Read Southern Kisi Īsi̍kīāā 40 Bible Online

Īsi̍kīāā 40 - Southern Kisi bible

Īsi̍kīāā 40

¹Wɔ̄sī na̍a̍ ŋ̄ chīŋa̍ wɔ̄sīla̍ŋ bi̍dīi̍ŋ a̍ lā ŋūɛ̍ɛ̍nu̍ o̍ bīyɔ̄ɔ̍ ni᷄ŋ ndo̍, wɔ̄sī kōŋ o̍ kāndɔ᷄ŋndo̍, o̍ mālā tɔ̍wa̍ŋ, mi̍ kpāāya̍ Mɛ̄lɛ̄ka̍ Ya̍a̍wɛ̄ɛ̄ wo̍ ō tūāl la̍ kɔ̄ɔ̄lī. Ndu̍yɛ̍, bīyɔ̄ɔ̄ ya̍a̍mɔ̍ɔ̍wa̍ bīī Chūlu̍sɛ̄lɛ̄m ndo̍, wɔ̄sīla̍ŋ tɔ̍ a̍ lā hīɔ̍ɔ̍lu̍ ndɔ̄ɔ̍ wa̍ ko̍ŋ ni̍.

²O̍ yi̍lāŋndo̍ ni᷄ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chu̍ā ya̍ mbo̍ kūā a̍ ya̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, mbo̍ kɔ̍ si̍mī ya̍ o̍ pēmbīī vīlɛ̄ī bɛ̄ndūe̍i̍ chōo̍. Mɛ̄ɛ̍ ya̍ I̍ to̍fa̍ŋ la̍chi̍, mi̍ cha̍nu᷄ŋ nyɔ̍ɔ̍ ya̍ o̍ hɔ̄l māā chi̍e̍e̍ bɛ̍ndū.

³Mi̍ Mɛ̄lɛ̄ka̍ chūā ya̍ mbo̍ sɔ̄ɔ̄ŋgūū ya̍ o̍ chi̍o̍o̍ ho̍ō īkɛ̄i̍ kpɛ̍ɛ̍lūŋ. O̍ ko̍ŋ, mi̍ cha᷅ pōo̍ īsīsi̍ o̍ dīō sāāsa̍ chi̍o̍o̍ sōndōo̍. Pōo̍ ho̍ō wāna̍ a̍a̍ che᷅ ndu̍ dīōndɔ̄ɔ̍ īmālākā mālākɛ̄i̍ pɛ̍, āā būlɔ̍ŋsīi̍ye̍ nda̍ bɛ̄ɛ̄ndi̍a̍a̍ ni̍, mi̍ ī wā īŋɛ̄lɛ̄ŋgi̍ ŋɛ̍lɛ̄ŋgi̍e̍i̍. Yōōlē nda̍ tūū chi̍ɛ̍īyo̍ le̍ŋ lē wa̍ ndu̍ bā, a̍ sīōndōōlē tūwāāle̍ŋ.

⁴Mi̍ pōo̍ ho̍ō dīmūl lā āā, “Wāna̍ chi̍o̍o̍ Īsi̍kīāā, to̍fa̍ nyɛ᷅ kɛ̄ndɛ̄ kɛ̍ndɛ̄, mā chē nyɛ̄ ya̍ I̍ cho̍ nu̍m chɔ̄mndo̍, ndu̍yɛ̍, mā ya̍ŋ nīla̍ŋ nyɛ̄ kɛ̄ndɛ̄ ye̍ke̍ŋ o̍ nyɛ̄ ya̍ I̍ cho̍ nu̍m dīmūllo̍, kāni̍ fo̍ndōle̍, le̍ sa̍bū kōŋ ya̍ I̍ hi᷅ŋ a̍ nūm na̍nu᷄ŋ ni̍. Nyɛ̄ o̍ nyɛ̄ ya̍ I̍ cho̍ nu̍m chɔ̄m na̍nu᷄ŋ, kɔ̍ mā kɔ̍ do̍o̍nu᷄ŋ wa᷅ŋnda̍ I̍sɔ̄lūɛ̍i̍ ko̍na̍ kpo̍u̍.”

⁵O̍ ko̍ŋ kɔ̍ɔ̍lī, mi̍ cha᷅ chīɛ̍i̍ Mɛ̄lɛ̄ka̍a̍ īsīsi̍ a̍ kpākīo̍o̍ ō bālāā kpɔ̍kɔ̍su̍. Ndu̍yɛ̍ sīōndōōlē tūwāāle̍ wa̍ pōo̍ ho̍ō o̍ bā le̍ŋ, lē wa̍ bānde̍i̍ le̍ nɛ̄īyo̍ tɔ̍. Mi̍ pōo̍ ho̍ō kūā mbo̍ kɔ̍ tu̍ū kpāki̍ wa̍ chīɛ̄īyo̍ ho̍ō ō bālāā wo̍. Kpākīo̍o̍ ho̍ō ō wa̍ hēlɔ̄ɔ̍ le̍ nɛ̄īyo̍ tɔ̍, chēlu̍l ndɔ̄ɔ̍ nɛ̄īyo̍ tɔ̍.

⁶O̍ ko̍ŋ kɔ̍ɔ̍lī, mbo̍ kūā o̍ dīō kpāki̍ wa̍ bā pāa̍le̍ŋ lē chāŋndo̍ wo̍. Mbo̍ hēl o̍ bi᷅ŋnda̍ŋ, mbo̍ kɔ̍ tu̍ū dīo̍o̍ ho̍ō ke̍e̍nde̍e̍ ndūɛ̍i̍ lēbɛ̄ŋgu̍ mɛ̄ɛ̍ i̍ wa̍ chēlu̍llo̍ yɛ̍, ndu̍yɛ̍ ī wa̍ chēlu̍llo̍ le̍ nɛ̄īyo̍ tɔ̍.

⁷Tē wāna̍ a̍a̍ hi̍o̍ū dīo̍o̍ ho̍ō pɛ̍, lu̍mūi̍la̍ wānāā mɛ̄ŋgɛ̄lāa̍ lā wa̍ o̍ nɛ̄ī la̍ŋ ŋɔ̍mpu᷅m, ba̍ā lā yāa̍, ba̍ā lā yāa̍. Lu̍mūi̍la̍ŋ nda᷅ŋ, tūū pīlɔ̍ɔ̍ kpe̍ nda̍ a̍a̍ tu̍u̍ la̍ŋ ni̍. Lu̍mūi̍ o̍ lu̍mūi̍, bānde̍i̍ le̍ nɛ̄īyo̍ tɔ̍, bu̍o̍o̍ nɛ̄īyo̍ tɔ̍. Lūŋgbu̍ŋ pi̍ɔ̍u̍ lu̍mūi̍la̍ŋ nda᷅ŋ tɛ̄ɛ̄ŋ ndo̍ŋ bɛ̍ɛ̍, īlūŋgbu̍ o̍ īlūŋgbu̍, ī wa̍ chēlu̍llo̍ le̍ nɛ̄īyo̍ lē ŋɔ̄ma̍a̍. Tē wāna̍ a̍a̍ hi̍o̍ū lu̍mūi̍la̍ŋ nda᷅ŋ pɛ̍, nāa̍ ke̍i̍yāa̍ ā wa̍, le̍ lūɛ̄īyɔ̄ɔ̍ o̍ tōŋgo̍ wāna̍ a̍a̍ ke̍ī ni̍ŋ mā lūɛ̄ī o̍ chīɛ̍i̍ Mɛ̄lɛ̄ka̍a̍ ho̍ō ni᷄ŋ ndo̍. Nāa̍ ke̍i̍yāa̍ ha̍ā, chɔ̍ŋ nāa̍ nda̍ kāndu̍ŋ nda̍, kɔ̍ nāa̍ nda̍ mɛ̄ɛ̄lu̍ wa̍, ō wa̍ bānde̍i̍ le̍ nɛ̄īyo̍ tɔ̍.

⁸O̍ ko̍ŋ kɔ̍ɔ̍lī, mi̍ pōo̍ ho̍ō tūū vɛ̄lɛ̄ tōŋgo̍ wa̍ ho̍ō o̍ dīō wo̍ mɛ̄ɛ̍ o̍ wa̍ bānde̍i̍ yɛ̍, ō wa̍ bānde̍i̍ le̍ nɛ̄īyo̍ tɔ̍ a̍ lē hīɔ̍ɔ̍lu̍.

⁹Tōŋgōo̍ ho̍ō lūŋgbu̍ŋ ndɔ̄ɔ̍ŋ ŋ̄ wa̍ chēlu̍llo̍ le̍ nɛ̄īyo̍ lē hīɔ̍ɔ̍lu̍. Ndu̍yɛ̍ tōŋgo̍ wa̍ ho̍ō o̍ dīō wo̍, ō wa᷄ lēni᷄ŋ o̍ mɛ̄ɛ̄lu̍la̍ŋ pɔ̍.

¹⁰Lu̍mūi̍la̍ wānāā mɛ̄ŋgɛ̄lāā wa̍ la᷅ŋ o̍ dīō la̍ŋ, la̍ŋ ŋɔ̍mpu᷅m kpo̍u̍, tūū pīlɔ̍ɔ̍ kpe̍ nda̍ a̍a̍ tu̍u̍ la̍ŋ ni̍. Lūŋgbu̍ŋ pi̍ɔ̍u̍ lu̍mūi̍la̍ŋ nda᷅ŋ tɛ̄ɛ̄ŋ ndo̍ŋ bɛ̍ɛ̍, tūū pīlɔ̍ɔ̍ kpe̍ nda̍ a̍a̍ tūu̍ mu̍ŋ ni̍.

¹¹O̍ ko̍ŋ kɔ̍ɔ̍lī, mi̍ pōo̍ ho̍ō tūū vɛ̄lɛ̄ fo̍ndā wānā a̍a̍ ke̍ī le̍ lūɛ̄īyɔ̄ɔ̍ o̍ dīō kpāki̍ wa̍ ho̍ō bā pāa̍le̍ŋ lē chāŋndo̍ wo̍, mɛ̄ɛ̍ o̍ wa̍ bu̍o̍o̍ yɛ̍. Fo̍ndāa̍ ho̍ō, ō wa̍ bu̍o̍o̍ le̍ nɛ̄īyo̍ bi̍di̍i̍ŋ a̍ lē dīi̍ŋ, ndu̍yɛ̍, dīo̍o̍ ndu̍ wa̍ tōŋgɔ̄ɔ̍ lēni᷄ŋ le̍ nɛ̄īyo̍ tɔ̍ a̍ lē ŋɔ᷄mpu᷅m.

¹²Lu̍mūi̍la̍ wānāā mɛ̄ŋgɛ̄lāa̍, wa̍ la᷅ŋ o̍ dīō la̍ŋ, lu̍mūi̍ o̍ lu̍mūi̍ lɔ̍ɔ̍pa̍ mī wānā a̍a̍ fu̍u̍lu̍u̍ o̍ dīo̍o̍, bi᷅ŋndo̍ wa̍ ō dūāūwāā o̍ dīō. Bi᷅ŋnda̍ŋ nda᷅ŋ, bi᷅ŋ o̍ bi᷅ŋ, bānde̍i̍ nɛ̄īyo̍ lēpīlɛ̍ a̍ i̍ŋchi̍sīi̍la̍ŋ lā ŋɔ̄ma̍a̍, chēlu̍llo̍ bɛ̍ɛ̍ le̍nde̍ ko̍ni̍. Lu̍mūi̍la̍ŋ nda᷅ŋ yɛ̍, lu̍mūi̍ o̍ lu̍mūi̍, bānde̍i̍ ni̍, bu̍o̍o̍ ni̍, ō wa̍ nɛ̄īyo̍ tɔ̍.

¹³Chɔ̍ŋ o̍ lu̍mūi̍yo̍ ō pīlɛ̍ a̍ mākɔ̄ɔ̄, kɔ̍ o̍ lu̍mūi̍yo̍ ō pīlɛ̍ a̍ mākɔ̄ɔ̄, a̍ nɛ̄i̍ ke̍e̍ku̍ tɛ̄ɛ̄ŋ ndo̍ kpo̍u̍, mi̍ pōo̍ ho̍ō tūū ti᷅ŋ kōŋ, ō wa̍ nɛ̄īyo̍ be̍le̍ hi̍ɔ̍ɔ̍lu̍ a̍ lēdīi̍ŋ.

¹⁴O̍ ko̍ŋ kɔ̍ɔ̍lī, mbo̍ tūū vɛ̄lɛ̄ tōŋgōo̍ ho̍ō, sūŋgbu̍ma̍ ndɔ̄ma̍ wa̍ le̍ fūlāa̍ o̍ la̍ūwo̍ wa̍ŋ, mɛ̄ɛ̍ ma̍ wa̍ hēlɔ̄ɔ̍ yɛ̍. Mā wa̍ hēlɔ̄ɔ̍ le̍ nɛ̄īyo̍ kɛ̄mɛ̄ a̍ lē ŋūɛ̍ɛ̍nu̍. Ndu̍yɛ̍ tōŋgo̍ wa̍ ho̍ō o̍ dīō wo̍, la̍ūwo̍ wa̍ ndu̍ ō bālāā.

¹⁵Chɔ̍ŋ o̍ dīō kpākīo̍o̍ ho̍ō sōndōo̍, kɔ̍ nāa̍ tōŋgo̍ wa̍ lēni᷄ŋ ndo̍ ō mɛ̄ɛ̄lu̍ wa̍, ō wa̍ nɛ̄īyo̍ be̍le̍-ŋɔ̍ma̍a̍ a̍ le̍ hīɔ̍ɔ̍lu̍.

¹⁶Ndu̍yɛ̍, dīō kpākīo̍o̍ ho̍ō, o̍ lūŋgbu̍ŋ ndɔ̄ɔ̍ŋ lēni᷄ŋ, ma̍ tōōsīāā fo̍ndāŋnda̍ŋ māā lāwu̍ndɛ̄i̍ le̍ nyɔ̄ɔ̍ŋ kɛ̄sīo̍o̍, kɛ̍ lā fūla̍ le̍kɔ̍ɔ̍lī le̍. Fo̍ndāŋnda̍ŋ nda᷅ŋ lā wa̍ o̍ lu̍mūi̍la̍ wānāā mɛ̄ŋgɛ̄lāa̍, a̍ o̍ dīo̍o̍ sōndōo̍, a̍ o̍ dīō tōŋgōo̍. Ndu̍yɛ̍, o̍ dīō kpākīo̍o̍ hōlnɔ᷄ŋndo̍ lēni᷄ŋ ve̍llāa̍ vēllē, wāūwa̍ŋ mā wa̍ mā tūūlīāā lo̍ŋ kpo̍u̍.

¹⁷O̍ ko̍ŋ kɔ̍ɔ̍lī, mi̍ pōo̍ ho̍ō kūā a̍ ya̍ o̍ la̍ū wa̍ o̍ bɛ̍ɛ̄ wo̍. La̍ūwo̍ ho̍ō, kpāki̍ wa̍ ndu̍ ō bālāā wo̍, lu̍mūi̍la̍ŋ lā wa̍ o̍ kpākī ko̍ŋ hōlnɔ᷄ŋndo̍ be̍le̍-ya̍a̍. Ndu̍yɛ̍ lu̍mūi̍la̍ŋ nda᷅ŋ, lu̍mūi̍ o̍ lu̍mūi̍ fo̍ndā kēyāa̍ wa̍ o̍ dīō wo̍, ō wa̍ ō bɛ̄ɛ̄ndīāā a̍ pōūta̍ŋ nyɛ̄ kɛ̄ndɛ̄ kɛ̍ndɛ̄.

¹⁸Chɔ̍ŋ le̍nde̍, mbo̍ kūā a̍ lu̍mūi̍la̍ la̍ŋ, ndu̍yɛ̍ mbo̍ kɔ̍ kɛ̍ɛ̍yā o̍ dīō kpākīo̍o̍, o̍ wa̍ ō bɛ̄ɛ̄ndīāā le̍nde̍ kpo̍u̍. Ndu̍yɛ̍ la̍ūwo̍ ho̍ō, ndu̍ ndu̍ o̍o̍ hi̍o̍ū tōlɔ̄ɔ̄ a̍ la̍u̍ wa̍ lēni᷄ŋ ndo̍.

¹⁹O̍ ko̍ŋ kɔ̍ɔ̍lī, mi̍ cha᷅ dīōlā wānā a̍a̍ ke̍ī le̍ lūɛ̄īyɔ̄ɔ̍ o̍ la̍u̍ wa̍ lēni᷄ŋ o̍ chīɛ̍i̍ Mɛ̄lɛ̄ka̍a̍ wo̍. Ndu̍yɛ̍ mi̍ sa̍a̍lu᷄ŋ māā dīōla̍ŋ nda᷅ŋ, la̍ŋ la̍a̍ hi̍o̍ū hēlɔ̄ɔ̄, a̍ dīōla̍ wa̍ le̍ fūlāa̍ o̍ la̍ū wa̍ o̍ bɛ̍ɛ̄ la̍ŋ. Chɔ̍ŋ o̍ dīo̍ wa̍ o̍ la̍ūwo̍ o̍ bɛ̍ɛ̄ wo̍, kɔ̍ o̍ dīo̍ wa̍ o̍ la̍ūwo̍ lēni᷄ŋ ndo̍, mi̍ pōo̍ ho̍ō tūū ti᷅ŋ kōŋ, ō wa̍ nɛ̄īyo̍ kɛ̄mɛ̄ a̍ be̍le̍-ŋɔ̍mpu᷅m a̍ lē ŋɔ̄ma̍a̍ (168).

²⁰O̍ ko̍ŋ kɔ̍ɔ̍lī, dīo̍o̍ wa̍ vɛ̄lɛ̄ bā lūāŋndo̍, le̍ fūlāa̍ o̍ la̍u̍ wa̍ o̍ bɛ̍ɛ̄ wo̍. Mi̍ pōo̍ ho̍ō ō tūū vɛ̄lɛ̄ dīō kōŋ.

²¹Ndu̍yɛ̍ dīō kpākīo̍o̍ ho̍ō bɛ̍ɛ̍, lu̍mūi̍la̍ wānāā mɛ̄ŋgɛ̄lāa̍ la̍ wa̍ lo̍ŋ ba̍ā lā yāa̍, ba̍ā lā yāa̍ la̍ŋ ni̍, lūŋgbu̍ŋ ndɔ̄ɔ̍ŋ vēllāa̍ vēllē ni̍, tōŋgo̍ wa̍ o̍ dīō wo̍ ni̍, tūū pīlɔ̍ɔ̍ kpe̍ nda̍ a̍a̍ tu̍u̍ la̍ŋ a̍ la̍ wa̍ o̍ dīō kpāki̍ wa̍ bā pāa̍le̍ŋ lē chāŋndo̍ la̍ŋ ni̍. Dīo̍o̍ wa̍ bānde̍i̍ le̍ nɛ̄īyo̍ be̍le̍ ŋɔ̍ma̍a̍ a̍ lē hīɔ̍ɔ̍lu̍, bu̍o̍o̍ nɛ̄īyo̍ be̍le̍ hi̍ɔ̍ɔ̍lu̍ a̍ lēdīi̍ŋ.

²²Tōŋgo̍ wa̍ o̍ dīō wo̍ ni̍, fo̍ndāŋnda̍ wa̍ lo̍ŋ māā lāwu̍ndɛ̄i̍ le̍ nyɔ̄ɔ̍ŋ kɛ̄sīo̍o̍ la̍ŋ ni̍, wāūma̍ wa̍ mā tūūlīāā lo̍ŋ nda̍ŋ ni̍, nyɛ̄ pīlɛ̍ kpe̍ la̍ wa̍ a̍ la᷅ŋ o̍ di̍o̍ wa̍ bā pāa̍le̍ŋ lē chāŋndo̍ wo̍ ni̍. Ndu̍yɛ̍ bi᷅ŋnda̍ŋ lā wa᷄ lā ŋɔ᷄mmɛ̍ū le̍ hēlɔ̄ɔ̍ o̍ dīo̍o̍ ho̍ō, ndu̍yɛ̍ tōŋgo̍ ndɔ̄ɔ̍ lēni᷄ŋ o̍ wa̍ ni̍.

²³O̍ dīō kpākīo̍o̍ ho̍ō kpēŋgēi̍ pīlɛ̍i̍ bā lūāŋndo̍, dīo̍o̍ wa̍ vɛ̄lɛ̄ lo̍ŋ le̍ lūɛ̄īyɔ̄ɔ̍ o̍ la̍u̍ wa̍ lēni᷄ŋ ndo̍, mɛ̄ɛ̍ ho̍ō wa̍ o̍ dīō kpākīo̍o̍ bā pāa̍le̍ŋ lē chāŋndo̍ yɛ̍. Chɔ̍ŋ o̍ dīo̍o̍ pīlɔ̍ɔ̍ le̍ kɔ̄la̍ŋ o̍ dīō wāna̍ a̍a̍ ke̍ī ko̍ŋ le̍ lūɛ̄īyɔ̄ɔ̍ o̍ la̍ūwo̍ lēni᷄ŋ ndo̍, mi̍ pōo̍ ho̍ō tūū ti᷅ŋ kōŋ, ō wa̍ nɛ̄īyo̍ kɛ̄mɛ̄ a̍ be̍le̍-ŋɔ̍mpu᷅m a̍ lē ŋɔ̄ma̍a̍ (168).

²⁴O̍ ko̍ŋ kɔ̍ɔ̍lī, mi̍ pōo̍ ho̍ō chūā ya̍, mbo̍ kūā a̍ ya̍ ba᷅ tōūwo̍, mi̍ cha᷅ dīō chēle̍ŋ ndo̍ŋ. Mi̍ pōo̍ ho̍ō tūū lūŋgbu̍ŋ dīo̍o̍ ho̍ō, a̍ tōŋgo̍ wa̍ lo̍ŋ ndo̍, ndu̍yɛ̍ nyɛ̄ pīlɛ̍ kpe̍ la̍ wa̍ a̍ la᷅ŋ o̍ dīōla̍ŋ lā pīlɛ̍ la̍ŋ ni̍.

²⁵Ndu̍yɛ̍ dīō kpākīo̍o̍ ho̍ō bɛ̍ɛ̍, a̍ lūŋgbu̍ŋ ndɔ̄ɔ̍ŋ kpo̍u̍, ndu̍yɛ̍ a̍ tōŋgo̍ ndɔ̄ɔ̍, la̍a̍ nɔ̍ fo̍ndāŋnda̍ŋ māā lāwu̍ndɛ̄i̍ le̍ nyɔ̄ɔ̍ŋ kɛ̄sīo̍o̍, mɛ̄ɛ̍ la̍ wa̍ o̍ dīōla̍ŋ lā pīlɛ̍la̍ŋ yɛ̍. Tōŋgo̍ ndɔ̄ɔ̍, ō wa̍ bānde̍i̍ le̍ nɛ̄īyo̍ be̍le̍-ŋɔ̍ma̍a̍ a̍ lē hīɔ̍ɔ̍lu̍, bu̍o̍o̍ nɛ̄īyo̍ be̍le̍-hi̍ɔ̍ɔ̍lu̍ a̍ lēdīi̍ŋ.

²⁶Chɔ̍ŋ lɛ᷅ŋ le̍ hēlɔ̄ɔ̍ o̍ dīo̍o̍ ho̍ō, bi᷅ŋnda̍ŋ lā wa̍ lo̍ŋ la̍ ŋɔ̍mmɛ̍ū. Ndu̍yɛ̍ ndu̍ bɛ̍ɛ̍ tōŋgo̍ wa̍ lo̍ŋ ndo̍, lēni᷄ŋ o̍ wa̍ ni̍. O̍ dīo̍o̍ ho̍ō hōlnɔ᷄ŋndo̍ lēni᷄ŋ ve̍llāa̍ vēllē, wāūwa̍ŋ mā wa̍ mā tūūlīāā lo̍ŋ.

²⁷Lo̍ŋ bɛ̍ɛ̍ dīo̍o̍ wa̍ le̍ lūɛ̄īyɔ̄ɔ̍ o̍ la̍u̍ wa̍ lēni᷄ŋ ndo̍. Chɔ̍ŋ o̍ dīō kōŋ, le̍ kɔ̄la̍ŋ o̍ dīo̍o̍ pīlɔ̍ɔ̍, mi̍ pōo̍ ho̍ō tūū ti᷅ŋ kōŋ, ō wa̍ nɛ̄īyo̍ kɛ̄mɛ̄ a̍ be̍le̍-ŋɔ̍mpu᷅m a̍ lē ŋɔ̄ma̍a̍ (168).

²⁸O̍ ko̍ŋ kɔ̍ɔ̍lī, mi̍ pōo̍ ho̍ō chūā ya̍ mbō kēī a̍ ya̍ o̍ dīō kpāki̍ wa̍ bā tōūwo̍ wo̍, mbo̍ kūā a̍ ya̍ o̍ la̍ūwo̍ lēni᷄ŋ. Mɛ̄ɛ̍ o̍ tu̍u̍ dīō kpākīo̍o̍ ho̍ō, mbo̍ sāālu᷄ŋ māā nyɛ̄ pīlɛ̍ kpe̍ o̍ wa̍ a̍ la᷅ŋ o̍ dīōla̍ŋ lā pīlɛ̍ la̍ŋ ni̍.

²⁹Dīo̍o̍ ho̍ō, a̍ lūŋgbu̍ŋ ndɔ̄ɔ̍ŋ kpo̍u̍, ndu̍yɛ̍ a̍ tōŋgo̍ ndɔ̄ɔ̍, tūū pīlɔ̍ɔ̍ kpe̍ nda̍ a̍a̍ tu̍u̍ la̍ŋ a̍ la̍ wa̍ o̍ dīōla̍ŋ lā pīlɛ̍ la̍ŋ nda̍ŋ ni̍. Ndu̍yɛ̍, ndu̍ bɛ̍ɛ̍ lūŋgbu̍ŋ ndɔ̄ɔ̍ŋ kpo̍u̍, a̍ tōŋgo̍ ndɔ̄ɔ̍, la̍a̍ nɔ̍ fo̍ndāŋnda̍ŋ māā lāwu̍ndɛ̄i̍ lā bālāā si̍lɔ̍ le̍ nyɔ̄ɔ̍ŋ kɛ̄sīo̍o̍. Dīo̍o̍ ho̍ō ō wa̍ bānde̍i̍ le̍ nɛ̄īyo̍ be̍le̍-ŋɔ̍ma̍a̍ a̍ lē hīɔ̍ɔ̍lu̍, bu̍o̍o̍ nɛ̄īyo̍ be̍le̍-hi̍ɔ̍ɔ̍lu̍ a̍ lēdīi̍ŋ.

³⁰Tōŋgōla̍ŋ lā wa̍ dīo̍o̍ ho̍ō lā bālāā, ō kɛ᷅ kɛ᷅ bānde̍i̍ nɛ̄īyo̍ be̍le̍-hi̍ɔ̍ɔ̍lu̍ a̍ lē yāa̍, bu̍o̍o̍ nɛ̄īyo̍ lē ŋɔ̄ma̍a̍.

³¹Tōŋgo̍ wa̍ o̍ dīo̍o̍ ho̍ō wo̍, kūmbū la̍u̍ wa̍ o̍ bɛ̍ɛ̍ wo̍, ndu̍ o̍o̍ mu̍li̍ hɔ̄lla̍ ni̍. O̍ dīo̍o̍ ho̍ō hōlnɔ᷄ŋndo̍ lēni᷄ŋ ve̍llāa̍ vēllē, wāūwa̍ŋ mā wa̍ mā tūūlīāā lo̍ŋ. Chɔ̍ŋ lɛ᷅ŋ le̍ hēlɔ̄ɔ̍ o̍ dīo̍o̍ ho̍ō, bi᷅ŋnda̍ŋ lā wa̍ lā ŋɔ̄ma̍a̍.

³²O̍ ko̍ŋ kɔ̍ɔ̍lī, mi̍ pōo̍ ho̍ō kūā a̍ ya̍ o̍ la̍u̍ wa̍ lēni᷄ŋ, bā pāa̍le̍ŋ lē chāŋndo̍ wo̍. Mbo̍ tūū dīo̍ wa̍ lo̍ŋ, ndu̍yɛ̍ nyɛ̄ pīlɛ̍ o̍ wa̍ a̍ lā pīlɛ̍ la̍ŋ ni̍.

³³Ndu̍yɛ̍, lu̍mūi̍la̍ wānāā mɛ̄ŋgɛ̄lāa̍ wa̍ o̍ dīo̍o̍ ho̍ō kpēŋgo᷄ŋ nda̍ŋ ni̍, lūŋgbu̍ŋ ndɔ̄ɔ̍ŋ ni̍, tōŋgo̍ wa̍ lo̍ŋ ndo̍ ni̍, nyɛ̄ pīlɛ̍ kpe̍ la̍ wa̍ a̍ la᷅ŋ o̍ dīōla̍ŋ lā pīlɛ̍ la̍ŋ ni̍. Ndu̍yɛ̍ dīō kpākīo̍o̍ ho̍ō bɛ̍ɛ̍, a̍ lūŋgbu̍ŋ ndɔ̄ɔ̍ŋ kpo̍u̍, ndu̍yɛ̍ a̍ tōŋgo̍ ndɔ̄ɔ̍, la̍a̍ nɔ̍ fo̍ndāŋnda̍ŋ māā lāwu̍ndɛ̄i̍ le̍ nyɔ̄ɔ̍ŋ kɛ̄sīo̍o̍, mɛ̄ɛ̍ la̍ wa̍ o̍ dīōla̍ŋ lā pīlɛ̍la̍ŋ yɛ̍. Dīo̍o̍ ho̍ō bɛ̍ɛ̍, ō wa̍ bānde̍i̍ nɛ̄īyo̍ be̍le̍-ŋɔ̍ma̍a̍ a̍ lē hīɔ̍ɔ̍lu̍, bu̍o̍o̍ nɛ̄īyo̍ be̍le̍-hi̍ɔ̍ɔ̍lu̍ a̍ lē dīi̍ŋ.

³⁴Ndu̍yɛ̍ dīo̍o̍ ho̍ō bɛ̍ɛ̍ tōŋgo̍ ndɔ̄ɔ̍, kūmbū la̍u̍ wā o̍ bɛ̍ɛ̄ wo̍ ndu̍ o̍o̍ mu̍li̍ hɔ̄lla̍ ni̍. O̍ ko̍ŋ kɔ̍ɔ̍lī, o̍ dīo̍o̍ ho̍ō hōlnɔ᷄ŋndo̍ le̍ni᷄ŋ ve̍llāa̍ vēllē, wāūwa̍ŋ mā wa̍ mā tūūlīāā lo̍ŋ. Chɔ̍ŋ lɛ᷅ŋ le̍ hēlɔ̄ɔ̍ o̍ dīo̍o̍ ho̍ō, bi᷅ŋnda̍ŋ lā wa̍ lo̍ŋ la̍ ŋɔ̍ma̍a̍.

³⁵O̍ ko̍ŋ kɔ̍ɔ̍lī, mi̍ pōo̍ ho̍ō kūā a̍ ya̍ o̍ dīō kpāki̍ wa̍ bā lūāŋndo̍ wo̍. Mbo̍ tūū vɛ̄lɛ̄ dīo̍o̍ ho̍ō, ndu̍yɛ̍ ndu̍ bɛ̍ɛ̍ nyɛ̄ pīlɛ̍ o̍ wa̍ a̍ lā pīlɛ̍ la̍ŋ ni̍.

³⁶Lu̍mūi̍la̍ wānāā mɛ̄ŋgɛ̄lāā la̍ wa̍ o̍ dīo̍o̍ ho̍ō vēllāa̍ vēllē la̍ŋ ni̍, lūŋgbu̍ŋ ndɔ̄ɔ̍ŋ ni̍, tōŋgo̍ wa̍ o̍ dīō wo̍ ni̍, nyɛ̄ pīlɛ̍ kpe̍ la̍ wa̍ a̍ lā pīlɛ̍ la̍ŋ ni̍. Ndu̍yɛ̍, ndu̍ bɛ̍ɛ̍ o̍ lūŋgbu̍ŋ ndɔ̄ɔ̍ kpo̍u̍, ndu̍ o̍o̍ nɔ̍ fo̍ndāŋnda̍ŋ lā bālāā māā lāwu̍ndɛ̄i̍ le̍ nyɔ̄ɔ̍ŋ kɛ̄sīo̍o̍. Dīo̍o̍ ho̍ō bɛ̍ɛ̍ ō wa̍ bānde̍i̍ nɛ̄īyo̍ be̍le̍-ŋɔ̍ma̍a̍ a̍ lē hīɔ̍ɔ̍lu̍, bu̍o̍o̍ nɛ̄īyo̍ be̍le̍-hi̍ɔ̍ɔ̍lu̍ a̍ lē dīi̍ŋ.

³⁷Ndu̍yɛ̍ tōŋgo̍ dīo̍o̍ ho̍ō bɛ̍ɛ̍, kūmbū la̍u̍ wā o̍ bɛ̍ɛ̄ wo̍ ndu̍ o̍o̍ mu̍li̍ hɔ̄lla̍ ni̍. O̍ ko̍ŋ kɔ̍ɔ̍lī, o̍ dīo̍o̍ ho̍ō hōlnɔ᷄ŋndo̍ lēni᷄ŋ ve̍llāa̍ vēllē, wāūwa̍ŋ mā wa̍ mā tūūlīāā lo̍ŋ. Ndu̍yɛ̍ chɔ̍ŋ lɛ᷅ŋ le̍ hēlɔ̄ɔ̍ o̍ dīo̍o̍ ho̍ō, bi᷅ŋnda̍ŋ lā wa̍ lā ŋɔ̍ma̍a̍.

³⁸O̍ ko̍ŋ kɔ̍ɔ̍lī, dīō kpāki̍ wa̍ bā lūāŋndo̍ wo̍, lu̍mūi̍ che᷅le̍ŋ wa̍ o̍ dīō ko̍ŋ. Tōŋgo̍ wa̍ o̍ dīo̍o̍ ho̍ō sōndōo̍ wo̍, lēni᷄ŋ dīō lu̍mūi̍yo̍ ho̍ō ō wa̍ ni̍. Ndu̍yɛ̍ o̍ lu̍mūi̍yo̍ ho̍ō ni᷄ŋ, nda̍ a̍a̍ pu̍lū chɔ̍lūāā nda̍ a̍a̍ ku̍ā le̍ sa̍lālā lūāmāāla̍ŋ sōlīo̍o̍ wa̍ ni̍.

³⁹O̍ ko̍ŋ kɔ̍ɔ̍lī, ti̍mbīi̍la̍ŋ lā wa̍ tōŋgōo̍ ho̍ō ni᷄ŋ la̍ hi̍ɔ̍ɔ̍lu̍, ba̍ā lā tīɔ̍ɔ̍ŋ, ba̍ā lā tīɔ̍ɔ̍ŋ. Sa̍lālā lūāmāāla̍ŋ ni̍, a̍ sa̍lālā nda̍ so̍lī le̍ yɔ̄ŋndā wɔ̄ɔ̍ŋnda̍ŋ fāŋāa̍ la̍ŋ, a̍ sa̍lālā nda̍ sōlī tē wāŋndo̍ tɛ̄ɛ̄mbu̍u̍ īsɔ̄ɔ̍ pɛ̍ la̍ŋ, chɔ̄lūāā nda̍ a̍a̍ so̍lī ha̍ā sa̍lāla̍ŋ nda̍ ki̍nɛ̍i̍ ya̍, o̍ ti̍mbīi̍la̍ la̍ŋ chōo̍ nda̍ a̍a̍ di̍ū nda̍ ni̍.

⁴⁰O̍ ko̍ŋ kɔ̍ɔ̍lī, ti̍bīi̍la̍ŋ lā wa̍ vɛ̄lɛ̄ o̍ bɛ̍ɛ̄ lā hi̍ɔ̍ɔ̍lu̍, lā tīɔ̍ɔ̍ŋ lā wa̍ o̍ tōŋgōo̍ bāa̍ pīlɔ̍ɔ̍, mi̍ lā tīɔ̍ɔ̍ŋ lā wa̍ bāa̍ pīlɔ̍ɔ̍.

⁴¹Mɛ̄ɛ̍ fa̍ū fa̍ū, ti̍bīi̍la̍ŋ lā wa̍ lā ŋɔ̄ma̍a̍, lā hīɔ̍ɔ̍lu̍ to̍ŋgōo̍ ni᷄ŋ, lā hīɔ̍ɔ̍lu̍ o̍ bɛ̍ɛ̄. Chɔ̄lūāā nda̍ a̍a̍ ku̍ā le̍ sa̍lāla̍ŋ sōlīo̍o̍ wa̍ ki̍nɛ̍i̍, o̍ ti̍bīi̍la̍ŋ nda᷅ŋ chōo̍ nda̍ a̍a̍ di̍ū nda̍ ni̍.

⁴²O̍ ko̍ŋ kɔ̍ɔ̍lī, ti̍bīi̍la̍ŋ lā wa̍ vɛ̄lɛ̄ lā hīɔ̍ɔ̍lu̍, lā tōōsīāā a̍ pōūtā nda̍ bɛ̄ɛ̄ndi̍a̍a̍ la̍ŋ, le̍ sa̍lālā lūāmāāla̍ŋ sōlīo̍o̍ lēchōo̍. Ti̍bīi̍la̍ŋ nda᷅ŋ, ō kɛ᷅ kɛ᷅ ō wa̍ hēlɔ̄ɔ̍ le̍ nɛ̄īyo̍ lē pīlɛ̍, a̍ i̍ŋchi̍sīi̍la̍ŋ lā ŋɔ̄ma̍a̍, bu̍o̍o̍ lēchōo̍, a̍ bānde̍i̍, nɛ̄īyo̍ lēdīi̍ŋ a̍ i̍ŋchi̍sīi̍la̍ŋ lā ŋɔ᷄mpu᷅m. Nyɛ̄m pīāāndūŋ nda̍ a̍a̍ di̍ū chɔ̍lūāā lāsa̍lāa̍ wo̍ŋ, o̍ ti̍bīi̍la̍ŋ nda᷅ŋ chōo̍ nda̍ a̍a̍ kɛ̍sī mu̍ŋ ni̍.

⁴³Ndu̍yɛ̍ do̍lu̍ŋndo̍ŋ ŋ̄ wa̍ ŋ̄ bāāyīāā o̍ ti̍bīi̍la̍ŋ nda᷅ŋ bālɔ̄ɔ̍ chɛ̍ chɛ̍. Do̍lu̍ŋndo̍ŋ mu᷅ŋ, ī kɛ᷅ kɛ᷅, ī wa̍ bānde̍i̍ le̍ i̍ŋchi̍sīi̍la̍ŋ lā yāa̍. Vīsīŋ nda̍ a̍a̍ so̍lī sa̍lāla̍ŋ ndo̍ŋ, o̍ ti̍bīi̍la̍ŋ nda᷅ŋ chōo̍ nda̍ a̍a̍ kɛ̍sī mu̍ŋ ni̍.

⁴⁴O̍ ko̍ŋ kɔ̍ɔ̍lī, mi̍ pōo̍ ho̍ō lūɛ̄ī a̍ ya̍ o̍ la̍u̍ wa̍ lēni᷄ŋ ndo̍. La̍ūwo̍ ho̍ō, lu̍mūi̍la̍ŋ lā wa̍ lo̍ŋ la̍ŋ tīɔ̍ɔ̍ŋ, ō pīlɛ̍ wa̍ o̍ dīō kpāki̍ wa̍ mālūāŋ ndo̍ īkɛ̄i̍, mbo̍ mūlī hɔ̄lla̍ kūmbū dīō kpāki̍ wa̍ bā tōūwo̍ wo̍, mi̍ ho̍ō wā o̍ dīō kpāki̍ wa̍ bā tōūwo̍ wo̍ i̍kɛ̍i̍, mbo̍ mūlī hɔ̄lla̍ kūmbū dīō kpāki̍ wa̍ bā lūāŋndo̍ wo̍.

⁴⁵Mi̍ pōo̍ ho̍ō dīmūl la̍ āā, “Lu̍mūi̍ cho̍ ho̍ō mbo̍ mūlī hɔ̄lla̍ kūmbū dīō kpāki̍ cho̍ bā tōūwo̍ wo̍, wānāā sōlīāā lāsa̍lāa̍ to̍sā wa̍llo̍ o̍ chi̍ɛ̍i̍ Mɛ̄lɛ̄ka̍a̍ ni᷄ŋ nda̍, nda̍ nɔ̍ ko̍ŋ ni̍.

⁴⁶Lu̍mūi̍ mūlī hɔ̄lla̍ kūmbū dīō kpāki̍ cho̍ bā lūāŋndo̍ wo̍, wānāā sōlīāā lāsa̍lāa̍ to̍sā wa̍llo̍ o̍ ma̍āŋndo̍ chōo̍ wa̍, nda̍ nɔ̍ ko̍ŋ ni̍. Ndu̍yɛ̍ wānāā sōlīāā lāsa̍lāa̍ ha̍ā ki̍nɛ̍i̍, o̍ pūlāle̍ Sa̍dɔ̍kīle̍ŋ chōo̍ nda̍ fūla̍ ni̍. O̍ yu̍ŋgu̍ Li̍va̍ī yo̍ chōo̍ ki̍nɛ̍i̍, nda̍ ko̍ni̍ nɔ̍ ni̍ mā kūɛ̄ Mɛ̄lɛ̄ka̍ Ya̍a̍wɛ̄ɛ̍ lāchī, mā sāāŋgi̍a̍l ndu̍.”

⁴⁷O̍ ko̍ŋ kɔ̍ɔ̍lī, mi̍ pōo̍ ho̍ō tūū vɛ̄lɛ̄ la̍u̍ wa̍ lēni᷄ŋ ndo̍. La̍ūwo̍ ho̍ō ō wa̍ bānde̍i̍ le̍ nɛ̄īyo̍ kɛ̄mɛ̄ a̍ be̍le̍-ŋɔ̍mpu᷅m a̍ lē ŋɔ̄ma̍a̍ (168), ndu̍yɛ̍ bu̍o̍o̍ bɛ̍ɛ̍ le̍nde̍ ko̍ni̍. Ndu̍yɛ̍ ma̍āŋndo̍ wa̍ o̍ chīɛ̍i̍ Mɛ̄lɛ̄ka̍a̍ dīō.

⁴⁸Mi̍ pōo̍ ho̍ō chūā ya̍ mbo̍ lūɛ̄ī a̍ ya̍ o̍ tōŋgo̍ wa̍ o̍ chīɛ̍i̍ Mɛ̄lɛ̄ka̍a̍ dīō wo̍. Ndu̍yɛ̍, mbo̍ tūū dīo̍o̍ ho̍ō, ō wa᷄ bānde̍i̍ le̍ nɛ̄īyo̍ lē ŋɔ̄ma̍hīɔ̍ɔ̍lu̍, bu̍o̍o̍ nɛ̄īyo̍ bi̍dīi̍ŋ a̍ lē hīɔ̍ɔ̍lu̍. Lūŋgbu̍ŋ ndɔ̄ɔ̍ŋ vēllāa̍ vēllē, ŋ̄ wa̍ chēlu̍llo̍ le̍ nɛ̄īyo̍ lē ŋūɛ̍ɛ̍nu̍.

⁴⁹Tōŋgo̍ wa̍ o̍ dīō kpākīo̍o̍ ho̍ō wo̍, ō wa̍ bu̍o̍o̍ le̍ nɛ̄īyo̍ be̍le̍-ya̍a̍ a̍ lē hīɔ̍ɔ̍lu̍, bānde̍i̍ nɛ̄īyo̍ bi̍dīi̍ŋ. Chɔ̍ŋ lɛ᷅ŋ le̍ hēlɔ̄ɔ̍ o̍ tōŋgōo̍ ho̍ō, bi᷅ŋnda̍ŋ lā wa̍ tɔ̍. Ndu̍yɛ̍, sūŋgbu̍a̍ŋ mā wa̍ o̍ dīō mā mi̍ɔ̍ɔ̍ŋ, le᷅ŋ lē wa̍ ba̍ā, mi̍ le᷅ŋ lē wā ba̍ā.