wo̍ ō yɔ̄nu̍ŋ pɛ̍, ndu̍yɛ̍ ō chō yɔ̄nɔ᷄ŋ le̍kɛ̍ndɛ̍ī, o̍ ko̍ŋ nda̍ chō sīnā ni̍, māā a̍ tōnya̍ kpe̍e̍kpe̍i̍ wāna̍ su̍a̍ā le̍ Mɛ̄lɛ̄ka̍ wo̍ ō wa̍ nda̍ tɛ̄ɛ̄ŋ.”