Read Southern Kisi Īsi̍kīāā 6 Bible Online

Īsi̍kīāā 6 - Southern Kisi bible

Īsi̍kīāā 6

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍. Mbo̍ dīmūl la̍ āā,

²“Wāna̍ chi̍o̍o̍ Īsi̍kīāā, he̍e̍lu̍ hɔ᷅lla̍ o̍ lūāŋūŋ bɛ̄ndo̍ŋ I̍sɔ̄lūɛ̄ī, mā di̍mu̍l mu̍ŋ a̍ nyɛ̄ pālāa̍ ko̍māl ni̍ŋ mu̍ŋ ndo̍ o̍kɔ̄ɔ̄.

³Di̍mu̍l lu̍a̍ŋūŋ bɛ̄ndo̍ŋ I̍sɔ̄lūɛ̄ī kpo̍u̍, a̍ pēmbo᷄ŋ, a̍ kpōlōŋ kpo̍lo̍ŋnda̍ŋ, a̍ lɛ̄ŋīī dɛ̍ŋgbɛ̍i̍ o̍ pēmbo᷄ŋ tɛ̄ɛ̄ŋ mā ya᷄ŋ ya̍ Mɛ̍lɛ̄ka̍ Ya̍a̍wɛ̄ɛ̄ nīla̍ŋ. Di̍mu̍l nda̍ māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ di̍mi̍ a̍a̍, ‘Lā ya᷄ŋ ni᷅la̍ŋ mī lā tūēī nyɛ̄ ya̍ I̍ cho̍ hūnɔ̄ɔ̄ tōsā o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ ndo̍. I̍ cho̍ hūnɔ̄ɔ̄ ya̍a̍mɔ̍ɔ̍wa̍ vīōmɔ̄ɔ̄ mā hu᷄ŋ de᷅l lɛ̄ŋndē I̍sɔ̄lūɛ̍i̍le̍ŋ chōo̍, ndu̍yɛ̍ fo̍ndāŋndā lāsōōlu̍u̍la̍ŋ I̍sɔ̄lūɛ̄ī kpo̍u̍ mā tɛ̄ɛ̄mbu̍u̍ la̍ŋ.

⁴Ā chō hūnɔ̄ɔ̄ ma̍āŋndā nyāla̍ŋ pēsī, ndu̍yɛ̍ mā tɛ̄ɛ̄mbu̍u̍ ma̍āŋndā nya̍ lūām nyɛ᷅m chūŋ kɛ̄ndɔ᷄ŋ lēchōo̍ la̍ŋ kpo̍u̍. Ndu̍yɛ̍ wānā o̍ wāna̍ cho̍ o̍ fo̍ndāŋndā lāsōōlu̍u̍la̍ la̍ŋ, ya̍a̍mɔ̍ɔ̍wa̍ chō nda̍ hūnɔ̄ɔ̄ dīū kpo̍u̍ nyɛ᷅m nda̍ŋ nda̍ sōōlūū mu̍ŋ ndo̍ŋ īkɛ̄i̍.

⁵Mɛ̄ɛ̍ mī to̍sa̍ mī I̍sɔ̄lūɛ̍i̍ya̍ dīāllūŋ nda᷅ŋ vi̍lɛ̍i̍yo̍ŋ ŋ̄ wa̍ ŋ̄ sɛ̄ŋīa̍ŋndo̍ŋ lɛ̄ŋ o̍ nyɛ̄m nda̍ŋ nda̍ sōōlūū wo̍ŋ īkɛ̄i̍. Pāālā ndāla̍ŋ lā wā ni̍ŋ la̍ mɛ̍līāā, lā bālāā ma̍āŋnda̍ŋ si̍lɔ̍.

⁶Chi̍e̍e̍ o̍ chi̍e̍e̍ bɛ̍ndu̍ cho̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, I̍ cho̍ mu̍ŋ hūnɔ̄ɔ̄ tɛ̄ɛ̄mbūū kpo̍u̍. Nyɛ̄m nda̍ sōōlūū māā Mɛ̄lɛ̄ka̍ā ndā wo̍ŋ, mī pe̍si̍ pe̍si̍ mu̍ŋ, ndu̍yɛ̍, mī tɛ̍ɛ̍mbu̍u̍ fo̍ndāŋndā lāsōōlu̍u̍la̍ŋ kpo̍u̍. Ma̍āŋndā ndāla̍ŋ lā chō hūnɔ̄ɔ̄ wā lā tɛ̄ɛ̄mbāā, ndu̍yɛ̍ ma̍āŋndā ndāla̍ nda̍ lūām nyɛ᷅m chūŋ kɛ̄ndɔ᷄ŋ lēchōo̍ la̍ŋ, mī pe̍si̍ la̍ŋ kpo̍u̍. Nyɛ̄ o̍ nyɛ̄ I̍sɔ̄lūɛ̍i̍ya̍ ā tōōsi̍a̍a̍ a̍ bālā ndāla̍ŋ, I̍ cho̍ mu̍ŋ hūnɔ̄ɔ̄ tɛ̄ɛ̄mbūū mī ba̍su̍ mu̍ŋ tɛ̍ɛ̍.

⁷Wāŋ vīlɛ̍i̍ya̍ ā chō hūnɔ̄ɔ̄ tīū o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍. O̍ ko̍ŋ, I̍sɔ̄lūɛ̍i̍ya̍a̍ cho̍ lō yōōmū wa̍ mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁸“ ‘Kɛ̍ ndu̍yɛ̍ I̍ tɛ̍ɛ̍mbūū ni̍ŋ nda̍ kpo̍u̍ le̍, I̍ cho̍ tōsā mī ā ti᷄ŋ ā lo̍ yōōmū. Kɛ̍ a̍ hi̍a̍lūŋ ni̍ŋ ka̍ŋ mā lo᷄ yo̍o̍mū wa̍ bɛ̍ɛ̍, ya̍a̍mɔ̍ɔ̍wa̍ chō hūnɔ̄ɔ̄ sɛ̄ŋi᷄ŋ a̍ nda̍ kpo̍u̍ o̍ lɛ̄ŋīī chēle̍ŋnde̍ ni᷄ŋ.

⁹Lo̍ŋ nda̍ chō wā o̍ bīyɔ̄ɔ̍ ni᷄ŋ ni̍. O̍ ko̍ŋ, mā lōōnu̍ŋ a̍ ya̍, mī nda̍ pīla̍ sīna̍ māā le̍ mɛ̄ɛ̍ nda̍ sōli̍ ya̍ dīōm, ma̍ tɛ̄ɛ̄mbūū ya̍ lābɛ̄ɛ̄, ndu̍yɛ̍ ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā ndā, yɔ̄ŋi̍ nda̍ sōōlu̍u̍ ya̍ yɛ̍, māā le̍la̍ŋ ya̍ I̍ dɔ̍ɔ̍nu᷄ŋ tu̍mbe̍ a̍ nda̍ ni̍ mi̍ tu̍sī nda̍ dɛ̍nɛ̍ pa̍lāa̍ chōo̍. Ndu̍yɛ̍ o̍ mɛ̄ɛ̄lu̍la̍ŋ kpɔ̍ŋ, nda̍ pīla̍ chō īchāli̍, mā lōōnu̍ŋ a̍ sɔ̄ɔ̍ŋ wɔ̍ɔ̍ŋ nda̍ tōsa̍ wo̍ŋ, mā tāmbu̍ kɔ̄l a̍ nda̍ pi̍la̍.

¹⁰Ā chō sīnā māā kɔ̄ŋgɔ̄la᷄ŋ ya̍ I̍ kɔ̍ŋgɔ̍la̍ŋ nda̍ le̍ nda̍ nyɛ̄ pālāa̍ tūsīo̍o̍ chōo̍ wo̍, māā ō ve᷄ fo̍ndō fu̍u̍ le̍. O̍ ko̍ŋ mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.’ ”

¹¹Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmī āā, “Cha̍ŋ le̍ wāŋnda̍ I̍sɔ̄lūɛ̄ī. Ko̍ŋu̍l kpe̍le̍ŋ mā kūā a̍ bāla̍ŋ lɔ̄ɔ̍, mā nīɔ̄ū cha̍pāā chāpāā a̍ cha᷄ŋndo̍, kāni̍ fo̍ndōle̍, le̍ sɔ̄ɔ̍ŋ wɔ̍ɔ̍ŋ bɛ̄ndūŋ ya̍ Mɛ̍lɛ̄ka̍ tu᷄l yɛ̄le̍ŋ tūl bɛ̄ndōo̍, mi̍ wāŋnda̍ I̍sɔ̄lūɛ̄ī a̍ to̍sā mu̍ŋ, ndu̍yɛ̍ mi̍ dɛ̍nɛ̍ pa̍lāā bɛ̄ndōo̍ ō hūŋ nda̍ tōlɔ̄ɔ̍ chōo̍ wo̍ŋ. Ya̍a̍mɔ̍ɔ̍wa̍ chō nda̍ hūnɔ̄ɔ̄ dīū a̍ mɔ̄ɔ̄ŋ fāŋndo̍ŋ, ndu̍yɛ̍ mī yīmā bɛ̄ndūa̍ŋ mā de᷄l o̍ lɛ̄ŋndē ndāle̍ŋ ni᷄ŋ, a̍ nāālā wɔ̄ɔ̍ŋnda̍ŋ mī I̍sɔ̄lūɛ̍i̍ya̍a̍ bɔ̍ɔ̍ bɔ̍ɔ̍ a̍ sɔ̍la̍ pīɔ̍mndo̍.

¹²A̍ cho̍ wā la̍nda̍ŋ la̍nda̍ŋ nda̍, nāālā wɔ̄ɔ̍ŋnda̍ŋ la̍ cho̍ nda̍ hūnɔ̄ɔ̄ chīī ni̍, o̍ ko̍ŋ kɔ̍ɔ̍lī, a̍ cho̍ wā māchɛ̄lū wa̍, mī ya̍a̍mɔ̍ɔ̍wa̍ hu᷄ŋ di̍ū nda̍. Ndu̍yɛ̍ ā tūa̍a̍ lo᷅ ni̍ŋ yo̍o̍mū wa̍, yīa̍a̍ŋ ma̍ cho̍ nda̍ hūnɔ̄ɔ̄ dīū ni̍. Wāŋnda̍ I̍sɔ̄lūɛ̄ī a̍ to̍sa̍ mi̍ du̍a̍u̍nu᷄ŋ tu̍mbe̍ a̍ nda̍ o̍ ka̍lā ka̍lā, ndu̍yɛ̍ mɛ̄ɛ̍ mī tu̍si̍ nda̍ dɛ̍nɛ̍ pa̍lāa̍ chōo̍ mbō fūūlu̍u̍ nda̍ mɛ̍ɛ̄, ma̍lāŋ ya̍ I̍ hi̍nī kɔ᷅l.

¹³Mɛ̄ɛ̍ mī to̍sa̍ mī wāŋnda̍ I̍sɔ̄lūɛ̄ī dīāllūŋ nda᷅ŋ vi̍lɛ̍i̍yo̍ŋ, ŋ̄ wa̍ ŋ̄ sɛ̄ŋīa̍ŋ nyɛ᷅m nda̍ŋ nda̍ sōōlūū wo̍ŋ tɛ̄ɛ̄ŋ, a̍ o̍ ma̍āŋndā ndāla̍ŋ bālɔ̄ɔ̍ si̍la̍. Bā o̍ bā sōōlu̍u̍la̍ ndāla̍ŋ lā chō, o̍ pēmbo᷄ŋ chōo̍ ni̍, a̍ o̍ lūāŋūŋ bɛ̍ndo̍ŋ chōo̍, a̍ o̍ yɔ̄mīī pūīyɛ̄i̍ bɛ̄ŋgu̍, a̍ o̍ yɔ̄mīī ɔ̍kūī pūīyɛ̄i̍ bɛ̄ŋgu̍, a̍ bā o̍ bā nda̍ lūām nyɛ᷅m chūŋ kɛ̄ndɔ᷄ŋ o̍ mɛ̄lɛ̄ka̍a̍ ndāā ka̍ŋ ndo̍, wāŋ vīlɛ̍i̍ya̍ ā wā ni̍ŋ a̍ ti̍u̍wāā lo̍ŋ kpo̍u̍. O̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹⁴Mɛ̄ɛ̍ mī tɛ̍ɛ̍mbu̍u̍ lɛ̄ŋndē I̍sɔ̄lūɛ̍i̍le̍ŋ, mī to̍sa̍ mī lē lo̍ pɔ̄m. Bā o̍ bā nda̍ chō, chɔ̍ŋ o̍ lɛ̄ŋndē po̍lte̍ŋ bā tōūwo̍, mbō kūɛ̄ a̍ chi̍e̍e̍ bɛ̍ndōo̍ Lu̍i̍bi̍lā o̍ cho̍ bā lūāŋndo̍ wo̍, lo̍ŋ kpo̍u̍ I̍ cho̍ tɛ̄ɛ̄mbūū. O̍ ko̍ŋ, mi̍ wāŋnda̍ I̍sɔ̄lūɛ̄ī a̍ si̍na̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”