Read Southern Kisi Da̍a̍ni̍ɛ̍ɛ̄ 11 Bible Online

Da̍a̍ni̍ɛ̍ɛ̄ 11 - Southern Kisi bible

Da̍a̍ni̍ɛ̍ɛ̄ 11

¹Kāni̍ ya̍ su̍a̍ā ho̍ō wo̍ bɛ̍ɛ̍, wɔ̄sī Da̍līɔ̄ɔ̄ Mɛ̍dɛ̍tīi̍nɔ̍ o̍ si̍mnu᷄ŋ ma̍sā bɛ̍ndōo̍ wo̍, ya̍ si̍m Ma̍kɛ̄l kɔ̄ɔ̄lī ni̍ mi̍ ma̍lā ndu̍.

²Ndūyɛ̍, nyɛ̄ ya̍ I̍ cho̍ nu̍m hūnɔ̄ɔ̄ dīmūllo̍ wo̍, tōnya̍ o̍ cho̍ ni̍.’ ” “Mi̍ ki̍i̍la̍nɔ̍ Mɛ̄lɛ̄ka̍a̍ hīāū lāchī a̍ sūɛ̍i̍ āā, ‘Māsāā bɛ̍ndūa̍a̍ yɛ̍ yi̍a̍a̍ a̍ yāa̍ a̍ chō hūnɔ̄ɔ̄ sīmnɔ᷄ŋ ma̍sāa̍ Pa̍a̍sīāā a̍ te̍le̍ŋnda̍ yɛ̍ yɛ̍la̍ŋ. Tē ka̍ŋ fa̍ŋa̍ŋ pɛ̍, ma̍sā hīɔ̍ɔ̍lu̍ ndɔ̄ɔ̍ ō mīīŋgu̍ o̍ fōōfo̍ ndāa̍. Kɛ̍ ndu̍ hi̍a̍ū ni̍ŋ sūl a̍ māsāa̍ ā pīli̍a̍a̍ kpo̍u̍. Ndu̍yɛ̍ ō sɔ̄lā ni̍ŋ kpa̍a̍yāa̍ ta̍u̍ ta̍u̍ sa̍na̍a̍ o̍ sūl ndɔ̄ɔ̍ ho̍ō ni᷄ŋ. Māsāa̍ ho̍ō sūl ndɔ̄ɔ̍ chō tōsā mī wāŋnda̍ kpo̍u̍ mā sīmu̍l māsāle̍ŋ o̍ lɛ̄ŋndē Kīli̍sīle̍ŋ ni᷄ŋ.

³“ ‘O̍ ko̍ŋ, mī māsa̍ kpāāyā bɛ̍ndū chēle̍ŋ ō su̍l vɛ̄lɛ̄ o̍ nɔ᷅ ni̍ŋ kpa̍a̍yā bɛ̍ndōo̍ wa᷅ŋnda̍ chōo̍ mbō bīī nda̍ mɛ̄ɛ̍ o̍ hɛ̍nāŋ ni̍ŋ yɛ̍ wo̍.

⁴Kɛ̍ te̍le̍ŋ māsāle̍ ndɔ̄le̍ŋ lē nɔ̄ ni̍ŋ kpa̍a̍yāa̍ nɔ̄ bɛ̄ndōo̍ wo̍, māsāle̍ ndɔ̄le̍ŋ lē chō pūūsi̍a̍ŋ mī lē sɛ̄ŋi᷅ŋ o̍ chi̍e̍ēŋndo̍ chōo̍ kpo̍u̍. Ndu̍yɛ̍ lē ku̍ē ni̍ŋ o̍ wānāa̍ fu̍la̍ o̍ pūlāle̍ ndɔ̄le̍ŋ chōo̍ wa̍ lo̍ le̍. Ndu̍yɛ̍ vɛ̍lɛ̄, lē nɔ᷅ lɛ̍ ni̍ŋ kpa̍a̍yā māā pāāndū le̍, kāni̍ fo̍ndōle̍, ā chō le̍ŋ pūū mā ke̍ wānāā chēle̍ŋ.

⁵“ ‘O̍ ko̍ŋ kɔ̍ɔ̍lī, mī māsā bɛ̍ndōo̍ I̍chi̍pī o̍ sɔ̍la̍ kpāāyāa̍. Kɛ̍ mī wānāa̍ cho̍ bōllē pu̍a̍a̍ ndūa̍a̍ chɔ̄ūwa̍ wa̍ ō pīlɛ̍ ō sɔ̄la̍ kpāāyāa̍ mbō hīōū bɛ̍ɛ̍ ndu̍. Ndu̍yɛ̍ māsāle̍ ndɔ̄le̍ŋ lē nɔ̄ ni̍ŋ kpa̍a̍yāa̍ mī lē hīōū māsāle̍ māsāa̍ I̍chi̍pī le̍ŋ.

⁶Tē wɔ̄sīla̍ŋ lā hīōū pɛ̍ la̍ ti̍ŋ, māsā bɛ̍ndōo̍ I̍chi̍pī o̍ cho̍ lākɔ̄ chɛ̄la᷅ŋ kɔ̄l nyūlōo̍ tōsā a̍ māsā bɛ̍ndōo̍ Si̍i̍līāā. Le̍ chɛ̄la᷅ŋndo̍ ho̍ō bōlle̍ŋ yāmbɔ̄ɔ̄, māsā bɛ̍ndōo̍ I̍chi̍pī o̍ cho̍ māsā bɛ̍ndōo̍ Si̍i̍līāā chūā ndɔ̄ɔ̍ kē o̍ nɔ̄ɔ̍ ni᷄ŋ mā cha᷄l nda̍ ndu̍. Kɛ̍ chɛ̄la᷅ŋndo̍ ho̍ō ō cho̍ vi̍o̍u̍wɔ̄ɔ̄ le̍ mbō tāmbu̍. Kāni̍ chūa̍a̍ ho̍ō ni̍, fāl ndɔ̄ɔ̍ ni̍, a̍ chɛ̄lɛ̄kpɛ̍ ndāa̍, a̍ bu̍ɛ̍i̍yāā ndūa̍a̍ o̍ ku̍ɛ̄ kɔ̄ɔ̄lī wa̍, ā chō nda̍ dīyɔ̄ɔ̄.

⁷Kɛ̍ tē te̍le̍ŋ ti̍ŋ ō hīōū pɛ̍, chūa̍a̍ ho̍ō, wānāyɛ̍ī ndūɛ̍i̍ ī pīlɛ̍, ī chō chɔ̄nɔ᷄ŋ mī ī sīmnu̍ŋ ma̍sā bɛ̍ndōo̍ o̍ fōōfo̍ māsa̍ nda̍ dīī ni̍ŋ ko̍ŋ ndo̍. Ndu̍yɛ̍ mī wānāyɛ̍ī ndūɛ̄ī ke̍ŋ ī kɔ̍ de᷅l pūa̍a̍ chɔ̄ūwa̍ Si̍i̍līāā chōo̍ a̍ sɔ̍ŋgɔ̄ɔ̍, o̍ ko̍ŋ kɔ̍ɔ̍lī mī ī bīū bīu̍ dɔ̍ɔ̍ŋgɔ̍lā chɔ̄ūla̍ māsāa̍ Si̍i̍līāā la̍ŋ kpo̍u̍, ndu̍yɛ̍ mī ī yēm nda̍.

⁸O̍ ko̍ŋ kɔ̍ɔ̍lī, mī wāŋndo̍ ho̍ō ō chɔ̄ɔ̄vi̍a̍a̍ mɛ̄lɛ̄ka̍ā wāŋnda̍ Si̍i̍līāā, a̍ to̍o̍si̍a̍a̍ a̍ chīli̍ŋu̍ŋ te̍e̍ŋgīa̍ŋ nda̍, ndu̍yɛ̍, a̍ nyɛ̄m ndāŋ la̍a̍ndūŋ kɛ̄ndɛ̄ kɛ̍ndɛ᷄ŋ cho̍ ŋ̄ tōōsīāā a̍ ka̍ni᷄ŋ hu̍mbo᷄ŋ, o̍ ko̍ŋ kɔ̍ɔ̍lī a̍ ko̍o̍līi̍yo̍ŋ ndo̍ŋ, mbō kūɛ̄nu̍ŋ a̍ mu̍ŋ I̍chi̍pī. Tē he̍ī ī yɔ̄nu̍ŋ pɛ̍, kɔ̄l nyūlōo̍ chō mīīŋgū I̍chi̍pī tɛ̍ɛ̄ŋ nda̍ Si̍i̍līāā le̍ te̍le̍ŋ vi̍lɛ̄ī.

⁹Tē ke̍ŋ I̍ hi̍o̍ū pɛ̍, māsā bɛ̍ndōo̍ Si̍i̍līāā bɛ̍ɛ̍, ō chō chɔ̄nɔ᷄ŋ mbō kɔ̍ de᷅l māsā bɛ̍ndōo̍ I̍chi̍pī chōo̍ a̍ sɔ̍ŋgɔ̄ɔ̍. Kɛ̍ ō ti̍ū ni᷅ŋ ndu̍ ba̍ le̍, mbō mīīŋgu̍ o̍ ndu̍lo̍ a̍ kīlta̍ŋ nda̍ pūa̍a̍ ndūa̍a̍ chɔ̄ūwa̍.

¹⁰“ ‘O̍ ko̍ŋ kɔ̍ɔ̍lī, māsā bɛ̍ndōo̍ Si̍i̍līāā pūa̍a̍ ndūa̍a̍ ā chō bɛ̄ɛ̄ndīa̍ŋ le̍ chɔ̄ūwo̍, mā chūūŋgi̍a̍a̍ pūa̍a̍ chɔ̄ūwa̍ ku̍ndā bɛ̄ndōo̍, mā kɔ̍ lu̍ɛ̍ī o̍ lɛ̄ŋndē I̍chi̍pīle̍ŋ ni᷄ŋ su̍lūlū bɛ̄ndū mɛ̄ɛ̍ mɛ̄ŋnda̍ŋ mā hūŋ nu̍a̍ā a̍ kpāāyā bɛ̍ndōo̍ yɛ̍. Ndu̍yɛ̍ ā chō lō sɔ̍ŋgɔ̍ɔ̍ ha̍a̍a̍ mā fūūlu̍u̍ o̍ chi̍e̍e̍ŋ nɔ̍ kpākīla̍ ka̍lā ka̍lā la̍ŋ I̍chi̍pī wo̍ŋ.

¹¹O̍ ko̍ŋ kɔ̍ɔ̍lī, mī māsā bɛ̍ndōo̍ I̍chi̍pī o̍ dɔ̍ɔ̍nūŋ tu̍mbe̍ o̍ ka̍lā ka̍lā. Mbō chɛ᷄ŋ a̍ tu̍mbe̍ ko̍ŋ mbō kɔ̍ de᷅l māsā bɛ̍ndōo̍ Si̍i̍līāā chōo̍ a̍ sɔ̍ŋgɔ̄ɔ̍, ndu̍yɛ̍ mbō yēm ndu̍ nda̍ pūa̍a̍ ndūa̍a̍ chɔ̄ūwāā ku̍ndā bɛ̄ndūāā kāŋ.

¹²O̍ ko̍ŋ, mī māsā bɛ̄ndōo̍ I̍chi̍pī o̍ dɔ̍u̍nu̍ŋ yo̍ŋgāa̍ ta̍u̍ le̍ so̍vɛ̄i̍ya̍a̍ ku̍ndā bɛ̄ndūāā o̍ di̍u̍ ka̍ŋ nda̍. Kɛ̍ ndu̍yɛ̍, ō hi̍ū ni᷅ŋ la̍chi̍ a̍ yōmɔ̄ɔ̍ le̍nde̍ lɔ̍ɔ̍ o̍ lɔ̍ɔ̍ le̍.

¹³“ ‘Tē te̍le̍ŋ hu᷄ŋ fu̍u̍lūū pɛ̍, māsā bɛ̍ndōo̍ Si̍i̍līāā o̍ cho̍ vɛ̄lɛ̄ chɔ̄nɔ᷄ŋ mbō chūūŋgi̍a̍a̍ so̍vɛ̄i̍ya̍a̍ chēle̍ŋ ku̍ndā bɛ̄ndōo̍ nāa̍ pi᷅lɛ̍ mā hīōū ā tāsi̍a̍a̍. Ndu̍yɛ̍ tē wɔ̄sīlā ti᷄ŋ lā hīōū pɛ̍, ō chō so̍vɛ̄i̍ya̍a̍ ndūāā kāŋ chūā mā kɔ̍ de᷅l ya̍a̍mɔ̍ɔ̍wa̍a̍ ndāa̍ chōo̍ a̍ sɔ̍ŋgɔ̍ɔ̍. Ndu̍yɛ̍ nyɛ̄m chɔ̄ūwo̍ŋ ŋ̄ chō nda̍ wā o̍ bā ta̍u̍ ta̍u̍ le̍ sɔ̍ŋgɔ̍ɔ̍.

¹⁴A̍ te̍le̍ŋ ko̍ŋ, wānāā bɔ̄ɔ̍ bɔ̍ɔ̍ a̍ cho̍ māsā bɛ̍ndōo̍ I̍chi̍pī sīmūl. Wānāā lātānda̍a̍ chō hūnɔ̄ɔ̄ fūlā wānāā nūmnda̍ tɛ̍ɛ̄ŋ, mā chɛ᷄ŋ a̍ sɔ̍ŋgɔ̍ɔ̍ le̍ mā tōsa̍ mī nyɛ̍ che̍nu᷄ŋ ho̍ō o̍ yi̍lāŋndo̍ ni᷄ŋ ndo̍ ō chīŋa̍ lāsōndō. Kɛ̍ ā ti̍ū ni᷅ŋ ba̍ le̍.

¹⁵Māsā bɛ̄ndōo̍ Si̍i̍līāā nda̍ so̍vɛ̄i̍ya̍a̍ ndūa̍a̍ ā chō hūnɔ̄ɔ̄ chi̍e̍e̍ cho̍ ō bālāā a̍ kpākī ka̍lā ka̍lā bɛ̄ndōo̍ I̍chi̍pī wo̍ bālɔ̄ɔ̄, mā dēŋge̍la̍ pūūlōo̍ o̍ kpāki̍ chi̍e̍e̍ ko̍ŋ hōlnɔ᷄ŋndo̍ chɛ̍ chɛ̍ le̍ mā kēēku̍ lēchōo̍ mā kɔ̍ bi̍ī chi̍o̍o̍, ndu̍yɛ̍ mā bīī chi̍e̍e̍ ka̍lāa̍. Māsāa̍ I̍chi̍pī so̍vɛ̄i̍ya̍a̍ ndūa̍a̍ sɔ̍ŋgā sɔ̍ŋgɔ̄ bɛ̄ndōo̍ wa̍, ā nɔ̍lā ni̍ŋ mā sīmu̍l so̍vɛ̄i̍ya̍a̍ māsā bɛ̍ndōo̍ Si̍i̍līāā o̍ cho̍ hūnɔ̄ɔ̄ wa̍ le̍.

¹⁶Nyɛ̄ māsā bɛ̍ndōo̍ Si̍i̍līāā o̍ hɛ̍nāŋ ni̍ŋ le̍ tōsāa̍ wo̍, ndu̍ ko̍ni̍ o̍ to̍sā ni̍ŋ ni̍. Wānā o̍ wānā o̍ nɔ̍lā ni̍ŋ mbō sīmu̍l ndu̍ le̍. Ō chō hūnɔ̄ɔ̄ wāŋnda̍ I̍sɔ̄lūɛ̄ī lɛ̄ŋndē kɛ̄ndɛ̄ kɛ̍ndɛ̄ lē bɛ̄ndū lē Mɛ̄lɛ̄ka̍ chūe̍l nda̍ būŋgɛ̄i̍ māā ō chō nda̍ kē le̍ŋ pōōndā o̍ bā a̍ ka̍ka̍, mī lē wa̍ ndu̍ o̍ bā bɛ̄ŋgu̍.

¹⁷“ ‘Māsā bɛ̍ndōo̍ Si̍i̍līāā o̍ cho̍ hūnɔ̄ɔ̄ kɛ̄ɛ̄sīāā le̍ mbō hīŋ a̍ kpāāyā bɛ̍ndū o̍ nɔ̍ o̍ māsāle̍ ndɔ̄le̍ŋ ni᷄ŋ ndo̍, le̍ mbō tɛ̄ɛ̄mbu̍u̍ māsāle̍ māsā bɛ̍ndōo̍ I̍chi̍pī. Ō chō hūnɔ̄ɔ̄ chɛ̄la᷅ŋ kɔ̄l nyūlōo̍ tōsā a̍ māsā bɛ̍ndōo̍ I̍chi̍pī, mbō ke̍ māsā bɛ̍ndōo̍ I̍chi̍pī chūā ndɔ̄ɔ̍ o̍ nɔ̄ɔ̍ ni᷄ŋ, le̍ hāli̍ kpe̍ŋ mbō tīu̍ māsā bɛ̍ndōo̍ I̍chi̍pī bā. Kɛ̍ mbō dēma̍, mī kɛ̄ɛ̄sīāālā ndɔ̄la̍ŋ lā tāmbū.

¹⁸O̍ ko̍ŋ, mbō mūli̍ hɔ̄lla̍ o̍ lɛ̄ŋīi̍ ho̍lnu̍ŋ Pēe̍ Mɛ̄ŋmā Īhɛ᷄llo̍ ve̍ mbō de᷄l ndi̍ cho̍o̍ a̍ sɔ̍ŋgɔ̄ɔ̍, mbō bīū bīu̍ ī ka̍ ka̍. Kɛ̍ mī wānā che᷅le̍ŋ o̍ cho̍ pūa̍a̍ chɔ̄ūwa̍ bōlle̍ŋ ndo̍ ō pūm, ō hu᷄ŋ de᷅l ndu̍ chōo̍ a̍ sɔ̍ŋgɔ̄ɔ̍, mbō yēm ndu̍, ndu̍yɛ̍ mbō tōsa̍ mī yōŋgā o̍ yōŋgā māsā bɛ̍ndōo̍ Si̍i̍līāā o̍ wa̍ kīōlɔ̄ɔ̍ mbō mɛ̄ɛ̄lu̍. Mī si̍ɔ̍mbu̍la̍ŋ lā mīīŋgu̍ ndu̍ pi̍la̍ ma̍sā bɛ̍ndōo̍ Si̍i̍līāā bīyɔ̄ɔ̄.

¹⁹O̍ ko̍ŋ, mī māsā bɛ̍ndōo̍ Si̍i̍līāā o̍ ma̍l le̍ mīīŋgōo̍ o̍ chi̍e̍e̍ŋ ndɔ̄ŋ bɛ̍ndu᷄ŋ nɔ̍ kpākīla̍ ka̍lā ka̍lā la̍ŋ o̍ lɛ̄ŋndē ndɔ̄le̍ŋ ni᷄ŋ ndo̍ŋ. Kɛ̍ o̍ mīīŋgū ndɔ̄ɔ̍ ni᷄ŋ, mī ya̍a̍mɔ̍ɔ̍wa̍ kēi̍ ndu̍ dēlɔ̄ɔ̄ chōo̍ mā dīī ndu̍. Le̍ fɛ̍ɛ̍ŋ a̍ fɛ̍ɛ̍ŋ, wānā chi᷅ lɛ̍ ni̍ŋ ndu̍ le̍.

²⁰“ ‘O̍ ko̍ŋ kɔ̍ɔ̍lī, mī māsā bɛ̍ndū che᷅le̍ŋ ō mīīŋgu̍ o̍ fōōfo̍ māsā bɛ̍ndōo̍ Si̍i̍līāā wo̍. Mbō yɔ̄ŋgu̍ wānāa̍ bi̍ī pa̍a̍wā lēlɛ̄ŋndo̍ wa̍, mā wa̍ wāŋnda̍ pāāwā lēlɛ̄ŋndo̍ bīyɔ̄ɔ̍ o̍ bā, le̍ hāli̍ kpe̍ŋ māā māsāle̍ ndɔ̄le̍ŋ lē wa̍ māsāle̍ tɔ̍ɔ̍ bɛ̍ndū. Kɛ̍ māsā bɛ̍ndōo̍ ho̍ō ndu̍ ndu̍, o̍ vi̍ū ni̍ŋ te̍ mā dīī ndu̍. Ndu̍yɛ̍ pīɔ̍m ndɔ̄ɔ̍, ō ve᷅m ni̍ŋ kpe̍nde̍ke̍le̍ ŋ̍wāŋndā chīe̍e̍ o̍ hɔ̄l te̍, kɛ̄lɛ̄ŋgāā mbō wa̍ o̍ chɔ̄ū ni᷄ŋ.’ ”

²¹“Mi̍ ki̍i̍la̍nɔ̍ Mɛ̄lɛ̄ka̍a̍ hīāū lāchī a̍ sūɛ̍i̍ nāa̍ ya̍ Da̍a̍ni̍ɛ̍ɛ̄ chūā, mbo̍ dīmūl la̍ māā, mānā che᷅le̍ŋ ō chō hūnɔ̄ɔ̄ sīmnɔ᷄ŋ ma̍sāa̍ Si̍i̍līāā, o̍ nɔ̍ bɛ̍ɛ̍ di̍ mbō wa̍ māsā le̍ wo̍. Ndu̍yɛ̍, māsa̍ kɔ̄l vēsɛ̍i̍yo̍ o̍ wa᷅ ni̍ŋ ni̍. Bōōndi̍i̍ wāŋnda̍ Si̍i̍līāā a̍ ve᷅m ni̍ŋ kɔ᷅l te̍ ve̍ o̍ cho̍ hūnɔ̄ɔ̄ a̍ kāŋgālāa̍ ni̍, mbō hu᷄ŋ hi̍ɔ̍lū Māsā bɛ̍ndōo̍ Si̍i̍līāā kpāāyāa̍ o̍ bā, mbō mīīŋgu̍ o̍ fōōfo̍ ndɔ̄ɔ̍.

²²Kɛ̍, ō chō hūnɔ̄ɔ̄ pūa̍a̍ chɔ̄ūwāā ka̍ ka̍ di̍ū, mbō bāsu̍ nda̍ tɛ̍ɛ̍. Māsa̍ wānāa̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ bɛ̍ɛ̍ ō chō ndu̍ hūnɔ̄ɔ̄ dīyɔ̄ɔ̄.

²³Māsāa̍ ho̍ō, ō chō hūnɔ̄ɔ̄ chɛ̄la᷅ŋ kɔ̄l nyūlōo̍ tōsā a̍ lɛ̄ŋīī bɔ̍ɔ̍ bɔ̍ɔ̍, kɛ̍ mbō tōsa̍ kāŋgālāa̍ mbō tɛ̄ɛ̄mbu̍u̍ chɛ̄la᷅ŋ kōŋ. Mi̍ che᷅ bɛ̍ɛ̍ ō nɔ̍ wa̍nāā bɔ̍ɔ̍ kɔ̍ɔ̍lī le̍ ni̍, kɛ̍ ō chō hūnɔ̄ɔ̄ sīmnɔ᷄ŋ ma̍sa̍ kpāāyā bɛ̍ndū.

²⁴Māsāa̍ ho̍ō, ka̍ā fi̍nyāā ndūa̍a̍ a̍ fi̍nyāā ndūāā ma̍māa̍ ā tōsa̍ kāni̍ bɛ̍ɛ̍ le̍ wo̍, ndu̍ o̍ wa᷅ ni̍ŋ to̍sāa̍ ni̍. Te̍le̍ŋ cho̍ fūūlūū, lɛ̄ŋndē o̍ cha᷅ nu̍a̍ā māā lē su᷄l ta̍u̍ le̍ŋ, ō kɔ̍ wo̍o̍lū nda̍ a̍ chɔ̄ūwo̍. Nyɛ̄m kɛ̄ndɛ̄ŋ o̍ ko̍māl nu̍a̍ā lo̍ŋ ndo̍ŋ, ō pūŋga̍ mu̍ŋ, ō pōōndi̍a̍a̍ mu̍ŋ a̍ ka̍ka̍, ō pīɔ̄ū pīɔ̍u̍ wānāā ndūa̍a̍ cho̍ ndu̍ kɔ̄ɔ̄lī wa̍. O̍ ko̍ŋ kɔ̍ɔ̍lī, mbō kɛ̄ɛ̄si̍a̍a̍ le̍ chi̍e̍e̍ŋ cho̍ ŋ̄ bālāā a̍ kpākīla̍ ka̍lā ka̍lālā bɛ̄ndūla̍ŋ ndo̍ŋ bīyɔ̄ɔ̍. Kɛ̍ le̍ te̍le̍ŋ bi̍ŋgī ko̍ni̍ o̍ to̍sā ni̍ŋ sɔ̍ɔ̍ŋ mu̍ŋ ni̍.”

²⁵“A̍ te̍le̍ŋ ko̍ŋ, māsa̍ kɔ̄l vēsɛ̍i̍ pi᷅lɔ̍ɔ̄ ho̍ō kpe̍, ō chō hūnɔ̄ɔ̄ pūa̍a̍ ndūa̍a̍ chɔ̄ūwāā kpāāyā bɛ̍ndūa̍a̍ chūā ku̍ndā bɛ̄ndōo̍, mbō kɛ̄ɛ̄si̍a̍ŋ a̍ kɔ̄l ndɔ̄ɔ̍ kpo̍u̍ le̍ mbō kɔ̄ sɔ̍ŋgā a̍ māsā bɛ̍ndōo̍ I̍chi̍pī. Kɛ̍ mī māsā bɛ̍ndōo̍ I̍chi̍pī o̍ chu̍a̍ pūa̍a̍ ndūa̍a̍ chɔ̄ūwāā kpāāyā bɛ̍ndūa̍a̍, a̍ hi̍o̍ū pūa̍a̍ chɔ̄ūwāā māsāa̍ ho̍ō wa̍, mbō hu᷄ŋ chīŋa̍la᷅ŋ ndu̍ a̍ sɔ̍ŋgɔ̄ɔ̍. Kɛ̍ mā tōsa̍l māsā bɛ̍ndōo̍ I̍chi̍pī kāŋgālāa̍ mī māsa̍ kɔ̄l vēsɛ̍i̍ bɛ̍ndōo̍ ho̍ō ō yēm ndu̍.

²⁶Ndu̍yɛ̍ māsā bɛ̍ndōo̍ I̍chi̍pī, wānāā nda̍ di̍ā nyɛ᷅ dīa̍a̍ o̍ ti̍bīi̍ pi̍lɔ̍ɔ̍ chōo̍ nda̍ nda̍ā wa̍, nda̍ kɛ̍sɛ̍ kɛ̍sɛ̍ pīsī ndu̍ ni̍ŋ ni̍. Ya̍a̍mɔ̍ɔ̍wa̍ chō so̍vɛ̄i̍ya̍a̍ ndūa̍a̍ yōmɔ̄ɔ̄, ndu̍yɛ̍ mā dīu̍ ā ka̍ ka̍ o̍ chɔ̄ūwo̍ ni᷄ŋ.

²⁷O̍ ko̍ŋ kɔ̍ɔ̍lī, māsāā bɛ̍ndūāā ŋīɔ̍ɔ̍ŋnda̍ ha̍ā, māsa̍ bɛ̍ndū kɔ̄l vēsɛ̍i̍yo̍ ho̍ō ni̍, māsā bɛ̍ndōo̍ I̍chi̍pī ni̍, ā chō īchāli̍ o̍ ti̍bīi̍ pi̍lɔ̍ɔ̍ chōo̍ mā dē nyɛ̄ dīa̍a̍. Kɛ̍ yīya᷄ŋnda̍ ndāla̍ŋ lā chō wā lā wɔ̄ɔ̍ŋ wɔ̄ɔ̍ŋ. Ā chō wā chōōla̍ŋ dīmu̍la᷅ŋndo̍ mā kɛ̄ɛ̄sīāā kɛ̍ɛ̍sīāālā wɔ̄ɔ̍ŋnda̍ŋ le̍ nda̍ pi̍la̍ vēllāa̍ vēllē. Kɛ̍ ā ti̍u̍wa᷅ŋ ni̍ŋ la̍ba̍ le̍. Kāni̍, ō ve᷅m wɔ̍ ni̍ŋ te̍le̍ŋ Mɛ̄lɛ̄ka̍ yēēma̍ le̍ nda̍ ŋīɔ̍ɔ̍ŋ mā vī le̍.

²⁸O̍ ko̍ŋ kɔ̍ɔ̍lī, mī māsā bɛ̍ndōo̍ Si̍i̍līāā mi̍i̍ŋgū o̍ ndu̍ lo̍ a̍ sūltā bɛ̄ndūlā o̍ ku̍e̍ndi̍ o̍ chɔ̄ūwo̍ la̍ŋ. Ndu̍yɛ̍ o̍ mīīŋgū ndɔ̄ɔ̍ ni᷄ŋ, ō chō kēī ku̍ndā wānāa̍ chɛ̍l le̍ wāa̍ o̍ kpe̍ma̍ Mɛ̄lɛ̄ka̍a̍ bɛ̄ŋgu̍ wa̍ dēlɔ̄ɔ̄ chōo̍ a̍ sɔ̍ŋgɔ̄ɔ̍ mbō tōsa̍ nyɛ̄ o̍ hɛ̍na᷄ŋ le̍ tōsāa̍ a̍ nda̍ wo̍. O̍ ko̍ŋ kɔ̍ɔ̍lī, mbō mīīŋgu̍ ni̍ko̍ o̍ lɛ̄ŋndē ndɔ̄le̍ŋ ni᷄ŋ.”

²⁹“Ndu̍yɛ̍ tē te̍le̍ŋ kpe̍e̍kpe̍i̍ Mɛ̄lɛ̄ka̍ kɛ̄ɛ̄si̍a̍a̍ wo̍ ō fūūlu̍u̍ pɛ̍, māsā bɛ̍ndōo̍ Si̍i̍līāā o̍ cho̍ vɛ̄lɛ̄ lākɔ̄ māsā bɛ̍ndōo̍ I̍chi̍pī dēlɔ̄ɔ̄ chōo̍ a̍ sɔ̍ŋgɔ̄ɔ̍. Kɛ̍ nyɛ̍ yɔ̍nūŋ ni̍ŋ ndo̍, ō ve᷅m lɛ̍ ni̍ŋ māā pāāndū le̍.

³⁰Lu̍o̍ma᷅ŋnda̍ chō hūnɔ̄ɔ̄ o̍ dɛ̄ndɛ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ ni᷄ŋ, fūlāa̍ bā pāa̍le̍ŋ lē dēllo̍ mā hu᷄ŋ chi᷅ŋa̍la᷅ŋ ma̍sā bɛ̍ndōo̍ Si̍i̍līāā.” “O̍ ko̍ŋ, mī māsā bɛ̍ndōo̍ Si̍i̍līāā o̍ ta̍mbu̍ kɔ̄llo̍, mbō mīīŋgu̍ o̍ lɛ̄ŋndē ndɔ̄le̍ŋ ni᷄ŋ, a̍ kɔ̄l tūū kōŋ mbō kɔ̍ tīsa̍ wānāa̍ chɛ̍l le̍ ma̍ wa̍ o̍ kpe̍ma̍ Mɛ̄lɛ̄ka̍a̍ bɛ̄ŋgu̍ wa̍ chōo̍. Kɛ̍ wānāa̍ fu̍la̍ŋ o̍ kpe̍ma̍ Mɛ̄lɛ̄ka̍a̍ bɛ̄ŋgu̍ wa̍ nda̍ nda̍, mbō chē ka̍ŋ nyīnā, ō yɔ᷅ŋ nda̍ ni̍ŋ nyɛ̄ le̍.

³¹Ō chō so̍vɛ̄i̍ya̍a̍ ndūa̍a̍ yɔ̄ŋgū mā kɔ̍ to̍sā sɔ̄ɔ̍ŋ nɔ̍ɔ̍lɛ̍i̍yo̍ŋ o̍ chīɛ̍i̍ Mɛ̄lɛ̄ka̍a̍ ni᷄ŋ. Sa̍lālā wāŋnda̍ hūŋ so̍līo̍o̍ o̍ chīɛ̍i̍ Mɛ̄lɛ̄ka̍a̍ ho̍ō ni᷄ŋ lēpāla̍ o̍ lēpāla̍ la̍ŋ mbō kūūna̍ la̍ŋ. O̍ ko̍ŋ kɔ̍ɔ̍lī, mbō tōsa̍ mī wāŋnda̍ wa̍ sɔ̄ɔ̍ŋ wɔ̍ɔ̍ŋ wɔ̄ɔ̍ŋ tɛ̍ɛ̍mbūū chi̍ɛ̍i̍ Mɛ̄lɛ̄ka̍a̍ mī ŋ̄ sōli̍ ndu̍ o̍ ba̍a̍ ni᷄ŋ ndo̍ŋ tōsāa̍ o̍ chīɛ̍i̍ Mɛ̄lɛ̄ka̍a̍ ho̍ō ni᷄ŋ.

³²Māsā bɛ̍ndōo̍ Si̍i̍līāā o̍ cho̍ wānāa̍ fu̍la̍ŋ o̍ kpe̍ma̍ Mɛ̄lɛ̄ka̍a̍ bɛ̄ŋgu̍ wa̍ hūnɔ̄ɔ̄ hūī a̍ sōndō yēēlɛ̍i̍yo̍, mbō tōsa̍ mā hīōūnu᷄ŋ ndu̍ kɔ̄ɔ̄lī. Kɛ̍ wānāa̍ yɔ̍ŋgu̍ŋ o̍ Mɛ̄lɛ̄ka̍a̍ ndāa̍ lo̍ wa̍ nda̍ nda̍, ā chō māsā bɛ̍ndōo̍ ho̍ō dīōm kɛ̄ɛ̄, mā sīmu̍l ndu̍ o̍ nyɛ̄ o̍ nyɛ̄ ni᷄ŋ.

³³Ndu̍yɛ̍ wānāa̍ nɔ̍ tāāsi̍o̍o̍ wa̍, ā chō wānāā ka̍ ka̍ hu̍nɔ̄ɔ̄ ma̍lā mā sɔ̄la̍ sīnā pɛ̄ŋgo̍o̍. Kɛ̍ tē te̍le̍ŋ ti̍ŋ hīōū pɛ̍, ā chō tōōsīāā ha̍ā dīū ā ti᷄ŋ a̍ mūɛ̄ī fāŋnde̍, ā ti᷄ŋ mā lōm nda̍, ā ti᷄ŋ mā pūŋga̍ nyɛ̄m nda᷄ŋ, ā ti᷄ŋ mā bīī nda̍ mā kɔ̍ dɔ̍ū nda̍ o̍ chīɛ̄ī mānyūmndo̍ ni᷄ŋ le̍ pālɛ̍i̍ ī ti᷄ŋ.

³⁴Ndu̍yɛ̍, ā te̍le̍ŋ nda̍ chō wa̍ wānāa̍ Mɛ̄lɛ̄ka̍a̍ dīūwo̍ wo̍, wānāa̍ Mɛ̄lɛ̄ka̍a̍ ā sɔ̍lā ni̍ŋ ma̍lā bɔ̄ɔ̍ le̍. Ndu̍yɛ̍, wānāa̍ cho̍ wa̍nāa̍ Mɛ̄lɛ̄ka̍ le̍ wa̍, ā bɔ̄ɔ̍ bɔ̍ɔ̍ ā chō hūnɔ̄ɔ̄ wānāa̍ Mɛ̄lɛ̄ka̍a̍ ha̍ā lūɛ̄īyɔ̄ɔ̄ tɛ̄ɛ̄ŋ a̍ kāŋgālāa̍.

³⁵Kɛ̍ wānāa̍ nɔ̍ ha̍ā tāāsi̍o̍o̍ wa̍, ā chō hūnɔ̄ɔ̄ ā ti᷄ŋ dīū, le̍ mbō lo̍ o̍ ko̍ŋ mī Mɛ̄lɛ̄ka̍ tōsa̍ mī ā tūa̍a̍ ā wa̍ ā dīāndāā ndu̍ Mɛ̍lɛ̄ka̍ pi̍la̍ o̍ hɔ̄l, ndu̍yɛ̍ mbō chɛ᷄l nda̍ māā ā chō wānāā bɛ̄ndāā ndu̍ Mɛ̄lɛ̄ka̍ o̍ hɔ̄l, ha̍a̍a̍ mbō fūūlu̍u̍ o̍ mɛ̄ɛ̄lu̍la̍ŋ a̍ te̍le̍ŋ ndu̍ Mɛ̄lɛ̄ka̍ pi̍la̍ kɛ̄ɛ̄si̍a̍a̍ wo̍.”

³⁶“Māsā bɛ̍ndōo̍ Si̍i̍līāā ō chō wā nyɛ̄ o̍ hɛ̍na̍ŋndo̍ tōsāa̍. Ō chō wā sɔ̄ɔ̍ŋ tōsāa̍ a̍ yōŋgā, ndu̍yɛ̍ mbō chūāŋnu̍ŋ o̍ bɛ̍ndū māā ō nɔ̄ kpāāyāa̍ mbo̍ hīāū nyɛ̄ o̍ nyɛ̄ chēle̍ŋ wāŋnda̍ sōōlūū māā mɛ̄lɛ̄ka̍ā nda̍. Ndu̍yɛ̍ ō chō wā dīōmndā wɔ̄ɔ̍ŋnda̍ŋ dīmīo̍o̍ a̍ Mɛ̄lɛ̄ka̍ wāŋnda̍ I̍sɔ̄lūɛ̄ī a̍ pi̍ɛ̍īyo̍, Mɛ̄lɛ̄ka̍ kpu̍lu̍ŋgūma̍ bɛ̄ndōo̍. Ndu̍yɛ̍, ō chō lō o̍ kpāāya̍ ndɔ̄ ko̍ŋ chōo̍ ha̍a̍a̍, mī te̍le̍ŋ Mɛ̄lɛ̄ka̍ tūsī ndu̍ ni̍ŋ nyɛ̍ pālāa̍ chōo̍ wo̍ ō fūūlu̍u̍. O̍ ko̍ŋ, mī nyɛ̄ Mɛ̄lɛ̄ka̍ kɛ̄ɛ̄si̍a̍a̍ le̍ yɔ̄nɔ᷄ŋndo̍ wo̍ o̍ yɔ̄nu̍ŋ.

³⁷Māsāa̍ ho̍ō nyɛ̄m fi̍nyāā ndūāā ma̍māa̍ nda̍ a̍a̍ so̍o̍lūū māā mɛ̄lɛ̄ka̍ā ndā wo̍ŋ, ō chu̍ē ni̍ŋ mu̍ŋ nyɛ̄ o̍ nyɛ̄ le̍. Ndu̍yɛ̍ ō wāŋnda̍ sōōlūū māā mɛ̄lɛ̄ka̍ nda̍, mi̍ wāŋ lāāndūa̍a̍ ā kāālā ndu̍ kāālā bɛ̄ndōo̍ wo̍ bɛ̍ɛ̍, ō chu̍ē ni̍ŋ ko̍ŋ nyɛ̄ o̍ nyɛ̄ le̍. Ō chō chūānɔ᷄ŋ māā ō chō ō bɛ̄ndū mbo̍ hīāū nyɛ̄ o̍ nyɛ̄ wāŋnda̍ so̍o̍lūū māā mɛ̄lɛ̄ka̍ nda̍.

³⁸Māsāa̍ ho̍ō yɔ̄ŋi̍ o̍ so̍o̍lu̍u̍ mɛ̍lɛ̄ka̍a̍ ha̍ā yɛ̍, mbō mūli̍ŋ mɛ̄lɛ̄ka̍ nda̍ lāāla̍ŋ māā ndu̍ ma̍ndā chi̍e̍e̍ŋ bɛ̍ndu᷄ŋ cho̍ ŋ̄ bālāā a̍ kpākīla̍ ka̍lā ka̍lāla̍ŋ ndo̍ sōōlūūwo̍, mɛ̄lɛ̄ka̍ fi̍nyāā ndūāā ma̍māa̍ nda̍ a̍a̍ si̍nā bɛ̍ɛ̍ le̍ wo̍. Mɛ̄lɛ̄ka̍ kōŋ māsā bɛ̍ndōo̍ ho̍ō ō chō wā ko̍o̍līi̍yo̍ŋ, a̍ ka̍ni᷄ŋ hu̍mbo᷄ŋ, a̍ pōūtā ba̍ā kālāla̍ŋ, a̍ nyɛ̍m ba̍ā kālāŋ chēle̍ŋndo̍ŋ kīo̍o̍ ni̍.

³⁹Māsāa̍ ho̍ō, mɛ̄lɛ̄ka̍ ndɔ̄ che᷅le̍ŋ o̍ cho̍ ko̍ŋ wa᷅ sōōlūūwo̍ wo̍, mɛ̄lɛ̄ka̍ ndɔ̄ ko̍ŋ ō cho̍ ndu̍ mālā mbō sīmu̍l chi̍e̍e̍ŋ cho̍ ŋ̄ bālāā a̍ kpākīla̍ ka̍lā ka̍lā la̍ŋ ndo̍ŋ. Ndu̍yɛ̍ wānā o̍ wāna̍ chɛ̍l māsāa̍ ho̍ō o̍ lēmāsā pɛ̍, ō ke̍ wānā ko̍ŋ fo̍ndāŋ kpe̍e̍kpe̍i̍yo̍ o̍ māsāle̍ ndɔ̄le̍ŋ ni᷄ŋ. Mbō sīīŋgu̍u̍ wānā ko̍ŋ māsāa̍ o̍ māsāle̍ ndɔ̄le̍ŋ ni᷄ŋ, ndu̍yɛ̍ mbō ke̍ wāna̍ ko̍ŋ lɛ̄ŋnde̍ ndɔ̄le̍ŋ lē ti᷄ŋ māā fāndā.”

⁴⁰“O̍ ko̍ŋ kɔ̍ɔ̍lī, tē bōōndi̍i̍ kpe̍e̍kpe̍i̍ Mɛ̄lɛ̄ka̍ kɛ̄ɛ̄sīa̍a̍ ve̍ ī fūūlu̍u̍ pɛ̍, māsā bɛ̍ndōo̍ Si̍i̍līāā o̍ cho̍ hūnɔ̄ɔ̄ māsā bɛ̍ndōo̍ I̍chi̍pi̍ dēlɔ̄ɔ̄ chōo̍ a̍ sɔ̍ŋgɔ̄ɔ̍ o̍ lɛ̄ŋndē ndɔ̄le̍ŋ ni᷄ŋ. Kɛ̍ mī māsā bɛ̍ndōo̍ I̍chi̍pī o̍ chu̍a̍ nyɛ̄lā ndɔ̄la̍ nyāāna᷄ŋnda̍ su̍a̍a̍ ō nāŋ nda̍ŋ, a̍ pūa̍a̍ sɔ̍ŋgā o̍ su̍a̍a̍ chɔ̄ūwa̍ chōo̍ wa̍, a̍ dɛ̄ndɛ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ ta̍u̍, mbō hīnu̍l māsāa̍ Si̍i̍līāā a̍ kpāāyā bɛ̍ndōo̍ mɛ̄ɛ̍ hūēīyīī bɛ̄ndūe̍i̍ ī hūŋ nu̍a̍ā yɛ̍. Ndu̍yɛ̍ māsā bɛ̍ndōo̍ I̍chi̍pī o̍ cho̍ lūɛ̄īyɔ̄ɔ̄ o̍ lɛ̄ŋīī fāŋgā fa̍ŋgā ni᷄ŋ su̍lūlū mɛ̄ɛ̍ mɛ̄ŋmā hūna᷄ŋ mā hūŋ nu̍a̍ā a̍ kpāāyā bɛ̍ndōo̍ yɛ̍.

⁴¹Ndu̍yɛ̍ lɛ̄ŋndē I̍sɔ̄lūɛ̍i̍le̍ŋ bɛ̍ɛ̍ ō chō le̍ŋ chīŋa̍la᷅ŋ a̍ sɔ̍ŋgɔ̍ɔ̍. Ō dīū ni̍ŋ wa᷅ŋnda̍ o̍ lɛ̄ŋnde̍ ni̍ŋ wāa̍la̍ŋ o̍ tɔ̍ tɔ̍la̍ŋ ni᷄ŋ. Kɛ̍ lɛ̄ŋnde̍ he̍ī ndi̍ i̍ cho̍ hīɔ̄lɔ᷄ŋ, ndi̍ yɔ̍nūŋ ni̍ māā I̍dɔ̄m a̍ Mo̍wa̍bī, a̍ wānāa̍ cho̍ wāŋnda̍ chīla̍ŋ o̍ lɛ̄ŋnde̍ A̍mɔ̄ŋnde̍ŋ ni᷄ŋ nda̍, mā nyāānu̍ŋ.

⁴²Māsā bɛ̍ndōo̍ Si̍i̍līāā o̍ cho̍ hūnɔ̄ɔ̄ lɛ̍ŋīī ka̍ ka̍ de̍lɔ̄ɔ̄ chōo̍ a̍ sɔ̍ŋgɔ̄ɔ̍, ndu̍yɛ̍ I̍chi̍pī bɛ̍ɛ̍ ō he̍lūŋ ni̍ŋ te̍.

⁴³Su᷅lta̍ŋ I̍chi̍pī kpo̍u̍ lā chō ndu̍ wā o̍ bā bɛ̄ŋgu̍, ŋ̄ko̍o̍līi̍ ni̍, ka̍ni᷄ŋ hu̍mbū ni̍, a̍ nyɛ̄ o̍ nyɛ̄ cho̍ nyɛ̄ kɛ̄ndɛ̄. O̍ ko̍ŋ kɔ̍ɔ̍lī, mbō de᷄l vɛ̄lɛ̄ lɛ̄ŋndē Li̍bīāāle̍ŋ chōo̍ a̍ sɔ̍ŋgɔ̄ɔ̍, a̍ lɛ̄ŋndē Īto̍o̍pīāāle̍ŋ, mbō bīī ndi̍ a̍ kpāāyā.

⁴⁴Kɛ̍ māsā bɛ̍ndōo̍ Si̍i̍līāā, yōōŋgūla̍ cho̍ wā fūlāa̍ bā pāa̍le̍ŋ lē chāŋndo̍ la̍ŋ, a̍ la̍ cho̍ wā fūlāa̍ bā lūāŋndo̍ la̍ŋ, lā chō tōsā mbō dɔ̄ɔ̄nu᷄ŋ yo̍lɛ̄i̍ ī kālā ka̍lā, mbō dīu̍ wānāā fāŋgā fa̍ŋgā.

⁴⁵Tē he̍ī ī hīōū pɛ̍, māsā bɛ̍ndōo̍ Si̍i̍līāā o̍ cho̍ Tɛ̍ndīi̍ ndɔ̍ lēmāsāa̍ sīmī Pēe̍ Mɛ̄ŋmā Īhɛ᷄llo̍ tɛ̄ɛ̄ŋ a̍ pēmbēi̍ Chūlu̍sɛ̄lɛ̄m, pēmbīī chīɛ̍i̍ Mɛ̄lɛ̄ka̍a̍ chō ō tāŋgūlāā lēchōo̍ ve̍. O̍ ko̍ŋ, wānā o̍ wānā ve᷅m lɛ̍ ni̍ŋ le̍ ndu̍ mālā le̍, mbō sɔ̄la̍ pīɔ̍mndo̍.”