Read Southern Kisi Īsi̍kīāā 47 Bible Online

Īsi̍kīāā 47 - Southern Kisi bible

Īsi̍kīāā 47

¹O̍ ko̍ŋ kɔ̍ɔ̍lī, mi̍ pōo̍ ho̍ō mīīŋgū a̍ ya̍ o̍ chīɛ̍i̍ Mɛ̄lɛ̄ka̍a̍ dīō. O̍ ko̍ŋ, mi̍ cha᷅ mɛ̄ŋnda̍ŋ fūlāa̍ o̍ dīo̍o̍ bɛ̄ŋgu̍ mī mā hīāū ba᷅ pāa̍le̍ŋ lē chāŋndo̍, kūmbū chīɛ̍i̍ Mɛ̄lɛ̄ka̍a̍ ō mūli̍ hɔ̄lla̍ wo̍. O̍ dīō chīɛ̍i̍ Mɛ̄lɛ̄ka̍a̍ ho̍ō bā tōūwo̍ kpe̍e̍kpe̍i̍ mɛ̄ŋnda̍ŋ māŋ mā wa̍ fūlāa̍ ni̍, mi̍ mā wā tūūsōo̍ mī mā hīāū ma̍āŋndo̍, mī mā kūā ba᷅ tōūwo̍.

²Mi̍ pōo̍ ho̍ō kēēkū a̍ ya̍ o̍ dīō kpāki̍ wa̍ bā lūāŋndo̍ wo̍, mbo̍ bālū a̍ ya̍, mbo̍ kūā a̍ ya̍ a̍ dīō kpāki̍ wa̍ bā pāa̍le̍ŋ lē chāŋndo̍. Ndu̍yɛ̍ mi̍ cha᷅ mɛ̄ŋnda̍ŋ hīōūwɔ̄ɔ̍ o̍ dīo̍o̍ ho̍ō hɔ̄lnɔ᷄ŋndo̍ o̍ bā kɛ̄ndɔ̄ɔ̍ chōo̍.

³O̍ ko̍ŋ, mi̍ cha᷅ pōo̍ ho̍ō kɔ̄la̍ŋ bā pāa̍le̍ŋ lē chāŋndo̍ a̍ sīōndōōlē tūwāāle̍ŋ o̍ bā. Mbo̍ tūū ti᷅ŋndo̍ nɛ̄īyo̍ wāa̍ pīlɛ̍, a̍ kɛ̄mɔ̄ɔ̍ lē ŋɔ᷄mpu᷅m a̍ be̍le̍ ŋɔ̍ma̍a̍ (1,680). Mi̍ pōo̍ ho̍ō kēēkū a̍ ya̍ o̍ pīo̍o̍ ho̍ō ni᷄ŋ. Mɛ̄ŋnda̍ŋ bɛ̄ŋgo̍o̍ ki̍nɛ̍i̍ ma̍a̍ ku̍mbū ya̍ ni̍.

⁴O̍ ko̍ŋ kɔ̍ɔ̍lī, mbo̍ tūū vɛ̄lɛ̄ nɛ̄īyo̍ wāa̍ o̍ pīlɛ̍, a̍ kɛ̄mɔ̄ɔ̍ lē ŋɔ᷄mpu᷅m, a̍ be̍le̍-ŋɔ̍ma̍a̍ (1,680). Ndu̍yɛ̍ mbo̍ kēēkū a̍ ya̍ o̍ mɛ̄ŋnda̍ŋ ma᷅ŋ ni᷄ŋ. Mi̍ mɛ̄ŋnda̍ŋ mā bīī ya̍ o̍ wūla̍ŋ ki̍nɛ̍i̍. O̍ ko̍ŋ kɔ̍ɔ̍lī, mbo̍ hīāū vɛ̄lɛ̄ a̍ tūūwo̍, lo̍ŋ bɛ̍ɛ̍ mbo̍ tūū nɛ̄īyo̍ wāa̍ pīlɛ̍ a̍ kɛ̄mɔ̄ɔ̍ lē ŋɔ᷄mpu᷅m a̍ be̍le̍-ŋɔ̍ma̍a̍ (1,680). Ndu̍yɛ̍ mbo̍ kēēkū vɛ̄lɛ̄ a̍ ya̍ o̍ mɛ̄ŋnda̍ŋ ma᷅ŋ ni᷄ŋ. Lo̍ŋ ndu̍, mi̍ mɛ̄ŋnda̍ŋ mā bīī ya̍ o̍ chāŋnda̍ ki̍nɛ̍i̍.

⁵O̍ ko̍ŋ kɔ̍ɔ̍lī, mbo̍ cha᷄ŋ vɛ̍lɛ̄ a̍ tūūwo̍ lo̍ŋ mbo̍ hīāū lāchī. Mbo̍ tūū vɛ̄lɛ̄ nɛ̄īyo̍ wāa̍ pīlɛ̍ a̍ kɛ̄mɔ̄ɔ̍ lē ŋɔ᷄mpu᷅m, a̍ be̍le̍-ŋɔ̍ma̍a̍ (1,680). Kɛ̍ lo̍ŋ ndu̍, mɛ̄ŋnda̍ŋ ma̍a̍ yi̍ŋgi̍la̍ ni᷅ŋ bɔ̄ɔ̍, I̍ nɔ̍la̍ lɛ̍ mī hi̍o̍ū lo̍ŋ te̍. Mɛ̄ɛ̍ a̍ sāānāa̍ mālāŋ wānā a̍a̍ hi̍a̍ū lo̍ŋ.

⁶Mi̍ pōo̍ ho̍ō dīmūl la̍ āā, “Wāna̍ chīo̍o̍ Īsi̍kīāā, nyɛ̄ o̍ nyɛ̄ ŋ̄ chō chɔ̄ɔ̍, mɛ̍ɛ̍nda̍ŋ ndu̍ nyɛ̄ kɛ̄ndɛ̄ kɛ̍ndɛ̄ mā kɛ̍si̍ŋ ndu̍ o̍ kɔ̄l.” O̍ ko̍ŋ kɔ̍ɔ̍lī, mi̍ pōo̍ ho̍ō mīīŋgū a̍ ya̍ o̍ kɔ̄ŋgɔ̍.

⁷Mɛ̄ɛ̍ ya̍ I̍ mi̍i̍ŋgu̍ lo̍ŋ, mi̍ cha᷅ ni᷅ŋ yɔ̄mnde̍ īsīsi̍ o̍ pīo̍o̍ ho̍ō kɔ̄ŋgɔ̍la̍ŋ vēllāa̍ vēllē ta̍u̍ ta̍u̍.

⁸Mi̍ pōo̍ ho̍ō dīmūl la̍ āā, “Pīo̍o̍ ho̍ō, chɔ̄nɔ᷄ŋndo̍ ho̍ō na̍nu᷄ŋ, mbo̍ lō kɔ̄la̍ŋ ba᷅ pāa̍le̍ŋ lē chāŋndo̍, mbo̍ kɔ̍ de᷅l o̍ dɛ̍ŋgbɛ̍ Chɔ̍ɔ̍dāŋ ndo̍ ni᷄ŋ, ndu̍yɛ̍, mbo̍ kɔ̍ de᷅l o̍ Pēi̍ Mɛ̄ŋmā Īhɛ᷄llo̍.[4] Pīo̍o̍ ho̍ō ō chō tōsā mī Pēe̍ Mɛ̄ŋmā Īhɛ᷄llo̍ ho̍ō ō sīmnu᷄ŋ pe̍e̍ mɛ̄ŋmā kɛ̄ndɛ̄ kɛ̍ndɛ̄.

⁹Ndu̍yɛ̍ pīo̍o̍ ho̍ō bā o̍ bā o̍ ku̍ɛ̄ pɛ̍, sūūwa̍ ni̍, a̍ nyāā yōōmāā chēle̍ŋnda̍, pīɔ̍ɔ̍ lo̍ŋ cha̍ cha̍. Pīo̍o̍ ho̍ō chō tōsā mī Pēe̍ Mɛ̄ŋmā Īhɛ᷄llo̍, o̍ nɔ̍ nya̍ā yōōmāā lēni᷄ŋ te̍ wo̍, ō sīmnu᷄ŋ pe̍ē kɛ̍ndɛ̄ kɛ̍ndɛ̄ bɛ̄ndū. Bā o̍ bā pīo̍o̍ ho̍ō ō kūɛ̄ pɛ̍, nyɛ̄ o̍ nyɛ̍ wa᷅ lo̍ŋ, wāa̍ o̍ wa᷅ yo̍o̍mū ni̍.

¹⁰Wānāā yɔ̄ɔ̄yāa̍ ā tīū ni̍ŋ o̍ Pēe̍ Mɛ̄ŋmā Īhɛ᷄llo̍ ho̍ō kɔ̄ŋgɔ̍ kpo̍u̍ le̍ sūūwāa̍ wa᷅ ni̍ŋ lo̍ŋ nda̍ yɔ̄ɔ̄yāa̍. Chɔ̍ŋ a̍ pēēla̍ pɔ̍mbɔ̄la̍ŋ Ɛ̄nīkɛ̍dī, kɔ̍ a̍ la᷅ŋ Ɛ̄nīki̍līm di̍, lo̍ŋ kpo̍u̍ wānāā yɔ̄ɔ̄yāa̍ ā wā ni̍ŋ a̍ tīūwāā, mā tɛ̄i̍ yālāla̍ ndāla̍ŋ. Sūūwa̍, ā su̍u̍ o̍ su̍u̍ ā wā ni̍ŋ ndo̍ŋ ta̍u̍ ta̍u̍, mɛ̄ɛ̍ nda̍ wā nu̍a̍ā o̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā yɛ̍.

¹¹Kɛ̍ pīo̍o̍ ho̍ō, hūŋndā ndɔ̄la̍ŋ ki̍nɛ̍i̍, a̍ fo̍ndāŋndā ndɔ̄la̍ māmɛ̄ŋnda̍ŋ, mɛ̄ŋma̍ cho̍ lo̍ŋ nda̍ŋ mā ma̍ŋgālāŋ ni̍ŋ te̍. Mā chō wā mɛ̄ŋmā īhɛ᷄l, nāa̍ wāŋnda̍ sɔ̄lā ni̍ŋ hɛ̍lle̍ wa̍.

¹²Pīo̍o̍ ho̍ō, yɔ̄mīī kōmɔ̄ɔ̄ ndɔ̄ɔ̍ ō na᷄ŋ le̍ dīo̍o̍ ve̍, ī sūu̍ o̍ ī sūū ī chō hūnɔ̄ɔ̄ wūlɔ̄ɔ̄ o̍ pīo̍o̍ ho̍ō kɔ̄ŋgɔ̍la̍ŋ vēllāa̍ vēllē. Yɔ̄mnde̍ he̍ī, pēi̍ ndūɛ̍i̍ ī nya̍mālā ni̍ŋ te̍, ndu̍yɛ̍ ī pɛ̍ŋgī ni̍ŋ a̍ kōmɔ̄ɔ̍ le̍, īpāŋgu̍ o̍ īpāŋgu̍ ī wā ni̍ŋ ko̍mɔ̄ɔ̍, kāni̍ fo̍ndōle̍, mɛ̄ŋma̍ cho̍ yɔ̄mnde̍ he̍ī pɔ̄ɔ̄līa̍a̍ wāŋ, o̍ fo̍ndāŋ kāsīo̍o̍ ma̍ cho̍ fūlāa̍ ni̍. Kōmɔ̄ɔ̄ yɔ̄mnde̍ he̍ī, ndi̍ wāŋnda̍ ā wā ni̍ŋ di̍o̍o̍ ni̍, ndu̍yɛ̍ pēi̍ ndūɛ̍i̍, ndi̍ wa᷅ ni̍ŋ ko̍o̍wa̍ŋ le̍ wāŋnda̍ chīɔ̄ūwo̍ ni̍.”

¹³Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmī āā, “Lɛ̄ŋnde̍ŋ nde᷅ŋ ya̍ I̍ ke̍ I̍sɔ̄lūɛ̍i̍ya̍ ni̍ māā nyɛ̄ ndā a̍ pɛ̍ŋgu̍la̍ŋ le̍nde̍ kpɛ̍ kpɛ̍. Lā nɔ̄ mī lā pīɔ̍u̍ le̍ŋ yu̍ŋgu̍la̍ tɔ̍ a̍ lā tīɔ̍ɔ̍ŋnda̍ŋ I̍sɔ̄lūɛ̄ī tɛ̍ɛ̄ŋ, yu̍ŋ̄gu̍ o̍ yu̍ŋgu̍ būŋgɛ̄i̍ i̍ nda̍. Kɛ̍ yu̍ŋgu̍ Chōo̍si̍ɔ̍ɔ̍ ndu̍, ō nɔ̄ mbō sɔ̄la̍ būŋga᷄ŋ ŋ̄ mūu̍ŋ.

¹⁴Lɛ̄ŋnde̍ŋ nde᷅ŋ, ya̍ I̍ chu̍e̍l fi̍nyāā nyāā ma̍māa̍ būŋgɛ̄i̍ sīndɛ̄ ī kālā ka̍lā le̍ nda̍ kīo̍o̍ māā lɛ̄ŋndē ndā ni̍. Le̍la̍ŋ lā nɔ̄ mī lā pīɔ̍u̍ le̍ŋ yu̍ŋgu̍la̍ŋ I̍sɔ̄lūɛ̍i̍ tɛ̄ɛ̄ŋ kpɛ̍ŋnji̍.

¹⁵“Pɛ̄ŋgu̍la̍ lɛ̄ŋndē nyāle̍ŋ la̍ŋ la̍ cho̍ la᷅ŋ ni̍. Chɔ̍ŋ ba᷅ lūāŋndo̍ mi̍ pɛ̄ŋgu̍la̍ lɛ̄ŋndē nyāle̍ŋ lā kāndu᷄ŋ o̍ Pēe̍ Mɛ̍ŋmā Īhɛ᷄llo̍ Mɛ̄dītālu̍e̍e̍nīāā, mi̍ lā hēēlū bā pāa̍le̍ŋ lē chāŋndo̍, mi̍ lā kūā a̍ chi̍e̍e̍ŋ bɛ̍ndo᷄ŋ, Hɛ̍ti̍lɔ̄ŋ, a̍ Hāmātī Pa̍a̍sī, a̍ Sɛ̍da̍dī,

¹⁶o̍ ko̍ŋ kɔ̍ɔ̍lī, mi̍ lā kūā a̍ chi̍e̍e̍ŋ bɛ̍ndo᷄ŋ, Bɛ̄lɔ̍tāā, a̍ Si̍bi̍lūīm. Chi̍e̍e̍ŋ mūu̍ŋ ndo̍ŋ mu᷅ŋ, Dāma̍si̍kɔ̍ɔ̄ a̍ Ha̍ma̍tī tɛ̍ɛ̄ŋ ŋ̍ cho̍ ni̍. O̍ ko̍ŋ kɔ̍ɔ̍lī, mi̍ pɛ̄ŋgu̍la̍ lɛ̄ŋndē nyāle̍ŋ lā kɔ̍ fu̍lā a̍ chi̍e̍e̍ bɛ̍ndōo̍ Ti̍kɔ̄ŋ, o̍ cho̍ o̍ pɛ̄ŋgu̍la̍ŋ a̍ būŋgɛ̄ī Ha̍u̍lūāŋnde̍ wo̍.

¹⁷Pɛ̄ŋgu̍la̍ lɛ̄ŋndē nyāle̍ŋ bā lūāŋndo̍, mi̍ lā cha᷄ŋ a̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā le̍nde̍, mi̍ lā hēēlū bā pāa̍le̍ŋ lē chāŋndo̍, mi̍ lā kɔ̍ fu̍lā a̍ Ɛ̍nɔ̄ŋ chi̍e̍e̍. Ndu̍yɛ̍ Ɛ̍nɔ̄ŋ bā lūāŋndo̍, lo̍ŋ Dāma̍si̍kɔ̍ɔ̄ a̍ Ha̍ma̍tī a̍ cho̍ ni̍.

¹⁸“Pɛ̄ŋgu̍la̍ lɛ̄ŋndē nyāle̍ŋ bā pāa̍le̍ŋ lē chāŋndo̍, mi̍ lā kāndu᷄ŋ Ha̍u̍lūāŋ tɛ̍ɛ̄ŋ a̍ Dāma̍si̍kɔ̍ɔ̄, mi̍ lā tūūsū bā tōūwo̍, mi̍ lā kɔ̍ de᷅l a̍ Pīo̍o̍ Chɔ̍ɔ̍dāŋ. Chɔ̍ɔ̍dāŋ nda̍ŋ ma̍ cho̍ pɛ̄ŋgu̍la̍ŋ lɛ̄ŋndē I̍sɔ̄lūɛ̍i̍le̍ŋ tɛ̄ɛ̄ŋ, a̍ lɛ̄ŋndē Ki̍li̍a̍a̍dīle̍ŋ ni̍. Lɛ̄ŋndē I̍sɔ̄lūɛ̍i̍le̍ŋ lē chō bā pāa̍le̍ŋ lē dēl lo̍, mi̍ lɛ̄ŋndē Ki̍li̍a̍a̍dīle̍ŋ le̍ŋ le̍ wa᷅ bā pāa̍le̍ŋ lē chāŋndo̍. O̍ ko̍ŋ kɔ̍ɔ̍lī, mi̍ pɛ̄ŋgu̍la̍ lɛ̄ŋndē nyāle̍ŋ lā kūā a̍ Ta̍māā chi̍e̍e̍, mi̍ lā kɔ̍ fu̍lā a̍ Pēe̍ Mɛ̄ŋmā Īhɛ᷄llo̍. Pɛ̄ŋgu̍la̍ lɛ̄ŋndē nyāle̍ŋ bā pāa̍le̍ŋ lē chāŋndo̍ la̍ŋ la̍ cho̍ la̍ŋ ni̍.

¹⁹“Pɛ̄ŋgu̍la̍ lɛ̄ŋndē nyāle̍ŋ bā tōūwo̍, lā kāndu̍ŋ Ta̍māā chi̍e̍e̍, mi̍ lā kūā a̍ fo̍ndāŋndā māmɛ̄ŋnda̍ŋ Ka̍dɛ̍sī Mɛ̍lu̍i̍bā, o̍ ko̍ŋ kɔ̍ɔ̍lī, mī lā hēēlū a̍ pēē pɔ̍mbɔ̄ɔ̍ o̍ pɛ̄ŋgu̍la̍ŋ a̍ lɛ̄ŋndē I̍chi̍pīle̍ŋ, mī lā kɔ̍ fu̍lā a̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā.

²⁰“Ndu̍yɛ̍ pɛ̄ŋgu̍la̍ lɛ̄ŋndē nyāle̍ŋ bā pāa̍le̍ŋ lē dēl lo̍, la̍ŋ la̍ cho̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā ni̍. Chɔ̍ŋ Mɛ̄dītālu̍e̍e̍nīāā o̍ pēēlo̍, mi̍ lā hēēlū bā lūāŋndo̍, mi̍ lā kɔ̍ bɔ̍ŋā a̍ pɛ̄ŋgu̍la̍ŋ bā lūāŋndo̍, Ha̍ma̍tī Pa̍a̍sī i̍kɛ̍i̍.

²¹“Le̍la̍ŋ lā nɔ̄ mī lā pīɔ̍u̍ lɛ̄ŋnde̍ŋ nde᷅ŋ yu̍ŋgu̍la̍ŋ I̍sɔ̄lūɛ̄ī tɛ̍ɛ̄ŋ.

²²Lɛ̄ŋnde̍ŋ nde᷅ŋ ya̍ I̍ ke̍ nya̍ ni̍, māā nyɛ̄m nya̍ kɛ᷅. Ndu̍yɛ̍ tē lā wa̍ lɛ̄ŋnde̍ŋ nde᷅ŋ pīɔ̄ūwo̍ pɛ̍, wānāā lēkāa̍wa̍a̍ cho̍ nya̍ tɛ̍ɛ̄ŋ, ma̍ vīālū ni᷅ŋ chūāūwa̍ nya̍ tɛ̄ɛ̄ŋ nda̍, nda̍ bɛ̍ɛ̍ ā nɔ̄ mā sɔ̄la̍ lɛ̄ŋnde̍ŋ le̍ nda̍le̍ŋ kpɛ̍ kpɛ̍. Wāŋnda̍ ha̍ā bɛ̍ɛ̍, lā nɔ̄ mī lā chu̍a̍ nda̍ ni᷅ŋ māā I̍sɔ̄lūɛ̍i̍ya̍ nda̍ chō ni̍. Le̍la̍ŋ nda̍ bɛ̍ɛ̍ ā nɔ̄ mā sɔ̄la̍ lɛ̄ŋnde̍ŋ le̍ nda̍le̍ŋ I̍sɔ̄lūɛ̍i̍ya̍ tɛ̄ɛ̄ŋ.

²³Yu̍ŋgu̍ o̍ yu̍ŋgu̍ wānāā lēkāa̍wa̍ ha̍ā ā wa̍ tɛ̄ɛ̄ŋ pɛ̍, būŋgɛ̄ī yu̍ŋgu̍ ko̍ŋ ō nɔ̄ le̍ sɔ̄lāa̍ ve̍, o̍ būŋgɛ̄ī kēŋ ni᷄ŋ nya̍ nɔ̄ ni̍ mī lā ke̍ nda̍ lɛ̄ŋnde̍ŋ le̍ nda̍le̍ŋ. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ya̍ so̍ō ni̍.”