Read Southern Kisi Īsi̍kīāā 41 Bible Online

Īsi̍kīāā 41 - Southern Kisi bible

Īsi̍kīāā 41

¹O̍ ko̍ŋ kɔ̍ɔ̍lī, mi̍ pōo̍ ho̍ō chūā ya̍ mbo̍ lūɛ̄ī a̍ ya̍ o̍ chīɛ̍i̍ Mɛ̄lɛ̄ka̍a̍ ho̍ō ni᷄ŋ, mbo̍ kūā a̍ ya̍ o̍ lu̍mūi̍ wa̍ tɛ̄ɛ̄ŋ ndo̍, o̍ wa̍ fo̍ndāŋ kāsīo̍o̍ wo̍. Mbo̍ tūū fo̍ndā kēīyāa̍ wa̍ le̍ lūɛ̄īyɔ̄ɔ̍ o̍ lu̍mūi̍yo̍ ho̍ō ni᷄ŋ ndo̍. Ō wa̍ bānde̍i̍ le̍ nɛ̄īyo̍ tɔ̍,

²bu̍o̍o̍ nɛ̄īyo̍ tɔ̍ a̍ lē ŋɔ̄ma̍a̍. Lūŋgbu̍ŋ wa̍ o̍ fo̍ndā kēīyāa̍ ho̍ō vēllāa̍ vēllē wo̍ŋ, ŋ̄ wa̍ chēlu̍llo̍ le̍ nɛ̄īyo̍ lē ŋɔ̄ma̍a̍. O̍ ko̍ŋ kɔ̍ɔ̍lī, mi̍ pōo̍ ho̍ō tūū lu̍mūi̍yo̍ ho̍ō mɛ̄ɛ̍ o̍ wa̍ lēni᷄ŋ yɛ̍. Ō wa̍ bānde̍i̍ le̍ nɛ̄īyo̍ be̍le̍-ŋɔ̍mpu᷅m a̍ lē ŋɔ̄ma̍a̍, bu̍o̍o̍ nɛ̄īyo̍ be̍le̍ ya̍a̍ a̍ lē hīɔ̍ɔ̍lu̍.

³O̍ ko̍ŋ kɔ̍ɔ̍lī, mi̍ pōo̍ ho̍ō lūɛ̄ī o̍ lu̍mūi̍ wa̍ o̍ lu̍mūi̍yo̍ ho̍ō lēkɔ̍ɔ̍lī wo̍. Ndu̍yɛ̍ mbo̍ tūū vɛ̄lɛ̄ fo̍ndā kēīyāa̍ wa̍ le̍ lūɛ̄īyɔ̄ɔ̍ o̍ lu̍mūi̍ ko̍ŋ ni᷄ŋ ndo̍. Ō wa̍ nɛ̄īyo̍ lēyāa̍, bu̍o̍o̍ nɛ̄īyo̍ tɔ̍. Lūŋgbu̍ŋ wa̍ o̍ fo̍ndā kēīyāa̍ ho̍ō vēllāa̍ vēllē wo̍ŋ, ŋ̄ wa̍ chēlu̍llo̍ le̍ nɛ̄īyo̍ tɔ̍ a̍ lēdīi̍ŋ.

⁴O̍ ko̍ŋ kɔ̍ɔ̍lī, mbo̍ tūū lu̍mūi̍yo̍ ho̍ō mɛ̄ɛ̍ o̍ wa̍ lēni᷄ŋ yɛ̍. Lu̍mūi̍yo̍ ho̍ō, ō wa̍ bānde̍i̍ lēni᷄ŋ le̍ nɛ̄īyo̍ be̍le̍-ya̍a̍ a̍ lē hīɔ̍ɔ̍lu̍, ndu̍yɛ̍ bu̍o̍o̍ bɛ̍ɛ̍ le̍nde̍ ko̍ni̍. Lu̍mūi̍yo̍ ho̍ō, o̍ lu̍mūi̍ wa̍ tɛ̄ɛ̄ŋ ndo̍ kɔ̄ɔ̄lī o̍ wa̍ ni̍. Mi̍ pōo̍ ho̍ō dīmūl la̍ āā, “Lu̍mūi̍yo̍ ho̍ō, ndu̍ cho̍ fo̍nda̍ kāsi̍ hi̍o̍ū kpo̍u̍ wo̍ ni̍.”

⁵O̍ ko̍ŋ kɔ̍ɔ̍lī, mi̍ pōo̍ ho̍ō tūū chīyīī chīɛ̍i̍ Mɛ̄lɛ̄ka̍a̍ mɛ̄ɛ̍ i̍ wa̍ chēlu̍llo̍ yɛ̍. Chīyīī chīɛ̄īyo̍ ho̍ō, ī wa̍ chēlu̍llo̍ le̍ nɛ̄īyo̍ tɔ̍. Ndu̍yɛ̍ chīɛ̍i̍ Mɛ̄lɛ̄ka̍a̍ ho̍ō tāŋgūl chēle̍ŋ wa̍ ndu̍ ō hōlāā chɛ̍ chɛ̍, a̍ lu̍mūi̍la̍ŋ. Lu̍mūi̍ o̍ lu̍mūi̍, ō wa̍ bu̍o̍o̍ nɛ̄īyo̍ lē ŋɔ᷄mmɛ̍ū.

⁶Tāŋgūllo̍ ho̍ō ō wa̍ hēlɔ̄ɔ̍ lē yāa̍, lēbɛ̄ŋgu̍, a̍ tɛ̄ɛ̄ŋ a̍ lēchōo̍. Ndu̍yɛ̍ hēlɔ̄ɔ̄ o̍ hēlɔ̄ɔ̄ ndu̍ o̍o̍ nɔ̍ lu̍mūi̍la̍ŋ be̍le̍-ya̍a̍. Ma̍ hōl nyɛ̄lā chēle̍ŋ o̍ chīɛ̍i̍ Mɛ̄lɛ̄ka̍a̍ ho̍ō bālɔ̄ɔ̍ chɛ̍ chɛ̍, māā lābi᷅ŋ, le̍ tāŋgu̍l wa̍ ho̍ō chīɛ̍i̍ Mɛ̄lɛ̄ka̍a̍ ō hōlāā wo̍ sīmīo̍o̍ lēchōo̍, le̍ māā tāŋgūl kōŋ ndu̍ o̍o̍ lu̍e̍ī o̍ chīyīī chīɛ̍i̍ Mɛ̄lɛ̄ka̍a̍ ni᷄ŋ te̍.

⁷Tāŋgūllo̍ ho̍ō lu̍mūi̍la̍ ndɔ̄la̍ŋ ma̍ bālū la̍ŋ sīmīo̍o̍ o̍ chīɛ̍i̍ Mɛ̄lɛ̄ka̍a̍ bālɔ̄ɔ̍ chɛ̍ chɛ̍. Ndu̍yɛ̍ lu̍mūi̍la̍ wa̍ o̍ hēlɔ̄ɔ̄ yāa̍ ndɔ̄ɔ̍ la̍ŋ, la̍ŋ la̍a̍ hi̍o̍ū kūmbi᷄ŋ a̍ la̍ wa̍ o̍ hēlɔ̄ɔ̄ tāso̍o̍, a̍ o̍ hēlɔ̄ɔ̄ dīi̍ŋ ndɔ̄ɔ̍ la̍ŋ. Ndu̍yɛ̍ ma̍ tāŋgūl nāa̍ ke̍yāa̍, chɔ̍ŋ o̍ hēlɔ̄ɔ̄ tāso̍o̍, mbo̍ kūā o̍ hēlɔ̄ɔ̄ dīi̍ŋ ndɔ̄ɔ̍, mbo̍ fūūlūū o̍ hēlɔ̄ɔ̄ yāa̍ ndɔ̄ɔ̍.

⁸Tāŋgūllo̍ ho̍ō, chīyīī ndūɛ̍i̍, ī wa̍ chēlu̍llo̍ le̍ nɛ̄īyo̍ lē ŋɔ̄ma̍a̍. Ndu̍yɛ̍ tāŋgūllo̍ ho̍ō, ndu̍ o̍o̍ nɔ̍ dīōla̍ŋ lā tīɔ̍ɔ̍ŋ, ho̍ō wa̍ o̍ chīɛ̍i̍ Mɛ̄lɛ̄ka̍a̍ bā lūāŋndo̍, le̍ lūɛ̄īyɔ̄ɔ̍ o̍ lu̍mūi̍la̍ wa̍ bā lūāŋndo̍ la̍ŋ, mi̍ ho̍ō wā bā tōūwo̍, le̍ lūɛ̄īyɔ̄ɔ̍ o̍ lu̍mūi̍la̍ wa̍ bā tōūwo̍ la̍ŋ. Ndu̍yɛ̍ o̍ būūbu̍u̍ve̍ chōo̍ chīɛ̍i̍ Mɛ̄lɛ̄ka̍a̍ ho̍ō wo̍ ō wa̍ ō tāŋgūlāā ni̍. Chɔ̍ŋ o̍ chīɛ̄īyo̍, kɔ̍ nāa̍ būūbu̍u̍ve̍ he̍ī ī mɛ̄ɛ̄lu̍ wa̍, ō wa̍ bu̍o̍o̍ nɛ̄īyo̍ lē ŋɔ̄ma̍a̍. Ndu̍yɛ̍, chɔ̍ŋ vɛ̍lɛ̄ lɛ̄ŋ, he̍l nāa̍ i̍ mɛ̍ɛ̍lu̍ wa̍, ō wa̍ hēlɔ̄ɔ̍ le̍ nɛ̄īyo̍ tɔ̍. Tāŋgu᷄l wa̍ ho̍ō chīɛ̍i̍ Mɛ̄lɛ̄ka̍a̍ ō bālāā wo̍, chīyīī ndūɛ̍i̍ o̍ si̍m chōo̍ ve̍, hēlɔ̄ɔ̍ mi̍ ī kɛ̄ɛ̄yā a̍ chīyīī chīɛ̍i̍ Mɛ̄lɛ̄ka̍a̍ ō si᷄m chōo̍ ve̍ fi̍ki̍ki̍. Chɔ̍ŋ o̍ būūbu̍i̍ chīɛ̍i̍ Mɛ̄lɛ̄ka̍a̍ ō wa̍ īsīsi̍ cho̍o̍ ve̍, kɔ̍ o̍ lu̍mūi̍la̍ wānāā sōlīāā lāsa̍lāa̍ nda̍ a̍a̍ to̍sā wa̍llo̍ ni᷄ŋ nda̍ŋ, la̍ūwo̍ wa̍ tɛ̄ɛ̄ŋ. La̍ūwo̍ ho̍ō ō wa̍ bu̍o̍o̍ le̍(...)

⁹

¹⁰

¹¹

¹²O̍ ko̍ŋ kɔ̍ɔ̍lī, mi̍ cha᷅ vɛ̄lɛ̄ tāŋgūl chēle̍ŋ īsīsi̍ o̍ chīɛ̍i̍ Mɛ̄lɛ̄ka̍a̍ bā pāa̍le̍ŋ lē dēllo̍. Tāŋgūllo̍ ho̍ō o̍ la̍u̍ chīɛ̍i̍ Mɛ̄lɛ̄ka̍a̍ ho̍ō mɛ̄ɛ̄lu̍la̍ŋ pɔ̍ o̍ wa̍ īsīsi̍ ni̍. Ndu̍yɛ̍ ō wa̍ bānde̍i̍ le̍ nɛ̄īyo̍ kɛ̄mɛ̄ a̍ be̍le̍-ŋu̍ɛ̍ɛ̍nu̍ (150), bu̍o̍o̍ nɛ̄īyo̍ kɛ̄mɛ̄ a̍ tɔ̍ a̍ le̍ ŋɔ᷄mpu᷅m (116). Chīyīī tāŋgūllo̍ ho̍ō, ī wa̍ chēlu̍llo̍ le̍ nɛ̄īyo̍ lē ŋɔ̄ma̍hīɔ̍ɔ̍lu̍.

¹³O̍ ko̍ŋ kɔ̍ɔ̍lī, mi̍ pōo̍ ho̍ō tūū chīɛ̍i̍ Mɛ̄lɛ̄ka̍a̍ ho̍ō mɛ̄ɛ̍ o̍ wa̍ bānde̍i̍ yɛ̍. Chīɛ̄īyo̍ ho̍ō ō wa̍ bānde̍i̍ le̍ nɛ̄īyo̍ kɛ̄mɛ̄ a̍ be̍le̍-ŋɔ̍mpu᷅m a̍ lē ŋɔ̄ma̍a̍ (168). Ndu̍yɛ̍, la̍ū ndɔ̄ɔ̍ a̍ mākɔ̄ɔ̄, chɔ̍ŋ kpe̍ŋgēi̍ pīlɛ̍i̍ kɔ̍ o̍ tāŋgu᷄l wa̍ bā pāa̍le̍ŋ lē dēllo̍ wo̍, ō wa̍ bānde̍i̍ le̍ nɛ̄īyo̍ kɛ̄mɛ̄ a̍ be̍le̍-ŋɔ̍mpu᷅m a̍ lē ŋɔ̄ma̍a̍ (168).

¹⁴Ndu̍yɛ̍, la̍u̍ wa̍ o̍ chīɛ̍i̍ Mɛ̄lɛ̄ka̍a̍ ho̍ō sōndōo̍ wo̍, chɔ̍ŋ kpe̍ŋgēi̍ pīlɛ̍i̍, kɔ̍ kpēŋgēi̍ pīlɛ̍i̍, ō wa̍ bu̍o̍o̍ nɛ̄īyo̍ kɛ̄mɛ̄ a̍ be̍le̍-ŋɔ̍mpu᷅m a̍ lē ŋɔ̄ma̍a̍ (168).

¹⁵Ndu̍yɛ̍ tāŋgu᷄l wa̍ ho̍ō bā pāa̍le̍ŋ lē dēllo̍ wo̍, mi̍ pōo̍ ho̍ō tūū ndu̍, lātūlu̍ a̍ tōŋgōla̍ ndɔ̄la̍ pɔ̍mbɔ̄la̍ wa̍ lēchōo̍ o̍ kpēŋgo᷄ŋ vēllāa̍ vēllē la̍ŋ, ō wa̍ nɛ̄īyo̍ kɛ̄mɛ̄ a̍ be̍le̍-ŋɔ̍mpu᷅m a̍ lē ŋɔ̄ma̍a̍ (168). Tōŋgo̍ wāna̍ a̍a̍ ke̍ī le̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍ ni̍, fo̍nda̍ kāsīo̍o̍ ni̍, a̍ fo̍ndā kāsi̍ hi̍o̍ū kpo̍u̍ wo̍,

¹⁶lā wa̍ lā hōlāā lēni᷄ŋ kpo̍u̍ a̍ pɛ̄ŋgɔ̍ŋ. Chɔ̍ŋ lɛ᷅ŋ mbo̍ hēl lūāŋ di̍, a̍ o̍ fo̍ndāŋndā nda̍ tōōsi̍a̍a̍ māā lāwu̍ndɛ̄i̍ le̍ nyɔ̄ɔ̍ŋ kɛ̄sīo̍o̍ la̍ŋ chōo̍ kpo̍u̍, pɛ̄ŋgɔ̍ŋ wa̍ ŋ̄ hōlīāā. Fo̍ndāŋndā nda̍ tōōsi̍a̍a̍ la̍ŋ māā lāwu̍ndɛ̄i̍ le̍ nyɔ̄ɔ̍ŋ kɛ̄sīo̍o̍ la̍ŋ, lā pūm ma̍ kīndā la̍ŋ.

¹⁷Dīo̍ wa̍ le̍ lūɛ̄īyɔ̄ɔ̍ o̍ fo̍ndā kāsīo̍o̍ wo̍, o̍ dīō kōŋ chōo̍, a̍ o̍ lu̍mūi̍ kāsīo̍o̍ ni᷄ŋ, a̍ o̍ bɛ̍ɛ̄ kpo̍u̍, pɛ̄ŋgɔ̍ŋ wa̍ ŋ̄ hōlīāā. Ndu̍yɛ̍ chīɛ̄īyo̍ ho̍ō lēni᷄ŋ kpo̍u̍, a̍ o̍ dīōla̍ŋ chōo̍,

¹⁸ma̍ tūūlīāā nyāā lākūmba᷅ŋnda̍, a̍ wāūwa̍ŋ. Ndu̍yɛ̍ nyāā lākūmba᷅ŋnda̍ ha̍ā, ō kɛ᷅ kɛ᷅ ndu̍ o̍o̍ nɔ̍ hɔ̄lla̍ sālā tīɔ̍ɔ̍ŋ, kūmbūe̍i̍ pīlɛ̍i̍ māā hɔ̄lāā wāna̍ chi̍e̍e̍, kūmbūe̍i̍ pīlɛ̍i̍ ki̍nɛ̍i̍ māā hɔ̄lāā kpɔ̍kūŋ fɔ̍ŋndɔ̍. Tē ā tūūla̍ pɛ̍ wa̍ūwo̍ ba̍ā, ā tūūla̍ wāūwo̍ ba̍ā, nyāa̍ ha̍ā ō pīlɛ̍ wa̍ tɛ̄ɛ̄ŋ, ā mūli̍ ndu̍ hɔ̄lāa̍ cho̍ māā hɔ̄lāā wāna̍ chi̍e̍e̍ya̍, kūmbū wāūwo̍ ō pīlɛ̍, ā mūli̍ ndu̍ vɛ̄lɛ̄ hɔ̄lāa̍ cho̍ māā hɔ̄lāā kpɔ̍kūŋ fɔ̍ŋndɔ̍ wa̍, kūmbū wāūwo̍ ō pīlɔ̍ɔ̍. Ndu̍yɛ̍, nu̍a̍ā nyɛ̄la̍ŋ nda᷅ŋ lā wa̍ lā tūūlīāā o̍ chīɛ̍i̍ Mɛ̄lɛ̄ka̍a̍ ho̍ō ni᷄ŋ kpo̍u̍ ni̍,

¹⁹

²⁰chɔ̍ŋ lɛ̄ŋ, mbo̍ hēl a̍ o̍ dīōla̍ŋ chōo̍ kpo̍u̍.

²¹Ndu̍yɛ̍, dīōla̍ wa̍ le̍ lūɛ̄īyɔ̄ɔ̍ o̍ fo̍nda̍ kāsīo̍o̍, a̍ o̍ fo̍ndā kāsi̍ hi̍o̍ū kpo̍u̍ wo̍ la̍ŋ, da̍kpe̍ŋnda̍ wa̍ o̍ dīōlā lāŋ nda̍ŋ, pɛ̄ŋgɔ̍ŋ ndɔ̄ɔ̍ŋ, bāndi̍i̍ ndūɛ̍i̍ ni̍, bu̍o̍o̍ ni̍, nyɛ̄ pīlɛ̍ kpe̍ ŋ̄ wa̍ ni̍. O̍ ko̍ŋ kɔ̍ɔ̍lī, fo̍nda̍ kāsi̍ hi̍o̍ū kpo̍u̍ wo̍, dīo̍ wa̍ le̍ lūɛ̄īyɔ̄ɔ̍ o̍ fo̍ndā kōŋ ndo̍, nyɔ̄ɔ̍ wa̍ ō tāŋgūlāā o̍ dīō kōŋ sōndōo̍ māā

²²ma̍āŋ īyɔ̄m. Ndu̍yɛ̍ nyɔ̄ɔ̍ ho̍ō, ō wa̍ hēlɔ̄ɔ̍ lē nɛ̄īyo̍ lē ŋūɛ̍ɛ̍nu̍, bu̍o̍o̍ nɛ̄īyo̍ lē hīɔ̍ɔ̍lu̍. Nyɔ̄ɔ̍ ho̍ō lēbɛ̄ŋgu̍ ni̍, o̍ kpēŋgo᷄ŋ ni̍, lēchōo̍ ni̍, a̍ yɔ̄mnde̍ o̍ wa̍ ō tāŋgūlāā kpo̍u̍ ni̍. Mi̍ pōo̍ ho̍ō dīmūl la̍ āā, “Ti̍bīi̍ cho̍ Mɛ̄lɛ̄ka̍ Ya̍a̍wɛ̄ɛ̍ lāchī wo̍, ndu̍ cho̍ ho̍ō ni̍.”

²³Fo̍ndā kāsīo̍o̍ ni̍, a̍ fo̍ndāŋ kāsi̍ hi̍o̍u̍ kpo̍u̍ wo̍, ō kɛ᷅ kɛ᷅ ndu̍ o̍o̍ nɔ̍ dīōlā kūmbī lēdīi̍ŋ nda̍ŋ lā tīɔ̍ɔ̍ŋ, a̍ ku̍mbi̍ ō tāso̍o̍ pɛ̍, a̍ kɔ̍ ku̍mbī vɛ̄lɛ̄ ho̍ō lēkɔ̍ɔ̍lī.

²⁴

²⁵Dīo̍ wa̍ le̍ lūɛ̄īyɔ̄ɔ̍ o̍ fo̍ndā kāsi̍ hi̍o̍ū kpo̍u̍ wo̍ wo̍, lo̍ŋ bɛ̍ɛ̍ ma̍ tūūlīāā nyāā lākūmba᷅ŋnda̍ ā wāūwa̍ŋ, mɛ̄ɛ̍ la̍ wa̍ lā tūūlīāā o̍ lūŋgbu̍ŋ chīɛ̄īyo̍ yɛ̍. Ndu̍yɛ̍ tōŋgo̍ wāna̍ a̍a̍ ke̍ī ni̍ŋ le̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍a̍ wo̍, dīo̍ wa̍ le̍ lūɛ̄īyɔ̄ɔ̍ o̍ tōŋgō ko̍ŋ ni᷄ŋ ndo̍, fɛ̄ɛ̄fɔ̄ɔ̍ wa̍ ō nānāā o̍ dīō kōŋ sōndōo̍, ō bɛ̄ɛ̄ndīāā a̍ yɔ̄mnde̍.

²⁶Ndu̍yɛ̍ tōŋgōo̍ ho̍ō, ndu̍ o̍o̍ nɔ̍ fo̍ndāŋnda̍ŋ lā bālāā sɔ̍ māā lāwu̍ndɛ̄i̍ le̍ nyɔ̄ɔ̍ŋ kɛ̄sīo̍o̍, a̍ wāūwa̍ŋ mā tūūlīāā o̍ kpēŋgo᷄ŋ vēllāa̍ vēllē.