Read Southern Kisi Īsi̍kīāā 38 Bible Online

Īsi̍kīāā 38 - Southern Kisi bible

Īsi̍kīāā 38

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ chu̍a̍.

²Mbo̍ dīmūl la̍ āā, “Wāna̍ chi̍o̍o̍ Īsi̍kīāā, mu̍li̍ hɔ᷅lla̍ kūmbū Ma̍sāa̍ Kɔ̍kī wo̍, o̍ cho̍ māsāa̍ le̍ wāŋnda̍ Mɛ̍si̍ɛ̍kī, a̍ wāŋnda̍ Tu̍bāā, mbo̍ wā o̍ lɛ̄ŋndē Ma̍kɔ̍kīle̍ŋ ni᷄ŋ ndo̍, mā di̍mu̍l ndu̍ a̍ nyɛ̄ pālāa̍ ko̍māl ni̍ŋ ndu̍ wo̍ o̍kɔ̄ɔ̄.

³Di̍mu̍l ndu̍ māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ māā, nūm Kɔ̍kī, māsāa̍ le̍ wāŋnda̍ Mɛ̍si̍ɛ̍kī, a̍ wāŋnda̍ Tu̍bāā, I̍ dɔ̍ɔ̍nu᷄ŋ tu̍mbe̍ a̍ nūm o̍ ka̍lā ka̍lā.

⁴I̍ cho̍ nu̍m hɔ̄lla̍ mūlī, mī ba̍a̍ nu̍m do̍lu̍ŋndo̍ŋ o̍ ya̍a̍lo̍ la̍ŋ, le̍ mī so̍li̍ nu̍m a̍ so̍vɛ̄i̍ya̍a̍ nu̍mnda̍ kpo̍u̍ o̍ lɛ̄ŋndē nyāle̍ŋ ni᷄ŋ. So̍vɛ̄i̍ya̍a̍ nu̍mnda̍ kpo̍u̍, a̍ ku̍ā o̍ nyɛ̄lā su̍a̍a̍ ā nāŋ nda̍ŋ ni᷄ŋ nda̍ ni̍, a̍ a̍ ku̍ā o̍ su̍a̍ā chɔ̄ūwa̍ chōo̍ wa̍, ā wā ni̍ŋ o̍ nyɛ̄lā ndāla̍ chɔ̄ūla̍ŋ ni᷄ŋ, a̍ nyɛ̄m nda̍a̍ŋ chɔ̄ūwo̍ŋ o̍ lābā. Nyɛ̄lā so̍vɛ̄i̍ya̍ bīī o̍ lābā le̍ nda̍ māndāa̍ o̍ sɔ̍ŋgɔ̄ɔ̍ ni᷄ŋ nda̍ŋ, lā pɔ̄mbɔ̄la̍ŋ, a̍ lā bɛ̄ndūla̍ŋ, lā wā ni̍ŋ nda̍ o̍ lābā, a̍ mɔ̄ɔ̄ŋ nda̍a̍ŋ fāŋndo̍ŋ.

⁵So̍vɛ̄i̍ya̍ Pa̍a̍sīāā ni̍, ha̍ā Īto̍o̍pīāā ni̍, a̍ ha̍ā Li̍bīāā, nda̍ kpo̍u̍ ā chō hūnɔ̄ɔ̄ a̍ nyɛ̄m nda̍a̍ŋ chɔ̄ūwo̍ŋ le̍ nu̍m sɔ̍ŋgɔ̄ɔ̍ mālāa̍.

⁶Lɛ̄ŋīī bɔ̄ɔ̍ bɔ̍ɔ̍ ā yɔ̄ŋ ni̍ŋ so̍vɛ̄i̍ya̍a̍ ndāa̍ le̍ nu̍m sɔ̍ŋgɔ̄ɔ̍ mālāa̍. So̍vɛ̄i̍ya̍ kpo̍u̍ o̍ lɛ̄ŋndē Ko̍māle̍ŋ ni᷄ŋ, a̍ lɛ̄ŋndē Bɛ̄tī To̍ka̍māāle̍ŋ bā lūāŋndo̍ pɔ̍ɔ̍li̍, nda̍ kpo̍u̍ ā hūŋ ni̍ŋ, lātūlu̍ a̍ lɛ̄ŋīī bɔ̄ɔ̍ bɔ̍ɔ̍ che᷅le̍ŋ le̍ nu̍m sɔ̍ŋgɔ̄ɔ̍ mālāa̍.

⁷Māsāa̍ Kɔ̍kī, bɛ̍ɛ̍ndi̍a̍ŋ pɔ̍ɔ̍ nyɛ̄ kɛ̄ndɛ̄ kɛ̍ndɛ̄ le̍ sɔ̍ŋgɔ̄ɔ̍. Bɛ̍ɛ̍ndi̍a̍a̍ pɔ̍ɔ̍ so̍vɛ̄i̍ya̍a̍ sɛ̍li̍a̍a̍ bɛ̍ndūāā ŋ̄ chūūŋgi̍a̍a̍ wa̍, le̍ sɔ̍ŋgɔ̄ɔ̍, mā si̍m nda̍ lāchī.

⁸Lɛ̄ŋnde̍ wa̍ le᷅ŋ pɔ̄mndo̍ le̍ te̍le̍ŋ o̍ te̍le̍ŋ, kɛ̍ mi̍ lē mīīŋgu̍ tāŋgūlɔ᷄ŋ māā pāāndū, mi̍ wānāā ndūa̍a̍ ā fūla̍ o̍ lɛ̄ŋīī nda̍ wa᷄ o̍ bīyɔ̄ɔ̍ ni᷄ŋ nde̍, ma̍ mīīŋgū o̍ pēmbo᷄ŋ I̍sɔ̄lūɛ̄ī cho̍o̍, ma̍ wā o̍ bā ndāa̍ chōo̍ yɛ̍lɛ̍kɛ̍lɛ̍ɛ̍ le̍ŋ, tē wɔ̄sīlā fāŋā lā hīōū pɛ̍, I̍ cho̍ tōsā nūm Māsāa̍ Kɔ̍kī mā sɔ̍la̍ kpāāyāa̍ mā kɔ̍ de᷅l lɛ̄ŋndē lēŋ chōo̍.

⁹Ā chō hūnɔ̄ɔ̄ a̍ so̍vɛ̄i̍ya̍a̍ nu̍mnda̍ mɛ̄ɛ̍ hūēīyīī kpāāyɛ̄ī bɛ̄ndūe̍i̍ ī hūŋ nu̍a̍ā yɛ̍, mā hu̍ŋ chi᷅ŋa̍la᷅ŋ lɛ᷅ŋnde̍ŋ nde᷅ŋ. Nūm ni̍, so̍vɛ̄i̍ya̍a̍ nu̍mnda̍ ni̍, a̍ so̍vɛ̄i̍ya̍a̍ sɛ̍li̍a̍a̍ bɛ̍ndūa̍a̍ fu̍lā ni̍ŋ o̍ lɛ̄ŋnde̍ ni᷄ŋ nda̍, lā chō hūnɔ̄ɔ̄ tīū o̍ lɛ̄ŋnde̍ŋ nde᷅ŋ ni᷄ŋ kpo̍u̍, mɛ̄ɛ̍ pīɔ̍ɔ̍ ō hēl nu̍a̍ā mbō kūmbū kpu̍ yɛ̍.”

¹⁰Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ hīāū lāchī a̍ sūɛ̍i̍, mbo̍ dīmī āā, “Tē te̍le̍ŋ ko̍ŋ ō fūūlu̍u̍ pɛ̍, tūūlā wɔ̄ɔ̍ŋnda̍ŋ kpo̍so̍ŋ la̍ wa᷅ ni̍ŋ nu̍m hūnɔ̄ɔ̍ o̍ kɔ̄l a̍ lɛ̄ŋndē I̍sɔ̄lūɛ̍i̍le̍ŋ o̍kɔ̄ɔ̄ ni̍.

¹¹Ā chō dīmī māā, I̍ cho̍ lākɔ̄ lɛ̄ŋnde̍ŋ nde᷅ŋ chīŋa̍la᷅ŋ a̍ wānāa̍ ndūa̍a̍ cho̍ŋnu̍ŋ ha̍ā o̍ bā ndāa̍ chōo̍ yɛ̍lɛ̍kɛ̍lɛ̍ɛ̍, ma̍ yīya᷄ŋ māā kpūndɛ̍ o̍ kpūndɛ̍ ō ko̍māl lɛ̍ nda̍ le̍ wa̍. Sɔ̄ndɔ̄kɔ̍ltā ndāla̍ŋ lā nɔ̍ la̍sa̍a̍sā lā bālāā, mī lā nɔ̄ dīōlā lāsāāsā le̍ nda̍ māndā le̍.

¹²Nyɛ̄ o̍ nyɛ̄ wāŋnda̍ ha̍ā ā mīŋgī ni̍ŋ chu̍u̍ŋgīāā o̍ chi̍e̍e̍ŋ ndāa̍ŋ wa̍ mu᷅ŋ pɔ̄mnda̍ŋ, ma̍ mīŋgī mu̍ŋ tāŋgūllo̍ ni᷄ŋ, lā chō mu̍ŋ lākɔ̄ dēlɔ̄ɔ̄ chōo̍, mī lā pūŋga̍ mu̍ŋ kpo̍u̍ le̍ kɔ᷄ŋnda̍ŋ a̍ mu̍ŋ. Wānāa̍ fu̍lā ni̍ŋ ha̍ā o̍ lɛ̄ŋīī yɛ̍ yɛ̍i̍ ni᷄ŋ, mā mīīŋgu̍ o̍ lɛ̄ŋndē ndāle̍ŋ ni᷄ŋ, mā nɔ̄ chɔ̄lūa̍a̍, a̍ nyɔ̄ɔ̍ŋ, ndu̍yɛ̍ mi̍ lɛ̄ŋndē ndāle̍ŋ lē wā o̍ chi̍e̍ēŋndo̍ tɛ̄ɛ̄ŋ nda̍, lā chō nda̍ lākɔ̄ chīŋa̍la᷅ŋ, mī lā pūŋga̍ nyɛ̄m ndāa̍ŋ kpo̍u̍.

¹³Wāŋnda̍ o̍ lɛ̄ŋndē Si̍ɛ̍bāle̍ŋ ni᷄ŋ ni̍, a̍ ha̍ā o̍ lɛ̄ŋndē Dɛ̍dāŋnde̍ŋ ni᷄ŋ, ndu̍yɛ̍ a̍ wānāā lēyākūa̍a̍ o̍ chi̍e̍e̍ŋ pɔ̍mbɔ᷄ŋ, o̍ lɛ̄ŋndē Sīpe᷅ŋnde̍ŋ ni᷄ŋ, nda̍ kpo̍u̍ ā chō nu̍m nyūnā māā, le̍ nyɔ̄ɔ̍ŋ pūŋgāa̍ ŋ̄ hīŋ ni̍? Le̍ lɛ̄ŋnde̍ŋ dēlɔ̄ɔ̍ chōo̍, mā pūŋga̍ le̍ŋ, mā kūɛ̄nu᷄ŋ a̍ ka̍ni̍ŋ hu̍mbo᷄ŋ, a̍ ko̍o̍līi̍yo̍ŋ, a̍ chɔ̄lūa̍a̍, a̍ nyɛ̄m bɔ̄ɔ̍ bɔ̍ɔ̍ che᷅le̍ŋ, le̍la̍ŋ ŋ̄ chūūŋgi̍a̍a̍ so̍vɛ̄i̍ya̍ sɛ̍lɛ̍ bɛ̍ndōo̍ ni̍ ma̍ hūŋ a̍ nda̍?

¹⁴“Le̍la̍ŋ wāna̍ chi̍o̍o̍ Īsi̍kīāā, di̍mu̍l Ma̍sāa̍ Kɔ̍kī māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ māā, bōōndi̍i̍ wānāā nīa̍a̍ I̍sɔ̄lūɛ̄ī a̍ wa̍ŋnūŋ ni̍ŋ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍ ve̍, a̍ te̍le̍ŋ ko̍ŋ ŋ̄ chō bɛ̄ɛ̄ndīa̍ŋ ni̍,

¹⁵mā fu̍la̍ o̍ lɛ̄ŋndē nūmnde̍ŋ ni᷄ŋ ba᷅ lūāŋndo̍ pɔ̍, mā hīŋ a̍ so̍vɛ̄i̍ya̍a̍ nūm a̍ kpāāyā bɛ̄ndūa̍a̍ sɛ̍lɛ̍ bɛ̍ndōo̍, nda̍ kpo̍u̍ ā chō wā o̍ su̍a̍ā chɔ̄ūwa̍ chōo̍, mā hu̍ŋ chi᷅ŋa̍la᷅ŋ nda̍.

¹⁶Ā chō hūnɔ̄ɔ̄ a̍ so̍vɛ̄i̍ya̍a̍ nu̍mnda̍, mɛ̄ɛ̍ hūēīyīī kpāāyɛ̄ī bɛ̄ndūe̍i̍ ī hūŋ nu̍a̍ā o̍ lɛ̄ŋnde̍ŋ ni᷄ŋ yɛ̍, mī lā hu᷄ŋ chi᷅ŋa̍la᷅ŋ wa̍nāā nīa̍a̍ I̍sɔ̄lūɛ̄ī. Tē te̍le̍ŋ ko̍ŋ ō fūūlu̍u̍ pɛ̍, I̍ cho̍ nu̍m vīōmɔ̄ɔ̄, mā hu̍ŋ chi᷅ŋa̍la᷅ŋ lɛ᷅ŋndē nīle̍ŋ, le̍ mī lɛ̄ŋnde̍ sīna̍ wāna̍ ya̍ I̍ cho̍ wo̍. I̍ cho̍ kpe̍ku̍ so̍li᷄ŋ a̍ nūm Māsāa̍ Kɔ̍kī, le̍ mī chɔ̍m lɛ̄ŋnde̍ māā Mɛ̄lɛ̄ka̍ kāsīo̍o̍ ya̍ I̍ cho̍ ni̍.

¹⁷Māsāa̍ Kɔ̍kī, sīndɛ̄ pa̍ ya̍ Mɛ̍lɛ̄ka̍ Kpu̍lu̍ŋgūma̍ bɛ̄ndōo̍ dɔ̄ū bu̍ɛ̍īyāā nīa̍a̍ su̍a̍ā le̍ ya̍ I̍sɔ̄lūɛ̄ī ya̍ dīōmnda̍ŋ o̍ sōndō ni̍, ma̍ dīmī a̍ nūm o̍kɔ̄ɔ̄, māā te̍le̍ŋ fu̍u̍lūū ni̍ŋ, mī ve᷅m nu̍m mā kɔ̍ chi᷅ŋa̍la᷅ŋ lɛ᷅ŋndē I̍sɔ̄lūɛ̍i̍le̍ŋ.” Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ndu̍ so̍ō ni̍.

¹⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ō dīmī āā, “Pāa̍le̍ Māsāa̍ Kɔ̍kī o̍ cho̍ lākɔ̄ lɛ̄ŋndē I̍sɔ̄lūɛ̍i̍le̍ŋ dēlɔ̄ɔ̍ chōo̍ le̍ŋ, I̍ cho̍ tu̍mbe̍ dɔ̍ɔ̍nɔ᷄ŋ o̍ ka̍lā ka̍lā.

¹⁹Ndu̍yɛ̍, tē I̍ dɔ̍ɔ̍nu᷄ŋ tu̍mbe̍ pa̍a̍le̍ le̍ŋ pɛ̍, I̍ cho̍ tōsā lɛ̄ŋndē I̍sɔ̄lūɛ̍i̍le̍ŋ kpo̍u̍ mī lē hīīlu̍ŋ, a̍ nyɛ̍ yɔ̍nūŋ ni̍ŋ ndo̍.

²⁰Nyɛ̄ o̍ nyɛ̄ yōōmāa̍ cho̍ o̍ chi̍e̍ēŋndo̍ chōo̍, sūūwa̍ o̍ pēēla̍ŋ ni̍, a̍ yōūwa̍, a̍ vīsīa̍a̍ kpo̍u̍, ō bɛ̄ndū ni̍, ō pɔ̄mbɔ̄ ni̍, a̍ wāŋndā chīe̍e̍ya̍ o̍ chi̍e̍ēŋndo̍ chōo̍ kpo̍u̍, ā chō nyīīyā a̍ sīōōŋīī nīi̍. Pēmbūŋ bɛ̄ndo᷄ŋ kpo̍u̍ ŋ̄ chō hīīlɔ᷄ŋ, mī ŋ̄ kōōmbi̍a̍a̍, o̍ ko̍ŋ kɔ̍ɔ̍lī, pōūtā vīlɛ̄īla̍ŋ bɛ̍ɛ̍ mī lā tɛ̄ɛ̄ndi̍a̍a̍, tāŋgūlta̍ŋ kpo̍u̍ mī lā kōōmbi̍a̍a̍, a̍ lɛ̄ŋnde̍ wa᷅ ni̍ŋ nyi̍i̍yāa̍ le̍ŋ.

²¹I̍ cho̍ Māsāa̍ Kɔ̍kī nyɛ̄ pālāā bɛ̄ndōo̍ tūsī chōo̍, mī to̍sa̍ mī sīōōŋīī bɛ̄ndūe̍i̍ ī bīī ndu̍. Ya̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍. Māsāa̍ Kɔ̍kī, I̍ cho̍ tōsā mī so̍vɛ̄i̍ya̍a̍ ndūa̍a̍, nda̍ pi̍la̍ dīūwa᷅ŋ ve̍llāa̍ vēllē a̍ mɔ̄ɔ̄ŋ fāŋndo̍ŋ.

²²Dɛ̍nɛ̍ pa̍lāā ya̍ I̍ tu̍sī ni̍ŋ Ma̍sāa̍ Kɔ̍kī chōo̍ nda̍ so̍vɛ̄i̍ya̍a̍ ndūa̍a̍ wo̍, ō wā ni̍ŋ o̍ bɔ̍ɔ̍. I̍ cho̍ tōsā mī nāālā wɔ̄ɔ̍ŋndā bɛ̄ndūla̍ŋ lā de᷄l nda̍ chōo̍, ndu̍yɛ̍, mī to̍sa̍ mī ā bɔ̄ɔ̍ bɔ̍ɔ̍ a̍ sɔ̍la̍ pīɔ̍mnda̍ŋ a̍ mɔ̄ɔ̄ŋ fāŋndo̍ŋ. Māsāa̍ Kɔ̍kī ni̍, so̍vɛ̄i̍ya̍a̍ ndūa̍a̍ ni̍, a̍ so̍vɛ̄i̍ya̍a̍ fu̍lā ni̍ŋ o̍ lɛ̄ŋīī bɔ̄ɔ̍ bɔ̍ɔ̍ ni̍ŋ, le̍ nda̍ sɔ̍ŋgɔ̍ɔ̍ mālāa̍ wa̍, nda̍ kpo̍u̍, I̍ cho̍ nda̍ hūnɔ̄ɔ̄ nyɛ̄ pālāā bɛ̄ndōo̍ tūsī chōo̍, mī chi̍i̍ nda̍ mu̍ɛ̍ɛ̍ŋ. I̍ cho̍ nda̍ pīɔ̄ɔ̄ kpūndɛ̍ bɛ̄ndōo̍ tūsī chōo̍, mī to̍sa̍ mī lōōŋ kpu̍ŋgbāŋ bɛ̄ndo᷄ŋ ŋ̄ dēli̍ nda̍ chōo̍, lātūlu̍ a̍ pōūtā lēyīŋndā bɛ̄ndūla̍ŋ, nda̍ kpo̍u̍ mā chūu̍.

²³O̍ ko̍ŋ, mī lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍ i̍ si̍na̍, māā ya̍ Mɛ̄lɛ̄ka̍, wāna̍ kpāāyā bɛ̍ndōo̍ ya̍ I̍ cho̍ ni̍, ndu̍yɛ̍ mi̍ wa᷅ Mɛ̄lɛ̄ka̍ kāsī. Ndu̍yɛ̍, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”