Read Southern Kisi Īsi̍kīāā 34 Bible Online

Īsi̍kīāā 34 - Southern Kisi bible

Īsi̍kīāā 34

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

²Mbō dīmūl la̍ āā, “Wāna̍ chi̍o̍o̍ Īsi̍kīāā, di̍mu̍l wa̍nāā māndāā lāsāa̍ I̍sɔ̄lūɛ̄ī a̍ nyɛ̄ pālāa̍ ko̍māl ni̍ŋ nda̍ wo̍ o̍kɔ̄ɔ̄, nda̍ yɔ̍nūŋ ni̍, māā wāŋ bɛ̄ndūa̍a̍ I̍sɔ̄lūɛ̄ī. Pɛ̍ɛ̍sa̍ nda̍ mā di̍mu̍l nda̍ māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ āā, ‘Nya̍ wānāā māndāā lāsāa̍ I̍sɔ̄lūɛ̄ī, nyɛ̄ pālāā bɛ̄ndōo̍ wā ni̍ŋ le̍. Lā būūla̍ŋ le̍ nya̍ pi̍la̍ mbo̍ hīāū sāā nīa̍a̍. Wānā ma̍ndāā lāsāa̍, ō cho̍ ndu̍ le̍ ma̍ndā sa̍a̍ ndūa̍a̍ le̍?

³Lā chō sāā che̍lu̍lɛ̍i̍ya̍a̍ kɛ̍ndɛ̄ kɛ̍ndīa̍a̍ dīūwo̍, mī lā dīā vi̍sīŋ ndāa̍ŋ māchūɛ̄īyo̍ŋ, ndu̍yɛ̍ mī lā wōōnūŋ nyɛ̍lā nda̍ tōōsīāā a̍ yīīŋīī ndɛ̄i̍ la̍ŋ. Kɛ̍ lā būūla̍ŋ le̍ nda̍ nyɛ̄ dīāā kē le̍.

⁴Sa̍a̍, ā nda̍ a̍a̍ nɔ̍ kpa̍a̍yā o̍ kpāāyā le̍ wa̍, lā māla̍ nda̍ le̍, lā chi̍ɔ̍ū a̍ wa̍ a̍ nāāla̍ŋ nda̍ le̍, a̍ nda̍ a̍a̍ yɔ̍ŋu̍lu̍ŋ nda̍, lā yīū yi̍u̍ nda̍ pāūve̍ le̍, ā nda̍ a̍a̍ la̍a̍si̍a̍ŋ nda̍, lā mīŋgi̍ nda̍ le̍, ā nda̍ a̍a̍ lo̍ wa̍, lā nūūwa̍ nda̍ le̍. Mi̍ lā wā nda̍ bīyɔ̄ɔ̍ ō kālā ka̍lā.

⁵O̍ ko̍ŋ, mi̍ sāa̍ nīa̍a̍ ā pūūsi̍a̍ŋ ma̍ sɛ̄ŋi᷄ŋ kpo̍u̍, kāni̍ fo̍ndōle̍, wānā o̍ wānā ve̍ mbō hāndu̍ nda̍ hɔ̄lte̍ŋ kɔ̄ɔ̄lī, mbō mānda̍ nda̍ le̍. Mi̍ sāa̍ nīa̍a̍ ā sīmnu᷄ŋ ni̍ko̍ nyɛ̍ dīa̍a̍ le̍ vīsīāā bīyāa̍ kpo̍u̍ yo̍ndōla̍ŋ ni᷄ŋ.

⁶Mi̍ lā māl nda̍ o̍ bā ndāa̍ chōo̍ ma̍ sɛ̄ŋi᷄ŋ, ma̍ tīū o̍ lɛ̄ŋnde̍ ni᷄ŋ kpo̍u̍. Ma̍ tīū o̍ pēmbūŋ pɔ̄mbɔ᷄ŋ chōo̍, a̍ o̍ pēmbūŋ bɛ̄ndo᷄ŋ chōo̍ kpo̍u̍. Wānā o̍ wānā ve̍ mbō hāndu̍ nda̍ hɔ̄lte̍ŋ kɔ̄ɔ̄lī, mbō nūūwa̍ nda̍ mbō mīŋgi̍ nda̍ nāa̍ pi᷅lɛ̍ le̍.

⁷“ ‘Le̍la̍ŋ nya̍ wānāā māndāā lāsāa̍ ha̍ā, lā ya᷄ŋ ni᷅la̍ŋ, mī lā tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍.

⁸Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ āā, “Lā ma᷄l sāa̍ nīa̍a̍ mi̍ vīsīāā bīyāa̍ ā chīŋa̍la᷅ŋ nda̍, ma̍ dīū nda̍, mi̍ lā tōsā ma̍ sīmnu᷄ŋ nyɛ̍ dīa̍a̍ le̍ vīsīa̍a̍ kpo̍u̍, kāni̍ fo̍ndōle̍, nda̍ a̍a̍ nɔ̍ wa̍nā ma̍ndāā le̍. Nya̍ wānāā māndāā lāsāa̍, lā nūūwa̍ sa̍a̍ nīa̍a̍ le̍, le̍ nya̍ pi̍la̍ ko̍ni̍ nya̍ a̍a̍ bu̍u̍la̍ŋ ni̍, kɛ̍ lā būūla̍ŋ le̍ sāa̍ nīa̍a̍ le̍.

⁹Le̍la̍ŋ, nya̍ wānāā māndāā lāsāa̍ ha̍ā, lā ya᷄ŋ ni᷅la̍ŋ mī lā tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍.

¹⁰Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, nya̍ wānāā māndāā lāsāa̍ ha̍ā, mɛ̄ɛ̍ mī tu̍si̍ nya̍ nyɛ̄ pālāa̍ chōo̍. I̍ cho̍ nya̍ sāa̍ nīa̍a̍ sōlī o̍ bā, mī to̍sa̍ fɛ̍ɛ̍ŋ a̍ fɛ̍ɛ̍ŋ bɛ̍ɛ̍ lā ve᷅ lɛ̍ wānāā māndāā le̍ nda̍ le̍. I̍ cho̍ tōsā lā bu̍u̍lāŋ ndɛ̍ le̍ nya̍ pi̍la̍ mbō hīōū sāa̍ nya̍ chō māndāa̍ wa̍ le̍. I̍ cho̍ nya̍ sāa̍ nīa̍a̍ sōlī o̍ bā, mī to̍sa̍ lā ve᷅ lɛ̍ nda̍ dīū mī lā dīā le̍.” ’ ”

¹¹Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ o̍ hi̍a̍ū lāchī a̍ sūɛ̍i̍. Mbo̍ dīmī āā, “Ya̍ pi̍la̍ I̍ cho̍ sāa̍ nīa̍a̍ nūūvīāā, mī chu̍u̍ŋgi̍a̍a̍ nda̍ kpo̍u̍ nāa̍ pi᷅lɛ̍, ndu̍yɛ̍ mī ya̍ pi̍la̍ I̍ ma̍nda̍ nda̍.

¹²Mɛ̄ɛ̍ wānā ma̍ndāā lāsāa̍ ō nūūvīāā nu̍a̍ā sāa̍ ndūa̍a̍ la̍a̍si̍a̍ŋ nda̍, mbō chūūŋgi̍a̍a̍ nda̍ nāa̍ pi᷅lɛ̍ yɛ̍, le̍nde̍ ya̍ I̍ nu̍u̍vīāā ni̍ŋ sa̍a̍ nīa̍a̍ ni̍ mī chu̍u̍ŋgi̍a̍a̍ nda̍ kpo̍u̍ na̍a̍ pi᷅lɛ̍. Bā o̍ bā nda̍ sɛ̄ŋi̍ŋ, o̍ pāa̍le̍ nyūmmā bɛ̄ndūa̍ŋ mā tōl, mi̍ kpūndɛ̍ bɛ̄ndu̍ kōŋ ō kōma̍l nda̍ le̍ŋ chōo̍, I̍ cho̍ nda̍ nūūvīāā mī chu̍u̍ŋgi̍a̍a̍ nda̍ kpo̍u̍ na̍a̍ pi᷅lɛ̍.

¹³Lēlɛ̄ŋ o̍ lēlɛ̄ŋ nda̍ chō, I̍ cho̍ nda̍ nūūvīāā tɛ̍ɛ̄ tɛ̍ɛ̄, mī so̍li̍ nda̍ o̍ lɛ̄ŋīī sūmīālīī kēŋ ni᷄ŋ, mī chu̍u̍ŋgi̍a̍a̍ nda̍ kpo̍u̍ na̍a̍ pi᷅lɛ̍, mī mi̍ŋgi̍ nda̍ o̍ lɛ̄ŋndē ndāle̍ŋ ni᷄ŋ. I̍ cho̍ tōsā mā wa̍ di̍o̍la̍ŋ o̍ pēmbūŋ I̍sɔ̄lūɛ̍i̍yo̍ŋ chōo̍, a̍ o̍ pēēla̍ŋ kɔ̄ŋgɔ̍, ndu̍yɛ̍, a̍ bā o̍ bā wāŋndā chīe̍e̍ya̍ chō o̍ lɛ̄ŋnde̍ŋ ni᷄ŋ.

¹⁴I̍ cho̍ tōsā mā wa᷄ bīl pūīyāā kɛ̄ndɛ̄ kɛ̍ndɔ̄ɔ̍ dīo̍o̍. Ā wānūŋ ni̍ŋ o̍ pēmbūŋ vīlɛ̄īyo̍ŋ I̍sɔ̄lūɛ̄ī cho̍o̍, ndu̍yɛ̍ mā hīnīŋ pɛ̍ŋgīo̍o̍ o̍ fo̍ndāŋ bīl kɛ̄ndɛ̄ kɛ̍ndɔ̄ɔ̍ ō chō wo̍. Ā wā ni̍ŋ bi᷅l kɛ̄ndɛ̄ kɛ̍ndɔ̄ɔ̍ dīo̍o̍ o̍ pēmbūŋ I̍sɔ̄lūɛ̍i̍yo̍ŋ chōo̍.

¹⁵Ya̍ pi̍la̍ I̍ cho̍ sāa̍ nīa̍a̍ māndā, ndu̍yɛ̍ mī to̍sa̍ mā wa᷄ hīni̍ŋnda̍ŋ mā pɛ̄ŋgī. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.

¹⁶“Sāa̍ lo̍ wa̍, I̍ cho̍ nda̍ nūūwā, a̍ la̍a̍si̍a̍ŋ nda̍, mī mi̍ŋgi̍ nda̍, a̍ cho̍ ā yɔ̄ŋu̍lɛ̍i̍ya̍, mī yi̍u̍ yi̍u̍ nda̍ pāūve̍, ndu̍yɛ̍ a̍ nɔ̍ di̍a̍llūŋ kālā le̍ wa̍, mī ma̍la̍ nda̍. Kɛ̍ ā chēlu̍lɛ̍i̍ya̍ nda̍ tɛ̄ɛ̄ŋ ki̍nɛ̍i̍, a̍ a̍ nɔ̍ dīāllūŋ kāla᷄ŋ nda̍, I̍ cho̍ nda̍ tɛ̄ɛ̄mbūū, kāni̍ fo̍ndōle̍, ya̍ Mɛ̍lɛ̄ka̍ wānā ma̍ndāā lāsāā sa̍kpōo̍ ya̍ I̍ cho̍ ni̍.

¹⁷“Ndu̍yɛ̍ nya̍ sāa̍ nīa̍a̍ ha̍ā, lā tūe̍i̍ nyɛ᷅ ya̍ Mɛ̍lɛ̍ka̍ Kpu̍lu̍ŋgūma̍ bɛ̄ndōo̍ dīmi̍ wo̍. I̍ cho̍ nya̍ yāmɛ̍i̍ kīlūl ā pīlɛ̍ŋ pi̍lɛ̍ŋ nda̍, mī hɛ̍li̍ sāa̍ kɛ̍ndīa̍a̍ sāa̍ tɛ̄ɛ̄ŋ, ndu̍yɛ̍ mī hɛ̍li̍ sāa̍ ko̍ndu̍a̍a̍ chūīŋāā tōōyīa̍a̍ tɛ̄ɛ̄ŋ.

¹⁸Lā dē bīl kɛ̄ndɛ̄ kɛ̍ndɔ̄ɔ̍ lā hīni̍ kɔ̍l te̍, mi̍ lā nīɔ̄ū nīɔ̄ū o̍ tɔ̄ɔ̍ a̍ ŋ̄pēlū. Ndu̍yɛ̍ mi̍ lā kōl mɛ̄ŋmā kɛ̄ndɛ̄ kɛ̍ndīa̍ŋ, lā hīni̍ kɔ̍l te̍, mā nya̍ mɛ̄i̍ ya̍ŋ, mi̍ lā nīɔ̄ū nīɔ̄ū lēni᷄ŋ, mi̍ lā līndā ma̍ŋ.

¹⁹Bīl nya̍ nīɔ̄ū ni̍ɔ̍u̍, mi̍ lā tɛ̄ɛ̄mbūū wo̍, ndu̍ sāa̍ nīa̍a̍ ā pīli̍a̍a̍ ā kūā di̍o̍o̍ ni̍. Ndu̍yɛ̍, pēēla̍ nya̍ nīɔ̄ū ni̍ɔ̍u̍ le̍ni̍ŋ, mi̍ lā līndā la̍ŋ nda̍ŋ, lo̍ŋ nda̍ kūā ko̍lɔ̄ɔ̍ ni̍.

²⁰“Le̍la̍ŋ nyɛ̄ ya̍ Mɛ̍lɛ̄ka̍ Kpu̍lu̍ŋgūma̍ bɛ̄ndōo̍ dīmi̍ wo̍ cho̍ ho̍ō ni̍. Ya̍ pi̍la̍ I̍ cho̍ yāmɛ̍i̍ kīōlɔ̄ɔ̄ sāā che̍lu̍lɛ̍i̍ya̍ tɛ̄ɛ̄ŋ, a̍ sāā nya̍vɛ̍i̍ya̍.

²¹Kāni̍ fo̍ndōle̍, nya̍ sāa̍ nɔ̍ kpāāyāa̍ wa̍, mi̍ lā wā sāa̍ nɔ̍ kpa̍a̍yā le̍ wa̍ nyīndɔ̄ɔ̍ īkɛ̄i̍. Mi̍ lā wā nda̍ kūndīo̍o̍, mā sɛ̄ŋīŋ kpo̍u̍.

²²Kɛ̍ ndu̍yɛ̍, I̍ cho̍ sāa̍ nīa̍a̍ chīīndīāā, mī to̍sa̍ vīsīāā bīyāa̍ ā chi᷅ŋa̍la᷅ŋ ndɛ̍ nda̍, le̍ mā dīū nda̍ le̍. Ndu̍yɛ̍ I̍ cho̍ yāmɛ̍i̍ kīōlɔ̄ɔ̄, sāa̍ a̍ sāa̍ tɛ̄ɛ̄ŋ.

²³I̍ cho̍ wānā ma̍ndāā lāsāa̍ hɛ̄lī ō pīlɛ̍, mbō wa̍ nda̍ chōo̍, mbō mānda̍ nda̍, ndu̍ yɔ̍nūŋ ni̍, māā bu̍ɛ̍ī nūu̍ Dēēve̍. Ndu̍ cho̍ wā wāna̍ ndā māndāa̍ ni̍, ndu̍yɛ̍ ō chō nda̍ mānda̍.

²⁴Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ wa᷅ ni̍ŋ Mɛ̍lɛ̄ka̍ ndāa̍ ni̍, ndu̍yɛ̍, mī Dēēve̍ wa̍ wānā bɛ̍ndōo̍ nda̍ chōo̍. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.

²⁵I̍ cho̍ kpe̍ma̍ kɔ̄l nyūlōo̍ yīī a̍ nda̍, ndu̍yɛ̍ mī so̍li̍ vīsīāā bīyāa̍ o̍ lɛ̄ŋndē ndāle̍ŋ ni᷄ŋ. O̍ ko̍ŋ, mā wānu̍ŋ o̍ lɛ̄ŋndē po̍lte̍ŋ ni᷄ŋ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍, mā lɔ̄lnūŋ yo̍ndōla̍ŋ ni᷄ŋ.

²⁶“I̍ cho̍ tōsā mā wānu̍ŋ o̍ fo̍ndāŋnda̍ŋ nda᷅ŋ, ndu̍yɛ̍ a̍ o̍ fo̍ndāŋnda̍ ba̍lu̍ pēmbīī nīi̍ kāsīe̍i̍ la̍ŋ. I̍ cho̍ tōsā mī fo̍ndāŋnda̍ŋ nda᷅ŋ lā wa̍ fo̍ndāŋndā kɛ̄ndɛ̄ le̍ nda̍, kāni̍ fo̍ndōle̍, I̍ wa᷅ ni̍ŋ nda̍ pīɔ̍ɔ̍ yɔ̄ŋndo̍, a̍ te̍le̍ŋ kpe̍e̍kpe̍i̍yo̍, mī to̍sa̍ mī lɛ̄ŋndē ndāle̍ŋ lē sīmnu᷄ŋ lɛ᷅ŋndē nāŋāā nyɛ̄.

²⁷Yɔ̄mīī ndɛ̄i̍ ī wā ni̍ŋ ko̍mɔ̄ɔ̍ o̍ kpe̍le̍la̍ ndāla̍ īyɔ̄mnda̍ŋ ni᷄ŋ le̍ te̍le̍ŋ o̍ te̍le̍ŋ, ndu̍yɛ̍, mī tɔ̄lɔ̄ɔ̄la̍ŋ lā nāŋ o̍ chīɔ̄ɔ̄ŋ ndāa̍ŋ ni᷄ŋ ta̍u̍ ta̍u̍. Wānā o̍ wānā wa̍ŋnūŋ ni̍ŋ o̍ lɛ̄ŋndē ndāle̍ŋ ni᷄ŋ, o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍. Ndu̍yɛ̍ tē I̍ hu̍ŋ fa̍ŋā nda̍ nyɛ̄ kīndīlāa̍ chōo̍ pɛ̍, mī pi̍ŋi̍ nda̍ wānāā nda̍ chō o̍ bā o̍ chɛ̄le̍ŋ ni᷄ŋ nda̍, o̍ ko̍ŋ nda̍ chō sīnā ni̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

²⁸I̍ cho̍ tōsā fɛ̍ɛ̍ŋ a̍ fɛ̍ɛ̍ŋ bɛ̍ɛ̍ lɛ̄ŋīī chēle̍ŋnde̍, ī chi᷅ŋa̍la᷅ŋ ndɛ̍ nda̍, le̍ nda̍ nyɛ̄ pālāā tūsī chōo̍ le̍, ndu̍yɛ̍ mī to̍sa̍ vīsīāā bīyāa̍ cho̍ o̍ lɛ̄ŋnde̍ŋ ni᷄ŋ nda̍ bɛ̍ɛ̍, ā di᷅ lɛ̍ nda̍ le̍. Ā wānūŋ ni̍ŋ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍, wānā o̍ wānā to̍sā ni̍ŋ mī sīōōŋīī bīī nda̍ le̍.

²⁹I̍ cho̍ chīɔ̄ɔ̄ŋ ndāa̍ŋ sa̍lā dɔ̄wɔ̄ɔ̄, mī to̍sa̍ mī nyɛ̄ dīa̍a̍ ō wa̍ o̍ chīɔ̄ɔ̄ŋ ndāa̍ŋ ni᷄ŋ ta̍u̍ ta̍u̍. I̍ cho̍ tōsā fɛ̍ɛ̍ŋ a̍ fɛ̍ɛ̍ŋ yīa̍a̍ŋ mā de᷅l lɛ̍ o̍ lɛ̄ŋndē ndāle̍ŋ ni᷄ŋ te̍, ndu̍yɛ̍ mī to̍sa̍ lɛ̄ŋnde̍ si̍i̍ŋgūū lɛ̍ nda̍ nyɛ̄ māmāā le̍.

³⁰Ndu̍yɛ̍ ā chō sīnā māā ya̍ Mɛ̍lɛ̄ka̍ Ya̍a̍wɛ̄ɛ̍ ndāa̍, māā I̍ cho̍ nda̍ tɛ̄ɛ̄ŋ, ndu̍yɛ̍ māā nda̍ wāŋnda̍ I̍sɔ̄lūɛ̄ī ki̍nɛ̍i̍, wānāā nīa̍a̍ nda̍ chō ni̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.

³¹“Nya̍ wāŋnda̍ I̍sɔ̄lūɛ̄ī, nya̍ cho̍ sāa̍ nīa̍a̍ ni̍, sāa̍ nīa̍a̍ cho̍ o̍ fo̍ndā nī ma̍ndāā lāsāa̍ wa̍. Ndu̍yɛ̍ ya̍ cho̍ Mɛ̄lɛ̄ka̍ nyāa̍ ni̍.” Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ndu̍ so̍ō ni̍.