Read Southern Kisi Īsi̍kīāā 45 Bible Online

Īsi̍kīāā 45 - Southern Kisi bible

Īsi̍kīāā 45

¹Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Tē lā hu᷄ŋ wa᷅ lɛ̄ŋndē I̍sɔ̄lūɛ̍i̍le̍ŋ pīɔ̄ūwo̍ a̍ yu̍ŋgu̍la̍ŋ pɛ̍, lā nɔ̄ mī lā hɛ̄li̍ lɛ̄ŋnde̍ŋ, mī le̍ŋ le̍ wa̍ te̍ŋge̍le̍ŋ le̍ ya̍ Mɛ̍lɛ̄ka̍ Ya̍a̍wɛ̄ɛ̄. Lɛ̄ŋndē nya̍ nɔ̄ mī lā hɛ̄li̍ le̍ŋ, lē nɔ̄ mī lē wa̍ bānde̍i̍ mɛ̍ɛ̍līi̍la̍ŋ tɔ̍, bu̍o̍o̍ mɛ̍ɛ̍līi̍la̍ŋ lā ŋɔ̄ma̍a̍. Fo̍ndā nya̍ chō ko̍ŋ hɛ̍lī wo̍, ndu̍ kpo̍u̍ cho̍ wā fo̍ndā kāsīo̍o̍ ni̍.

²Lɛ̄ŋndē nya̍ chō le᷅ŋ hɛ̄lī le̍ŋ, fo̍ndāa̍ nɔ̄ mbō wa̍ lo̍ŋ le̍ chīɛ̄ī ni̍ kāsīo̍o̍ tāŋgūllo̍. Fo̍ndāa̍ ho̍ō, bānde̍i̍ ni̍, bu̍o̍o̍ ni̍, ō nɔ̄ mbo̍ wa̍ nɛ̄īyo̍ kɛ̄mɔ̄ɔ̍ lē ŋɔ̄ma̍a̍ a̍ be̍le̍-hi̍ɔ̍ɔ̍lu̍ (840). Ndu̍yɛ̍ fo̍ndā fɛ̄kɛ̄īyo̍ nɔ̄ mbō wa̍ chīɛ̍i̍ Mɛ̄lɛ̄ka̍a̍ ho̍ō ō bālāā kpɔ̍kɔ̍su̍, bu̍o̍o̍ nɛ̄īyo̍ be̍le̍-ŋɔ̍ma̍a̍ a̍ lē hīɔ̍ɔ̍lu̍.

³Lɛ̄ŋndē nya̍ chō le̍ŋ hɛ̍lī, mi̍ lē wā fo̍ndā kāsīo̍o̍, bānde̍i̍ mɛ̍ɛ̍līi̍la̍ŋ tɔ̍, bu̍o̍o̍ mɛ̍ɛ̍līi̍la̍ŋ lā hīɔ̍ɔ̍lu̍ le̍ŋ, tɛ̄ndāa̍ tɛ̄ɛ̄ŋ ki̍nɛ̍i̍, ndu̍ cho̍ wā le̍ chīɛ̄ī ni̍ kāsīo̍o̍ tāŋgūllo̍ ni̍, o̍ cho̍ fo̍ndā kāsi̍ hi̍o̍ū kpo̍u̍ wo̍ wo̍.

⁴Fo̍ndā ko᷄ŋ cho̍ wā fo̍ndā kāsīo̍o̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍ ni̍. Wānāā sōlīāā lāsa̍lāa̍ to̍sā wa̍llo̍ ya̍ Mɛ̍lɛ̄ka̍ Ya̍a̍wɛ̄ɛ̍ lāchī, o̍ chīɛ̄ī ni̍ kāsīo̍o̍ ni᷄ŋ nda̍, nda̍ nɔ̍ fo̍ndāa̍ ho̍ō ni̍. Lo̍ŋ chīɛ̄īlā ndāla̍ŋ lā nɔ̄ ni̍ mī lā wa̍, ndu̍yɛ̍ mī fo̍ndāa̍ ō wa̍ lo̍ŋ le̍ chīɛ̄ī ni̍ kāsīo̍o̍ tāŋgūllo̍.

⁵O̍ ko̍ŋ kɔ̍ɔ̍lī, lɛ̄ŋndē nya̍ chō le̍ŋ hɛ̍lī le̍ŋ, kūmbūe̍i̍ pīlɛ̍i̍ ki̍nɛ̍i̍, ndu̍ cho̍ wā le̍ Li̍va̍īya̍, a̍ to̍sā wa̍llo̍ o̍ chīɛ̄ī kāsīo̍o̍ wa̍ ni̍. Li̍va̍īya̍ ki̍nɛ̍i̍, o̍ fo̍ndāa̍ ho̍ō, chi̍e̍e̍ŋ ndāa̍ŋ ŋ̄ nɔ̄ ni̍, mī ŋ̄ wa̍.

⁶“O̍ ko̍ŋ kɔ̍ɔ̍lī, lā nɔ̄ vɛ̄lɛ̄ mī lā mɛ̄i̍ lɛ̄ŋnde̍ŋ, o̍ lɛ̄ŋndē kāsī le̍ŋ hōlnɔ᷄ŋndo̍ chɛ̍ chɛ̍, bānde̍i̍ mɛ̍ɛ̍līi̍la̍ŋ tɔ̍, bu̍o̍o̍ mɛ̍ɛ̍līi̍la̍ŋ lā tīɔ̍ɔ̍ŋ, le̍ chi̍o̍o̍ tāŋgūllo̍ lo̍ŋ. I̍sɔ̄lūɛ̍i̍ya̍ kpo̍u̍, chi̍e̍e̍ ndā le̍bo᷅llo̍ cho̍ wā ko̍ŋ ni̍.”

⁷Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Lā nɔ̄ vɛ̄lɛ̄ mī lā hɛ̄li̍ lɛ̄ŋnde̍ŋ te̍ŋge̍le̍ŋ, mī le̍ŋ le̍ wa̍ le̍ wāna̍ cho̍ lɛ̄ŋndē I̍sɔ̄lūɛ̍i̍le̍ŋ kpo̍u̍ chi᷅la̍ŋ ndo̍. Pɛ̄ŋgu̍la̍ lɛ̄ŋndē ndɔ̄la̍ŋ nu̍a̍ā la̍ wa᷅ ni̍ŋ ni̍. Chɔ̍ŋ o̍ pɛ̄ŋgu̍la̍ lɛ̄ŋndē kāsīle̍ŋ bā pāa̍le̍ŋ lē dēllo̍, mbō kūɛ̄ a̍ Pēē Mɛ̄ŋmā Īhɛ᷄llo̍ Mɛ̄dītālu̍e̍e̍nīāā, mbō chɛ᷄ŋ vɛ̍lɛ̄ o̍ pɛ̄ŋgu̍la̍ lɛ̄ŋndē lēŋ bā pāa̍le̍ŋ lē chāŋndo̍, mbō hēēlu̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍. Lɛ̄ŋndē nya̍ chō le᷅ŋ mɛ̄ī le̍ŋ, lē nɔ̄ mī lē sīīma᷅ŋ ba̍nde̍i̍ a̍ būŋgɛ̄ī yu̍ŋgo̍o̍ ō pīlɛ̍ I̍sɔ̄lūɛ̄ī o̍ sɔ̍lā ni̍ŋ nde̍.

⁸Wāna̍ wa᷅ lɛ᷅ŋndē I̍sɔ̄lūɛ̍i̍le̍ŋ kpo̍u̍ chi᷅la̍ŋndo̍, lɛ̄ŋndē o̍ nɔ̍ mbo̍ sɔ̄la̍ le̍ŋ, le̍ŋ le̍ cho̍ le̍ŋ ni̍. Ndu̍ bɛ̍ɛ̍ ō nɔ̄ mbō sɔ̄la̍ lɛ̄ŋnde̍ŋ le̍ ndɔ̍le̍ŋ mɛ̄ɛ̍ yu̍ŋgu̍la̍ŋ I̍sɔ̄lūɛ̄ī la̍ sɔ̍la̍ kpɛ̍ kpɛ̍ yɛ̍. Ko̍ŋ to̍sā ni̍, ō tu̍sī I̍sɔ̄lūɛ̍i̍ya̍a̍ tu̍a̍a̍ nyɛ̄ pālāa̍ chōo̍, mbō pūu̍ nda̍ lɛ̄ŋīī ndɛ̄i̍ o̍ bā le̍.”

⁹Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Nya̍ wānāā bɛ̄ndūa̍a̍ I̍sɔ̄lūɛ̄ī, yɔ̄ŋ wɔ̄ɔ̍ŋ nya̍ tōsa̍ ni᷅ŋ ndo̍, ō chō ni᷅ŋ tūu̍le̍ŋ. Lā pɛ̄ŋgi̍ ni᷅ŋ wāŋnda̍ ka̍fāla̍ŋ tōsāllo̍, mī lā tūsī nda̍ nyɛ̄ pālāa̍ chōo̍. Lā kāndu̍ nyɛ̍ cho̍ sa̍kpō, ndu̍yɛ̍ mbo̍ wa̍ sa̍na̍a̍ ya̍ o̍ hɔ̄l lo̍ tōsāa̍. Lā pɛ̄ŋgi̍ ni᷅ŋ wānāā nīa̍a̍ tōūwɔ̄ɔ̍ mī lā fāŋā nda̍ o̍ cha᷄lta̍ ndāla̍ŋ. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.

¹⁰“Lā wa̍ ni᷅ŋ wāŋnda̍ wɔ̄ŋgūla̍ŋ bīīlūllo̍ o̍ nɛ̄ī sa̍kpōo̍ chōo̍. Sēke̍lēi̍la̍ nyāla̍ŋ lā nɔ̄ mī lā wa̍ sa̍kpō. Nyɛ̄lā nya̍ tūūlūl wa᷅ŋnda̍ wɔ̄ŋgūlā ku̍lta̍ŋ, a̍ nyɛ̄ o̍ nyɛ̍ cho̍ māā māmɛ̄ŋ nda̍ŋ, lā nɔ̄ mī lā wa̍ sa̍kpō, ndu̍yɛ̍ mī lā wa̍ nyɛ̄ pīlɛ̍ kpe̍, mɛ̄ɛ̍ i̍ cho̍ ī chɛ̄la᷅ŋ le̍ wɔ̄ŋgūla̍ŋ tūūwo̍ yɛ̍. Sēke̍lēi̍la̍ nya̍ lēndūl wa᷅ŋnda̍ wɔ̄ŋgūla̍ŋ nda̍ŋ bɛ̍ɛ̍, lā nɔ̄ mī lā wa̍ nyɛ̄ pīlɛ̍ kpe̍, mɛ̄ɛ̍ i̍ cho̍ ī chɛ̄la᷅ŋ le̍ wɔ̄ŋgūla̍ŋ lāndɔ̄ɔ̍ yɛ̍.

¹¹

¹²

¹³Ndu̍yɛ̍ nyɛ̄m nya̍ nɔ̄ mī lā hīŋ o̍ ya̍ Mɛ̍lɛ̄ka̍ lo̍ māā lākē wo̍ŋ, mu̍ŋ cho̍ mu᷅ŋ ni̍. Tē lā sɔ̄la̍ pɛ̍ ba̍a̍līi̍yo̍ŋ, ɔ̄ɔ̄ wi̍tīi̍yo̍ŋ bɔ̄lɔ̄ɔ̍ cha̍, lā nɔ̄ mī lā yɔ̄ŋgu̍ pa̍nīo̍o̍ cha̍. Tē lā sɔ̄la̍ pɛ̍ chu̍ɛ̍īmā ɔ̄li̍fīi̍ya̍ŋ dūlɔ᷅ŋndo̍ cha̍, lā nɔ̄ mī lā yɔ̄ŋgu̍ sīa̍a̍mbūi̍yo̍ cha̍. Nu̍a̍ā nya̍ nɔ̄ ni̍ mī lā tōsa̍, ndu̍yɛ̍ tē lā wa̍ nyɔ̄ɔ̍ŋ mu᷅ŋ tūūwo̍ pɛ̍, nyɛ̄ tūū wāŋnda̍ kpo̍u̍ a̍ chɛ̍la᷅ŋ cho̍o̍ wo̍, lēni᷄ŋ nya̍ tūu̍ mu̍ŋ ni̍. Ndu̍yɛ̍ vɛ̍lɛ̄, tē lā sɔ̄la̍ pɛ̍ sa̍a̍, ɔ̄ɔ̄ chūīŋnda̍ kɛ̄mɔ̄ɔ̍ lēdīi̍ŋ, o̍ fo̍ndālā nyāla̍ kɛ̍ndɛ̄ kɛ̍ndɛ̄lā nya̍ māndā chɔ̍lūa̍a̍ la̍ŋ, lā nɔ̄ mī lā yɔ̄ŋgu̍ ō pīlɛ̍ o̍ ya̍ Mɛ̍lɛ̄ka̍ lo̍. Nyɔ̄ɔ̍ŋ mu᷅ŋ nya̍ nɔ̄ ni̍ mī lā yɔ̄ŋgu̍ le̍ sa̍lālā ku̍lta̍ŋ, a̍ sa̍lālā lūāmāā la̍ŋ, ndu̍yɛ̍ a̍ sa̍lālā kɔ̄l nyūlūla̍ŋ, le̍ mī ya̍ Mɛ̍lɛ̄ka̍ ma᷄l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.

¹⁴

¹⁵

¹⁶“Wānā o̍ wāna̍ cho̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, lā nɔ̄ mī lā yɔ̄ŋgu̍ kēla̍ŋ nda᷅ŋ o̍ wāna̍ cho̍ wā lɛ̄ŋnde̍ŋ chīla̍ŋ ndo̍ lo̍.

¹⁷Tē lā kūɛ̄ a̍ nyɛ̄m mu᷅ŋ o̍ ndu̍lo̍ pɛ̍ kpo̍u̍, sa̍lā o̍ sa̍lā nɔ̍ le̍ sōlīo̍o̍ o̍ bɔ̄ŋa᷅ŋndā nyāla̍ŋ chōo̍, bɔ̄ŋa᷅ŋ pāŋgi̍i̍ sɛ̍nɛ̄īyo̍ ni̍, a̍ bɔ̄ŋa᷅ŋ pāa̍le̍ pɛ̍ŋgīa̍a̍, a̍ bɔ̄ŋa᷅ŋndā chēle̍ŋnda̍ŋ, wāna̍ cho̍ ko̍ŋ wa᷅ lɛ᷅ŋnde̍ŋ chīla̍ŋ ndo̍, ndu̍ i̍ cho̍ kūēē ni̍, mbō yɔ̄ŋgu̍ nyɛ̄m yɛ̍ yɛ̍ŋ cho̍ le̍ sa̍lāla̍ŋ nda᷅ŋ sōlīo̍o̍ wo̍ŋ. Sa̍lā o̍ sa̍la̍ nɔ̍ le̍ sōli᷄ŋndo̍, sa̍lāla̍ŋ le̍ yɔ̄ŋndā wɔ̄ɔ̍ŋnda̍ŋ fāŋāa̍ ni̍, a̍ sa̍lālā ku̍lta̍ŋ, a̍ sa̍lālā lūāmāā la̍ŋ, a̍ sa̍lālā kɔ̄l nyūlū la̍ŋ, le̍ wāŋnda̍ I̍sɔ̄lūɛ̄ī kpo̍u̍ ma̍lɔ̄ɔ̍ le̍ yɔ̄ŋndā ndāla̍ŋ wɔ̍ɔ̍ŋnda̍ŋ, wānā ko̍ŋ, ndu̍ nɔ̍ ni̍ mbō yɔ̄ŋgu̍ nyɛ̄m cho̍ le̍ sa̍lāla̍ŋ nda᷅ŋ sōlīo̍o̍ wo̍ŋ.”

¹⁸Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmī āā, “Wɔ̄sī o̍ wɔ̄sī, pāŋgi̍i̍ tāse̍i̍, lɔ̄mā lēpīlɛ̍, lā nɔ̄ mī lā sōli̍ nāū tōōyē fɔ̍ŋndɔ̍ nɔ᷅ sɔ᷅ŋ o̍ sɔ̄ŋ te̍ wo̍ sa̍lāa̍, le̍ chīɛ̄ī ni̍ kāsīo̍o̍ dīndi̍o̍o̍ ya̍ Mɛ̍lɛ̄ka̍ o̍ hɔ̄l.

¹⁹Sa̍lā kōŋ, ndu̍ cho̍ le̍ yɔ̄ŋndā wɔ̄ɔ̍ŋnda̍ŋ fāŋāa̍ ni̍. Tē lā dīī chɔ̄lōo̍ ho̍ō pɛ̍, wānā so̍līāā lāsa̍lāa̍, ō chūa̍ kōo̍ma̍ chɔ̄lū kōŋ mā ti᷄ŋ, ō sūu̍ ma̍ŋ o̍ dīōlā chīɛ̍i̍ Mɛ̄lɛ̄ka̍a̍ chōo̍, a̍ o̍ sɔ̍ŋgi̍la̍ hi̍ɔ̍ɔ̍lu̍la̍ bi̍ŋ cho̍ ō hōlāā o̍ ma̍āŋndo̍ wo̍, a̍ o̍ dīo̍ cho̍ le̍ lūɛ̄īyɔ̄ɔ̍ o̍ la̍ūwo̍ lēni᷄ŋ ndo̍ chōo̍.

²⁰O̍ ko̍ŋ kɔ̍ɔ̍lī, tē pālɛ̍i̍ hīōū vɛ̄lɛ̄ pɛ̍ i̍ ŋɔ̍mpu᷅m, o̍ ŋɔ᷄mmɛ̍ū wo̍, lā nɔ̄ vɛ̄lɛ̄ mī lā sōli̍ sa̍lā wāā le̍nde̍, mī lā tōsa̍ vɛ̄lɛ̄ mɛ̄ɛ̍ nya̍ tōsa̍ a̍ sa̍lā tāso̍o̍ yɛ̍. Yɔ̄ŋndā wɔ̄ɔ̍ŋndā wāŋnda̍ tōsā ā ve᷅ kɔ᷅l te̍, ɔ̄ɔ̄ ā si̍nā māā lāyɔ̄ŋ wɔ̄ɔ̍ŋ te̍ la̍ŋ ki̍nɛ̍i̍, sa̍lā ko̍ŋ cho̍ le̍ la̍ŋ fāŋāa̍ ni̍. Mɛ̄ɛ̍ o̍ nɛ̄īyo̍ ho̍ō ni᷄ŋ nya̍ nɔ̄ ni̍ mī lā tōsa̍, mī chīɛ̄ī nūu̍ ō wa̍ chīɛ̄ī kāsī.

²¹“O̍ ko̍ŋ kɔ̍ɔ̍lī, wɔ̄sī o̍ wɔ̄sī pāŋgi̍i̍ tāse̍i̍ mālɔ̄ tɔ̍ a̍ lē hīɔ̍ɔ̍lu̍, pāa̍le̍ le̍ŋ nya̍ nɔ̄ ni̍ mī lā kāndu̍ bɔ̄ŋa᷅ŋndo̍ a̍ hīōūwɔ̄ɔ̄ chōo̍ o̍kɔ̄ɔ̄ bīyɔ̄ɔ̍. Bɔ̄ŋa᷅ŋndo̍ ho̍ō ō nɔ̄ mbō wa̍ le̍ pālɛ̍i̍ ī ŋɔ᷄mmɛ̍ū. Ndu̍yɛ̍ o̍ pālɛ̍i̍ ŋɔ̍mmɛ̍ūve̍ he̍ī bɛ̄ŋgu̍ ki̍nɛ̍i̍, bēe̍ndīi̍ nda̍ do̍ū yi̍i̍sīi̍ le̍ wo̍, ndu̍ nya̍ nɔ̄ ni̍ mī lā wa̍ dīo̍o̍.

²²Pāa̍le̍ bɔ̄ŋa᷅ŋndo̍ ho̍ō ō nɔ̄ mbō kāndu̍ŋ nde̍ŋ, wāna̍ cho̍ wā lɛ̄ŋndē I̍sɔ̄lūɛ̍i̍le̍ŋ chīla̍ŋ ndo̍, ō nɔ̄ mbō bīī nāū tōōyē fɔ̍ŋndɔ̍ɔ̍ mbō yɔ̄ŋgu̍, mā sōli̍ ndu̍ sa̍lāa̍ le̍ ndu̍ pi̍la̍, a̍ wāŋnda̍ kpo̍u̍, le̍ yɔ̄ŋndā ndāla̍ wɔ̍ɔ̍ŋnda̍ŋ fāŋāa̍.

²³Tē ko̍ŋ o̍ fa̍ŋa̍ŋ pɛ̍, pālɛ̍i̍ ŋɔ̍mmɛ̍ū ī bɔ̄ŋa᷅ŋnde̍ he̍ī, lēpāa̍ o̍ lēpāa̍ ō nɔ̄ mbō yɔ̄ŋgu̍ nāūwāā tōōyīāā fɔ̍ŋndu̍a̍a̍ ā ŋɔ᷄mmɛ̍ū, a̍ sāā ko̍ndu̍a̍a̍ ā ŋɔ᷄mmɛ̍ū, a̍ nɔ᷅ sɔ᷅ŋ o̍ sɔ̄ŋ te̍ wa̍, mā sōli̍ nda̍ sa̍lā lūāmāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. Ndu̍yɛ̍, pālɛ̍i̍ ŋɔ̍mmɛ̍ūve̍ he̍ī, lēpāa̍ o̍ lēpāa̍, ō nɔ̄ vɛ̄lɛ̄ mbō sōli̍ chūīŋ tōōyōo̍ ō pīlɛ̍ sa̍lāa̍, le̍ yɔ̄ŋndā nyāla̍ wɔ̍ɔ̍ŋnda̍ŋ fāŋāa̍.

²⁴Ndu̍yɛ̍ chɔ̄lūāā o̍ nɔ̍ ha̍ā le̍ sa̍lāa̍ sōlīo̍o̍ wa̍, nāūwāā kāŋ ni̍, sāā ka̍ŋ ni̍, tē ō wa̍ ō pīlɛ̍ sa̍lāa̍ sōlīo̍o̍ pɛ̍, ō nɔ̄ mbō yɔ̄ŋgu̍ kōlo̍ nda̍ tōōsīāā bēe̍dīi̍yo̍ wo̍ bu̍sɔ̄ɔ̍ tɛ̄ndāa̍ tɛ̄ɛ̄ŋ, a̍ chūɛ̄īmā ɔ̄li̍fīi̍ya̍ŋ ka̍lɔ̄ŋndo̍ ō pīlɛ̍, le̍ chɔ̄lū kōŋ sa̍lāa̍ sōlīo̍o̍.

²⁵“O̍ ko̍ŋ kɔ̍ɔ̍lī, bɔ̄ŋa᷅ŋ pālɛ̍i̍ ŋɔ̍mmɛ̍ū lābāfɛ̄i̍yo̍ bɛ̍ɛ̍, mɛ̄ɛ̍ nya̍ nɔ̄ mī lā bīī ndu̍ yɛ̍ cho̍ ho̍ō ni̍. Bɔ̄ŋa᷅ŋndo̍ ho̍ō ō nɔ̄ mbō kāndu̍ŋ o̍ pāŋgi̍i̍ ŋɔ̍mmɛ̍ūve̍ ni᷄ŋ, o̍ wɔ̄sīo̍o̍ ni᷄ŋ mālɔ̄ tɔ̍ a̍ lē ŋūɛ̍ɛ̍nu̍. Ndu̍yɛ̍ pālɛ̍i̍ ŋɔ̍mmɛ̍ūve̍ he̍ī, lēpāa̍ o̍ lēpāa̍, wāna̍ cho̍ wā lɛ̄ŋnde̍ŋ chīla̍ŋ ndo̍ ō nɔ̄ mbō sōli̍ vɛ̄lɛ̄ sa̍lāla̍ŋ o̍ ya̍ Mɛ̍lɛ̄ka̍ lo̍, le̍ mī ma᷄l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ. Sa̍lālā lūāmāālā o̍ so̍li̍ a̍ te̍le̍ŋ bɔ̄ŋa᷅ŋ hīōūwɔ̄ɔ̄ chōo̍ wo̍ la̍ŋ ni̍, a̍ sa̍lālā ku̍lta̍ o̍ so̍li̍ a̍ chūɛ̄īmā ɔ̄li̍fīi̍ya̍ŋ lātūlu̍ la̍ŋ, sa̍lālā pīlɛ̍lā lāŋ ko̍ni̍ o̍ nɔ̍ ni̍ mbo̍ sōli̍ a̍ te̍le̍ŋ bɔ̄ŋa᷅ŋndo̍ ho̍ō.”