Read Southern Kisi Īsi̍kīāā 7 Bible Online

Īsi̍kīāā 7 - Southern Kisi bible

Īsi̍kīāā 7

¹O̍ ko̍ŋ kɔ̍ɔ̍lī mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍, mbo̍ dīmūl la̍ āā,

²“Wāna̍ chi̍o̍o̍ Īsi̍kīāā, di̍mu̍l wa᷅ŋnda̍ I̍sɔ̄lūɛ̄ī, māā ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyɛ̄ ya̍ I̍ di̍mi̍ a̍ lɛ̄ŋndē I̍sɔ̄lūɛ̍i̍le̍ŋ o̍kɔ̄ɔ̄ wo̍ cho̍ ho̍ō ni̍. Wāŋnda̍ I̍sɔ̄lūɛ̄ī, mɛ̄ɛ̄lu̍la̍ŋ lā fūūlu̍u̍ le̍ nya̍. Bōōndi̍i̍ lɛ̄ŋndē I̍sɔ̄lūɛ̍i̍le̍ŋ kpo̍u̍ le̍ hi᷅ŋ pīɔ̄l le̍ ī fūūlu̍u̍.

³“Mɛ̄ɛ̄lu̍la̍ nyāla̍ŋ lā fūūlu̍u̍ wāŋnda̍ I̍sɔ̄lūɛ̄ī. Bōōndi̍i̍ ya̍ Mɛ̍lɛ̄ka̍ hīŋ nya̍ chɔ̄m māā I̍ dɔ̍ɔ̍ŋnu᷄ŋ tu̍mbe̍ a̍ nya̍ o̍ ka̍lā ka̍lā ve̍ ndi̍ cho̍ he̍ī ni̍. Wāŋnda̍ I̍sɔ̄lūɛ̄ī, nyɛ̄ o̍ nyɛ̄ wɔ̄ɔ̍ŋ nya̍ tōsa̍ mi̍ ya̍ Mɛ̍lɛ̄ka̍ tūl ndu̍ yɛ̄le̍ŋ, te̍le̍ŋ ya̍ hi᷅ŋ nya̍ yāmɛ̍i̍ kīlūl mī tu̍si̍ nya̍ dɛ̍nɛ̍ pālāa̍ cho̍ wo̍ ō hīŋ. Ndu̍yɛ̍ mɛ̄ɛ̍ kūɛ̍ɛ̍la̍ nyāla̍ŋ lā chō yɛ̍, le̍nde̍ ya̍ I̍ tu̍sī ni̍ŋ nya̍ nyɛ̄ pālāa̍ chōo̍ ni̍.

⁴Ndu̍yɛ̍ īnyīɛ̍ɛ̍ bɛ̍ɛ̍ I̍ cho̍ nya̍ tūīīnɔ᷄ŋ, mī wānā o̍ wānā hɛ̍lu᷄ŋ le̍ni̍ŋ te̍. I̍ cho̍ nya̍ dɛ̍nɛ̍ pa̍lāā bɛ̄ndōo̍ tūsī chōo̍ mbō fūūlu̍u̍ nya̍ mɛ̍ɛ̄, kāni̍ fo̍ndōle̍ le̍ sɔ̄ɔ̍ŋ wɔ̍ɔ̍ŋ bɛ̄ndūŋ cho̍ nya̍ tɛ̄ɛ̄ŋ, ŋ̄ ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

⁵Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ āā, “Dɛ̍nɛ̍ pa̍lāa̍ hīŋ nya̍ tōlɔ̄ɔ̄ chōo̍, ho̍ō wā ni̍ŋ fa̍ŋa᷄ŋndo̍ mī ho̍ō hīŋ.

⁶Ndu̍yɛ̍ te̍le̍ŋ ko̍ŋ ō fūūlu̍u̍. Mɛ̄ɛ̄lu̍la̍ nyāla̍ŋ lā hīŋ wāŋnda̍ I̍sɔ̄lūɛ̄ī. Te̍le̍ŋ nya̍ hīŋ chūū kpo̍u̍ wo̍ ō fūūlu̍u̍.

⁷Nya̍ wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ, dɛ̍nɛ̍ pa̍lāā bɛ̄ndōo̍ hīŋ le̍ nya̍. Wāŋnda̍ I̍sɔ̄lūɛ̄ī, bōōnde̍i̍ fūūlu̍u̍ le̍ nya̍, pāa̍le̍ kɔ̄l tāmbɛ̍i̍le̍ bɛ̍ndūle̍ŋ lē hīŋ. Bɔ̄ɔ̄lūū kɔ̄l kɛ̄ndɛ̄ nya̍ tōsā o̍ lūāŋūŋ nyāa̍ŋ sōōlūūwo̍ ni᷄ŋ ndo̍, te̍le̍ŋ cho̍ fūūlūū mbō mɛ̄ɛ̄lu̍. Mɛ̄ɛ̍ ni᷅ŋ bɔ̄ɔ̄lūūlā īsīōōŋnda̍ŋ mī lā wa̍ lo̍ŋ.

⁸“Ō bēndu̍ lɛ̍ bɛ̍ɛ̍ ti᷅ŋ te̍, mī ya̍ Mɛ̍lɛ̄ka̍ hu᷄ŋ dɔ̍ɔ̍ŋ tu̍mbe̍ a̍ nya̍ mī ki̍lu̍l nya̍ yāmɛ̍i̍, le̍ nya̍ dɛ̍nɛ̍ pa̍lāā bɛ̄ndōo̍ tūsīo̍o̍ chōo̍ mɛ̄ɛ̍ kūɛ̍ɛ̍la̍ nyāla̍ŋ lā chō yɛ̍. I̍ cho̍ nya̍ dɛ̍nɛ̍ pa̍lāā bɛ̄ndōo̍ tūsī chōo̍ mbō fūūlu̍u̍ nya̍ mɛ̍ɛ̄, kāni̍ fo̍ndōle̍, le̍ sɔ̄ɔ̍ŋ wɔ̍ɔ̍ŋ bɛ̄ndūŋ nya̍ tōsa̍ wo̍ŋ, ŋ̄ ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ.

⁹Ndu̍yɛ̍, īnyīɛ̍ɛ̍ bɛ̍ɛ̍ I̍ cho̍ nya̍ tūīīnɔ᷄ŋ mī wānā o̍ wānā hɛ̍lu᷄ŋ le̍ni̍ŋ te̍. Ndu̍yɛ̍ mɛ̄ɛ̍ kūɛ̍ɛ̍la̍ nyāla̍ŋ lā chō yɛ̍, le̍nde̍ ya̍ I̍ tu̍sī ni̍ŋ nya̍ nyɛ̄ pa̍lāa̍ chōo̍ ni̍, kāni̍ fo̍ndōle̍ le̍ sɔ̄ɔ̍ŋ wɔ̍ɔ̍ŋ bɛ̄ndūŋ cho̍ nya̍ tɛ̄ɛ̄ŋ ndo̍ŋ, ŋ̄ ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ. O̍ ko̍ŋ nya̍ chō sīnā ni̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, māā ya̍ tu̍si̍ nya̍ nyɛ̄ pa̍lāa̍ chōo̍ ni̍.

¹⁰“Wāŋnda̍ I̍sɔ̄lūɛ̄ī, bōōnde̍i̍ fūūlu̍u̍! Te̍le̍ŋ kɔ̄l tāmbɛ̍i̍ bɛ̍ndōo̍ ō kōma̍l nya̍. Pāa̍le̍ ya̍ Mɛ̍lɛ̄ka̍ tūsī ni̍ŋ nya̍ dɛ̍nɛ̍ pa̍lāā bɛ̄ndōo̍ chōo̍ le̍ŋ lē fūūlu̍u̍. Ka̍fāla̍ŋ lā bīī mi̍ lā kūī o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, ndu̍yɛ̍, mi̍ yōŋgāa̍ pīā wāŋndā chīe̍e̍ya̍ o̍ lākɔ̄l cha̍ cha̍.

¹¹Wānāa̍ cho̍ ha̍ā sɔ̄ɔ̍ŋ mu᷅ŋ tōsāa̍ ki̍nɛ̍i̍ ya̍, nyɛ̄ o̍ nyɛ̄ nda̍ chō wāŋnda̍ tōsāllo̍, nda̍ bɛ̍ɛ̍ le̍nde̍ ko̍ni̍ ya̍ Mɛ̄lɛ̄ka̍ chō nda̍ tōsāl ni̍, mī pa̍a̍wa̍ nda̍ le̍ dɛ̍nɛ̍ wɔ̍ɔ̍ŋ nda̍ chō tōsāa̍ wo̍. Wāŋnda̍ ha̍ā nda̍ kpo̍u̍ ā chō hūnɔ̄ɔ̄ chūū, wāŋndo̍ ō pīlɛ̍ bɛ̍ɛ̍ lo᷅ ni̍ŋ yo̍o̍mū le̍. Ndu̍yɛ̍, nyɛ̄ o̍ nyɛ̄ nda̍ chūūŋgi̍a̍a̍, nyɛ̄m ba̍ā kālā ni̍, sūltā chēle̍ŋndā nda̍ nɔ̄ la̍ŋ ni̍, kpo̍u̍ ya̍a̍mɔ̍ɔ̍wa̍ chō mu̍ŋ hūnɔ̄ɔ̄ bāsɔ̄ɔ̄ tɛ̍ɛ̍ mā kūɛ̄nu᷄ŋ a̍ mu̍ŋ.

¹²“Wāŋnda̍ I̍sɔ̄lūɛ̄ī, te̍le̍ŋndo̍ fūūlu̍u̍ le̍ nya̍. Pāa̍le̍ dɛ̍nɛ̍ pa̍lāāle̍ŋ lē chō ni᷅ŋ kpɛ̍ɛ̍lūŋ. Pāa̍le̍ le̍ŋ wānāa̍ wa᷅ ni̍ŋ nyɔ̍ɔ̍ŋ pīōndɔ̄ɔ̍ wa̍ ā du̍a̍u̍nu᷄ŋ nya̍a̍le̍ le̍ nyɛ̄m nda̍ wā ni̍ŋ pi̍i̍ndūūwo̍ wo̍ŋ te̍. Wānāa̍ wa᷅ ni̍ŋ nyɛ̄m ndāa̍ŋ pīīsūūwo̍ wa̍ bɛ̍ɛ̍, ā ta̍mbū lākɔ̄l le̍ nyɛ̄m ndāa̍ŋ te̍. Kāni̍ fo̍ndōle̍, wānāa̍ wa᷅ ni̍ŋ nyɛ᷅m ndāa̍ŋ pīīsūūwo̍ wa̍ ni̍, a̍ wānāa̍ wa᷅ ni̍ŋ nyɛ᷅m mu᷅ŋ pīīndūūwo̍ wa̍, nda̍ kpo̍u̍, ā chō hūnɔ̄ɔ̄ wā o̍ dɛ̍nɛ̍ pālāā bɛ̄ndū ya̍ Mɛ̄lɛ̄ka̍ tūsī ni̍ŋ nda̍ chōo̍ wo̍ ni᷄ŋ.

¹³Wānā o̍ wāna̍ pi̍sī ni̍ŋ lɛ᷅ŋnde̍ŋ, ā wū ni̍ŋ le̍nde̍, lɛ̄ŋndē ndɔ̄le̍ le̍ŋ lē mi̍i̍ŋgū lɛ̍ ni̍ŋ ndu̍ o̍ lābā le̍, kāni̍ fo̍ndōle̍, dɛ̍nɛ̍ pa̍lāā ya̍ Mɛ̄lɛ̄ka̍ tūsī ni̍ŋ wa᷅ŋnda̍ chōo̍ wo̍, nda̍ kpo̍u̍ ā wā ni̍ŋ le̍ni̍ŋ. Wānā o̍ wānā cho̍ wāna̍ yɔ̄ŋ wɔ̄ɔ̍ŋ, ō nɔ̍lā ni̍ŋ mbō fūla̍ o̍ tu̍mbe̍ nī ko̍ŋ bɛ̄ŋgu̍ le̍.

¹⁴So̍vɛ̄i̍ya̍ ā hɔ᷄ŋ bu̍lu̍ chɔ̄ūwo̍, ndu̍yɛ̍ wōlɔ̄ɔ̄lā chɔ̄ūla̍ŋ kpo̍u̍, mi̍ lā wā lā bɛ̄ɛ̄ndīāā, kɛ̍ wānā pi᷅lɛ̍ bɛ̍ɛ̍ o̍ ku̍e̍ le̍, kāni̍ fo̍ndōle̍, tu̍mbe̍ ya̍ Mɛ̄lɛ̄ka̍ dɔ̄ɔ̄nu᷄ŋndo̍, a̍ wāŋnda̍ kpo̍u̍ ya̍ I̍ dɔ̍ɔ̍nu᷄ŋ ndu̍ ni̍.”

¹⁵Mi̍ Mɛ̄lɛ̄ka̍ hīāū lāchī a̍ sūɛ̍i̍ āā, “Sɔ̍ŋgɔ̄ɔ̍ chō o̍ bɛ̍ɛ̄la̍ŋ I̍sɔ̄lūɛ̍i̍. Ndu̍yɛ̍ nāālā wɔ̄ɔ̍ŋnda̍ŋ, a̍ yīmā bɛ̄ndūa̍ŋ mā tīu̍ chīɛ̄īla̍ŋ ni᷄ŋ. Wānāa̍ cho̍ o̍ chīɔ̍ɔ̍ŋ ni᷄ŋ nda̍ ki̍nɛ̍i̍, ya̍a̍mɔ̍ɔ̍wa̍ chō nda̍ dīū a̍ mɔ̄ɔ̄ŋ fāŋndo̍ŋ. A̍ cho̍ chi̍e̍e̍ wa̍, mī nāālā wɔ̄ɔ̍ŋnda̍ŋ a̍ yīa̍a̍ŋ mā chīi̍ nda̍.

¹⁶Wānāa̍ hi̍a̍lūŋ ni̍ŋ mā nyāānu̍ŋ o̍ pēmbo᷄ŋ nda̍, ā chō dīīnɔ᷄ŋ ku̍ndāa̍ mɛ̄ɛ̍ pīīŋāa̍ wa᷅ ha̍ā o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ nda̍ ā wā yɛ̍, mā wa̍ cha᷄ŋ īmɔ̍nɔ̍ɔ̍ le̍ yɔ̄ŋndā ndāla̍ wɔ̍ɔ̍ŋnda̍ŋ.

¹⁷Ndu̍yɛ̍ bāla̍ŋ lā chō nda̍ hūnɔ̄ɔ̄ wu᷄ lɔ̍ŋgɔ̄mɛ᷄ŋ, mī wūla̍ŋ lā wa̍ nda̍ nyīīyāa̍ pi̍ā pīā.

¹⁸Ā chō hūnɔ̄ɔ̄ nyɛ̄lā lābɛ̍kīla̍ŋ wōōnɔ᷄ŋ, ndu̍yɛ̍ mā sēndi̍ yu̍ŋgu̍lta̍ŋ le̍ kɔ̄ltā ndāla̍ ta̍mbɛ̍i̍la̍ŋ chɔ̄mndo̍. Si̍ɔ̍mbu̍la̍ bɛ̍ndūla̍ŋ lā chō nda̍ hūnɔ̄ɔ̄ bīyɔ̄ɔ̄, ndu̍yɛ̍ mā pɛ̄ a̍ sīōōŋīī bɛ̄ndūe̍i̍.

¹⁹Ā chō hūnɔ̄ɔ̄ ka̍ni̍ŋ ndāa̍ŋ hu̍mbo̍ŋ chūā mā vīī vi̍i̍ mu̍ŋ o̍ bɛ̍ɛ̄la̍ŋ, ndu̍yɛ̍ mā chē ko̍o̍līi̍ŋ ndāa̍ŋ māā nyɛ̍ bɛ̍nda̍ bɛ̍ɛ̍ le̍ pīla᷄ŋ te̍ wo̍ŋ. Ndu̍yɛ̍, pāa̍le̍ ya̍ Mɛ̄lɛ̄ka̍ Ya̍a̍wɛ̄ɛ̄ I̍ du̍a̍u̍nūŋ ni̍ŋ tu̍mbe̍ a̍ nda̍ le̍ŋ, ka̍ni̍ŋ hu̍mbūŋ mu᷅ŋ, a̍ ko̍o̍līi̍ŋ ndāāŋ mu̍ŋ, ŋ̄ nɔ̍lā ni̍ŋ mī ŋ̄ chīīndi̍a̍a̍ nda̍ le̍. Nyɛ̄ dīa̍a̍ bɛ̍ɛ̍ ŋ̄ nɔ̍lā ni̍ŋ mī ŋ̄ pīndu̍l nda̍, mbō wa̍ lētūu̍ a̍ nda̍ le̍. Ndu̍yɛ̍, ka̍ni̍ŋ mu̍ŋ a̍ ko̍o̍līi̍ŋ ndāāŋ mu̍ŋ to̍sa̍ ni̍ ma̍ sīmnu᷄ŋ wa̍nāā yɔ̄ŋ wɔ̄ɔ̍ŋ.

²⁰Nyɛ̄m kɛ̄ndɛ̄ŋ nda̍ bāāyīāŋ le̍ mā pɛ̄ɛ̄lu̍ŋ ndo̍ŋ, mu̍ŋ nda̍ tōōsi̍a̍a̍ nyɛ̄m ndāāŋ so̍o̍lāā ni̍. Ma̍ bīī ma̍ tōōsīāā nyɛ̄m chēle̍ŋndo̍ŋ, ŋ̄ ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ, a̍ nyɛ̄m mu᷅ŋ. Le̍ he̍ī, I̍ cho̍ tōsā mī nyɛ̄m mu᷅ŋ ŋ̄ sīmnu᷄ŋ nyɛ᷅m nɔ̄ɔ̄lɛ̍i̍ nda̍ o̍ hɔ̄l.

²¹“I̍ cho̍ tōsā mī wānāā lēkāa̍wa̍ ā hu᷄ŋ ku̍e̍ndī nyɛ̄m mu̍ŋ kpo̍u̍ mā kūɛ̄nu᷄ŋ a̍ mu᷅ŋ. Nyɛ̄ o̍ nyɛ̄ nda̍ nɔ̍, wānāā dɛ̍nɛ̍ wɔ̍ɔ̍ŋāā bɛ̄ndūa̍a̍ o̍ chi̍e̍ēŋndo̍ ni̍ŋ, ā chō mu̍ŋ hūnɔ̄ɔ̄ pūŋgā kpo̍u̍, ndu̍yɛ̍ mā sōli̍ mu̍ŋ o̍ ba̍a̍ ni᷄ŋ.

²²Ya̍a̍mɔ̍ɔ̍wa̍ chō hūnɔ̄ɔ̄ chīɛ̄ī ni̍ ya̍ kɛ̍si̍ kɔ̄llo̍ chōo̍ wo̍ dēlɔ̄ɔ̍ chōo̍, kɛ̍ I̍ wo̍ū ni̍ŋ so̍ndō le̍. Ā lūɛ̄ī ni̍ŋ ndo̍ŋ mā wa̍ ndu̍ bɛ̄ɛ̄la̍ŋ tɛ̄ɛ̄mbūūwo̍, kɛ̍ ba̍kā bɛ̍ɛ̍ I̍ sūū ni̍ŋ te̍.

²³“Ya̍a̍mɔ̍ɔ̍wa̍, lā bɛ̄ɛ̄ndi̍a̍a̍ pɔ̍ɔ̍ yūe̍i̍ le̍ wāŋnda̍ yīīyo̍. Lɛ̄ŋndē I̍sɔ̄lūɛ̍i̍le̍ŋ lē sīmnu᷄ŋ lɛ᷅ŋndē dīyāā ŋ̄wāŋndā chi̍e̍e̍. Ndu̍yɛ̍, mi̍ Chūlu̍sɛ̄lɛ̄m si̍mnu᷄ŋ chi̍e̍e̍ lākpūndɛ̍ bɛ̄ndū.

²⁴Le̍ he̍ī, I̍ cho̍ tōsā mī lɛ̄ŋīī dɛ̍nɛ̍ wɔ̍ɔ̍ŋīī bɛ̄ndūe̍i̍ ī hu᷄ŋ de᷅l lɛ̄ŋndē I̍sɔ̄lūɛ̍i̍le̍ŋ chōo̍, ndu̍yɛ̍, mī to̍sa̍ mā pōōndi̍a̍a̍ chīɛ̄īlā ndāla̍ŋ kpo̍u̍. I̍ cho̍ tōsā mī yōŋga̍ nda̍ kēlū a̍ kpāāya̍ ndāa̍ wo̍ ō mɛ̄ɛ̄lu̍. Fo̍ndāŋndā ndāla̍ kāsīla̍ŋ kpo̍u̍, I̍ cho̍ tōsā mī ya̍a̍mɔ̍ɔ̍wa̍ hu᷄ŋ sōlī la̍ŋ o̍ ba̍a̍ ni᷄ŋ, lā bɛ̍ndā lɛ̍ le̍ mɛ̄lɛ̄ka̍ā ndāa̍ sōōlūū lo̍ŋ te̍.

²⁵Tē dɛ̍nɛ̍ pa̍lāa̍ hu᷄ŋ to᷅l nda̍ chōo̍ pɛ̍, ā yēēmā ni̍ŋ kɔ᷅l nyūlōo̍ kɛ̍ ā sɔ̍lā ni̍ŋ ndu̍ le̍.

²⁶Dɛ̍nɛ̍ pa̍lāa̍ wā ni̍ŋ nda̍ chōo̍, ho̍ō wā fa̍ŋa᷄ŋndo̍, mī ho̍ō hūŋ. Le̍ te̍le̍ŋ o̍ te̍le̍ŋ yōōŋgūlā wɔ̄ɔ̍ŋnda̍ŋ su̍e̍e̍ nda̍ wā ni̍ŋ tu̍e̍i̍yɔ̄ɔ̍ ni̍. Ā nyɔ̄ɔ̄lū ni̍ŋ wa̍nāa̍ su̍a̍ā le̍ Mɛ̄lɛ̄ka̍ wa̍, le̍ mā dīmu̍l nda̍ sɔ̄ɔ̍ŋ wa᷅ hūnɔ̄ɔ̄ yɔ̄nɔ᷄ŋndo̍ wo̍ŋ, kɛ̍ ā nɔ̍lā ni̍ŋ mā dīmūl nda̍ nyɛ̄ o̍ nyɛ̄ le̍. Wānāā sōlīāā lāsa̍lāa̍ bɛ̍ɛ̍, ā nɔ̍lā ni̍ŋ mā pɛ̄ɛ̄ku̍ nda̍ sāwāla̍ nīla̍ŋ te̍. Ndu̍yɛ̍, wāŋ bɛ̄ndūāā kɔ̄l kālu̍a̍a̍ si̍lā nda̍ pāāndū wa̍ kpo̍u̍, ā nɔ̍lā lɛ̍ ni̍ŋ mā sīla̍ nda̍ le̍.

²⁷Māsā bɛ̍ndōo̍ chō hūnɔ̄ɔ̄ cha᷄ŋ, ndu̍yɛ̍ wānāā bɛ̄ndūa̍a̍ cho̍ ndu̍ wa̍llo̍ o̍ bā bɛ̄ŋgu̍ wa̍, mī kɔ̄lta̍ŋ lā tāmbu̍ nda̍, kāni̍ fo̍ndōle̍, ā nɔ᷅ ni̍ŋ wa̍nā o̍ wānā ma̍lāā le̍. Sīōōŋīī bɛ̄ndūe̍i̍ chō hūnɔ̄ɔ̄ wāŋnda̍ I̍sɔ̄lūɛ̍i̍ bīyɔ̄ɔ̄ mā nyīīya̍ kpa̍ kpa̍. Nyɛ̄ o̍ nyɛ̄ wɔ̄ɔ̍ŋ wāŋnda̍ I̍sɔ̄lūɛ̄ī a̍ to̍sa̍, I̍ cho̍ nda̍ hūnɔ̄ɔ̄ pāāwā le̍ ndu̍, mɛ̄ɛ̍ wānā o̍ wānā kūɛ̍ɛ̍la̍ ndɔ̄la̍ŋ lā chō yɛ̍. Dɛ̍nɛ̍ pa̍lāā o̍ dɛ̍nɛ̍ pa̍lāā nda̍ tūsi̍ wāŋnda̍ chōo̍, nda̍ bɛ̍ɛ̍ I̍ cho̍ nda̍ ndu̍ tūsī chōo̍. O̍ ko̍ŋ, mā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄.”