Read Southern Kisi Īsi̍kīāā 36 Bible Online

Īsi̍kīāā 36 - Southern Kisi bible

Īsi̍kīāā 36

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍. Mbo̍ dīmūl la̍ āā, “Wāna̍ chi̍o̍o̍ Īsi̍kīāā, so̍o̍ nāa̍ pēmbūŋ bɛ̄ndo᷄ŋ I̍sɔ̄lūɛ̄ī chu̍a̍, mā di̍mu̍l mu̍ŋ mī ŋ̄ tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mu̍l mu̍ŋ ndo̍.

²Di̍mu̍l mu̍ŋ māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ māā, ya̍a̍mɔ̍ɔ̍wa̍a̍ wāŋnda̍ I̍sɔ̄lūɛ̄ī a̍ dɔ̍ɔ̍nu᷄ŋ nya̍a̍le̍, ma̍ dīmī māā pēmbūŋ māsīndɔ᷄ŋ I̍sɔ̄lūɛ̄ī le̍ nda̍ ŋ̍ cho̍ ni᷅ŋ ni̍.

³“Le̍la̍ŋ di̍mu̍l pe̍mbo᷄ŋ mu᷅ŋ yōōŋgōo̍ ho̍ō, māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ māā, ya̍a̍mɔ̍ɔ̍wa̍ ā chīŋa̍la᷅ŋ nya̍ bā o̍ bā fe̍e̍, ndu̍yɛ̍ ma̍ sīīŋgūū nya̍ nyɛ̄m ki̍ɔ̍ɔ̍ŋ le̍ lɛ̄ŋīī tūɛ̍i̍, mi̍ lɛ̄ŋndē nyāle̍ŋ lē sīmnu᷄ŋ pɔ᷅m. O̍ ko̍ŋ, mi̍ wāŋnda̍ ā wā bālɔ̄ɔ̍ a̍ nya̍ o̍ lāsōndō, mā chōŋgū nya̍.

⁴Le̍la̍ŋ nya̍ pēmbūŋ bɛ̄ndo᷄ŋ I̍sɔ̄lūɛ̄ī, lā ya᷄ŋ ni᷅la̍ŋ o̍ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ Kpu̍lu̍ŋgūma̍ bɛ̄ndōo̍ dīmi̍ wo̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyɛ̄ ya̍ I̍ di̍mi̍ a̍ nyɔ̄ɔ̍ŋ mu᷅ŋ o̍kɔ̄ɔ̄ wo̍ cho̍ ho̍ō ni̍, mu̍ŋ yɔ̍nūŋ ni̍, māā pēmbūŋ bɛ̄ndo᷄ŋ, a̍ pēmbūŋ pɔ̄mbɔ᷄ŋ, a̍ kpōlōŋ kpo̍lo̍ŋ nda̍ŋ, a̍ lɛ̄ŋīī dɛ̍ŋgbɛ̍i̍ o̍ pēmbo᷄ŋ tɛ̄ɛ̄ŋ, a̍ lɛ̄ŋīī pɔ̄mnde̍, ndu̍yɛ̍ a̍ chi̍e̍e̍ŋ pɔ᷅mndo̍ŋ, chi̍e̍e̍ŋ lɛ̄ŋīi̍ ba̍lu̍ mu̍ŋ nde̍ ī chīŋa̍la᷅ŋ ma̍ mām mu̍ŋ ndo̍ŋ.

⁵“Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ di̍mi̍ ma̍a̍, I̍ dɔ̍ɔ̍nu᷄ŋ tu̍mbe̍ o̍ ka̍lā ka̍lā mi̍ pɛ̍ɛ̍sā lɛ̄ŋnde̍ ī pīlɛ̍i̍, ndu̍yɛ̍ a̍ lɛ̄ŋndē I̍dɔ̄mnde̍ŋ. Ā chūa̍ lɛ̄ŋndē nīle̍ŋ a̍ kɔ̄l kɛ̄ndɔ̄ɔ̍, mi̍ lē sīmnu᷄ŋ nyɛ᷅ ndā, ndu̍yɛ̍ ma̍ tūl I̍sɔ̄lūɛ̍i̍ yɛ̄le̍ŋ. Fo̍ndāŋ kɛ̄ndɛ̄ kɛ̍ndɛ̄lā chɔ̄lūa̍a̍ ā kūā di̍o̍la̍ŋ nda̍ŋ, la̍ŋ nda̍ a̍a̍ ye̍e̍ma̍ ni̍ māā fāndā ndā, le̍ yōmɔ̄ɔ̄ nda̍ yēm lɛ̄ŋndē I̍sɔ̄lūɛ̍i̍le̍ŋ o̍ chɔ̄ūwo̍ wo̍.

⁶“Le̍la̍ŋ so̍o̍ o̍ lɛ̄ŋndē I̍sɔ̄lūɛ̍i̍le̍ŋ ndo̍, mā di̍mu̍l pēmbūŋ bɛ̄ndo᷄ŋ, a̍ pēmbūŋ pɔ̄mbɔ᷄ŋ, a̍ kpōlōŋ kpo̍lo̍ŋnda̍ŋ, a̍ lɛ̄ŋīī dɛ̍ŋgbɛ̍i̍ o̍ pēmbo᷄ŋ tɛ̄ɛ̄ŋ, māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ māā, nya̍ wāŋnda̍ I̍sɔ̄lūɛ̄ī, nya̍ kāa̍la̍ che᷅le̍ŋnda̍ŋ lā yīo̍u̍ ni̍, ma̍ tɛ̄ɛ̄mbūū nya̍ lābɛ̄ɛ̄. Nyɛ̄ kōŋ ya̍ Mɛ̍lɛ̄ka̍ dɔ̄ɔ̄nu᷄ŋ tu̍mbe̍ o̍ ka̍lā ka̍lā ni̍, mi̍ wa᷅ sūɛ̍i̍.

⁷Le̍ he̍ī, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, lɛ̄ŋīi̍ ba̍lu̍ nya̍ ve̍, nda̍ bɛ̍ɛ̍ mɛ̄ɛ̍ mā sɔ̄la̍ bɛ̄ɛ̄la̍ ta̍mbɛ̍i̍la̍ŋ.

⁸Kɛ̍, o̍ pēmbūŋ I̍sɔ̄lūɛ̍i̍yo̍ŋ chōo̍ mu̍ŋ, yɔ̄mnde̍ chō vɛ̄lɛ̄ wūlɔ̄ɔ̄ lo̍ŋ, mī ī pūi̍, ndu̍yɛ̍ mī ī kōm le̍ nya̍ wānāā nīa̍a̍ I̍sɔ̄lūɛ̄ī. Ndu̍yɛ̍ lā chō hūnɔ̄ɔ̄ su̍ŋ su̍ŋ mi̍i̍ŋgū o̍ lɛ̄ŋndē nyāle̍ŋ ni᷄ŋ.

⁹Wāŋnda̍ I̍sɔ̄lūɛ̄ī, ya̍ Mɛ̍lɛ̄ka̍ I̍ cho̍ nya̍ kɔ̄ɔ̄lī. I̍ cho̍ hɔ̄lla̍ mūlī o̍ nya̍lo̍, mī to̍sa̍ mī lā mīīŋgu̍ wa̍lta̍ nyāla̍ īchīɛ̄ɛ̄la̍ŋ tōsāa̍ māā pāāndū.

¹⁰I̍ cho̍ tōsā mī lā kūi̍ vɛ̄lɛ̄ o̍ lɛ̄ŋnde̍ŋ nde᷅ŋ ni᷄ŋ, mī lɛ̄ŋnde̍ŋ lē mīīŋgu̍, mī lē pɛ̄ a̍ wāŋnda̍ chīe̍e̍ya̍. Chi̍e̍e̍ŋ nyāa̍ŋ si̍mnu᷄ŋ pɔ᷅mnda̍ŋ ndo̍ŋ, wāŋndā chīe̍e̍ ā chō hūnɔ̄ɔ̄ mīīŋgū lo̍ŋ, ndu̍yɛ̍ mā mīŋgi̍ mu̍ŋ tāŋgūl.

¹¹Wāŋnda̍ chīe̍e̍ya̍ ni̍, chɔ̄lūa̍a̍ ni̍, I̍ cho̍ tōsā mā kūi̍ ta̍u̍ ta̍u̍. Ā vīālū ni̍ŋ chu̍a̍ūwa̍, mā kūi̍ ta̍u̍ ta̍u̍ mbō hīōū māā pāāndū. Ndu̍yɛ̍ I̍ cho̍ tōsā mī lɛ̄ŋndē nyāle̍ŋ lē pɛ̄ a̍ wāŋndā chīe̍e̍ya̍, mbō hīōū māā pāāndū, ndu̍yɛ̍, mī to̍sa̍l nya̍ dɛ̍nɛ̍ kɛ̍ndɔ̄ɔ̍ mbō hīōū bɛ̍ɛ̍ māā pāāndū. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹²Wānāā nīa̍a̍ I̍sɔ̄lūɛ̄ī, I̍ cho̍ nya̍ mīŋgī mī lā hu᷄ŋ wa᷅ o̍ lɛ̄ŋndē nyāle̍ŋ ni᷄ŋ. Lɛ̄ŋndē nyāle̍ŋ lē chō nya̍ mīīŋgū o̍ bā, ndu̍yɛ̍ mī to̍sa̍ fɛ̍ɛ̍ŋ a̍ fɛ̍ɛ̍ŋ bɛ̍ɛ̍ chūāā nyāa̍ ā yīmā bi̍ī lɛ̍ nda̍ le̍.

¹³“Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ ma̍a̍, wāŋnda̍ I̍sɔ̄lūɛ̄ī, wāŋnda̍ dīmi̍ māā lɛ̄ŋndē nyāle̍ŋ lɛ̄ŋndē dīāā ŋ̄wāŋndā chīe̍e̍ le̍ŋ le̍ cho̍ ni̍, ndu̍yɛ̍ mī lā tōsā mī chūāāmbūa̍a̍ a̍ wānāa̍ cho̍ o̍ lɛ̄ŋnde̍ŋ ni᷄ŋ nda̍, ā sɔ̄lā pi̍ɔ̍mnda̍ŋ a̍ yīa̍a̍ŋ.

¹⁴Kɛ̍ ndu̍yɛ̍, I̍ cho̍ tōsā lɛ̄ŋndē I̍sɔ̄lūɛ̍i̍le̍ŋ lē ve᷅ lɛ̍ ni̍ŋ lɛ̍ŋndē dīāā ŋ̄wāŋndā chīe̍e̍ le̍, ndu̍yɛ̍ mī I̍ to̍sā chūāāmbūa̍a̍, a̍ wānāa̍ cho̍ o̍ lɛ̄ŋnde̍ŋ ni᷄ŋ nda̍, ā sɔ̍la̍ lɛ̍ pīɔ̍mnda̍ŋ a̍ yīa̍a̍ŋ te̍.

¹⁵Lɛ̄ŋīi̍ ba̍lu̍ nya̍ ve̍ ī chō nya̍ māmɔ̄ɔ̍, mi̍ ī wā nya̍ bɛ̄ɛ̄la̍ŋ tɛ̄ɛ̄mbūūwo̍ wo̍, kɛ̍ ndu̍yɛ̍, I̍ cho̍ tōsā fɛ̍ɛ̍ŋ a̍ fɛ̍ɛ̍ŋ lā tu̍i̍ī lɛ̍ mī lɛ̄ŋīī kēŋ ī ma᷄m nya̍, ɔ̄ɔ̄ mī ī pɛ̄ɛ̄sa̍ nya̍ le̍. Lɛ̄ŋndē I̍sɔ̄lūɛ̍i̍le̍ŋ, lē ve᷅ lɛ̍ ni̍ŋ lɛ᷅ŋnde̍ to̍sā mī chūāūwāā pi̍la̍a̍ ā sɔ̄la̍ pīɔ̍mnda̍ŋ te̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.”

¹⁶O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍, mbo̍ dīmūl la̍ āā,

¹⁷“Wāna̍ chi̍o̍o̍ Īsi̍kīāā, bōōndi̍i̍ wāŋnda̍ I̍sɔ̄lūɛ̄ī a̍ wa̍ o̍ lɛ̄ŋndē ndāle̍ŋ ni᷄ŋ nde̍, ma̍ tɛ̄ɛ̄mbūū lɛ̄ŋnde̍ŋ, ma̍ tōsā mi̍ lē sīmnu᷄ŋ le̍ nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l, a̍ ka̍a̍lā wɔ̄ɔ̍ŋndā nda̍ wa̍ tōsāa̍ la̍ŋ. Mɛ̄ɛ̍ wānā la̍nɔ̍ɔ̍ ō chā nu̍a̍ā te̍le̍ŋ ndɔ̄ɔ̍, ō ve᷅ o̍ bɛ̍ndāā ya̍ o̍ hɔ̄l te̍ yɛ̍, le̍nde̍ nda̍ wa̍ ni̍.

¹⁸Wāŋnda̍ ha̍ā, ma̍ dīū wāŋndā chīe̍e̍ya̍ dīū bɛ̄ndōo̍, ndu̍yɛ̍ ma̍ kɛ̄ɛ̄ ya̍, ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ ndā. O̍ ko̍ŋ, ma̍ tōsā mi̍ lɛ̄ŋndē I̍sɔ̄lūɛ̍i̍le̍ŋ lē sīmnu᷄ŋ le̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Le̍ he̍ī, mi̍ du̍a̍u̍nu᷄ŋ tu̍mbe̍, mi̍ tu̍si̍ nda̍ nyɛ̄ pālāā bɛ̄ndōo̍ chōo̍.

¹⁹Mi̍ sɛ̍ŋī nda̍ o̍ kāa̍la̍ŋ ni᷄ŋ, mi̍ to̍sā ma̍ tīū o̍ lɛ̄ŋnde̍ ni᷄ŋ kpo̍u̍, le̍ ka̍ālā nda̍la̍ŋ, a̍ sɔ̄ɔ̍ŋ wɔ̍ɔ̍ŋ nda̍ wa̍ tōsāa̍ wo̍ŋ.

²⁰Ndu̍yɛ̍ mɛ̄ɛ̍ nda̍ sɛ̄ŋi̍ŋ o̍ lɛ̄ŋnde̍ ni᷄ŋ, ma̍ tōsā mi̍ dīōlā nīla̍ kāsīla̍ŋ lā fūlā o̍ ba̍a̍ ni᷄ŋ o̍ lɛ̄ŋīī kēŋ ni᷄ŋ, kāni̍ fo̍ndōle̍, wāŋnda̍ wa̍ dīmīo̍o̍ o̍ lɛ̄ŋīī kēŋ ni᷄ŋ āā, ‘Mɛ̄lɛ̄ka̍ Ya̍a̍wɛ̄ɛ̄, wānāā ndūa̍a̍ cho̍ ha̍ā ni̍, kɛ̍ ma̍ fūlā o̍ lɛ̄ŋndē ndɔ̄le̍ŋ ni᷄ŋ.’

²¹Kɛ̍ ya̍ i̍i̍ bu̍u̍la̍ŋ le̍ dīōlā nīla̍ kāsī la̍ŋ māndāa̍, lā wāŋnda̍ I̍sɔ̄lūɛ̄ī a̍ tɛ̍ɛ̍mbu̍u̍ lābɛ̄ɛ̄ o̍ lɛ̄ŋnde̍ ni᷄ŋ la̍ŋ.

²²“Le̍la̍ŋ di̍mu̍l wa᷅ŋnda̍ I̍sɔ̄lūɛ̄ī, māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ māā, wāŋnda̍ I̍sɔ̄lūɛ̄ī, nyɛ̄ o̍ nyɛ̄ ya̍ I̍ cho̍ hūnɔ̄ɔ̄ tōsā, I̍ cho̍ ndu̍ tōsā le̍ sa̍bū nyā le̍. Kɛ̍ I̍ cho̍ ndu̍ tōsā, le̍ mī to̍sa̍ mī wāŋnda̍ ā ke̍ dīōlā nīla̍ kāsī la̍ŋ bɛ̄ɛ̄le̍ŋ, lā nya̍ tōsa̍, mi̍ lɛ̄ŋīī nya̍ chō ni᷄ŋ nde̍ ī tɛ̄ɛ̄mbūū la̍ŋ lābɛ̄ɛ̄ la̍ŋ.

²³I̍ cho̍ lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍ chɔ᷅m, mɛ̄ɛ̍ dīōlā nīla̍ŋ lā chō lā bɛ̄ndū, ndu̍yɛ̍ mi̍ lā wā dīōlā kāsī yɛ̍, dīōlā nya̍ tɛ̄ɛ̄mbu̍u̍ lābɛ̄ɛ̄ o̍ lɛ̄ŋīī nya̍ chō ni᷄ŋ nde̍ la̍ŋ. O̍ ko̍ŋ, mī lɛ̄ŋnde̍ o̍ chi̍e̍ēŋndo̍ ni᷄ŋ i̍ si̍na̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍, bɛ̄ndōo̍, ya̍ so̍ō ni̍. Nyɛ̄ ya̍ I̍ cho̍ tōsā a̍ nya̍ wo̍, ndu̍ cho̍ lɛ̄ŋnde̍ o̍ chi̍e̍ēŋndo̍ ni᷄ŋ chɔ᷅m ni̍, māā ya̍ Mɛ̍lɛ̄ka̍, wāna̍ kāsīo̍o̍ ya̍ I̍ cho̍ ni̍.

²⁴Bā o̍ bā nya̍ chō ā sɛ̄ŋīa̍ŋ o̍ kāa̍la̍ŋ ni᷄ŋ, I̍ cho̍ nya̍ chūūŋgīāā, mī so̍li̍ nya̍ o̍ lɛ̄ŋīī kēŋ ni᷄ŋ kpo̍u̍, mī mi̍ŋgi̍ nya̍ o̍ lɛ̄ŋndē nyāle̍ŋ ni᷄ŋ.

²⁵Ndu̍yɛ̍, tē I̍ mi̍ŋgi̍ nya̍ pɛ̍, I̍ cho̍ nya̍ mɛ̄ŋmā dīānda᷄ŋ fāsāŋīāā, le̍ mī to̍sa̍ mī lā sīmnu᷄ŋ vɛ̍lɛ̄ wānāā kāsī. O̍ ko̍ŋ, yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nya̍ tōsa̍, mi̍ lā sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l, yɔ̄ŋ wɔ̄ɔ̍ŋ sōōlāā mɛ̄lɛ̄ka̍ā chēle̍ŋ ndo̍ ni̍, a̍ yɔ̄ŋndā wɔ̄ɔ̍ŋndā chēle̍ŋ nda̍ŋ, mī ma̍l nya̍, mī di̍ndi̍ nya̍.

²⁶I̍ cho̍ tōsā mī lā nɔ̄ kɔ̄ltā sɛ̄nɛ̄ī la̍ŋ, a̍ yīya᷄ŋnda̍ sɛ̍nɛ̄ī la̍ŋ. Kɔ̄ltā bōlīī kālā nya̍ nɔ̄ ni᷄ŋ, lā kālā ka̍lā māā pōū la̍ŋ, I̍ cho̍ la̍ŋ nya̍ sōlī ni᷄ŋ, mī ke̍ nya̍ kɔ̄ltā tūsīa̍ŋ nda̍ŋ.

²⁷I̍ cho̍ yīya᷄ŋnda̍ kɛ̍ndɛ̄la̍ŋ dɔ̄wɔ̄ɔ̄ nya̍ o̍ lākɔ̄l, ndu̍yɛ̍, mī to̍sa̍, mī lā wa̍ tūsi᷄ŋndo̍ o̍ sāwāla̍ nīla̍ŋ bɛ̄ŋgu̍, ndu̍yɛ̍ mī lā mānda̍ŋ o̍ nyɛ̄ ya̍ I̍ di̍mūl nya̍ wo̍ tōsāa̍ ni᷄ŋ.

²⁸Ndu̍yɛ̍, mī lā hīōū lāchī a̍ cha᷄lle̍ o̍ lɛ̄ŋnde̍ŋ nde᷅ŋ ni᷄ŋ, lɛ̄ŋndē ya̍ I̍ ke̍ fi̍nyāā nyāā ma̍māa̍ le̍ŋ. Lā wā ni̍ŋ wa̍nāā ni̍, mī ya̍ bɛ̍ɛ̍ I̍ wa̍ Mɛ̄lɛ̄ka̍ nyā.

²⁹Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nya̍ tōsa̍, mi̍ lā sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l, I̍ cho̍ nya̍ bāŋā, ndu̍yɛ̍ mī di̍ndi̍ nya̍. I̍ cho̍ tɔ̄lɔ̄ɔ̄la̍ŋ dīmūl o̍ chīɔ̄ɔ̄ŋ nyāa̍ŋ ni᷄ŋ mī lā na᷄ŋ ta̍u̍ ta̍u̍, mī lā nɔ̄ nyɛ̄ dīa̍a̍ ta̍u̍, mī to̍sa̍ yīmā bi̍ī lɛ̍ nya̍ le̍.

³⁰I̍ cho̍ tōsā mī yɔ̄mīī nyɛ̄ī ī kōm ta̍u̍ ta̍u̍ o̍ kpe̍le̍la̍ nyāla̍ŋ ni᷄ŋ, ndu̍yɛ̍ mī tɔ̄lɔ̄ɔ̄la̍ŋ lā na᷄ŋ ta̍u̍ ta̍u̍ o̍ chīɔ̄ɔ̄ŋ nyāa̍ŋ ni᷄ŋ. O̍ ko̍ŋ, mī to̍sa̍ lā te̍mbū lɛ̍ lābɛ̄ɛ̄ a̍ yīa̍a̍ŋ lɛ̄ŋnde̍ tɛ̄ɛ̄ŋ te̍.

³¹O̍ ko̍ŋ kɔ̍ɔ̍lī, nya̍ pi̍la̍ chō hūnɔ̄ɔ̄ yīya᷄ŋ a̍ dɛ̍nɛ̍ nyā wɔ̍ɔ̍ŋndo̍, ndu̍yɛ̍ a̍ kēlālā nyāla̍ wɔ̍ɔ̍ŋnda̍ŋ, mī kɔ̄lta̍ŋ lā tāmbu̍ nya̍. Sɔ̄ɔ̍ŋ wɔ̍ɔ̍ŋ nya̍ tōsa̍ ki̍nɛ̍i̍ yo̍ŋ, ŋ̄ ya̍ Mɛ̍lɛ̄ka̍ tu᷄l yɛ̄le̍ŋ tūl bɛ̄ndōo̍ wo̍ŋ, lā chō hūnɔ̄ɔ̄ yīya᷄ŋ a̍ mu̍ŋ mī kɔ̄lta̍ŋ lā tāmbu̍ nya̍.

³²Le̍la̍ŋ I̍ ye̍e̍ma̍ mī lā sīna̍ ndi̍ kpe̍nde̍ke̍le̍, māā nyɛ̄ o̍ nyɛ̄ ya̍ I̍ cho̍ tōsā, I̍ cho̍ ndu̍ tōsā le̍ sa̍bū nyā le̍. I̍ ye̍e̍ma̍ mī si̍ɔ̍mbu̍la̍ bɛ̍ndūla̍ŋ lā bīī nya̍ wāŋnda̍ I̍sɔ̄lūɛ̄ī kpo̍u̍ le̍ nyɛ̄ nya̍ tōsa̍ wo̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̍ndōo̍, ya̍ so̍ō ni̍.”

³³Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍gūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Wāŋnda̍ I̍sɔ̄lūɛ̄ī, tē te̍le̍ŋ ko̍ŋ ō fūūlu̍u̍ pɛ̍, mī ma̍l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ ki̍nɛ̍i̍, mī di̍ndi̍ nya̍, I̍ cho̍ tōsā, mī wāŋndā chīe̍e̍ya̍ mīīŋgu̍ o̍ chi̍e̍e̍ŋ nyāa̍ŋ, ndu̍yɛ̍ mā mīŋgi̍ pɔ̄mndā nyāla̍ŋ tāŋgūl.

³⁴Chīɔ̄ɔ̄ŋ nyāa̍ŋ mu̍ŋ ta̍mbu̍, mi̍ ŋ̄ sīmnu᷄ŋ yo̍ndōla̍ŋ, mī wānāā hīāwa᷄ŋnda̍ ā kēī mu̍ŋ tōfāa̍ wo̍ŋ, lā chō vɛ̄lɛ̄ mu̍ŋ mīīŋgū tōsāa̍ māā pāāndū.

³⁵Ndu̍yɛ̍, wāŋnda̍ chō dīmī āā, ‘Lɛ̄ŋnde̍ le̍e̍ ta̍mbu̍ le᷅ŋ, mi̍ lē sīmnu᷄ŋ po̍llo̍ le̍ŋ, lē sīmnu᷄ŋ māā kpe̍lo̍o̍ I̍dɛ̄ŋ. Chi̍e̍e̍ŋ ya̍a̍mɔ̍ɔ̍wa̍ ā pēsi̍ pe̍si̍, ma̍ kūēndī nyɛ̄ o̍ nyɛ̍ wa̍ lo̍ŋ, ma̍ mɛ̄ī mu̍ŋ pɔ̄mnda̍ŋ ndo̍ŋ, wāŋndā chīe̍e̍ya̍ ā mīīŋgu̍ vɛ̄lɛ̄ lo̍ŋ, ndu̍yɛ̍ ma̍ bɛ̄ɛ̄ndīāā mu̍ŋ ŋ̄ kālā ka̍lā.’

³⁶O̍ ko̍ŋ, lɛ̄ŋīi̍ ba̍lu̍ nya̍ ve̍, wānāā lo᷅ ni̍ŋ yo̍o̍mū o̍ lɛ̄ŋīī kēŋ ni᷄ŋ nda̍, ā chō sīnā māā ya̍ Mɛ̍lɛ̄ka̍ Ya̍a̍wɛ̄ɛ̄, ya̍ mi̍ŋgi̍ chi̍e̍e̍ŋ nyāāŋ mu̍ŋ tāŋgūl ni̍, ndu̍yɛ̍ mi̍ to̍sā mi̍ tɔ̄lɔ̄ɔ̄la̍ŋ lā mīīŋgū vɛ̄lɛ̄ o̍ chīɔ̄ɔ̄ŋ nyāa̍ŋ mu̍ŋ si̍mnu᷄ŋ yo̍ndōla̍ŋ ndo̍ŋ ni᷄ŋ. Ya̍ Mɛ̍lɛ̄ka̍ Ya̍a̍wɛ̄ɛ̍ so̍ō ni̍, ndu̍yɛ̍ I̍ cho̍ ndi̍ tōsā.”

³⁷Mi̍ Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndo̍o̍ ō hīāū lāchī a̍ sūɛ̍i̍, mbo̍ dīmī āā, “I̍ cho̍ tōsā mī wāŋnda̍ I̍sɔ̄lūɛ̄ī a̍ nyu̍na̍ ya̍ vɛ̄lɛ̄ dīōm le̍ mī to̍sa̍ mā kūi̍ ta̍u̍ ta̍u̍ mɛ̄ɛ̍ sāa̍ ā kūī nu̍a̍ā yɛ̍, ndu̍yɛ̍ mī to̍sa̍l nda̍ nyɛ̄ nda̍ yēēma̍ wo̍.

³⁸Mɛ̄ɛ̍ sāa̍ nda̍ kūā le̍ sa̍lāla̍ŋ sōlīo̍o̍ Chūlu̍sɛ̄lɛ̄m a̍ te̍le̍ŋ lābɔ̄ŋa᷅ŋndo̍ wa̍, ā wā nu̍a̍ā sɛ̍lɛ̍ bɛ̍ndōo̍ yɛ̍, le̍nde̍ chi̍e̍e̍ŋ la̍pɔ᷅mndo̍ŋ I̍sɔ̄lūɛ̄ī ŋ̍ pi̍ā ni̍ŋ vɛ̍lɛ̄ a̍ wāŋndā chīe̍e̍ya̍ ni̍. O̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”