Read Southern Kisi Īsi̍kīāā 9 Bible Online

Īsi̍kīāā 9 - Southern Kisi bible

Īsi̍kīāā 9

¹O̍ ko̍ŋ kɔ̍ɔ̍lī, mi̍ tu̍ɛ̍ī mi̍ Mɛ̄lɛ̄ka̍ vēēlū cho̍o̍ cho̍o̍ kpe̍le̍ŋ, mbo̍ dīmī āā, “Nya̍ pūa̍a̍ ya̍ I̍ hɛ̍li̍ le̍ hūnɔ̄ɔ̍ Chūlu̍sɛ̄lɛ̄m tɛ̄ɛ̄mbūūwo̍ wa̍, lā sɔ̄ɔ̄ŋgu̍u̍ na̍nu᷄ŋ kpɛ̍ɛ̍lūŋ a̍ nyɛ̄m nya̍a̍ŋ chɔ̄ūwo̍ŋ o̍ lābā.”

²O̍ ko̍ŋ, o̍ lēpīlɛ̍ ni᷄ŋ kpe̍, mi̍ cha᷅ pūa̍a̍ ā ŋɔ᷄mpu᷅m ā wa᷄ fūlāa̍ o̍ dīō chīɛ̍i̍ Mɛ̄lɛ̄ka̍a̍ bā lūāŋndo̍. Pūa̍a̍ ha̍ā ō kɛ᷅ o̍ kɛ᷅ ndu̍ o̍o̍ nɔ̍ wōlɔ̄ɔ̄ ndɔ̍ chɔ̄ūwo̍ o̍ bā le̍ dīyɔ̄ɔ̍. Ndu̍yɛ̍, wāŋndo̍ wa̍ nda̍ tɛ̄ɛ̄ŋ ō dōūvīa̍ŋ o̍ kōlāla̍ kɛ̍ndɛ̄ kɛ̍ndɛ̄la̍ŋ ni᷄ŋ. Wāŋndo̍ ho̍ō, nyɛ̄ nda̍ pōōnyīāā a̍ ndu̍ wo̍ ō wa̍ ndu̍ o̍ bā. O̍ ko̍ŋ kɔ̍ɔ̍lī, pūa̍a̍ ha̍ā ni̍, wāna̍ wa̍ ho̍ō nda̍ tɛ̄ɛ̄ŋ ō dōvīa̍ŋndo̍ ni̍, nda̍ kpo̍u̍ ma̍ hu᷄ŋ si᷅m ma̍āŋ wa̍ ō tōōsīāā a̍ būlɔ̍ŋsīi̍ye̍ wo̍ īkɛ̄i̍.

³O̍ ko̍ŋ kɔ̍ɔ̍lī, mi̍ cha᷅ pa̍ŋgēle̍ bɛ̄ndu̍ chɔ᷅m na̍ŋɔ̄ɔ̄ Mɛ̄lɛ̄ka̍ I̍sɔ̄lūɛ̍i̍ya̍ wo̍, o̍ wa̍ nyāā yōōmāa̍ tɛ̄ɛ̄ŋ ndo̍, mbo̍ cha᷄ŋ mbo̍ kɔ̍ to̍l o̍ dīō chīɛ̍i̍ Mɛ̄lɛ̄ka̍a̍. Mi̍ tu̍ɛ̍ī mi̍ Mɛ̄lɛ̄ka̍ Ya̍a̍wɛ̄ɛ̄ o̍ ve̍e̍lū wāna̍ wa̍ ho̍ō ō dōvīa̍ŋ ō nyɛ̄lā kɛ̄ndɛ̄ kɛ̍ndɛ̄la̍ŋ ni᷄ŋ ndo̍, ndu̍yɛ̍ mbo̍ nɔ̄ nyɛ̄ nda̍ pōōnyīāā a̍ ndu̍ wo̍ o̍ bā wo̍.

⁴Mbo̍ dīmūl ndu̍ āā, “Ba̍lu̍ o̍ bɛ̍ɛ̄la̍ŋ Chūlu̍sɛ̄lɛ̄m kpo̍u̍, wānā o̍ wāna̍ cho̍ a̍ kɔ̄l tāmbɛ̍i̍yo̍ le̍ sɔ̄ɔ̍ŋ wɔ̍ɔ̍ŋ bɛ̄ndu᷄ŋ cho̍ mu᷅ŋ yɔ̄nɔ᷄ŋndo̍ o̍ chi̍o̍o̍ ho̍ō ni᷄ŋ, mi̍ ya̍ Mɛ̍lɛ̄ka̍ tūl mu̍ŋ yɛ̄le̍ŋ, ndu̍yɛ̍ mi̍ kɔ̄l ndɔ̄ɔ̍ wā mɔ̍nɛ̍i̍ bīyɔ̄ɔ̍, mā ha̍ndu̍ nda̍ tāāmāsi̍la̍ŋ o̍ ŋ̄tēndu̍.”

⁵O̍ ko̍ŋ kɔ̍ɔ̍lī, mi̍ tu̍ɛ̍ī mbo̍ dīmūl pūa̍a̍ ā pīli̍a̍a̍ āā, “Lā to᷄l ndu̍ kɔ̄ɔ̄lī lā kɔ̍. Wānā o̍ wānā nya̍ chē pɛ̍ mbō hēndu̍ ndu̍ tāāmāsi̍ o̍ ītēndu̍ le̍, lā dīi̍ ndu̍, ō pīlɛ̍ bɛ̍ɛ̍ lā tu̍i̍i̍nu᷄ŋ ndu̍ īnyīɛ̍ɛ̍ mī lā mɛ̄i̍ ndu̍ yōōmū le̍.

⁶Bɛ̄ndū yūvɛ̍i̍ ni̍, chūā pīāāndū ni̍, chūā lāāndū ni̍, wānā la̍nɔ̍ ka̍a̍so̍ŋnɔ̍ ni̍, chɛ̄lɛ̄kpɛ̍ ni̍, nda̍ kpo̍u̍ lā dīu̍ nda̍, ō pīlɛ̍ bɛ̍ɛ̍ lā mɛ̍ī le̍. Wānāā nya̍ mɛ̄ī yo̍o̍mū wa̍ su̍e̍e̍, mɛ̄ɛ̍ wānāā nya̍ chā a̍ tāāmāsi̍la̍ŋ o̍ ŋ̄tēndu̍ wa̍. Ndu̍yɛ̍ o̍ chīɛ̍i̍ Mɛ̄lɛ̄ka̍a̍ ni᷄ŋ nya̍ kāndu̍ ni̍.” O̍ ko̍ŋ, wāŋ bɛ̄ndūāā ŋ̄wāŋ be̍le̍-ŋɔ̍mmɛ̍ūwāa̍ wa̍ o̍ chīɛ̍i̍ Mɛ̄lɛ̄ka̍a̍ dīō wa̍, nda̍ fɛ̍lɛ̍ŋ nda̍ kāndu̍ dīūwo̍.

⁷Mi̍ Mɛ̄lɛ̄ka̍ dīmūl pūa̍a̍ ha̍ā āā, “Lā tōsa̍ mī la̍ūla̍ ba̍lu̍ chīɛ̍i̍ Mɛ̄lɛ̄ka̍a̍ la̍ŋ lā pɛ̄ a̍ wāŋ vīlɛ̍i̍ya̍, mī chīɛ̍i̍ Mɛ̄lɛ̄ka̍a̍ ho̍ō ō sīmnu᷄ŋ o̍ nɔ̍ɔ̍lɛ̍i̍. Lā fūla̍ ni̍ko̍ mī lā kɔ̍ hi̍o̍ū lāchī a̍ nda̍ dīūwo̍ o̍ bɛ̍ɛ̄la̍ŋ.” Ndu̍yɛ̍, mi̍ pūa̍a̍ ha̍ā fūlā ma̍ kāndū wāŋnda̍ dīūwo̍ o̍ bɛ̍ɛ̄la̍ŋ Chūlu̍sɛ̄lɛ̄m.

⁸Mɛ̄ɛ̍ nda̍ fūla̍ kpo̍u̍ ma̍ wā wāŋnda̍ dīūwo̍, mi̍ lo᷅ ya̍ pīlɛ̍, mi̍ ba᷅ŋ wūla̍ŋ mi̍ fu̍u̍lūū hɔ̄lla̍ lɛ̄ŋ mɛ̍ɛ̄. Mi̍ di̍mūl Mɛ̄lɛ̄ka̍ a̍a̍, “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, bāā mā tɛ̍ɛ̍mbu̍u̍ wānāā tūa̍a̍ lo̍ ha̍ā yōōmū I̍sɔ̄lūɛ̍i̍ya̍ kpo̍u̍ le̍ mɛ̄ɛ̍ ŋ̄ dɔ̄ɔ̄nu᷄ŋ tu̍mbe̍ o̍ ka̍lā ka̍lā a̍ wāŋnda̍ Chūlu̍sɛ̄lɛ̄m yɛ̍?”

⁹Mi̍ Mɛ̄lɛ̄ka̍ dīmūl la̍ āā, “Īsi̍kīāā, yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄ī nda̍ wāŋnda̍ Chu̍dā a̍ to̍sa̍ wo̍ ō chō ō bɔ̄ɔ̍. Lɛ̄ŋnde̍ŋ kpo̍u̍ lē pɛ̄ a̍ wānāā dīūwāā ŋ̄wāŋndā chīe̍e̍ya̍, ndu̍yɛ̍, mi̍ Chūlu̍sɛ̄lɛ̄m o̍ cho̍ chi̍e̍e̍ le̍bo᷅llo̍ kpo̍u̍ wo̍, ō sīmnu᷄ŋ chi̍e̍e̍ lāka̍fā. Tē ā bīī pɛ̍, ā dīmi̍ āā, ‘Mɛ̄lɛ̄ka̍ Ya̍a̍wɛ̄ɛ̄ o̍ cho̍ na̍a̍ chɔ̄ le̍, ō ma᷄l na̍a̍ ni᷅ŋ o̍ bā nāa̍ chōo̍.’

¹⁰Le̍la̍ŋ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ wāŋnda̍ ha̍ā ā tōsa̍, mɛ̄ɛ̍ mā sɔ̄la̍ pāāwā ndɔ̄ɔ̍ ō pīāā cha̍, īnyīɛ̍ɛ̍ bɛ̍ɛ̍ I̍ tu̍i̍i̍nūŋ nda̍ mī chi̍i̍ndi̍a̍a̍ ō pīlɛ̍ bɛ̍ɛ̍ le̍.”

¹¹O̍ ko̍ŋ kɔ̍ɔ̍lī, mi̍ wāna̍ wa̍ ho̍ō o̍ dōvīa̍ŋ o̍ nyɛ̄lā kɛ̄ndɛ̄ kɛ̍ndɛ̄la̍ŋ ni᷄ŋ, mbo̍ nɔ̄ nyɛ̄ nda̍ pōōnyīāā a̍ ndu̍ wo̍ o̍ bā wo̍, ō mīīŋgū nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍, mbo̍ hu᷄ŋ do̍o̍nu᷄ŋ ndu̍ ko̍na̍ āā, “I̍ chi̍i̍ nyɛ̄ ŋ̄ dīmu̍l la̍ wo̍ tōsā.”