Read Southern Kisi Īsi̍kīāā 48 Bible Online

Īsi̍kīāā 48 - Southern Kisi bible

Īsi̍kīāā 48

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Mɛ̄ɛ̍ I̍sɔ̄lūɛ̍i̍ya̍ ā nɔ̄ mā sɔ̄la̍ lɛ̄ŋnde̍ŋ a̍ yu̍ŋgu̍la̍ŋ yɛ̍ cho̍ ho̍ō ni̍. Yu̍ŋgu̍ o̍ yu̍ŋgu̍ ā nɔ̄ mā sɔ̄la̍ būŋgɛ̄i̍ i̍ ndɛ̍i̍. Yu̍ŋgu̍ Da᷅ŋ ndo̍, būŋgɛ̄ī ndɛ̄i̍ ī nɔ̄ mī ī wa᷄ bā lūāŋndo̍. Pɛ̄ŋgu̍la̍ būŋgɛ̄ī ndɛ̄i̍ lā nɔ̄ mī lā kūɛ̄ a̍ nɛ̄i̍ Hɛ̍ti̍lɔ̄ŋ ndo̍, mī lā kūɛ̄ a̍ Hāmātī Pa̍a̍sī, mī lā kɔ̍ fu̍lā a̍ chi̍e̍e̍ bɛ̍ndōo̍ Ɛ̍nɔ̄ŋ, o̍ pɛ̄ŋgu̍la̍ būŋgɛ̄ī Dāma̍si̍kɔ̍ɔ̄ ve̍ tɛ̄ɛ̄ŋ, a̍ būŋgɛ̄ī Ha̍ma̍tī ve̍. Yu̍ŋgu̍ Da᷅ŋ ndo̍ būŋgɛ̄ī ndɛ̄i̍ ī nɔ̄ mī ī kūɛ̄ le̍nde̍ kɛ᷅, chɔ̄nɔ᷄ŋndo̍ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, mī ī fūūlu̍u̍ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēl lo̍.

²Yu̍ŋgu̍ A̍sīɛ̄ɛ̄ wo̍, būŋgɛ̄ī ndɛ̄i̍ ī nɔ̄ mī ī chīɛ̄ɛ̄li̍āŋ a̍ būŋgɛ̄i̍ yu̍ŋgu̍ Da᷅ŋndo̍. Nda̍ bɛ̍ɛ̍ būŋgɛ̄ī ndɛ̄i̍ ī nɔ̄ mī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋ ndo̍, mī ī fūūlu̍u̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēl lo̍.

³Yu̍ŋgu̍ Nāfi̍ta̍lī yo̍, būŋgɛ̄ī ndɛ̄i̍, ī nɔ̄ mī ī chīɛ̄ɛ̄li̍āŋ a̍ būŋgɛ̄i̍ yu̍ŋgu̍ A̍sīɛ̄ɛ̄ve̍. Nda̍ bɛ̍ɛ̍ būŋgɛ̄ī ndɛ̄i̍ ī nɔ̄ mī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋ ndo̍, mī ī fūūlu̍u̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēl lo̍.

⁴Yu̍ŋgu̍ Mānāa̍sē wo̍, būŋgɛ̄ī ndɛ̄i̍, ī nɔ̄ mī ī chīɛ̄ɛ̄li̍āŋ a̍ būŋgɛ̄i̍ yu̍ŋgu̍ Nāfi̍ta̍lī yo̍. Nda̍ bɛ̍ɛ̍ būŋgɛ̄ī ndɛ̄i̍ ī nɔ̄ mī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, mī ī fūūlu̍u̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēl lo̍.

⁵Yu̍ŋgu̍ E̍fi̍lūēmndo̍, būŋgɛ̄ī ndɛ̄i̍ ī nɔ̄ mī ī chīɛ̄ɛ̄li̍āŋ a̍ būŋgɛ̄i̍ yu̍ŋgu̍ Mānāa̍sē ve̍. Nda̍ bɛ̍ɛ̍ būŋgɛ̄ī ndɛ̄i̍ ī nɔ̄ mī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, mī ī fūūlu̍u̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēl lo̍.

⁶Yu̍ŋgu̍ Lūbɛ᷅ŋ ndo̍ būŋgɛ̄ī ndɛ̄i̍ ī nɔ̄ mī ī chīɛ̄ɛ̄li̍āŋ a̍ būŋgɛ̄i̍ yu̍ŋgu̍ E̍fi̍lūēm ndo̍. Nda̍ bɛ̍ɛ̍ būŋgɛ̄ī ndɛ̄i̍ ī nɔ̄ mī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, mī ī fūūlu̍u̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēllo̍.

⁷Yu̍ŋgu̍ Chu̍dā wo̍, būŋgɛ̄ī ndɛ̄i̍ ī nɔ̄ mī ī chīɛ̄ɛ̄li̍āŋ a̍ būŋgɛ̄i̍ yu̍ŋgu̍ Lūbɛ᷅ŋ ndo̍. Nda̍ bɛ̍ɛ̍ būŋgɛ̄ī ndɛ̄i̍ ī nɔ̄ mī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, mī ī fūūlu̍u̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēllo̍.”

⁸Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Būŋgɛ̄ī nya̍ nɔ̄ mī lā hɛ̄li̍, mī ī wa̍ te̍ŋge̍le̍ŋ nde̍, ī nɔ̄ mī ī chīɛ̄ɛ̄li̍āŋ a̍ būŋgɛ̄i̍ yu̍ŋgu̍ Chu̍dā wo̍. Būŋgɛ̄ī kēŋ bɛ̍ɛ̍, ī nɔ̄ mī ī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, mī ī fūūlu̍u̍ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēllo̍. Būŋgɛ̄i̍ he̍ī chɔ̍ŋ ba᷅ lūāŋndo̍, kɔ̍ ba᷅ tōūwo̍, ī nɔ̄ mī ī wa̍ mɛ̍ɛ̍līi̍la̍ŋ tɔ̍. O̍ būŋgɛ̄i̍ he̍ī tɛ̄ɛ̄ŋ kpe̍e̍kpe̍i̍ chīɛ̄ī ni̍ kāsīo̍o̍ ō nɔ̄ ni̍ mbō wa̍.

⁹“O̍ būŋgɛ̄i̍ he̍ī tɛ̄ɛ̄ŋ, lā nɔ̄ mī lā tūu̍ fo̍ndāa̍ bānde̍i̍ le̍ mɛ̍ɛ̍līi̍la̍ŋ tɔ̍, bu̍o̍o̍ le̍ mɛ̍ɛ̍līi̍la̍ŋ lā ŋɔ̄ma̍a̍ mī ndu̍ wa̍ le̍ ya̍ Mɛ̍lɛ̄ka̍ Ya̍a̍wɛ̄ɛ̄.

¹⁰Wānāa̍ sōlīāā lāsa̍lāa̍ ā nɔ̄ mā sɔ̄la̍ fo̍ndāa̍ ō ti᷄ŋ o̍ fo̍ndā kāsī kōŋ, fo̍nda̍ cho̍ ko̍ŋ wa᷅ le̍ ya̍ Mɛ̄lɛ̄ka̍ wo̍. Fo̍ndā wānāā sōlīāā lāsa̍lāa̍ ā nɔ̄ mā sɔ̄la̍ o̍ fo̍ndāa̍ ho̍ō wo̍, chɔ̍ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, kɔ̍ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēllo̍, ō nɔ̄ mbō wa̍ le̍ mɛ̍ɛ̍līi̍la̍ŋ tɔ̍, chɔ̍ŋ ba᷅ lūāŋndo̍, kɔ̍ ba᷅ tōūwo̍, ō nɔ̄ mbō wa̍ lē mɛ̍ɛ̍līi̍la̍ŋ lā hīɔ̍ɔ̍lu̍. Ndu̍yɛ̍ o̍ fo̍ndāa̍ ho̍ō tɛ̄ɛ̄ŋ kpe̍e̍kpe̍i̍ chīɛ̍i̍ kāsi̍ Mɛ̄lɛ̄ka̍ Ya̍a̍wɛ̄ɛ̄ wo̍ ō nɔ̄ mbō wa̍ ni̍.

¹¹Wānāā sōlīāā lāsa̍lāa̍, a̍ fu̍la̍ o̍ pūlāle̍ Sa̍dɔ̍kī le̍ŋ chōo̍ wa̍, nda̍ nya̍ nɔ̄ ni̍ mī lā ke᷄ fo̍ndāa̍ ho̍ō. Wānāā sōlīāā lāsa̍lāa̍ ha̍ā ā chō sa̍kpō o̍ ya̍ sāāŋgīāllo̍ ni᷄ŋ. Bōōndi̍i̍ I̍sɔ̄lūɛ̍i̍ya̍ ā fāŋa̍ŋ o̍ nɛ̄i̍ nūu̍ chōo̍, ma̍ mūli᷄ŋ sɔ̍ɔ̍ŋ bɛ̍nda̍ le̍ wo̍ŋ tōsāa̍ ve̍, wāŋnda̍ ha̍ā ā tu᷄l nda̍ kɔ̄ɔ̄lī, mɛ̄ɛ̍ Li̍va̍īya̍ ā pīli̍a̍a̍ ā tōsa̍ yɛ̍ le̍.

¹²Le̍la̍ŋ, nda̍ nɔ̄ mā sɔ̄la̍ fo̍ndāa̍ o̍ nda̍a̍ te̍ŋge̍le̍ŋ, o̍ fo̍ndā kāsi̍ hi̍o̍ū kpo̍u̍ wo̍ ni᷄ŋ, o̍ būŋgɛ̄i̍ yu̍ŋgu̍ Li̍va̍īyo̍ hōlnɔ᷄ŋndo̍. Ndu̍yɛ̍ būŋgɛ̄ī ndɛ̄i̍ ke̍ŋ, ndi̍ wa᷅ ni̍ŋ fo̍ndā kāsi̍ hi̍o̍ū kpo̍u̍ wo̍ ni̍.

¹³Ndu̍yɛ̍ Li̍va̍īya̍ bɛ̍ɛ̍, ā nɔ̄ mā sɔ̄la̍ būŋgɛ̄i̍ te̍ŋge̍le̍ŋ, o̍ būŋgɛ̄ī wānāā sōlīāā lāsa̍lāa̍ hōlnɔ᷄ŋndo̍ bā tōūwo̍. Būŋgɛ̄ī kēŋ bɛ̍ɛ̍, chɔ̍ŋ ba᷅ pāa̍le̍ŋ lē chāŋndo̍, kɔ̍ ba᷅ pāa̍le̍ŋ lē dēllo̍, ī nɔ̄ mī ī wa̍ le̍ mɛ̍ɛ̍līi̍la̍ŋ tɔ̍, chɔ̍ŋ ba᷅ lūāŋndo̍ kɔ̍ ba᷅ tōūwo̍, ī nɔ̄ mī ī wa̍ le̍ mɛ̍ɛ̍līi̍la̍ŋ lā hīɔ̍ɔ̍lu̍.

¹⁴Ndu̍yɛ̍ fo̍nda̍ cho̍ ho̍ō wā ō yɔ̄ŋga᷄ŋ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍, mbo̍ wā le̍ wānāā sōlīāā lāsa̍lāa̍ ha̍ā wo̍, wānāā sōlīāā lāsa̍lāa̍ ha̍ā ā nɔ̍ mā pīsī ndu̍, ɔ̄ɔ̄ mā sīīŋgi̍ ndu̍ a̍ fo̍ndā chēle̍ŋ, ɔ̄ɔ̄ mā ke᷄ wānā che᷅le̍ŋ ndu̍ le̍. Kāni̍ fo̍ndōle̍, fo̍ndā kāsi̍ ya̍ Mɛ̍lɛ̄ka̍ Ya̍a̍wɛ̄ɛ̄ wo̍ o̍ cho̍ ni̍.

¹⁵“Tē lā fāŋa̍ būŋgɛ̄ī kēŋ le̍ chīɛ̍i̍ ya̍ Mɛ̍lɛ̄ka̍ Ya̍a̍wɛ̄ɛ̄ wo̍ pɛ̍, lɛ̄ŋndē tɔ̄le̍ cho̍ lō, bānde̍i̍ mɛ̍ɛ̍līi̍la̍ŋ tɔ̍, bu̍o̍o̍ mɛ̍ɛ̍līi̍la̍ŋ lā tīɔ̍ɔ̍ŋ nde̍ŋ, le̍ŋ lē cho̍ lɛ̍ŋndē kāsī le̍. Lɛ̄ŋndē fa̍ū fa̍ū le̍ŋ le̍ cho̍ le̍ŋ ni̍, le̍ mī wāŋnda̍ cha᷄l lo̍ŋ, mā sōli̍ŋ kpe̍ku̍ a̍ le̍ŋ. O̍ lɛ̄ŋndē lēŋ tɛ̄ɛ̄ŋ chi̍e̍e̍ bɛ̍ndōo̍ nɔ̄ ni̍ mbō tāŋgu̍lu̍ŋ.

¹⁶Chi̍o̍o̍ ho̍ō bānde̍i̍ ni̍, bu̍o̍o̍ ni̍, ō nɔ̄ mbō wa̍ nyɛ̄ pīlɛ̍ kpe̍, mɛ̍ɛ̍līi̍yo̍ ō pīlɛ̍ a̍ tɛ̄ndāa̍ tɛ̄ɛ̄ŋ.

¹⁷Ndu̍yɛ̍ fo̍ndāa̍ ō nɔ̄ mbō lo᷄ fɛ̍kɛ̄ī, ō bālāā chi̍o̍o̍. Fo̍ndā fɛ̄kɛ̄īyo̍ ho̍ō, kpēŋgu᷄ŋ ndɔ̄ɔ̄ŋ hi̍ɔ̍ɔ̍lo̍ŋ kpo̍u̍, ō nɔ̄ mbō wa̍ bu̍o̍o̍ nɛ̄īyo̍ kɛ̄mɔ̄ɔ̍ lē hīɔ̍ɔ̍lu̍ a̍ bi̍dīi̍ŋ.

¹⁸Tē lā chīi̍ chi̍o̍o̍ ho̍ō tāŋgūl pɛ̍, fo̍ndāa̍ nɔ̄ mbō lo̍ vɛ̄lɛ̄ o̍ chi̍o̍o̍ bā tōūwo̍ kpe̍e̍kpe̍i̍, o̍ fo̍ndā kāsīo̍o̍ hōlnɔ᷄ŋndo̍. Fo̍nda̍ cho̍ ko̍ŋ lo᷅ wo̍, bā pāa̍le̍ŋ lē chāŋndo̍ wo̍, ō nɔ̄ mbō wa̍ bānde̍i̍ le̍ mɛ̍ɛ̍līi̍la̍ŋ lā hīɔ̍ɔ̍lu̍, bu̍o̍o̍ mɛ̍ɛ̍līi̍la̍ŋ lā tīɔ̍ɔ̍ŋ, bā pāa̍le̍ŋ lē dēllo̍, ō nɔ̄ mbō wa̍ bānde̍i̍ mɛ̍ɛ̍līi̍la̍ŋ lā hīɔ̍ɔ̍lu̍, bu̍o̍o̍ mɛ̍ɛ̍līi̍la̍ŋ lā tīɔ̍ɔ̍ŋ. Ndu̍yɛ̍ fo̍nda̍ cho̍ ko̍ŋ lo᷅ wo̍, ndu̍ cho̍ wā le̍ wa̍lta̍ ŋ̄chīɛ̄ɛ̄la̍ŋ tōsāa̍ ni̍, le̍ mī nyɛ̄ dīa̍a̍ sɔ̄la̍ŋ le̍ wānāā wa̍lla̍ o̍ chi̍o̍o̍ ho̍ō ni᷄ŋ.

¹⁹Wānāa̍ cho̍ fūlā o̍ yu̍ŋgu̍la̍ŋ I̍sɔ̄lūɛ̄ī cho̍o̍ mā yɔ᷄ŋ nda̍ le̍ wa̍llo̍ o̍ chi̍o̍o̍ ho̍ō ni᷄ŋ nda̍, nda̍ cho̍ wā wa̍lta̍ ŋ̄chīɛ̄ɛ̄la̍ŋ tōsāa̍ o̍ fo̍ndāa̍ ho̍ō ni̍.

²⁰“Mɛ̄ɛ̍ būŋgɛ̄ī kāsīī nya̍ chō ke̍ŋ hɛ̍lī mī ndi̍ wa̍ te̍ŋge̍le̍ŋ nde̍, kpo̍u̍ kpo̍u̍ ī nɔ̄ mī ī wa᷄ bānde̍i̍ le̍ mɛ̍ɛ̍līi̍la̍ŋ tɔ̍, ndu̍yɛ̍ bu̍o̍o̍ bɛ̍ɛ̍ le̍nde̍ ko̍ni̍. Ndu̍yɛ̍ o̍ būŋgɛ̄ī kēŋ ni᷄ŋ chi̍o̍o̍ ō nɔ̄ ni̍ mbō fūla̍.

²¹“Tē lā fāŋa̍ fo̍nda̍ cho̍ le̍ chīɛ̍i̍ Mɛ̄lɛ̄ka̍a̍ wo̍ pɛ̍, a̍ fo̍nda̍ cho̍ le̍ Li̍va̍īya̍ wo̍, a̍ fo̍nda̍ cho̍ le̍ chi̍o̍o̍ tāŋgūllo̍ wo̍, būŋga᷄ŋ chō lō ŋ̄ mūu̍ŋ vēllāa̍ vēllē, bā pāa̍le̍ŋ lē chāŋndo̍ a̍ bā pāa̍le̍ŋ lē dēllo̍. Būŋgāŋ mūu̍ŋndo̍ŋ mu᷅ŋ, le̍ wāna̍ cho̍ wā lɛ̄ŋnde̍ŋ chīla̍ŋ ndo̍ o̍ cho̍ ni̍. Ndu̍yɛ̍ būŋgāŋ mūu̍ŋndo̍ŋ mu᷅ŋ, ī kɛ᷅ kɛ᷅ chɔ̍ŋ nāa̍ i̍ ka̍ndu̍ŋ nda̍, kɔ̍ o̍ pɛ̄ŋgu̍la̍ lɛ̄ŋndē I̍sɔ̍lūɛ̄īle̍ŋ, ī nɔ̄ mī wa̍ bu̍o̍o̍ le̍ mɛ̍ɛ̍līi̍la̍ŋ lā ŋɔ̍ma̍a̍ a̍ nyɛ̄ pɔ̄mbɔ̄. Būŋga᷄ŋ cho̍ mu᷅ŋ lō vēllāa̍ vēllē wo̍ŋ, he̍ī chō lākɔ̄ bɔ̄ŋā a̍ būŋgɛ̄i̍ yu̍ŋgu̍ Chu̍dā ve̍ bā lūāŋndo̍, mī he̍ī kɔ̍ bɔ̍ŋā a̍ būŋgɛ̄i̍ yu̍ŋgu̍ Bɛ̍ŋnja̍mīŋ nde̍ bā tōūwo̍, mī būŋgɛ̄i̍ cho̍ wā le̍ Li̍va̍īya̍ ve̍, a̍ būŋgɛ̄i̍ cho̍ wā le̍ chi̍o̍o̍ tāŋgūllo̍ ve̍, a̍ fo̍nda̍ cho̍ wā le̍ chīɛ̍i̍ Mɛ̄lɛ̄ka̍a̍ tāŋgūllo̍ ve̍ ŋ̄ wa̍ tɛ̄ɛ̄ŋ.”

²²

²³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Yu̍ŋgu̍la̍ŋ lā pīlɛ̍ la̍ŋ būŋgāŋ nda̍ nɔ̄ mā sɔ̄la̍ wo̍ŋ mu̍ŋ cho̍ mu᷅ŋ ni̍. Yu̍ŋgu̍ Bɛ̍ŋnja̍mīŋ ndo̍ būŋgɛ̄ī ndɛ̄i̍ nɔ̍ ni̍ mī chīɛ̄ɛ̄li̍āŋ a̍ fo̍ndā cho̍ wā ō hɛ̄līāā te̍ŋge̍le̍ŋ ndo̍. Ndu̍yɛ̍ nda̍ bɛ̍ɛ̍ būŋgɛ̄ī ndɛ̄i̍ ī nɔ̄ mī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, mī ī fūūlu̍u̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēllo̍.

²⁴Yu̍ŋgu̍ Si̍mīɔ̄ŋ ndo̍ būŋgɛ̄ī ndɛ̄i̍ ndi̍ nɔ̍ mī ī chīɛ̄ɛ̄li̍āŋ a̍ būŋgɛ̄i̍ yu̍ŋgu̍ Bɛ̍ŋnja̍mīŋ nde̍ ni̍. Nda̍ bɛ̍ɛ̍ būŋgɛ̄ī ndɛ̄i̍ ī nɔ̄ mī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, mī ī fūūlu̍u̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēllo̍.

²⁵Yu̍ŋgu̍ I̍sa̍a̍kā wo̍ būŋgɛ̄ī ndɛ̄i̍ ndi̍ nɔ̍ mī ī chīɛ̄ɛ̄li̍āŋ a̍ būŋgɛ̄i̍ yu̍ŋgu̍ Si̍mīɔ̄ŋnde̍ ni̍. Nda̍ bɛ̍ɛ̍ būŋgɛ̄ī ndɛ̄i̍ ī nɔ̄ mī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, mī ī fūūlu̍u̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēllo̍.

²⁶Yu̍ŋgu̍ Sɛ̍bu̍lɔ̄ŋ ndo̍ būŋgɛ̄ī ndɛ̄i̍ ndi̍ nɔ̍ mī ī chīɛ̄ɛ̄li̍āŋ a̍ būŋgɛ̄i̍ yu̍ŋgu̍ I̍sa̍a̍kā wo̍ ni̍. Nda̍ bɛ̍ɛ̍ būŋgɛ̄ī ndɛ̄i̍ ī nɔ̄ mī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, mī ī fūūlu̍u̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēllo̍.

²⁷Yu̍ŋgu̍ Ka̍a̍dī wo̍ būŋgɛ̄ī ndɛ̄i̍ ndi̍ nɔ̍ mī ī chīɛ̄ɛ̄li̍āŋ a̍ būŋgɛ̄i̍ yu̍ŋgu̍ Sɛ̍bu̍lɔ̄ŋ nde̍ ni̍. Nda̍ bɛ̍ɛ̍ būŋgɛ̄ī ndɛ̄i̍ ī nɔ̄ mī chɛ᷄ŋ o̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē chāŋndo̍, mī ī fūūlu̍u̍ a̍ pɛ̄ŋgu̍la̍ lɛ̄ŋndē I̍sɔ̄lūɛ̍i̍le̍ŋ bā pāa̍le̍ŋ lē dēllo̍.

²⁸Yu̍ŋgu̍ Ka̍a̍dī wo̍ būŋgɛ̄ī ndɛ̄i̍ pɛ̄ŋgu̍la̍ ndɔ̄la̍ŋ bā tōūwo̍, lā nɔ̄ mī lā chɛ᷄ŋ a̍ Ta̍māā chi̍e̍e̍, mī lā kūɛ̄ a̍ pēēla̍ pɔ̍mbɔ̄la̍ŋ Mɛ̄lūībātī Ka̍dɛ̍sī, o̍ ko̍ŋ kɔ̍ɔ̍lī, mī lā hēēlu̍ bā lūāŋndo̍ a̍ pɛ̄ŋgu̍la̍ŋ a̍ lɛ̄ŋndē I̍chi̍pīle̍ŋ, mi̍ lā kūɛ̄ a̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā.

²⁹Nu̍a̍ā nya̍ nɔ̄ ni̍ mī lā pīɔ̍u̍ yu̍ŋgu̍la̍ŋ I̍sɔ̄lūɛ̄ī lɛ̄ŋnde̍ŋ nde᷅ŋ a̍ būŋga᷄ŋ kpɛ̍ kpɛ̍ māā nyɛ̄m nda̍ kɛ᷅.” Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ Kpu̍lu̍ŋgūma̍ bɛ̄ndōo̍, nyɛ̍ o̍ di̍mi̍ wo̍ cho̍ ko̍ŋ ni̍.

³⁰Sāāsa̍ cho̍ wā Chūlu̍sɛ̄lɛ̄m ō bālāā wo̍, ō nɔ̄ mbō nɔ̄ dīōlā lūɛ̄īyāā la̍ŋ tɔ̍ a̍ lā tīɔ̍ɔ̍ŋ. Dīōlā tɔ̍ a̍ lā tīɔ̍ɔ̍ŋnda̍ŋ nda᷅ŋ, la̍ŋ lā si᷄m le̍ dīōlā yu̍ŋgu̍la̍ tɔ̍ a̍ lā tīɔ̍ɔ̍ŋ nda̍ŋ I̍sɔ̄lūɛ̄ī ni̍. Sāāsāa̍ ho̍ō kpēŋgu᷄ŋ ndɔ̄ŋ hi̍ɔ̍ɔ̍lo̍ŋ, īkpēŋgū o̍ īkpēŋgū ī nɔ̄ mī ī wa̍ bānde̍i̍ le̍ mɛ̍ɛ̍līi̍yo̍ ō pīlɛ̍ a̍ tɛ̄ndāa̍ tɛ̄ɛ̄ŋ. Ndu̍yɛ̍ o̍ īkpēŋgū o̍ īkpēŋgū, dīōlā lūɛ̄īyāāla̍ŋ lā nɔ̄ mī lā wa̍ lā yāa̍. Dīōla̍ nɔ̍ mī lā wa̍ bā lūāŋndo̍ la̍ŋ, ō pīlɔ̍ɔ̍ dīōla̍ŋ āā Lūbɛ᷅ŋ, ō pīlɔ̍ɔ̍ āā Chu̍dā, ō pīlɔ̍ɔ̍ āā Li̍va̍ī. La̍ nɔ̍ mī lā wa᷄ bā pāa̍le̍ŋ lē chāŋndo̍ la̍ŋ, ō pīlɔ̍ɔ̍ dīōla̍ŋ āā Chōo̍sɛ̍, ō pīlɔ̍ɔ̍ āā Bɛ̍ŋnja̍mīŋ, ō pīlɔ̍ɔ̍ āā Da᷅ŋ. La̍ nɔ̍ mī lā wa̍ bā tōūwo̍ la̍ŋ, ō pīlɔ̍ɔ̍ dīōla̍ŋ āā Si̍mīɔ̄ŋ, ō pīlɔ̍ɔ̍ āā, I̍sa̍a̍kā, ō pīlɔ̍ɔ̍ āā, Sɛ̍bu̍lɔ̄ŋ. La̍ cho̍ wā bā pāa̍le̍ŋ lē dēllo̍ la̍ŋ, ō pīlɔ̍ɔ̍ dīōla̍ŋ āā Ka̍a̍dī, ō pīlɔ̍ɔ̍ āā A̍sīɛ̄ɛ̄, ō pīlɔ̍ɔ̍ (...)

³⁵Mɛ̄ɛ̍ sāāsa̍ cho̍ wā chi̍o̍o̍ ho̍ō ō bālāā wo̍, kpo̍u̍ kpo̍u̍, ō nɔ̄ mbō wa̍ bālɔ̄ɔ̍ chɛ̍ chɛ̍ mɛ̍ɛ̍līi̍la̍ŋ lā ŋɔ᷄mpu᷅m. Ndu̍yɛ̍ chɔ̍ŋ ni᷅ŋ a̍ te̍le̍ŋndo̍ ho̍ō mbō kūɛ̄ a̍ lāchī kɛ᷅, chi̍o̍o̍ ho̍ō dīōlā ndɔ̄la̍ŋ la̍ cho̍ ni᷅ŋ wā ni̍ āā, “Mɛ̄lɛ̄ka̍ Ya̍a̍wɛ̄ɛ̄ o̍ cho̍ lo̍ŋ.”