Read Southern Kisi Īsi̍kīāā 46 Bible Online

Īsi̍kīāā 46 - Southern Kisi bible

Īsi̍kīāā 46

¹Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Dīō kpāki̍ cho̍ bā pāa̍le̍ŋ lē chāŋndo̍ le̍ lūɛ̄īyɔ̄ɔ̍ o̍ la̍u̍ cho̍ lēni᷄ŋ ndo̍ wo̍, ō nɔ̄ mbō wa̍ ō kīndāā le̍ pālɛ̍i̍ ī ŋɔ᷄mpu᷅m o̍ lɔ̍ɔ̍ bɛ̄ŋgu̍. Kɛ̍ o̍ pāa̍le̍ ŋɔ̍mmɛ̍ūle̍ŋ chōo̍, pāa̍le̍ pɛ̍ŋgīāā le̍ŋ, a̍ o̍ pāa̍le̍ bɔ̄ŋa᷅ŋ pāŋgi̍i̍ Sɛ̍nɛ̄īyo̍ chōo̍, ō nɔ̄ mbō wa̍ ō kūmbīāā.

²Wāna̍ cho̍ lɛ̄ŋnde̍ŋ chīla̍ŋndo̍, ō nɔ̄ mbō kēēku̍ a̍ la̍u̍ cho̍ o̍ bɛ̍ɛ̄ wo̍, mbō kēēku̍ a̍ tōŋgo̍ cho̍ o̍ dīō wo̍, mbō lūɛ̄ī o̍ la̍u̍ cho̍ lēni᷄ŋ ndo̍. Tē ō lūɛ̄ī pɛ̍, ō kɔ̍ si᷅m o̍ da̍kpe̍ŋ dīō kōŋ īkɛ̄i̍. Lo̍ŋ o̍ nɔ̍ ni̍ mbō lo̍ īsīsi̍ mī wānāā sōlīāā lāsa̍lāa̍ ā sōli̍ sa̍lā lūāmāa̍, a̍ sa̍lā kɔ̄l nyūlōo̍, le̍ ndu̍. Tē ā chīi̍ sa̍lāla̍ŋ nda᷅ŋ sōlī pɛ̍, ō sōōlu̍u̍ ya̍ Mɛ̍lɛ̄ka̍ o̍ dīo̍o̍ bɛ̄ŋgu̍ lo̍ŋ, ō fūla̍. Kɛ̍ dīo̍o̍ ō nɔ̄ mbō lo̍ ō kūmbīāā ha̍a̍a̍, mī fīti̍līo̍o̍ tōl.

³Ndu̍yɛ̍ tē pāa̍le̍ pɛ̍ŋgīāāle̍ŋ, a̍ pāa̍le̍ bɔ̄ŋa᷅ŋ pāŋgi̍i̍ sɛ̍nɛ̄īyo̍, lē pīlɛ̍ lē fūūlu̍u̍ pɛ̍, wānā o̍ wāna̍ cho̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, ā nɔ̄ mā chūūŋgi̍āŋ o̍ dīō kpākīo̍o̍ ho̍ō sōndōo̍, mā sōōlu̍u̍ ya̍ Mɛ̍lɛ̄ka̍ Ya̍a̍wɛ̄ɛ̄.

⁴“O̍ pāa̍le̍ pɛ̍ŋgīāāle̍ŋ chōo̍, wāna̍ cho̍ wā lɛ̄ŋnde̍ŋ chīla̍ŋndo̍ ō nɔ̄ mbō sōli̍ sa̍lā lūāmāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ a̍ sāā fɔ̍ŋndu̍a̍a̍ ā ŋɔ᷄mpu᷅m, ndu̍yɛ̍ a̍ sāā ko̍ndo̍o̍ ō pīlɛ̍, a̍ nɔ᷅ sɔ᷅ŋ o̍ sɔ̄ŋ te̍ wa̍.

⁵Ndu̍yɛ̍ te̍le̍ŋ o̍ te̍le̍ŋ tē ō wa̍ sa̍lā lūāmāa̍ sōlīo̍o̍ a̍ sāā ko̍ndo̍o̍ pɛ̍, ō nɔ̄ mbō yɔ̄ŋgu̍ kōlo̍ nda̍ tōōsīāā bēe̍dīi̍yo̍ wo̍ bu̍sɔ̄ɔ̍ tɛ̄ndāa̍ tɛ̄ɛ̄ŋ. Kɛ̍ sāā fɔ̍ŋndu̍a̍a̍ nda̍, tē ō wa̍ ō pīlɛ̍ sa̍lāa̍ sōlīo̍o̍ pɛ̍, nyɛ̄ o̍ nyɛ̄ o̍ nɔ̍lā sɔ̄lā pɛ̍ le̍ sa̍lā ko̍ŋ sōlīo̍o̍, ndu̍ o̍ nɔ̍ ni̍ mbō yɔ̄ŋgu̍. Ndu̍yɛ̍ te̍le̍ŋ o̍ te̍le̍ŋ tē o̍ yɔ̄ŋgu̍ pɛ̍ ko̍lō to̍o̍sīāā bēe̍dīi̍yo̍ bu̍sɔ̄ɔ̍ tɛ̄ndāa̍ tɛ̄ɛ̄ŋ le̍ sa̍lāa̍ sōlīo̍o̍, ō nɔ̄ mbō yɔ̄ŋgu̍ chūɛ̄īmā ɔ̄li̍fīi̍ya̍ŋ ka̍lɔ̄ŋndo̍ cha̍ le̍ kōlō ko̍ŋ.

⁶Sa̍lālā o̍ nɔ̍ mbō sōli̍ o̍ bɔ̄ŋa᷅ŋ pāŋgi̍i̍ sɛ̍nɛ̄īyo̍ chōo̍ la̍ŋ, chɔ̄lūāā o̍ nɔ̍ mbō dīī le̍ sa̍lālā yɛ̍ yɛ̍ la̍ŋ sōlīo̍o̍ wa̍ nda̍ cho̍ ha̍ā ni̍. Nāū tōōyē fɔ̍ŋndɔ̍ɔ̍ ō pīlɛ̍, a̍ sāā fɔ̍ŋndu̍a̍a̍ ā ŋɔ᷄mpu᷅m, a̍ sāā ko̍ndo̍o̍ ō pīlɛ̍, a̍ nɔ᷅ sɔ᷅ŋ o̍ sɔ̄ŋ te̍ wa̍.

⁷Ndu̍yɛ̍ nāūwāā tōōyīāā fɔ̍ŋndu̍a̍a̍ o̍ nɔ̍ ha̍ā le̍ sa̍lāla̍ŋ sōlīo̍o̍ wa̍ ni̍, sāā ko̍ndu̍a̍a̍ ka̍ŋ ni̍, tē ō wa̍ ō pīlɛ̍ sa̍lāa̍ sōlīo̍o̍ pɛ̍, ō nɔ̄ mbō yɔ̄ŋgu̍ kōlo̍ nda̍ tōōsīāā be̍e̍dīi̍yo̍ wo̍ bu̍sɔ̄ɔ̍ tɛ̄ndāa̍ tɛ̄ɛ̄ŋ. Kɛ̍ sāā fɔ̍ŋndu̍a̍a̍ nda̍, tē ō wa̍ ō pīlɛ̍ sa̍lāa̍ sōlīo̍o̍ pɛ̍, nyɛ̄ o̍ nyɛ̄ o̍ nɔ̍lā sɔ̄lā pɛ̍, le̍ sa̍lā kōŋ sōlīo̍o̍, ndu̍ o̍ nɔ̍ ni̍ mbō yɔ̄ŋgu̍. Ndu̍yɛ̍ te̍le̍ŋ o̍ te̍le̍ŋ tē o̍ yɔ̍ŋgu̍ pɛ̍ ko̍lō to̍o̍sīāā bēe̍dīi̍yo̍ bu̍sɔ̄ɔ̍ tɛ̄ndāa̍ tɛ̄ɛ̄ŋ le̍ sa̍lāa̍ sōlīo̍o̍, ō nɔ̄ mbō yɔ̄ŋgu̍ chūɛ̄īmā ɔ̄li̍fīi̍ya̍ŋ ka̍lɔ̄ŋndo̍ cha̍ le̍ kōlō ko̍ŋ.

⁸Ndu̍yɛ̍ tē wāna̍ cho̍ wā lɛ̄ŋnde̍ŋ chīla̍ŋndo̍ ō wa̍ lūɛ̄īyɔ̄ɔ̍ o̍ la̍u̍ cho̍ lēni᷄ŋ pɛ̍, ō nɔ̄ mbō kēi̍ a̍ tōŋgo̍ cho̍ o̍ dīō wo̍ mbō lūɛ̄ī. Tē ō wa̍ vɛ̄lɛ̄ fūlāa̍ pɛ̍, lo̍ŋ ko̍ni̍ o̍ nɔ̍ ni̍ mbō kēi̍.

⁹“Ndu̍yɛ̍ tē pāa̍le̍ bɔ̄ŋa᷅ŋ nde̍ŋ lē fūūlu̍u̍ pɛ̍, wānā o̍ wāna̍ cho̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ mā chūūŋgi̍āŋ o̍ la̍u̍ cho̍ lēni᷄ŋ ndo̍, le̍ ya̍ Mɛ̍lɛ̄ka̍ sōōlūūwo̍, wānā o̍ wānā dīō ŋ̄ kēēku̍ ma̍ lūɛ̄ī yo̍, tē a̍ wa̍ ni᷄ŋ fūlāa̍ pɛ̍, a̍ ke̍e̍kū lɛ̍ a̍ dīō kōŋ te̍. Tē a̍ dīō kpāki̍ cho̍ bā lūāŋndo̍ wo̍ ŋ̄ kēēku̍ ni̍ ma̍ lūɛ̄ī, ā nɔ̄ mā ke̍e̍ku̍ a̍ dīō kpāki̍ cho̍ bā tōūwo̍ wo̍ mā fu̍la̍. Tē a̍ dīō kpāki̍ cho̍ bā tōūwo̍ wo̍ ŋ̄ kēēku̍ ni̍ ma̍ lūɛ̄ī, ā nɔ̄ mā ke̍e̍ku̍ a̍ dīo̍ cho̍ bā lūāŋndo̍ wo̍ mā fu̍la̍. Wānā o̍ wānā tē ā lūɛ̄ī pɛ̍, dīo̍ cho̍ nu̍m o̍ hɔ̄l sa̍kpō wo̍, a̍ ndu̍ ŋ̄ nɔ̄ ni̍ mā fu̍la̍.

¹⁰Ndu̍yɛ̍ te̍le̍ŋ o̍ te̍le̍ŋ, tē pāa̍le̍ bɔ̄ŋa᷅ŋ nde̍ŋ lē fūūlu̍u̍ pɛ̍, mī wāŋnda̍ wa̍ lūɛ̄īyɔ̄ɔ̍ le̍ ya̍ Mɛ̄lɛ̄ka̍ sōōlūūwo̍, wāna̍ cho̍ wā lɛ̄ŋnde̍ŋ chīla̍ŋndo̍, ō nɔ̄ mbō lūɛ̄ī nda̍ wāŋnda̍ lātūlu̍. Tē wāŋnda̍ wa̍ vɛ̄lɛ̄ fūlāa̍ pɛ̍, a̍ nɔ̄ mā fūla̍ nda̍ nda̍ lātūlu̍.

¹¹Te̍le̍ŋ o̍ te̍le̍ŋ, tē pālɛ̍i̍ bɔ̄ŋa᷅ŋ nde̍ ī fūūlu̍u̍ pɛ̍, pālɛ̍i̍ nya̍ nɔ̄ le̍ sa̍lāla̍ŋ sōlīo̍o̍ ve̍, nāūwāā tōōyīāā fɔ̍ŋndu̍a̍a̍ nya̍ nɔ̄ le̍ sa̍lāla̍ŋ sōlīo̍o̍ wa̍ ni̍, sāā ko̍ndu̍a̍a̍ ni̍, lā nɔ̄ mī lā yɔ̄ŋgu̍ kōlo̍ nda̍ tōōsīāā bēe̍dīi̍yo̍ wo̍ bu̍sɔ̄ɔ̍ tɛ̄ndāa̍ tɛ̄ɛ̄ŋ le̍ ō pīlɛ̍ sa̍lāa̍ sōlīo̍o̍. Kɛ̍ sāā fɔ̍ŋndu̍a̍a̍ nda̍ ki̍nɛ̍i̍, tē lā wa̍ ō pīlɛ̍ sa̍lāa̍ sōlīo̍o̍ pɛ̍, nyɛ̄ wāŋndo̍ ō nɔ̄lā sɔ̍lā le̍ sālā kōŋ sōlīo̍o̍ wo̍, ndu̍ o̍ nɔ̍ ni̍ mbō yɔ̄ŋgu̍. Ndu̍yɛ̍ te̍le̍ŋ o̍ te̍le̍ŋ tē lā yɔ̄ŋgu̍ pɛ̍ ko̍lō to̍o̍sīāā bēe̍dīi̍yo̍ bu̍sɔ̄ɔ̍ tɛ̄ndāa̍ tɛ̄ɛ̄ŋ le̍ sa̍lāa̍ sōlīo̍o̍, lā nɔ̄ mī lā yɔ̄ŋgu̍ chūɛ̄īmā ɔ̄li̍fīi̍ya̍ŋ ka̍lɔ̄ŋndo̍ cha̍ le̍ kōlō ko̍ŋ.

¹²“Tē wāna̍ cho̍ wā lɛ̄ŋnde̍ŋ chīla̍ŋndo̍ ō yēēma̍ le̍ sa̍lā o̍ sālā sōlī pɛ̍ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍, sa̍lā ndu̍ pi̍la̍ kɛ̍ɛ̍si̍a̍a̍ a̍ kɔ̄l ndɔ̄ɔ̍ kpo̍u̍ wo̍, ō wa̍ sa̍lā lūāmāā, ō wa̍ sa̍lā kɔ̄l nyūlū, ā nɔ̄ mā kūmbi̍ dīo̍ cho̍ bā pāa̍le̍ŋ lē chāŋndo̍ wo̍, mbō sōli̍ sa̍lā ndɔ̄ɔ̍. Ndu̍yɛ̍ tē ō lūɛ̄ī pɛ̍, mɛ̄ɛ̍ o̍ to̍sā a̍ sa̍lā bɔ̄ŋa᷅ŋ pāa̍le̍ pɛ̍ŋgīa̍a̍ yɛ̍, le̍nde̍ ko̍ni̍ o̍ nɔ̍ mbō tōsa̍ o̍ sa̍lāa̍ ho̍ō sōlīo̍o̍ ni᷄ŋ ni̍. Ndu̍yɛ̍ tē ō chīi̍ sa̍lā ndɔ̄ɔ̍ sōlī pɛ̍ mbō fūla̍, ā nɔ̄ mā mīŋgi̍ dīō kōŋ kīndā.”

¹³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Īdīi̍ o̍ īdīi̍, wāna̍ cho̍ wā lɛ̄ŋnde̍ŋ chīla̍ŋndo̍ ō nɔ̄ mbō yɔ̄ŋgu̍ sāā fɔ̍ŋndɔ̍ɔ̍ chīi̍ wɔ̄sīo̍o̍ ō pīlɛ̍ wo̍, o̍ nɔ᷅ sɔ᷅ŋ o̍ sɔ̄ŋ te̍ wo̍, le̍ sa̍lā lūāmāa̍ sōlīo̍o̍ o̍ ya̍ Mɛ̍lɛ̄ka̍ lo̍.

¹⁴Ndu̍yɛ̍, īdīi̍ o̍ īdīi̍, ō nɔ̄ mbō yɔ̄ŋgu̍ kōlo̍ nda̍ tōōsīāā bēe̍dīi̍yo̍ wo̍, pa᷅ŋnda̍ŋ lā ŋūɛ̍ɛ̍nu̍, a̍ chūɛ̄īmā ɔ̄li̍fīi̍ya̍ŋ bi̍yɛ̄i̍yo̍ ō pīlɛ̍ a̍ tɔ̍tɔ̄ŋndo̍, le̍ līndāa̍ a̍ kōlō ko̍ŋ, mā sōli̍ sa̍lāa̍ a̍ sāā ko̍ŋ lātūlu̍. Ya̍ Mɛ̄lɛ̄ka̍ Ya̍a̍wɛ̄ɛ̄, sāwa̍ ya̍ I̍ dɔ̍ū wo̍ cho̍ ho̍ō ni̍, ndu̍yɛ̍ sāwāa̍ ho̍ō ō nɔ̄ mbō wa̍ le̍ fɛ̍ɛ̍ŋ a̍ fɛ̍ɛ̍ŋ.

¹⁵Sāā fɔ̍ŋndɔ̍ ko̍ŋ ni̍, kōlō to̍o̍sīāā bēe̍dīi̍ ko̍ŋ ni̍, a̍ chūɛ̄īmā ɔ̄li̍fīi̍mā māŋ, īdīi̍ o̍ īdīi̍, ō nɔ̍ mbō bēŋga̍ le̍ nyɛ̄m mu᷅ŋ yɔ̄ŋgōo̍, le̍ sa̍lāa̍ sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍. Īdīi̍ o̍ īdīi̍ lā nɔ̄ mī lā sōli̍ yɔ̄ɔ̍ŋ mu᷅ŋ sa̍lāa̍ o̍ ya̍ lo̍.”

¹⁶Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō hīāū lāchī a̍ sūɛ̍i̍, mbo̍ dīmī āā, “Wāna̍ cho̍ wā lɛ̄ŋndē I̍sɔ̄lūɛ̍i̍le̍ŋ chīla̍ŋndo̍, lēlɛ̄ŋ o̍ lēlɛ̄ŋ o̍ sɔ̍la̍ pɛ̍, le̍ ndu̍ a̍ chūāūwāā ndūa̍a̍, lɛ̄ŋndē lēŋ lē chō ni̍. Le̍ he̍ī, tē ō ke̍ pūa̍a̍ ndūa̍a̍ ō pīlɛ̍ lēlɛ̄ŋ o̍ lēlɛ̄ŋ o̍ lɛ̄ŋndē lēŋ ni᷄ŋ pɛ̍, po̍ ndɔ̄ ko̍ŋ, nda̍ yu̍ŋgu̍ ndɔ̄ɔ̍ nda̍ nɔ̍ lɛ̄ŋndē lēŋ māā nyɛ̄m nda̍ ŋ̄kɛ᷅ ni̍.

¹⁷Kɛ̍ ō fūla̍ o̍ pūa̍a̍ ndūa̍a̍ kɔ̄ɔ̄lī, wānāa̍ cho̍ ndu̍ wa̍llo̍ o̍ bā bɛ̄ŋgu̍ wa̍ ki̍nɛ̍i̍, tē ō ke̍ wānā o̍ wānā lɛ̍ŋndē ndɔ̄le̍ le̍ŋ, lē ti᷄ŋ pɛ̍, wānā ko̍ŋ lɛ̄ŋndē lēŋ lē si̍mnūŋ nyɛ᷅m ndɔ̄ɔ̍ŋ kɛ᷅ le̍. Tē wɔ̄sī nya̍ nɔ̄ le̍ nyɔ̄ɔ̍ŋ mīŋgīo̍o̍ wāŋnda̍ o̍ lābā wo̍ ō fūūlu̍u̍ pɛ̍, wānā ko̍ŋ ō nɔ̄ mbō mīŋgi̍ lɛ̄ŋndē lēŋ. Wāna̍ cho̍ wā lɛ̄ŋnde̍ŋ chīla̍ŋndo̍, mɛ̄ɛ̍ pūa̍a̍ ndūa̍a̍ mbō ke̍ nda̍ lɛ̄ŋnde̍ŋ, mī lē sīmnu᷄ŋ nyɛ᷅m nda̍a̍ŋ kɛ᷅.

¹⁸Ndu̍yɛ̍ wāna̍ cho̍ wā lɛ̄ŋnde̍ŋ chīla̍ŋndo̍ ō nɔ̍ mbō bīī wānā o̍ wānā lɛ᷅ŋndē ndɔ̄le̍ŋ o̍ bā a̍ ka̍ka̍, le̍ mɛ̄ɛ̍ o̍ cho̍ māsāa̍ yɛ̍ le̍. Tē ō yēēma̍ le̍ po̍ ndɔ̄ pi᷅lɛ̍ lēlɛ̄ŋ o̍ lēlɛ̄ŋ kē pɛ̍, ō nɔ̄ mbō ke̍ ndu̍ lɛ̄ŋndē ndɔ̄le̍ ndu̍ pi̍la̍ le̍ŋ lē ti᷄ŋ. Kɛ̍ ō nɔ̍ mbō pōōnda̍ wānā o̍ wānā lɛ᷅ŋndē ndɔ̄le̍ŋ o̍ bā le̍.”

¹⁹O̍ ko̍ŋ kɔ̍ɔ̍lī, mi̍ po̍ wa̍ ho̍ō bālɔ̄ɔ̍ a̍ ya̍ wo̍ ō kēēkū a̍ ya̍ o̍ fo̍ndā kēīyāa̍ ō pīlɔ̍ɔ̍, o̍ wa̍ o̍ dīō kpākīo̍o̍ īkɛ̄i̍yo̍ ba᷅ lūāŋndo̍ wo̍, mbo̍ kūā a̍ ya̍ o̍ lu̍mūi̍la̍ kāsīla̍ mu̍li̍ hɔ̄lla̍ bā lūāŋndo̍ la̍ŋ, lu̍mūi̍la̍ wa̍ le̍ wānāā sōlīāā lāsa̍lāa̍ la̍ŋ. Ndu̍yɛ̍, mbo̍ yūlūl la̍ bāa̍ o̍ lu̍mūi̍la̍ wa̍ bā pāa̍le̍ŋ lē dēl lo̍ la̍ŋ.

²⁰Mbo̍ dīmūl la̍ āā, “Fo̍nda̍ cho̍ ho̍ō nda̍ wo̍, lo̍ŋ wānāā sōlīāā lāsa̍lāa̍ ā nɔ̄ le̍ vīsīŋ lāsa̍la᷄ŋ yāūwo̍ ni̍. Sa̍lāla̍ cho̍ le̍ yɔ̄ŋndā wɔ̄ɔ̍ŋnda̍ŋ fāŋāa̍ la̍ŋ ni̍, a̍ sa̍lālā nda̍ sōlī tē wāŋndo̍ tɛ̄ɛ̄mbu̍u̍ īsɔ̄ɔ̍ pɛ̍ la̍ŋ, chɔ̄lūāā nda̍ dīū le̍ sa̍lālā lāŋ nda̍, o̍ fo̍ndā kōŋ nda̍ nɔ̄ le̍ vīsīŋ mu᷅ŋ yāūwo̍ ni̍. Ndu̍yɛ̍ lo̍ŋ nda̍ nɔ̄ ni̍ mā tōōsi̍a̍a̍ bēe̍dīi̍ sa̍lā ku̍llo̍. Ko̍ŋ to̍sā ni̍, ā fu̍lā a̍ nyɛ̄m kāsīŋ mu᷅ŋ o̍ la̍u̍ cho̍ o̍ bɛ̍ɛ̄ wo̍ le̍, yɔ̄ŋi̍ wāŋnda̍ ā pīlɛ̍ la̍ŋ mu̍ŋ mā sɔ̄la̍ dɛ̍nɛ̍ pa̍lāa̍.

²¹“O̍ ko̍ŋ kɔ̍ɔ̍lī, mbo̍ hūŋ a̍ ya̍ o̍ la̍u̍ wa̍ o̍ bɛ̍ɛ̄ wo̍, mbo̍ bālū a̍ ya̍ o̍ sɔ̍ŋgi̍la̍ hi̍ɔ̍ɔ̍lu̍la̍ la̍ūwo̍ ho̍ō kpo̍u̍. La̍ūwo̍ ho̍ō sɔ̍ŋgi̍la̍ ndɔ̄la̍ hi̍ɔ̍ɔ̍lu̍la̍ŋ, o̍ sɔ̍ŋgi̍ o̍ sɔ̍ŋgi̍, mi̍ cha᷅ la̍ū pɔ̄mbɔ̄ɔ̍ lo̍ŋ. La̍ūlā pɔ̄mbɔ̄la̍ŋ nda᷅ŋ, ō kɛ᷅ o̍ kɛ᷅, ō wa̍ bānde̍i̍ le̍ nɛ̄īyo̍ be̍le̍-ŋɔ̍mpu᷅m a̍ lē ŋɔ̄ma̍a̍, bu̍o̍o̍ nɛ̄īyo̍ be̍le̍-hi̍ɔ̍ɔ̍lu̍ a̍ lē ŋɔ̄ma̍a̍.

²²

²³La̍ūla̍ŋ nda᷅ŋ ō kɛ᷅ o̍ kɛ᷅ ō wa̍ ō bālāā kpɔ̍kɔ̍su̍ a̍ kpāki̍ lāpōūwo̍, a̍ yīŋndā chīe̍e̍le̍ la̍ŋ lēni᷄ŋ, lā chɔ̄ūwāā o̍ kpākīo̍o̍ hōlnɔ᷄ŋndo̍.

²⁴Mi̍ po̍ wa̍ ho̍ō bālɔ̄ɔ̍ a̍ ya̍ wo̍ ō dīmūl la̍ māā, fo̍ndāŋndā yāūwāāla̍ŋ la̍ cho̍ la̍ŋ ni̍. Wānāa̍ to̍sā wa̍llo̍ o̍ chīɛ̍i̍ Mɛ̄lɛ̄ka̍a̍ wa̍, lo̍ŋ nda̍ nɔ̄ le̍ sa̍lālā wāŋnda̍ ā hūŋ nda̍ŋ yāūwo̍ ni̍.”