Read Southern Kisi Īsi̍kīāā 39 Bible Online

Īsi̍kīāā 39 - Southern Kisi bible

Īsi̍kīāā 39

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ hīāū lāchī a̍ sūɛ̍i̍, mbo̍ dīmūl la̍ āā, “Wāna̍ chi̍o̍o̍ Īsi̍kīāā, di̍mu̍l Ma̍sāa̍ Kɔ̍kī, o̍ cho̍ māsāa̍ le̍ wāŋnda̍ Mɛ̍si̍ɛ̍kī, a̍ wāŋnda̍ Tu̍bāā wo̍, a̍ nyɛ̄ pālāa̍ ko̍māl ni̍ŋ ndu̍ wo̍ o̍kɔ̄ɔ̄. Mā di̍mu̍l ndu̍ māā ya̍ Mɛ̍lɛ̄ka̍ dīmi̍ māā, Māsāa̍ Kɔ̍kī, I̍ cho̍ nu̍m nyɛ̄ pālāa̍ tūsī chōo̍.

²I̍ cho̍ nu̍m hɔ̄lla̍ mūlī, mī so̍li̍ nu̍m o̍ lɛ̄ŋndē nūmnde̍ŋ ni᷄ŋ ba᷅ lūāŋndo̍ pɔ̍, mī ku̍ɛ̄ a̍ nūm o̍ pēmbo᷄ŋ I̍sɔ̄lūɛ̄ī.

³O̍ ko̍ŋ, mī lɔ̍ɔ̄ chi̍ɔ̍ū cho̍ nu̍m o̍ bā mi̍āllo̍, ndu̍yɛ̍ mī chīŋɔ̍ma̍ cho̍ nu̍m o̍ bā kɛ̄ndɔ̄ɔ̍ wa̍ŋ mā dēli̍ lɛ̄ŋ.

⁴Nūm ni̍, so̍vɛ̄i̍ya̍a̍ nu̍mnda̍ ni̍, a̍ so̍vɛ̄i̍ya̍a̍ fu̍lā ni̍ŋ o̍ lɛ̄ŋīī chēle̍ŋ ni᷄ŋ le̍ nu̍m sɔ̍ŋgɔ̄ɔ̍ mālāa̍ wa̍, lā chō pīɔ̍mndo̍ sɔ̄lā o̍ pēmbo᷄ŋ I̍sɔ̄lūɛ̄ī, ndu̍yɛ̍ mī to̍sa̍ mī yōūwa̍, a̍ vīsīāā yōndūa̍a̍, mā dē vīsīŋ nyāa̍ŋ.

⁵Lā chō wā īhīni̍ a̍ vi̍lɛ̍i̍ya̍ yōndōlā la̍ŋ ni᷄ŋ. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.

⁶I̍ cho̍ lɛ̄ŋndē Ma̍kɔ̍kīle̍ŋ mālɔ̄ɔ̄ o̍ yīŋ, ndu̍yɛ̍ wānāa̍ cho̍ o̍ lɛ̄ŋīi̍ ho̍lnu̍ŋ pe̍ēla̍ mɛ̄ŋmā īhɛ᷄lla̍ŋ ni᷄ŋ, ma̍ wānu᷄ŋ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍ wa̍, mī to̍sa̍ mā ŋūɛ̄. O̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁷I̍ cho̍ tōsā mī wānāā nīa̍a̍ I̍sɔ̄lūɛ̄ī a̍ si̍na̍ māā ya̍ Mɛ̍lɛ̄ka̍ dīōlā nīla̍ŋ, dīōlā kāsī la̍ŋ la̍ cho̍ ni̍. Ndu̍yɛ̍ mī to̍sa̍ le̍ fɛ̍ɛ̍ŋ a̍ fɛ̍ɛ̍ŋ, wāŋnda̍ tɛ̍ɛ̍mbūū lɛ̍ dīōlā nīla̍ kāsī la̍ŋ lābɛ̄ɛ̄ le̍. O̍ ko̍ŋ, mī wāŋnda̍ o̍ lɛ̄ŋnde̍ ni᷄ŋ a̍ si̍na̍, māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, Mɛ̄lɛ̄ka̍ kāsīo̍o̍ I̍sɔ̄lūɛ̄ī.”

⁸Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Pāa̍le̍ le̍ŋ lē chō o̍ nɛ̄ī, pāa̍le̍ sɔ̄ɔ̍ŋ mu᷅ŋ kpo̍u̍ ŋ̍ yɔ̍nūŋ ni̍ŋ nde̍ŋ. Pāa̍le̍ŋ nde᷅ŋ ya̍ I̍ so̍ō a̍ le̍ŋ o̍kɔ̄ɔ̄ ni̍.

⁹Wānāa̍ cho̍ o̍ chi̍o̍o̍ŋ I̍sɔ̄lūɛ̄ī ya̍, ā fūlā ni̍ŋ mā kɔ̍ chɔ̍ɔ̍vīāā wōlɔ̄ɔ̄lā chɔ̄ūla̍ wa᷅ ni̍ŋ la̍ mɛ̍līāā lɛ̄ŋ nda̍ŋ, le̍ mā lōm nda̍ŋ. Ā chɔ̄ɔ̄vīāā ni̍ŋ nyɛ̍lā so̍vɛ̄i̍ya̍ bīī o̍ lābā le̍ ndā māndāa̍ o̍ sɔ̍ŋgɔ̍ɔ̍ ni᷄ŋ nda̍ŋ, lā pɔ̄mbɔ̄la̍ŋ, a̍ lā bɛ̄ndūla̍ŋ, a̍ chīɔ̄ūla̍ŋ, a̍ chīŋu̍a̍ŋ, a̍ ba̍lta̍ŋ, a̍ yɔ̄mīī bīŋgīī nda̍ sɔ̄ŋgā o̍ lābā ve̍, mā wa̍ mu̍ŋ lōmɔ̄ɔ̍ le̍ wɔ̄sīla̍ŋ lā ŋɔ᷄mmɛ̍ū.

¹⁰Ā ve᷅ lɛ̍ ni̍ŋ i̍yɔ̍m tīŋgɔ̄ɔ̄ yōndōla̍ŋ ni᷄ŋ, ɔ̄ɔ̄ mā kēlū īyɔ̄m o̍ būndɛ̍ ni̍ŋ le̍ dɔ̄wɔ̄ɔ̄ o̍ yīŋ te̍, wōlɔ̄ɔ̄lā chɔ̄ūlā lāŋ, la̍ŋ nda̍ wā ni̍ŋ dɔ̍u̍wɔ̄ɔ̍ o̍ yīŋ ni̍. Wānāa̍ de̍l nyɛ̄m ndāa̍ŋ chōo̍ ma̍ pūŋgā mu̍ŋ nda̍, nda̍ bɛ̍ɛ̍ ā chō lākɔ̄ nyɛ̄m wānāā kāŋ dēlɔ̄ɔ̄ chōo̍ mā pūŋga̍ mu̍ŋ.” Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ so̍ō ni̍.

¹¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Tē te̍le̍ŋ ko̍ŋ ō fūūlu̍u̍ pɛ̍, Māsāa̍ Kɔ̍kī ni̍, so̍vɛ̄i̍ya̍a̍ ndūa̍a̍ ni̍, o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ ya̍ I̍ cho̍ tōsā ni̍ mā chɔ̍ nda̍. Lɛ̄ŋndē dɛ̍ŋgbɛ̍le̍ cho̍ o̍ pēmbo᷄ŋ tɛ̄ɛ̄ŋ, o̍ Pēe̍ Mɛ̄ŋmā Īhɛ᷄llo̍ bā pāa̍le̍ŋ lē chāŋndo̍ le̍ŋ, le̍ nɔ̍ dīōla̍ŋ āā, ‘Dɛ̍ŋgbɛ̍ Wānāā Kēlāa̍’ le̍ŋ, lo̍ŋ nda̍ chɔ̄ ni̍ŋ ndu̍, nda̍ so̍vɛ̄i̍ya̍a̍ ndūāā sɛ̍līa̍a̍ bɛ̍ndūa̍a̍ ni̍. O̍ ko̍ŋ, wānāā kēlāa̍ ā sɔ̍lā lɛ̍ ni̍ŋ nɛ̍i̍ nda̍ kēēkū lo̍ŋ te̍, a̍ sɛ̄īla̍ wa᷅ ni̍ŋ lo̍ŋ nda̍ŋ. Ndu̍yɛ̍ wāŋnda̍ vēēlū ni̍ŋ fo̍ndāŋ kōŋ āā, ‘Dɛ̍ŋgbɛ̍ So̍vɛ̄i̍ya̍a̍ Kɔ̍kī wa̍.’

¹²Wāŋ vīlɛ̍i̍ya̍ ā wā ni̍ŋ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ ha̍a̍a̍, le̍ pāŋgo̍ŋ ŋ̄ ŋɔ᷄mmɛ̍ū, ā wā ni̍ŋ nda̍ chɔ̄ɔ̍, le̍ mī lɛ̄ŋnde̍ŋ lē sīmnu᷄ŋ le̍ di̍a̍ndāā ya̍ Mɛ̍lɛ̄ka̍ o̍ hɔ̄l.

¹³Wānā o̍ wāna̍ cho̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, nda̍ kpo̍u̍, ā chō sɔ̄ɔ̄ŋgūū lē wāŋ vīlɛ̍i̍ya̍ ha̍ā chɔ̄ɔ̍. Ndu̍yɛ̍ tē te̍le̍ŋ ko̍ŋ ō fūūlu̍u̍ pɛ̍, mī chɔ̍m kpāāya̍ nī bɛ̍ndōo̍, wāŋnda̍ ā chō I̍sɔ̄lūɛ̍i̍ya̍ bɛ̄ɛ̄le̍ŋ kē. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.

¹⁴Le̍ pāŋgo̍ŋ ŋ̄ ŋɔ᷄mmɛ̍ū wāŋnda̍ I̍sɔ̄lūɛ̄ī a̍ wa᷅ ni̍ŋ wa᷅ŋ vīlɛ̍i̍ya̍ vīlīo̍o̍ mā kūā nda̍ chɔ̄ɔ̍. Tē pāŋgu̍ŋ ŋɔ̍mmɛ̍ū mu᷅ŋ ŋ̄ hīōū pɛ̍, wāŋnda̍ I̍sɔ̄lūɛ̄ī a̍ cho̍ pūa̍a̍ hɛ̄lī mā ma᷄l nda̍ mā ba̍lu̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍, le̍ wāŋ vīlɛ̍i̍ya̍a̍ tu̍a̍a̍ lo̍ wa̍ chɔ̄ɔ̍, le̍ mā tōsa̍ mī lɛ̄ŋnde̍ŋ lē sīmnu᷄ŋ le̍ di̍a̍ndāā ya̍ Mɛ̍lɛ̄ka̍ o̍ hɔ̄l.

¹⁵O̍ ko̍ŋ, pūa̍a̍ nda̍ chō ha̍ā hɛ̄lī wa̍ ā chō bālɔ̄ɔ̄ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍, bā o̍ bā nda̍ kōma̍l pāālā wāna̍ chi̍o̍o̍ pɛ̍, ā kɛ̄si̍ tāāmāsi̍o̍o̍ lo̍ŋ, le̍ mī wānāa̍ cho̍ pāāla̍ŋ chɔ̄ɔ̍ wa̍, ā hu᷄ŋ chɔ̍ɔ̍vīāā mā kɔ̍ chɔ᷅ o̍ Dɛ̍ŋgbɛ̍ So̍vɛ̄i̍ya̍a̍ Kɔ̍kī wa̍.

¹⁶(Ndu̍yɛ̍ chi̍o̍o̍ ō wā ni̍ŋ o̍ dɛ̍ŋgbɔ̍ɔ̍ ho̍ō īkɛ̄i̍, ndu̍ bɛ̍ɛ̍ mī dīōlā So̍vɛ̄i̍ya̍a̍ Kɔ̍kī wa̍ lā wa̍ ndu̍ chōo̍.) O̍ ko̍ŋ, tē ā chīi̍ wāŋ vīlɛ̍i̍ya̍a̍ ka̍ŋ chɔ̄ pɛ̍ kpo̍u̍, lɛ̄ŋndē I̍sɔ̄lūɛ̍i̍le̍ŋ lē sīmnu᷄ŋ vɛ̍lɛ̄ lē dīāndāā ya̍ Mɛ̍lɛ̄ka̍ o̍ hɔ̄l.”

¹⁷Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Wāna̍ chi̍o̍o̍ Īsi̍kīāā, di̍mu̍l yo̍ūwa̍, a̍ vīsīa̍a̍ kpo̍u̍ yo̍ndōla̍ŋ ni᷄ŋ, mā chūūŋgi̍āŋ na̍a̍ pi᷅lɛ̍ le̍ nyɛ̄ dīā bɛ̄ndū sa̍lā ya̍ I̍ cho̍ nda̍ bɛ̄ɛ̄ndīāl lo̍ dīo̍o̍. Di̍mu̍l nda̍ mā fūla̍ o̍ chi̍e̍ēŋndo̍ ni᷄ŋ kpo̍u̍, ma̍ chūūŋgi̍āŋ o̍ pēmbūŋ I̍sɔ̄lūɛ̍i̍yo̍ŋ chōo̍, mā hu᷄ŋ di̍ō vīsīŋ sa̍la᷄ŋ, mā ko᷄l kōo̍wa̍ŋ.

¹⁸Mɛ̄ɛ̍ nda̍ dīū nu̍a̍ā sāā ko̍ndu̍a̍a̍, a̍ sāā fɔ̍ŋndu̍a̍a̍, a̍ chūīŋnda̍, a̍ nāūwāā tōōyīāā chēlu̍lɛ̍i̍ya̍a̍ kɛ̍ndɛ̄ kɛ̍ndīa̍a̍ le̍ sa̍lāla̍ŋ yɛ̍, le̍nde̍ i̍ yɔ̍nūŋ ni̍ŋ o̍ pēmbo᷄ŋ chōo̍ I̍sɔ̄lūɛ̄ī ni̍. So̍vɛ̄i̍ya̍a̍ kpāāyā bɛ̍ndūa̍a̍ o̍ chi̍e̍ēŋndo̍ ni᷄ŋ, yōūwa̍, a̍ vīsīa̍a̍, nda̍ cho̍ hūnɔ̄ɔ̄ vīsīŋ ndāa̍ŋ dīo̍ ni̍, ndu̍yɛ̍ mā ko᷄l kōo̍ma̍ wānāā bɛ̄ndūa̍a̍ o̍ chi̍e̍ēŋndo̍ ni᷄ŋ.

¹⁹Te̍ I̍ bɛ̍ɛ̍ndi̍a̍a̍ nyɛ̄ dīāā sa̍lāa̍ ho̍ō pɛ̍, yōūwa̍, a̍ vīsīa̍a̍ ā dīā ni̍ŋ chu̍ɛ̍īmā wāŋndā chīe̍e̍ya̍, ndu̍yɛ̍ mā ko᷄l kōo̍ma̍ wāŋndā chīe̍e̍ya̍ te̍i̍ mā sāŋga̍.

²⁰I̍ cho̍ so̍vɛ̄i̍ya̍a̍ sɔ̍ŋgā o̍ su̍a̍ā chɔ̄ūwa̍ chōo̍ wa̍ dīū, a̍ su̍a̍ā ndāa̍ chɔ̄ūwa̍, a̍ so̍vɛ̄i̍ya̍a̍ kpāāyā bɛ̍ndūa̍a̍, a̍ ku̍u̍ba̍a̍ ndāa̍, mī bɛ̍ɛ̍ndi̍a̍a̍ nyɛ̄ dīāā bɛ̄ndōo̍, mī yōūwa̍, a̍ vīsīa̍a̍ ā dē te̍i̍ mā sāŋga̍.”

²¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “I̍ cho̍ tōsā mī lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍ I̍ che᷅ nāŋɔ̄ɔ̄ ni̍ bɛ̍ndōo̍, ndu̍yɛ̍ mā chē mɛ̄ɛ̍ ya̍ I̍ cho̍ wāna̍ kpāāyā bɛ̍ndū, mi̍ tu̍sī Māsāa̍ Kɔ̍kī nda̍ so̍vɛ̄i̍ya̍a̍ ndūa̍a̍ nyɛ̄ pālāa̍ chōo̍ yɛ̍.

²²Ndu̍yɛ̍ chɔ̍ŋ a̍ te̍le̍ŋ ko̍ŋ, mbō kūɛ̄ a̍ lāchī kɛ᷅, wāŋnda̍ I̍sɔ̄lūɛ̄ī a̍ cho̍ sīnā māā ya̍ cho̍ Mɛ̄lɛ̄ka̍ Ya̍a̍wɛ̄ɛ̍ ndāa̍ ni̍.

²³Ndu̍yɛ̍, wāŋnda̍ o̍ lɛ̄ŋnde̍ ni᷄ŋ a̍ cho̍ sīnā māā wāŋnda̍ I̍sɔ̄lūɛ̄ī, le̍ dɛ̍nɛ̍ ndā wɔ̍ɔ̍ŋndo̍ nda̍ kūɛ̄ o̍ bīyɔ̄ɔ̍ ni᷄ŋ ni̍. Ā chō sīnā māā yɔ̄ŋ wɔ̄ɔ̍ŋ nda̍ tōsa̍ a̍ ya̍ wo̍, māā le̍la̍ŋ ya̍ I̍ mu̍lu̍l nda̍ kɔ̄ɔ̍ ni̍, mi̍ ma᷅l nda̍ ya̍a̍mɔ̍ɔ̍wa̍a̍ ndāa̍ o̍ bā, ma̍ dīū nda̍ a̍ mɔ̄ɔ̄ŋ fāŋndo̍ŋ.

²⁴Ma̍ fāŋa᷄ŋ o̍ nɛ̄i̍ nūu̍ chōo̍, ma̍ mūli᷄ŋ yɔ᷅ŋndā wɔ̄ɔ̍ŋnda̍ŋ tōsāa̍, ndu̍yɛ̍ ma̍ sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. O̍ ko̍ŋ, mi̍ mu̍lūl nda̍ kɔ̄ɔ̍, mi̍ tu̍sī nda̍ nyɛ̄ pālāa̍ chōo̍, mɛ̄ɛ̍ kpɛ̍ɛ̍ kūɛ̍ɛ̍la̍ ndāla̍ŋ lā wa̍ yɛ̍.”

²⁵Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ o̍ hi̍a̍ū lāchī a̍ sūɛ̍i̍, mbo̍ dīmī āā, “Kɛ̍ ndu̍yɛ̍, I̍ cho̍ yu̍ŋgu̍ Che̍kɔ̍pū wo̍ īnyīɛ̍ɛ̍ tūīīnɔ᷄ŋ, nda̍ yɔ̍nūŋ ni̍ māā wāŋnda̍ I̍sɔ̄lūɛ̄ī, mī to̍sa̍ mā sɔ̄la̍ vɛ̄lɛ̄ dɛ̍nɛ̍ kɛ̍ndɛ̄ bɛ̄ndōo̍ māā pāāndū. Ndu̍yɛ̍ I̍ cho̍ dīōlā nīla̍ kāsī la̍ŋ māndā, mī wāŋnda̍ ke᷄ la̍ŋ bɛ̄ɛ̄le̍ŋ.

²⁶I̍ cho̍ tōsā mī wāŋnda̍ I̍sɔ̄lūɛ̄ī a̍ mi̍i̍ŋgu̍ o̍ lɛ̄ŋnde̍ ndāle̍ŋ ni᷄ŋ, mā wānu̍ŋ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍, wāna̍ o̍ wānā to̍sā mī sīōōŋīī bīī nda̍ le̍. Si̍ɔ̍mbu̍la̍ ya̍ I̍ to̍sa̍ mi̍ ya̍a̍mɔ̍ɔ̍wa̍a̍ ndāa̍ ā tūsī nda̍, le̍ nyɛ̄ nda̍ tōsa̍ a̍ ya̍ wo̍ la̍ŋ, I̍ cho̍ tōsā mā pu̍ɛ̍ɛ̍nu᷄ŋ a̍ la̍ŋ.

²⁷Lēlɛ̄ŋ o̍ lēlɛ̄ŋ nda̍ kūɛ̄ a̍ I̍sɔ̄lūɛ̍i̍ya̍ o̍ bīyɔ̄ɔ̍ ni᷄ŋ, I̍ cho̍ nda̍ hūnɔ̄ɔ̄ sōlī o̍ lɛ̄ŋīī kēŋ ni᷄ŋ, mī chu̍u̍ŋgi̍a̍a̍ nda̍ nāa̍ pi᷅lɛ̍ kpo̍u̍, mī mi̍ŋgi̍ nda̍ o̍ lɛ̄ŋndē ndāle̍ŋ ni᷄ŋ. O̍ ko̍ŋ, mī chɔ̍m lɛ̄ŋnde̍ o̍ chi̍e̍ēŋndo̍ ni᷄ŋ, māā ya̍ Mɛ̍lɛ̄ka̍, Mɛ̄lɛ̄ka̍ kāsīo̍o̍ ya̍ I̍ cho̍ ni̍.

²⁸Wāŋnda̍ I̍sɔ̄lūɛ̄ī a̍ cho̍ sīnā māā ya̍ cho̍ Mɛ̄lɛ̄ka̍ Ya̍a̍wɛ̄ɛ̍ ndāa̍ ni̍, kāni̍ fo̍ndōle̍, ya̍ to̍sa̍ ni̍ ma̍ kūā a̍ nda̍ o̍ bīyɔ̄ɔ̍ ni᷄ŋ, ndu̍yɛ̍ ya̍ ko̍ni̍ cho̍ vɛ̄lɛ̄ nda̍ chūūŋgīāā kpo̍u̍ ni̍, ō pīlɛ̍ bɛ̍ɛ̍ I̍ cho̍ mɛ̍ī kɔ̄ɔ̄lī le̍, mī mi̍ŋgi̍ nda̍ o̍ lɛ̄ŋndē ndāle̍ŋ ni᷄ŋ.

²⁹I̍ cho̍ tōsā mī nyi̍nā nūu̍ ō tōl nda̍ kɔ̄ɔ̄lī, ndu̍yɛ̍ fɛ̍ɛ̍ŋ a̍ fɛ̍ɛ̍ŋ, I̍ mu̍lūl lɛ̍ nda̍ kɔ̄ɔ̍ le̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ya̍ so̍ō ni̍.”