Read Southern Kisi Īsi̍kīāā 42 Bible Online

Īsi̍kīāā 42 - Southern Kisi bible

Īsi̍kīāā 42

¹O̍ ko̍ŋ kɔ̍ɔ̍lī, mi̍ pōo̍ ho̍ō fūlā a̍ ya̍ o̍ la̍ū wa̍ o̍ bɛ̍ɛ̄ wo̍, mbo̍ kūā a̍ ya̍ o̍ tāŋgu᷄l wa̍ bā lūāŋndo̍ wo̍. Tāŋgūllo̍ ho̍ō, ō ve̍ le̍vi̍l a̍ tāŋgu᷄l wa̍ bā pāa̍le̍ŋ lē dēllo̍ le̍.

²Tāŋgūllo̍ ho̍ō, ō wa̍ bāndēi̍ nɛ̄īyo̍ kɛ̄mɛ̄ a̍ be̍le̍-ŋɔ̍mpu᷅m a̍ lē ŋɔ̄ma̍a̍ (168), bu̍o̍o̍ nɛ̄īyo̍ be̍le̍-ŋɔ̍ma̍a̍ a̍ lē hīɔ̍ɔ̍lu̍.

³O̍ tāŋgūllo̍ ho̍ō kpēŋgēi̍ pīlɛ̍i̍, fo̍ndāŋ fɛ̄kɛ̄īyo̍ ō wa̍ lo̍ŋ, ō bɛ̄ɛ̄ndīāā nyɛ̄ kɛ̄ndɛ̄ kɛ̍ndɛ̄, bu̍o̍o̍ nɛ̄īyo̍ be̍le̍-ya̍a̍ a̍ lē hīɔ̍ɔ̍lu̍, o̍ ko̍ŋ kɔ̍ɔ̍lī, kpēŋgēi̍ pīlɛ̍i̍, mi̍ nāa̍ ke̍i̍yāa̍ ā wā lo̍ŋ ā bɛ̄ɛ̄ndīāā a̍ pōūta̍ŋ. Tāŋgūllo̍ ho̍ō ndu̍ o̍o̍ nɔ̍ hēlɔ̄ɔ̍ lē yāa̍, ndu̍yɛ̍ ndu̍ o̍o̍ nɔ̍ tōŋgōla̍ pɔ̍mbɔ̄la̍ŋ lēchōo̍.

⁴Nāa̍ ke̍i̍yāa̍ wa̍ o̍ tāŋgūllo̍ ho̍ō lāchī le̍ lūɛ̄īyɔ̄ɔ̍, bu̍o̍o̍ nɛ̄īyo̍ tɔ̍ a̍ lē ŋɔ᷄mpu᷅m, bānde̍i̍ nɛ̄īyo̍ kɛ̄mɛ̄ a̍ be̍le̍-ŋɔ̍mpu᷅m a̍ lē ŋɔ̄ma̍a̍ (168). Ndu̍yɛ̍ tāŋgūllo̍ ho̍ō, bā lūāŋndo̍ dīōla̍ŋ lā wa̍ ni̍ le̍ lūɛ̄īyɔ̄ɔ̍ lēni᷄ŋ.

⁵Kɛ̍ lu̍mūi̍la̍ wa̍ o̍ hēlɔ̄ɔ̄ yāa̍ ndɔ̍ɔ̍ la̍ŋ, la̍ŋ la̍a̍ hi̍o̍ū dɔ̄ɔ̄na᷄ŋ, a̍ la᷅ŋ o̍ hēlɔ̄ɔ̄lā tīɔ̍ɔ̍ŋ nda̍ŋ lēbɛ̄ŋgu̍, kāni̍ fo̍ndōle̍, la̍ŋ nda̍ŋ, mi̍ tōŋgōla̍ pɔ̍mbɔ̄la̍ wa̍ lo̍ŋ nda̍ŋ lā chūā ti᷄ŋ fo̍ndāa̍ cha̍la̍ŋ.

⁶Tāŋgūllo̍ ho̍ō, ō wa̍ hēlɔ̄ɔ̍ lēyāa̍, ndu̍yɛ̍ ndu̍ o̍o̍ nɔ̍ lābi᷅ŋ le̍ ndu̍ sīmī lēchōo̍ māā tāŋgūllo̍ o̍ la̍u̍ wa̍ o̍ bɛ̍ɛ̄ wo̍ le̍. Mɛ̄ɛ̍ nyɛ̄ ko̍ŋ to̍sa̍ ni̍, ma̍ mīŋgī lu̍mūi̍la̍ wa̍ lēchōo̍ la̍ŋ a̍ mākɔ̄ɔ̄ ti᷄ŋ, mbo̍ hīāū lu̍mūi̍la̍ wa̍ o̍ hēlɔ̄ɔ̄lā tīɔ̍ɔ̍ŋnda̍ŋ lēbɛ̄ŋgu̍ la̍ŋ.

⁷O̍ ko̍ŋ kɔ̍ɔ̍lī, kpākīo̍o̍ wa̍ tāŋgūllo̍ ho̍ō tɛ̄ɛ̄ŋ a̍ la̍ū wa̍ o̍ bɛ̍ɛ̄ wo̍. Kpākīo̍o̍ ho̍ō ō wa̍ bānde̍i̍ nɛ̄īyo̍ be̍le̍-ŋɔ̍ma̍a̍ a̍ lē hīɔ̍ɔ̍lu̍.

⁸Ndu̍yɛ̍ tāŋgūllo̍ ho̍ō lu̍mūi̍la̍ ndɔ̄la̍ wa̍ kūmbū la̍u̍ wa̍ o̍ bɛ̍ɛ̄ wo̍ la̍ŋ, lā wa̍ bānde̍i̍ nɛ̄īyo̍ be̍le̍-ŋɔ̍ma̍a̍ a̍ lē hīɔ̍ɔ̍lu̍. La̍ wa̍ o̍ chīɛ̍i̍ Mɛ̄lɛ̄ka̍a̍ lāchī sa̍ta̍ta̍ la̍ŋ, lā wa̍ bānde̍i̍ nɛ̄īyo̍ kɛ̄mɛ̄ a̍ be̍le̍-ŋɔ̍mmɛ̍ū a̍ lē pīlɛ̍.

⁹O̍ tāŋgūllo̍ ho̍ō lēbɛ̄ŋgo̍o̍, nāa̍ lu̍ɛ̍i̍yāa̍ wa̍ bā pāa̍le̍ŋ lē chāŋndo̍, tē wānā a̍a̍ chɛ̍ŋ o̍ la̍u̍ wa̍ o̍ bɛ̍ɛ̄ wo̍ pɛ̍.

¹⁰Lo̍ŋ kpāki̍ wa̍ o̍ bɛ̍ɛ̄ wo̍ ō kāndu̍ŋ ni̍. O̍ ko̍ŋ kɔ̍ɔ̍lī, kūmbū bā tōūwo̍, o̍ la̍ūwo̍ tɛ̄ɛ̄ŋ a̍ tāŋgūllo̍ ho̍ō, tāŋgūl pīlɛ̍ wāā le̍nde̍ kpe̍ o̍ wa̍ vɛ̄lɛ̄ lo̍ŋ.

¹¹Nāa̍ ke̍yāa̍ wa̍ o̍ tāŋgūllo̍ ho̍ō dīō. Ndu̍yɛ̍ tāŋgūllo̍ ho̍ō a̍ tāŋgu᷄l wa̍ bā lūāŋndo̍ wo̍, nyɛ̄ pīlɛ̍ kpe̍ la̍ wa̍ ni̍, bānde̍i̍ ni̍, bu̍o̍o̍ ni̍. Ndu̍yɛ̍ fo̍ndāŋndā wāna̍ a̍a̍ ke̍ī la̍ŋ bɛ̍ɛ̍, a̍ dīōla̍ŋ, bɛ̄ɛ̄ndīāā pīlɔ̍ɔ̍ kpe̍ nda̍ a̍a̍ bɛ̍ɛ̍ndi̍a̍a̍ la̍ŋ ni̍.

¹²Ndu̍yɛ̍ tāŋgūllo̍ ho̍ō ndu̍ o̍o̍ nɔ̍ dīo̍o̍ bā tōūwo̍. O̍ ko̍ŋ kɔ̍ɔ̍lī, nāa̍ ke̍yāa̍ wa̍ o̍ kpākīla̍ ti̍ɔ̍ɔ̍ŋnda̍ŋ tɛ̄ɛ̄ŋ. Ndu̍yɛ̍ vɛ̍lɛ̄, fo̍ndā fɛ̄kɛ̄īyo̍ ō wa̍, o̍ fo̍ndāŋ nāa̍ ke̍yāa̍ ā kāndu̍ŋ nda̍, le̍ lūɛ̄īyɔ̄ɔ̍ o̍ tāŋgūllo̍ ho̍ō ni᷄ŋ. Ndu̍yɛ̍ fo̍ndāŋ fɛ̄kɛ̄īyo̍ ho̍ō, bā pāa̍le̍ŋ lē chāŋndo̍ ndu̍ o̍o̍ mu̍li̍ hɔ̄lla̍ ni̍.

¹³Mi̍ pōo̍ ho̍ō dīmūl la̍ āā, “Tāŋgu᷄l cho̍ ho̍ō bā lūāŋndo̍ wo̍, a̍ tāŋgu᷄l cho̍ bā tōūwo̍ wo̍, fo̍ndālā kāsī la̍ŋ la̍ cho̍ ni̍. Wānāā sōlīāā lāsa̍lāa̍ to̍sā wa̍llo̍ Mɛ̄lɛ̄ka̍ Ya̍a̍wɛ̄ɛ̄ lāchī wa̍, o̍ tāŋgūlta̍ŋ nda᷅ŋ ni᷄ŋ nda̍ nɔ̍ ni̍ mā dē sa̍lālā kāsīla̍ hi̍o̍ū kpo̍u̍ la̍ŋ. Ndu̍yɛ̍ lo̍ŋ nda̍ nɔ̄ ni̍ mā kɛ̄si̍ sa̍lālā tɔ̄lɔ̄ɔ̄ lāku̍lta̍ŋ, a̍ sa̍lāla̍ cho̍ le̍ yɔ̄ŋ wɔ̄ɔ̍ŋndo̍ fāŋāa̍ la̍ŋ, a̍ lā nda̍ sōlī tē wāŋndo̍ tōsa̍ sūɛ̍i̍ wɔ̍ɔ̍ŋnde̍ pɛ̍ la̍ŋ.

¹⁴Tē wānāā sōlīāā lāsa̍lāa̍ ā chīi̍ sa̍lāla̍ŋ sōlī o̍ fo̍ndāŋ kāsīo̍o̍ o̍ chīɛ̍i̍ Mɛ̄lɛ̄ka̍a̍ ni᷄ŋ pɛ̍, mā wa̍ fūlāa̍, o̍ tāŋgūlta̍ŋ nda᷅ŋ ni᷄ŋ nda̍ nɔ̄ ni̍ mā kēi̍ sīīŋgi᷄ŋ, lɔ̍ɔ̍pa̍ mā kūɛ̄ o̍ la̍u̍ cho̍ o̍ bɛ̍ɛ̄ wo̍, nāa̍ wāŋnda̍ ā chūūŋgi̍āŋ nda̍. Nyɛ̄lā sōlīāā lāsa̍la̍ wa᷅ nda̍ lēkɔ̄ɔ̍ la̍ŋ, lo̍ŋ ndā nɔ̍ ni̍ mā kɛ̄si̍ la̍ŋ, kāni̍ fo̍ndōle̍ nyɛ̄lā kāsīla̍ŋ la̍ cho̍ ni̍.”

¹⁵Mɛ̄ɛ̍ pōo̍ ho̍ō chīi̍ tāŋgūlta̍ wa̍ chīɛ̍i̍ Mɛ̄lɛ̄ka̍a̍ lā bālāā la̍ŋ tūu̍, mbo̍ chūā ya̍ mbo̍ kēī a̍ ya̍ o̍ dīō kpāki̍ wa̍ bā pāa̍le̍ŋ lē chāŋndo̍ wo̍, mbo̍ fūlā a̍ ya̍ le̍ mbo̍ tūu̍ kpāki̍ wa̍ chīɛ̍i̍ Mɛ̄lɛ̄ka̍a̍ ō bālāā wo̍.

¹⁶O̍ ko̍ŋ kɔ̍ɔ̍lī, mbo̍ tūū kpākīo̍o̍ ho̍ō bā pāa̍le̍ŋ lē chāŋndo̍ a̍ sīōndōōlē tūwāāle̍ wa̍ ndu̍ o̍ bā le̍ŋ. Kpākīo̍o̍ ho̍ō chɔ̍ŋ kpe̍ŋgēi̍ pīlɛ̍i̍, kɔ̍ kpe̍ŋgēi̍ pīlɛ̍i̍ ō wa̍ bānde̍i̍ le̍ nɛ̄īyo̍ kɛ̄mɔ̄ɔ̍ lē ŋɔ̄ma̍a̍ a̍ be̍le̍-hi̍ɔ̍ɔ̍lu̍ (840).

¹⁷O̍ ko̍ŋ kɔ̍ɔ̍lī, mbo̍ tūū vɛ̄lɛ̄ bā lūāŋndo̍, lo̍ŋ bɛ̍ɛ̍ chɔ̍ŋ kpe̍ŋgēi̍ pīlɛ̍i̍ kɔ̍ kpe̍ŋgēi̍ pīlɛ̍i̍, ō wa̍ bānde̍i̍ le̍ nɛ̄īyo̍ kɛ̄mɔ̄ɔ̍ lē ŋɔ̄ma̍a̍ a̍ be̍le̍-hi̍ɔ̍ɔ̍lu̍ (840).

¹⁸Mbo̍ mūli᷄ŋ vɛ̍lɛ̄ mbo̍ tūū bā tōūwo̍, lo̍ŋ bɛ̍ɛ̍ le̍nde̍ ko̍ni̍.

¹⁹Mbo̍ tūū vɛ̄lɛ̄ bā pāa̍le̍ŋ lē dēllo̍, lo̍ŋ bɛ̍ɛ̍ le̍nde̍ ko̍ni̍.

²⁰Kpākīo̍o̍ ho̍ō kpēŋgu᷄ŋ ndɔ̄ɔ̄ŋ hi̍ɔ̍ɔ̍lo̍ŋ fa̍ū, nyɛ̄ pīlɛ̍ kpe̍ ŋ̍ wa̍ bānde̍i̍ ni̍, nɛ̄īyo̍ kɛ̄mɔ̄ɔ̍ lē ŋɔ̄ma̍a̍ a̍ be̍le̍-hi̍ɔ̍ɔ̍lu̍ (840). Kpākīo̍o̍ ho̍ō wa̍ māwāā le̍ fo̍ndā kāsi̍ wa̍ le̍ Mɛ̄lɛ̄ka̍ sōōlūūwo̍ wo̍ pīɔ̄ūwo̍ tɛ̄ɛ̄ŋ a̍ fo̍ndā yɔ̄ŋāa̍ wa̍ o̍ bɛ̍ɛ̄ wo̍.