Read Southern Kisi Īsi̍kīāā 8 Bible Online

Īsi̍kīāā 8 - Southern Kisi bible

Īsi̍kīāā 8

¹Wɔ̄sī na̍a̍ ŋ̄ chīŋa̍ wɔ̄sīla̍ŋ lā ŋɔ᷄mpu᷅m o̍ bīyɔ̄ɔ̍ ni᷄ŋ ndo̍, pāŋgi̍i̍ ŋɔ̍mpu᷅mnde̍ o̍ wɔ̄sī kōŋ ni̍ŋ, lɔ̄mā lē ŋūɛ̍ɛ̍nu̍, mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ kpāāya̍ ndɔ̄ɔ̍ ō tūāl la̍ chōo̍ o̍ lēpīlɛ̍ ni᷄ŋ kpe̍. A̍ te̍le̍ŋ ko̍ŋ, ya̍ ni̍, a̍ wāŋ bɛ̄ndūa̍a̍ Chu̍dā ŋ̄ wa̍ īchāli̍ o̍ ya̍lo̍ chi̍ɛ̍ī ni̍ŋ.

²Mi̍ Mɛ̄lɛ̄ka̍ chɔ̄m ya̍ yi̍lāŋndo̍. O̍ yi̍lāŋndo̍ ho̍ō ni᷄ŋ, mɛ̄ɛ̍ ya̍ I̍ he̍e̍lu̍ hɔ̄lla̍ chōo̍, mi̍ cha᷅ nyɔ̄ɔ̍ māā wāna̍ chi̍e̍e̍. Nyɔ̄ɔ̍ ho̍ō, chɔ̍ŋ pɛ̍ŋgu̍ chāŋnda̍ mbo̍ tūāl ma̍to̍ū, wānā a̍a̍ che᷅ ndu̍ īyēlēŋgi̍ ye̍lēŋgi̍e̍i̍ pɛ̍, āā yīŋndē wūle̍ wu᷅le̍ le̍ bɛ̍ndūle̍ŋ ni̍. Chɔ̍ŋ vɛ̍lɛ̄ pɛ̄ŋgu̍ chāŋnda̍ mbo̍ he̍l ma̍lu̍āŋ, wānā a̍a̍ che᷅ ndu̍ dīōndɔ̄ɔ̍ īŋɛ̄lɛ̄ŋgi̍ ŋɛ̍lɛ̄ŋgi̍e̍i̍ pɛ̍, āā būlɔ̍ŋsīi̍ye̍ nda̍ bɛ̄ɛ̄ndi̍a̍a̍ ni̍.

³Mi̍ cha᷅ mi̍ nyɔ̄ɔ̍ ho̍ō sīɛ̄ndī bāa̍ māā bā wāna̍ chi̍e̍e̍, mbo̍ sāā ya̍ yīīŋnde̍ o̍ lēbōl. O̍ ko̍ŋ, mi̍ Nyi̍na̍ Mɛ̄lɛ̄ka̍a̍ chūā ya̍ o̍ yi̍lāŋndo̍ ni᷄ŋ mbo̍ hēl a̍ ya̍ o̍ hūēīye̍ ni᷄ŋ mbo̍ kūā a̍ ya̍ Chūlu̍sɛ̄lɛ̄m. Mbo̍ kɔ̍ tu̍sī ya̍ o̍ dīō la̍ūwo̍ lēni᷄ŋ, bā lūāŋndo̍, la̍u̍ ba̍lu̍ chīɛ̍i̍ Mɛ̄lɛ̄ka̍a̍ wo̍. Mɛ̄ɛ̍ ya̍ to̍fa̍ o̍ la̍ūwo̍ ho̍ō ni᷄ŋ, mi̍ cha᷅ nyɔ̄ɔ̍ īsīsi̍, ō wāŋnda̍ I̍sɔ̄lūɛ̄ī nda̍ a̍a̍ so̍o̍lūū māā mɛ̄lɛ̄ka̍ ndā, ma̍ tōsā mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ ta̍u̍ ta̍u̍ wo̍.

⁴O̍ ko̍ŋ kɔ̍ɔ̍lī, mi̍ cha᷅ pa̍ŋgēle̍ bɛ̄ndu̍ chɔ᷅m na̍ŋɔ̄ɔ̍ Mɛ̄lɛ̄ka̍ I̍sɔ̄lūɛ̍i̍ya̍ wo̍ o̍ fo̍ndāa̍ ho̍ō, mɛ̄ɛ̍ ya̍ I̍ che᷅ ho̍ō o̍ Pīo̍o̍ Chɛ̍bāā i̍kɛ̍i̍ yɛ̍.

⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ dīmūl la̍ āā, “Wāna̍ chi̍o̍o̍ Īsi̍kīāā, to̍fa̍ wɔ̍ ba᷅ lūāŋndo̍.” Mɛ̄ɛ̍ ya̍ I̍ to̍fa̍, mi̍ cha᷅ nyɔ̄ɔ̍ māā īsīsi̍, ō wāŋnda̍ I̍sɔ̄lūɛ̄ī nda̍ āā so̍o̍lūū māā mɛ̄lɛ̄ka̍ nda̍, ma̍ tōsā mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ ta̍u̍ ta̍u̍ wo̍. Ō wa̍ īsīsi̍ o̍ ma̍āŋndo̍ īkɛ̄i̍, ma̍āŋ wa̍ o̍ dīō sāāsa̍ wa̍ bā lūāŋndo̍ wo̍.

⁶Mi̍ Mɛ̄lɛ̄ka̍ dīmūl la̍ āā, “Wāna̍ chi̍o̍o̍ Īsi̍kīāā, hu̍ŋ mā chē nyɛ̄ wāŋnda̍ I̍sɔ̄lūɛ̄ī a̍ cho̍ tōsāa̍ wo̍. Sɔ̄ɔ̍ŋ wɔ̍ɔ̍ŋndo̍ŋ mu᷅ŋ wāŋnda̍ I̍sɔ̄lūɛ̄ī a̍ cho̍ tōsāa̍ ni̍, ma̍ tōsā I̍ nɔ̍lā lɛ̍ mī cha̍l o̍ chīɛ̄ī nī kāsīo̍o̍ ni᷄ŋ te̍. Ndu̍yɛ̍ nyɛ̄ ŋ̄ chē ho̍ō wo̍, ndu̍ cho̍ bɛ̍ɛ̍ nyɛ᷅ o̍ nyɛ̄ lē, ā chō sɔ̄ɔ̍ŋ dɛ̍nɛ̍ wɔ̍ɔ̍ŋ chēle̍ŋ chɔ̄ ŋ̍ hi̍o̍ū bɛ̍ɛ̍ mu᷅ŋ ndo̍ŋ.”

⁷O̍ ko̍ŋ kɔ̍ɔ̍lī, mbo̍ chūā ya̍ mbo̍ kūā vɛ̄lɛ̄ a̍ ya̍, o̍ dīō la̍u̍ chīɛ̍i̍ Mɛ̄lɛ̄ka̍a̍. Mɛ̄ɛ̍ ya̍ I̍ to̍fa̍, mi̍ cha᷅ tɛ̄ɛ̄ŋgōo̍ o̍ sāāsāa̍.

⁸Mbo̍ dīmūl la̍ āā, “Wāna̍ chi̍o̍o̍ Īsi̍kīāā, chɔ̍ɔ̍lu̍ tɛ̍ɛ̍ŋgīi̍ cho̍ ke̍ŋ o̍ sāāsāa̍ ve̍ kūmbī.” Ndu̍yɛ̍, mi̍ chɔ̍ɔ̍lū ndi̍ kūmbī. O̍ ko̍ŋ, Mi̍ cha᷅ dīo̍o̍.

⁹Mi̍ Mɛ̄lɛ̄ka̍ dīmūl la̍ āā, “Lu̍ɛ̍i̍ mā kɔ̍ chɔ᷅ sɔ̄ɔ̍ŋ dɛ̍nɛ̍ wɔ̍ɔ̍ŋ wāŋnda̍ chō tōsāa̍ na̍nu᷄ŋ ndo̍ŋ, sɔ̄ɔ̍ŋ ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ.”

¹⁰O̍ ko̍ŋ, mi̍ lu̍ɛ̍ī, ndu̍yɛ̍ mi̍ cha᷅ nyɛ̄m wɔ̄ɔ̍ŋndo̍ŋ ŋ̄ su̍u̍ o̍ su̍u̍, ŋ̄ wa̍ ŋ̄ tūūlīāā o̍ lūŋgbu̍ŋ chīɛ̄īyo̍ lēni᷄ŋ kpo̍u̍, nyāa̍ ku̍ā ŋa̍a̍yā ŋāāyā wa̍ ni̍, a̍ vīsīāā cho̍ a̍ di̍a̍ndāā Mɛ̄lɛ̄ka̍ o̍ hɔ̄l te̍ wa̍, ndu̍yɛ̍, a̍ nyɛ̄m chēle̍ŋ wāŋnda̍ I̍sɔ̄lūɛ̄ī a̍ wa̍ sōōlūūwo̍ māā mɛ̄lɛ̄ka̍ā nda̍ wo̍ŋ.

¹¹Mi̍ cha᷅ wa̍ŋ bɛ̄ndūāā I̍sɔ̄lūɛ̍i̍ya̍ o̍ fo̍ndāa̍ ho̍ō ŋ̄wāŋ be̍le̍-ŋɔ̍mmɛ̍ū, ā wa᷄ īsīsi̍ nya̍ā wa̍ ka̍ŋ a̍ tu̍u̍līāā wa̍ lāchī. Ndu̍yɛ̍ Chāāsāna̍yā, po̍ Si̍a̍fāŋ ndo̍ ō wa᷄ nda̍ tɛ̄ɛ̄ŋ. Wāŋ bɛ̄ndūa̍a̍ ha̍ā, ō kɛ᷅ o̍ kɛ᷅ hɛ̄ŋgɛ̍i̍ nda̍ lūām nyɛ᷅m chūŋ kɛ̄ndɔ̍ŋ lēni᷄ŋ ndo̍ ō wa̍ ndu̍ o̍ bā, a̍ nyɛ̄m chūŋ kɛ̄ndɛ̄ŋ nda̍ wa̍ lōmɔ̄ɔ̍ wo̍ lēni᷄ŋ, mī kūmi̍i̍ ke̍ŋ ī hēl tu̍ū.

¹²Mi̍ Mɛ̄lɛ̄ka̍ dīmūl la̍ āā, “Wāna̍ chi̍o̍o̍ Īsi̍kīāā, ā chē nyɛ̄ wāŋ bɛ̄ndūa̍a̍ I̍sɔ̄lūɛ̄ī a̍ hu᷅ŋ to̍sāa̍ na̍nu᷄ŋ sɔ̍ɔ̍ sɔ̍ɔ̍ wo̍? Nyɔ̄ɔ̍ŋ mu᷅ŋ nda̍ hūŋ so̍o̍lūūwo̍ o̍ lu̍mūi̍la̍ŋ nda᷅ŋ ni᷄ŋ ni̍, māā mɛ̄lɛ̄ka̍ā ndā, wānā o̍ wānā lu̍mūi̍ ndɔ̄, a̍ nyāā kāŋ ā tūūlīāā, mā dīmī āā, ‘Mɛ̄lɛ̄ka̍ Ya̍a̍wɛ̄ɛ̄ o̍ cho̍ lɛ̍ na̍a̍ chɔ̄ le̍. Na̍a̍ wāŋnda̍ I̍sɔ̄lūɛ̄ī, ō ma᷄l na̍a̍ o̍ bā nāa̍ chōo̍.’ ”

¹³Mbo̍ dīmūl la̍ vɛ̄lɛ̄ āā, “Īsi̍kīāā, ā chā ni̍ŋ sɔ̍ɔ̍ŋ wɔ̍ɔ̍ŋ chēle̍ŋ ŋ̄ wāŋnda̍ I̍sɔ̄lūɛ̄ī a̍ wa̍ tōsāa̍ wo̍ŋ, ŋ̍ hi̍o̍ū bɛ̍ɛ̍ mu᷅ŋ lē wɔ̄ū wo̍ŋ.”

¹⁴O̍ ko̍ŋ kɔ̍ɔ̍lī, mbo̍ chūā ya̍ vɛ̄lɛ̄, mbo̍ kūā a̍ ya̍ o̍ dīō sāāsa̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ bā lūāŋndo̍. O̍ ko̍ŋ, mi̍ ko̍māl wāŋ lāāndūa̍a̍ ā wa̍ cha᷄ŋndo̍ kpe̍e̍kpe̍i̍, kāni̍ fo̍ndōle̍, Ta̍mu̍sī, mɛ̄lɛ̄ka̍ ndāa̍ ndu̍ o̍o̍ vi᷅.

¹⁵Mi̍ Mɛ̄lɛ̄ka̍ lō o̍ ko̍ŋ mbo̍ dīmūl la̍ āā, “Wānā chi̍o̍o̍ Īsi̍kīāā, ā chē vɛ̄lɛ̄ he̍ī? Ndu̍yɛ̍ ā chā ni̍ŋ sɔ̍ɔ̍ŋ dɛ̍nɛ̍ wɔ̍ɔ̍ŋ chēle̍ŋ, ŋ̄ ya̍ Mɛ̍lɛ̄ka̍ tu᷄l yɛ̄le̍ŋ ndo̍, ŋ̍ hi̍o̍ū bɛ̍ɛ̍ mu᷅ŋ lē wɔ̄ū wo̍ŋ.”

¹⁶O̍ ko̍ŋ kɔ̍ɔ̍lī, mbo̍ kūā vɛ̄lɛ̄ a̍ ya̍ o̍ la̍u̍ wa̍ lēni᷄ŋ ndo̍, la̍u̍ ba̍lu̍ chīɛ̍i̍ Mɛ̄lɛ̄ka̍a̍ wo̍. Mɛ̄ɛ̍ ya̍ I̍ to̍fa̍ o̍ dīō wānā a̍a̍ ke̍ī le̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍, mi̍ cha᷅ wāŋ pīāāndūa̍a̍ ŋ̄wāŋ bi̍dīi̍ŋ a̍ wānāā ŋūɛ̍ɛ̍nu̍, ā wa̍ īsīsi̍ ma̍āŋndo̍ tɛ̄ɛ̄ŋ a̍ tōŋgo̍ chīɛ̍i̍ Mɛ̄lɛ̄ka̍a̍, ma̍ mūlī kɔ̄ɔ̄la̍ŋ o̍ chīɛ̍i̍ Mɛ̄lɛ̄ka̍a̍ ma̍ mūlī hɔ̄lla̍ bā pāa̍le̍ŋ lē chāŋndo̍, ma̍ tūndū bōlle̍ mā sōōlūū pāa̍le̍ŋ.

¹⁷Mi̍ Mɛ̄lɛ̄ka̍ dīmūl la̍ āā, “Wānā chi̍o̍o̍ Īsi̍kīāā, ā chē sɔ̄ɔ̍ŋ dɛ̍nɛ̍ wɔ̍ɔ̍ŋ wāŋnda̍ ha̍ā ā chō chōo̍ wo̍ŋ? Sɔ̄ɔ̍ŋ pɔ̍mbɔ᷄ŋ nda̍ chō mu᷅ŋ tōsāa̍ ni̍? Mu᷅ŋ wāŋnda̍ Chu̍dā a̍ cho̍ tōsāa̍ ni̍, ma̍ tɛ̄ɛ̄mbūū lɛ̄ŋnde̍ŋ, ma̍ tōsā mi̍ dēlɔ̄ɔ̄lā chōo̍ la̍ŋ lā tīū o̍ lɛ̄ŋnde̍ŋ ni̍ŋ kpo̍u̍. Ā tōsa̍ sɔ̄ɔ̍ŋ wɔ̍ɔ̍ŋndo̍ŋ o̍ bɛ̍ɛ̄ te̍i̍, ā hīni̍ kɔ̍l te̍, o̍ chīɛ̍i̍ Mɛ̄lɛ̄ka̍a̍ ni᷄ŋ kpe̍e̍kpe̍i̍ nda̍ hīŋ ni᷅ŋ mu̍ŋ tōsāa̍ ni̍, le̍ mā chɔ̄ɔ̄lu̍ ya̍ kɔ̄l tɛ̄ɛ̄mbūū. Wāŋnda̍ ha̍ā, bɛ̄ɛ̄la̍ nda̍ chō ya̍ tɛ̄ɛ̄mbūūwo̍ la̍ŋ, lā chō lā bɔ̄ɔ̍.

¹⁸Le̍la̍ŋ, mɛ̄ɛ̍ mī tu̍si̍ nda̍ dɛ̍nɛ̍ pa̍lāā bɛ̄ndōo̍ chōo̍ mbō fūūlu̍u̍ nda̍ mɛ̍ɛ̄, ndu̍yɛ̍ īnyīɛ̍ɛ̍ bɛ̍ɛ̍ I̍ cho̍ nda̍ tūīīnɔ᷄ŋ mī wānā o̍ wānā o̍ hɛ̍lu᷄ŋ le̍ni̍ŋ te̍. Wāŋnda̍ Chu̍dā a̍ cha᷅ŋ ni̍ŋ cho̍o̍ cho̍o̍ kpe̍le̍ŋ nāa̍ ya̍ chu̍a̍ mā nyɔ̄ɔ̄lu̍ ya̍, le̍ mī tu̍i̍i̍nu̍ŋ nda̍ īnyīɛ̍ɛ̍, kɛ̍ I̍ ye̍ŋ ni̍ŋ nda̍ lānī le̍.”