Read Southern Kisi Īsi̍kīāā 44 Bible Online

Īsi̍kīāā 44 - Southern Kisi bible

Īsi̍kīāā 44

¹O̍ ko̍ŋ kɔ̍ɔ̍lī, mi̍ pōo̍ ho̍ō mīīŋgū a̍ ya̍ o̍ dīō kpāki̍ chīɛ̍i̍ Mɛ̄lɛ̄ka̍a̍, o̍ wa̍ o̍ bɛ̍ɛ̄, bā pāa̍le̍ŋ lē chāŋndo̍ wo̍. Kɛ̍ dīo̍o̍ ho̍ō ō wa̍ ō kīndāa̍.

²Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl la̍ āā, “Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, a̍ dīo̍o̍ ho̍ō ya̍ I̍ ke̍i̍ ni̍, mi̍ lu̍ɛ̍ī o̍ chīɛ̄ī nūu̍ ni᷄ŋ. Le̍la̍ŋ dīo̍o̍ ho̍ō ō nɔ̄ mbō wa̍ ō kīndāā le̍ fɛ̍ɛ̍ŋ a̍ fɛ̍ɛ̍ŋ. Wānā o̍ wānā nɔ̍ mbō kūmbi̍ ndu̍, mbō kēi̍ lo̍ŋ te̍.

³Wāna̍ wa᷅ ni̍ŋ ma̍sāa̍ I̍sɔ̄lūɛ̄īyo̍, ndu̍ ko̍ni̍ nɔ̍ ni̍ mbō cha᷄l lo̍ŋ, tē ō lūɛ̄ī le̍ nyɛ̄ dīāā sa̍lāa̍ dīo̍o̍ ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l pɛ̍. Kɛ̍ ndu̍ bɛ̍ɛ̍, tē ō wa̍ lūɛ̄īyɔ̄ɔ̍ pɛ̍, ō nɔ̄ mbō kēēku̍ a̍ tōŋgo̍ cho̍ o̍ la̍ūwo̍ o̍ bɛ̍ɛ̄ wo̍, ndu̍yɛ̍ tē ō wa̍ vɛ̄lɛ̄ fūlāa̍ pɛ̍, lo̍ŋ ko̍ni̍ o̍ nɔ̍ ni̍ mbō kēēku̍.”

⁴O̍ ko̍ŋ kɔ̍ɔ̍lī, mi̍ pōo̍ ho̍ō, kēēkū a̍ ya̍ a̍ dīō kpāki̍ wa̍ bā lūāŋndo̍ wo̍, mbo̍ kūā a̍ ya̍ o̍ chīɛ̍i̍ Mɛ̄lɛ̄ka̍a̍ dīō. Mɛ̄ɛ̍ ya̍ I̍ to̍fa̍ chīɛ̍i̍ ni̍ŋ, mi̍ cha᷅ pa̍ŋgēle̍ bɛ̄ndu̍ chɔ᷅m na̍ŋɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍, ō tīūwāā chīɛ̄ī ni̍ŋ kpo̍u̍. O̍ ko̍ŋ, mi̍ hi̍nī lɛ̄ŋ sa̍kpō, mi̍ fu̍u̍lūū hɔ̄lla̍ lɛ̄ŋ mɛ̍ɛ̄.

⁵Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Wāna̍ chi̍o̍o̍ Īsi̍kīāā, ya̍ŋ ni᷅la̍ŋ nyɛ̄ kɛ̄ndɛ̄ kɛ̍ndɛ̄, o̍ nyɛ̄ ya̍ I̍ cho̍ nu̍m dīmūl lo̍, ndu̍yɛ̍ mā to̍fa̍ nyɛ̄ kɛ̄ndɛ̄ kɛ̍ndɛ̄, mā chē nyɛ̄ ya̍ I̍ cho̍ nu̍m chɔ̄m ndo̍. Ya̍ŋ ni᷅la̍ŋ nyɛ̄ kɛ̄ndɛ̄ kɛ̍ndɛ̄, mā tūēī sāwāla̍ cho̍ a̍ chīɛ̄ī nī kāsīo̍o̍ o̍kɔ̄ɔ̄ la̍ŋ, ndu̍yɛ̍ mā si̍na̍ wānāa̍ nɔ̍ mā lūɛ̄ī o̍ chīɛ̄īyo̍ ho̍ō ni᷄ŋ nda̍, a̍ wānāa̍ nɔ̍ mā lūɛ̄ī le̍ wa̍.

⁶“Di̍mu̍l wa᷅ŋnda̍ I̍sɔ̄lūɛ̄ī, wānāa̍ si̍mu̍l la̍ ha̍ā wa̍, māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmi̍ māā, wāŋnda̍ I̍sɔ̄lūɛ̄ī, sɔ̄ɔ̍ŋ wɔ̄ɔ̍ŋ nya̍ wa̍ tōsāa̍ wo̍ŋ ki̍nɛ̍i̍, mi̍ ya̍ Mɛ̍lɛ̄ka̍ tūl mu̍ŋ yɛ̄le̍ŋ ndo̍ŋ, ŋ̄ nɔ̄ mī ŋ̄ mɛ̄ɛ̄lu̍.

⁷Lā tōsa̍ mi̍ chīɛ̄ī ni̍ kāsīo̍o̍ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l, a̍ sɔ̄ɔ̍ŋ nya̍ chō tōsāa̍ wo̍ŋ. Wānāā lēkāa̍wa̍, a̍ kɛ̍ɛ̍ ya̍ ma̍ sōlī ya̍ dīōm nda̍, tē lā wa̍ chūɛ̄īmā chɔ̄lōo̍, a̍ kōo̍wa̍ŋ sa̍lāla̍ŋ sōlīo̍o̍ pɛ̍, nda̍ kpo̍u̍ mī lā chɛ̄l nda̍ mā lūɛ̄ī o̍ chīɛ̄ī nī kāsīo̍o̍ ni᷄ŋ. Ndu̍yɛ̍ ō fūla̍ o̍ sɔ̄ɔ̍ŋ nya̍ wa̍ mu᷅ŋ tōsāa̍, ŋ̄ ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ kɔ̄ɔ̄lī, kpe̍ma̍ wa̍ na̍a̍ tɛ̄ɛ̄ŋ na̍a̍ nya̍ā wo̍ bɛ̍ɛ̍, mi̍ lā tɛ̄ɛ̄mbūū vɛ̄lɛ̄ kpe̍ma̍ ko̍ŋ.

⁸Nyɛ̄m ni̍ŋ kāsīo̍ŋ ki̍nɛ̍i̍, nya̍ nya̍ a̍a̍ nɔ̍ ni̍ mī nya̍ a̍a̍ wa̍ mu̍ŋ lāchī, kɛ̍ mi̍ lā sīmī wānāā lēkāa̍wa̍ mu̍ŋ kpo̍u̍ la̍chi̍, o̍ chīɛ̄ī ni̍ kāsīo̍o̍ ni᷄ŋ.

⁹“Kɛ̍ ndu̍yɛ̍ ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyɛ̄ ya̍ I̍ di̍mi̍ wo̍ cho̍ ho̍ō ni̍. Wānāā lēkāa̍wa̍a̍ ka̍ŋ ki̍nɛ̍i̍, a̍ kɛ̍ɛ̍ ya̍ ka̍ŋ ma̍ sōlī ya̍ dīōm ma̍ wā nya̍ I̍sɔ̄lūɛ̍i̍ya̍ tɛ̄ɛ̄ŋ nda̍, lā nɔ̍ mī lā chɛ᷄l mā lūɛ̄ī o̍ chīɛ̄ī nī kāsīo̍o̍ ni᷄ŋ te̍.”

¹⁰Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Li̍va̍īya̍ ki̍nɛ̍i̍, a̍ to᷅l I̍sɔ̄lūɛ̍i̍ya̍a̍ tu̍a̍a̍ kɔ̄ɔ̄lī, ma̍ kɛ̄ɛ̄ ya̍, ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā ndā wa̍, I̍ cho̍ nda̍ nyɛ̄ pālāā bɛ̄ndōo̍ tūsī chōo̍.

¹¹Li̍va̍īya̍ ha̍ā, kpe̍ku̍ o̍ kpe̍ku̍ nda̍ nɔ̄ le̍ sōlīo̍o̍ o̍ chīɛ̄ī ni̍ kāsīo̍o̍, lātūlu̍ a̍ dīōlā kpāki̍ ba̍lu̍ chīɛ̄ī nūu̍ la̍ŋ māndāa̍, I̍ cho̍ chɛ̄lɔ̄ɔ̄ mā hīōū lāchī a̍ la̍ŋ tōsāa̍. Ndu̍yɛ̍, chɔ̄lūāā wāŋnda̍ hūŋ le̍ sa̍lālā lūāmāā la̍ŋ, a̍ sa̍lāla̍ŋ lā pīlɛ̍ la̍ŋ sōlīo̍o̍ wa̍ bɛ̍ɛ̍, nda̍ wa᷅ ni̍ŋ chɔ̍lūāā kāŋ dīūwo̍ ni̍, ndu̍yɛ̍ mā mālā wa᷅ŋnda̍, mā sāāŋgīāl nda̍.

¹²Kɛ̍ le̍ kɛ̄ɛ̄ nda̍ kɛ̄ɛ̍ ya̍ ma̍ sīm I̍sɔ̄lūɛ̍i̍ya̍ lāchī, le̍ nyɛ̄m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ ndā, ma̍ tōsā mi̍ I̍sɔ̄lūɛ̍i̍ya̍ ā sīmnu᷄ŋ wa̍nāā yɔ̄ŋ wɔ̄ɔ̍ŋ ya̍ Mɛ̍lɛ̄ka̍ o̍ hɔ̄l lo̍, ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ me̍na̍ŋ po̍, mɛ̄ɛ̍ mī tu̍si̍ nda̍ nyɛ̄ pālāa̍ chōo̍.

¹³Wāŋnda̍ ha̍ā ā nɔ̍ lɛ̍ mā hīŋ ya̍ lāchī, le̍ mā sāāŋgi̍a̍l la̍ māā wānāā sōlīāā lāsa̍lā le̍. Ndu̍yɛ̍ nyɛ̄ o̍ nyɛ̍ cho̍ nyɛ̄ kāsī, ā nɔ̍ mā sɔ̄ɔ̄ŋgu̍u̍ lɛ̄ ndu̍ īkɛ̄i̍ le̍, kɛ̄lɛ̄ŋgāā ni᷅ŋ te̍, mā lūɛ̄ī o̍ fo̍ndā kāsi̍ hi̍o̍ū kpo̍u̍ wo̍. Si̍ɔ̍mbu̍la̍ bɛ̍ndūla̍ŋ lā chō nda̍ bīyɔ̄ɔ̄, kāni̍ fo̍ndōle̍, le̍ sɔ̄ɔ̍ŋ wɔ̍ɔ̍ŋ bɛ̄ndūŋ nda̍ tōsa̍ ki̍nɛ̍i̍ yo̍ŋ, ŋ̄ ya̍ Mɛ̍lɛ̄ka̍ tu᷄l yɛ̄le̍ŋ tūl bɛ̄ndōo̍ wo̍ŋ.

¹⁴Wāŋnda̍ ha̍ā kpe̍ku̍la̍ ya̍ I̍ chɛ᷅l ni̍ŋ nda̍ mā wa̍ sōlīo̍o̍ o̍ chīɛ̄ī nī kāsīo̍o̍ la̍ŋ, mɛ̄ɛ̍ le̍ kpe̍ku̍la̍ yɔ̍ŋāālā chēle̍ŋnda̍ŋ.”

¹⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Wānāā sōlīāā lāsa̍lāā ya̍ Mɛ̍lɛ̄ka̍ hɛ̄li̍ le̍ mā wa̍ ya̍ sāāŋgīāllo̍, mā sōlī sa̍lāla̍ŋ o̍ ya̍ Mɛ̍lɛ̄ka̍ lo̍ wa̍, nda̍ cho̍ ku̍nda̍ Li̍va̍īyo̍ ō pīlɔ̍ɔ̍ ni̍, a̍ fu̍la̍ o̍ yu̍ŋgu̍ Sa̍dɔ̍kī wo̍ chōo̍ wa̍. Kāni̍ fo̍ndōle̍, wāŋnda̍ ha̍ā nda̍ ko̍ni̍ hi̍o̍ū lāchī a̍ tīīnda᷄ŋ ndāa̍ dɔ̄wɔ̄ɔ̍ o̍ ya̍ ni̍ŋ ni̍. Bōōndi̍i̍ wāŋnda̍ I̍sɔ̄lūɛ̄ī a̍ kɛ̍ɛ̍ ya̍ ma̍ mūli᷄ŋ nyɛ᷅m chēle̍ŋndo̍ sōōlūūwo̍ māā mɛ̄lɛ̄ka̍ā ndā ve̍, wāŋnda̍ ha̍ā nda̍ ko̍ni̍ lo̍ ya̍ o̍ ībūŋ ni̍, ma̍ wā hīōūwɔ̄ɔ̍ lāchī a̍ ya̍ sāāŋgīāllo̍ o̍ chīɛ̄ī ni̍ kāsīo̍o̍ ni᷄ŋ. Le̍ he̍ī, wāŋnda̍ ha̍ā, nda̍ ko̍ni̍ ya̍ I̍ hɛ̍li̍ ni̍, le̍ mā hīŋ ya̍ lāchī mā sōli̍ chūɛ̄īmā chɔ̄lōo̍, a̍ kōo̍wa̍ŋ sa̍lāla̍ŋ o̍ ya̍ lo̍.

¹⁶Nda̍ ko̍ni̍ nɔ̍ ni̍ mā lūɛ̄ī o̍ chīɛ̄ī ni̍ kāsīo̍o̍ ni᷄ŋ, mā sōli̍ sa̍lāla̍ŋ o̍ ya̍ lo̍. Kpe̍ku̍ o̍ kpe̍ku̍ cho̍ kpe̍ku̍ kāsī o̍ chīɛ̄ī nī kāsīo̍o̍ ni᷄ŋ, nda̍ nɔ̍ ni̍ mā tōsa̍ ndu̍.

¹⁷Ndu̍yɛ̍ tē ā wa̍ lūɛ̄īyɔ̄ɔ̍ o̍ fo̍ndā ni̍ kāsīo̍o̍ pɛ̍, le̍ wa̍li̍ nda̍ nɔ̄ le̍ tōsāa̍ wo̍ tōsāa̍, nyɛ̄la̍ cho̍ lā tōōsīāā a̍ kōlāla̍ kɛ̍ndɛ̄ kɛ̍ndɛ̄la̍ŋ nda̍ŋ, la̍ŋ nda̍ nɔ̄ ni̍ mā wōōnu̍ŋ, ā nɔ̍ mā wōōnu̍ŋ nyɛ᷅ o̍ nyɛ̍ cho̍ ō tōōsīāā a̍ yīīŋīī chɔ̄lōo̍ le̍. La̍ū cho̍ lēni᷄ŋ ndo̍ ni̍, o̍ chīɛ̄ī nī kāsīo̍o̍ ni᷄ŋ ni̍, tē ā wa̍ lūɛ̄īyɔ̄ɔ̍ lo̍ŋ pɛ̍, nyɛ̄la̍ŋ nda᷅ŋ nda̍ nɔ̄ ni̍ mā wōōnu̍ŋ.

¹⁸Mɔ̍si̍lta̍ vi̍lɛ̄īlā nda̍ wōōnūŋ ni̍ŋ nda̍ŋ ni̍, a̍ lɛ̄mbɛ̄lā lēbɛ̄ŋgu̍la̍ nda̍ nɔ̄ mā wōōnu̍ŋ nda̍ŋ, lā nɔ̄ mī lā wa̍ lā tōōsīāā a̍ kōlā kɛ̍ndɛ̄ kɛ̍ndɔ̄ɔ̍. Ā nɔ̍ mā wōōnu̍ŋ nyɛ᷅ o̍ nyɛ̄ to̍sā mā lāli̍ le̍.

¹⁹Ndu̍yɛ̍ tē ā chīi̍ kpe̍ku̍ nda̍ nɔ̄ le̍ sōlīo̍o̍ wo̍ pɛ̍, lɔ̍ɔ̍pa̍ mā ma᷄l chīɛ̄ī ni̍ kāsīo̍o̍ mā fūla̍ o̍ la̍u̍ cho̍ o̍ bɛ̍ɛ̄ wo̍, na̍a̍ wāŋnda̍ chō ā chūūŋgi̍āŋ nda̍, nyɛ̄la̍ cho̍ nda̍ la̍ŋ le̍kɔ̍ɔ̍ la̍ŋ, ā nɔ̄ mā sōli̍ la̍ŋ, mā mɛ̄i̍ la̍ŋ o̍ lu̍mūi̍la̍ kāsī la̍ŋ ni᷄ŋ, mā wōōnu̍ŋ nyɛ᷅lā chēle̍ŋ. Kāni̍ fo̍ndōle̍, nyɛ̄lā kāsī la̍ŋ la̍ cho̍ ni̍. Ā nɔ̍ mā kūɛ̄ a̍ la̍ŋ wa᷅ŋnda̍ tɛ̄ɛ̄ŋ te̍, yɔ̄ŋi̍ wāŋnda̍ pīla̍ŋ nda̍ŋ mā sɔ̄la̍ pīɔ̍mndo̍.

²⁰“Ndu̍yɛ̍ wānāā sōlīāā lāsa̍lāa̍ ha̍ā, ā nɔ̍ mā sēndi̍ yīīŋnde̍ nda̍ o̍ lēbōl te̍, kɛ̍ ndu̍yɛ̍, ā nɔ̍ mā ma᷄l ndi̍ vɛ̄lɛ̄ mī ī bāndu̍ ta̍u̍ ta̍u̍ le̍. Ā nɔ̄ mā wa̍ ndi̍ kīlīo̍o̍ lēchōo̍ nyɛ̍ kɛ̄ndɛ̄ kɛ̍ndɛ̄.

²¹Wānāā sōlīāā lāsa̍lāa̍, tē ā wa̍ kɔ̄la̍ŋ o̍ la̍u̍ cho̍ lēni᷄ŋ ndo̍ pɛ̍, ā nɔ̍ mā ko᷄l mūɛ̄īmā mākīle̍pīi̍ le̍.

²²Wānāā sōlīāā lāsa̍lāa̍ ā nɔ̍ mā chūa̍ wāŋ lāāndūa̍a̍ vi̍i̍ku̍u̍ pīāāndūa̍a̍ wa̍, ɔ̄ɔ̄ wāŋ lāāndūāā pīāāndāā ndāa̍ ā kɛ̄ɛ̍ wa̍ o̍ lānɔ̄ ni̍ŋ te̍. Wāŋ lāāndūāā nda̍ nɔ̄ mā chūa̍ o̍ nɔ̄la̍ŋ ni᷄ŋ nda̍, mɛ̄ɛ̍ wāŋ lāāndūāā I̍sɔ̄lūɛ̍i̍ya̍a̍ si̍nā wɔ̍ sūɛ̍i̍ wānā pɔ̍nɔ̍ le̍ wa̍, a̍ wānāā sōlīāā lāsa̍lāa̍ wu᷅ wa̍, lāāndāā ndāā vi̍i̍ya̍.

²³“Wānāā sōlīāā lāsa̍lāa̍, nda̍ nɔ̍ ni̍ mā pɛ̄ɛ̄ku̍ wānāā nīa̍a̍, mā chɔ̍m nda̍ yɛ̍ yi̍ɔ̍ɔ̍ nyɛ̄m kāsīo̍ŋ tɛ̄ɛ̄ŋ, a̍ nyɛ̄m yɔ̄ŋa᷄ŋ, ndu̍yɛ̍ mā chɔ᷄m nda̍ yɛ̍ yi̍ɔ̍ɔ̍ nyɛ᷄m cho̍ ŋ̄ dīāndāā ya̍ Mɛ̍lɛ̄ka̍ o̍ hɔ̄l lo̍ŋ tɛ̄ɛ̄ŋ, a̍ ŋ̍ cho̍ ŋ̍ di̍a̍ndāā le̍ wo̍ŋ.

²⁴Ndu̍yɛ̍ vɛ̍lɛ̄, wānāā sōlīāā lāsa̍lāa̍, nda̍ nɔ̍ ni̍ mā dīmi̍ wāŋnda̍ sɔ̄ɔ̍ŋ tɛ̄ɛ̄ŋ. Tē sɛ̄ɛ̄ŋgi̍āŋ o̍ sɛ̄ɛ̄ŋgi̍āŋ ō de᷄l wāŋnda̍ tɛ̄ɛ̄ŋ pɛ̍, wāŋnda̍ ha̍ā nda̍ nɔ̍ ni̍ mā dīmi̍ sūɛ̍i̍ ke̍ŋ wānāā kāŋ tɛ̄ɛ̄ŋ, mɛ̄ɛ̍ sāwāla̍ nīla̍ŋ lā dīmi̍ yɛ̍. O̍ ko̍ŋ kɔ̍ɔ̍lī, bɔ̄ŋa᷅ŋndā nīla̍ŋ ki̍nɛ̍i̍, wāŋnda̍ ha̍ā, nda̍ nɔ̍ ni̍ mā si᷄m nda̍ŋ lāchī, mā chē māā sāwāla̍ cho̍ a̍ bɔ̄ŋa᷅ŋnda̍ŋ nda᷅ŋ o̍kɔ̄ɔ̄ la̍ŋ, māā wāŋnda̍ chō la̍ŋ chūa̍a̍. Ndu̍yɛ̍ ā nɔ̄ mā kɛ̄si̍ pāa̍le̍ nīle̍ pɛ̍ŋgīāāle̍ŋ lēbɛ̄ɛ̄.

²⁵“Wānā o̍ wāna̍ cho̍ wānā so̍līāā lāsa̍lāa̍, ō nɔ̍ mbō pīla̍ŋ wa̍nā vi̍lɛ̍i̍yo̍ le̍, yɔ̄ŋi̍ o̍ si̍mnu̍ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Kɛ̍ tē fi̍nyā ndɔ̄, ɔ̄ɔ̄ kāla̍ ndɔ̄, ɔ̄ɔ̄ chūā ndɔ̄ɔ̍, ɔ̄ɔ̄ pɔ̄mbɔ̄ ndɔ̄, ɔ̄ɔ̄ bɛ̄ ndɔ̄, ɔ̄ɔ̄ yēma̍ ndɔ̍ cho̍ o̍ nɔ̄ le̍ wo̍ ō vī pɛ̍, ō pīlāŋ ko̍ŋ, kɛ̍ ndu̍yɛ̍ mbō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l.

²⁶Kɛ̍ tē ō sɔ̄la̍ dīndīo̍o̍ ya̍ Mɛ̍lɛ̄ka̍ o̍ hɔ̄l pɛ̍, ō nɔ̄ mbō chu̍m le̍ pālɛ̍i̍ ī ŋɔ᷄mmɛ̍ū. Tē pālɛ̍i̍ ŋɔ̍mmɛ̍ū kēŋ ī hīōū pɛ̍,

²⁷ō kūɛ̄ o̍ la̍u̍ cho̍ lēni᷄ŋ o̍ chīɛ̄ī ni̍ kāsīo̍o̍ wo̍, ō kɔ̍ so̍lī sa̍lāa̍ o̍ ya̍lo̍ le̍ yɔ̄ŋ ndɔ̄ wɔ̍ɔ̍ŋndo̍ fāŋāa̍, ma̍lāŋ o̍ ka̍ndū vɛ̍lɛ̄ wa̍llo̍ o̍ chīɛ̄ī ni̍ kāsīo̍o̍ ni᷄ŋ. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.

²⁸“Wānāā sōlīāā lāsa̍lāa̍ ha̍ā, ya̍ pi̍la̍ hɛ̍li̍ nda̍ ni̍, mi̍ ke᷅ nda̍ wa̍llo̍ ho̍ō māā nyɛ̄m ndāa̍ŋ ŋ̄kɛ᷅. Wāŋnda̍ ha̍ā, ā nɔ̍ lɛ̍ mā sɔ̄la̍ nyɛ̄ o̍ nyɛ̄ chēle̍ŋ māā nyɛ̄m ŋ̄kɛ᷅ I̍sɔ̄lūɛ̍i̍ya̍a̍ tu̍a̍a̍ tɛ̄ɛ̄ŋ te̍. Ya̍ Mɛ̍lɛ̄ka̍, ya̍ cho̍ nyɛ̄ nda̍a̍ŋ ki̍ɔ̍ɔ̍ŋ ni̍.

²⁹Nyɛ̄ o̍ nyɛ̄ wāŋnda̍ hūŋ nāa̍ ya̍ chu̍a̍ māā lāsa̍lā, sa̍lā tɔ̄lɔ̄ɔ̄ ku̍llo̍ ni̍, a̍ nyɛ̄m nda̍ hūŋ le̍ sa̍lāla̍ŋ sōlīo̍o̍ le̍ yɔ̄ŋ wɔ̄ɔ̍ŋndo̍ fāŋāa̍ wo̍ŋ, a̍ ŋ̄ nda̍ hūŋ tē wāŋndo̍ tɛ̄ɛ̄mbu̍u̍ īsɔ̄ɔ̍ pɛ̍ le̍ sa̍lā kōŋ sōlīo̍o̍ wo̍ŋ, nyɛ̄m mu᷅ŋ ki̍nɛ̍i̍, wānāā sōlīāā lāsa̍lāa̍, nda̍ nɔ᷅ mu̍ŋ ni̍. Ō fūla̍ o̍ ko̍ŋ kɔ̍ɔ̍lī, nyɛ̄ o̍ nyɛ̍ cho̍ ō yɔ̄ŋga᷄ŋ o̍ ya̍lo̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, wānāā sōlīāā lāsa̍lāa̍ ha̍ā nda̍ nɔ̍ mu̍ŋ ni̍.

³⁰O̍ ko̍ŋ kɔ̍ɔ̍lī, tɔ̄lɔ̄ɔ̄lā tāse̍la̍ nya̍ hūŋ o̍ ya̍lo̍ la̍ŋ ki̍nɛ̍i̍, a̍ nyɛ̄m chēle̍ŋ nya̍ hūŋ o̍ ya̍lo̍ māā lākē wo̍ŋ, wānāā sōlīāā lāsa̍lāa̍ ha̍ā, nda̍ nɔ̍ mu̍ŋ kpo̍u̍ ni̍. Ndu̍yɛ̍ ō fūla̍ o̍ ko̍ŋ kɔ̍ɔ̍lī, te̍le̍ŋ o̍ te̍le̍ŋ, tē wānā o̍ wānā a̍ to̍o̍si̍a̍a̍ bēe̍ndīi̍yo̍ pɛ̍, kpūŋgbɛ̄ī tāse̍i̍ ŋ̄ chō kēlēŋā tōōsīāā ve̍, ā nɔ̄ mā ke̍ wānāā sōlīāā lāsa̍lāa̍. Tē lā tōsa̍ ke̍ŋ pɛ̍, le̍ te̍le̍ŋ o̍ te̍le̍ŋ sa̍lāa̍ ya̍ I̍ du̍a̍ū chīɛ̄īlā nyāla̍ŋ ni̍.

³¹“Wānā o̍ wāna̍ cho̍ wānā so̍līāā lāsa̍lāa̍, ō nɔ̍ mbō dē nyɛ̄ o̍ nyɛ̍ vi᷅ o̍ bā chōo̍ wo̍ le̍. Yōū ni̍, vīsī ni̍, ā yɔ᷄ŋ bɛ̍ɛ̍ mbō wa̍ māā vīsīo̍o̍ di̍ī ō pīlɛ̍ ni̍, ō nɔ̍ mbō dē ndu̍ le̍.”